Carta a la sinyora facha que chila

Yo le entiendo, sinyora facha esverrecadera. Ye vusté un d’os mios memes favoritos de tot lo que s’ha visto en istos días de orchía espanyolista. Pobrona. Astí, en lo preto de Barcelona, con lo suyo bolso de sinyora gran y la estanquera mercada en lo bazar la vispra d’a suya gambadeta manifestadera. Entiendo de tot ixa frustración, ixe sentimiento de que tiens toda la razón d’o mundo y lo gubierno fa tot lo contrario, de que los tuyos argumentos no se sienten. Yo la he sentida a-saber-las vegadas. Dende que tiengo memoria politica. Me facié a perder batallas de bien choven, asinas que ya aprendié a chestionar ixa rabia y ixa carranya. Si no, hese escrabutau, m’hese petau la trunfa. U sería engarcholau, que me sé yo. Ya deciban los Zoo ixo de que no serà per ganes de ficar les bombes, que serà per la por a perdre el que tenim.

Vusté, sinyora facha esverrecadera, ha sentiu una redota politica por primer vegada en la vida. Que no’n ye. Tan de buen que en fuese, que de verdat lo gubierno espanyol fuese tot lo que le acusan d’estar. Que fese politicas socialcomunistas, instaurase la republica y trencase d’una maldita vegada Espanyita. No han perdiu vustés, las fachas, pero ixo ye lo que sienten. No pueden asumir que belún que no ye “d’os suyos” ocupe nian un trocet d’o poder. Una miquirrina nomás. Porque tienen los chueces, la poli, l’exercito, los medios, la ilesia, lo senau, cuantos gubiernos autonomicos y muitas d’as principals ciudaz. Pero lo gubierno espanyol y lo congreso son en mans d’otri. Y ixo sí que no. Una clica de hippies, pa forro de bota, seguntes la suya envista d’o mundo.

Esverreca de puro odio. Que no ye pa tanto, ya le digo. Vusté ni se’n enterará, d’os efectos d’ista amnistía. L’atra, la d’os bancos, d’ixa sí que nos n’enteremos. Buena patacada de diners que perdiemos toz, que podrían haber iu pa escuelas, hespitals u mesmo pinganillos pa traducir, a las que charramos basto, a l’universal espanyol, pero se los han quedau en la buchaca los executivos de banca. La’atra amnistía, la d’agora va a deixar que Puigdemont pueda fer-se una gambadeta por l’estau espanyol, lo solo estau d’o planeta a on que no puede fer-la agora. Ye decir, que ye libre d’estar-se en 500.000 km2 mas que no antes. Contando que las tierras emerchidas son 150.000.000 de km2, nomás le han ixamplau un 3% la garchola que ye iste mundo. Tamién l’amnistía toca a directoras d’escuela, que cometioron lo terrible delito de ubrir los centros pa que la chent votase. Y a atros que estioron acusaus d’atentaus y cosas piors con prebas terribles como la posesión d’un chiflet amariello. L’alferez que se levó la pistola ta Ferraz, manimenos, tornará tranquilament t’o suyo treballo de veilar por la nuestra seguridat. Diz que la mía tamién. 

Le consello, sinyora facha esverrecadera, que deixe de veyer la telefacha ixa, por muito western que i metan. Que astí sale chent verenosa. Y no ubra los videos ixos que le ninvia lo nieto, que estudia ADE en la Rey Juan Carlos, que allí la fan en castellano. Que antimás a Vito ya le han empecipiau a deixar de responder y ni la policía le permite fer lo que le pete. Ay, si Meritxell en hese parau cuenta antes, lo que nos hesenos puesto escusar. Que no será que no le’n avisase dengún.

Le confieso, sinyora facha esverrecadera, que a yo tampoco no me fa goyo Perro Sanxe. Que ye un veleta, que las pocas vegadas que fa cosas de zurdo ye de casualidat u porque le obligan las circunstancias, los numeros u las socias. Que ni ha derogau ni derogará la lei mordaza, que mantiene en lo puesto a lo suyo psicopata d’interior, que fa una politica exterior de vergüenya y un ciento de cosas mas. Pero tamién le digo que, en veyendo a sinyoras fachas esverrecaderas como vusté y a la clica que s’achuntó ixos días cada nueit por Madrit, da-me bien de Perro, que buena bala hemos esquivau. D’ixo s’aproveita, que si no, de qué iba a salir. Lo día que deixen d’esverrecar asinas, igual ganan. Pero de verdat, de lo de ganar y dimpués gubernar. 

Talment s’haiga encarranyau tantismo, sinyora facha esverrecadera, por lo de veyer a la policía abataniando a los suyos amigos, familiars y companyers. Vusté, que chiló ixo de “A por ellos” en 2017, que se i solidarizó porque la birolla d’os barcos de Piolín yera muit mala y los suyos - porque son SUYOS - no se mereixeban ixa mala minchanga, que desfiende a tot trance la lei mordaza y las balas de goma, que de verdat se creye que las camaras d’as comisarías d’esmarchinan terne que terne… No se’n faiga, sinyora facha esverrecadera. Yo tamién me creyeba, de bien chiquet, la faloria que me recontaban en la tele, lo cole y la familia. Lo de “pa servir y protecher”, que toz somos iguals debant d’a lei y tot ixo. A la tercer mani ya comprebé que d’ixo, ni pon. Que ni servir ni protecher y que, de bien choven, la poli ya m’heba creyau muitos mas problemas d’os que m’heba resuelto. Ye la novedat, sinyora, pero ya le digo yo que, por desgracia, uno se i fa.

No han cambiau tanto las cosas, sinyora facha esverrecadera. Puigdemont s’iba a fer la gambadeta por las Ramblas igual. Isto nomás ha acelerau un poquet las cosas. Lo gubierno no será socialcomunista. Socialdemocrata como muito, y no guaire. Marlaska tornará a ninviar a la poli contra las royas, las treballadoras que fan vaga, las que protestan contra los CIEs u las yayas que quieren seguir habitando lo suyo piso pero no tienen 88 euros pa pagar-le a lo banco amnistiau de turno. Las mugas d’Espanya, la suya quiesta Espanya, continarán estando las mesmas. Si peta unatro volcán, talment s’ixamplen un poquet, pero ixo ye tot. Los chueces continarán estando suyos, como siempre. ¿Que no ha visto las facultaz de dreito? Ixo tien mal cambiar.

Pero chile, sinyora facha esverrecadera. Chile muito, que ye terapeutico, que libera. Lo sé porque levo muitos anyos chilando, de rabia y frustración, de veyer como discursos que creyeba superaus en los 90 tornan y s’ixemenan por tot, que mesmo plegan a chent que considero bien agudica. Chilo a traviés d’un blog, de libros, de pogos, de nueis de borina, d’un programa de radio y, bella vegada, tamién chilando. En casa, d’amagatons, faltando a la tele y a los fachas que i salen, que por ixo no se me grava ni protagonizo un meme. Chile, sinyora, faiga-se una camomila, y disfrute de que, talment, lo gubierno socialcomunista filoetarra jihadista y no sé cuantas cosas mas no le deixará morir en la residencia con 7000 viellos mas cuan arribe la siguient pandemia.

Trilerismo olimpico

Yera de vermut, rodiau de chent de dreitas. D’as que quiers, porque tiens vinclos con ells, y prebas d’evitar seguntes qué temas pa no tricolotiar-te. Una d’ellas decide trencar la paz y, sin venir a cuento, introduz lo tema d’o suyo mitin: “Mama mía, lo d’as olimpiadas y Lambán”. La estratechia mía en istas situacions ye d’esbarrar lo tema enta atro mas amable: bella serie u bell libro, l’orache, lo zaguer viache que haiga feito u qualsequier cosa asinas. Pero me pilla con la guardia baixa, asinas que respuleyo de camín con un “mira-te tu que proposar olimpiadas d’hivierno entre que has de portar cambions plenos de nieu artificial pa que funcionen las pistas que tiens ubiertas”. L’audiencia se me mira fendo uellos, como si charrase d’o zaguer numero d’os X-Men u d’os costumbres d’os cayubabas. “Ya, ya, ixo rai. ¿Pero lo de Catalunya? Cal que los nombres vaigan, como poco, a ran. Aragón y Catalunya. Yo me niego a que no i amaneixca Aragón. Ya dimpués si se fan mas u menos prebas se puet charrar, pero que lo nombre i siga”. Me pensaba que lo debat yeran sobre olimpiadas, no pas sobre complexos. Tantos anyos en politica y sigo sin aprender lo d'a prevalencia d’o simbolico sobre lo material.

Lambán ye experto en ista mena d’estratechias y, por lo que veigo, le funcionan de pistón. Se proposa un chuegos olimpicos d’hivierno en una tierra que sabe y pateixe de primera man lo que ye la especulación y la corrupción asociada a ixa mena de grans eventos. Viviemos la Expo, estiemos a pocas d’acullir aquella ida de flama que yera Gran Scala, cremamos diners a boticiegas en lo forau de Motorland y me pasé toda la mia nineza y adolescencia sentindo la faloria d’a Chaca olimpica. Si ya no i hai nieu, si mesmo en atras latitutz mas propicias pa uns chuegos d’hivierno han de fer-se con artificial, ¿qué sostenibilidat puet haber-ie aquí? No cal ixuplidar que lo nuestro president, lo dr. Lambán, niega lo cambio climatico y considera que toda la comunidat scientifica internacional fa parte d’o que ell clama radicalismo ecolochista.

Sabe don Javier que l’ecolochista ye un d’os pocos movimientos socials que conserva musclo y prou numbro d’activista pa chafar-le lo suyo suenio-negocio olimpico. Asinas que, en un nuevo exercicio de trilerismo, como si fuese un d’ixos perillans d’as Ramblas barcelonesas, amaga la bola d’o ecolochismo y t’amuestra la de l’espanyolismo, sabedor de que en l’actual ambient identitario, la mayoría d’o electorau ye capable de refirmar la mayor loquería que se diga si leva una estanquera. Ya no se charra d’impacto medioambiental, cosas de fanaticos anti-extinción. Ni d’o impacto social u economico -pa mal - que tamién tendría y que a sobén pasa quasi d’amagatons en l’argumentario de qui nos oposamos a las olimpiadas y atras grans sanseladas. No se charra tampoco de qui se beneficia d’as olimpiadas y d’as obras que caldría fer, u simplament d’o negocio que la sola posibilidat de que se celebren significa pa belún. Arredol d’os chuegos lo solo tema de debat posible ye la toponimia d’a denominación.

Acusaban, tiempo habe y bella vegada con razón, a lo nacionalismo catalán y vasco d’amagar con sinyals los problemas socials d’os paises suyos. Lambán en ye experto, igual como la suya admirada Ayuso.

Mesmo pareixería, de quan en vez, que a Lambán le importa igual lo d’as olimpiadas. Pues si querese que se fesen prebaría de fer pacha con lo president de Catalunya, ni que fuese por l’intrés común. Aparcaría los anyos y anyos de faltadas enta lo país vecín, ixe trilerismo que cada vegada que tien problemas aquí fa servir, y complegaría en una candidatura conchunta. Soi seguro de que no ye mica dificil alcordar-lo con Aragonès si de verdat se deseya. Talment se la bufe lo d’os chuegos olimpicos y nomás quiera fer-lo servir de cortina de fumo entre que desmonta trens, ambulancias y atros servicios publicos con los suyos companyers de gubierno, a tuertas y dreitas, quedos u mesmo aplaudindo.

Cal que no se celebren aquí, los chuegos, por muitos, diferents y contudents motivos. Talment sisquiera se faiga una candidatura. Se’n charrará, y muito, y tanimientres bi habrá chent fendo negocio con las simplas alufras, arramplando con parte d’os presupuestos publicos nuestros. Si como en tantas atras ocasions m’entivoco, y a la fin se fesen, proposo que lo trilerismo entre como nueva disciplina y que Lambán nos i represente. Ye medalla d’oro segura.

Quarto y metat de castellano

Faigamos un poder y viachemos ta un d’os universos paralelos tant de moda en la sciencia ficción y las pelis superheroicas. Esmachinatz-tos que, en bell lugar d’Aragón UNA familia quier educar a lo suyo fillo en aragonés y, como la escuela y la resta de familias en son en contra lo levase t’os tribunals. Ixos tribunals fallan a favor d’a familia y obligan a que un 25% d’as clases se faigan en aragonés y mesmo ubren la puerta a que en tot Aragón, calga ixamplar ixa mida. ¿Qué dirían los medios de comunicación? Charrarían sin dubda d’imposición y de que, por lo concieto d’una familia, talment calga redisenyar tot lo sistema educativo. Manimenos, ya veyemos que si ye de revés, ixa familia pareixen garrispos herois luitando contra lo catalán, la nueva ETA.

Si, como ye lo caso d’aragonés y catalán, la luenga ye minorizada, antimás charrarían de que ye un invento de laboratorio, un idioma inutil, sin futuro y cazurro. Que encerrinar-se en charrar-lo ye un atraso. Porque ya se sabe que l’espanyol “s’expande”, pero la resta de luengas “se imponen”. Ixa luenga que de vez tien una salut de pistón, que se parla en tot lo mundo, por cada día por mas chent, cientos de millons de personas, pero que pareixe tremolar si en un lugaron d’o Maresme los ninos fan Sociales en catalán u si Peppa Pig diz Egun on cada maitín.

¿Ye que dengún i piensa, en los ninos? pregunta una voz por astí. ¿De verdat conoixetz a garra nino que le preocupe en qué luenga le dan tal u qual asignatura? Talment, a aquella Victoria Invent que ploraba si le leyeban un libro en catalán, u a lo vecín de camping de Julen. Pero lo cierto ye que la mayoría d’a cachimalla no tien ixos problemas lingüisticos y se relacionan con la naturalidat de qui no tien los prechuicios d’os adultos. Asinas que a ixe hipotetico alumno que protagonizaba las primers ringleras d’iste post, lo mas probable ye que le tienga igual si le fan la clase en una u atra luenga. 

Sin ETA, con uns relativament buenos datos economicos y laborals y la evolución favorable d’a pandemia, a lo facherío no le queda atra que tirar de conflicto lingüistico y fer aparatos a mirar qué pesca en una qüestión tant identitaria y alavez pasional. L’aparato mediatico, prou que sí, i colabora, emplindo horas de desinformación con isto a on que pareixe que no tienen ni un minuto pa comentar que l’alcaldesa y las profesoras de l’instituto son recibindo menazas de muerte dende que se mediatizó lo caso, tant condenables como qualsequier atra menaza de muerte. Diz Casado, y i soi d’alcuerdo con ell, que no caldría adedicar ni un minuto a charrar de que Peppa Pig s’emita en euskera. Prou que no. Tramite parlamentario y ta casa. ¿Qué problema i hai? ¿Por qué no va a poder veyer la cachimalla de Eukal Herria los dibuixos en la luenga que quiera? Ye la dreita qui s’encerrina en que no se pueda ixamplar la ufierta de contenius en luengas que no sigan lo castellano. “Luengas cooficials”, que les claman los medios, ixuplidando lo significau d’ixe prefixo “co” que las mete en una teorica igualdat. Tant cooficial ye lo catalán u lo gallego como lo castellano, asinas que, u anyaden “diferents d’o castellano” a lo termen “cooficials” u fan servir atras mas sinceras como “inferiors” u “molestosas” que ye en realidat lo que quieren decir.

Contimparan la docencia en catalán con lo terrorismo, lo nazismo u l’apartheid sin mica vergüenya. La supervivencia d’una luenga chiqueta en un mundo globalizau con qüestions que han significau muertos arrienda.

Lo que diga la sentencia ye quasi lo de menos. Porque lo que importa ye qüestionar un modelo de immersión lingüistica que leva decadas funcionando razonablement bien y con lo que las ninas y ninos educaus en Catalunya consiguen competencia en todas dos luengas. Si no, ¿por qué ye un 25% de clases en castellano? ¿Por qué no un 50%? ¿U un 10, 73 u 2%? ¿U lo que demande cada familia en cada escuela. Quarto y metat de castellano, como en las carnicerías ¿Qué razons pedagochicas u chudicials i hai pa que siga precisament lo 25? Cada hora menos en la luenga minorizada ye un entrepuz pa la suya supervivencia, cosa que no pasa con la no-minorizada, omnipresent, y que, precisament por ixa ubicuidat, no aprecisa de mayor protagonismo pa que se charre con la mesma (u mesmo mayor) competencia que en los territorios monolingües de l’estau. 

En tot iste caso, a lo facherío le importa igual lo crio y la familia, las razons pedagochicas, culturals, socials u historicas que aparan lo sistema d’immersión lingüistica, y se la bufa l’arbitrariedat chudicial. Porque lo problema suyo ye la simpla existencia d’una luenga que no siga lo castellano. Porque, a la fin, lo que quieren ye que todas ixas luengas molestosas se queden en la intimidat d’as casas u, en lo millor d’os casos, musealizadas pa que, qui tienga lo raro concieto de querer conoixer-las, pueda consultar-las en bell rechistro, sin fer estorbo a la naturalisma, mistica y mica forzada expansión d’o castellano que, como dició lo Rei fuyiu, “nunca fue lengua de imposición, sino de encuentro, y que a nadie se le obligó nunca a hablar”. Por dencima d’un 25%, caldría anyadir.

Viaches coronaviricos. Tierra de barrenaus 6x18

No quereba fer-lo y a la fin lo he feito. Iste nuevo Tierra de barrenaus radio se centra de tot en la covid 19 y la crisi sanitaria que ha provocau. Yera un tema que no quereba charrar-ne debiu a la saturación de noticias, pero que a la fin no m'he puesto adubir y he creyiu que podeba fer-se bella cosa intresants sobre lo tema. Como la vida coronavirica zaragozana me la sé porque la disfruto y/u pateixco, he entrevistau a quatre personas que aportarán la suya envista y experiencia dende atros puntos de l'estau.



Lo viache empecipia con Chorche, periodista que vive en Barcelona. Nos charrará d'o suyo treballo, d'as dificultatz d'a suya parella que ye embarazada y de cómo ha quedau la situación politica d'o proceso independentista que pareixe dispareixiu d'as noticias que no en fa tanto plenaba. Seguimos dimpués enta Segovia, un d'os puestos mas afectaus y que en lo momento de grabar yera encara en fase 0. Armando nos recuenta cómo s'ha viviu las visitas d'os turistas madrilenyos y la suya experiencia treballando en lo sector agroganader. La tercer aturada d'o viache la femos en Ondarroa, a on que Chuserra no recuenta la realidat en un territorio con a-saber-las peculiaridatz y que habió de deixar pa mas entabant unas eleccions autonomicas que pareixe que se celebrarán en bell mes. Acabamos lo viache en Aragón con Elena que, vivindo en Montalbán, nos da la suya envista sobre la convivencia en lo mundo rural, bien diferent a la que podamos tener en Zaragoza. De man d'ella, profesora de secundaria, conoixeremos tamién cómo s'ha habiu de buscar las manyas pa fer las clases on line.

Todas quatre experiencias creigo que aportan diferents envistas en un momento a on que, talment mas que de cutio, todas hemos de conoixer las realidatz d'otri pa poder entender-las y buscar solucions que funcionen pa todas.

Quasi tot lo programa se podió grabar en l'estudio de Radio Topo. Un puesto que nunca no me pensé que trobase tanto a faltar y dende a on que aspero poder recontar-tos muitas cosas mas y tornar con las entrevistas en persona antes con antes. Si tiens ideyas pa lo programa, si quiers proposar temas, textos, cancions u qualsequier atra cosa, no dubdes en contactar con yo. Emitir nos fará vencer!

Programa #77

La Catalunya post- sentencia y mas relatos. Tierra de barrenaus 6x07

Ya ha pasau mas d'un mes dende que la sentencia d'a chusticia espanyola condenase a penas que arriban dica los tretze anyos a los presos politicos catalans. La reacción de man d'a suya sociedat no se fació asperar mica. Los CDR y lo Tsunami Democràtic, un nuevo achent en lo conflicto, son dinamizando una respuesta que ye tot un eixemplo de desobediencia civil. Manimenos, dende los medios de comunicación espanyols se nos amuestra un mundo de tot diferent a la realidat. Somos vivindo un d'os eixemplos mas caboliosos de guerra mediatica. Asinas que dende las mias posibilidatz, prebo con iste programa de fer la mia parte - la d'o colibri - pa crebar ixa desinformación.



En iste programa entrevisto a Chorche Romance, periodista aragonés y blogger que vive en Barcelona dende fa anyos y que tanto por la suya profesión como por las suyas inquietutz politicas conoixe de firme tot lo que ye pasando en Catalunya con lo suyo proceso independentista. Charramos de politica, información, represión, organización social y mesmo d'a vida cutiana en la suya ciudat. 

Ent'o cabo d'o programa, locuto un d'os relatos que mas goyo me fació d'escribir en lo suyo diya. Tercer d'una serie que clamé "Las transformacions" y que empecipioron como un exercicio d'un taller de creación literaria. Lo zapo ye ambientau con la canción "We all stand together" de Paul McCartney, que me traye a-saber-las remeranzas de quan yera chiquet. Creyeba que lo tema yera bien conoixiu, pero bete-me que entre la chent d'a mia cheneración que he preguntau, bien pocas la conoixeban.

En la parte mosical, dos propuestas, como quasi siempre. La primera, una nueva banda con disco fresquet d'iste verano, y una chira que acaba d'empecipiar. La segunda, una nueva "Canción d'antes mas" d'un dos grupos mas influyents d'Aragón en lo cambio de milenio.

Naixiu d'Aragón (Cantando No puc deixar-te, de Auxili)

"Ací no em pariren, però ací estic, ací visc orgullós i agraït de que em volgueres acollir". (No puc deixar-te. Auxili)

I hai, en l'imachinario colectivo, bella mena d'autoridat que te da naixer d'un puesto. Pareixe como si ixos primers dias d'a vida tuya marcasen pa cutio la tuya existencia. Como si imprentasen en lo tuyo ADN una serie de caracteristicas imborrables y inmutables que definirán la tuya identidat la resta d'a tuya existencia. Pa estar "d'un puesto", no ye prou con haber viviu astí, con desfender-lo u con pagar-ie impuestos. S'aprecisa ixe certificau de naiximiento, u mesmo que los tuyos antepasaus tamién sigan d'o lugar, barrio u ciudat. Los famosos ueito apellius acumulaus a lo nacionalismo vasco.

D'eixemplos en tenemos a pirol en lo país nuestro cada vegada que se parla de Catalunya. ¿Quantas vegadas habremos sentiu desacreditar a Carod Rovira u a muitos atros politicos independentistas por tener orichens en Aragón? Las radices d'una tienen la importancia que cada ún les quiera dar. Y la identidat no ha d'estar vinclada necesariament a lo puesto d'a on que se naixió. Ni sisquiá a on que se creixió.

Tornando ta l'eixemplo catalán, tenemos toda una cheneración d'independentistas con una graniza variedat de circumstancias personals. Fillas y nietas de chent venida d'atras partes de l'estau y d'o mundo, comparten militancia con milenta personas que pareixen descendients d'o mesmo Rafael Casanova. Muitas d'ixas migradas troboron en Catalunya un puesto que las acubilló, con una cultura que talment no tetasen en casa, pero que acarrazoron con rasmia. A sobén, con muito mas carinyo que las propias d'o lugar.

En Aragón, ixe fenomeno tien atras coordenadas. Dos d'as personas que conoixco que mas han treballau por lo país, no tienen las suyas radices familiars aqui. Por las aulas de Nogara, i ha pasau chent de procedencias bien diversas, con a-saber-las ganas d'aprender aragonés y de chupir-se d'a nuestra cultura tradicional.  Bien a ormino son la chent "de difuera" las que mas s'intresan por tot lo nuestro y lo fan suyo tamién.

Un compa de l'instituto se casó t'Andalucía. La suya parella vinió a visitar Albarrazín. Embacilada por la polideza d'o lugar, le'n comentó a la suya suegra, qui respondió con un breu: "Bueno, sí, ye mahico". La zagala se feba cruces por lo poco que valuramos lo nuestro patrimonio. Talment si se'n venise a vivir t'aquí, se tornaría una d'ixas defensoras de l'aragonés que, arribadas dende difuera, aprecian lo que nusatras tant a sobén veyemos como poco important.

Talment lo nuestro saldo migratorio negativo ye un mas d'os tantos entrepuces que hemos teniu pa la construcción d'una identidat aragonesa que valure lo suyo patrimonio historico, cultural y lingüistico. Talment las personas que han habiu d'ixopar son fendo ixe treballo difuera, y no en tenemos prou de difuera que viengan a trucar-nos y avisar-nos d'as cosas tant repolidas que tenemos aquí.

Pa forro de bota, muitas siguen tenendo ixa envista tant negativa de que si no yes de bell puesto pareixes tener menos dreito - u mesmo no tener-ne - a desfender la suya cultura, patrimonio u tradicions. ¡Guarda si nos femos la bamba las aragonesas d'estar acullidoras! Pero encara en 2019 i hai qui demanda lo libro de familia a la hora de considerar-te "autentica" de tal u qual causa.

Soi naixiu d'aqui, igual como pai, mai, y totz los yayos mios. No conoixco garra ascendent mio naixiu de difuera d'o país, y mesmo muit pocos de difuera de Zaragoza. Y no por ixo tiengo mas u menos dreito que garra atra persona a lo nuestro patrimonio, luenga, identidat, cultura y historia. Sisquiá bi hese mas "recient arribaus" como belún d'os que conoixco, y menos "argüellosos d'estar aragoneses" de culicaiga.

Una quatribarrada a lo servicio d'o nacionalismo espanyol

Aragón, pa la mayoría d'espanyols, ye ixe país que nomás tien identidat quan s'ha de fer servir pa enrestir a Catalunya y a lo suyo pueblo y historia.Uns diyas ye previo a la existencia d'Espanya, y de feito simient d'a mesma. Nomás cal remerar aquella exposición sobre Fernando II d'Aragón que tituloron "Lo rei que esmachinó Espanya y la ubrió a Europa". Aragón yera una ferramienta d'usar y aventar pa la construcción d'o que de verdat importaba: Espanya. Atros diyas, manimenos, Aragón nomás existe porque la sacrosanta Constitución d'o post-franquismo asinas lo decidió.

Totz los momentos a on que Aragón ha teniu problemas con Castiella u Espanya s'amagan u relativizan. La rebelión aragonesa de 1591 se conoixe como "alteracions" y mesmo belun desfiende que Felipe II yera muit queriu por la población aragonesa. Los Decretos de Conquista siempre son clamaus de Nueva Planta, y reciben una atención quasi nula de medios y institucions en lo suyo 300 aniversario. Tot lo contrario que los 200 anyos d'a resistencia contra los franceses que dio buen ferrete, enmarcando-se adintro d'ixe proceso contino de construcción d'identidat espanyola. 

Probablement lo feito de que un personache como Lambán siga lo nuestro president tien relación con lo texto que podemos leyer en l'Alchafaría, la siede d'as Cortes d'Aragón, en una exposición sobre lo sinyal d'a Casa Reyal d'Aragón, a on que veyemos un eixemplo bien cabolioso de tot isto:

"La anulación de los Fueros aragoneses en el siglo XVIII produjo la desaparición de muchas de nuestras instituciones y la reducción progresiva del uso del escudo y la bandera hasta el siglo XIX. Muchos de los intelectuales aragoneses de esta época se doblegaron ante la propaganda nacionalista catalana que defendía el origen catalán de las Barras. Sin embargo, tras muchos avatares, la bandera barrada aragonesa consiguió representar al conjunto de los ciudadanos de Aragón a partir  de 1984."

Por lo texto, hemos de suposar que los fueros aragoneses s'anuloron por arte de machia. Talment prenioron consciencia y decidioron abolir-se ells mesmos. U se fació un referendum a on que las aragonesas y los aragoneses votoron prener las leis castellanas como propias. No lo sabemos. Podríanos haber escrito que "Los decretos de Conquista, dictaus por Felipe V dimpués d'a redota d'Aragón en la Guerra de Sucesión, acaboron con la mayoría d'as nuestras leis y institucions propias, provocando una destrucción progresiva d'a identidat y simbolos aragoneses". Pero cuento que se acusaría a ixe texto de tendencioso.

L'orichen d'o sinyal aragonés, común a totz los territorios d'a Corona, ye encara hue en discusión. En tot caso, me pareixe de poca importancia lo suyo orichen y un debat que se fa siempre dende lo presentismo. Nación, identidat, país, sinyal, escudo... son conceptos que han iu cambiando a-saber-lo en la historia y mirar-nos qüestions d'o sieglo XII con uellos d'o XXI ye una error. En tot caso, pa l'autor d'o texto, los intelectuals aragoneses d'o sieglo XIX que desfendioron (suposo que con argumentos, como totz los intelectuals) ixe orichen catalán, no teneban criterio propio. Que las barras naixesen a un canto u l'atro d'una buega muito mas difusa en ixos anyos, no da mas lechitimidat u historia a Catalunya u Aragón. En lo panel, los historiadors catalans fan propaganda, entre que los aragoneso-espanyols fan rigurosa investigación historica. Como en tantas ocasions en qüestions historicas, la calidat de l'historiador no se mide por las evidencias que aporte, sino por las conclusions que fa, independientement de que tiengan u no pas alazetz.

Remata lo texto fendo referencia a uns "avatars", que desconoixco si explica en la resta d'a exposición, pero que barrunto que no. Dimpués repite lo debantdito discurso d'a chustificación d'a existencia d'Aragón por la Constitución Espanyola. Los simbolos pueden u no representar a la población en función de muitos factors. L'institucional nomás en ye un. L'himno oficial d'Aragón, a pesar d'estar-ne, no represienta a dengún. La quatribarrada representaba a las aragonesas (y a las catalanas, valencianas, etc) muito antes de que salise en los papels. Y prou que muito antes d'o 84. A qui quiera que le represente, claro. Porque igual que a yo no me represienta la estanquera por muita literatura que bi haiga en lo mio DNI, a bell ciudadano aragonés, por las razons que siga, no le representará lo nuestro sinyal. Y no pasa cosa.

Aragón ye bien anterior a Espanya, y ha teniu pleitos y problemas con Castiella, Catalunya y qualsiquier territorio mugant, como ye lochico en un país de mil anyos d'historia. Lo nuestro sinyal ye un valioso troz d'ixa historia que, afortunadament, compartimos con atros paises que por un tiempo teniemos un prochecto común. Lo mesmo feito de que ixe sinyal siga compartiu ye una parte bien positiva d'a nuestra historia y habría d'estar motivo de firme argüello, y no pas una sincusa pa que nos faigan servir como arma contra una nación que preba de decidir lo suyo futuro democraticament.

La nuestra identidat, en lo sieglo XXI la hemos de fer de conchunta, con los parametros socials, culturals y politicos d'o present. Trigar d'a historia las valors positivas que podemos fer servir hue, y recordar las partes negativas pa no repetir-las. Teixer una alternativa a la identidat espanyola, de tot excluyent, que pueda levar-nos enta un futuro mas libre. Pa ixo, y no pas pa atras cosas, considero que cal fer servir los nuestros simbolos.

Lo Sur resiste y la Republica catalana fa un anyo. Tierra de barrenaus 5x04

Bien luent d'a on que lo país naixió, lo nuestro sur ye a soben qui nos traye mas alegrías. Una tierra abandonada, olvidada y despoblada, pero plena de rasmia y de chent con a-saber-las ganas de treballar. La chent d'as comarcas teruelanas han sabiu buscar-se las manyas pa creyar tot un calendario d'actividatz culturals y reivindicativas que poco u mica tien a envidiar a lo de lugars muito mas grans a lo suyo norte.



Preba en ye lo mes d'octubre que han viviu. Empecipió en Calamocha un curso d'aragonés, impartiu por los nogarers Diego y David que ye estando tot un exito de participación, y que leva l'amostranza de l'aragonés ta ixas tierras por primer vegada en muito tiempo. La despoblación, que ye uno d'os principals problemas por ixa parte, estió lo tema que centró un festival en Allepuz. Se'n charró y se i presentoron iniciativas y diferents envistas d'o problema. Y s'acabó con un concierto y firme borina, que ixo nunca no ha de faltar. A l'atro cabo de semana, Torrillo d'o Campo estió lo lugar trigau pa fer la Fiesta d'o Chopo Capecero en la suya decena edición. Una chornada que reivindica las valors culturals y ecolochicas d'ista manera de treballar la fusta. De todas istas iniciativas charremos con Fer, David y Diego qui participoron en todas tres y que nos deixoron reflexions bien intresants.

En la segunda parte d'o programa cambiamos de tot de scenario y tematica. Nos n'imos ta Catalunya pa analisar iste zaguer anyo. Mas de dotze meses han pasau dende que lo pueblo catalán se movilizase por la suya independencia en un referendum que ye lo mas gran exercicio de desobediencia civil que se ha conoixiu por ista parte d'Europa en muito tiempo. Los acontecimientos d'os meses de setiembre y octubre de 2017 ya fan parte d'a historia. Con Chorche, periodista aragonés que vive en Barcelona, estié parlando de tot lo que ha pasau, d'a situación actual, y d'o futuro que l'aspera a la Republica catalana que tasament existió por ueito segundos, pero que pa muita chent ya ye un estau mental.

Valencia, Aragón y los nuestros diyas nacionals

Quan escribo isto se fa 311 anyos d’a redota austracista en la Batalla d’Almansa. Con aquella redota empecipiemos a perder la nuestra independencia. La guerra continaría bell tiempo mas, pero con poco ya a fer. Lo 25 d’abril, aniversario d’ixa redota, las valencianas celebran oficiosament lo suyo diya, recordando ixa calendata. Manimenos, la suya fiesta oficial, lo diya de Valencia, ye lo 9 d’octubre. Valencianas y aragonesas compartimos muita historia, muita identidat y tamién lo mal de tener un diya nacional oficial con significau muit diferent de l’oficioso.

Acabamos en Aragón de celebrar Sant Chorche, lo nuestro "diya nacional oficial". Por tot lo alto. Con un acto en las nuestras Cortes d’alto standing, an que se chunta toda la chent "important" d’o país. En ista ocasión pa ascuitar como lo nuestro vergonyoso president Lambán presumiba de patriotismo espanyol una vegada mas. Con lo socio “aragonesista” mirando-se t’o ciel y chiflando como si la cosa no ise con ells. En las carreras aragonesas, las ciudadanas con lo periodico baixo lo brazo, leyendo las enqüestas que nos dicen lo que cal votar. Ixe diya recordamos las glorias pasadas, ixa aluenyada Edat Media tant convenient pa l’espanyolismo. Tant comoda, en no tener conseqüencias tant claras en lo nuestro present. Tant romantica y heroica, con ixos almugavars portiando las nuestras quatre barras por toda la Mediterrania. Mercamos la zaguer novedat de Corral Lafuente, "que fa libros que de vez que aprendes, pasas un buen rato". Por la tele nomas charran de Sant Jordi y lo diya d’o libro, y lo baturrismo s’encarranya porque Espanya, una vegada mas, no nos fa caso.

Celebramos en Sant Chorche, que a un rei aragonés se le apareixió un martir cristiano que vivió entre los sieglos III y IV. Ista pantasma diz que aduyó a l’exercito de Pedro I a conquerir Uesca a los musulmans. La Reconquista, una vegada mas, como atro d’os mitos espanyols. Lo cristianismo enradigau en la identidat aragonesa.

En lo País Valenciano, lo diya oficial ye lo 9 d’octubre, diya d’a entrada de Chaime I en la ciudat de Valencia. Unatra vegada lo mito d’a Reconquista. En ista ocasión, a lo menos, celebrando bella cosa que sí que pasó. ¿Urbanocentrista? Pues tamién.

L’atro país chirman, lo tercer territorio con que nos chuguemos lo futuro en lo Compromís de Casp, tien lo suyo diya en una calendata bien diferent. L’once de setiembre remeran una redota militar y las suyas conseqüencias. En 1714, fa mas de tres sieglos, las tropas borbonicas entraban en Barcelona dimpués de meses de sitio, y acababan con los zaguers repuis d’a resistencia austracista. Siet anyos antes aragonesas y valencianas hebanos empecipiau a sufrir los Decretos de Conquista (conoixius tamién como Decretos de Nueva Planta). Las catalanas no tardarían guaire a sufrir-los tamién.

Ixa guerra estió probablement la mas important pa los tres territorios. Dimpués d’a Guerra de Sucesión, Aragón, Valencia y Catalunya perdioron la suya independencia y leis “por dreito de conquista”. Iste feito se remera muit bien en Catalunya, con libros, exposicions, etc. por tot, y con lo suyo diya nacional. Una sobrebuena manera de no olvidar la historia ye fer-ne alcordanza por cada anyo.

Valencia y Aragón, tamién perdiemos aquella guerra. Tamién nos quedemos sin fueros. Manimenos los nuestros diyas nacionals no son festivos. Garra institución no celebra cosa ixe diya. Lo 29 de chunyo, diya que se promulgó lo Decreto de Conquista d’Aragón, nomás da nombre a una fundación de CHA, y no se le dedica ni una ringlera en la prensa local. En ixas calendatas las aragonesas somos contando los diyas que falta pa marchar ta Salou.

Las valencianas sí que trigoron lo 25 d’abril, diya d’a Batalla d’Almasa, pa recordar la suya identidat historica y reivindicar-la. Millars de valencianas salen t’a carrera ixe diya en manifestacions que implen las carreras de quatribarradas.

L’equivalent nuestro, sería lo d’atra redota. La de Chuan V de Lanuza, Chusticia d’Aragón, contra l’exercito de Felipe II de Castiella, que tenió como conseqüencia lo suyo asesinato y l’empecipiadura d’a nuestra perdua d’independencia, que remataría en 1707. Lo 20 d’aviento, las soberanistas aragonesas salimos t’as carreras (u no), femos charradas, nos enzorriamos a viyer si conseguimos olvidar tanta redota, … y aguantamos la relativización contina d’a importancia d’o que pasó en aquella rebelión aragonesa.

Los diyas nacionals han de servir pa remerar la nuestra historia, analisar-la, viyer qué conseqüencias tien en lo present, reivindicar-la, y reivindicar-nos como pueblo con una personalidat propia que sobrevive (en parte, lo menos) a pesar de Lambans, Rudis y los suyos complices.

En la mia opinión Sant Chorche no vale pa ixo. Ye un diya esbafau, vuedo de tot, folklorico estando chenerosas. ¿Qué remeramos ixe diya? Como muito, las Cortes de 1461 que decidioron de trigar-lo pa patrón d’Aragón, con garra conseqüencia sobre la población u lo futuro nuestro. Celebrar lo 29 de chunyo, u lo 20 d’aviento ye remerar la nuestra historia. ¿Una historia de redotas? Pues sí. Porque somos un país redotau. Y continaremos estando-ne si desconoixemos la nuestra historia y si seguimos mercando ixe relato que leva a Aragón dende “l’almugavarismo” dica la transición en un peten, sin que pasase cosa en tot ixe tiempo.

Sería tamién bueno, que antimás de recordar la historia d'Aragón, lo fesenos de conchunta con qui nos acompanyó en ixa redota. Conoixendo mas d'a historia de Catalunya y Valencia, nos conoixeremos millor. Trobaremos, paisanos a los tres cantos d'a muga, totz ixos vinclos historicos y culturals que nos unen y achirmanan, y que tanto intrés tienen dende bell sector en trencar terne que terne. 

¡¡¡Dignidat!!! (Amprau de Societat Anonima)

Societat anonima ye un blog d'ixos que preban de denunciar lo nacionalismo banal, -en zagueras ya no tant banal - espanyol. Durant buena cosa d'anyos leva denunciando tot l'odio espanyolista que han habiu d'aguantar las catalanas en cheneral y las independentistas en particular. Los articlos los escribe en castellano. Cuento que tenendo muita fe en la humanidat y creyendo que bi habrá bell lector espanyolista que talment i pueda reflexionar. Lo 20 de setiembre, empecipiaba de facto l'aplicación d'o 155 y la Guardia Civil (cuerpo policial militar, cal recordar) deteneba a 14 altos cargos d'o gubierno catalán. Societat Anonima publicaba iste articulo que leyié en lo programa especial sobre lo Proceso independentista y que hue traigo traduciu. L'orichinal lo podetz leyer aqui.

Yes estau leyendo durant anyos La Razón, l’ABC, El Mundo, El País… Has visto las televisions espanyolas… Has ascuitau las rufiertas d ‘as radios… Mesmo has visto los aquelarres de Intereconomía y 13TV. Talment te han convenciu. Talment te has creyiu lo relato. Ye lo relato oficial. Una visión d’o conflicto. Una envista. Una. Ye un relato con altavoces muit potents. Son altavoces que no deixan sentir atras voces. Voces que han estau silenciadas d’o tuyo espacio publico una y atra vegada, cada día durant siet largos anyos de firme cansera. Muitos de vusatros nos hetz feito de menos u faltau. Hemos estau los malos d’o relato. Bi heba diyas que pareixeba que las ciudatz catalanas yeran plenas de barricadas quan en realidat existiba una tranquilidat total. Se nos ha feito de menos. Se ha invadiu cadaun d’os aspectos d’a sociedat catalana ta humillar-los y ta convertir-los en poco menos que vasuera. Se ha terchiversau la Historia. Se ha mentiu. Hemos estau lo recurso electoral favorito d’os faixistas de siempre y d’a piyor d’as cuchas que podeba tener iste país. Lo vuestro país. Porque yo ya no considero Espanya como lo mio país. M’avergüenya. Con totz los suyos encantos (que en tien), con todas las suyas buenas chents (que en tien) y con todas las suyas conquistas socials (que prou que en tien) ya no lo siento como lo mio país. Ni hue, ni nunca. Prou.

Tos han seqüestrau Espanya. Tos han seqüestrau mesmo los suyos simbolos y agora ya ye la historia de qualcosa que podió estar y no estió. Tos han furtau Espanya. Debant d’a cara vuestra. Han feito d’os tres poders (mas lo quarto que ye la prensa), uno nomas. Han feito una garda d’a caixa publica como han puesto. S’han meso lo chersé en los huembros, s’han feito la bamba d’as choyas suyas como nuevos ricos, s’han chupiu de gomina y tos han furtau lo país.

Me fa vergüenya Espanya. No ye lo mío país. No tien mas prochecto que l’autoritarismo y la represión. Ixo no ye un prochecto de país sostenible. No ye un país inclusivo. No accepta la diversidat ni la suya complexidat. Y baixo lo mantra d’a unidat no bi ha que una ideya: someter a totz a LA SUYA envista monolitica d’a realidat.

A Rajoy y a los suyos lacayos, los catalans les importamos igual. Encara resuena en la ment de muitos la suya frase “me fan goyo los catalans porque fan cosas”. ¡Por favor! No nos quier ascuitar. Nunca no charra d’a carrera. No menciona las millonarias movilizacions pacificas. Un anyo sin atro. Rajoy tos charra a vusatros. A los d’o relato oficial. Rajoy ye un monologuista penible, con lo mesmo texto y lo mesmo publico cada diya: la Constitución que nos hemos dau…. la lei… l’estau de dreito…. los espanyols… ¿creyetz que nos importa ya cosa ixe discurso vuedo? Nos mueve la dignidat, lo querer estar. Nos mueve la baruca de poder decidir. Nos mueve la democracia. Somos la carrera. Dengún no tos ha dito que isto va d’abaixo t’alto. Dengun no tos ha dito que isto ye transversal. Y dengún no tos ha dito que isto empecipió quan qui tos charra de leis (y los lacayos suyos) decidioron que l’Estatut que votó lo Parlament, que votemos los catalans y que votó lo Congreso y lo Senau, heba de retallar-se. Porque sí, porque s’heba de negar que somos una nación, que nos sentimos una nación, u que queremos estar millor tractaus economicament.

Tenemos a cargos inhabilitaus, leis d’o nuestro parlamento suspendidas por lo Tribunal Constitucional, rechistros, detencions… Ye una burda prebatina de humillar-nos, de someter-nos. Y ye prou. Dica aqui hemos plegau. Quedatz-tos la vuestra Espanya. Chestionar-la como queratz. Deciditz que modelo social, politico y economico queretz. Pero deixatz-nos tranquilos d’una vegada. De bella manera, ya en hemos marchau. Y lo vuestro president sabe, ye de tot conscient, de que antes u dimpués habretz perdiu a Catalunya pa cutio. Y sabe que ell será lo president y la suya foto apareixerá en los libros de Historia.

No podemos querer a Espanya “por collons”. Ixo no ye amor. No tien ni brenca ni meya que viyer con l’amor. Rajoy nos exiche que reblemos. No ha entendiu cosa. Querebanos votar. Queremos votar. Los d’o sí, y los d’o no. Yera democracia. Yera dignidat.

En ascuitando... Renaixem, de Xavi Sarrià

S'ha encertau que lo disco de Xavi Sarrià, cantaire d'Obrint Pas, va editar-se lo mes de setiembre. Malas que salió, prou que va baixar-me-lo y ficar-me-lo en lo MP3 pa escuitar-me-lo terne que terne, como foi con todas ixas mosicas que entrarían en la banda sonora d'a mia vida. Pero antimás, setiembre de 2017 ha esdeveniu un mes muit intenso politicament y personal. Lo suyo disco L'esperança entre les dents, lo va mercar un 30 de setiembre, la vispra d'o refererendum, en la botiga Partisano de Barcelona. Lo mesmo 1 d'octubre, en la gara d'o tren que me levaba de Barcelona ta Zaragoza, entre que ordenaba los mios pensamientos y sentimientos por tot lo que yera pasando arredol de yo, Xavi Sarrià sonaba en lo MP3. 

En totz istos diyas, lo disco s'ha iu fendo parte d'a mia vida, con ixas letras tant plenas de optimismo y luita que ya escribiba en Obrint Pas. Ista, la traducié ta lo especial de Tierra de barrenaus que facié sobre lo Proceso independentista de Catalunya, y aquí la tenetz. 

Renaixemos:
Renaixemos de la luz de l’albada

y lo sol que nos crema cada diya

l’instinto d’a fieras feroches

lo vuelo d’os muixons

las furas olas.

Renaixemos de creyer en nusatros

d’as radices que sostienen los arbols

La leyenda d’una resistencia que nunca no vencerán

Renaixemos de l’antiga sabiduría

d’as mans que treballan la siembra

Renaixemos d’a tuya calida riseta

l’audacia de sentir-nos libres

Fillos de l’augua, la tierra y lo fuego

renaixemos con tu

y con tu venceremos

Renaixemos d’as tardadas royas

en las carreras d’a nuestra nineza

L’alegría humilde en las caras

la emoción cantada con la voz trencada

Renaixemos d’as chestas d’o pueblo

celebradas con ploros y abrazadas

La polideza de vivir la vida

sin reblar

Renaixemos de todas las feridas

escritas en las piels mestizas

Renaixemos d’a perseverancia

de luitar con la viella asperanza

Fillos de l’augua, la tierra y lo fuego

renaixemos con tu

y con tu venceremos

Renaixemos d’o ciel cubierto d’estrelas

la luna grisa entre las brancas

Lo viento que se leva los miedos

la clamada salvache, la rumor d’o bosque

Renaixemos d’os nuestros orichens

Las parolas que mantenemos vivas

Los versos que recuentan la historia

d’un antigo legau

Renaixemos d’as guerras que se libran

en las vals foscas d’as nuestras vidas

Renaixemos de todas las redotas

Si hemos cayiu, nos devantaremos mil vegadas

Fillos de l’augua, la tierra y lo fuego

renaixemos con tu

y con tu venceremos

Racionalizando l'independentismo

Si a los conflictos nacionals de qualsiquier mena les sacamos todas la pasión y la parte identitaria, talment podamos plegar en solucions d’una manera civilizada, que ye como s’habrían de fer las cosas en lo sieglo XXI. Sé que ye dificil, en haber-ie qüestions identitarias y simbolicas, y pa solucionar ixas qüestions caldrá atras solucions. De feito tamién caldrá que la solución a los problemas racionals (por decir-les de bella traza) pase por la solución d’os problemas identitarios y simbolicos. Pero pa ixo, primer cal conoixer-nos

Qué quiere un independentista?

Un independentista no ye necesariament nacionalista. L’independentismo, por definición, postula un estau propio pa un territorio que no en tien. No lo fa, necesariament, por una pretendida superioridat cultural (ixo sí que ye nacionalismo), ni por odio a l’atro, ni por no querer charrar la luenga colonial, … cadaun lo fa por qüestions diferents. Bi’n ha que son indepes por qüestions identitarias, bi’n ha que por economicas, y bi’n habrá de tot. Mesmo belun que por una simpla moda. Pero lo que los une a todas, y concretament en lo caso catalán ye evident, ye la voluntat de tener un estau propio.

Podríanos simplificar una definición d’estau como un conchunto de institucions y poders que organiza lechislativament la vida d’o pueblo que se suposa que represienta. Ye decir, basicament, ye un espacio lechislativo. Lo que distingue a los ciudadans espanyols d’os franceses, ye que se richen por leis diferents. Lo que se pretende en creyar un nuevo estau, si olvidamos por un momento la qüesitons identitarias y simbolicas, ye ixo: tener un tarabidau lechislativo diferent. Y independient, en la mida en que lo son los estaus d’o sieglo XXI. Ixo, y ni mas ni menos que ixo.

A la fin, tot ye un problema de legalidatz. Pa tanto ye ixo?

La identidat nacional

La identidat nacional ye propia. Como todas las identidatz individuals y colectivas. “Lo que mete en lo DNI” ye la CIUDADANÍA. Yo soi ciudadano espanyol, prou que sí, porque son las suyas leis las que he de cumplir. Pero la mia identidat nacional no ye espanyola. Yo no soi espanyol, porque no siento que la espanyolidat siga parte d’a mia identidat personal. Ye una opción personal y no ye tant dificil d’entender.

Te lo explico, amiga espanyola. Tú yes espanyola. Te sientes espanyola. Tremolas quan gana la selección en bell esporte, t’encanta la suya luenga universal charrada por chococientos millons d’humanos, y todas ixas cosas. Si marchases a vivir difuera (u quan has marchau a vivir difuera), has continau estando espanyola, ¿no?. Mesmo si t’heses de cambiar legalmente de nacionalidat, continarías estando espanyola. Empadronar-te en Düsseldorf no te faría deixar de celebrar las victorias de La Roja. A que no? Lo puesto an que naixes tampoco no ye determinant pa cosa. Emilio Aragón, u Alaska son espanyols y muito espanyols, a qué sí? L’uno naixió de Cuba, y l’atra de Mexico.

La identidat nacional ye qualcosa intima, sentida por una nomas, y que dengún no puet imposar a atro. Por muito que me digas que soi espanyol, ixo será una qüestion legal, no pas identitaria. Ciudadanía ye en l’ambito d’o legal. Nacionalidat en lo sentimental y identitario. Ye important saber distinguir-lo. Y respetar-lo.

Pa qué un estau propio?

Juan Carlos Moreno Cabrera feba un simil charrando d’as luengas y las normas cultas. Ell deciba que a una luenga no le cal, en primeras, una norma culta, ni autoridat lingüistica, ni sisquiera grafía común. Igual como a las personas, ta sobrevivir, no nos cal, en primeras, ropa. Podemos ir espulladas. Pero en las sociedatz que vivimos, a la chent le cal portiar ropa la mayoría d’o tiempo, y a las luengas les cal estandars, autoridatz y grafías ta poder sobrevivir. A las culturas y luengas minoritarias, a las nacions sin estau propio nos pasa qualcosa pareixida. Si se respetasen los mios dreitos, la mia identidat, luenga y cultura, probablement no sería demandando un estau propio que las protechese. Si Aragón no fuese tractau sistematicament como una colonia d’an que sacar recursos, talment creyese mas en ixe teorico “cafe pa totz”. Pero como ixo, ni pasa, ni pasará, mientras Espanya siga Espanya, nos cal un estau propio. No pa refusar atras culturas, identidatz u luengas, sino pa que qui no somos en las hechemonicas, tamién podamos exercer los nuestros dreitos y vivir las nuestras identidatz con normalidat.

Talment caldria desapasionar lo discurso independentista, como de feito se ye fendo en una ampla parte de l’independentismo moderno. Tot iste renombramiento d’as nuestras ideyolochías como “empoderamientos”, “soberanías”, y atras, cuento que va precisament en ixa linia. Lo identitario, simbolico y emocional ye important, prou que sí, pero ye mas important explicar qué ye lo que queremos y por qué. Vulcar tot lo discurso espanyolista dende lo politico, y no pas dende lo simbolico. Desfender la viabilidat d’as nuestras propuestas socials, politicas y economicas.

Bi ha dos grupos de personas con que tenemos firme faina en iste sentiu d’haber-nos d’explicar-nos bien. La una son todas ixas que, sin estar especialment espanyolistas, en istos diyas s’han alticamau y mesmo han penchau la estanquera en lo balcón. Sí, n’i hai. Ye dificil y cal paciencia a-saber-la, pero tenemos argumentos arrienda pa explicar-les las mentiras que les son contando y, sobre tot, que bi ha un prochecto alternativo y inclusivo con todas las identidatz, siempre que respeten a la resta.

L’atro, ixos suposadament internacionalistas, que meten como problemas iguals a l’independentismo catalán (sin diferenciar CUP de JxS, por eixemplo), y a l’espanyolismo que ocupó policialment Catalunya. Mesmo muitas d’istas personas tienen una formación politica prou gran y, manimenos, no aduben a entender lo que bi ha dezaga d’un y atro movimiento politico. D’istos, en he conoixiu qualques y, quan les n’explicas, a lo menos les fas reflexionar bell poquet. Conoixer-nos y ascuitar-nos con respeto, siempre ye bueno.

Los independentismos y las independentistas somos probablement las que demandamos una democracia mas radical. Hemos treballau mas que garra atro movimiento politico los conceptos de soberanía y identidat, que serán vitals en los desarrollos politicos d’o que queda de sieglo. Tenemos un marco teorico inmillorable, an que hemos superau muitas d’as nuestras contradiccions historicas. Agora nos cal saber explicar-lo y ixemenar-lo, dende envistas purament racionals pa, sino conseguir una masa critica que crebe con lo sistema, lo menos sí fer cayer las resistencias entre las nuestras aliadas potencials

Lo proceso d'independencia catalán. Tierra de barrenaus especial

Nunca no he planteyau lo programa de radio como un espiello de l'actualidat. En l'orichen sisquiera quereba emitir en FM, sino fer nomas un podcast. Pero, ai!, cosas d'a vida, a la fin soi fendo radio, u qualcosa pareixida, y pa forro de bota, me foi un directo.

Que Catalunya ye un tema que m'apasiona no ye garra secreto. Lo que somos vivindo en istos diyas ye una baruca y de vez me fa trobar-me con contradiccions, pasions miedos, debatz y emocions a cada paso. La escalada violenta protagonizada por l'estau talment fuese asperable, pero sincerament no creyeba que plegase ni tant luego, ni tant fura. Y lo que nos queda por viyer. Asinas que, dimpués de tot lo que pasó ixe 20 de setiembre, y de los feito que han iu a l'arreu dende alavez, me viyé quasi en la obligación moral de fer un Tierra de barrenaus radio sobre lo clamau "procés".

Lorient, de Podemos, Daniel, de Puyalon, Laura de Purna y lo periodista Chorche, nos dan a Arale, a yo y a todas vusatras la suya envista y opinions sobre iste afer. Bi convidé a muita mas chent, pero en istos diyas imos todas bien aqueferadas, y en estar un directo, tot se fa mas dificil.

Aspero que sirva iste programa ta que la chent que lo ascuite entienda una mica millor tot lo que ye pasando en Catalunya, i piense bell poquet, y que las que somos por lo dreito a l'autodeterminación y por la simpla democracia, tiengamos bellas quantas voces mas que sentir, en un momento comunicativo muit dificil.

Lo podetz sentir en la barra d'abaixo, u descargar-tos-lo dende aqui.