Carrileros y chinchorreyo. Tierra de barrenaus 9x13

Ya plega la primavera y en Tierra de barrenaus empecipiamos lo tretzeno programa d’a temporada celebrando ixe cambio d’estación que tant feliz me fa. Lo femos con una edición bien variada con a saber qué temas que tractar.

Empecipiamos con la canción d’o programa remerando los tres anyos dende que la pandemia plegó en las nuestras vidas. La Ronda de Boltaña ha publicau un disco sobre la pasa pleno de cancions bien emotivas. Tos proposo d’ascuitar una d’ellas. La ideya yera adedicar-le-ne a mai, que estió ATS, en representación de todas las personas que treballoron ixos meses por desfender-nos d’a malotía, pero la emoción fació que hese de tallar lo programa y editar-lo dimpués. Que sirva iste post pa ixa dedicatoria y pa que nunca no ixuplidemos a toda la chent que treballa en la sanidat día sin atro.

Torna lo tema d’as cadieras d’a Madalena, tot un eixemplo de cómo entiende la dreita zaragozana las ciudatz. Pa las chents de bien, cadieras y lo que calga. Pa carrileros, cinchorreyadors, cosa. Azcón, manimenos, s’ha trobau con un barrio como la Madalena, que se moviliza en un petén y que queremos achuntar-nos en las nuestras plazas y carreras, lo millor y insustituyible ret social.

Ubrimos lo calaixo d’a canción marxista una vegada mas pa trayer-tos tot un himno de EINA, antes mas conoixius como Inadaptatas, que adedicoron tot un disco a la obra “L’estau y la revolución”, de Lenin.

Pa acabar lo programa, charramos d’o 8 de marzo, día d’a muller, leyendo un texto ecofeminista feito por Ecologistas en acción a on que se fa tamién una reflexión sobre la situación derivada d’a guerra en Ucraína. Parlamos tamién d’a presentación d’o libro En l’atro canto d’a buega, de Rubén Ramos, que presentó Edicions Transiberiano en un acto en la siede de l’Asociación pa la recuperación d’a memoria historica d’Aragón. Acabamos lo programa charrando de Birosta que zarra las suyas puertas temporalment pa fer un cambio de dirección y con un tema de Rapsusklei queme desbloqueyoron en l’act de despedida d’ixe bar. 

Ya veyetz, bien variau, como la vida mesma. Que lo disfrutetz!

Recuerda que puetz ascuitar totz los programas en Ivoox, Spotify y la web de Radio Topo.

Programa #142

La reforma d'a Plaza d'a Madalena

¡Con tot lo viello que me siento de cabo ta quan y guarda que contino sin aprender a malfiar d'os poders publicos! La zaguera ye la d'a reforma d'a Plaza d'a Madalena. Quan vide que se i feba obra me facié bien contento. Yera farto d'as recholas blancas que bi heba, que esbarizaban a-saber-lo y malas que pleveba quatre gotas hebas de pasar-ie con ficancia a-saber-la pa no estozolar-te. Quan devantoron la tierra, me facioron temer por los arbols, ixas alcacias granizas que tant buena brempa nos fan pa lo verano. Por lo que se veyeba, les heban tallau quantas venas. Me dicié que ya los de parques y chardins serían a la tisva pa que no se las cargasen. Prou que dimpués quan vide las placas de metal en lo Buñuel, sin que a los de patrimonio les deixasen ni tartir, pensé que como fucionase tot igual, a las alcacias les quedaba quatre días. La obra arribó a la fin y ya se fació la devantadera d'a plaza. ¿Resultau? Unatra azconada, neolochismo que habría de trobar un puesto en lo diccionario d'aragonés como sinonimo de zancochada.

La plaza d'a Madalena ye lo centro d'o barrio nuestro. Astí quedamos, femos fiesta, nos chuntamos, nos escunzamos, nos pretamos buenos capazos... Ye un tramenar contino de chent indo y venindo y tamién un espacio pa estar-te-ie. Dica agora, a lo menos. La reforma ha sacau las recholas esbarizosas, bien se vale, pero chunto con ellas han ixopau los bancos y la fuent. Tot lo que feba d'a plaza un puesto a on que estar-se-ie, a on que descansar-se, a on que trobar-se y capaciar. Tot cosas que se feban, ye claro, sin consumir. Y ixo, lo PP no lo puet permitir. La respuesta OFICIAL d'o concello, a la pregunta de si tornarán los bancos ye que no, que los bancos se feban servir pa lo chinchorreyo de droga y pa los carrileros y que "la chent" se'n ha queixau.

La chent d'o barrio lo que queremos ye los bancos, las papereras y la fuent. Poder disfrutar d'ixe barrio que, de tant bonico que ye, nos tien tot lo día en la carrera y no pas en casa. L'azconato torna a gubernar sin contar con las habitants d'o barrio. La Madalena somos de tercera y no quieren que faigamos fiestas ni que tiengamos lo barrio como queremos. Y prou que no quieren que nos organicemos. Lo van a tener dificil, porque imos a continar dando ferrete, chestionando lo nuestro ocio y los nuestros espacios sin entrar en los suyos marcos consumistas y capitalistas. Lo miercres 1 de marzo improvisaremos cadieras y baixaremos pa exichir que las ciudatz sigan humanas y habitables y no un catalogo de franquicias y puestos pa turistas. Y a l'atro día nos chuntaremos pa seguir organizando las nuestras fiestas. Y a l'atro ves-te-ne tu a saber. Que la Madalena ye un barrio vivo y por ixo no mos estamos quietas ni un segundo. Tos comparto contino lo manifiesto de l'acto d'o miercres:

Manifiesto ¿A ón son las nuestras cadieras? Por unas plazas y carreras pa vivir-las

La semana pasada, l’equipo de gubierno d’o Concello de Zaragoza inauguraba, dando-se firme bamba, la plaza d’a Madalena. Una reforma feita, como de cutio, sin contar con nusatras, las vecinas d’o barrio, qui bi vivimos y bi convivimos. Lo resultau fa burro falso de tot. Lo que yera lo bell meyo d’o barrio nuestro, a on que nos chuntabanos pa charrar, chugar, compartir… ha esdeveniu una zona de paso sin vida. Hemos pasau de tener una plaza a tener un vago bien enrecholau que fa imposible la convivencia, un puesto de paso, una carrera ampla.

Nos han deixau sin papereras, fendo dificil las buenas practicas de hichiene, salur y convivencia que suposa no deixar por tierra los repuis u los excrementos d’os cochos nuestros. Han sacau las fuents, obligando a las personas a consumir en establimientos d’hostelería u a fer servir augua en botella, con la consiguient cheneración de repuis. Antimás de que resulta paradochico que, en plena emerchencia climatica y a pocas d’aprebar un Plan d’adaptación a lo cambio climatico, no se facilite l’acceso d’as personas a un bien basico como ye l’augua. Y han dispareixiu las cadieras, las nuestras cadieras. Lo puesto que fan servir los zagals y zagalas d’o IES Pedro de Luna pa minchar-se l’entropan en lo recreu. Lo puesto a on que la chent gran se posa a charrutiar, a fuyir d’a soledat y solaniar-se. La parte a on que pais y mais se miran como chugan los fillos suyos. Y, en cheneral, l’espacio que fer servir pa estar-ie, pa trobar-nos, pa compartir, pa cudiar-nos, pa fer comunicat. Vivir la carrera ye un activo en salut que afavoreixe la calidat de vida y lo bienestar. ¿Ye que a iste Gubierno le fa miedo isto?

En respuesta a las queixas formuladas por las vecinas, dende lo concello dicen que s’ha sacau tot ixe mobiliario urbano porque “se feba servir por carrileros y pa chinchorreyo” (sic). Una respuesta que, amás de fer pudor de clasismo y prechuicios, nos deixa enarcadas, ya que atras reformas de fa poquet, como la d’a carrera Sant Miguel no s’ha teniu en cuenta ixos risgos y se i ha instalau cadieras y atros elementos urbanos. ¿Que la Madalena ye menos barrio que no atros? Pa iste Gubierno, ye cabolioso que sí. Que se sobreentiende que ye millor que no faigamos servir las carreras porque femos estorbo y porque no somos soque delinqüents. Ye mas que ofensivo, fa de menos a las personas que vivimos aquí y estigmatiza la pobreza.

Por desgracia, ista situación no ye nueva pa nusatras. Levamos anyos denunciando l’estau de qualques infraviviendas, la chentrificación d’o barrio u la enrona d’os vagos nuestros

Exichimos a lo gubierno d’o Concello de Zaragoza que instale de nuevas lo mobiliario que faiga d’as nuestras carreras espacios pa vivir-los. Lo nuestro ye un barrio diverso y de convivencia a on que i culle tot lo mundo y queremos que contine asinas.

Vecinas y vecins d'a Madalena

Autochestión cultural y de l'ocio y centros socials. Tierra de barrenaus 9x11

Plegamos en la metat, si fa u no fa, d'a temporada con un programa a on que charramos d'un tema que sisquiá no tenese tantisma actualidat: las enrestidas d'o sistema contra tot lo que supose autochestión y ocupación y visibilización d'os espacios publicos. En ista nueva edición femos un repaso por belunas d'ixas enrestidas que venimos patindo en la nuestra ciudat dende habe anyos y por diferents gubiernos y institucions.

Empecipiamos con las fiestas d'a Madalena, eixemplo d'autochestión y d'organización popular que vive por cada anyo mas problemas institucionals pa celebrar los suyos actos mas sinyalers. Se prohibioron las chentas populars, ya va bell anyo que no se deixa fer la chera d'o solsticio, con decadas d'historia, y los actos que encara se permiten reciben pinyoras arrienda y acoso policial como respuesta.

Seguimos con lo Buñuel que, en grabar-se lo programa, no s'heba desaloixau encara. Lo Centro Social Comunitario yera lo centro social mas amplo y funcional de toda la ciudat y precisament por ixo, Azcón y los suyos complices han quiesto acotolar-lo. No quieren que sigamos contrimostrando lo que somos capables de fer y que i hai solucions alternativas y millors a lo suyo modelo capitalista, institucionalizau y aluenyau d'as necesidatz reals d'as personas y los barrios.

Repasamos, breument, por qüestions de tiempo, belatro eixemplos d'enrestidas contra ixa organización popular: la cincomarzada, la baixada d'a canal, las cheras de Sant Antón y Sant Chuan, l'acoso a centros socials... i hai muitos eixemplos d'a suya fobia a que lo pueblo tienga alternativas d'ocio que no pasen por lo consumo seguntes las suyas reglas.

En la parte mosical, tos convido a ascuitar cancions que parlan de barrios, de centros socials y d'a suya vida cutiana con tres temazos de grupos aragoneses, valencianos y vascos.

Ya hemos reblau masa. Ye l'hora de recuperar las nuestras fiestas y los nuestros centros socials.

Recuerda que puetz ascuitar totz los programas en Ivoox, Spotify y la web de Radio Topo.

Programa #140

Vivir la carrera

A monico y sin masa estrapalucio, los colectivos y organizacions socials y d'izquierda imos perdendo la carrera. No lo digo en lo sentiu de que se pierda refirme popular. Creigo que si fa u no fa somos tant bien, u tant mal, como fa bella decada. Pero sí hemos dispareixiu en buena mida d'a carrera. L'autochestión d'espacios culturals y d'ocio y la ocupación de l'espacio publico yera antes mas una prioridat. Talment tamién una necesidat, en no existir la patacada de formas de comunicación que tenemos agora. Substituir los retz socials fisicos por los virtuals ye, en la mía opinión una grieu error que nos ye pasando factura. La comunicación ye de tot diferent, perdendo las posibilidatz de debat, empatía y interpretación d'o luengache no verbal que sí que i hai en lo mundo fisico. Trobar-nos en las carreras, prener-las, tener un ocio no mercantilizau, intercambiar opinions, circumstancias vitals, vivencias... ye tot menester si queremos construyir barrios vivos y sociedatz sanas.

Las fiestas d'a Madalena son buen eixemplo d'ixo. China-chana, dende lo concello s'ha iu enrestindo contra un modelo autochestionau y participativo que yera sinyalero en la nuestra ciudat y que contaba con un gran exito adintro y difuera d'o barrio. Manimenos no reblamos y iste anyo empecipiamos dende ya a organizar la nuestra Semana cultural que, como siempre, se fará pa lo solsticio de verano. Lo 4 de febrer empecipiamos con un vermutico pa veyer-nos las caras, fer partache de todas ixas vivencias y prencipiar a organizar-nos. Fará honra, tamién, pa replegar bella perra que pague las pinyoras con que lo concello preba d'acotolar los nuestros actos. Y antimás d'a minchanga y los traguetz tendremos la mosica que nos proposarán las Sororitrap. De tot isto, y muito mas, charraremos en l'onceno programa de Tierra de barrenaus radio. Tanimientres, comparto lo manifiesto que s'ha feito pa ista primer convocatoria. ¡Nos veyemos en las carreras!  

MANIFIESTO: ¿Nos deixará lo concello vivir la carrera?

En lo barrio d’a Madalena somos de vivir la carrera, de compartir con vecins y vecinas arte, cultura, mosica, folclore u reivindicación.

Pero en zagueras qualsequier prebatina d’actividat en las carreras, beluna arradigada dende habe decadas como la chera de solsticio de verano, se traduce en pinyoras, se prohibe dreitament u se mete toda mena d’entrepuces burocraticos que las fa inviables.

Qualsequier actividat que no siga institucional, ye claro. En ixa cerra que las personas vivimos en libertat y en la que demandamos lo nuestro dreito a expresar-nos.

Una d’as zagueras tongadas de pinyoras arribó en la pasada Semana Cultural d’a Madalena con tres que en metioron a los tres actos mayoritarios que se facioron en diferents puntos d’o barrio. Tres pinyoras quasi a l’arreu que, tot y que buena emprenyadura economica, nos nos empachará de seguir con lo desarrollo d’unas chornadas como son la nuestra Semana Cultural, que suposa 34 edicions d’historia viva d’iste barrio.

Nos dan notorio tamién de que mientres lo Pilar i habió pinyoras pa las barras populars y dificultatz arrienda pa fer actos en la carrera. Un empandullo de papelamento que leva meses pa organizar un simple concierto en la carrera u bella punchada de baldes.

La zaguer prohibición estió la d’a chera de Sant Antón en Torrero.

L’agravio comparativo ye considerable.

Pa Fiestas d’o Pilar qualsequier acto organizau por lo concello se puet sentir dende meya ciudat con un estrapalucio que supera prou lo limite permitiu.

Se puet tallar lo trafico pa celebracions relichiosas, afectando a catolicos y no pas. Se pueden fer petar toneladas de polvora u montar un recinto ferial que prene Val d’Espartera dos semanas.

Pero para cuenta con montar una verbena u vermú respetando con ficancia los horario, que siempre lo femos, u prebar de recuperar fiestetas populars perdidas como la Chera de Sant Antón u la de Solsticio de Verano. Las cheras populars, d’atra man, tampoco no podioron fer-se en lo barrio de Torrero, a on que levan decada arroclando a milenta personas.

Tot ye entrepuces burocraticos y emboliques de man d’o mesmo concello que, por eixemplo, montó una chera en lo preto d’a Plaza Sant Francho.

Queremos recuperar la carrera, vivir-la, fer-la nuestra y convidar a que tot lo mundo lo faiga.

Estar una bufada d’aire fresco dillá de pinyoras y prohibicions de toda mena. Pero tamién queremos convivir y respetar lo decanso d’as nuestras vecinas. Que si existe bell problema podamos charrar-ne en cuenta de ninviar a lo guardia con la charrasca. Siempre lo dialogo antes d’o castigo.

Vivir la carrera, estar carrera y convivir. ¿Te i apuntas?

 

 

Parque Bruil. Zaratober 21

Muitas tenemos un bar que ye LO bar. Ixe que quan dices me’n voi t’o bar no te cal especificar qual. Cuento que tamién somos muitas las que tenemos un parque que ye LO parque. En lo Bruil pasaba de chiquet, con la mía chirmana, firmes horas pa Pilars, con la programación infantil que se i feba. Ya de mas gran s’ha convertiu en una d’as partes mas importants d’o mio barrio.

Astí baixemos pa lo nevazo d’a Filomena, a pasar lo maitín limpio chugarriar con la nieu. Astí me’n he baixau en los mios piors momentos vitals, a fer-me una gambada y consultar-les a los arbols y a la Uerva qué fer con los míos problemas. Astí nos chuntamos vecinas y vecins a cremar las cosas malas pa lo solsticio, Sant Chuan u como le queratz decir. Astí capaciamos con las amigas en que fa bueno. Astí m’he feito la biera de dimpués d’as presentacions d’os mios tres libros.

Lo parque Bruil tien tamién tot un catalogo de muitas especies d’arbols, beluna d’ellas unica en la ciudat y con mas d’un eixemplar singular. Y por si no ye prou, ye testigo privilechiau d’a historia zaragozana, como un d’os scenarios d’os sitios u acubillando un minizoo que hue nos espantaría.

La Quiteria. Zaratober 19

Abaixo de casa mía bi heba una papelería. Totz los días en tornar d’o cole, i pasaba un ratet a alparciar las revistas, las depeixas, los tebeos y lo chuguetes. Los amos conoixeban a toda la cachimalla. Astí mercaba la prensa Andoni Cedrún, portero historico d’o Reyal Zaragoza, y cada vegada que nos encertabanos feba uellos mirando-me los suyos quasi dos metros de zaragocismo. Aquella papelería zarró fa a-saber-los anyos.

Quan facié casa muda habié de buscar-me-ne una nueva. En Quiteria me mercaba lo periodico quan encara teneba lo costumbre de leyer-me-lo en papel. A l’ama u a lo fillo les encargaba que me guardasen tal u qual coleccionable, d’ixos que s’acotolan de camín. Agora ya fa tiempo que no i entro que a pillar bella lata de cabo ta quan porque de revistas y papels no se’n leye. Cuento que d’aquí a poco no’n quedará, de papelerías, asinas que no sé qué futuro puet tener la Quiteria. Sisquiá no faigamos como ye costumbre en Zaragoza y deixemos que dispareixca una d’as botigas mas sinyaleras d’o barrio y patrimonio suyo inqüestionable.

La Carrera Estudios. Zaratober 13

Quan quedaba con bell amigo por primer vegada en lo Dispierta Fierro heba de decir-le “en lo barrio d’a Madalena, en la carrera que fa ulor de queso”. De camín sabeba de qual le yera charrando. Entrando dende Cortesías, a dreita y cucha podemos tastar belún d’os millors quesos y embutius d’a ciudat en los historicos Estudios y Portón, que agora mesmo ye zarrau, asperemos que por poco tiempo. En lo cabo d’a carrera, con la puerta en Sant Chorche nos trobamos con L’Albada y lo suyo lema “Ye gran saber estar chiquet”. Birolla y vins de calidat y d’o país y probabibilidatz d’acabar con una jam de mosica tradicional. Lo Barrio Sur, en l’atra cantonada que fan Estudios y Sant Chorche, t’aculle en un agradable ambient y con una ufierta culinaria de tot diferent.

Unatro bar, en lo bell meyo d'a carrera, ha pasau por diferents mans, con millor u pior suerte. Ye un carrerón estreito y curtet que, manimenos, tien mas vida que bell barrio entero. I falta agora, en la carrera, ixe Dispierta Fierro, centro social que estió casa de muitas y muitos a saber qué anyos y que zarró las suyas puertas fa tiempo deixando-nos en busca d’un nuevo puesto a on que poder chilar un BIEEEEEEN cada vegada que sonaba La Ronda de Boltaña.

Ganicas de fiestas d'a Madalena

Entre toda la parrafiquera de razons que tiengo pa vivir en La Madalena, una d'as mas importants ye la suya vida vecinal. I hai en tot lo barrio un bullir d'ideyas y de personas inquietas con ganas d'organizar cosas y la capacidat de fer-lo que va muito con la mía manera de veyer lo mundo. Las fiestas, la clamada Semana Cultural, en ye un buen eixemplo. Arredol d'o solsticio de verano, tot lo vico s'organiza pa fer actividatz de toda mena y que durant diez días bi haiga mesmo mas movimiento. Las vecinas, que ya somos d'estar-nos en la carrera, quasi ni entramos en casa. Y tot organizau a pur de voluntariau, cooperación, autochestión y, como diz lo lema d'estianyo: muitas ganicas, que n'i hai a embute dimpués d'istos dos anyos de pasa.

En ista primer edición libre de midas covid torna t'a carrera la corrida de pollos de Nogara, la visita a lo claustro de Sant Nicolás, que atro anyo me perderé en fer-se de maitins, los conciertos, la milenta d'actos pa la cachimalla, las procheccions y debatz, las visitas culturals por los bars y las cantonadas d'o barrio, que amagan historias dende tiempo d'os romans y, sobre tot, y fuera de programa, los capazos que nos imos a pillar todas terne que terne. Los cabos de semana, prou que sí, programación especial con las grans borinas de man de colectivos como Radio Topo, l'AVV Arrebato u lo CSO Kike Mur. Tot lo programa se puet consultar en la suya web.

Iste yera l'anyo que quereba tornar a estar en la organización tot y que no he puesto ni baixar ni colaborar tot lo que m'hese feito goyo. Ixo sí, en las asembleyas que he puesto ir-ie he trobau a-saber-la ilusión por tornar a fer tremolar lo barrio. Bi heba miedo a que la perda de musclo organizativo y asociativo d'a zaguer decada y que la cansera d'a pasa fese imposible unas fiestas como las d'antes. Manimenos, la respuesta de asociacions, comercios y personas ha estau emplir d'actos ista Semana Cultural que barrunto que ye simient de reprener la rasmia que siempre ha caracterizau lo barrio.

A l'endrecho nos trobamos los entrepuces d'una administración local que quier acotolar con toda la participación y organización popular. Ya habe anyos que consiguioron que deixasenos de fer las chentas en las carreras con malas sincusas de reglamentos sanitarios. Estianyo, en primeras, no se fará la gran chera d'o solsticio por qüestións de seguridat d'incendios. Les ha pasau parellano a la chent d'atros barrios como La Paz. Todas dos cheras con decadas de tradición y que bien podrían haber-se declarau fa anyos fiesta d'intrés local u patrimonio inmaterial. A Azcón le tiene igual la nuestra seguridat alimentaria u d'incendios, tiengamos-lo bien claro. Si istas actividatz las fese la parroquia de Sant PitoPato u se fese una chura de bandera espanyola, u simplament servise a los suyos intreses, toda la papelamenta s'hese solucionau en un tres y no res.

Lo facherío, la chent de perras d'a ciudat, ya tien las suyas fiestas, los locals a on fer-los, y si no, les ne deixa lo concello, que pa ixo ye suyo. La resta no tenemos que las carreras y antimás no queremos deixar-las. Queremos estar-ie y vivir-las. Trobar-nos-ie, chuntar-nos-ie, y fer visteras todas las nuestras inquietutz. Ixo ye lo que les preocupa y no pas la nuestra seguridat. 

Viviremos istas fiestas con l'alegría de siempre. Nos chuntaremos en las carreras y bars. Y d'ixa intelichencia colectiva ha de salir la rasmia pa reprener lo nuestro y que a l'atro anyo tornen las cheras en totz los barrios, y las chentas en las carreras. La Semana Cultural d'a Madalena ye muito mas que fiestas. Ye autochestión en marcha y unatro paso, decisivo, en la recuperación d'as carreras de man d'as que siempre i somos.

Tabiernas d'Aragón (V): El Refugio del crápula

No sé qué diya entré por primer vegada en El Refugio del crápula, ni ta qué. Pero sí que tiengo cabolioso la primer remeranza d'ixe bar. Los diyas de cada diya, se i feban actuacions. Lo bar teneba unas mesas chicotas pa fer-te un hordio tranquilo. La mía parella d'alavez yera muit aficionada a la guitarra y a las cantautoras y ixa tarde n'actuaba una en lo Crápula. I fuemos y pasemos un rato bien agradable. A la fin de l'actuación, nos enfilemos ent'a barra y preguntemos cómo se chestionaba lo tema d'os conciertos porque la mía companyera yera pensando en tanyer-ie bells temas. Lo cambrero, no recuerdo quí, quitó un libro de debaixo d'a mesa y nos dició que simplament nos caleba trigar una calendata que tenese libre. A la fin, ixe concierto nunca no se i fació, pero me deixó bien enarcau la facilidat con la que una persona que querese empecipiar a fer-se sentir en lo mundet d'a mosica podeba trobar una oportunidat en ixe guariche que acababa de conoixer.

La siguient remeranza ye tamién d'habe a-saber-los anyos. Entre ixas paretz bailé por primer vegada con qui agora ye la mía parella. Encara tardaríanos muito a chuntar-nos, pero en ixa fiesta y con la mosica de La Orquestina u La Ronda de fundo, nos faciemos lo primer de muitos bailes que vendrían dimpués. Estió en una Borina por l'aragonés, una fiesta que organizabanos de conchunta totz los anyos Nogara y Ligallo de Fablans quan todas dos organizacions teneban firme rasmia y buena cosa de socias. Encara que lo puesto a on que lo celebrabanos no yera fixo, lo Crápula n'acubilló quantas. Siempre nos meteban a-saber-las facilidatz ta que sonase la mosica nuestra, poder calar-ie una mesa de materials y mesmo vender presiego con vin que febanos en unas pipas d'ixas grans de plastico pa poder financiar las nuestras actividatz.

Lo Crapula yera la zaguer aturada en muitas d'as mías nueitz de borina por La Madalena. Como muito, bella vegada, n'i heba unatra en lo Loro, pero nunca he estau yo guaire de quedar-me a veyer salir lo sol. En los anyos que treballé en A Flama, en acabar la chornada, siempre tocaba de fer-ne una astí. Las suyas cambreras veniban a sobén t'o nuestro bar y nusatros les tornabanos la visita bella hora dimpués. En entrar-ie, la nuestra presencia yera percibida de camín, por la uloreta a cocina que febanos. La extracción de fumos d'aquellas envueltas funcionaba prou malament.

Pero si cal charrar d'ulors, sin sangre en la pocha me deixó lo diya que se vedó de fumar en los bars. Lo Crápula siempre heba estau d'ixos puestos a on que se fumaba muito. En entrar-ie hebas de barallar-te con una preta boira de tabaco y lo que no yera tabaco, encara que lo cambreros prebaban de que no i hese guaire porro pa escusar-se pinyoras. Ta ixo ya n'i heba atros bars por lo barrio y totz sabebanos ta on ir si ixo yera lo que querebanos. La primer nueit a on que la prohibición se respectó, todas habiemos de fer-nos a la ulor humana. A sustituyir lo Ducados por la sudor y la fortor que beluno feba(nos).

Ixa novieta que tenié nunca no arribó a fer lo suyo concierto astí, pero la mosica en directo yera un d'os puntos fuertes d'o Crapu. Astí sintié por primer vegada a bandas como Las Guindillas u La Monkiband, antimás d'unas quantas vegadas a Dechusban/Gaire y a-saber-los atros. En lo suyo teito, por muitos anyos, estioron penchadas estrelas doradas de cartón a on que yeran los nombres d'as collas y cantaires que heban pasau por lo suyo inexistent scenario. Nombres a sobén bien conoixius anyos dimpués. No yera un buen puesto pa fer conciertos, en estar tant chiquet y tener la distribución que teneba, pero ta cosas chiquetas y autochestionadas feba buena honra.

Gracias a una fiesta de Radio Topo tenié la ocasión de punchar-ie mosica. Lo puesto a on que yera previsto de fer-la se quedó sin biera y habiemos de cambiar la ubicación ixa mesma tarde. A tot meter, les ne preguntemos y no nos metioron garra entrepuz pa fer-lo-ie. Ixa nueit esdevenié un mas en toda la parrafiquera de chent que pasó por lo controls d'ixe equipo de soniu. Entre la resta bi'n habió de tot. De muit buenos y no pas tanto. Bi heba nueitz memorables a on que no en sentibas ni una de mala. Y atras de tot ixuplidables a on que la falta de criterio feba que ixo se tornase un pandemonium mosical sin mica sentiu. 

Creigo que precisament ixo estió un d'os grans problemas que teneba lo bar en la suya etapa zaguera. Lo menos a yo yera lo que me feba no freqüentar-lo guaire en istos zaguers anyos. A la hora de trigar un bar de borina, me fa goyo de saber qué me i trobaré mosicalment. Sé que rai a atros, pero ta yo la mosica ye bien important. En lo Crápula, a la fin, nunca no sabebas qué te puncharían. Si tenebas suerte, te quedaba una sobrebuena borina por debant. Si no, ya podebas espipar a toda vitesa t'atro cabo antes que l'alcohol y las horas fesen la suya barracha y te deixasen camín d'o leito.

La cantidat d'historias que han pasau entre los muros d'o Crapula darían ta fer toda una serie de novelas. Son muitos anyos, muitas cambreras y clients, conciertos y sesions, litros y litros d'alcohol, borinas de toda mena y lo puesto a on que acababan muitas nueitz. Los dos zaguers diyas d'a suya existencia, muita d'a suya parroquia nos chuntemos en lo bar y las carreras d'arredol. Recontemos las nuestras batalletas, las horas que i hebanos viviu. Lo que recordabanos, lo que hebanos ixuplidau y lo que nos feba vergüenya de remerar.

Feba tiempo que no bi iba. Feba tiempo que la mayoría d'a chent d'a mía cheneración no i entraba guaire. Pero con tot y con ixo, sabebanos que siempre i yera. Que las nueitz de borina d'a Madalena siempre podeban rematar astí. Muitos viviemos un tiempo a on que tenebas atras opcions como lo Sin Fronteras u Calaveras y diablitos. Bi heba publico pa todas y encara en sobraba pa los locals d'os colectivos que tamién ubriban de cabo ta quan dica tarde. En zagueras, no nos i quedaba que lo Crapula y agora nian ixo.

Con lo zarre d'o Crapula probablement perdemos una licencia, ya que en la Madalena no se'n da de nuevas. Nomás se puet fer un bar a on que ya n'i hai un. Perdemos un d'os zaguers guariches que ubriban dica tarde. Perdemos un puesto que siempre teneba las puertas pataleras ta que los colectivos i organizasenos las nuestras movidas. Y perdemos un testigo de muitas d'as nueitz mas divertidas d'as nuestras vidas. Sirva iste post como homenache a toda la chent que, a l'atro costau d'a barra, lo facietz posible.

Puetz leyer atras historias sobre Tabiernas d'Aragón clicando aqui

Un maitin zaragozano

Quan os youtubers locals, os barrenaus d'o palo y o rosario, u os comentaristas de Heraldo te fan planteyar-te deixar la ciudat, ye buena cosa fer alcordanza d'ixa atra Zaragoza que vivo totz os diyas y que tanto amo. A Madalena ye, antimás, un lugarón adintro d'o monstruo zaragozano. Un puesto con a suya propia lochica, diferent d'a resta de vicos  y con dinamicas socials que, pa bien y pa mal, remiten a soben a la ruralidat.

Yera un maitin d'ixos que o sol t'eslucerna en salir de casa. Un abrazo de luz y calor que anuncia ixas poquetas semanas de goyosa primavera que van antes d'o furo y rusient verano zaragozano. As vecinas queremos decidir sobre o nuestro barrio -¡qué loquería! -y nos hebanos convocau pa fer-le un abrazo a la ilesia d'a Madalena. En istos primers diyas de caloreta, os capazos se prolargan. Ya no fa galvana estar-te firme rato de charreta. Encara que a nueit d'antes no s'embolicó, un cafe nunca no ye por demás pa sacar-se as zaguers laganyas. Charrin charrand, se nos pasa la hora d'a convocatoria y os camaras de televisión ya se nos miran, preguntando-se quan podrán hopar t'a siguient noticia. As periodistas siempre atabaladas!

A la fin, beluna pilla o megafono. Nos imos agafando d'as mans. Como lo contacto fisico no me fa guaire goyo, prebo de no aleixar-me d'as personas de mas confianza. Me miro de bislai, y con cansera intelectual, a una que demanda que a ilesia pase d'a superstición catolica a la superstición new age. As vecinas que fan tarde, s'han d'unir a l'abrazo sin o capazo previo. Ya se lo farán dimpués, en o vermut. Femos o fato bell ratet. Nos redimos. Enfortimos, unatro diya, o rete que nos enreliga a todas as madaleneras. A lectura d'o manifiesto reivindica que a ilesia catolica deixe d'arramplar con tot. Tot ixe patrimonio, feito a pur de furtar y explotar fisicament, intelectual y espiritual a tantas y tantas personas. Dito con mas elegancia y millors modos, que pa ixo tenemos buen cudiau.

Acaba l'acto y a mitat d'as presents nos enfilamos ent'a Plaza d'o Pilar. T'a nuestra Plaza d'o Pilar tamién. De todas as zaragozanas. En a Plaza Sant Bruno, l'azoque anima lo maitin d'o domingo. Entre zarrios y quincallas, siempre se i troba bella choya. Ya tiengo un puesto que siempre tien bell libro intresant sobre Aragón. En a pocha, pocas perras. O sabado no estió furo, pero me deixó lasa la cartera. En una d'as caixas d'o puesto, un libro sobre a obra de Asso, escrito por Antonio Peiró. "Qué vale?" pregunto a lo botiguer. Se me mira. Cuento que analizando quanto sería disposau a pagar por ixe libro, y sumando-le bell par d'euros. Siet. Yo no sé recatiar. Dubdo. Una amiga quier mercar-le-ne unatro. "Diez por os dos" - l'ufre la mia parella. Antimás de no saber recatiar, ye qualcosa que me mete niervudo y me fa a saber que vergüenya. O botiguer accepta a escape. L'amiga me deixa chanfles pa pagar o libro. "- Ya te los tornaré". Un "Tira!" me fa pensar que será mas facil convidar-le a una biera.

Con l'alegria que nomas un nuevo libro puet dar-te, continamos o camin ent'a plaza. Unas mozas portan unas pelucas azulas y son cantando. "Be d'estar una despedida de soltera", nos pensamos. Pero ¿a ixas horas d'un maitin de domingo?. En acercar-nos-ie descubrimos que a letra d'a canción ye un canto antiabortista. Unatra asociación d'as que preban de decir-les a las mullers qué fer con o suyo cuerpo. M'ufren no se qué. Les ne refuso. ¡Cómo va ista ciudat!

Pocos metros dimpués, a color azula torna a protagonizar la plaza. En iste caso ye o nuestro destino: a manifestación d'o Rete Augua Publica d'Aragón. Lo d'a Madalena y d'o Pilar son dos actos prou diferents pero con pareixius. A la fin, en os dos, nomas demandamos que todas podamos decidir sobre os nuestros recursos. S'estendillan una telas que represientan os rius nuestros .Uns globos chigants entretienen a catrinalla y a las mas enchugardidas d'a plaza. Atra vegada, trobar-te con chent arrienda. As d'a Montanya y as de Tierra Plana. D'o norte y d'o sur. De l'activismo politico y qui simplament desfiende o lugar suyo. Mas capazos. Mas abrazos. Mas complicidat. O rete que s'ixampla d'o barrio ta cada cabo d'Aragón y dillá.

Hemos de marchar, que hemos quedau a chentar en Penyaflor. A resta se'n iran en un rato t'o vermut. Regular que en tornar d'a chenta, nos ne trobamos a mas d'un, que encara ye vermutiando. ¡Paratz cuenta, que a l'atro ye lunes!

Zaragoza ye hostil bellas vegadas. Y t'agana d'exiliar-te ta bell cabo ideyalizau que, manimenos, tendrá as suyas propias miserias, que por agora ignoro. Atras, Zaragoza ye amable, polida, una amiga mas d'as que comparten la vida con tu. Un maitin pa disfrutar as suyas carreras, plazas y paisaches, un ratet con as amigas y companyeras de luita, ... ixo ye de mal sustituir. Zaragoza ye casa mia, y encara que tienga bella tubería embozada, y bella paret con crepazas, la amo con ixe "carinyo ancestral", que deciba Labordeta.

Tabiernas d'Aragón (IV): Pottoka

No recuerdo quan estió a primer vegada que vesité lo Pottoka. Tampoco no recuerdo la primer vegada en l'IFI. Pero sí que totz dos han feito parte d'a mia vida borinera. Y cómo! Ista semana plegaba lo momento que tanto espanto nos feba dende tiempo habe. Iñaki, amo y cambrero d'o Pottoka, se chubilaba. L'espanto veniba de que i montasen bell atro bar de modernas, d'ixos que surten como fongos por a Madalena, en zagueras. Bien se vale que, seguntes pareixe, lo deixa en buenas y expertas mans que no esvarrarán guaire o camín que prencipió Iñaki.

De bars clonicos, bi'n ha a brozuecos en Zaragoza. A mesma estructura y decoración, os mesmos menús, a mesma bebida, o mesmo ambient, ... De Pottokas, no bi'n heba que uno. Como deciba belun, en un d'os cientos de reflexions que han deixau istos dias en os retes socials, a carrera Martín Carrillo, ha deixau fa tiempo de decir-se asinas, y tot lo mundo la conoixe como "a carrera d'o Pottoka".

O Pottoka no yera un bar "de marcha", ni de fer-se un café, ni teneba pinchos, ni birolla. A mosica tasament se sentiba, o cambrero no yera especialment simpatico, no i feban cocktails de moda, ni yera más barato que qualsiquier atro bar d'a redolada. Manimenos, os cabos de semana s'empliba. Yera un bar d'ixos que siempre i ye. Un puesto an que se ye bien, an que te puetz posar y, arredol d'una botella de sidra vasca, apanyar totz os problemas d'Aragón y d'o mundo con as tuyas companyeras y amigas.

O Pottoka yera d'ixos bars periglosos, porque sabes como i dentras pero no quan ni como en sales. Un d'ixos bars an que as rondas y os capazos iban a l'arreu. Nos i trobabanos, antimás, chent de todas as familias politicas d'a madalena. Pocas vegadas he visto más compleganza que en as despedidas que le faciemos a Iñaki en istos zaguers dias antes d'a chubilación.

Me quedará incognitas pa cutio como qué ostias bi heba dezaga d'a puerta de l'escusau u qué sentiba Iñaki en o transistor. Agora una nueva etapa empecipia pa o Pottoka. A chent que lo pilla tien la confianza d'Iñaki y tamién la mia, y aspero que sepan conservar ixa esencia acullidera que teneba o bar dica o suyo zaguer dia. Aspero tamién que Iñaki tienga la chubilación que tanto se mereixe, en estar toda una figura d'o vico y d'a vida de muitas personas que hemos viviu tantas cosas en os suyos locals.

Iñaki, zure erretiroa gozatu!
Agur Pottoka, kaixo Pottoka!

Tos deixo penchadas as tres videofateras que i gravé:

 

De vacanzas IV: Madalena, Mayestrato y Matarranya

De tornada t'Aragón, pasemos un diya en Zaragoza, aprofeitando que yeran as fiestas d'o nuestro vico, A Madalena, y que yera o diya central, o d'a chera de Sant Chuan. Cuento que iste vico estió un d'os primers en fer cheras de Sant Chuan en Zaragoza y soi prou seguro de que probablement siga un d'os que más chent i arrocle. 

Millars de personas se chuntan en un evento que imple o Parque Bruil anyada par d'atra y que a suya organización ye autochestionaria de tot, por un regular por l'Asociación de Vecins y as buenas chents de Radio Topo. Por si belún no i ye estau, a tardi prencipia con un pasavillas con diaples por as carreras d'o vico, que remata en o Parque Bruil. Astí se preta fuego a la chera, a on que bi ha diferents rituals machicos, como os de aventar-ie os mals deseyos u no tan machicos como los de blincar parti d'a chera u fer-ie bells mondongos ta cenar.

De tardis tamién gosa d'haber-ie mosica entre que os vecins van montando a chera, pero dimpués d'enchegar-la ye quan prencipia o concierto gran. Por un regular d'una colla aragonesa. Por astí, en as zaguers anyadas pasoron China chana, Dadá, Irregular Roots u una colla de versions de Kiko Veneno que no remero o nombre suyo. Todas sobrebuenas collas.

En ista edición se quedó una mica esbafada porque l'orache que feba no permitió de fer guaire gran a chera y nos cheló un poco a totz. Más que más a qui venibanos d'a placha en espardenyas y nos habiemos de meter a chaquetica. Con tot y con ixo, a zorrera no i faltó, ni os capazos con vecinas, companyeras y amigas.

Toda la siguient semana estiemos en Andorra, fendo-la servir como base ta fer cursas por a redolada. A primera estió t'o naixedero d'o Río Pitarc. Por o camín t'allá se pueden viyer os Organos de Montoro, entre os terminos municipals de Villar Luengo y Exulv, un poliu paisache y un increyible patrimonio cheolochico que, como tantas atras cosas, resulta prou esconoixiu t'os zaragocetas como yo. Toda la redolada ye, en cheneral, de muit buen viyer. Y millor que'n sería si no por l'incendio que fa bellas anyadas cremó buena parti d'as selvas. Ta conoixer ixa historia y l'albandono que les tienen os gubiernos a istos lugars, tos recomiendo de visitar o blog de "Nuestros montes no se olvidan", plataforma que luita ta actuar y reflexionar sobre a problematica d'os incendios en Teruel.

A cursa t'o naixedero d'o río Pitarc ye prou facileta. Prencipia en o lugar de Pitarc, un lugar prou chicorrón amán de Villar Luengo. Dende astí surte o camín que leva t'o naixedero. Ye muito bien sinyalau y imposible de cacegar-se-ie. Mientres quasi tot lo camín, que tasament tien costeras, se va por una selveta no guaire funda, pero prou como ta estar-se fresquet y con bien de goi. Bi ha bell churret d'augua, u a lo menos bi'n ha quan ha pleviu tanto como en ista anyada, bien pincho por o camín. A metat camín si fa u no fa bi ha una chiqueta ermita y un panel explicativo sobre a clasificación d'as especies que fació en a redolada Ignacio Jordan de Asso, un d'os personaches más importants y de vez esconoixius d'a sciencia y a historia aragonesa. A la fin se plega en una foz prou polida a on que se viye o naixedero. Tot lo camín tien tamién muitos puntos intresants dende l'anvista cheolochica. D'animals no'n viyemos guaires, pero diz que bi ha mesmo loiras. Tot lo recorriu se fa en bellas tres horetas y no tien mica dificultat. A la fin, en o bar de Pitarc, pillemos un capacet con uns ciclistas catalans que i yeran fendo BTT y con os cambrers d'o bar que son bien mahos y que tos recomiendo que visitetz ta fer-tos-ie a "biera de dimpués".

A tardi la pasemos en Villar Luengo y Cantaviella, dos polius lugars d'o Mayestrato que, sin destacar guaire tienen bells cantons pinchos. En Cantaviella, por qüestión d'horarios, nos quedemos sin visitar o museu d'o carlismo, a on que se interpreta a importancia d'o lugar y toda la redolada en as Guerras Carlistas. A l'atro'l diya estiemos visitando, quasi de conchunta con un autobús de chubilaus Mirambel y La Iglesuela, dos d'os lugars más polius que he visto en tot Aragón (y ya me'n he recorriu prou). Os dos tienen muito bien conservau buena parti d'o suyo patrimonio arquitectonico y fer una gambadeta por as carreras suyas ye revivir un poquet tot lo pasau que tienen, que no'n ye poco. Tanto o medieval, como toda la importancia en as debantditas guerras carlistas u en a guerra civil espanyola y en a posguerra con prou actividat d'o maquis. Si lo unes a lo paisache a on que son mesos, tot de mont, tiens un sobrebuen scenario ta recontar libros y cintas. Sisquiá se animase belún... De feito, Ken Loach gravó en Mirambel parti de "Tierra y libertat".

Dimpués d'un diya de "no fer cosa" en Andorra, que tamién cal de cabo ta quan, tornemos a fer un miniviache t'o Matarranya. Ya i yeranos estaus fa anyadas visitando toda la redolada, que ye muito recomendable. En aquella anyada bi heba sequera y nos recomendoron de no visitar El Salt, un churro d'augua que fa o Tastavins, porque yera ixuto de tot. Nos quedemos con as ganas y, en viyer as plevias d'ista anyada, no podebanos quedar-nos sin visitar-lo. Heba visto fotos y me'n heban charrau prous vegadas, pero viyer El Salt "en vivo" ye impresionant. Probablement, un d'os puestos más pinchos d'Aragón. Ya me flore haber tardau trenta y quatre anyadas en descubrir-lo!

El Salt ye en o cauz d'o río Tastavins, en o termino municipal de La Portellada. Se puede plegar-ie en auto u deixar-lo en a carretera y fer una chiqueta gambada dica astí. O churro se puet viyer dende alto, en una formación rocosa prou curiosa, y dende abaixo con una anvista espectacular de l'augua cayendo, con a formación cheolochica que ha creyau y a vechetación que i creixe. Y prou que ye un puesto sobrebueno ta fer-te un banyo, más que más en istos diyas de tanta calor.

A cursa por totz istos lugars la rematemos viyendo Calazeit y pasando-nos por Val d'Algorfa ta mercar-ie aceite d'a cooperativa y carquinyols, nyudos, tortas d'alma, almendraus y atras laminerías en o furno d'o lugar que i fan cosas rebuenas.

Aquí remato o recontamiento egolatra d'as mias vacanzas. Aspero no haber resultau prou canso y que hayatz trobau información ta visitar puestos pinchos, que yera lo que prebaba de fer.

De Pilars: 6 y 7 d'octobre

Ya voi de dos en dos, pero contino cumplindo.

6 d’octobre

Prometeba estar un d’os diyas más furos de Pilars. Y de furo, no’n estió guaire, pero de divertiu muitismo. Prencipiaba con una chenta en A Enrestida rodiau de amigas y companyeras, fendo-ie buenas risas y tastando sidrica y aranyons casers. Tamién bi habió minicampionatos de chitar por tierra a sidra, morra, aplausos sin sentiu y atras disciplinas que feremos olimpicas en declarar a independencia.

Dimpués d’a obligatoria-en-istos-diyas clucadeta, baixemos t’as barras ta trobar-nos-ie con a chent que iba t’o millor concierto de todas as fiestas: Prau y Los olvidados de la morgue. Dimpués de bella biereta y de pasar por o chino d’o Coso a mercar bragas t’aventar-le-ne a os mozos más sexys de o concierto, pleitiemos por qué camín yera o más curto ta plegar en l’Arena dende a Plaza d’a Madalena: Compromís de Casp, Florentino Ballesteros, carreras ixas d’as Fuents y salir si fa u no fa a l’altura d’o BBK u baixar ent’a Plaza Sant Miguel y tirar tot dreito por Miguel Servet. Nos trestallemos debiu a la manca d’alcuerdo (a cucha siempre igual), y o comando Miguelservetista (p-m) plegó bells segundos antis. Pero a fe a fe que ferían bell zancocho por o camín, porque ye de dar que ye más curto por As Fuents.

O caso ye que bi pleguemos, cenemos en o turco y, bell poquet tardi, prencipioron Los Olvidados de la Morgue (Os ixublidaus d’a morgue) con o suyo conciertazo: versions de La Polla, Parálisis Permanente, Los fresones rebeldes, Tenessee entre atros y, prou que sí, os suyo temas con una versión en aragonés de Sant Chorche buco! y un manifiesto en contra d’o brachiluro. Cutrepunk baturro en esencia y sobrebuena borina. En rematar, pichadica y los Prau sobre o scenario, presentando o nuevo disco que daban con a dentrada de 8 euros (ya podeban aprender atros...). Sonando cada diya millor, engueroron en directo beluns d’os temas d’o nuevo disco sin ixublidar os suyos ya miticos. Divertius, reivindicativos, buena mosica y en aragonés. Poco más se puet demandar-ne...

A nueit tampoco no daba guaire más t’a bodega que portiabanos, asinas que, dimpués d’un ratet por as barras d’o BIC, marchemos ta casa, que ya caleba... Nos quedemos sin viyer o pregón, que me han dito que estió muito bien, no? (modo somarda ON)

7 d’octobre

Como a nueit d’o 6 no remató masiau tardi, encara teniemos rasmias ta fer una gambadeta de maitins. Baixemos a viyer o mercau aragonés. Bi yeran Pepín y Arnao de pasavillas y un fascal de puestos ta minchar y mercar artesanía. Entre atros, o Choripan (bien de carnaca bien), a pinchería (u como fer un sobrebuen negocio con a ideya más chorra d’o mundo) y la Pijería como podríanos clamar a o puesto ixe que bi ha a la fin, que bi ha vin ta tastar y se i vende “alfayas d’a garnacha” (atiende, amante!).

En indo por o mercau nos quedemos enlucernaus d’a cantidat de tocineras d’a poli espanyola que bi heba por tot. Y ye que, no sé como lo hebanos ixublidau, yera l’acto ixe d’a Guardia Civil que le daban un sinyal d’Espanya de 5000 euros (qui lo ha teixiu, Dolce & Gabanna?) a la virchen u no se qué. Que foticos que nos ha deixau l’acto d’a nuestra presidenta, eh? Que leyal que ye a ciudat de Zaragoza! A glarimeta se me cayeba por tot d’a emoción! Teniemos susto gran quan sintiemos dende a carrea Alifonso o Vivaspanya Vivalrei que chilo o que feba o discurso y decidiemos de pasar un ratet viyendo a unos mozos fer movidas de break dance. Muito mahos os zagals, que diz que son d’a mesma especie que yo, pero o mio cuerpo no ye asinas, ni parellano. De tornada ta casa capazos en La Tranquera, que ha tornau a ubrir y en as barras d’o BIC, a on que yera toda l’alicatalla buena.

De tardes tocaba fer o viello, porque ya no plegabanos t’a mani antitaurina. Gambadetas por o centro, a on yera a rebutir de tocineras por a debandita mani (en contemos siet). Viyemos o “trusqueninos” a on que nos dicioron que caleba fer una hora de ringlera t’aventar a un nino por un esbarizaculos tuneau (que guarda si no bi’n ha en totz os parque de Zaragoza!). Dimpués a poli, que cundió muito, le demandó os papels a uns zagalotz que yeran fendo un show en a Plaza Aragón y visita t’as “casas rechionals”, o ternasco y La Otra a on que rematemos a tardi pues me feban mal os uellos por as lentetas y o lunes caleba treballar. Tardi de viellas ta una viella como yo. Ai, con lo que yo yera!

Sant Chorche buco!


Street flow blincando

Araleachenda de verano 2012

Todas as anyadas, Arale, ta istas calendatas s'organiza lo suyo verano. O suyo y o mio, en a mida d'o posible. Y ya de paso les n'invía a las suyas amistatz. En primeras se'n feban a mofla, pero agora ya ye quasi un ritual y, si tarda bell poco, le carranyan en trobar-se-la por a carrera. No digamos si se deixa bell festival u evento. 

Como cuento que ye una información d'intrés ta todas as lectoras d'o blog, feré un resumen de l'Araleachenda 2012 con bells comentarios míos y suyos:

Fiestas d'a Madalena: 15 a 24 de chunio. Vico d'a Madalena, Zaragoza. As fiestas d'o millor vico d'o mundo. Qué más decir? Incluyida la chera de Sant Chuan, que en ista anyada toca en sabado, y muitas actividatz alternativas ta prencipiar o verano con borina y reivindicación.

Tamborilé: 16 de chunio, Mezquita de Exarc (Cuencas mineras). Festival de mosica en a carrera. Tot lo diya dezaga d'una banda fendo pasavillas por o lugar, zorriando y bailando. IV edición d'una borinaza ya imprescindible.

Fiestas d'o Gancho: 21-26 de chunio. Vico d'o Gancho, Zaragoza. As fiestas d'o segundo millor vico d'o mundo. Encara no conoixco lo programa, pero siempre i levan buenas cosetas. Todas as anyadas i trobo bella colla de mosica nueva buena.

Poborina folk: 22-24 de chunio Lo Pobo (Comunidat de Teruel). Mitico festival de folk que leva 14 anyadas. Y como todas as anyadas me lo perderé. O nuestro festival maldito.

PIR: 29 de chunio - 1 de chulio Chasa (Chacetania). Toda una tradición. Un d'os millors festivals d'Aragón con una d'as piors programacions. Pero toque qui toque siempre i femos sobrebuenos ratos. Ye lo que tien a buena companyía, as badinas, l'alcohol y a mosica...

Fiestas de l'Anchel: 29 de chunio - 9 de chulio (Teruel)  Si nunca no i yes estada, ya tardas. Muito millor que Sant Lorient en Uesca. Si borina tenese una foto en o diccionario se fería en istas fiestas.

Esfendemos a tierra: 14-16 de chulio. Artieda (Chacetania) A gran borina de l'independentismo. O puesto y os diyas de l'anyada a on que salimos de l'almario y aprofeitamos ta debatir, charrar y, prou que sí, pasar un sobrebuen cabo de semana. Con muitas sorpresas en ista edición.

Carrasca Rock: 20-21 de chulio Exulv (Andorra-Sierra d'Arcos). Tamién se ha iu fendo o suyo espacio d'entre os festivals de verano, dende aquella primer edición fa ya tanto... Y siempre fendo buena faina en a prochección de collas d'a redolada.

Pirineos Sur 13-28 de chulio. Sallent, Val de Tena. O más institucional y comercial de totz os festivals, pero no por ello deixa de trayer asoben artistas intresants. Encara que nunca no i soi estau, tanto Arale como tot qui bi ye iu en ha traito buen sabor de boca.

Trobada de chenero: 17-19 d'agosto Lakabe, Nafarroa. Trobada sobre muller, salut y igualdat en una ecoaldea navarra. Prou intresant.

Fiestas d'Andorra: 7-11 de setiembre. Andorra. A oportunidat de rematar bien o verano y tener a zaguer borina estibera antis de prencipiar o curso. A tamás d'os bars, siempre surten buenas ideyas ta pasar a nueit.

Y ixo ye tot lo que incluyó Arale en a suya achenda t'o verano 2012. Si tenetz más ideyas podetz escribir-las como comentarios. Regular que nos deixamos cosas como estoesloquehay, Gaire, Lagatavajunto, Sant Lorient... Afortunadament a ufierta en Aragón ye cada diya más gran y más intresant.

 
 

Sant Agustín de Hipona

De fa tiempos me fa goi de saber un poquet d'a historia d'as carreras de Zaragoza. Más que más, d'as d'a Madalena, o vico a on que vivo y prou que o millor de Zaragoza y d'o mundo. M'intresé por a carrera Sant Agustín y por saber qui yera ixe personache y que heba feito ta que le dasen una carrera en Zaragoza. Y be-te-me que ye tot un eixemplo de un buen cristiano. Masclista, anti-scientificos y imposador d'o cristianismo a sangre y fuego si ye menister. Gracias a Pixe, qui me pasó un vinclo a una web sobre vidas de santos, m'enteré d'a versión catolica d'a vida suya.

Un articlo que remata con a frase:
"Con él se lega a la posteridad el pensamiento filosófico-teológico más influyente de la historia. " No puedo estar más d'alcuerdo con ixa frase. Pero conoixcamos as opinions de San Agustín de Hipona (354-430 d'a era cristiana). A más gran parti son ampradas d'a web SinDioses...

"El buen cristiano debe permanecer alerta de los matemáticos y todos aquellos que realicen profecías vacías. Ya existe el peligro de que los matemáticos hayan hecho una alianza con el demonio para oscurecer el espíritu y confinar al hombre en las ataduras del Infierno."

"Las heridas de un amigo son mejores que los besos de un enemigo. Amar con dureza es mejor que engañar con delicadeza... En Lucas 14: 23 está escrito: 'Obliguen a la gente a entrar'. Con amenazas de la ira de Dios, el Padre atrae almas hacia su Hijo."

"Nada rebaja tanto a la mente varonil de su altura como acariciar mujeres y esos contactos corporales que pertenecen al estado del matrimonio."

"Es Eva, la tentadora, de quien debemos cuidarnos en toda mujer... No alcanzo a ver qué utilidad puede servir la mujer para el hombre, si se excluye la función de concebir niños."

"Las mujeres no deben ser iluminadas ni educadas en forma alguna. De hecho, deberían ser segregadas, ya que son causa de insidiosas e involuntarias erecciones en los santos varones."

"Dos clases de humanos, los cristianos y los judíos. La luz y las tinieblas. Pecadores, homicidas, basura revuelta."

Lo dito: tot un eixemplo de cristianismo.

Ampraus 049

Dimpués de pasar o reseco pilarista y de tornar t'os treballos, caldrá continar escribindo, no? Y como ya sabetz que soi muito chandro, pues torno con un ampraus. Un poquet de tot.

Quanto vale? Ye una d'as frases que más sentié decir en Pilars. Por treballar en un bar y porque en salir-ne, un par de nueitz m'amané t'o cabaret que organizaba Dada en a Plaza San Pedro Nolasco. En no estar subvencionau por o concello, ni por garra atra institución, terne que terne pasaban o chaper ta replegar as perras d'a chent que i yera a lo chilo de "¿Quanto vale?" " Vale menos un concierto que una chambreta de Zara?" Quantisma razón. O show que i facioron mientres os Pilars estió tot un eixemplo de cómo fer as cosas autochestionadas. Humor, mosica, más humor, contorsionismo, poesía... ta tot lo mundo. De baldes, u no, seguntes lo que cadagún querese y podese dar. A saber-lo de momentos ta no ixublidar como a versión reggae de "Soy el novio de la muerte", os sobrebuens conciertos de Dada y Los teloneros u o monologo sobre a perda d'a virchinidat de Juako Malavirgen. Asperemos que en os Pilars venients torne a haber-ie bella cosa parellana... ¿Quanto vale?

O movimiento okupa en Zaragoza ye bien fuerte en as zaguers anyadas y son fendo reyalidat ixo de "un desaloix, una atra okupación. Malas que son forachitaus d'un espacio liberau, en prenen un atro. Quan prencipié a escribir isto existiba encara La Vieja Escuela y en tasament tres diyas l'antiga garchola de Torrero ye estada liberada por as okupas a on que se ye fendo agora mesmo o Hackmeeting. Asperemos que dure bien de tiempo y se i puedan organizar tantas u más cosas que en os anterior C.S.O.'s que bi ha habiu en as zaguers anyadas. Suerte!

"L'aragonés ye bien vivo" torna ta La Enredadera iste mesmo domingo. Se i charrará de muitas cosas y, como ye de dar, d'o empecipiallo d'os cursos d'aragonés. ¿Cómo? ¿Que encara no te i has apuntau? ¿A que yes asperando? Por ufierta no será... Nogara fa cursos de maitins, de tardis, os cabos de semana, on line.... Fablans tamién. Y de seguras que en a tuya redolada, si yes de difuera de Zaragoza, bi ha bella asociación que'n fa. Y si no, posa-te en contacto con qualsiquier d'as debanditas asociacions que bell apanyo podrán fer. Prou que millor presencials que no pas a distancia. Que o contacto humano ye muito important, moceta!

Marcelino marcha ta Madrid. Caleba charrar-ne. Pero poco en queda por decir. Ha estau o manso d'os mansos. O president que no se movió y salió en a foto. Ya me pareixeba a yo que tornar a fer clases de esquí, como que no... Nos deixa o marrón de que a venient presidenta será u Almunia u la Rudi. Villamala y Villapior. Ai mama! Madalena independient y autochestionaria ya!

La rematadera la da o debandito video d'o cabaret, o reggae de Soy el novio de la muerte "perpetrau" por Diego Peña. Que tos faiga goi.

microbarrenaus: zarrau por Pilars

Istos Pilars me toca de treballar, como muitas sabretz, asinas que poca fiesta podré tener. Prebaré d'ir ta Comando Cucaracha o miercols y ta Barricada o viernes, pero ixo ye tot. A lo menos podré estar en os Pilars d'A Flama y en as barras d'o BIC, que estianyo se meterán en a Plaza d'a Madalena... Asinas que astí nos viyeremos. Tierra de barrenaus cuento que remanirá zarrau dica o 18 u más. Que tos faigan buen prebo as fiestas y fetz-me una visiteta!

...y o 18, baixa por borina.

Ampraus 044

Ya un poquet más relaixau d'os mios afers de treballo, y dimpués d'as fiestas d'a Madalena, aspero tornar con bien de rasmia y muitas cosas intresants ta emplir o blog de conteniu. Prencipiar con un Ampraus no ye un sinyal d'orichinalidat, pero bueno. Asinas ye a vida. Ilustro iste con una sobrebuena vinyeta de Fontdevilla que publicó en Publico. Muito gran!

Fablando de tornadas, torna O chemeco d'as parolas, un d'os pioners en isto d'os fablogs. Y torna tamién citando a otri, en iste caso un articlo d'o País a on que charran de luengas en periglo y, prou que sí, i sale l'aragonés.

Octubre 17 nunca no nos dixó. U sí. Va y torna de cabo ta quan, siempre con videos intresants ta fer-se una rialleta como aquel que nos dixó d'o santo por tierra u iste nuevo que penchó sobre o baile d'o Mao Mao.

Purnas ye qui nunca no marcha y mesmo nos twittea A flama. Fa bells pocos diyas penchó un articlo d'opinión-vomeco amprau de o Heraldo. Espanyol y rancio son adchetivos que asoben van chuntos, pero lo de l'hombre iste ye brutal. O somarda analís de Purnas nos dixa tamién a rialleta que cal fer-nos ta no plorar deban d'iste panorama mundialero espanyolazo tan aburriu y inquesto que tenemos.

A lo menos en iste cabo de semana buena cosa de buenas chents (y de malas tamién) nos chuntaremos en Echo ta pasar un sobrebuen ratet en o PIR. A suya programación la podetz consultar en l'achenda gaitera ta qui l'intrese. No i viyemos fendo una bieras u unos sucos d'aranyons d'ixos tan buenos que fan por ixas tierras. Salut!