Especial Pilars. Tierra de barrenaus 11x03

Ni unas fiestas sabe organizar lo facherío. Que guarda si ye sota-caballo-rei, que los Pilars levan fendo-se anyos arrienda y con formulas que ya se sabe que funcionan. Pero los mayordomos d’os amos de Zaragoza han quiesto zancochiar mesmo cualcosa tan simpla como la nuestra Fiesta Gran d’a ciudat.

Nos hemos trobau con uns Pilars jautos, sin morfuga fiestera por las carreras, con una ufierta cultural radida, monotona y menos plural que no nunca. En l’atro costau, un teixiu social y cultural que sabe fer-se valer y imple de conteniu y borina istos días a pesar d’a parrafiquera d’entrepuces administrativos y lochisticos y de l’acoso policial.

En lo nuevo programa en charramos, d’istas fiestas, d’os eventos que i hemos iu y de muitas cuestions relacionadas con la manera que i hai d’entender la cultura y l’ocio en Zaragoza. Antimás tendremos tamién la primera d’as historietas mallacaneras a on que Rubén nos recuenta muitas cosas. Anima-te a participar y ninvia-nos la tuya.

Por unas fiestas populars, plurals, diversas, libres y autochestionadas!

Recuerda que puez ascuitar toz los programas en Ivoox, Spotify y la web de Radio Topo.

Programa #176

 

La reforma d'a Plaza d'a Madalena

¡Con tot lo viello que me siento de cabo ta quan y guarda que contino sin aprender a malfiar d'os poders publicos! La zaguera ye la d'a reforma d'a Plaza d'a Madalena. Quan vide que se i feba obra me facié bien contento. Yera farto d'as recholas blancas que bi heba, que esbarizaban a-saber-lo y malas que pleveba quatre gotas hebas de pasar-ie con ficancia a-saber-la pa no estozolar-te. Quan devantoron la tierra, me facioron temer por los arbols, ixas alcacias granizas que tant buena brempa nos fan pa lo verano. Por lo que se veyeba, les heban tallau quantas venas. Me dicié que ya los de parques y chardins serían a la tisva pa que no se las cargasen. Prou que dimpués quan vide las placas de metal en lo Buñuel, sin que a los de patrimonio les deixasen ni tartir, pensé que como fucionase tot igual, a las alcacias les quedaba quatre días. La obra arribó a la fin y ya se fació la devantadera d'a plaza. ¿Resultau? Unatra azconada, neolochismo que habría de trobar un puesto en lo diccionario d'aragonés como sinonimo de zancochada.

La plaza d'a Madalena ye lo centro d'o barrio nuestro. Astí quedamos, femos fiesta, nos chuntamos, nos escunzamos, nos pretamos buenos capazos... Ye un tramenar contino de chent indo y venindo y tamién un espacio pa estar-te-ie. Dica agora, a lo menos. La reforma ha sacau las recholas esbarizosas, bien se vale, pero chunto con ellas han ixopau los bancos y la fuent. Tot lo que feba d'a plaza un puesto a on que estar-se-ie, a on que descansar-se, a on que trobar-se y capaciar. Tot cosas que se feban, ye claro, sin consumir. Y ixo, lo PP no lo puet permitir. La respuesta OFICIAL d'o concello, a la pregunta de si tornarán los bancos ye que no, que los bancos se feban servir pa lo chinchorreyo de droga y pa los carrileros y que "la chent" se'n ha queixau.

La chent d'o barrio lo que queremos ye los bancos, las papereras y la fuent. Poder disfrutar d'ixe barrio que, de tant bonico que ye, nos tien tot lo día en la carrera y no pas en casa. L'azconato torna a gubernar sin contar con las habitants d'o barrio. La Madalena somos de tercera y no quieren que faigamos fiestas ni que tiengamos lo barrio como queremos. Y prou que no quieren que nos organicemos. Lo van a tener dificil, porque imos a continar dando ferrete, chestionando lo nuestro ocio y los nuestros espacios sin entrar en los suyos marcos consumistas y capitalistas. Lo miercres 1 de marzo improvisaremos cadieras y baixaremos pa exichir que las ciudatz sigan humanas y habitables y no un catalogo de franquicias y puestos pa turistas. Y a l'atro día nos chuntaremos pa seguir organizando las nuestras fiestas. Y a l'atro ves-te-ne tu a saber. Que la Madalena ye un barrio vivo y por ixo no mos estamos quietas ni un segundo. Tos comparto contino lo manifiesto de l'acto d'o miercres:

Manifiesto ¿A ón son las nuestras cadieras? Por unas plazas y carreras pa vivir-las

La semana pasada, l’equipo de gubierno d’o Concello de Zaragoza inauguraba, dando-se firme bamba, la plaza d’a Madalena. Una reforma feita, como de cutio, sin contar con nusatras, las vecinas d’o barrio, qui bi vivimos y bi convivimos. Lo resultau fa burro falso de tot. Lo que yera lo bell meyo d’o barrio nuestro, a on que nos chuntabanos pa charrar, chugar, compartir… ha esdeveniu una zona de paso sin vida. Hemos pasau de tener una plaza a tener un vago bien enrecholau que fa imposible la convivencia, un puesto de paso, una carrera ampla.

Nos han deixau sin papereras, fendo dificil las buenas practicas de hichiene, salur y convivencia que suposa no deixar por tierra los repuis u los excrementos d’os cochos nuestros. Han sacau las fuents, obligando a las personas a consumir en establimientos d’hostelería u a fer servir augua en botella, con la consiguient cheneración de repuis. Antimás de que resulta paradochico que, en plena emerchencia climatica y a pocas d’aprebar un Plan d’adaptación a lo cambio climatico, no se facilite l’acceso d’as personas a un bien basico como ye l’augua. Y han dispareixiu las cadieras, las nuestras cadieras. Lo puesto que fan servir los zagals y zagalas d’o IES Pedro de Luna pa minchar-se l’entropan en lo recreu. Lo puesto a on que la chent gran se posa a charrutiar, a fuyir d’a soledat y solaniar-se. La parte a on que pais y mais se miran como chugan los fillos suyos. Y, en cheneral, l’espacio que fer servir pa estar-ie, pa trobar-nos, pa compartir, pa cudiar-nos, pa fer comunicat. Vivir la carrera ye un activo en salut que afavoreixe la calidat de vida y lo bienestar. ¿Ye que a iste Gubierno le fa miedo isto?

En respuesta a las queixas formuladas por las vecinas, dende lo concello dicen que s’ha sacau tot ixe mobiliario urbano porque “se feba servir por carrileros y pa chinchorreyo” (sic). Una respuesta que, amás de fer pudor de clasismo y prechuicios, nos deixa enarcadas, ya que atras reformas de fa poquet, como la d’a carrera Sant Miguel no s’ha teniu en cuenta ixos risgos y se i ha instalau cadieras y atros elementos urbanos. ¿Que la Madalena ye menos barrio que no atros? Pa iste Gubierno, ye cabolioso que sí. Que se sobreentiende que ye millor que no faigamos servir las carreras porque femos estorbo y porque no somos soque delinqüents. Ye mas que ofensivo, fa de menos a las personas que vivimos aquí y estigmatiza la pobreza.

Por desgracia, ista situación no ye nueva pa nusatras. Levamos anyos denunciando l’estau de qualques infraviviendas, la chentrificación d’o barrio u la enrona d’os vagos nuestros

Exichimos a lo gubierno d’o Concello de Zaragoza que instale de nuevas lo mobiliario que faiga d’as nuestras carreras espacios pa vivir-los. Lo nuestro ye un barrio diverso y de convivencia a on que i culle tot lo mundo y queremos que contine asinas.

Vecinas y vecins d'a Madalena

Lo Buñuel no rebla

El Buñuel no se rinde se coriaba iste cabo de semana en lo concierto de Los chikos del maíz. Dende que los chueces decidioron dar-le la razón a los suyos amigos d'o PP, la menaza d'o desaloixo fació movilizar-se a lo barrio d'o Gancho y a toda la resta de personas de Zaragoza que desfendemos lo modelo de Centro Social Comunitario que tant bien ha funcionau en istos anyos. La respuesta en la carrera estió eixemplar y masiva. Hue, manimenos, y deixando claro la nula intención de dialogo que tien lo gubierno municipal, s'ha feito l'anunciau desaloixo. Quieren que lo Buñuel torne a estar un edificio vuedo, enronando-se por cada día, aguardando a que, talment, en bell momento d'o siguient anyos se faiga un Centro Civico incapable de sustituyir ni una chiqueta parte d'a vida y actividatz que se i dinamizaban. Tot por puro odio -y miedo- a la organización popular, a las personas que contrimuestran por cada día que se puet treballar d'atra manera, dende l'autochestión, creyando alternativas a las institucions y los modelos capitalistas.

Los espacios fisicos colectivos son bien importants. No seré yo, que levo los zaguers anyos dando ferrete con ixo día sin atro, qui diga lo contrario. Pero si lo Buñuel acaba efectivament desaloixau, si perdemos ixe espacio, lo que no podrán espaldar ye lo que s'ha construyiu en tot iste tiempo. Plegarán nuevos espacio, u recuperaremos ixe, nos trobaremos en las carreras u empliremos los centros socials ya existents. Lo que ye seguro ye que d'una manera u atra Lo Buñuel seguirá vivo.

En lo siguient programa de Tierra de barrenaus charramos d'as fiestas d'a Madalena, d'o CSC Luis Buñuel y de tantas y tantas atras enrestidas contra l'autochestión de l'ocio y las fiestas y d'os centros socials. La mía intención yera compartir lo texto d'o manifiesto de desfensa d'o Buñuel hue, sin saber que, por desgracia s'iba a encertar con lo día d'o suyo desaloix. Aquí tenetz ixe texto que preba d'explicar lo que ye lo Buñuel y por qué cal desfender-lo. Las movilizacions no han feito que empecipiar, asinas que vaigamos-ie y desfendamos tot lo que ixe Centro Social ha suposau y suposará. Lo texto orichinal y todas las novedatz lo puetz consultar en la suya web.

MANIFIESTO “YO REFIRMO LO BUÑUEL”

En 2011 bellas vecinas d’o zaragozano barrio d’o Gancho empecipioron a dar-le vida a l’edificio abandonau de l’antigo instituto Luis Buñuel. Naixió asinas lo Centro Social Comunitario Luis Buñuel. Un espacio chenerau por y pa lo barrio, de manera comunitaria y asembleyaria, y que ha constituyiu un verdader centro cultural d’un d’os barrios mas populosos de Zaragoza.

¿Conoixes lo Buñuel? Te lo presentamos

Lo Centro Social Comunitario Luis Buñuel ye un prochecto colectivo chestionau por personas voluntarias que ofreixen lo suyo tiempo de manera altruista pa treballar por lo común organizando un ciento d’actividatz ubiertas a toda la ciudadanía.

¿A on ye? En Zaragoza, en la plaza Santo Domingo numero 15, encara que tamién tien una entreada por lo paseyo d’Echegaray (una puerta de color amariella). Ye en lo bell meyo d’o barrio zaragozano d’o Gancho. L’edificio ye de cabo d’o sieglo XIX, estió museu de Bellas Artes dica 1911 y siede d’o concello de Zaragoza dica 1965. Entre 1986 y 2005 fació d’instituto.

¿Dende quan? Lo CSC Luis Buñuel naixió en 2011 y dende alavez se i han sumau collas y colectivos que i fan un ciento d’actividatz pa los vecins d’o barrio d’o Gancho y pa toda la ciudadanía.

¿Qual ye la suya filosofía? 1. L’AUTOCHESTIÓN, aduyar a personas y colectivos a creyar, experimentar y transformar. 2: Ye un espacio UBIERTO a lo barrio y a toda la ciudat, sin mirar-se color ni ideolochía. 3. La enerchía d’o SOCIAL, enfilada pa lograr lo bien común, que plega en meta increyibles. 4: Lo Buñuel ye un espacio COMÚN pa prochecto y actividatz integraderas.

¿Cómo funciona? I participan mas de quaranta entidatz ciudadanas de caracter social y de voluntariau civil, incluyidas cooperativas d’iniciativa social sin animo de lucro. Qualsequier persona con una ideya de caracter social puet proposar-la a l’asembleya de l’asociación pa que s’aprebe por consenso y se faiga funcionar.

¿Qué actividatz se i fan? Arrienda. Por eixemplo, ye la siede d’a banda mosical de L’Almozara; cuenta con biblioteca y ludoteca; ofreixe espacio pa bailes en linia y ye la siede d’Artistas por la Paz; los suyos muros acullen una asesoría socio-churidica; se i fa clases de yoga, teatro, chimnasia pa mayors y danza; s’organiza un “mercau d’o tiempo” y i hai un “espacio pa lo silencio”, sin ixuplidar la chardinería u lo taller de clown. Totz los sabados la cocina solidaria reparte bellas 300 chentas y qui l’aprecise puet acudir a lo roper de baldes y a la botiga solidaria. S’organiza conferencias, tallers educativos, procheccions, mosica en directo, eventos solidarios.. y a-saber-las actividatz mas pa un publico de todas las edatz y procedencias.

¿Por qué nos movilizamos? Lo Gubierno d’a ciudat de Zaragoza pretende desaloixar a l’Asociación CSC Luis Buñuel lo venient 23 de chinero. Con la mida, iste puesto deixará d’estar un espacio verdaderament social y comunitario autochestionau, con tot lo que ixo suposa.

Han “promeso” a los vecins un centro civico de chestión municipal, promesa que pareixe de mal cumplir. Con tot y con ixo, si a la fin se convierte en un espacio que contine dando servicio a lo barrio, no será por atra razón que por lo esfuerzo de todas las vecinas que han estau istos anyos mantenendo-lo vivo y en uso.

Manimenos, muitas cosas se perderían con iste cambio. Por eixemplo, en un centro civico no son las vecinas qui deciden qué actividatz aprecisan ni puet esdevenir de rapiconté en un espacio de refirme mutuo y autocudiau pa las mas vulnerables, como ocurrió entre lo encadamiento. Tampoco no podría deixar-se como espacio pa las necesidatz que no lo mercau ni l’estau cubreixen como lo Rastro d’a Plataforma Social u la Olla comunitaria. I hai quantos atros eixemplos como istos. Lo modelo d’o Buñuel constituye un proceso d’experimentación social, refirme mutuo y integración radical, imposible de remedar en espacios de chestión municipal.

Los centros socials y los espacios vecinals son una realidat en ciudatz tant importants como Barcelona, Malaga u Madrit y alportan vida cultural, artistica y social alternativa. Pero, sobre tot, lo CSC Luis Buñuel ye un espacio integrador pa todas las personas que arriban nuevas a lo barrio y que troban, entre las actividatz que se i organizan, un puesto de convivencia imprescindible pa creyar retz vecinals con los habitadors d’o barrio y de toda la ciudat.

Lo CSC Luis Buñuel ha feito un centro civido a mida d’o barrio de Lo Gancho, un centro a peu de carrera intercheneracional y intercultural que fa barrio y fa vida. Lo CSC Luis Buñuel ye en lo corazón d’o barrio y en lo corazón de millars de personas que dende fa mas d’una decada i troban lo suyo espacio. Nomás en los zaguers quatre anyos s’ha feito 192.000 usos comunitarios.

Pero lo Gubierno d’a ciudat aprecisa tener lo control y decidir de manera unilateral qué se i fa y qué no pas. Lo proximo 23 de chinero procesderá a esfuizar-lo pa instalar un suposau centro civico. Lo centro actual cubre de sobra la demanda cultural d’o barrio que antimás ya disposa d’a Casa de Choventut Sant Pablo, la Casa d’Amparo, lo Centro de día Sant Blás, Zona Choven Ramóny Cajal…

Queremos una ciudat con diversidat d’espacios. Ye sano tener puesto con filosofías comunitarias y autochestionadas, mesmo mas quan contribuyen a millorar lo bienestar social d’a comunidat. Espacios libres a on que lo propio barrio chenera vida, con las suyas iniciativas, creya la suya realidat artistica y cultural. No siempre ye menester lo control institucional mientras se respete y beneficie a la sociedat. ¡Queremos lo nuestro Buñuel!

Por istas razons, qui firmamos abaixo, MANIFESTAMOS LO NUESTRO REFIRME A LO CSC Luis Buñuel como recurso social y que pueda asinas continar lo treballo suyo pa todas las personas que viven en lo barrio de Lo Gancho y en toda Zaragoza

Lo soto de Cantalobos. Zaratober 26

A pesar de tot lo suyo creiximiento Zaragoza sigue rodiada por entornos naturals de firmes valors. Tenemos la suerte de poder disfrutar-los, qui sabe por quánto tiempo, y de tener-los bien a man. Un d’ixos ye lo Soto de Cantalobos por a on que tantas zaragozanas gosamos de fer gambadas u esporte.

Tot seguindo Echegaray y Caballero, pasau l’azute de l’Ebro, la ciudat dispareixe de bote y voleyo baixo lo puent d’o tercer cinglo, dando paso a un paisache pleno de huertas a la dreita y con l’Ebro a la cucha. En un petén podemos veyer como lo Galligo, dimpués de traviesar tot lo norte d’o país, une las suyas auguas con las d’o gran ríu. Alto ye de facil veyer bell esparber mirando la minchanga d’o día. De verano, falcillas y codalbetz se’n fartan, por los campos d’alfalz y hordio, d’os bichetz que los pueblan. En l’augua, pescairetz, garras, gallos marinos, bernatz y toda mena de muixons aproveitan un entorno bien favorable pa la vida suya.

Lo camín, dimpués de pasar por bell puent, arriba dica l’Alfranca por una cursa de muit buen fer en bici. Astí tenemos, antimás d’o Centro d’Interpretación, lo palacio de Palafox, a on que diz que la población d’a ciudat fueron a escar-le pa que luitase contra los franceses. Antes, habremos pasau por quantos miradors que fan firme honra pa qualsequier que le faiga goyo alufrar a tot ixe vecindau con alas con qui compartimos ciudat.

Lo Gancho. Zaratober 22

Si no vivise en La Madalena, la mía segunda opción sería Lo Gancho. Ixe atro barrio chirmán, que en tiempos medievals yera rival, y que agora comparte tantas cosas con lo mío. D’una man, la suya composición etnica y social, barrachando etnias y orichens bien diferents. D’atra, la chentifricación, la pasa d’os centros viellos urbanos de tantas y tantas ciudatz. Ye barrio de vivir-se en las carreras, de botigas d’antes mas y de zaguer moda, de bars chics chunto a tabiernas clasicas, d’historias antigas en cada una d’as suyas cantonadas, de fiestas populars, dances y mosicas.

Lo conoixié porque con las mías amigas de l’instituto montemos en Las Armas, una d’as suyas carreras principals, una penya. Un guariche en un cobaixo que nian escusau teneba. Astí zorriabanos un poquet antes de marchar de borina.

Dende aquellas envueltas lo barrio ha cambiau a-saber-lo, pero entre mercaus de modernas y vermuts mosicals, por las suyas carreras, tabiernas y botigas, se sigue sentindo l’alentar d’un barrio vivo, con arrienda d’iniciativas de movilización y vitalización y con firme rasmia pa reivindicar los dreitos d’as suyas vecinas. ¡Gancho y Gallo, Sant Pablo y Madalena, barrios chirmans pa cutio

Lo Rollo. Zaratober 11

A finals d’os novanta la zona de Moncasi, conoixida como Lo Rollo, cuento que por lo nombre d'un d'os suyos piors bars, yera rusient de tot. Cada cabo de semana nos chuntabanos astí meya ciudat pa empifolar-nos y pasar un buen rato. De bars n’i heba a trompicuesco. Hue, no’n queda que bella decena. Entre los supervivients, Atrio y Posturas, dos d’os pocos que teneban un prochecto mosical y d’ocio coherent, diferent y no dependient de modas. Entre ixas paretz pasé buena parte d’a mía adolescencia y firmes horas de borina con los mios millors amigos. Astí conoixié un ciento de mosicas y vivié conciertos en salas con DeVizio u Piramys.

Lo modelo yera insostenible y a la fin s’espaldó, pa descanso d’o vecincau. Astí continan Posturas y Atrio, testigos de decadas de borina, pa seguir disfrutando d’una ufierta mosical que no se troba en guaires puestos d’a ciudat y d’un ambient sobrebueno.

A l'Atrio ya le adediqué un post fa tiempos. Aquí lo tiens pa leyer-lo.

Lo Medina Albaida. Zaratober 05

Dimpués de bell anyo demandando a mis pais que me quitasen de Corazonistas, a on que facié la EGB, consiguié que m’apuntasen a un nuevo instituto, en ista ocasión publico. L’edificio sisquiá existiba t’a part d’alavez. La matricla la habié de fer en lo cercano IES Pedro de Luna, a on que heban estudiau antes los míos chirmans. En lo Medina Albaida descubrié atra manera de fer clases, la d’a publica, a on que se me permitiba opinar y discutir, a on que no bi heba violencia de man d’os profesors y a on que compartiba clases con mesachas (Corazonistas en aquellas envueltas no yera mixto).

En ixos anyos estió lo mio dispertar politico y cultural. Estió lo tiempo tamién que facié amistatz que encara hue continan. De buena parte d’o que soi agora en tien culpa - u la responsabilidat - ixe centro y toda las personas que me rodioron en ixos quatre anyos.

L’edificio no ye bonico, ni falta que fa, ya que lo que ha d’estar ye funcional, pero las remeranzas que amaga son repolidas. Lo suyo nombre, manimenos, ye un d'os mas polius d'os de Zaragoza. Qui tenié la ideya, un d'os millors profesors que bi heba en la plantilla de l'instituto, morió poco dimpués de meter-lo. Fa referencia a lo pasau musulmán d'a ciudat y sustituyiba a lo popular Gasómetro que ye como le decibanos en primeras en estar construyiu en lo puesto a on que antes bi'n heba un.

Las mías historias de part d'alavez, las recuento en istos posts.

Sant Miguel d'os navarros. Zaratober 04

Antes de que yo entendese que lo cristianismo no yera obligatorio y que, en conseqüencia, abrazase l’ateísmo, acompanyaba a los mios catolicos pais cada domingo ta misa. La parroquia nuestra yera Sant Miguel d’os navarros. Cusira la entrada l’Arcanchel que le da nombre, como siempre, bien guerrer. Debaixo d’o suyo peu, chafa a lo mal, portiando en la man la espada que imparte la chusticia d’un dios que diz que ye tot amor.

L’apelliu d’iste Sant Miguel -“d’os navarros”- diz que ye porque astí estió un campamento de navarros que aduyó a Alifonso I en la conquista d’a ciudat y que Sant Miguel diz que tamién deixó las suyas cosas d’arcanchel pa, con la suya espada, cargar-se bell mulsulmán. Adintro estió la mitica Campana d'os cacegaus, que amostraba con lo suyo soniu lo camín de tornada t'a ciudat los días que bi heba boira preta que, en Zaragoza, no en son pocos.

Adintro, de chicorrón, lo cristianismo me pareixeba nomás aburriu. Tot y no tener lo tarabidau ideolochico que tiengo agora, nunca no le trobé garra sentiu a tot aquel ritual y a lo mormor d‘o mosén. Pa que no dase mal, mai y pai me deixaban levar-me bell libro, asinas que me foteba tot lo servicio limpio leyer, sin fer caso a los sermons que, como nino que yera, no adubiba a entender, y devantando-me y tornando-me a posar mecanicament quan sentiba que lo feba la resta d’a chent. Porque pa yo lo catolicismo, y la resta de relichions, nunca no han teniu guaire sentiu.

Lo Parque de Villafeliche #Zaratober 02

Cerqueta d’a casa a on que creixié ye lo Parque de Villafeliche, que se diz asinas dende habe ya bell anyo, pero que totz los que tenemos bella edat lo conoixemos como lo Canodromo, que encara existiba quan naixié. Ya yera enronau quan prencipié a ir-ie a fer gambadetas con bell par d’amigos y lo can d’un d’ells, a qui febanos servir d’enchaquia pa chuntar-nos de nueitz y fer-nos los nuestros primers fumarros. Yeran los anyos d’a heroína, asinas que no yera mica raro, en un puesto tant amagau, de trobar-nos bell yonqui.

Hue ye un parque repincho, bien ateclau y agradable, chunto a la mía quiesta Uerva. En lo bell meyo, una terraceta pa fer-te bell hordio. Hue, los cans que van t’astí, son tranquilos, chugarriando con atros cans, u disfrutando d’iste chiquet parque. La muller-alica, la escultura en bronce que da la bienvenida a lo parque a qui entra por Miguel Servet, cusira que nos los maltracten.

(D)Escribindo Zaragoza. Zaratober #00

"Zaragoza, la romana, mora d'a morería, cristiana y tamién chodiga, mosica de muitas chents..." canta Carmen París en una repolida canción adedicada a la mía ciudat. Aquí he naixiu, he creixiu, sigo vivindo y m'agradaría de morir. Nunca no he pasau mas d'un mes difuera d'as suyas mugas. Asinas ye la mía vida. Cuento que ni millor ni pior que la de dengún atro. Simplament asinas. Talment por ixo, porque no conoixco garra atra cosa, ye porque la quiero tanto. U talment porque la quiero tanto ye por lo que no he quiesto u no m'he atreviu a conoixer garra atra cosa.

"La amo, la odio, le tiengo un cariño ancestral", le deciba Jose Antonio Labordeta en lo suyo Zarajota blues. Bi habió un tiempo, no guaire largo, que la Immortal m'angunió, que pensé en deixar-la, en buscar en atros puestos un cubil a on que las mías pantasmas no podesen entrar, a on que fuyir d'os monstruos que habitaban las carreras d'a ciudat. No marché, entre atras razons porque ni sisquiá podeba, pero tiempo dimpués entendié que ixos monstruos yeran adintro de yo y que tot y que ixopase, m'acompanyarían. Asinas que, en realidat, sisquiá plegué a odiar-la. Creigo que no puedo.

Asinas, mas de quaranta y tres anyos dimpués de sentir-la por primer vegada, arribaba iste octubre. Y con ell, lo inktober, ixe mes que en los zaguers tres anyos m'ha teniu limpio escribir. Un relato cada día d'o mes, plegando a fer-ne novanta y tres que publiqué, en formato papel, en los fanzines Tintubre, Inkventos d'octubre y L'aragoMés. Iste anyo no me veyeba con fuerzas, tiempo ni inspiración pa fer-me unatro inktober de relatos. Ni m'aganaba. Pero como no me puedo estar ni quieto ni callau, empecipié a preixinar qualque alternativa. 

A partir de manyana empecipia Zaratober. Cada día iré penchando una foto d'a mía amada ciudat de Zaragoza y tos recontaré bella historieta. Por un regular, remeranzas de yayo. De cabo ta quan, curiosidatz historicas. Bi habrá espacio pa la reivindicación, no lo dubdetz. Y lo que no faltará, en garra d'os posts, ye carinyo por la bimilenaria ciudat que tiengo la suerte d'habitar.

La gaita de l'autochestión (y viceversa)

Las fiestas d'o Pilar me fan goyo, y no, no soi penyista. Ye una opinión impopular, mas que mas entre un amplo sector d'a intelectualidat y lo culturetismo local, pero ye la mía. Explico a sobén, a qui se me mira como si fuese un marciano quan digo ixas cosas, que istas son las mías fiestas mayors, que soi zaragozano, sin un lugar referencial, y las fiestas que siento como las mías, como LAS FIESTAS son istas, las d'o Pilar. No cal que me digan que i hai cazurrismo a embute, que la programación siempre, con gubiernos de todas las colors, ye chusteta, y que me faigan toda la retolica de que son espanyolistas y relichiosas. Cada un triga las suyas contradiccions y ista, si fa falta, será una d'as mías. 

Pero una d'ixas cosas que me feba argüelloso d'as mías fiestas yera que ye un d'os pocos momentos de l'anyo a on que lo folk tien un espacio central y vistero en la ciudat. Por un regular, en la Plaza Sant Felipe, pero tamién en la d'o Pilar y en Sant Bruno. Aquí pa fiestas, la mosica tradicional aragonesa suena, y muito. U, millor dito, sonaba. Dimpués d'os anyos de pasa, las fiestas tornan a poder-se celebrar como siempre y las amants d'a cultura aragonesa, en candeletas aguardando la programación mosical d'estianyo, nos trobamos con que lo folk ye dispareixiu. Lo nuestro patrimonio mosical mas autentico s'esborra, de rapiconté, d'a ufierta cultural pa istos días. Remaneixe, ixo sí, una parrafiquera d'actuacions de grupos tributo y de bandas que, sin tener-ne yo mica en contra, no aportan cosa que no pueda sentir-se qualsequier atro día en la ciudat.

La mosica tradicional ye la que da personalidat a las fiestas d'un lugar u ciudat. Sin ella nos quedamos con una ufierta mosical que podría tener-se igual en Alicante, Badajoz u Santander. De feito, a fe que en qualsequier d'as fiestas mayors d'ixas ciudatz sí que i hai bella representación d'a cultura mosical tradicional local. Azcón y lo suyo gubierno apuestan unatra vegada por enrestir contra lo patrimonio aragonés. Lo que quieren ye uniformidat cultural que no i haiga mica diversidat. Son cazurros que s'avergüenyan d'una d'as choyas que tenemos en Aragón, que ye la nuestra mosica, y que nomás conciben una d'as suyas expresions, la ixota como digna de tener espacio. Ixo sí, en la suya pior y mas elitista versión, aluenyada d'o canto popular que estió y encara ye pa muitas.

Manimenos, si qualcosa tien la mosica tradicional ye lo suyo caracter de popular. Las folkis somos pocas, pero tenemos -tienen, que lo talento pa lo de tocar trastes a yo ni se m'acerca - ferramientas pa sobrevivir a ababols y carnuces muito piors que lo fan de Taburete y la suya clica mafiosa. Baixo la etiqueta de #PilarSinFolk m'han arribau en istos días iniciativas arrienda pa fer rondas y quedadas pa bailar y chuflar las gaitas, tanyer los chicotens y dar mal con las donzainas, entre trago y trago y prenendo las carreras d'a ciudat, que son nuestras. Porque si no quieren que se nos sienta, bufaremos mas fuerte. Las gaitas s'autochestionarán y la mosica tradicional aragonesa, ixa que tant argüellosas habría de fer-nos y que tant d'amagatons amaneixe en los medios d'o país, tornarán en istos días a emplir Zaragoza, a pesar d'o suyo concello. ¡Garra fiesta sin gaiter!

Bicis, informativos y transformacions

Pasó lo día d'as bicis. Una chornada que s'aproveita pa remerar las reivindicacions de qui la femos servir de cutio. S'encertó que teneba la tarde alto u baixo libre pa poder asistir a la manifestación y, tot y que la plevia espantó a buena cosa de chent, nos chuntemos buena clica pa pedaliar por la ciudat. Astí yeran, como en convocatorias anteriors, quantas personas que levan anyos arrienda en l'activismo ciclista compartindo bicifestación con una patacada de chovenastras que tamién quieren poder disfrutar d'iste medio de transporte. La presencia policial  sirvió, como de cutio, pa creyar bell problema a on que no bi'n hese habiu. Con tot y con ixo, la mani recorrió las carreras zaragozanas recullindo la solidaridat d'a-saber-los ciudadans que nos animaban dende las aceras, los carrils bici y los autos. 

Ya dimpués, en casa, tenié la error d'enchegar la televisión. Feban un noticiario estatal y charroron d'o Día Internacional. Lo reportache empecipió charrando de l'augmento de vendas de bicicletas en los zaguers meses y d'os problemas que tienen fabricas y botigas pa adubir a fer todas la que se demanda. La gran puyada d'o uso d'a bici lo acumulaban a una hipotetica mayor conciendia medioambiental y a las millors infraestructuras ciclistas urbanas. Lo que, obviament, ye verdat. Pero ixuplidoron un d'os factors que influyó, y firme, dende que empecipió la pasa, y ye la cerina a fer servir los transportes publicos. Somos muitas las personas que nos obligoron a treballar de manera presencial, ignorando de tot las recomendacions sanitarias y metendo en periglo la nuestra salut. Muitas d'ixas personas feban servir de cutio metro, tramvía u bus pa ir t'os puestos de treballo y troboron en la bicicleta una alternativa muito mas segura. Lo treballo ha estau un d'os grans vectors de contachio que, manimenos, no se'n ha charrau mica, centrando lo debat en botelladas y borinas.

Me clamó mas l'atención una segunda frase que facioron servir y que me remeró a qui da gracias a bell dios quan las advogadas les libran d'a garchola u las medicas d'a muerte u de bella malotía. Dició lo presentador que "Por suerte, las ciudatz cada vegada acullen millor las bicicletas", como si los plans urbanisticos los dictase bell chuego d'azar y en los zaguers anyos hese saliu la tarcheta d'o carril bici u d'a pacificación viaria. Ye claro que no ye asinas. Las ciclistas hemos habiu de ganar-nos cada centimetro de carril bici y cada dreito conseguiu a pur de dar ferrete en administracions y medios de comunicación, con lo refús d'un sector d'a sociedat que s'encerrina en una urbanidat cochecentrista y, en lo caso de Zaragoza, campanyas continas en contra de l'Heraldo .

Como en quasi tot, ye l'acción colectiva la que fa cambiar la realidat. Rai si charramos d'os dreitos d'as mullers, las aragonesofablants u, como ye lo caso, las ciclistas. Y tot abance conseguiu cal desfender-lo con firme rasmia porque, malas que t'espiguardas un inte, pueden vulcar-te lo treballo de decadas. Lo numbro ye un factor importantismo en toda luita colectiva y, a diferencia d'atras, la ciclista cada vegada arrocla a mas chent. Asinas que seguiremos transformando la ciudat pa fer-la millor pa todas, ciclistas y no ciclistas.

Lo catalán en lo concello de Zaragoza

En lo momento periodistico que vivimos quasi ni s'amagan las intencions dezaga d'os titulars. En un d'ixos diarios dichitals que tanto amaneixen en grupos de WhatsApp y retz socials, una periodista titulaba "El catalán puntúa como el inglés para elegir plaza en el Ayuntamiento de Zaragoza" con caboliosa intención de fer encarranyar-se a lo publico obchectivo d'ixe medio. A yo, lo puet tener seguro, m'encarranyó prou. ¿Cómo se puet consentir que anglés y catalán den los mesmos puntos? ¿En qué sociedat vivimos? ¿Ye que no somos conscients d'a importancia d'as luengas? Pa yo no i hai discusión posible y a fe que todas las lectoras seretz d'acuerdo que lo catalán habría de dar mas puntos que no l'anglés. Todas dos son luengas igual de respetables como toda la resta, pero qui sabe catalán, antimás de conoixer-ne una, ye colaborando a protecher un patrimonio cultural propio d'Aragón que ye en serio periglo. Ye fendo posible mantener un herencio lingüistico milenario que sobrevive malament en la nuestra tierra, mientras que l'anglés tien la suya supervivencia asegurada. No nomás por estar la luenga de l'imperio, la mas aprendida d'o mundo y una d'as mas fabladas, sino porque, a diferencia d'o catalán, todas las ninas y ninos la estudean obligatoriament en las escuelas encara que no siga una d'as luengas oficials d'Aragón.

Somarderías aparte, tot lo que i hai tanto en lo titular como en la noticia ye unatro eixemplo d'o espanyolismo y la incultura lingüistica tant ixemenada por la nuestra tierra, empecipiando por lo nuestro president y lo suyo primoroso librito.

La reacción a lo titular en un mundo normal, sin prechuicios lingüisticos, sería un "oh claro". ¿Por qué iba a contar menos una luenga que atra a l'hora de decidir destino adintro de l'organigrama funcionarial d'una ciudat a on que garra d'ixas luengas ye oficial? Pero por desgracia no vivimos en ixe mundo y las luengas tienen unas escalas d'importancia. En lo cuerpo d'a noticia s'explica que lo criterio pa dar mas puntos por fablar-se una luenga ye que ixa s'amuestre en las EOI d'Aragón(1), a on que se puet aprender anglés, francés, alemán, italiano, chino, ruso y catalán. Explica tamién, que los puntos no sirven pa fer-se funcionario sino pa trigar destino entre los muitos puestos d'o concello a on que se incluyen administrativos u incheniers, por eixemplo.

Que s'haiga trigau l'anglés pa lo titular no ye mica casual. ¿A qué no resultaría tant efectista si fuese "El catalán puntúa como el italiano para elegir plaza en el Ayuntamiento de Zaragoza" u "El italiano puntúa como el inglés para elegir plaza en el Ayuntamiento de Zaragoza"? En l'imachinario d'a nuestra sociedat l'anglés ye l'idioma que CAL saber, lo prestichioso, l'important, la luenga de l'imperio. Por dezaga n'i hai atros, como lo francés y l'alemán, que tienen bella utilidat, sobre tot si vas a treballar en seguntes que campos empresarials. Porque lo solo motivo que puet tener un hispanofablant pa aprender una luenga ye l'economico, ixo ni se qüestiona. L'italiano, en ixa mesma linia ideolochica, a lo menos ye un idioma de verdat y te puet fer honra si vas t'alla de turismo. Lo chino y lo ruso nomás se puet entender que s'estudien por las debantditas qüestions economicas. Y dimpués de tot ixo ya ye lo catalán, que no vale pa cosa, que mesmo belún le niega la suya naturaleza de luenga. Deciba no sé qui, en modo somarda, que "en Espanya todas las luengas sirven pa comunicar-se fueras d'o catalán, l'euskera y lo gallego que sirven pa hoder".

Posiblement, garra d'ixos funcionarios faigan servir garra d'ixas luengas en lo suyo treballo cutiano. Si en aprecisasen beluna, sería requisito pa acceder a ixe puesto. Pero nomás una ye sospeitosa. Nomás d'una i hai una asociación - los nacionalistas lingüisticos de cutio - que se'n queixa. Diz, un d'os portavoces d'ixa clica que "Un ciudadano de Gerona, por ejemplo, tendrá más facilidad para sumar puntos que uno de la misma Zaragoza que no tenga conocimientos de catalán". Claro. Y uno de Pequín. U de Pau. ¿Quál ye lo problema? No suma mas puntos por estar de Beijing, Pau u Chirona. Los suma por saber una luenga y tener un titol en ixa luenga.

A la fin, si preguntas a la chent que fa istos razonamientos, si en bell momento han teniu la corrección politica de reconoixer lo catalán como luenga y la suya importancia patrimonial y cutural, en que forigas bell poquet surten las suyas verdaderas motivacions. No quieren que lo catalán - u qualsequier atra luenga minorizada - existan. No quieren que sentir-la en las carreras, en las televisions, en las aulas, en garra cabo. Son a favor de que se charre nomás en la esfera privada, a on que lo molestoso soniu d'ixas parlas disidents no emporque los suyos oyius. Son en contra de que dé puntos pa un traslado, prou que sí. Pero tamién de que s'amuestre en las EOIs, u en las clases de primaria y secundaria. De que tiengan espacios en radio u televisión. Lo dito: de que existan. Son la chent que espaldaría la Seu de Zaragoza pa fer-ie un bloque de pisos. No tos ne ridatz: lo facioron con Averly.

I hai tanto a cambiar socialment pa que s'entienda, de verdat, que las luengas - todas las luengas - son utils y que las luengas - todas las luengas - son patrimonio, que enacara que las administracions y lo mundo educativo empecipiase con firme rasmia y convicción manyana mesmo me pienso que nos costaría a-saber-lo veyer los primers resultaus reals. Como de toda manera ixo no va a pasar, nos toca a nusatras, la chent que sí que entendemos que la diversidat lingüistica ye un tresoro, explicar-nos y explicar-lo terne que terne, prebando a lo menos de que qui tienga una mica de sensibilidat cultura nos ascuite.

(1) Sobre beluna d'as reaccions d'a chent quan les explicaba que aprendeba catalán en la EOI de Zaragoza, escribié iste post.

De cursa por Zaragoza y Inktober2020. Tierra de barrenaus radio 7x05

Las zaragozanas, igual como las habitants de quasi todas las ciudatz, gosamos de salir d'a nuestra urbe malas que podemos. Lochicament, relacionamos gudrón con treballo y mont u placha con tiempo libre y, a ormino, ixuplidamos que en la nuestra propia localidat, sin traviesar las mugas municipals, tenemos naturaleza a trompicuesco que podemos disfrutar. L'encadamiento que nos ha tocau por lo d'a pasa nos deixa sin poder pasar d'ixa muga. Sabemos que a muitas d'as oyents, igual como a qui escribe, les fa goyo de veyer una mica de verde quan las fayena lo permite. Asinas que trayemos pa istos días un Tierra de barrenaus de servicio a on que Tamara, la educadora ambiental d'o programa, nos consella quantas rutas de naturaleza sin abandonar lo termin municipal. A peu u en bici, podremos conoixer una mica mas la ciudat que habitamos y, asinas, querer-la un poquet mas.

La segunda parte ye destinada sobre tot a las personas que nomás ascuitan lo programa, ya que i charro d'o reto #Intkober y d'os 31 relatos publicaus en iste blog, que ya puetz leyer aquí. Antimás, leigo lo numero 29, Calcero, un d'os míos favoritos. Si tot va bien aspero poder publicar en papel la replega d'os trenta y un relatos en lo primer trimestre de 2021 y poder presentar-lo pa compartir con las lecturas un ratet, pero ixo, como tot, penderá d'a situación sanitaria.

En la parte mosical, ya tardaba masa a presentar-tos un tema d'un d'os mios mosicos favoritos, feito pa la Banda Sonora de La mort de Guillem, que parla de l'asesinato de Guillem Agulló y d'o posterior chuicio a los faixistas que lo matoron. En lo calaixo de cancions, empecipiamos unatra categoría, la canción literaria, a on que tos proposaré temas que tiengan relación con la literatura. En iste primer caso, un poema d'un autor uruguayo que le mete mosica una colla de Mallorca que leva dende 1997 fendo-nos bailar. 

Programa #88

De visita a un Ebro creixiu

Quan, en dias como istos, l’Ebro baixa creixiu, furo y amplo, fa goyo baixar a veyer-lo. Dende la seguridat d’a marguin dreita, a quantos metros d’altaria sobre las auguas, impresiona veyer lo río fendo-nos remerar que lo cauz ye suyo tot entero. Que cada metro que le hemos sacau ye nomás un ampre temporal que nos permite fer servir pero que, en qualsiquier momento, nos puet esfuizar-ne, que pa ixo la tierra ye suya.

Ahiere, como en tantas atras creixidas, baixemos a mirar-nos un d’os nuestros ríos. Lo mas sinyaler. Los patos iban espisguardaus, mirando nuevos puestos a on que estar-se pa aguardar la medolla que les chitan las chubiladas, en un inconscient exercicio de desobediencia civil debant d’as ordenanzas municipals que viedan alimentar a la fauna. Atras aus, manimenos, yeran bien tranquilas. Los pescairetz s’aprestaban a pasar una nueit mas, cada ún en lo suyo camal de l’arbol que levan quantos anyos fendo servir de dormider. Un bernat pescataire, posau un troz d’o camín royo que encara remaniba sobre lo nivel de l’augua, iba pescando lo que pillaba. Tant aprisa que si no yeras bien a la tisva nian parabas cuenta de que s’heba moviu. Y entre lo dormider de pescairetz y lo territorio de pesca d’o bernat, un garrapescaire gran y argüelloso, pareixeba cusirar tot lo río dende una branca que sobreceba de l’augua.

Admirau como siempre por los rapedos cambios que fa l’Ebro en istos diyas, me pensaba en cómo lo vivirían todas las anteriors civilizacions que pasoron por la ciudat. Sin la seguridat que nos dan las infraestructuras actuals. Talment, a la fin, tenesen menos miedo que no nusatras, en saber por la experiencia propia y por la d’as personas mas grans d’a ciudat, dica a on arribarían las auguas. Encara que no tenesen las debantditas infraestructuras, probablement tampoco no las aprecisasen, en no haber estau tant ababols de construyir en puestos que sabeban que, de cabo ta quan, s’engaronaban.

No ye l’Ebro lo solo río que he visto creixer en la mia vida, afortunadament. Y en atros cabos, he visto arrigachuelos que, de rapiconté, esdeveniban un flumen d’augua que arramplaba con tot. Ye imposible no sentir miedo debant de fenomenos asinas, que te recuerdan la febleza propia y la frachilidat d’as nuestras bambosas construccions.

Manimenos bi ha una polideza salvache en veyer lo río asinas, desafiando a qui preba de domesticar la tierra en cuenta de aprender a convivir con ella. Dragaus, paretz, azutes y demás costodias no son que nyapas pa pareixer que se meten solucions a los problemas de qui vive cerca - u adintro - d’o cauz. La chestión fluvial ye atra d’ixas cosas que no se pueden solucionar a pur de cimento.

Muitos d’istos afers - lo funcionamiento d’o río, lo tresoro de vida que i aculle, la (in)utilidat d’as infraestructuras - no me las amostroron de mas choven. He habiu d’aprender-las dimpués, y gracias en buena parte a la chent que ha invertiu parte d’o suyo tiempo en ensenyar-me-las. En la ciudat d’a Expo de l’augua y en lo país de rios que ye Aragón, habríanos de tener muito mas conoiximiento sobre lo tema, y no recurrir de manera acritica a la cantidat de topicos desinformaus que se puet sentir en los partes y rufiertas d’os medios. Recursos educativos, n’i hai a trompicuesco, y nomás cal investigar bell poquet pa trobar-los. Conoixer los ríos ye conoixer una d’as partes mas importants d’o país, obligación pa qualsiquier que diga amar Aragón y lo suyo paisache y una buenisma manera de disfrutar mas d’o nuestro entorno.

¡Rondadora, mas que rondadora!

Fa bell diya penchaba en Instagram una foto d'un d'os arbols de l'amor que proporcionan la mosquera d'a Carrera Universidat y la Plaza d'a Madalena. Las suyas flors, con ixe rosa tant repoliu, son un d'os sinyals de l'arribada d'a primavera a Zaragoza. Veyer las carrerotas d'o mio barrio plenas d'ixas colors me posa a-saber-lo contento. D'atra man, por la parte de l'Ebro entre lo puent de Sant Chaime y lo de Fierro, se veyeba esvolastriar lo domingo pasau buen amiro de volandrinas - que anuncian la primavera al alborear - minflando-se de bichetz y alegrando lo ciel d'A Inmortal. No tardarán guaire a estar acompanyadas de codalbetz y falcetas a embute. Sí, la primavera ye aquí.

Le cantaban Los Delinqüentes, "despendindo-se de l'abrigo". De toda ixa parrafiquera de napas de ropa que nos protechen d'a fredor y lo cierzo y que fan fascals en las mesas y barras d'os bars de nueitz. "Arribó la primavera con presents pa totz: / un ventilador, estió lo primer present / pa que se saquen las boiras grisas en los diyas malos /  que se leve la vasuera d'os aires contaminaus". Talment siga por lo fotoperiodo. Talment por la calor. U por tornar a trobar-nos en las carreras. Pero lo menos en lo mio caso, pareixe que ixe debantdito ventilador efectivament se leva las malas boiras y fumos.

La Ronda de Boltaña debeba tener d'hibierno la mesma sensación que yo quan escribió "¡Qué impaciente t'aguarda lo país / con un ramo de flor de l'aliaga!".Y ye que malas que pasa la cincomarzada ya me miro totz los maitins por la finestra a mirar si ya ha amaneixiu a la hora de marchar t'o treballo. U si puedo deixar-me en casa lo gorro y los esguants. Pareixe que lo pior de l'anyo queda dezaga y que agora empecipia de verdat la vida: "¡Primavera has arribau a la fin! / ¡Rondadora, más que rondadora! / Remudau y de fiesta t'aguarda lo país, sospirando d'amors por tu". Como si lo hibierno fuese qualcosa antinatural que nos mete a preba por cada anyo.

Los alerchiosos como yo lo pasamos malament con ixe "¡Qué volar de semillas al sol!", pero vale la pena lo moquero y bell anti-histaminico en la pocha por si un caso, por veyer "ixa mar d'almendreras en flor". Lo diya pareixe lo doble. En las terrazas no se i culle. Tot lo barrio deixa las suyas casas y imple las carreras. "¡Vaya noche!, ¿Quién piensa en dormir?". Las plantas follan y fan flors. Los animals empecipian a festellar y los humanos organizamos toda mena de fiestas y borinas. Arriban la fiesta d'o sol, Sant Chuan y, toda la temporada festivalera que se prolargará por lo verano. Los viaches por un país que dimpués de "tot un anyo soniando con tornar-te a veyer" no quier malfurriar ni un solo segundo d'a estación.

Ixe esclatiu de vida s'ha emplegau como recurso literario un ciento de vegadas. George RR Martin fa d'as estacions un d'os leit motivs d'a suya Canción de chelo y fuego. Lo gran enemigo d'a humanidat, y d'a vida, ye l'hibierno y la suya representación fisica en forma de Caminant Blancos u Atros. En politica se fació servir, en una gran campanya de marketing, como sinyal d'asperanza d'as revolucions arabes, encara que ya sabemos todas como acabó aquello. Con ixe sentiu de tornar la vida y la color a un tiempo de angunia y foscor, naixió la Primavera Valenciana, que Aspencat  le cantaba: "Naixen primaveras cada maitín en lo tuyo chardín. Cautiva los tuyos sentius. Empecipian nuevas primaveras en lo tuyo camín. Crema lo destino. Ilumina l'horizont de hue".

Nos fa falta la primavera, y por ixo la prenemos con tantas ganas. "La nuestra riseta... combustible esencial pa vivir", seguindo con la letra d'Aspencat. De tot lo que pasa entre Pilars y la fiesta d'o Sol, me'n sobra la metat. I hai fans de l'hibierno. En conoixco quantas y nunca no las he entendidas. Atras, barrunto que ye mas postureo que no atra cosa. Pa yo ixos meses son por demás y la suya sola función ye valurar lo que arriba dimpués. Por yo, que ista estación se quede "un anyo con yo a vivir, y que en ninvien unatra en abril!"

Sin mas suenios que portar

Dende iste chueves Zaragoza ye un poquet pior. La librería Los portadores de sueños baixaba por zaguer vegada la suya persiana. Adintro quedaba a-saber-los libros sin vender y una ripa de buen treballo que, a lo menos en ixe local, ya no continará. Toda una pena que fa d'a nuestra ciudat un puesto con un poquet menos de cultura.

Istos zaguers diyas, cada vegada que pasaba por la suya puerta, feba una uellada enta l'interior, rebutient de clients alparciando los libros u de capazo con los librers. "Si hese estau asinas de plena antes, probablement no les hese caliu zarrar", pensaba. Y contino empecipiaba a encarranyar-me a yo mesmo por no haber mercau mas a soben. La mayoría d'os libros los pillo dreitament a l'autor u l'editor en las ferias, y quan en mercaba en librería, Los portadores no yera la unica que teneba como referencia. Asinas que puedo contar con los didos d'as mans las vegadas que m'he i deixau los chanfles.  Ixo yo, que soi parte d'o target. Asinas que cuento que un porcentache altismo d'a chent que conoixco probablement nunca no i haiga gastau garra perra.

Los Portadores yera un puesto a on que se yera bien. A on que te podebas estar firme rato veyendo de tot y fendo ixa lista mental de "libros pa leyer quan tienga bell rato". Siempre que bi iba me sorprendeba qualcosa, de mal trobar en atros puestos. Obras que nian heba sentiu parlar-ne pero que a escape esdeveniban obchecto d'a mia curiosidat. Autors que ni d'amagatons amaneixeban en los repalmars de fnacs y casasdellibro. Istos diyas me i soi pasau bell par de vegadas. Tiengo una memoria horrible, y no quereba olvidar Los Portadores, asinas que decidié de chupir-me d'a suya ulor, de fer-me un plano mental d'a distribución d'o mobiliario, de rechistrar lo "paisache" que se columbraba dende la parte d'alto. Entre las suyas paretz fue fendo orella d'as conversas alllenas, pa saber de qué charraban. Quasi todas, de literatura. Obviando lo feito de que la librería zarrase. La vida contina y queda masa libros por leyer.

Me siento culpable de no haber mercau bell libro mas a soben. Acumulo tamién parte de culpa a lo Sistema. No porque me pague poco, que tamién, sino sobre tot por deixar-me tant poco tiempo pa poder leyer. Si en tenese mas, regular que me podría leyer quantos libros mas cada anyo. Me fa miedo que zarre Los portadores porque creyeba que les iba millor. Yera un buen puesto, con un modelo de negocio serio y solido, enfilau a un perfil de client prou fiel. Feban las cosas como creigo que cal fer-las. No tiengo ni un pero a la suya trachectoria. Y manimenos zarra. ¿Qui será lo siguient? ¿Quál d'as mias botigas favoritas será sustituyida por un Kentucky Fried Chicken en 2019? Zaragoza se fa mas hostil por cada buen puesto que zarra.

Ixe zaguer diya que i estié me levé "Acceso no autorizado" de Belén Gopegui. Leva prou tiempo en la lista de "pa leyer", pero he de reconoixer que lo he feito mas por fetichismo que por atra cosa. No recuerdo quals d'os libros que tiengo por casa merqué en Los portadores, asinas que iste ha esdeveniu de camín en "Lo libro de portadores". Lo libro que, cada vegada que lo veiga en lo repalmar, faré acordanza d'ixa botiga que podiemos disfrutar por tres lustros en un callizo de San Miguel. 

M'he promeso estar mas a la tisva y fer-les mas caso a totz los chicotz negocios que fan parte d'a ciudat que quiero. Pero de vez sé que ni los diners me dan pa guaire mas, ni tiengo mas tiempo disponible pa la lectura. Mesmo he de contar con lo problema espacial d'una casa de cinquanta metros quadraus. Pero si qui me leye sigue mercando en las macrolibrerías de cadena y explotación laboral, de ubrir los domingos, d'emplir de best-sellers los suyos escaparates, por favor, que le dé una oportunidat, u dos, u las que faiga falta a las librerías chiquetas, de barrio, las que creyan espacios literarios, las que t'entienden quan les parlas. Con ellas, las ciudat, y la vida, ye muito millor.

Con la bici por Independencia, un diya mas

Lo que me pasó un maitin d'octubre estió un déjà vu de tantas y tantas vegadas que me ha pasau, y de tanta y tanta chent que vive lo mesmo diya par d'atro. La movilidat en Zaragoza va millorando, prou que sí. Levo dotze anyos movendo-me con bici de cutio por la ciudat y s'ha iu notando como por cada anyo la convivencia con la resta de vehiclos ye millor. Pero con tot y con ixo, sigue habendo-ie carnuces como lo taxista que me pasó debant aquell maitin.

Iba circulando por la calzada, por a on que la lei diz que he de ir, enta lo Paraninfo. Como siempre, por lo bell meyo d'o carril, cosa que pareixe que no adube a entender bell conductor, asinas que talment calga explicar-se. Lo primer de tot ye aclarir que tiengo tot lo dreito a ir por la parte d'o carril que m'agane. Soi un vehiclo que cal repectar como totz. Si decido circular por la dreita d'o carril ye la mia opción. Lo segundo, y muito mas important ye la mia seguridat. Circular por la dreita significa que un porcentache d'autos va a sentir que puet pasar-te debant sin guardar la distancia de seguridat. Qualsiquier que haiga circulau por Independencia, u por qualsiquier carrera d'a ciudat, por la parte mas a la dreita d'o carril sabe a qué distancia le pasan los autos. Si circulamos por lo bell medio d'o carril ye precisament pa que no se nos pase debant, porque con que un solo auto te pase sin mantener la distancia de seguridat, ya te yes chugando la vida innecesariament.

Iste feito, en atras vías no suposa garra problema por un regular. Belun, niervudo, te chufla de cabo ta quan. Cada vegada menos, afortunadament. Manimenos, en Independencia, existe unas zonas a on que la calzada d'ixampla, encara que ixa zona no ye pensada pa fer maniobras d'adelantamiento. Ni a bicis ni a dengún. Seguntes confirmó la propia policía local de Zaragoza a traviés d'o suyo Twitter ye vedau pasar debant a qualsiquier vehiclo en movimiento aproveitando la zona adoquinada. Incluyiu, prou que sí, a las bicis. Adintro d'o carril ye imposible mantener la distancia de seguridat. La zona adoquinada no se puet fer servir. Asinas que, basicament, ye prohibiu pasar debant a una bici en Independencia.

Y ixo ye chusto lo que me fació aquell maitin lo taxista carnuz ixe. Aproveitando la zona adoquinada, me pasó a menos de meyo metro, metendo-me en periglo y conseguindo la chesta de arribar 5 segundos antes que no yo a lo semaforo.

Ixa ye atra d'as consideracions que cal fer sobre istas maniobras en Independencia. Iste paseyo ye zona 30, asinas que no se podría correr guaire por lei. Pero antimás gosa de tener prou trafico, mas que mas de maitins que ye quan me pasó isto. Y pa forro de bota, los semaforos son sincronizaus de tal manera que ye quasi imposible pasar-lo d'una vegada mesmo en condicions favorables. Quasi todas las vegadas que bell auto m'ha pasau debant en ista carrera, he arribau a la suya posición en lo siguient semaforo, u como muito dos dimpués, ya que las bicis en tenemos de propios y gosan d'estar en ambar. Asinas que ixa maniobra, antimás de periglosa, ye de tot inutil. L'auto no arribará antes t'o suyo destino. Mesmo puet estar que m'haiga de tornar a pasar debant una mica mas allá en la mesma carrera. ¿Vale la pena chugar-se la vida d'una persona pa estar-se un rato mas aturau en un semaforo?

L'auto me pasó, como he contau, y bell segundo dimpués plegué t'a on que yera. Levaba la finestreta baixada y empecipié a increpar-le por la maniobra, explicando-le que no yera permitida. Ell, como tantas atras vegadas, me dició que sí que yera. Isto me lo han feito autos particulars, taxis, y mesmo bell autobús. Ye grieu en totz los casos, pero creigo que en ye muito mas en chent que s'adedica tot lo diya a circular por la ciudat y que s'habría de saber perfectament lo codigo de circulación d'a ciudat a on que treballa.

Le expliqué tamién que m'heba meso en periglo pa arribar bell rato antes a un semaforo, cosa que ell tamién negó. Probablement nunca no haiga estau pedaleando mientras un auto te pasa a ixa distancia, porque qualsiquier que lo haiga viviu, conoixe ixa sensación. Memoricé la suya matricula entre que ell continaba faltando-me, con muit malos modos, como siempre que me pasa isto. "Apunta-te-la, apunta-te-la" me dició, sabendo que no le pasaría cosa.

Lochicament pasé debant de toda la resta d'autos que bi heba dica lo semaforo y continé dica la Plaza Aragón, a on que lo veyié pasar. A pesar d'a maniobra suya, y tot y que m'habié d'aturar a tricolotiar-me con ell,  una vegada mas yo heba arribau antes a la plaza.

Tenendo la suya matricula decidié de clamar a las cooperativas de taxis pa queixar-me-ne. En la primer no tenié suerte. En la segunda, la d'o 976 75 75 75, me confirmoron que yera d'a suya cooperativa. Les expliqué lo que me heba pasau y facioron l'equivalent telefonico a cargar-se de huembros. Insistindo en que no me pareixeba un comportamiento profesional, continoron pasando de yo y a la fin mesmo les barruntaba un tono chuzón.

Fer una campanya informativa en Independencia no costaría guaires perras. Ninviar quatre correus u imprentar bell cartel en las cooperativas de taxis, explicando bien la normativa d'ista vía, mesmo menos. Si los medios de comunicación dasen tanto ferrete con isto como con atras qüestions de movilidat zaragozana, a dengún se le ocurriría fer ixa maniobra. Solucions n'i hai y son de buen fer. 

Con tot y con ixo, la zaguer cosa que quiero ye desanimar a la chent a fer servir la bici. Como he empecipiau decindo, las cosas han millorau muito. Los conductors repectan muitismo mas que fa anyos y la tendencia ye a millor. D'atra man, la cantidat de carrils bicis que ya i hai, permite circular por buena parte de Zaragoza sin haber de salir t'a calzada, pa qui tienga mas inseguridatz.

Lo carlismo y la Cincomarzada. Tierra de barrenaus 4x07

Lo primer pasquin que facié, en Chobenalla Aragonesista, estió sobre la Cincomarzada. Igual como tantas atras cosas, nunca no m'heba planteyau guaire por qué se celebraba aquello. Pa yo, yera una d'as mias borinas favoritas. Siempre m'ha feito goyo lo d'enzorriar-me en un parque. Pero no estió dica que habié de fer aquell pasquin, que me documenté bien. Descubrié, alavez, un troz d'a nuestra historia, a soben prou amagau, y como tantos atros apasionant.

Dende la envista d'o sieglo XXI, lo carlismo no deixa d'estar una mica bizarro y de mal entender. Ye d'ixas cosas que has d'estar una mica friki d'a historia pa intresar-te-ie. Afortunadament, tiengo cerca a chent que sabe tanto d'historia como Dani, que vinió t'a radio a charrar-ne y explicar como estió lo carlismo en Aragón. D'una victoria liberal en Zaragoza, sobre ixe carlismo, naixió la Cincomarzada, fiesta que se vedó en los anyos d'o franquismo, y que se recuperó con lo rechimen d'o 78.

Con Ruben, muit buen conoixedor d'ixa epoca historica, charremos d'ixa recuperación y resignificación d'a fiesta d'a Cincomarzada. Tamién d'as dificultatz que ha pasau y de como a lo poder nunca no l'ha feito guaire goyo una fiesta autochestionada, laica y reivindicativa.



Iste ye un d'ixos programas que yera en la lista de "programas a fer" dende lo primer diya que esmachiné Tierra de barrenaus radio. Lo resultau creigo que ye muit bueno, asinas que aspero que lo disfrutetz tantismo como yo.

Lo TSJA y las suyas barrenadas sentencias

Aquello d'a división de poders, fa muito tiempo que no se lo creye dengún. Pero bi ha vegadas que ye tant evident, que se disimula tant poco, que fa sangre... En lo nuestro caso, lo Tribunal Superior de Justicia de Aragón, ye un eixemplo penible de como lo poder chudicial treballa pa una ideyolochía.

Siempre me ha preocupau, y habría de preocupar-nos a todas, que lo poder chudicial siga tant mayoritariament en mans d'a dreita. Y d'a pior dreita, muit a soben. Nomas cal fer-se una gambadeta por la facultat de dreito ta parar cuenta de por a on alienta politicament la mayoría d'os futuros advogaus y chueces. Admiro fundament a toda la chent d'izquierdas radicals que s'han habiu de fer los x anyos de carrera compartindo aularios con ixa clica.

Pero como una d'as millors armas contra la suya terror ye la nuestra humor, pensé de adedicar-les ista primera historia barrenada. En la memoria, guardaba beluna d'as suyas barrenadas sentencias, pero una busca en Google, me'n dio quantas mas. Asinas que, pa qui le faiga honra, aqui va l'audio d'a Historia barrenada, y vinclos a cadauna d'as noticias que se i charra. Que faiga buen prebo, y paratz cuenta, porque si bell diya tenetz un chuicio, puet que acabetz en iste barrenau tribunal!



L'aragonés en lo Curriculo de primaria

Las bicis no podrán ir por plazas y peatonals

Lo TSJA refirma que las interpresas evadan impuestos

Lo TSJA suspende lo convenio laboral d'o concello de Zaragoza

Lo 010 se queda sin municipalizar

Averly a cascar-la

Hora y meya de relichión en primaria

La relichión en Bachillerato