Varmekjelder

Eg har strikka jamt i det siste, om ikkje i så store mengder... Men noko blir det jo! No har eg to halsar og ei lue å presentere:)
Lua er frå garnstudio, og du kan finne oppskrifta på Florence der. Eg brukte ikkje rett garn, for eg hadde alt strikka ein slags hals, og ville ha ei lue til. Dermed vart lua litt lita til meg, men så er det jo mange som har mindre hovud enn meg her i verda! Garnet er Drops Extra fine merino, og det gjekk ganske nøyaktig eit nøste til lua.

Under ser du halsane eg har strikka. Dei to er like, men blir ganske ulike i uttrykket når garnet er så ulikt.
Den blå er strikka i Sulka, eit deilig garn! Det brune er altså Extra fine merino, som lua. Eg ser at det er ganske stor fargeforskjell mellom dei ulike bileta, men det er altså eitt brunt og eitt blått eksemplar:)

Eg klarer ikkje å finne igjen kvar eg såg denne "halsen" eller sjalet, eller kva eg skal kalle det. Det er så enkelt at eg ikkje trengde å skrive ut eller lagre oppskrifta, og no har eg ikkje kontroll på opphavet lenger... Det er rett og slett ein firkant, starta med 3 masker, auke ei maske i starten av kvar omgong til du har ca 50 masker, og så felle i starten av kvar omgong. Hekle kant rundt om du vil:) Eg laga knapphol i heklekanten.

Desse er perfekte til kalde dagar med litt for utringa overdel! Kneppinga skal vere i nakken, men det kan ein sjølvsagt variere etter ynskje.

Varme til toppen

No er det slutt på haustferien i regionen. Vi har ikkje vore på noko tur, men eg har fått med meg at det har vore snøkaos på vegane både her og der. Jammen godt at vi har vore heime, tenkte eg... Sist helg var det kjempevarmt, fleire stadar var det over 20 grader, så det er ikkje så rart at folk ikkje tenkte på vinterdekk om dei reiste på haustferie då!

Etter den varmen vart det meir regn igjen, så no er blomsterbedet mitt nesten ei rismark. Dersom eg slenger ut litt ris, kan eg sikkert hauste ris der snart?

Jaja, når det går mot vinter, er det kjekt med varme luer og denslags. Her er eit strikka panneband, strikka i dobbel Sterk. Eg strikka til det var passe langt, og sydde saman i endane. Enkelt og greitt:)
Og så vart resten av Sterk-garnet til ei enkel hekla lue. Den er ikkje stor nok til meg, men så er eg stor i hovudet også... På lua starta eg på toppen, hekla stavar rundt og rundt, og auka litt av og til... Det vart ganske bra. Fordelen med å hekle slik, er jo at det er lett å rekke opp att ei runde eller to om det er behov for det!

Topp til Prinsessa mi

Månadens utfordring på Hobbyboden var å strikke ein vest eller tunika. Eg er ikkje sikker på om dette kan vere ein tunika, den er ikkje så veldig lang. Men det er ein vest:) Prinsessa kallar den for ein topp, så då får den heite det.

Garnet er blålilla Angora-Tweed frå Drops. Det er fryktelig som det røytar, eg vaska toppen i eit forsøk på å få vekk det meste av overskotet. No er det for varmt for slike plagg, og det stikk nok ein liten smule. Eg reknar med at dette blir eit plagg for hausten, med ein tynn gensar under.

Oppskrift har eg ikkje. Eg la opp eit passe antal masker, strikka rundt til det var passe langt, og så felte eg av. Deretter hekla eg stavar rundt eit par omgongar, og felte inn litt på vidda samtidig. Så laga eg hol til armane, og heldt fram med å hekle nokre omgongar til. Easy-peasy. Eg kan nemne at eg felte ei maske (hoppa over ein stav) i kvart "hjørne" av armehola, kvar omgong. Slik fekk eg forma toppen litt, og det likna bittelitt på ei raglanfelling. Men ok, mest av alt er det rundfelling, i og med at eg felte litt på dei siste omgongane.

Dersom du syns det er vanskeleg å sjå, kan du klikke på biletet, så blir det litt større på skjermen din:)

Varmt nytt

No har eg nye tøfler på meg:) Desse er strikka av Incawool, og er tova svært, svært forsiktig. Likevel måtte eg strekke dei for å få dei til å passe til meg. Det er varmt og deilig med tova tøfler, og i kveld passar det godt.

Vi er på tur til Bjorli, nesten tilbake til gamle hytteminne. I mange år har vi hatt tilgang til hytte gjennom svigerforeldra mine, men no må vi sjølve leite opp alternativ. Denne helga var det gode tilbod på Bjorligard hotell, så no sit vi i ei ok leiligheit, med stove og to soverom. Eit av særtrekka her er at nesten alle leiligheitene har dør ut frå stova. Praktisk når ein skal bere inn og ut bagasje, vi berre parkerer utanfor og lemper alt rett inn. Men det er ikkje så veldig godt isolert, for å seie det slik. Pakningane er så godt som borte, og då vert det golvkaldt!

Gullungen på 4 år er i full fart omtrent heile tida her. Det er mange born på hotellet denne helga, og ho er ikkje redd for å ta kontakt med andre. No har ho skaffa seg tre bestevenner, og det er jenter ho aldri har sett før... Prinsessa er av ein heilt annan type. Ho tek ikkje kontakt med andre på samme måte, og brukar lang tid på å våge å nærme seg. Heldigvis kan ho slenge seg med veslesøstra av og til;)

Elles er eg ikkje sikker på kva eg har hekla her:
Eg tenkte at det kunne bli eit gryteunderlag, ei hekla rute av restegarn, og så lett tova. Men akkurat då den var ferdig, oppdaga minstemor at den kunne vere eit dokketeppe eller noko slikt.

Eg veit ikkje kva det er. Bruken får avgjere!

Basar!

Jentene mine har vore på basar saman med mormor:) Dei skulle synge saman med barnekoret Fifaliana, men eg var opptatt på anna hald. Så då overtalte eg mormora til å ta med seg jentene på basar på det same bedehuset der ho var på mange basarar då ho var lita jente.

Dei hadde ein hyggeleg kveld på basar, med åresalg og mat, og anna program. Og jentene kom heim med ein haug gevinstar:)Skikkelege raggsokkar i ca størrelse 38 og 30, fire par mohairsokkar eg kjenner att frå supersalg hos Nille i haust, to lys, og hekla pyntegryteklutar.

Men eg har ikkje heilt kontroll med kva den eine gevinsten er... Kven kan kome med tips til kva denne "vesten" er? Eg har to identiske hekla vestar. Dei er opne i sidene, og i nakken er det ei lita hempe til å henge dei opp med. Men skal dei berre henge, eller er det noko meir med dei, mon tru??



Desse tøflene er omtrent passe til meg. Eg får sjå litt an kvar dei endar;)

Wollmeise-småplukk

Eg hadde litt igjen av Wollmeisen min:) Så då vart det eit hekla panneband med eit par pynteknappar, eit hekla armband med massevis av pynteknappar, og eit armband til å surre 5-6 gongar rundt handleddet. Prinsessa gjekk med på å vere modell.

 

Paris-tunika til meg sjølv!

Jepp, eg er endeleg ferdig! Prosjektet vart starta i juli, men fekk ikkje vere med på ferie... Dermed tok det litt tid å få den fullført. Men no er det altså gjort! Kantane er til og med hekla, og det etter oppskrifta;)
Ettersom nokre andre damer på hobbyboden strikka denne før meg, kunne eg lære av deira sine erfaringar. For eksempel at overdelen lett vart for kort i originaloppskrifta. Så eg la til nokre cm etter rillekanten.

Oppskrifta kan du finne på Garnstudio sine sider, for eksempel via denne linken


Det er ikkje heilt enkelt å ta gode bilete av seg sjølv... Men no kan eg ikkje vente lenger med å få vise fram at eg er ferdig heller;)


Syns ikkje den vart så verst, faktisk!

Titt tei:)

I går annonserte eg med brask og bram og høge kneløft at heretter skulle det bli fancy bilete. Så no har eg vel eit lite ansvar for å følge opp....

Her har du siste dagars aktivitet. Ein turkis kjole med sving (minstemor sin definisjon på kjole som svingar rundt når ho snurrar) var i ferd med å bli litt kort. Så no har den rett og slett fått nokre omgangar med hekla kant. Det utgjer ca 5 cm på lengda, og gav enda meir sving. Kan knapt bli betre:)

Eg har brukt opp resten av garnet frå Hemmeleg venn i september. Dette er ein hatt som kan passe til ei av jentene, omtrent. Det er ikkje avgjort kven som skal få den.

Dessuten tok eg med eit bilete av ei av dei mange haglbygene som har frest over bygda siste dagane. Det er spennnende med hagl når ein er inne, litt ubehageleg når ein er ute...

Lurer på å lære meg å hekle granny squares...

Når ein vil lære noko, er nettet ei god hjelp. Berre sjå her, du får så detaljert hjelp at det nesten ikkje er råd å bomme.
Eg legg ut to ulike typer, medan eg gjer ferdig eit panneband og prøver å la vere å starte på noko nytt før det forrige prosjektet er ferdig...

Litt smått og godt:)

Eg har av og til kjole eller skjørt på jobb. Eller tights. Fellesnemnar: Ingen lommer. Det er ein dårleg ide når ein må ha nøklar med seg rundt på skulen. Svaret er oppfunne: Nøkkelsnor. Men eg likar ikkje å gå med dinglande nøklar som skranglar når eg går. Så då måtte eg berre prøve å lage eit anna svar.... Dette er ei bittelita veske, hekla i bambusgarn frå Tyrkia. Reima er lang nok til å bli brukt på skrå over ei skulder. Så då er det berre å sjå om eg likar å bruke denne... Nøkkelen er berre for å vise størrelsen.
Eg har eit lite samanlikningsprosjekt her. Svigermor laga plommesylte, og ho var flittig og skrella plommene og fjerna steinane. Sylta er veldig god, og lys guloransje på farge. Så var det faktisk mykje plommer igjen på treet etterpå, og eg ville teste litt... Mi plommesylte er laga av heile plommer, og så plukka eg ut steinane etter at den hadde kokt ei stund. Ein del skal plukka eg også. Sylta smakar sterkare, men er jammen god likevel. Og sjå forskjellen på fargen!! Plommene er frå det same treet;)


Er vi ikkje heldige som har ei lita kanin å kose med? Trampe likar å vere inne saman med jentene, då vert det mykje kosing. Og dersom det i tillegg vankar litt god mat, er det stas!

Ferieproduksjon

Sjølv om det eigentleg kunne ligge til rette for storproduksjon i ferien, vart det ikkje laga så veldig mykje. Eg slit med eit vondt handledd, og lurer på om det kan vere ein senebetennelse. Dermed har det blitt meir dødtid enn eg likar....

Men eg har laga litt smykke. Her er eit armband i glasperler og sølvperler, på elastisk tråd.
To smykke:


Ein liten restegarnproduksjon: To strikka klutar og ein hekla, her på ei lita bananpalme:)

Nytt sommarsett til ei prinsesse

I dag har eg festa dei siste trådane i overdelen også:)

Eg syns dette settet er så søtt, så eg måtte berre prøve. Eg er ganske stolt av meg sjølv, for no har eg klart å følge ei hekleoppskrift og laga klede!

Oppskrifta fann eg i pt design, hefte 92, trur eg det var:) Det var fleire yndige ting der, så det kan hende det blir meir frå same hefte.
Sjå forresten den kreative snøringa i livet. Denne versjonen vart dekorativ! Og med perler i endane vart det akkurat passe søtt til Prinsessa.

No får vi håpe at sola ikkje er ferdig med å vise seg fram:)

Sommaren er her!

Eg har ikkje heilt ferie, men nokså nær. Det er deilig å jobbe på skulen etter at elevane har gjort seg ferdige;) I morgon skal eg på sykkeltur saman med nokre av "mine" elevar som ikkje har budd i Noreg så lenge. Jammen ein fin aktivitet i strålande sol!

I går var det siste skuledag for elevane. Lærarstanden ved skulen framførte ein kul rap til 7. klassingane, meir eller mindre utkledde. Det slo an:)
5.klassingane har hatt sløyd i år, og på slutten av året laga dei stylter! Og dei vart mala i dei lekraste fargar, for eksempel mintgrøn og rosa... Kanskje litt femi?

I går var det jonsok, og vi besøkte ein svoger med nedlagt løe. Det er greitt å kunne gå inn, dersom det er kaldt. I fjor var det nesten livsnødvendig å ha løa, men i går var det faktisk fint etterkvart.
Eg kan anbefale grilla loff:
Eg blanda persillesmør og kvitløksmør. Dette smurte eg på begge sider av ei loffskive, og grilla raskt, så dei vart sprø, feite og gode. Nam! Enkelt tilbehør, særleg når eg brukte ferdig oppskoren loff og ferdig kryddersmør. Skivene vart ordna på kjøkenet heime, og så var dei klar etter 15 sekund på grillen.

Jentene kosa seg intenst, dei har nok venta på sola og varmen. Grillmat og utekos, det kan vel ikkje bli stort betre...

Eg har strikka og hekla, men ikkje ting eg treng i dag;) Det vart ei strikka lue og eit hekla skjerf, i tynn alpakka. Dette skal i kassa for eventuelle gåver, eller til eg frys på øyrene sjøl!

You can leave your Solhatt on!

Eg har klart å hekle etter oppskrift! Rett nok ganske elementær oppskrift, hentar frå Garnstudio. Men uansett: Eg har laga solhatt til meg sjølv!

Den er hekla av Mandarin Fiesta. Stor og god, til ei dame som er større enn normalen i hovudet....

Hekla sommarlue med paljettar

Jepp, det vart bruk for garnet med paljettar. Dette er ei lue til prinsessa. Etter å ha prøvd ulike versjonar og rekt opp att minst tre gongar, er dette resultatet. Mottakaren er fornøgd, ho fekk velge litt korleis den skulle bli. Det er altså ikkje brukt oppskrift. Garnet er Bomull-Lin, og med paljettgarn som effekt i kanten.

Det skal glitre litt av prinsesser:)

Gode husmødre bakar brød. Eg bakar brød. Ergo...

Er eg ei god husmor?? I går vart det jammen baka 10 brød! Er du like imponert som gubben? Han vart så glad for å få heimebaka brød etter overtid at middagen som skulle varmast vart "gløymt"....

Eg hadde litt garn igjen etter sokkane eg strikka i helga. Så då vart det eit panneband, hekla etter fantasien. Det er litt smalare bak, og med påsydde blomster som eg fekk av ein hemmeleg venn for ganske lenge sidan:)

Dagens nyheiter

Hurra, fjelldag! 2.-4. klasse var på fjelltur i dag, og eg fekk den store ære å vere fremst:) Det var morsomt, i alle fall var det ein langt lettare jobb enn å vere blant dei siste, og måtte hale med seg slitne born som ikkje kan forstå poenget med å surre rundt på fjellet.

Vi gjekk ikkje så langt, vi som gjekk fyrst brukte litt over ein time opp til ein gammal sommarfjøs. Så hadde vi laaaang pause:)

På heimebane har eg brukt opp litt garn. Dette garnet er farga med rødvin, for lenge sidan! Men eg har ikkje kome på noko å bruke det til. Så no måtte eg berre kome på noko... Slik vart det rett og slett garnslanking!

Det vart ein hekla og tova gryteklut. Eg burde ha laga to, men det var tomt for garn!

Det vart nemlig også eit par tøfler, gubben håpte på at dei var til han. Så då er dei det. Modellen her er meg, med assistanse frå minstemor. Ho syns ho også burde få tøfler. Men så er jo det eigentleg standardkommentaren til alt: Ej mæ ha!

Eg har ikkje brukt oppskrift på desse, og garnet er to ulike restar som eg slett ikkje aner kva er. Så dette er eit typisk "bruke opp garnet-prosjekt"

Hekla nett og lue

Her er vi igjen!
Eg hekla desse forrige veke, men har ikkje fått somla meg til å feste trådar før i går kveld. I dag låg lua og veska framme, klare til fotografering. Og så kjem ein fotomodell og melder seg svært frivillig;) Ho måtte ha veske ho også, sjølvsagt!

Veska er ein kombinasjon av fleire teknikkar: Botnen er hakka, for då vert alt så stødig og stabilt. Så hekla eg opp på sidene, med luftmasker og fastmasker.
Dessverre gjekk eg tomt for Tuva garn, så då eg fann ein butikk med garn, måtte eg sjå etter noko som kunne brukast. Eg plukka med meg to nøster Idena Bamboo, og har jo brukt dei. Men eg er ikkje veldig begeistra for garnet. Det er mjukt og godt, men ekkelt å hekle med. Og enda verre var det å feste trådane.

Kombinasjonen brunt og blått er ikkje så dum:)


Neste søndag skal vi vere vertskap på eit matutsalg ved enden av eit vatn her:) Då må vi stille med 6-7 kaker pluss eit fat med sveler. I går laga eg to av dei, dvs eg laga fire, så eg har to sjølv... Nøttebotn med pærer og krem på, det er enkelt og snaddergodt. Og suksessterte er nesten det beste eg veit. Mandelbotn med smør/eggekrem på toppen, nam!!

Den eine av desse vert donert til kafegjestane, den andre skal eg ha i reserve sjølv! Det beste er at begge dei to typene er glutenfrie! Då kan svigerfar få kake neste gong han kjem;)