Oppdatering, kanskje?

Hei! Det er visst ikkje så ofte eg er innom og oppdaterer. Men det er jo fordi det skjer så mykje IRL.

Forrige innlegg avslutta eg med å fortelle at kronprinsparet skulle kome på besøk dagen etter. Det vart ein kjempedag! Eg var svært stolt av Musikanten min, som spelte nydeleg på trompet, heilt åleine på scena. I tillegg var begge jentene med, den eldste med skulen, den yngste saman med dei eldste i barnehagen. Det var rett og slett ei fin stund.
Bildeserie i Vikebladet.

Etter at eg hadde fått av bunaden og rydda vekk bunadsølvet, måtte eg pakke for kortur til Trondheim. For rett etter jobb fredag gjekk vi i Hareid kammerkor ombord i ferja, og på andre sida stod bussen klar og venta. Det er kos å køyre buss ilag med andre, og dei tre yngste damene i koret sat heilt bak i bussen og strikka mesteparten av vegen:) Kjekt!

Trondheim er ein fin by, heldigvis hadde vi sol og varme:) Den store streiken i kommune og stat var ganske ny enno, så det var ikkje mykje søppel å sjå heller. Det vart verre etter at vi reiste...


Vi budde på Rica Nidelven, som fleire gongar har fått pris for Norges beste frukost. Det er nok med rette, for vi kosa oss med eit enormt utval og svært høg service. Trur at eg kjem tilbake, ja.


Hareid kammerkor song i gudstenesta i Nidarosdomen 1.pinsedag. Det var ei flott oppleving. Men det var kanskje enda flottare å synge i Vår Frue kirke søndag kveld. Det er fantastisk klang i slike gamle steinkirker!

Her er bilete frå Nidarosdomen etter gudstenesta, og under frå konserten om kvelden. Det var faktisk ein god del menneske der, og vi sette sjølvsagt stor pris på å ha publikum:) Ikkje alle var kjenningar heller...

Det var fint å reise heim att også. For Musikanten min kom heim medan eg var borte, og han hadde med kjærasten sin også. Det aller fyrste besøket hos "svigerforeldra" var sikkert skummelt. Men for ei flott jente! Både på utsida og innsida:) Jentene vart glade i henne med ein gong, det var tydeleg.

Håper du kjem att snart, Julia!!

Cantus på besøk:)

For ein dag:)

Etter ein rask vinter i går, vart det heldigvis ein strålande vårdag i dag. Vi har sykla på tur til Brandal og endeleg besøkt retrokafeen Flo og Fjøre. Det er ei lita perle, og eg kan gjerne anbefale dei som er i lokalområdet å svinge innom. I dag var det koseleg å site utanfor i sola med kaffe og te, og vi kunne ha kjøpt heimebaka kaker om vi hadde lyst til det. Og dei hadde til og med potetball til middag! Det er ikkje plass til mange gjestar på ein gong, men det er så sjarmerande:)

I kveld har eg vore med på ei stor musikalsk oppleving: Konsert med Cantus, Jan Magne Førde og Hareid kammerkor. Cantus er eit damekor frå Trondheim, dirigenten deira heiter Tove Ramlo-Ystad og er kjent for Hareid kammerkor frå før.
Vi, som mange andre, har leigd henne inn til øvingshelgar, for ho er ei av dei ypperste kordirigentane i landet. Vi skulle gjerne hatt henne på besøk igjen, ho er så levande, engasjerande og spennande:) Jan Magne Førde var også med, og Cantus song fleire songar han har laga, der han også bidrog sterkt på flygelhorn.

Heldige oss fekk synge ilag med Cantus på to songar, deriblant Bruremarsj av Jan Magne Førde. Herlig å vere med på slikt!

 
 Her er eit klipp der Cantus framfører Safari, skrive av JM Førde. Kult:)

Vi i kammerkoret når ikkje opp til knea på dei andre på denne konserten, men vi får prøve å sjå på at vi har vore deltakarar i ein flott konsert:)
Heimesida til Cantus kan gje deg meir informasjon!

Ein nydelig liten song

Denne er berre nydeleg. Den får fram tårene hos meg, i alle fall! Men det skal ikkje så mykje til for tida. Tårene ligg visst langt framme. Slik kan livet også vere. Av og til er det einaste ein kan gjere å felle ei tåre, tørke den bort og gå vidare.

Hysterisk morsom:)

No har eg fått heim Musikanten min til jul, og då blir det brått litt musikalsk humor her i heimen. Noko av det fyrste han gjorde då han kom heim, var å spele denne videosnutten. Eg syns det er fantastisk morsomt, og eg reknar med at andre kanskje er enige med meg. I alle fall om dokke er musikalske....


Denne er musikalsk på eit litt høgare nivå enn jenta i forrige innlegg, men den er likevel litt på linje;)

Juleverkstad:)

I dag har eg ein fin dag! Det er juleverkstad på ungdomsskulen, og før lunsj stod eg ilag med nokre andre og rørte i grautgrytene. Enkel og grei jobb, ja... Skal vel innrømme at det var bittelitt kjedeleg etterkvart, men det vart god graut! Og ingen av dei store grytene vart svidde:)

Etter lunsj er det nye grupper, elevane har meldt seg på ulike aktivitetar og alle byttar midt på dag. Så no sit eg ved ein pc, ved sidan av elevar som skal lage julekort på pc. Medan elevane arbeider, høyrer vi (og dei) julemusikk og skravlar. Det er ikkje så dumt, dette her....

Eg kunne gjerne vore på ei av dei andre gruppene, for eksempel dei som lagar marsipan, eller strikkar, eller er på sløyden. Noko av det mest populære er ballspel i hallen, eller styrketrening på Aktivsenteret. Gode alternativ for mange elevar:)

Eg vil gjerne dele litt av stemninga med dokke:

Ein av dei nye, nydelege julesongane!

Denne har vi hatt på barneskulen nokre år, og eg har hatt gåsehud og klump i halsen mange gongar. Det er ei så utrulig vakker tekst! Og så er jo melodien også fin, da...

Eg kjenner at eg stressar ein del no i førjulstida, men prøver å la roa senke seg innimellom. Då er det ei god hjelp å ha julemusikken:)

Årets fyrste, men ikkje den siste!

For ei helg!!

Dette har vore litt av ei helg!

Fredag var vi på konsert med Sissel Kyrkjebø. Laurdag var eg på stemnefest, ei 4 timar lang kulturmønstring av store dimensjonar. Og i dag song vi på festgudsteneste, før eg gjekk med innsamlingsbøsse for tv-aksjonen.

Stemnefest? Pussige greier, kanskje? Ikkje her:) Det er den femtiande gongen, faktisk. 50årsjubileum er vel verdt ei skikkeleg markering. Omtrent 700-800 menneske samla!
No er det ikkje uvanleg at det er mykje godt program på Hareidsstemna, det må eg seie. Det har vore ein presentasjon av både lokale og nasjonale storheiter.

Vi kan nemne Strings Unlimited, Ytre Suløen Jazzensemble, festtale ved pensjonert biskop Gunnar Stålsett, ballett, solosong, 5 kor, skuleelevar med nydeleg song... Og så ein god matpause med muligheit til å skravle med andre.

Sunnmørsposten har laga ei bildeserie frå festen. Eg har ei utfordring: Gjett kva kor eg er med i? (du ser kanskje at eg og systra mi har bunad...)

Dersom du ikkje veit kva Strings Unlimited driv med, kan du få ein snutt her:)

Fantastisk konsert:)

Sissel Kyrkjebø er ei dame med lang fartstid. Denne helga hadde ho teke turen til vesle Hareid, og det slo an. Minst 1000 tilhøyrarar var på plass, og eg stilte med begge jentene på slep;) Gubben og eg var enige om at dette var ein konsert vi gjerne ville ha med oss, og barnevaktene hadde store planar om å vere på same konserten. Dermed fekk dei to små vere med, utstyrte med drikke og godteri. Minstemor sovna mot slutten, då var det litt for seint for henne....

Det vart eit fryktelig ver ute i kveld, så ho våkna då ho kom ut i vinden. Før ho slokna i senga si, sa ho at ho likte veldig godt då Sissel song Velkommen hjem. Det er eg enig med henne i, det er ein nydeleg song! Og eg kan gjerne dedikere den til Musikanten min. Vi saknar deg!

Megasuperkulturell, ja!

No er vi i gong igjen på Hareid. Det er standard kvar haust, veke 43 er fullspekka av konsertar og anna kulturelt program. I dag var eg med på konsert ilag med koret mitt, Hareid kammerkor. Vi fekk vere med på Hjørungavåg Brass sin konsert, på eit bestillingsverk av Odd-Arve Hjørungdal.

I år det Hareidsstemne nr 50, det er ikkje verst, kva? Innhaldet har nok endra seg ein smule gjennom åra, og det som i starten var ei feiring av korsongen i bygda, har vakse seg langt større. No er det vanleg med ein storkonsert med aktørar som er kjende både innanlands og gjerne utanlands. Fredag kjem Sissel Kyrkjebø, men fram til den konserten skal vi ha med oss mykje anna.

Eg er høgt oppe etter å ha vore med på å framføre bestillingsverket i dag. Det var lokale diktarar som leverte tekstene, komponisten er utflytta sambygding, og i tillegg hadde vi gleda av å nyte operasolistane Charlotte Fongen og Magne Fremmerlid.

Det var ein fantastisk kveld, og resten av veka blir det meir:)

Han er lang, vinter`n, men ikkje evig!

Det var ein liten nedtur at vinteren kom tilbake her i havgapet. I dag er det kvitt ute igjen, og vi som venta på våren... Men eg vart så varm innvendig då eg høyrde Halvdan Sivertsen synge denne på radioen ein dag.

Teksta er rett og slett nydeleg. Og vi treng litt optimisme medan vi lengtar mot våren:)

Sakte nedtrapping er vesentleg

Songen er vel ein god måte å trappe ned etter VM i Oslo.

Fix you

When you try your best, but you don't succeed
When you get what you want, but not what you need
When you feel so tired, but you can't sleep
Stuck in reverse

And the tears come streaming down your face
When you lose something you can't replace
When you love someone, but it goes to waste
Could it be worse?

Lights will guide you home
And ignite your bones
And I will try to fix you

And high up above or down below
When you're too in love to let it go
But if you never try you'll never know
Just what you're worth
Det er litt meir tekst, men eg tek med berre starten. Ein nydeleg song!

Når 8.klassegutar sender lappar i timen

Eg jobbar på fleire skular i kommunen, inkludert litt på ungdomsskulen. Der kjenner eg mange av elevane frå då dei var elevar på barneskulen "min".

Her ein dag fekk eg ein lapp av ein gut i 8.klasse. Det skjer ikkje ofte;) Så då eg las at han hadde gjeve meg eit tips til noko å leite opp på youtube, måtte eg sjølvsagt sjekke. Det angrar eg ikkje på.

Eg limer inn den teksta versjonen også, her er teksta så vesentleg at eg vil at du skal få den med som støtte i lyttinga. Nydeleg song, med eit tema som dessverre er viktig.

2.søndag i advent med den nydelegaste julesongen som fins

Eg er så glad i denne: Deilig er jorden, her med Sissel Kyrkjebø.
Det er kjekt å ha sin eigen adventskalender, og eg vert stadig mållaus over dei flotte pakkane eg får! I går fekk eg ein eplepyjamas;) Eller noko slikt. For berre eit par dagar sidan, prøvde eg å forklare til ein kollega korleis dette skulle fungere. Eg har aldri prøvd å strikke ein slik, men no slepp eg;) Og dessuten fekk eg oppskrifta om eg skulle få lyst på fleire!
I dag fekk eg oppskrifta på ei kake med krydder, og sjølvsagt sender Briti med krydder også;) I tillegg til ei lita sølvbjelle som kanskje kan henge på treet, eller halde på plass eit bordkort.

Eg har strikka ei lue til. Bombe! Denne er strikka i Sterk, eit mjukt og varmt garn. To rett og to vrang. Enkelt og greitt. Kanskje til ein mann??

2.desember

Sjå, så søt! Pakken min frå Briti i dag inneheldt ei nydeleg lita notisbok, som skal hjelpe mor med alt som skal planleggast fram mot jul. Godt tenkt:)

Eg er veldig glad i julesongar, nye og gamle, norske og utanlandske. I dag må eg minne gjestane mine om ein nydeleg song: Himmel på jord, her er ein versjon med Maria Arredondo.

Eg skal på konsert:)

Eg skal berre ta på meg nyekjolen, og så skal eg på konsert med vokalgruppa PUST. Berre nyt!

Grand Prix-fest:)

Som eg nemnde i går: Det var blåtur i går, stort sett heile dagen. Eg kan endeleg fortelle kvar vi var....

Som alle blåturar er det innlagt nokre "lurestopp" og andre finter for at det skal vere vanskeleg å gjette kvar vi skal. Men hovudstoppen vår var på Hide i Gjerdsvika, der Veronica Sundgot Hide driv Hide gard og glasdesign. Ein fantastisk kreativ plass å legge eit besøk! Det er mogleg å reise dit med ein gjeng og lage glaskunst, og sjøl om vi var mange klarte ho å få det til å fungere. Vi strekte nok grensene for kva som var behageleg for vertinna, men det gjekk supert! Ommøblering til seint på natt kvelden før måtte visst til!

Vi hadde med dei fyrste mennene som nokon gong har vore der, og det var ein suksess. Sjølv kjende eg litt på ein mangel på ide eller mangel på kreativitet i starten, men jammen vart det lettare etterkvart! Alle kosa seg, og alle er spente på å sjå resultatet etter brenning. Denne teknikken heiter visst fusing, eller noko slikt...
Eg laga ein blank og blå engel, og ser med stor spenning fram til å sjå den igjen:)

Etter nokre innlagde "sportsleikar" av typen hoppetau og potetløp, enda vi hos ein kollega der vi hadde kinamat og Grand Prix-fest. Det var ein morsom kveld, og vi gjorde det skikkeleg, med skjema og poenggjeving.

Som god nordmann likte eg Didrik sin My heart is yours. Men eg kom etterkvart til at Lena frå Tyskland var ein eg kunne like. Så eg følte at kvelden var bra!

Musikanten min kom bak meg no og sa: Romania sin va bedre! Så då må eg legge inn den også, så kan folket vurdere:)

16.mai er vi så glad i:)

Eg tek ei lita oppsummering før den stooore dagen:)
Eg er mett og god etter ein nydeleg lasagne, med salat og varme rundstykke. Rømmegrauten er kokt i dag, den står i kjøleskapet klar til oppvarming, eg fann ut at det er enklare å koke og herje utan bunad... Fire bunadskjorter er strokne, eg overlevde i år også. Gele med vaniljesaus er ferdig. Fana til barnehagen til minstemor er på plass, eg er med i samarbeidsutvalet og fekk den store æra å ta med fana til toget i morgon.

Gubben har vore på jobb i dag, for 17.maikomiteen. Dei har pynta med bjørk her og der, pynta i hallen, ordna dei siste detaljane og gjort dei siste avtalane før morgondagen.

Men i går skulle du ha vore her! Alle dei tre skulekorpsa i kommunen var ute og marsjerte. Dei var til og med forsterka med musikantane frå dei to vaksenkorpsa. Til saman vart det rett og slett mykje liv, mykje lyd, smil og glede over heile fjøla.

Dei gjekk ei runde i sentrum, og så enda dei i den grøne lunga vår i sentrum, Åsendalen. Der stilte Hareid skulekorps med sal av sveler, kaker, kaffe og sjølvsagt lodd. Alle skulle levere to gevinstar, og eg var lur og leverte nokre fleire. Eg tok eit raid i kassa med diverse strikkeprodukt, og leverte frå meg luer, panneband, pulsvarmarar... Godt å få litt sirkulasjon! Men eg gløymde å sjå etter kva prinsessa tok med seg... Så eit sett med calorimetry og pulsvarmarar vart nesten med heim. Eg løyste det med å gje settet vidare til svigermor, så kan ho lodde det ut på basar fram mot jul;)

Tenk så kjekt det er å spele i eit så stort korps! Dei avslutta med 4-5 fellesnummer, og det var verkeleg flott!

Man tager...

Man tager ein note. For eksempel ei messe av Schubert. Rist saman to kor, eit symfoniorkester og nokre solistar. Putt alt saman i ei kyrkje. For eksempel Volda kyrkje.
Ein kjend dirigent varmar opp blandinga, rører og krydrar. Server ein laurdag kveld i samband med Sunnmøre Kammermusikkfestival.

Meir om dei ulike deltakarane på kammermusikkfestivalen kan du finne på artistlista.

Og så kan eg vel nemne at vi har øvd mykje, og eg trur resultatet vart bra. Det er stas å synge i store kor, sjølv om dirigenten stort sett ville ha det svaaaakt heile tida;)Neida, det var lov å synge med litt meir styrke av og til!

Berre ein liten ekstra detalj:) Det er noko heilt spesielt med å site i ei kyrkje og høyre 300 år gammal musikk for strykarar og cembalo. Lyden er rett og slett ulik alt anna!
En Cembalo (uttales: tsjembalo) er et strengeinstrument med klaviatur, selve cembaloen ligner i formen et piano. Instrumentet ble særlig brukt i barokken. En person som spiller cembalo kalles cembalist.

Instrumentet virker som et piano, bortsett fra at en mekanisme gjør at strengene plukkes istedenfor å slås på. Særegent for cembaloet er at tonestyrken ikke kan endres ved anslaget på tangenten.
Tusen takk, Wikipedia:)