Expertas en manifestacions

I hai qui diz que todas las opinions son respetables. Que todas podemos opinar sobre qualsequier tema. En l’atro cabo son qui creyen que nomás bellas personas tienen autoridat pa opinar sobre seguntes qué temas en función d’a suya condición (muller, fablant materno, naixiu de tal puesto…) u formación. Tiengo obchecions a todas dos posturas.

¿Dreito a opinar universal? Prou que sí. ¿A que la tuya opinión tienga un peso inchustificau? No pas. Belún dició, charrando d’o periodismo que “si una persona diz que pleve y atra diz que no pas, lo treballo d’un periodista no ye dar-le voz a todas dos: ye ubrir la puta finestra y veyer si ye plevendo”. Pienso que las opinions valen lo fundamento que tiengan y los argumentos de qui las desfiende. Y ixo no pende, necesariament, ni de formación ni de condición. Los titols no valen res quan veyemos la interpretación d’a historia que fa lo doctor Javier Lambán, la d’as luengas d’Aragón d’a filologa Maria Jose Ferrando u la de bell medico antivacunas u pro-homeopatía.

La condición y formación no ye, alavez, una garantía de que la opinión siga millor formada. Ye cabolioso que, por un regular, tendrá mas base los razonamientos de qui ha viviu u s’ha formau en la qüestión que se’n charre que unatra persona que se i acerque dende “difuera”. Se acusa, y con toda la razón, de l’ausencia de personas afectadas y/u expertas en la materia en a-saber-las rufiertas y foros, sobre tot d’os medios de comunicación de masas. Plegando a casos como lo d’o panel sobre la incorporación d’as mullers a los consellos d’administración d’as intepresas a on que no bi heba ni una muller. Ye cutiano que, con cada problema nuevo, todas nos tornemos expertas hidrologas, epidemiologas, vulcanologas u lo que pertoque y ixo incluye a los tertulianos y opinadors profesionals que, por un regular y fablo con conoiximiento de causa, toda la información que tienen sobre lo tema en qüestión lo han leyiu en los diez minutos anteriors a entrar en antena.

Igual que creigo que todas podemos opinar de tot, tamién creigo que sería bueno que, efectivament, en ixas rufiertas que tanto modelan por desgracia las opinions populars, s’haiga de convidar a chent que, a lo menos a priori, sí que sepa d’o que charra. Que d’historia bi haiga prioridat pa que charren las historiadoras, de luenga, las lingüistas, d’educación, lo profesorau, de sciencia, las scientificas y asinas-asinas. Que, repito, no garantiza cosa, pero ye un buen encomience.

Por ixo tamién sería bueno que, quan se charra de conflictos laborals i amaneixese bell sindicalista. Que quan se parla d'una vaga, siga present bella persona que n'haiga viviu una de mas d'un día. Y que quan se charra de manifestacions y d’ixa violencia tant grieu que pareixe estar cremar un sacrosanto contenedor que tien mas protección que los linces, lo patrimonio industrial u las independentistas, dasen la parola a bella persona que haiga estau en una manifestación. No pas una d’as de fer la gambadeta por la ciudat y trobar-te con las compas d’a casa que siga. Una d’as marroneras. D’ixas que arriban los antidisturbios a creyar disturbios, que pa ixo existen.

Siempre que i hai un conflicto u una manifestación d’as que los medios claman violentas trobo a faltar la presencia u lo testimonio en las rufiertas de personas que haigan estau en una d’ixas. De chent que sepa por qué se creman contenedors, por qué s’avientan piedras, areden pneumaticos u se tallan carreteras, quí, cómo y por qué empecipia lo reparto de lapos, lo que pasa con las personas detenidas en publico y d’amagatons, etc. Qualsequier que haiga viviu una d’ixas sabe cómo se viven, cómo se sienten, la rabia por tot lo que pasa adintro y por cómo se cuenta a l’atro día en prensa, radio y tele. No i hai titol que te faiga experto en manifestacions. Ni sisquiá condición, pues a todas nos puet tocar vivir-ne una, d’ixas, si lo delegau d’o gubierno decide ixe día que va a dar eixemplo con la tuya mani. Ye una pura qüestión d’experiencia.

Igual que se demanda que bi haiga expertos con formación en las rufiertas, y me pienso que ye deseyable que siga asinas, tot y no estar garantía de cosa, caldría exichir que qui parle de manifestacions violentas n’haiga viviu una lo menos. En caso contrario, y tornando t’a frase sobre lo periodismo y la plevia, nomás se ye dando voz a qui diz que no pleve entre que difuera i hai firme tronada.

Bicis, informativos y transformacions

Pasó lo día d'as bicis. Una chornada que s'aproveita pa remerar las reivindicacions de qui la femos servir de cutio. S'encertó que teneba la tarde alto u baixo libre pa poder asistir a la manifestación y, tot y que la plevia espantó a buena cosa de chent, nos chuntemos buena clica pa pedaliar por la ciudat. Astí yeran, como en convocatorias anteriors, quantas personas que levan anyos arrienda en l'activismo ciclista compartindo bicifestación con una patacada de chovenastras que tamién quieren poder disfrutar d'iste medio de transporte. La presencia policial  sirvió, como de cutio, pa creyar bell problema a on que no bi'n hese habiu. Con tot y con ixo, la mani recorrió las carreras zaragozanas recullindo la solidaridat d'a-saber-los ciudadans que nos animaban dende las aceras, los carrils bici y los autos. 

Ya dimpués, en casa, tenié la error d'enchegar la televisión. Feban un noticiario estatal y charroron d'o Día Internacional. Lo reportache empecipió charrando de l'augmento de vendas de bicicletas en los zaguers meses y d'os problemas que tienen fabricas y botigas pa adubir a fer todas la que se demanda. La gran puyada d'o uso d'a bici lo acumulaban a una hipotetica mayor conciendia medioambiental y a las millors infraestructuras ciclistas urbanas. Lo que, obviament, ye verdat. Pero ixuplidoron un d'os factors que influyó, y firme, dende que empecipió la pasa, y ye la cerina a fer servir los transportes publicos. Somos muitas las personas que nos obligoron a treballar de manera presencial, ignorando de tot las recomendacions sanitarias y metendo en periglo la nuestra salut. Muitas d'ixas personas feban servir de cutio metro, tramvía u bus pa ir t'os puestos de treballo y troboron en la bicicleta una alternativa muito mas segura. Lo treballo ha estau un d'os grans vectors de contachio que, manimenos, no se'n ha charrau mica, centrando lo debat en botelladas y borinas.

Me clamó mas l'atención una segunda frase que facioron servir y que me remeró a qui da gracias a bell dios quan las advogadas les libran d'a garchola u las medicas d'a muerte u de bella malotía. Dició lo presentador que "Por suerte, las ciudatz cada vegada acullen millor las bicicletas", como si los plans urbanisticos los dictase bell chuego d'azar y en los zaguers anyos hese saliu la tarcheta d'o carril bici u d'a pacificación viaria. Ye claro que no ye asinas. Las ciclistas hemos habiu de ganar-nos cada centimetro de carril bici y cada dreito conseguiu a pur de dar ferrete en administracions y medios de comunicación, con lo refús d'un sector d'a sociedat que s'encerrina en una urbanidat cochecentrista y, en lo caso de Zaragoza, campanyas continas en contra de l'Heraldo .

Como en quasi tot, ye l'acción colectiva la que fa cambiar la realidat. Rai si charramos d'os dreitos d'as mullers, las aragonesofablants u, como ye lo caso, las ciclistas. Y tot abance conseguiu cal desfender-lo con firme rasmia porque, malas que t'espiguardas un inte, pueden vulcar-te lo treballo de decadas. Lo numbro ye un factor importantismo en toda luita colectiva y, a diferencia d'atras, la ciclista cada vegada arrocla a mas chent. Asinas que seguiremos transformando la ciudat pa fer-la millor pa todas, ciclistas y no ciclistas.

Un maitin zaragozano

Quan os youtubers locals, os barrenaus d'o palo y o rosario, u os comentaristas de Heraldo te fan planteyar-te deixar la ciudat, ye buena cosa fer alcordanza d'ixa atra Zaragoza que vivo totz os diyas y que tanto amo. A Madalena ye, antimás, un lugarón adintro d'o monstruo zaragozano. Un puesto con a suya propia lochica, diferent d'a resta de vicos  y con dinamicas socials que, pa bien y pa mal, remiten a soben a la ruralidat.

Yera un maitin d'ixos que o sol t'eslucerna en salir de casa. Un abrazo de luz y calor que anuncia ixas poquetas semanas de goyosa primavera que van antes d'o furo y rusient verano zaragozano. As vecinas queremos decidir sobre o nuestro barrio -¡qué loquería! -y nos hebanos convocau pa fer-le un abrazo a la ilesia d'a Madalena. En istos primers diyas de caloreta, os capazos se prolargan. Ya no fa galvana estar-te firme rato de charreta. Encara que a nueit d'antes no s'embolicó, un cafe nunca no ye por demás pa sacar-se as zaguers laganyas. Charrin charrand, se nos pasa la hora d'a convocatoria y os camaras de televisión ya se nos miran, preguntando-se quan podrán hopar t'a siguient noticia. As periodistas siempre atabaladas!

A la fin, beluna pilla o megafono. Nos imos agafando d'as mans. Como lo contacto fisico no me fa guaire goyo, prebo de no aleixar-me d'as personas de mas confianza. Me miro de bislai, y con cansera intelectual, a una que demanda que a ilesia pase d'a superstición catolica a la superstición new age. As vecinas que fan tarde, s'han d'unir a l'abrazo sin o capazo previo. Ya se lo farán dimpués, en o vermut. Femos o fato bell ratet. Nos redimos. Enfortimos, unatro diya, o rete que nos enreliga a todas as madaleneras. A lectura d'o manifiesto reivindica que a ilesia catolica deixe d'arramplar con tot. Tot ixe patrimonio, feito a pur de furtar y explotar fisicament, intelectual y espiritual a tantas y tantas personas. Dito con mas elegancia y millors modos, que pa ixo tenemos buen cudiau.

Acaba l'acto y a mitat d'as presents nos enfilamos ent'a Plaza d'o Pilar. T'a nuestra Plaza d'o Pilar tamién. De todas as zaragozanas. En a Plaza Sant Bruno, l'azoque anima lo maitin d'o domingo. Entre zarrios y quincallas, siempre se i troba bella choya. Ya tiengo un puesto que siempre tien bell libro intresant sobre Aragón. En a pocha, pocas perras. O sabado no estió furo, pero me deixó lasa la cartera. En una d'as caixas d'o puesto, un libro sobre a obra de Asso, escrito por Antonio Peiró. "Qué vale?" pregunto a lo botiguer. Se me mira. Cuento que analizando quanto sería disposau a pagar por ixe libro, y sumando-le bell par d'euros. Siet. Yo no sé recatiar. Dubdo. Una amiga quier mercar-le-ne unatro. "Diez por os dos" - l'ufre la mia parella. Antimás de no saber recatiar, ye qualcosa que me mete niervudo y me fa a saber que vergüenya. O botiguer accepta a escape. L'amiga me deixa chanfles pa pagar o libro. "- Ya te los tornaré". Un "Tira!" me fa pensar que será mas facil convidar-le a una biera.

Con l'alegria que nomas un nuevo libro puet dar-te, continamos o camin ent'a plaza. Unas mozas portan unas pelucas azulas y son cantando. "Be d'estar una despedida de soltera", nos pensamos. Pero ¿a ixas horas d'un maitin de domingo?. En acercar-nos-ie descubrimos que a letra d'a canción ye un canto antiabortista. Unatra asociación d'as que preban de decir-les a las mullers qué fer con o suyo cuerpo. M'ufren no se qué. Les ne refuso. ¡Cómo va ista ciudat!

Pocos metros dimpués, a color azula torna a protagonizar la plaza. En iste caso ye o nuestro destino: a manifestación d'o Rete Augua Publica d'Aragón. Lo d'a Madalena y d'o Pilar son dos actos prou diferents pero con pareixius. A la fin, en os dos, nomas demandamos que todas podamos decidir sobre os nuestros recursos. S'estendillan una telas que represientan os rius nuestros .Uns globos chigants entretienen a catrinalla y a las mas enchugardidas d'a plaza. Atra vegada, trobar-te con chent arrienda. As d'a Montanya y as de Tierra Plana. D'o norte y d'o sur. De l'activismo politico y qui simplament desfiende o lugar suyo. Mas capazos. Mas abrazos. Mas complicidat. O rete que s'ixampla d'o barrio ta cada cabo d'Aragón y dillá.

Hemos de marchar, que hemos quedau a chentar en Penyaflor. A resta se'n iran en un rato t'o vermut. Regular que en tornar d'a chenta, nos ne trobamos a mas d'un, que encara ye vermutiando. ¡Paratz cuenta, que a l'atro ye lunes!

Zaragoza ye hostil bellas vegadas. Y t'agana d'exiliar-te ta bell cabo ideyalizau que, manimenos, tendrá as suyas propias miserias, que por agora ignoro. Atras, Zaragoza ye amable, polida, una amiga mas d'as que comparten la vida con tu. Un maitin pa disfrutar as suyas carreras, plazas y paisaches, un ratet con as amigas y companyeras de luita, ... ixo ye de mal sustituir. Zaragoza ye casa mia, y encara que tienga bella tubería embozada, y bella paret con crepazas, la amo con ixe "carinyo ancestral", que deciba Labordeta.

Cronicas Pilaristas 2014 (3) Campanyas politicas

Como en totz os Pilars, prou que bi ha habiu actos politicos de toda mena. En charraré d'os dos que tiengo bella cosa que decir.

A manifestación antitaurina tornó a estar un exito de convocatoria. Ya ha esdeveniu un referent y quasi no cal ni convocar-la ta que todas plenemos a redolada d'a Plaza. Como todas as anyadas, recibiemos as faltadas d'os aimants d'a tortura y ells as nuestras. Soi seguro de que, a lo menos, les molestemos bell poquet y no les deixemos disfrutar tanto d'a sangre allena. Por cierto, o publico d'os toros ye cada vegada más casposo u ye sensación mía? 

Tamién como en as zaguers anyadas contemos con un dispositivo policial de tot desproporcionau. Más suaus que atras anyadas pero igual d'absurdos y inquestos. Asinas ye ista ciudat...

Aprofeito ta remerar, como fació Arale en o suyo Facebook, os orichens d'ista manifestación, pues en bell articlo en os periodicos, Amnistía Animal en daba una versión a on que ixublidaba bella coseta tant important como d'a on surtió a iniciativa d'a Manifestación.

A primer manifestación antitaurina en as fiestas d'os Pilars ye en 2002, quan bella decena de personas, convocadas por Chobenalla Aragonesista nos concentremos en a Plaza Espanya de Zaragoza. Ni presencia policial ni taurinos ni cosa. Simplament bells chovens espardindo pasquins en esfensa d'os dreitos d'os animals, a o canto d'una colla de mosicos peruanos. O manifiesto lo leyió Pedro Lobera, qui alavez yera diputau de CHA. A l'atro anyo, se contactó con Aministía Animal y en 2003 se convocó de conchunta con ixa y atras organizacions. Fueras d'ixa error, en iste vinclo se reconta a historia entre 2002 y 2007 alto u baixo bien.

En ixas envueltas Chobenalla yera parte de CHA y os próceres d'a patria tremoloron en viyer-nos fer cosas tant subersivas y pretoron a correr ent'a plaza de toros a fer-se fotos ta que o baturrismo no viyese periglar "as vaquillas" y atras trazas más u menos organizadas de tortura animal. D'asti salió a famosa foto de Bernal, Fuster (hue encara Diputau Provincial por Zaragoza y cutiano espectador d'istos "shows") y bell cargo más (no remero si Acero u Orna).

Cosas d'a vida, l'encargau de leyer o manifiesto d'estianyo estió Chesús Yuste, d'o mesmo partiu. Un d'os mayors esfensors de forachitar a Chobenalla por cosas como ixa y que no sé que relación tendrá con a resta de cargos taurinos d'o partiu suyo. Bienvenius sigan os cambios a millor si son sinceros, pero de Yuste y de Chunta me creigo tant poco istas cosas...

Campanyas de Purna

O maltracto animal estió precisament un d'os puntos fuertes d'a campanya pilarista de Purna, a organización chovenil d'a cucha independentista. L'atro, a luita contra o heteropatriarcau.

A campanya pendió en pegallos, cartels y pancartas que s'ixemenoron por tot Zaragoza, encara que especialment en o vico d'a Madalena. O cartel d'os dos baturros y as dos baturras besando-se se tornoron a escape virals y dondioron por movils, retes socials y collas de whatsapp. As pancartas, mesas en a Plaza d'a Madalena estioron tamién l'obchectivo d'arrienda de fotos de chent que le trucó lo ficació. Mesmo Juan Martin, de CHA, felicitó en Twitter a Purna por os cartels!

Os pegallos d'as dos campanyas s'ixemenoron por tot, como he dito y, en estar dos afers a on que o talibanismo ye tant furo, los sacaban de camin. Más en seguntes que ambients como a Carpa d'o Ternasco, a on que lo cazurrismo militant me sacó mesmo cinco pegallos en o mesmo escusau en a mesma nueit.

Campanyas como istas, directas, bien feitas, con mensaches y que se popularicen a escape son una trunfada de l'independentismo y d'a luita contra o maltracto animal y l'heteropatriarcau. Os mios parabiens a Purna y a qui ideyoron a campanya.

Manifestacions, sinyals y batucadas

Bi ha temas recurrents en toda asambleya, plataforma y reunión que se faiga. En que se chuntan dos colectivos bell poco diferents, no digamos ya quan son frents amplos, surten os mesmos debatz. Violencias, distribución d'espacios y tiempos, lechitimidatz, .... Pero un d'os más cutianos, que levo vivindo en as manifestacions "unitarias" dende que teneba quince anyadas, ye o d'os "codigos" de sinyals, pancartas y actitutz en as manifestacions.

Ya lo he charrau bella vegada antes más por ista mesma canal. As manifestacions me fan bien de goyo de viyer-las plenas de pluralidat. Que cadagún leve os suyos sinyals, pancartas, pegallos y trazas de manifestar-se. A cultura de manifestación de cada colectivo ye parte d'a riqueza que tenemos as cuchas. Me deciba un companyer en una manifestación rollo 15mera (no remero de qué) que le feba muito goyo viyer pancartas "individuals". Piruletas d'ixas feitas en casa con un rotu y un mensache escrito por qui la portiaba, pero no pas os sinyals d'Aragón. Particularment me pareixe perfecto que cadagún faiga lo que quiera. Si quier portiar una piruleta con a suya movida perfecto y si quier portiar un sinyal de lo que sía perfecto tamién.

Pero sí que bi ha bella mena d'encerrinamiento con o tema d'os sinyals d'Aragón, a lo menos dende bells sectors. Bi'n ha qui no ha entendiu encara a diferencia entre nacionalista y independentista, por eixemplo. Y bi'n ha qui no critica solo que si o trapo en qüestion ye o sinyal aragonés pero no pas si ye o republicano espanyol, u l'anarquista, por eixemplo. Mesmo decindo que ixos representan ideyas, pero lo d'Aragón no pas. Eixemplo en han estau a soben as manis d'o 15M aragonés, plegando a meter en a cartelería lo de "sin siglas ni sinyals", como si ixa uniformidat fuese qualcosa buena u sisquiá deseyable.

Muitas d'as que portan sinyals estrelaus, y isto tamién ye aplicable a los republicanos, no los portan como sinyal d'un territorio. U a lo menos no nomás como sinyal d'ixe territorio, sino como sinyal d'un prochecto politico vinclau a ixe territorio. D'emancipación nacional y social en o caso aragonés y de reconoiximiento d'una memoria de luita y d'un prochecto politico (pasau, present y futuro) en o segundo. 

Simpatizo más con os sinyals ideyolochicos u d'organizacions. Creigo personalment que fer a luita cadagún a la suya no nos levará ta garra cabo. Por ixo he militau, milito y militaré en organizacions politicas, culturals y de toda mena. Porque creigo que l'asociacionismo y a luita organizada son fundamentals. As pancartas "personals", por un regular, son portiadas por chent no organizada. (Ye una cheneralización, lo sé, no me friyatz a correus de "pues yo en levo y soi militant de nosequé y nosequantas"). Con tot y con ixo, les respeto tot lo que cal respetar a una companyera de luitas. Encara que creiga que a suya estratechia pueda estar entivocada. Talment en siga la mía. Talment ixa persona trobe en ixa manifestación un espacio a on que organizar-se y treballar de conchunta con atros ta sumar fuerzas.

Atra qüestión a-saber-lo debatida en zagueras, ye la de l'actitut. Dende que Carlinhos Brown nos fartó con o pi-pi-pi-pi-pi-pi-pi-pi as batucadas s'han multiplicau como fongos por tot. Agora bi ha pocas manifestacions que no en tiengan una. En os ambients indepes u aragonesistas tamién tenemos siempre a colla donzainers con mayor u menor fortuna. As dos me dan prou por saco, a verdat. Pero qui de verdat me da por saco ye o canso "ferreter" que prencipia a explicar-les que ixo no son trazas de luita, que no ye una borina ... Que pareixe que en as manifestacions calga estar caricacho u encarranyau. Pues no. Qui quiera ir con a batucada u a donzaina que i vaiga y qui quiera ir-ie con o cenyo de chungo d'o Bronx y a capucha tapando-le a cara pues bienvenida tamién. Que a yo no me faigan goyo, que me pareixcan cansos u que no comparta a suya traza d'estar en una manifestación, no significa que tienga yo razón, ni que ellas tiengan menos dreito que no yo a estar-se-ie.

Fueras de bells casos, prou excepcionals, a on que, por razons estratechicas bien razonadas y compartidas por todas, se veiga menister un "look" u una actitut determinada, as manifestacions habrían d'estar un exercicio de libertat, a on que cadagún pueda expresar-se como quiera. Aintro siempre d'unas mugas que todas entendemos, como no portiar svasticas y cosas asinas. Todas somos mayors y sabemos lo que ye inacceptable.

A yo me fan goyo as manifestacions a on que bi ha variedat de sinyals y siglas, a on que puede ir-ie a chent "no-aliniada" y trobar-se comoda. Me fan goyo sin batucadas ni donzainas, y con bien de chilos de conchunta y o megafono a tot meter. Me fan goyo que bi haiga un ambient barallero, pero a on que se puedan compartir ideyas y propuestas con a persona que tiens a o canto. Pero ixo ye como me fan goyo a yo. Y yo m'entivoco. Muito y a soben.

As cuchas hemos de saber aprender as unas d'as atras. D'as errors y enciertos que cadaguna fa. No podemos tener a soberbia de pretender que nomás a nuestra estratechia (y charro d'estratechias, no pas d'ideyas) nos levará t'a revolución social. Más autocritica y menos criticar por fateras a las companyeras.

NOTA: Mientres buscaba bella foto ta iste post, m'he trobau con que ya heba escrito iste post en 2010. Dende alavez, a mia anvista sobre muitas cosas ha cambiau, pero por lo que veigo, isto contina alto u baixo igual. Iste ye l'articlo que escribié alavez. Veigo que prencipio a repetir-me, pero ye lo que tien levar siet anyos ya y tener a memoria tant malament como la tiengo.

Os prodisturbios en as Marchas d'a dignidat. Articlo de Ruth Toledano

4.000 personas seguntes o Gubierno

Lo que ha pasau iste sabado en Madrit, no ye que unatro eixemplo d'a tant faixista como absurda (u no pas tanto) politica de represión de l'estau espanyol. Lo malo ye que, ta muita chent pareixe funcionar. Ya charré en un articlo sobre iste afer y sobre cosas que cal remerar a la policía y a qui refirman as suyas actuacions. Ruth Toledano resumió fa bells diyas en l'articlo que traduzco contino, belunas d'as ideyas que quereba meter-ie muito millor que lo facié yo. Ye lo que tien que ella siga periodista de verdat y yo no pas. Ta charrar de periodismo de verdat, tamién podríanos adedicar atro articlo, porque estió penible a desinformación d'os mass media istos dos diyas, pero ixo lo deixaremos ta más debant. Tamién podemos remerar as imachens d'aquellas JMJ, a on que a policía protecheba contramanifestacions no convocadas, mientres abataniaban a qui sí la heban comunicada.

"Imos a por ells, conyo", chiló un mando a los antidisturbios

Lo que pasó o sabado en Madrit ye un grieu punto d'inflexión en a ya intolerable represión d'o dreito a la protesta y a la manifestación. Disparar pelotas de goma en una plaza con millars de personas, muitas d'ellas, viellos y ninos, se pareixe masiau a una declaración de guerra.

Os antidisturbios enristioron de traza violenta o sabado contra la Marcha por a Dignidat quan encara no yeran as nueu d'a nueit (a manifestación yera autorizada dica ixa hora), o coro d'a Solfonica cantaba en un scenario a rebutir y a plaza de Colón, o paseyo de Recoletos y as carreras d'arredol, yeran plenas de millars de personas, entre ellas, arrienda ninos y personas mayors. Chitoron gases glarimochenos, abatanioron con as suyas porras de metal recubierto, torcioron brazos con brutalidat, fotioron patadas y disparoron as suyas fastiosas pelotas de goma, que podrían haber deixau tuerto a belún u haber muerto a belun d'ixos ninos.

A versión oficial diz que tot prencipió porque belún aventó obchectos a los achents. Pero os portavoces oficials no tienen, ye de dar, a más minima autoridat moral ta que creigamos a suya versión. Si o Gubierno miente por sistema. Si o ministerio d'Interior miente por sistema. Si han mentiu sobre os muertos de Melilla debant de totz os medios de comunicación, debant d'os alufradors internacionals y en o mesmo Congreso d'os Diputaus, ¿como quieren que creigamos que l'agresividat d'os antidisturbios no estió una provocación presta d'antes?

No nos creyemos a versión oficial porque o feito d'haber disposau 1.700 efectivos d'a Unidat d'Intervención Policial ya yera una declaración d'intencions: sabebanos que ixe granizo despliegue que no caleba ta cosa, significaba que iban a enrestir. ¿Por qué, si no, tantos antidisturbios ta una convocatoria que, seguntes Telemadrid (a mesma fuent oficial, a la fin), nomás arrocló a 4.000 personas? ¿Por qué bi habio los concaramientos chusto a tiempo de ninviar imachens violentas a los telediarios d'a nueit? ¿Por qué pasoron a una hora que a Marcha no heba rematau pero a o Ministerio de l'Interior le vagaba de parar un vinclo con fotos y ninviar-lo t'a prensa t'a suya publicación?

Violentos antisistema, con y sin
uniforme, colaborando.

No nos creyemos a versión oficial porque ya hemos visto atras vegadas a los suyos esbirros infiltraus entre os manifestants ta provocar unos concaramientos que intresan a lo Gubierno. O sabado les intresaban de traza especial, pues a o Gubierno le caleba esbafar con violencia l'exito d'a Marcha por a Dignidat, que estió multitudinaria, unida en a diversidat y pacifica. Teneban a poderosa razón ta fer ixas bestials enrestidas: si no la montan ells mesmos, as fotos que habrían quedau serían nomás las d'ixa imponent masa de carranyaus. Agora tenemos as d'a fricasera y as d'uns encapuchaus que pareixen manifestants violentos pero aduyan a los antidisturbios a esposar-ne a un por tierra (entre que, por cierto, le escachan o tozuelo con un escudo policial).

No nos creyemos a versión oficial porque, dos diyas antes, o president d'a Comunidat de Madrit, ixe Ignacio González, esleixiu a dido a tamás d'estar relacionau con diferents delitos y d'adedicar-se a encorrer periodistas, heba contimparau o manifiesto d'a Marcha por a Dignidat con l'ideyario politico d'os neonazis griegos de Amaneixer Dorau y heba deseyau que o sabado no bi hese lesions "ta dengún" ni contra "o patrimonio de totz". Debant de ixe don visionario y debant d'un analís pulitico tant fundo (que aduyó a enriquir o portavoz d'o gubierno suyo, Salvador Victoria, catalogando as mareas como "cucha extrema" y decindo que os sindicalistas andaluces "van ta Venezuela en business"), no nos sorprende que os suyos tenesen prevista reventar, sin más, a fuerza movilizadera de treballadors, aturaus, esfiuzaus, y atros cientos de millars de ciudadans carranyaus.

No nos creyemos a versión oficial porque Cristina Cifuentes ya heba avisau en Twitter: "Acampar en Madrit ye viedau difuera d'as zonas habilitadas de propio ta ixo, y as Fuerzas de Seguridat ferán cumplir a lei". Ye decir, teneba a las suyas huestes alicionadas ta enrestir en que bi hese lo más chiquet empecipiallo d'acampada, como asinas estió: quan os antidisturbios enristioron contra la multitut, s'heba prencipiau a devantar un campamento en Recoletos, previsto ta remanir-ie dica lo martes, pero bells minutos antes de que empecipiasen as enrestidas, decenas de furgons policials ya s'heban amanau t'a zona a on que se montaban as lonas. Cal sinyalar a obviedat de que una acampada, siga viedada u no pas, no ye, en si mesma, un acto violento. Pero Cifuentes quiere contrimostrar a lo PP que tien a man prou dura ta liderar o Concello u a Comunidat de Madrit como o suyo partiu considera que cal fer-lo: a lo fato, como Botella; a lo mafioso, como González; u a lo bestia, como ella.

No nos creyemos a versión oficial porque, mesmo en o caso de que fuesen alticamadors qui prencipioron os concaramientos, os achents antidisturbios i son (les pagamos por ixo) chusto ta protecher o curso pacifico d'a marcha y a seguridat d'os manifestants, y no de revés, ta meter en grieu periglo a suya integridat fisica y a suya vida. ¿Como pretenden que los creigamos dimpués de enterar-nos de que o fillo d'o golpista Tejero menaba una unidat d'antidisturbios d'a Guardia Civil dica estar destituyiu por celebrar en o cuartel o cabo d'anyo d'o 23F? Parando cuenta que ixa ye a mena de chefes que tienen as diferents colla de "control de masas", i culle de tot o comportamiento violento d'a policía antidisturbios, a qui o sabado en Colón, un d'os suyo mandos animó a lo "Tejeril" chilo de "imos a por ells, conyo".

No nos creyemos a versión oficial porque ye o ministro Fernández Díaz, ixo ministro, o d'a lei mordaza, o d'as cletas de Melilla, o d'as mentiras sobres os inmigrants afogaus entre que recibiban disparos de pelotas de goma, ixe ministro, qui esfiende l'actuación d'os antidisturbios en Madrit y acusa a los manifestants d'enrestir-les. ¿Ye que piensa que le queda un sacre de credibilidat?

Lo que pasó o sabado en Madrit ye un punto d'inflexión a-saber-lo de grieu en la ya intolerable represión d'o dreito a la protesta y a la manifestación. Ye o periglosos estiramiento d'a tensión entre una ciudadanía pacifica y un Gubierno de creixient sesgo dictatorial, tensión que no s'ha tornau definitivament insostenible gracias a l'aguante, a la resistencia, a la templaza y a la responsabilidat d'ista ciudadanía. Pero disparar pelotas de goma en una plaza con millars de personas, muitas d'ellas viellos y ninos, se pareixe masiau a una declaración de guerra. Vien a decir: "Podetz estar más d'un millón y estar pacificos. Nusatros diremos que sotz violentos y que no pasatz de 4.000. Pero ixo no ye tot: imos a disparar y podemos dar en a cara a los vuestros fillos. Asinas que tos lo pensatz antes de tornar t'a carrera. Porque imos a por vusatros, conyo"

Articlo orichinal en:

http://www.eldiario.es/zonacritica/Vamos-cono-grito-mando-antidisturbios_6_241885818.html

De Pilars: 8, 9 y 10 d'octobre

 

8 d'octobre

En o diya más heavy marchemos t'o concierto d'Azero, Metalurgica y Iron Maños. En plegar t'o Ternasco chusto yeran empecipiando Azero con Cona repela y nusatras creyendo que yera a prebatina de soniu porque yeran as 19:30 y creyebanos que prencipiaba a las 20:00. Bien se vale que i estiemos antis, porque viyemos o que, en a mia opinión, ye o millor concierto que ha feito Azero en as zaguers anyadas. U que le haiga visto yo, a lo menos. Y ixo que feba una calor ta morir-se. Temazos de totz os discos, que ya'n tienen prous y dedicatorias t'Artieda u t'os miners. Dimpués, Metalurgica y Iron Maños, floixetz... Encara que de los Iron Maños tampoco no'n remero guaire pues, gracias a los mios companyers de l'instituto que me i trobé, me la pillé monumental. En rematar o concierto m'han dito que estiemos por as barras y o Pottoka, pero ixo no tos lo puedo guaranciar....

 

9 d'octobre

Prencipiemos con Nafarroako fendo un buen socalce en El Coscurro y viyendo a exposición que tien Fablans en a Casa d'os Morlans. Muitos recosiros de conciertos y chambretas. De nueitz, decidiemos a la fin d'ir ta Los Artistas del gremio. Ya sé que tanyeba La Ronda, pero en Pilars, con tantisma chent, pasabanos un poco. En o Ternasco de nuevas tornemos a viyer un gran concierto. A charanga d'Os Artistas estió prou divertida en un primer pase que facioron antis de fer un show con artistas d'o rollo de circo. Un mozo con un diavolo fendo de tot, un par de zagalas puyando por unas cintas y fendo figuretas, ... muito espectacular, a verdat. En rematar un atro pase de Los Artistas del gremio, que remató con "churro, media manga, manga entera", ta goi d'Arale. Como a l'atro'l diya caleba amaitinar ta ir t'Artieda, nos faciemos a zaguera en Erzo y t'o leito.

10 d'octobre
Como cuento que ya todas lo hetz leyiu y visto, en Arredol, Arainfo, Heraldo, el Periodico, u Aragón Televisión, no cuento que calga adhibir cosa sobre lo d'Artieda. Bi estiemos, esfendendo con ellas a dignidat d'un pueblo y resistindo-nos a la suya "democracia" que no ye que dar palos a lo pueblo que s'esfiende contra o suyos intreses capitalistas y absurdos.

De tornada ta Zaragoza caleba parar a brenda de Nogara. Bocaus de choriceta, hummus, tortiella de trunfas y bella coseta más ta celebrar de conchunta os Pilars con un(atro) capazo en aragonés. I pasemos un buen ratet charrando d'o que heba pasau de maitins, d'os Pilars y de todas as cosas que imos a fer en iste curso 2012-2013.

Con a plevia heban zarrau as barras d'o BIC, asinas que nos faciemos buena rondeta por Pottoka, A Flama, el Detalle y a barra d'o PCE ta rematar marchando ta casica, que ya no yeran horas y bi heba cansera de tanta faina. Un diya que a fe a fe no ixublidaré nunca... Gracias Artieda

Policias, empatias, manipulación y videos

Foto d'o 25S en Anticapitalistes.net

Lo que ye pasando en zagueras tan asoben cuanto a las actuacions policials siempre me deixa toda ripa de sentimientos. Rabia, más que más. Tamién impotencia, en saber que pueden fer lo que les pete pues nunca no tendrá conseqüencias legals u laborals. Argüello, quan veigo a las companyeras desarmadas concarar-se con almarios empotraus armaus y, a ormino drogaus. Tristura, por os tozuels d’os estalentaus que bi ha baixo ixos cascos azuls y que son tan dificils de tornar a convertir en personas normals. Y asinas asinas muitos más...

Pero probablement lo que más mal me fa de tot ye que rara vegada nos creye muita chent quan charramos (os anticapitalistas, indepes, hippies, canchiflos, royos u lo que sia: ya sabetz qui ye a primer persona d’o plural en iste blog) d’istas cosas. Familia y amigas de dillá de "indepelandia" u d’a “Madalena conceptual”, gosan mirar de trobar bella chustificación t’as enrestidas policials. Gosan mirar-se-te como dicindo “no te voi a decir que no te creigo por educación, pero no te creigo” quan les charras d’as torturas y malos tractos. Gosan clamar-te paranoico quan les dices que bi ha policias infiltraus en as manifestacions y que, por un regular, son relacionaus con l’empecipie d’os lapos. Gosan de trobar provocacions en l’actitut d’os periodistas (u creyer que ixo les pasa nomas a os periodistas de “meyos radicals, como iste mozo de El mundo). Y a la fin, como les quieres, cambias de tema y charras de o zaguer episodio de bella serie de TV.

Os que nos hemos criau con Os Simpsons y nos sabemos os dialogos de memoria remeraremos un episodio a on que acusan a Homer en TV d’un crimen. Tot lo lugar lo considera culpable. Se desespera y, en un inte, se mira t’a familia suya y les preguntan si creyen en a inocencia suya. Mientres un inte no le responden ta dimpués decir-le que sí, pero Homer en para cuenta y les diz que porque han dubdau a lo que Bart responde -alto u baixo- que a TV les ha educau y les diz lo que cal que piensen. Como tantas atras vegadas a los Simpsons no les falta razón. Soi quasi seguro que, si a yo me pillasen en una d’ixas, buena parti d’a mia familia y d’as mias amigas no creyerían a mitat d’as cosas que contase. Sería un Homer. Quiero creyer que me refirmarían, prou que sí, y que me aconortarían, pero dimpués, en a intimidat, probablement pensasen “bella cosa habrá feito que no nos ye contando”. ¿Qué ostias les da o sistema ta que lo creigan igual como a una relichión, sin qüestionar-ne cosa? ¿Quantos videos, quantas prebas, fan falta ta conseguir que una persona pare cuenta de que a policía no proteixe que a o capitalismo?

En pencho bells quantos, por si vale ta cosa:











Un testimonio escrito tamién

A vada: cronica y reflexions personals

Os diyas d’antis d’a vada, en amanando-se, creyeba que iba a estar un exito. No podeba nian preixinar que tanto. A lo menos tal y como lo vivié yo. O bicipiquete, de maitins, achuntó a más de cincocientas  personas por toda a ciudat, chugando a 'mixins y churis' con a policía que no consiguió aturar-nos. Os violentos preboron de foter-nos de lapos terne que terne pero no consiguioron que reblasenos. A la fin un deteniu y bella persona con bell batán. Intes trunfals en chuntar-nos en a puerta d’o Carmen u en a Plaza Europa. Y agradeixer a todas as personas, a piet u en auto, que nos amostroron o suyo refirme.

A resta d’o maitin, por o Paseu Independencia con a chent d’o 15M, refirmando a las piqueteras d’o Corte Inglés u pasando por o Centro de Meyas que se metió en a Plaza d’o Pilar ta que os meyos alternativos treballasen ‘d’atras trazas’ as noticias que s’iban chenerando arredol d’a vada cheneral.

De tardis, a manifestación d’os sindicatos combativos: CGT, CNT, Intersindical d’Aragón, SOA y CATA. Pleguemos, igual como de maitins, con o tiempo chustet y a manifestación ya heba prencipiau. Me’n puyé ta una cleta ta poder fer fotos y me quedé enlucernau d’a cantidat de chent que bi heba. No feban que pasar-ie cientos de personas y continaba habendo-ie a mesma ringlera que plegaba dica a on que podeba viyer. De nueitz pleguemos en a Plaza d’o Pilar y, una atra vegada, podié puyar-me-ne ta un muret ta fer fotos dende astí. Arrienda personas plenaban a Plaza. Os charrazos que se fotioron os representants d’as organizacions estioron mesmo emocionants en bells intes. CNT fació un discurso prou furo contra o pasteleyo sindical, que fació bullir a sangre de más d’un. SOA leyó o suyo en aragonés. Viyer como 15.000 personas ascuitan un mensache en aragonés en una movida que no ye por l’aragonés ye un d’os indicadors de que imos por buen camín. Y por cierto, tamién muito emocionant y una atra traza d’ir normalizando l’emplego d’a nuestra luenga en todas as dembas. De rematadera, un par de discursos improvisaus d’un valient mocet representant d’a estudiantalla, tamién prou pincho y d’un migrant, colombiano, si no remero mal.

Vivir tot isto con a companyía d’a mia parella y de una ripa de buenos amigos, trobar-te a chent que no pensabas que ise a fer vada en a vida, comprobar que quan queremos somos capables de fer cosas grans.... ye tot un goyo que quiero agradeixer a todas y totz qui compartimos tantas y tantas luitas.

Contina quedando muita luita. Totz os diyas, en todas as dembas, ta poder costruyir o mundo que queremos, o mundo que no quieren que tiengamos. Ta poder fuyir totz os diyas d’as zarpas d’o pensamiento unico y tener totz ixo intes d’autonomía personal y colectiva que nos fan fuertes. 

Pero dende a mía anvista, prou personal y sin datos que l’alazeten, creigo que os anticapitalismos somos en un granizo inte. Somos costruyindo buenos y firmes retes. Somos costruyindo buenas y firmes alternativas economicas, políticas, identitarias, meyoambientals, socials... Como deciban os Mallacán, o nuestro diya plegará!!!

P.D.: Y remeratz... a luita ye contra o capitalismo y o faixismo en todas as suyas trazas, no pas contra a heterodoxia.


#vada29M from AraInfo on Vimeo.

Policia catolica

Siempre que charro con chent “normal” d'a violencia policial les costa muito de creyer que siga verdat lo que les digo. Cuento que a mas gran parti d'as vegadas nian me creyen. Ye dificil, lo entiendo. Si nunca no has viviu una enrestida d'a policia, si no has visto como a las tuyas amigas las levan t'os furgons y tornan como tornan, si no has visto ixe cenyo farute y farto de droga que tienen quan saben que te van a foter lapos dica cansar-se, ye de dificil creyer. A televisión y a prensa nos bombardeya con as bondatz policials. As pelis y series los amuestran como heroes. Y los malos siempre son los grises, no pas os azuls. Como si hese cambiau guaire a policia.

Dimpués de lo que ye pasando istos diyas en Madrid, a muitas mas personas les han quedau esclateras muitas cosas. Cosas que muitas sabebanos, pero que nunca no ye mal de remerar-las. A policia tien impunidat total. Puet fer lo que le pete. No le cal cumplir as suyas propias leis. Nunca no t'amostrarán a placa y si les en demandas, acocha-te que te'n cayerá una. A policia sirve a o poder. Y en ixe poder tamién i ye a ilesia catolica. A contramanifestación ilegal cristiana estió esfendida por ells. A grabación de man d'os policials d'os manifestants (en ista noticia leyetz o seiseno parrafo) contrimuestra una vegada mas que bi ha listas negras a on que yo apareixco y, probablement tu tamien. A policia ye una policia politica (de dreitas, ye de dar). A mas gran parti d'os testimonios charran de faltadas politicas (royo de mierda y ixas cosas), antiparti d'atras. En l'estau espanyol no bi ha libertat de prensa. No mientres a policia s'adedique a detener periodistas y a torturar-los en os furgons. En l'estau espanyol no bi ha libertat de manifestacion. A lo menos si a ilesia catolica decide lo contrario. En l'estau espanyol bi ha una colla violenta y armadas que preba d'amugar os nuestros dreitos.

¿Dica quan ista impunidat? ¿Dica quan habremos d'aguantar isto?

Por si queda chent que crei que son totz paranoias, contino pencho videos, articlos y movidas de istos dos diyas de manifestacions por un estau laico.

Agresión a zagala y periodista.

Testimonio d'o periodista agrediu en l'anterior video

Fotos y testimonio d'un periodista de Fotograccion

Entrevista a Jonas Candalija, un d'os periodistas deteniu:

Identificación d'una periodista en Madrid.

Articlos en Publico 1

Articlos en Publico 2

Articlos en Publico 3

Articlo-testimonio de Shangay Lily

Articlo de Lidia Ucher, periodista detenida en Sol.

Entrevista con Lidia Ucher, periodista detenida en Sol.

Enrestidas policials. Zaguer minuto impresionant

Más enrestidas policials

.... y asinas podría emplir tres blogs. Bi ha arrienda mas de videos, testimonios, articlos, opinions... Troba-los y espardi-los.

15 M

A politica nunca no deixa de sosprender-me. Feba tiempo que me aburriba d'o diya a diya d'a politica cutiana. Crisi, paro, Belén Esteban, aburrius debatz sin mica suco,... os de siempre fendo o de siempre. Y ixo nos incluye a la cucha anticapitalista, alternativa u como la queramos clamar. Pero be-te-me que o quince de mayo, una manifestación por la que no daba meya perra, va y prencipia un movimiento que agora ye achuntando a milenta de personas en tot l'estau espanyol y, que yo sepa, en as dos principals ciudatz d'o país.

Cal reconoixer muitas cosas a iste movimiento. Han conseguiu, sin refirmes economicos ni politicos conoixius, convocar a fascals de chent ta protestar por a situación actual. Dimpués d'a mani, han conseguiu tamién fer una acampada que cada tardi se i adhiben más personas. Paso totz os diyas por a Plaza d'o Pilar y se nota que cada vegada bi ha más refirme. Y tamién mas organización, que en os primers intes yera tot un poquet caotico... Cal reconoixer que han sabiu manullar muito bien tot lo afer de Puerta d'o Sol en Madrid, a on continan dimpués d'enrestidas policials que no han feito so que enamplar o numer de refirmes. Han conseguiu tamién meter prou niervudos a los politicos d'a mas gran parti de partius. O tractamiento informativo d'as eleccions ha cambiau de tot. Os debatz son atros. Y ixo me fa a-saber-lo de goi.

Dende a mía opinión, tamién he d'estar cretico. Iste 15M no ye un movimiento revolucionario, como beluns dicen. Ni antisistema. As pocas proposas que'n han surtiu son nomas que reformas, aintro d'un mesmo sistema politico y economico. Más democratico y plural, pero o mesmo sistema. Antimás ye un movimiento naixiu de Madrid y d'un esmo espanyol (y en bells casos espanyolista). Belunas d'as opinions que he sentiu en TV y radio charrando d'a reforma electoral prebaban de fer difuera a "os nacionalistas". Como deciba una muller en a Sexta "no entiendo porque cuenta distinto un voto a un partido MINORITARIO que a uno NACIONAL". Prou que ixo no ye que una persona, y que antimas, como contrimuestra iste articlo (gracias, Ripa!), o sistema electoral nomas favoreix a PP y PSOE, no pas a os partius mas chicotz. Tamién ye trasversal, sin dreitas ni cuchas, se suposa. Asinas que te i puetz trobar a chentucia de toda mena. A os que han creyau lo problema. Nunca no he creito en a trasversalidat en garra qüestion y muito menos en iste afer de "reformar a democracia".

Dende fa tiempo pienso que cada cheneración tien bella cosa que fa que a chent se movilice y dentre en os movimientos socials y en as organizacions. En o caso mio y d'atras companyeras estio o movimiento contra o trasvase y os entibos quan prencipiemos a tener un compromís reyal con a cucha anticapitalista. Atras compas prencipioron con a segunda guerra d'Iraq, y belunas mas viellas con a insumisión, a primer guerra d'Iraq, o 0,7%... Talment iste 15M siga lo naixer en l'activismo de muita chent. Encara que o movimimiento no conseguise cosa, regular que muitas d'as personas que son participando-ie, remanirán en os movimientos socials quan tot isto pase.

A cucha anticapitalista en cheneral, y a independentista en particlar, hemos de mirar-nos fito-fito iste movimiento social. Hemos de parar cuenta y fer un analis de como ha surtiu, como han conseguiu lo que son conseguindo, y mirar de trobar as licions que podamos aprender-ne.

No sé si isto rematará en bell cabo u quedará en bella cosa romantica de un par de semanas. Sí sé que han conseguiu animar a vida cutiana y politica d'a ciudat, d'o país y de l'estau, que cambeen discursos, que muita chent que nunca no hese feito cosa, se mueva bell poquet... muitas cosas buenas. O 15M no ye perfecto, pero sin dubda, ye a-saber-lo de positivo. Tenemos tot a ganar y mica que perder. Nos viyemos en a Plaza d'o Pilar!

Ampraus 056

China chana he iu replegando material ta bell par d'ampraus. Talment por as eleccions, a primavera u ves-te-ne tu a saber qué, pero Aragón ye bullindo de noticias, convocatorias, actividatz...

Puyalon fació fa poco un comunicau sobre a Franja y a suya anviesta sobre ixas redoladas. Alto u baixo a postura que ha levau l'independentismo aragonés dende que yo lo conoixco, pero por escrito y muito bien esplanicau tot. Lo texto lo tenetz aquí. ¡Y que siga tan dificil d'esplicar isto a tanta chent....!

Sobre academias y grafías, escribió Lluis Xavier Flores Abat fa poco en o blog de Fablans. Como quasi tot lo que se charra sobre o tema soi d'alcuerdo en bellas cosas y no pas tanto en belatras, pero ye un d'os millors textos publicaus en zaguerías. Sin alticamar-se ni una parola más fura que no a d'antis.Un clamamiento a entender-nos entre todas as fablans, a la nuestra unidat y a empentar entre todas ixe esdevenider que s'ha ubierto con a proclamación (encara no oficial) de l'academia d'a luenga aragonesa. Ta reflexionar y pensar-ne.

19 de mayo. Apuntatz-tos ista calendata en as vuestras achendas. De tardis Xavi Sarriá presentará a versión en castellano d'o suyo libro “Bienvenidos al paraíso” en la librería La Pantera Rossa de Zaragoza. Tamién ixa mesma tardi ye o primer cabo d'anyo d'A Flama. A crepería tabierna que en ixos 365 diyas si fa u no fa, s'ha convertiu en un puesto de trobada ta muitas personas d'os movimientos socials de Zaragoza y un poquet tamién de tot Aragón. Lo celebrarán con una borineta bien plena de sospresas. Tamién podetz aprofeitar ta viyer a exposición que ye organizando Lurte mientres tot lo mes, con unas fotos bien pinchas d'a colla vestidas d'almugavars en a placha, en plan conquerindo Neopatria. Asinas que astí nos viyeremos. O diya 20 caldrá descansar-se un poquet porque remeratz que o 21 ye o mundialet anti racista. Tenetz o cartel y más info en o canto dreito d'iste mesmo blog, baixo o titol de “A convocatoria”. Dimpués de toda a participación que bi habió en as dos primers edición cal que ista rebuta d'anti racistas. Encara no ha feito as tres anyadas y ya ye un clasico. Norabuena a las mais d'a ideya!

A porra electoral que publiqué fa diyas en iste mesmo blog ya ha teniu bells participants. Un par de cosas cal adhibir. La una, que si no publicatz con o vuestro nombre / nick y queretz participar-ie, me invietz un correu dicindo qui sotz, u no tos podré convidat a la biera. A segunda, que ye de dar, ye que o plazo remata o diya 20 a meyanueit. Si queretz informar-tos más sobre as elecciones dende atra anviesta, La Enredadera en ferá un debat iste domingo. Bi son convidaus chent d'os verdes, CHA, IU, Puyalon, y chent que esfiende l'abstención u atras opcions. A fe a fe que será intresant.

Continando con ixe domingo, o rete de colectivos socials d'Aragón convoca una manifestación baixo o lema: “Aragón: esfender o territorio, cambiar o modelo”. O manifiesto ye, tamién en aragonés, en o blog suyo. Astí podetz leyer as reivindicacions que fan. Nos i viyeremos!

Como de cutio, remato con un video. Una colla que conoixié de casualidat en o quiosco d'o Parque Bruil: Gogol Bordello. Muito gran!

Exercendo lo pasquinismo 002

Una d'as cosas más repetidas y que más mal me fan en os oyius, ye os comentarios sobre as actuacions policials en os meyos de masas. Fa bell tiempo leyié en o Heraldo d'Aragón (Espanya), una noticia sobre a polemica por un video que se grabó en as fiestas de San Lorient de Uesca l'anyada pasada. I amaneixeban dos policials nacionals d'Espanya-Espanya (no yeran os autonomicos) prebando de detener a una muller, debant d'as protestas d'a chent que bi yera. En a noticia escrita i meteba que, como se podeba viyer en o video, os policials no solo no enristión a la chent sino que habioron d'aguantar faltadas, chifladas y de tot, tenendo muita paciencia. A noticia, afortunadament, ye disapareixida d'o Heraldo, asinas que no tos puedo meter o vinclo. Habretz d'aceptar a mía parola. Digo afortunadament porque o video no yera lo que se diz de buen viyer. Plegaban a decir que no heban quitau a porra en garra inte. Bueno, pues u han visto un atro video u yo tiengo una esmaixinación maravillosa. A policía, s'encerrina en detener a una muller aventando-la por totz os cabos, deixando-la meyo en coritatis y, sí, quitando a porra quan un par d'espectadors prebaban de charrutiar con ells ta que reblasen en levar-se a la muller. O Heraldo feba a interpretación d'un video que todas podebanos viyer, por si nos feba galvana de viyer os poco más de cinco minutos que duraba (a porra la quitaba en o minuto 4 u 5).

Iste ye un caso particlar, pero bi ha una frase que se repite terne que terne en telediarios, periodicos y mass-media de toda mena. "A policía habió d'enrestir" u "a policía habió de fer tal u qual cosa". As pasquinistas interpretan que no le'n quedaba atra, quan, qui hemos estau en manifestacions, sabemos que, asoben, enristen porque les agana, porque van drogadas, u simplament porque bell alto cargo les n'ha dito que lo faigan, pase lo que pase.

Pero a noticia que le plega a la ciudadana meya, fendo servir ixa mena de frases d'obligación (haber de), ye que a policía no podeba fer atra cosa debant d'a violencia d'as manifestants. En bells poquetz casos, quan l'actuación d'a policía ye masiau evident, u quan bella periodista ye enrestida, qüestionan ixas trazas d'actuar, pero siempre dando a versión policial. Ta quan a versión d'as manifestants, en todas y cadaguna d'as enrestidas policials?

Ampraus 050

Noviembre plega plen de actividatz, manis y cosas bien intresants. Asinas que pertoca un Ampraus quasi de tot de convocatorias.

Yesa: fa pocos diyas estié en Yesa (o lugar) viyendo o monasterio de Leyre y, ya que i yera, a paret de l'entibo. Que penica! Por o camín viyemos os lugars albandonaus. Artieda s'endebinada dende a carretera y no podeba deixar de pensar en a luita de tantas y tantas anyadas contra o recreiximiento. Y astí continamos. Luitando contra ixa sinrazón. Ista vegada as nuestras quiestas companyeras se'n baixan t'A Inmortal ta convocar una manifestación que ha d'estar un exito. Ista por dignidat y chusticia d'a de verdat. Prencipiará o 14 de noviembre (domingo) dende a siede d'a CHE, en o zaragozano paseu de Sagasta. O diya d'antis Dada, Azero y La Orquestina del Fabirol amprarán o suyo talento ta ista chusta causa. Será en o Vico Oliver, en El túnel, a las 21. As dentradas se venderán nomás en ixe puesto asinas que caldrá estar-ie un ratet antis ta guaranciar-se de pillar-ne una. Un gran concierto ta una gran causa.

Noviembre Antifaixista: Deban d'as enrestidas d'a ultradreita y d'a dreita sin más, a Coordinadera Antifaixista de Zaragoza y o Bloque Independentista de Cuchas, organizan un noviembre rusient d'actividatz que ya han prencipiau. O domingo estié en a visita guidada t'a exposición sobre l'anarquismo que bi ha en o Palacio de Sastago y, si ixe contina estando o ran, as chornadas serán sobrebuenas. Charradas, tallers, procheccions, teyatro... de tot. Tenetz un calendario en a web d'A clau roya (y en muitos atros cabos) con todas as cosas que se fan. Y viyeremos o qué pasa o diya 20 en Torrero. A viyer si o delegau d'o gubierno deixa a os faixistas fer lo que les agane como siempre u ista vegada cambean as cosas (que me pienso que no).

Quanta caspa s'ha visto istos diyas entre a visita d'o Papa y a manifestación d'os biens d'a Franja. Espanyolismo, catolicismo... De verdat somos en 2010? Franco morió u estió tot un suenio?

Ta rematar, gracias a lo facebook d'o Todopoderoso, pencho un video d'un Lipdub independentista (que tien o record d'o mundo) que facioron en Vic (Catalunya) a o ritmo d'Obrint Pas y a suya Flama de tot un poble en moviment.