A cultura en a Marca Espanya (#MarcaEspanya 1)

"Muera la intelectualidat traidora". A frase de Millán Astray, tant quiesto por Esperanza Aguirre, la d'a Espanya d'os tresmil anyos, revela muito d'a relación entre Espanya, intelectualidat y cultura. A traición ye cosa mala  por definición. Pero qui define traición como qualsiquier cosa que s'esvarre un celemin d'a linia fixada por a hechemonía cultural, ixa intelectualidat traidora esdeviene simplament intelectualidat.

A cultura espanyola, vista dende l'exterior, se resume en toros y flamenco. Ni l'estau, ni qui se sienten nacionalment espanyols, se avergüenyan guaire d'iste feito. A tortura animal ye present en tot lo mundo de diferents trazas: cazeras de zorros, domas de bisonte, barallas de gallos, ... pero en pocos puestos se fa d'ixo sinyal nacional.

O mundo d'a cultura, la de verdat, la que no le cal torturar garra bicho, ye mirau con desconfianza y mesmo con hostilidat. L'espanyolismo s'ha ocupau de fer-les pareixer uns cazasubvencions galbans que fan mierda. O caso d'o cine ye muit sinyaler. No sé si hetz visto bella vez o programa que fan de cine espanyol en 13TV, pero ye buen reflexo d'a idea que tien Espanya d'o que ye a "intelectualidat no traidora". Willy Toledo, Leo Bassi, Albert Pla u a revista Mongolia son linchaus publicament y as suyas obras boicoteadas, u mesmo sufren prebatinas d'atentau. Os titiriteros de Madrit, todas as campanyas de criminalización d'a AVT contra Fermín Muguruza, S.A. y muitas más, a basemia d'a prensa de dreitas con a familia Bardem, ... de casos, n'i hai a brozuecos.

"Faltarán perras para otras cosas, pero aquí gastan un millón", cantaba Ixo Rai! charrando d'as vacas en as fiestas d'os lugars. Y quanta razón tienen. Con os diners que malfurria cada chiquet concello en fer-le a tana a las vacas, se podrían fer unos ciclos de teatro impresionants, u trayer orquestas que fuesen una mica dillá d'os Pajaritos y Paquito Chocolatero. Pero bi ha un ambient cheneralizau de que a minoria vaquillera tien bella mena de prioridat en o reparto de perras, y que lo atro ye pa "finas" u concieteras. A las mosicas y a las artistas en cheneral se les recatia tot lo que se puet, fendo-les bien dificil poder vivir d'o suyo treballo, tant malament reconoixiu.

A Marca Espanya se caracteriza tamién por una envista de tot utilitarista y economicista de quasi tot. Lo viyemos en o nuestro país quan s'estricalla a Espluca de Chaves pa poder cazar-ie, u s'esboldrega Averly pa fer-ie putos pisos. Pero dillá d'as nuestras mugas en tenemos eixemplos arrienda (el Cabanyal, Gamonal, El Algarrobico, ....) que metioron a especulación y o negocio inmobiliario por debant d'as valors patrimonials y mediambientals u d'as necesidatz d'o vecinamen.

Con ixa mesma mentalidat se desprecian y desprestichian os estudios "de letras", sacando-les horas de l'amostranza obligatoria, u mesmo zarrando estudios universitarios. Ixo sí, l'amostranza en castellano en Catalunya, u d'a relichión catolica en totz os puestos, eslampa d'ixa envista y se debuixa como un dreito quasidivino.

Quan bell artista trunfa difuera de l'Estau, ixo sí, no les falta tiempo t'apropiar-se d'o treballo suyo si cal. "El cómic español se quita los complejos con cuatro premios Eisner", titulaba La Razón quan Aja, Guarnido y Díaz Canales ganoron iste premio, que ye o máyor reconoiximiento en o mundo d'o comic. L'articlo s'adedica a charrar de Marca España y de que Espanya y a luenga espanyola son pistonudas y trunfan en tot lo mundo. Curiosament, en El Periodico, o titular yera unatro: "Dos creadores premiados con los Oscar del cómic reniegan de la Marca España". En ixe articlo, bien diferent de l'anterior, os dibuixants charran d'a imposibilidat de tener una carrera profesional y sisquiera reconoiximiento publico en Espanya, si t'adedicas a os comics. "Tanto ell [Juan Díaz Canales], como David Aja, atro d'os premiaus, han expresau a traviés d'os retes socials a suya carranya y han escrito que lo que les preboca Espanya ye, más que más, vergüenya", diz l'articlo. As parolas que diz contino Díaz Canales, expresan lo que cada vegada más artistas piensan:

Díaz Canales afirma que ye espanyol, porque "no puetz estar atra cosa dende o momento que naixes d'Espanya" y adhibe que "isto no ye prou pa sentir-me argüelloso d'o mio país. De feito, hue, os sentimientos que me fa estar espanyol son de vergüenya, impotencia y infinita indignación".
"Por tot ixo - remata -, no quiero que o mio nombre s'asocie, y muito menos sin o mio consentimiento, con ixe esperpento que han clamau "marca Espanya". Faigan a favor de clamar-me atra vegada quan haigan escoscau a casa, a chent pueda aspirar a un treballo digno, as institucions recobren a suya verdadera función y a etica torne a tener más valor que no os diners".

No creigo que ni ell, ni muitas atras personas que comparten istos sentimientos sigan independentistas d'os suyos respectivos países. Pero entienden perfectament lo que ye Espanya, y lo que significa culturalment. Quan Strawberry escribió "España es idiota" pa DEF CON DOS, no creigo que lo fese pensando en a secesión de garra territorio precisament.

As lenguas mereixen un tractamiento aparte en ista serie d'articlos que soi escribindo, y lo tendrán. Pero en un estau an que se charran siet luengas, an que un porcentache muit significativo d'a población en fa servir beluna ta expresar-se de cutio, ye raro que siga mas facil sentir en as radios estatals una canta en rumano u alemán que no en qualsiquier luenga de l'estau que no siga o castellano. Bueno, sería raro si no fuese por a construcción cultural y lingüistica d'a ideya (agora marca) "Espanya".

Manel se consiguió posicionar a primer colla en ventas de discos. Sino porque a SER los mete cada vegada que charra d'o "Procés", encara sería asperando a sentir-los en bella radio espanyola. Mallacán u Obrint Pas lo petoron en Chapón u Alemanya, pero ni una noteta en os telediarios. A "scena valenciana" ye agora mesmo fendo as propuestas más intresants d'a mosica en iste cabo d'Europa. Festivals espanyols como o Viñarock implen os suyos cartels con a mosica de Aspencat, Zoo, La Gossa Sorda, Auxili, ... pero tot ixo no apareixe en a radioformula.  ¿Ye porque o publico espanyol quiere entender punto por agulla as letras d'as cantas? Evidentement no, pues no sonaría garra canta en anglés. Dragostea din tei nunca no hese trunfau si hese estau por ixo. Ye porque Espanya ye una comunidat nacional lingüisticament analfabeta y incapable de superar una serie de fobias nacionals que fan que cantar en catalán, euskera u aragonés vede automaticament a qui lo fa, l'acceso a los medios de comunicación masivos. Mesmo si una persona tant espanyola quan intresa como Shakira, se l'ocurre fer una versión de "Boig per tu" de Sau, ha de soportar una campanya d'acoso y faltadas que fa vergüenya allena. Y no por a calidat d'a versión, sino por fer-la en catalán. De feito, dengún no criticó a Luz por cantar ixa mesma canta. Prou que no, porque lo fació en castellano.

Pa Espanya a cultura ye un estorbo. Un concieto d'afrancesadas. Lorca ye bien en a fuesa an que siga, y os actors son una clica de terroristas. L'arte y a cultura ye lo que paguen os turistas y, prou que sí, os toros. Toda la resta, masonería. Ye verdat que Millán Astray no dició literalment ixo de "Muera la intelichencia", pero a efectos practicos, ye lo mesmo.

Anteriorment, en #MarcaEspanya... (Se puet cambiar Espanya?)

Cronicas Pilaristas 2014 (3) Campanyas politicas

Como en totz os Pilars, prou que bi ha habiu actos politicos de toda mena. En charraré d'os dos que tiengo bella cosa que decir.

A manifestación antitaurina tornó a estar un exito de convocatoria. Ya ha esdeveniu un referent y quasi no cal ni convocar-la ta que todas plenemos a redolada d'a Plaza. Como todas as anyadas, recibiemos as faltadas d'os aimants d'a tortura y ells as nuestras. Soi seguro de que, a lo menos, les molestemos bell poquet y no les deixemos disfrutar tanto d'a sangre allena. Por cierto, o publico d'os toros ye cada vegada más casposo u ye sensación mía? 

Tamién como en as zaguers anyadas contemos con un dispositivo policial de tot desproporcionau. Más suaus que atras anyadas pero igual d'absurdos y inquestos. Asinas ye ista ciudat...

Aprofeito ta remerar, como fació Arale en o suyo Facebook, os orichens d'ista manifestación, pues en bell articlo en os periodicos, Amnistía Animal en daba una versión a on que ixublidaba bella coseta tant important como d'a on surtió a iniciativa d'a Manifestación.

A primer manifestación antitaurina en as fiestas d'os Pilars ye en 2002, quan bella decena de personas, convocadas por Chobenalla Aragonesista nos concentremos en a Plaza Espanya de Zaragoza. Ni presencia policial ni taurinos ni cosa. Simplament bells chovens espardindo pasquins en esfensa d'os dreitos d'os animals, a o canto d'una colla de mosicos peruanos. O manifiesto lo leyió Pedro Lobera, qui alavez yera diputau de CHA. A l'atro anyo, se contactó con Aministía Animal y en 2003 se convocó de conchunta con ixa y atras organizacions. Fueras d'ixa error, en iste vinclo se reconta a historia entre 2002 y 2007 alto u baixo bien.

En ixas envueltas Chobenalla yera parte de CHA y os próceres d'a patria tremoloron en viyer-nos fer cosas tant subersivas y pretoron a correr ent'a plaza de toros a fer-se fotos ta que o baturrismo no viyese periglar "as vaquillas" y atras trazas más u menos organizadas de tortura animal. D'asti salió a famosa foto de Bernal, Fuster (hue encara Diputau Provincial por Zaragoza y cutiano espectador d'istos "shows") y bell cargo más (no remero si Acero u Orna).

Cosas d'a vida, l'encargau de leyer o manifiesto d'estianyo estió Chesús Yuste, d'o mesmo partiu. Un d'os mayors esfensors de forachitar a Chobenalla por cosas como ixa y que no sé que relación tendrá con a resta de cargos taurinos d'o partiu suyo. Bienvenius sigan os cambios a millor si son sinceros, pero de Yuste y de Chunta me creigo tant poco istas cosas...

Campanyas de Purna

O maltracto animal estió precisament un d'os puntos fuertes d'a campanya pilarista de Purna, a organización chovenil d'a cucha independentista. L'atro, a luita contra o heteropatriarcau.

A campanya pendió en pegallos, cartels y pancartas que s'ixemenoron por tot Zaragoza, encara que especialment en o vico d'a Madalena. O cartel d'os dos baturros y as dos baturras besando-se se tornoron a escape virals y dondioron por movils, retes socials y collas de whatsapp. As pancartas, mesas en a Plaza d'a Madalena estioron tamién l'obchectivo d'arrienda de fotos de chent que le trucó lo ficació. Mesmo Juan Martin, de CHA, felicitó en Twitter a Purna por os cartels!

Os pegallos d'as dos campanyas s'ixemenoron por tot, como he dito y, en estar dos afers a on que o talibanismo ye tant furo, los sacaban de camin. Más en seguntes que ambients como a Carpa d'o Ternasco, a on que lo cazurrismo militant me sacó mesmo cinco pegallos en o mesmo escusau en a mesma nueit.

Campanyas como istas, directas, bien feitas, con mensaches y que se popularicen a escape son una trunfada de l'independentismo y d'a luita contra o maltracto animal y l'heteropatriarcau. Os mios parabiens a Purna y a qui ideyoron a campanya.

Piscinas y toros

Mani antitaurina en Zaragoza, Octobre de 2011

Quan yera chicorrón remero d’ir t’a piscina d’una traza prou diferent que no pas agora. T’a part d’alavez se i podeba correr, se podeba chugar con pelotas u colchonetas y mesmo en bellas piscinas tenebas trampolins ta blincar-ne. De fundo teneban más de dos metros y una d’as cosas que más goi me feba de fer yera de ficar-me-ie dica tocar lo fundo. Mesmo si podeba i remaniba bell ratet antis de tornar ta l’aire.I febanos sobrebuenos ratos fendo lo craba. Y prou que sí, como cada vegada que se fa o craba, de cabo ta quan, belun s’esnafraba. D'accidents bi'n heba a embute y nunca no conoixié garra caso grau personalment, pero cuento que bell muerto bi habió.

Dende alavez a normativa china chana se fació más fura. As piscinas no son tan fundas, no se i puet correr, ni chugar y no quedan guaire trampolins. No voi a discutir como de buena u mala son istas midas, ni atras que se podrían prener. U como, en aplicando o sentiu común, a norma se puet fer más flexible en bells contextos.

Lo que me truca lo ficacio ye como, bells casos d'accidents, u mesmo muertos, facioron cambiar a escape y sin mica debat, toda a lechislación tocant a las piscinas y a contimparación con o caso taurino.

Fa bells pocos diyas un zagalet moriba en Uesca por una enrestida d'un toro. No ye raro en tot l'estau. Terne que terne bi ha muertos u chent prou ferida, en ista mena de "eventos". Y mientres totz istos diyas, periodistas, politicos y chent en tabiernas y retes socials repetiban con una sola voz que "yera inevitable", que "a plaza cumple a normativa" y que "istas cosas pasan".

¿Porque en os eventos taurinos se permite tot entre que en qualsiquier atro evento no? ¿Porque una normativa tan fura t'as piscinas, inofensivas en primeras, y no en os eventos taurinos, a on que o risque ye más que evident?

As muertes en os eventos taurinos son evitables de tot. Ta prencipiar, sacando-los. Pero mesmo sin viedar-los, se pueden fer muitas cosas. Viedar de verdat a dentrada a menors d'edat, fer controls d'alcoholemia en a dentrada d'as plazas, fer que as plazas sigan montadas y controladas por profesionals, mayors midas de seguridat y millors servicios sanitarios, etc... ¿porqué no se fa isto? As primers midas sacarían a muito publico. ¿Quanta chent bi ha en as fiestas d'as ciudatz y d'os lugars en as vacas que no vaigan zorros? ¿Quantos menors d'edat i dentran? Toda a resta fería muito más caro istos eventos. L'anyada pasada muitos concellos baralloron con o gubierno porque les desichiba mayors midas medicas y isto feba inviable economicament a tortura animal institucionalizada.

Por ixo os pasquinistas y a resta de chentucia que tien intreses economicos, politicos u nacionals en a tortura d'os toros aprofeitan de camín a presencia d'os micros ta repetir os mantras d'a inevitabilidat d'a muerte d'o zagalet uescano. Porque saben que si somos conscients de que ixas muertes son evitables, os eventos taurinos tienen os diyas contaus. Y si dices lo contrario yes d'a ETA. Afortunadament, creigo y aspero que a venient cheneración viyerá como se remata con ista barbarie.

Ampraus 055

Ola, que taaaaal!

Torno con unatro Ampraus, ta emplir un poco iste forau de manca d’inspiración que tiengo en zagueras…


Cheneración ni-ni: Y van no se quantas vegadas que charro d’o mesmo. De lo poco goi que me fa o ferrete de “a mía cheneración ye la millor, a resta puden”. En iste caso ye Publico qui publica un estudio sobre a “cheneración ni-ni” desmitificando ixa vox populi que diz que a zaragalla d’agora no fa cosa. Cuento que, como totz os estudios, bien cocinau, podría haber dau esferents resultaus, pero resulta agradable viyer que bell meyo de comunicación creba ixe discurso tabierner sobre “a chovenalla d’agora”.


El mundo today ye una depeixa de noticias ta esmelicar-se un ratet, que siempre ye bueno. La conoixié gracias a Pixe y, dende fa bells meses, no deixo de leyer-me-la de cabo ta quan, ta fer bella riseta en ixos intes a on que te trobas un poquet triste u canso. Muito recomendable.

De Sortu muitas han publicau ya as suyas anviestas. (Desde Banarús, Isaac Rosa u Purnas con a suya sobrebuena contimparanza con Minority Report.Poco más que decir-ne. O estau espanyol torna a contrimostrar que le importa prou poco a suya propia legalidad, feita a esprés ta ilegalizar a la cucha abertzale y que, faiga lo que faiga, no les deixará presentar-se a unas eleccions. ¿Qué mas cal? Fa bells meses hese dito que con lo feito por Sortu sería proa. Agora pareix que cal condenar totz os terrorismos presents, pasaus, futuros, en totz os multiversos, os tsunamis y mesmo fer palmas quan engarcholan a bell etarra… Tanimientres os partius faixistas continan fendo lo que les agana, o PP encantau con o franquismo y, si belun d’Intereconomía me leye, o PCE que sin condenar lo de Paracuellos, u o PSOE lo GAL. Cuento, que como siempre, a cucha abertzale tendrá plan B (y C, y D…) y a la fin será present de bella traza en as eleccions. Viéremos que pasa alavez… Buenisma a vinyeta d'alto de Fontdevilla, publicada en Publico y en o blog suyo.


Chapón: ye ta fer un “exerciendo lo pasquinismo” de tanto topicazo. Vienga terne que terne a decir que “qué organizaus que son os chaponeses”, que “qué bien que fan as ringleras t’a virolla” y asinas asinas… No seré yo qui diga que os pueblos no tienen bella cosa d’idiosincrasia propia, y que bells d’os topicos tienen parti de razón, pero me aburre tanto ixa santificación que se ye fendo d’os chaponeses… Más que más quan los contimparan con Haiti, metendo a las haitianas quasi como animals luitando por pizca. Me fería goi de viyer l’actuación de toda ista periodistalla en ixos tierratremos. A las chaponesas no les faltará de minchar, ni de beber. Mesmo betunas podrán continar chugando con a XBOX mientres bi haiga luz. En Haití, nian a virolla de cada diya yera (ni en ye) guaranciada, asinas que fer contimparacions, d’a situación u d’o comportamiento d’a chent, ye una ababolada de ordago.


Libia: Toca, no? Ya he charrau de Chapón (y tornaré a fer-lo) y cal mirar-se enta l’atro “afer d’actualidat”. A situación ye mala de tot. No le veigo garra solución buena por garra cabo. Continará Gadaffi d’aquí a seis meses? En qué condicions? Habrán ganau as rebeldes? Será una (atra) colonia d’Occident? Quantos muertos habrá costau plegar en ixa situación? Crudo lo tienen por ixa parti d’o mundo. Por agora, a respuesta a una matanza, ye estando-ne una atra, como diz Isaac Rosa y repitió Llamazares en o Congreso d’os Diputaus Espanyol. Se’n ha escrito muito. Por agora, tos deixo con quatre articlos que me facioron goi y con esferents anviestas sobre a guerra de Libia: Nacho Escolar, Entrevista a Gilbert Achcar, Isaac Rosa, y Andrés Martínez Lorca.

Como no, en a era de lo audiovisual, un par de videos. O primer, de PACMA, sobre o toro de Medinacelli, una atra traza sofisticada de torturar animals. Penible, simplament. Como o video ye prou desagradable, un poquet de humor tamién: Puncoyo aprendendo a fer tinticola. Gracias a Arale por o video...

Ampraus 047

A nueva grafía va a espardindose china chana. Cada vegada son más os blogs, pachinas web, escriptors y colectivos que la fan servir. A un ritmo chicot pero terne que ye como cal fer as cosas. Tanimientres, en o Heraldo adedicoron quasi una pachineta a la noticia, con declaracions de Manuel Castán, president de l'Academia.

Un d'os blogs que va fendo servir a nueva grafía, y dende fa prou tiempo, ye o de o programa de radio de Fendo Orella. Dende fa bells diyas son publicando una serie d'articlos sobre luengas minorizatas u mesmo acotoladas muito intresants. Ya i han charrau d'o kumiai, ge'ez, tigrinya, ainu y cingalés, luengas que nian sabeba que existiban. Muitas gracias a la chent de Fendo Orella por fer-nos un poquet más saputas y conoixedoras d'o mundo arredol de nusatras.

A CAO (Colla Antitaurina Oscense) m'informa que en bell meyo d'as fiestas de San Lorient, o 10 d'agosto ferán una concentración antitaurina. Ta qui esfienda as tradicions as concentracions d'a CAO, le ferán goi, pos levan tantas anyadas fendo-las que ya se pueden considerar tradicionals. A luita antitaurina contina en Uesca y en tot Aragón. Por un país más civilizau. A convocatoria d'hora y puesto cuento que la pencharán a escape en o blog suyo que, ta qui encara no lo faiga, tos recomiendo leigatz asoben pues ye una d'as millors webs d'información animalista que haiga leyiu. Y bien actualizada. Por cierto, ¿Bella apuesta sobre os titulars d'o Heraldo y o Diario de l'Alto Aragón a l'atro'l diya? Asperemos que, a lo menos i escriban qualcosa... Si lo fan de seguras que nos ne rediremos.

A flama he esviellau a suya exposición. Una atra vegada Lucía López nos amuestra bellas d'as fotos suyas en ista ocasión sobre ciudatz d'o mundo. Bi'n ha belunas sobrebuenas, d'entre a que más goi me fa ye una d'o sulero d'a Plaza d'o Pilar mullau y refleixando a Basilica. Buenisma. Fetz-le una uellada y aprofeitatz a hora feliz.

O video de despedida, ista vegada va de recosiros. Lo torné a viyer ahiere en a Kiss FM d'a TDT y feba arrienda anyadas que no lo viyeba. Quasi ni lo remeraba. Pero de chicorrón me feba a saber-lo de goi. En 1990 (hibo si soi viello!) estió muito orichinal, en mezclar animación con personas. A zagala, Paula Abdul remató estando churau d'un programa d'ixos de American Idol u Britain's got talent u qualcosa parellana, pero antis, fació as sobrebuenas coreografías d'a cinta Runningman (Perseguido, en castellano). Que tos faiga goi, y t'a chent d'a mía edat, que tos traiga todas as remeranzas que me trayió a yo.

Paula Abdul. Opposites attract

D'argumentos taurinos

O tema d'os toros da ta muito. Y me cal fer una segunda reflexión. Más que más, con tot lo que se ye decindo en istos diyas. D'argumentos, ista vegada en charraré.

Arrienda socialdemocratas y simplament "democratas", en un exercicio d'incoderencia, dicen que, en no fendo-les goi a "fiesta", no la hesen viedada, dixando-la amortar-se china chana. Ni proposan, ni proposarán acotolar todas as subvencions que continan dando-se, mesmo en o preto d'una crisis economica, a toda mena d'actividatz de tortura animal y prou que t'as corridas de toros. Sería un gran trango entabán. O feito ye que as corridas de toros no apasionan. En muitos puestos, más que más a o norte de Madrid, as plazas continan existindo gracias a las subvencions. Como deciba fa poco o Heraldo, en Teruel no fue ni o Tato (nunca no millor dito) t'as corridas d'as fiestas. Ahiere a Monumental de Barcelona, en una corrida prou sinyalera, no consiguió plenar. Ni con guiris, ni en o momento actual. Y todas as encuestas sinyalan en a mesma endrecera. Cada vegada menos chent va a viyer sufrir a los toros ta una plaza.

Con tot y con ixo, viedar as corridas ye menister. Probablement as corridas vaigan disapareixendo a monico y en bellas cinquanta anyadas no i quedarán guaires en o norte peninsular. Pero, con tot y con ixo, dixar-las amortar-se significaría que no nos ha importau. Sería un acotole pasivo, igual como disapareixión, os VHS y as cintas-casette. Como una tecnolochía antiga. Manimenos, viedar-las ye un exercicio de dignidat, d'esfensa d'os dreitos animals y d'a cultura de verdat, deban d'a barbarie, mesmo de pedagochía. Las viedamos porque creyemos que isto ye mal y no s'ha de fer d'a tortura animal un espectaclo publico. Preba d'explicar a una nina porque no ha de torturar a la suya canya, mientres vei vomecar sangre a un toro en a TV ye, como poco, dificil.

Si, antimás, como pareix que se va a fer, tenese en bell inte bella administración a tentación d'adedicar mesmo más diners a torturar toros, una vieda sería a unica posibilidat de que no se fese. Que yo sepa, no se pueden adedicar legalment diners publicos a financiar actividatz viedadas.

Sobre l'argumento economico poco a decir. As corridas no dan guaire esquilmen, asinas que de diners, poco se'n quita. Lo d'as indemnizacions s'ha encargau ya Publico de contrimostrar que ye mentira. Y de verdat, si o coste ye 57 euros por catalana, yo meto a parti de un protaurino. Que 57 euros por estar más civilizau me pareix barato. De feito, podrían ir fendo o calculo t'Aragón y asinas voi alzando as perras en un furtadiners ta quan nos toque, que aspero que siga antis con antis.

Atro argumento que repiten terne que terne, qui esfiende a tortura ye o d'a libertat. No sé si me fa más gracia u pena. Gracia, porque lo fan servir as que, tamién terne que terne, nos son viedando o consumo de seguntes que drogas, as que preban de viedar o dreito a decidir sobre o cuerpo suyo a las mullers, as que viedan a dentrada de pobres migrants en territorio espanyol u mesmo europeo, partius politicos, periodicos en euskera, o matrimonio entre dos personas d'o mesmo sexo, as botelladas, charrar seguntes que luengas en as escuelas y asinas asinas toda una lista de viedas que nunca no remataría.

Prenen a parola libertat ta lo que les conviene, con toda a hipocresía d'o mundo. Y, encara que no tien cosa a viyer con os toros, fan servir ixe mesmo argumento ta que todas bosemos a escuela privada. Libertat d'elección de centro, le dicen. Todas bosamos a escuela concertada, pero nomás ellas la disfrutan. Porque malas que bella persona que no quieren i va se troba con toda mena de cletas que no puede blincar. Ha de bosar milenta conceptos foscos, ta viedar de facto que faiga servir ixa escuela concertada que tamién ye bosando.¿Qué mena de libertat ye ixa? ¿Queretz libertat ta eslexir o centro educativo? Perfecto. S'avientan totz os conciertos y levatz a las vuestras fillas t'a privada. Ixo sí, bosando-la. Que nusatras no hemos de bosar-tos os concietos.

De l'argumento nacional, no diré ni pon. Paso, de verdat. Que me canso. Me canso, d'espanyolismo, d'espanyolistas, de fateras, de paranoias...

Ta rematar, por hue, sí que bi ha un argumento valido. Y ye o d'a hipocresía. A hipocresía de no haber viedau os correbous y atras trazas de tortura. Y tienen toda la razón. Ye una hipocresía. Asperemos que a escape se vaiga rematando ixa hipocresía y tamién se vieden. Prou de fer espectaclo de tortura.

Una vegada más, salut y ¡Visca Catalunya! ¡Y Canarias!

Viedan as corridas en Catalunya

A NOTICIA. Con mayusclas y tot. Puestar que sía a noticia de tot lo verano, con o permiso d'a reforma laboral que ya en estió d'a primavera. Viedan parti d'a tortura taurina en Catalunya que, como ye costumbre en tantas atras cosas, va trenta anyadas deban d'a resta de nacions d'a peninsula. Y digo parti, porque de traza vergüenyosa y hipocrita de tot, i quedan legals os correbous y atras trazas de tortura animal. Igual como fa anyadas remanioron legals as barallas de gallos en Canarias.

A noticia me plegó en A Flama y si i hesenos teniu champagne en hese ubierto una buena botella. O movimiento ecolochista, a cucha alternativa u como nos queramos decir no tenemos guaires diyas de noticias tan buenas como istas y cal celebrar-los ta continar con l'animo alto. A dreita espanyola y "aragonesa", a socialdemocracia y tantos y tantos atros son niervudos una atra vegada. Que Espanya se trenca, que no dixar-les torturar animals ye un atentau contra a libertat y tal y tal. Os titulars d'os suyos periodicos fan plorar u redir, seguntes como los pilles. As editorials lo mesmo. A de l'Heraldo habría de fer que Purnas tornase a ubrir Aragón colonial. Levamos una semana de sentir fateras como feba tiempo que no'n tenebanos.

Una d'as cosas buenas surtidas d'a noticia ye que muitas s'han retratau por si tenebanos bella dubda. IU, vía Llamazares u Barrena, refirman a tortura, tot respetando a decisión d'o Parlament. Decisión que no levarían ta Espanya u t'Aragón. Por si beluna pensaba en votar-les, ya sabetz lo que bi ha. Yuste, de CHA, no lo dixa guaire platero, encara que todas sabemos que ixe partiu nunca no ha feito guaires poders por refirmar a luita antitaurina en o pasau, ni en o present. O PSOE y o PSC en a suya muito gran mayoría han refirmau a tortura, con mayor u menor pasión, u con millors u piors argumentos.

Con iste panorama ye normal que tot iste proceso haiga prencipiau y haiga estau empetau dende alacetz socials. Dende una plataforma que ha habiu de fer una ILP (Iniciativa Lechislativa Popular ta qui no lo sepa), no habendo garra partiu que gosase asumir ista luita como suya. Y ye que, me pienso que continamos estando solos y trasversals. Dengún gran partiu (en numer de representants y/u militants) no nos aduyará en ista luita, como en tantas atras (como l'aragonés), asinas que habremos de continar apanyando-nos nusatras.

En a blogosfera, prou que bi ha habiu reaccions arrienda. Dende Banarús, o somarda Florencio, razonaba como Catalunya s'amana ta Espanya con ista decisión, con argumentos tan absurdos como os d'a dreita espanyola. Se felicitaba tamién El Barzal, Kale Borraja, A onsera u l'Esconxuradero. A colla antitaurina oscense, como no podeba estar d'atra traza feba un reportache prou completo con a saber-lo de videos d'as noticias. Inde feba una reflexión que as conclusions suya las comparto en parti, encara que creigo que ixublida toda a rabia contenida de sentir tan y tan asoben como nos criminalizan y mienten en os meyos de comunicación de masas, as esfensoras d'a tortura. Creigo que cal una respuesta, a lo menos, igual de fura. Y nomás cal viyer a respuesta de l'atra parti en forma de enrestida de man d'un torero a la siede d'ERC, u os titulars en periodicos como El Mundo an que saliba, baixo una foto de Carod-Rovira y Montilla o titular "Los animales triunfaron".

Quiero rematar con ixa buena sensación que me dixó a noticia. Con ixa frase d'Artur Mas que comparto de tot, quan deciba que el creyeba que heba deixau una Catalunya millor a la suya catrinalla. Prou que sí, Artur. Y como tamién ye costumbre en iste blog, con bell video mosical de cantas antitaurinas. Un tema que terne que terne tractan as millors y más reivindicativas collas de rock y de mosica de toda mena. Salut y Visca Catalunya! (a tamás d'os correbous). Un trango más entaban, garra trango entazaga.

S.A. Motxalo!

Comando Cucaracha. Medias rosas

Reincidentes. Grana y oro.

Ampraus 042

Catalunya, siempre Catalunya y o catalán... Quanta cansa paranoica y espanyola... En Aragón, fan boicot a una charrada que organizaba CHA en La Codonyera sobre a lei de luengas. Que penica que en ixa redolada y en ixe lugar con tan buenisma chent, bi haiga (u bi vaigan, que no sé d'a ón yeran) tanto ababol... Podetz leyer a noticia en el Periodico de Aragón y en Lo finestró del Gràcia. A debandita paranoia anticatalana ha feito tamién que as comunidatz autonomas gobernadas por o PP, Aguirre meyant, preben de declarar a tortura de toros como Bien d'Intrés Cultural. Quim Monzó se'n fa a mofla d'o penible d'a situación en un sobrebueno articlo publicau en La Vanguardia y que penchoron en o blog d'a Colla Antitaurina Oszense. A lo menos en bell puesto (en Catalunya, concretament) as espanyolistas s'han habiu de minchar a sentencia d'o Tribunal Constitucional a favor d'a rotulación en catalán. Ya sabetz, en vint u trenta anyadas talment podamos viyer cosa parellana en Aragón. Con que no saquen os cartels en aragonés ya sería prou...

Achenda t'o cabo de semana: Furo cabo de semana y fura prencipia a primavera. Encara somos escruixinadas por a chornada zapatista y, iste cabo de semana se nos chunta de tot. O viernes, en as chornadas que organiza Fendo Orella en o suyo seiseno cabo d'anyo nos visitará Xavi Sarrià, cantaire d'Obrint Pas y autor de Històries del paradís. Tant y mientres prencipiará a XII Borina por l'aragonés -dotze ya!- que estianyo se ferá en La Penya Los Chachos (carrera Santa Rosa, 6). O sabado, en descansar bell poquet, podemos continar-la en a Fiesta d'o sol, en o bico de Torrero. Mosica, botiguetas, teyatro, biera, parque,... tot lo bueno ta istas calendatas... O cartel lo tenetz penchau alto. Ya sabetz que punchando-ie s'enampla ta poder leyer-lo.

En o Periodico d'Aragón me trobé con un articlo prou pincho titulau el poder de las ideas, que si fa u no fa, coincide con as tesis de Susan George sobre a derechización de toda a sociedat occidental. En iste caso lo centra en as reinterpretacions que falsifican a guerra civil espanyola. Tamién en charré bella miqueta sobre isto, dende a mia ambiesta en ¿Qué ye pasando? II y III.

Lurte: Os dos diyas, una d'as collas que tanyerá será Lurte, qui antimás graboron un video bien pincho en as zaguers bodas d'Isabel en Teruel. Tos lo pencho contino ta que vaigatz calentando o cabo de semana.

¿Qué ye pasando? (IV)

En a que, talment, será a zaguer d'ista serie d'articlos (1, 2 y 3) baixare t'o país y ta una d'as vesants d'a dreita: l'espanyolismo politico y cultural. L'espanyolismo ye trunfando en tot l'Estau espanyol como no lo heba feito dende o franquismo. Y más que por represión, que tamién bi'n ha, por una politica cultural muito encertada (ta ellas, ye de dar).

D'una man, tot lo que les puet fer mal, a escape s'encargan d'amarguinar-lo u ridiculizar-lo como deciba que fa o capitalismo global con toda ideya que siga diferent. Antimás o espanyolismo fa servir unatra estratechia más local: relacionar-lo tot con ETA. Ye o zaguer recurso, pero si cal siempre lo tienen astí. Quan pretoron a tremolar por ERC, de camín consiguioron relacionar-lo con a ETA y mesmo en Aragón fa tiempos facioron servir ixa estratechia con Chobenalla. Mesmo dende bell sector de l'aragonesismo rechional de cuchas, cal remerar. D'atra man, si bella cosa puet trunfar u estar identitaria d'atra nación de l'Estau espanyol, a escape s'asimila por Espanya y pasa a estar espanyola. Asinas, as nuestras quiestas amigas rufierteras pillan o catalán como una luenga espanyola quan quieren amanar a os espanyols moderaus de Catalunya, por eixemplo. Aquí, implen un cantar popular como a ixota, de espanyolismo por totz os cabos y, dica no fa guaire, meteban tot lo diccionario de l'aragonés en o d'a RAE, ta chustificar que l'aragonés no yera que una versión fura d'o castellano.

O nacionalismo espanyol ye muitismo más furo y fanatico que qualsiquier d'a resta de nacionalismos peninsulars (por clamar-les de bella traza). Nomás cal viyer como se carranyan quan prebas de viedar a tortura de toros, quan chilas u chiflas a lo suyo Rei y no digamos si charras publicament en una luenga que no siga lo castellano. A escape blincan y te remeran que ellas son as que dan os DNI's, que isto ye Espanya, que as espanyolas charran castellano, viyen futbol, torturan animals, son heterosexuals y que si no te fa goi, has de marchar d'Espanya. Con un autoritarismo y una soberbia que fa medrana. Y dimpués charran de respeto y tolerancia a qui s'endreza ta ellas en catalán.

Os enemigos d'atros nacionalismos por un regular son atros estaus d'o mundo. USA tien a meyo mundo, India a Pakistan. Francia a Anglaterra, Irlanda a Anglaterra (bueno, tot lo mundo odia a Anglaterra :-)) . ¿Quí ye l'enemigo de Espanya? Catalunya, Euskal Herria y qualsiquier que qüestione a ideya de l'Estau-nación espanyol. Y mesmo ixo lo asimilan, con un cenyo de ¡pobrichons, si ye que son fatos! La rematadera de l'asimilacionismo y sinyal prou vistero de ixa politica ye o titol d'o libro de Sánchez Dragó: "Y si habla mal de España, es español". Nian charrando mal d'Espanya, te dixan mandar-la a muyir fardachos. A trampa perfecta.

¿Porqué en zagueras ye trunfando l'espanyolismo politico y cultural? Ixo ya pende d'o país. En Catalunya, encara tien muitas dificultatz, a tamás d'o president que tienen. En Euskal Herria, han habiu de ilegalizar a parti d'o país ta ganar as eleccions y, con tot y con ixo, si bell diya remata a excusa d'ETA, ya viyeremos qué pasa. En Castilla simplament son espanyols. De Galiza, León, Asturies y atras, no'n se prou como ta dar razons. Valencia y Baleares comparten un d'os motivos con nusatras: haber estau parti d'a Corona aragonesa. En o suyo caso, pior encara pues antimás charran catalán en tot lo suyo territorio y bi ye oficial.

En Aragón bi ha dos razons principals. L'espanyolismo como anticatalanismo y o papel penible d'o nacionalismo aragonés. D'a primera poco cal decir. Si quiers fer una olimpiada que ye una barbaridat y que no la refirma dengún, mete a los catalans por meyo y ya tiens a meyo Aragón refirmando-la. ¿No bi ha conexions con l'Estau Francés por o Pirineu Aragonés? A culpa ye de una conspiración chodigo masonica entre catalans y vascos. Si Hitler hese muerto catalans en cuenta de chodigos, tot Aragón sería nazi. Una vegada que s'ha creyau l'enemigo catalán, os aragoneses ya nos hemos de chuntar, prou que sí, con qui enriste contra ixe enemigo: Espanya. Y ya tenemos a identidat espanyola ficada bien aintro. No porque tiengamos una cultura amanada a la espanyola, que no ye asinas, sino porque tenemos un enemigo común: Catalunya. Pero d'isto ya en charré prou.

Tocant a o nacionalismo politico aragonés, consiguió fer cosas muito buenas en muito poco tiempo y dimpués d'haber feito tan sobrebueno treballo, una grandisma parti estió esmicazada dica plegar en a situación actual. Dende una conciencia aragonesa amán de zero, consiguió que una luenga quasi esconoixida y dispreciada, pasa-se a estar nomás dispreciada. Que nos intresasenos , estudiasenos y conoixesenos a nuestra historia. Que se recuperasen tradicions y mosicas. Que un partiu politico que se define como nacionalista aragonés y que en as ordinacions suyas aparix o dreito d'autodeterminación d'Aragón estase a tercer fuerza d'o parlamento...

CHA consiguió buena cosa de votos nacionals sin nacionalizar a las votants. Y asinas le fue dimpués. Pasada de moda a menaza trasvasista (a menaza continará, a tamás de no estar de moda, mientres siga o modelo actual d'explotación d'os recursos naturals), as votants s'estimón más de tornar a la espanyolidat, viache prou facil ta qui nunca no salió d'ella. Porque a más gran parti d'as votants de CHA yeran y son espanyols u aragoneses rechionals (1). Y mesmo muitas, anticatalanistas, que como he dito, creigo que ye quasi lo mesmo que estar espanyolista. A oportunidat de aprofitar o concello de Zaragoza y os nueu diputaus ta aragonesizar Aragón se cacegó en refirmando Expos, urbanismos escrontrolaus, forachitando independentistas y disidents d'o partiu y coseguindo que muita chent reblase ta cutio d'esfender l'aragonesismo político. Hue CHA ye quasi un recosiro, un repui, que luita por tener un prestichio que tresbatió fa masiau tiempo y por razons tan graus que le costará muitismo de recuperar si bella vez lo fa.

BIC, un movimiento social naixiu en que CHA agonizaba, ye fendo cosas muito intresants. O treballo ye firme y a monico, encara que masiau a monico, va arroclando a cada diya más chent. Con tot y con ixo, ye de dar que tien atros problemas. Por agora no dixa d'estar marguinal y no tien guaire presencia en a sociedat. Os meyos de comunicación prou que no quieren ni charrar-ne. Ye dificil de trobar bella aragonesa que sisquiá conoixca a suya existencia. Difuera de Zaragoza, antimás, a suya implantación ye quasi anecdotica. Asperemos que ixe debandito treballo consiga bell diya fer fruitos.(continará?)

(1) Patricia Gabancho, en "El preu de ser catalans", aplicaba a definición "catalans rechionals" a qui se sentiban catalán como una parti d'estar espanyol. L'he ampro a definición d'aquí entaban pues me parix prou util ta definir a muitos d'os que, administrativament, son aragoneses.

Ampraus 037

Por una vegada me va a salir un Ampraus sin charrar de relichión. Y ixo que de motivos en tendría un buen fascal (como malfurrian diners, as fateras d'o papa, lo de Belchite...) pero ixo ye que da ta fer un blog.... Ummmm Soi pensando que.... Bueno, prencipio con iste amprau y ya iremos charrando.

Os nuestros mons no s'ixublidan: Ye o nombre d'una nueva plataforma que se presenta o viernes 22 en Andorra. A plataforma s'ha creyau ta remerar os incendios que bi habió fa ya seis meses y que ni a ciudadanía ni as alministracions les ixubliden. Atra d'as razons ta creyar-la ye que a chent s'embrece y participe en a chestión d'os mons y o meyo natural suyo. Asinas que bienplegada ista plataforma que de seguras que ferá honra en aquellas tierras que tanta aduya les cal y en tot Aragón amostrando como s'han de fer as cosas.

A espelunga de Chaves: En iste caso no estió un maldau accident, ni a inevitabilidat. Estió a man humana en una d'as más grands muestras d'o cazurricos que somos en Aragón. Ta conoixer un poquet más lo que pasó y la importancia d'a espelunga de Chaves s'ha feito un video que podetz viyer en iste vinclo.Antimás se son movendo charradas ta viyer o video y charrar dimpués con expertos en o tema. A venien se ferá o miercols 27 en o centro Joaquín Roncal de Zaragoza (C / San Braulio, a o canto d'o Pilar). Podetz continar viyendo as novedats en o blog que han creyau.

Yo tampoco: Gracias a Adeban m'enteré d'ista iniciativa en contra d'a tortura de toros. Dimpués tamién en dió treslat Publico. As antitaurinas imos fendo trangos entabán. As taurinas son cada diya más carrañadas y ixorrontadas. Cada diya les queda menos... Itz puyando as vuestras fotos y dixando os vuestros mensaches de refirme. En l'inte que escribo isto somos 316 aragonesas as que hemos refirmau a iniciativa.

Fethi: Un caso que cuasi no me baga nian de charrar-ne de lo rapedo que ha pasau tot. Cuasi fan fuera de l'estau a un compañer d'o rete de refirme a os sinpapels y gracias, entre atrás cosas, a la movilización y a la solidaridat de muitas s'ha conseguiu que pueda continar vivindo con nusatras. Tot un eixemplo de que a movilización popular puede funcionar. Y tot montau vía correus y blogs! Podetz leyer tot lo que pasó aquí y aquí.

Graficament: Guarda si pencho cosas que creigo que creyarán polemica y pasan sin estar ni comentadas y talment ni leyidas. Pero be-te-me que o post sobre a grafía sí que ha estau bien comentau. Tos animo a alportar-ie a vuestra opinión, que no i hemos charrau que tres (más que más, dos, o neoarcaico y o paleomoderno, -que bien nos lo pasamos-). Y tamién en cualsiquier atro articlo que escriba, que me fa goi de viyer que se me lei!

Chiapas:Diz Arale que ista tardi vaigatz todas t'a charrada que fa o Caracol Zaragoza sobre a situación en Chiapas. Digo yo que ye bien intresant. Ye una charrada que ya s'ha iu movendo por muitos lugars d'Aragón y que a la fin plega en a Inmortal. Será en o CSO El adoquín (bico d'as Fuents), a las 19:00. A info la tenetz aqui.

De videos, no'n he trobau mica bueno, asinas que habré de tirar de l'archivo de mixins estalapizando-se y fendo o fato que tiengo. Muito bueno

Mixins, ¡Cómo son!:

Ampraus 034

L’agüerro ya ye plegau y con qué trazas! Que’n fa de fredor...! Ixo sí, nos dixa paisaches repinchos como o d’a foto penchada, feita en Bezas, redolada d’a Sierra d’Albarrazín. Podetz biyer-ne más en Flickr de Barrenaus.

Torturas taurinas: As torturadoras ya no saben ni qué nuebas trazas de torturar creyar. Seguntes informaba Publico, en Galapagos (Castiella) fan bella mena de safari con autos encorrendo toros dica que se cansan (as umanas) y lo matan fotendo-le un tiro. Como cuasi siempre ista colla de salbaches tamién son biolentas con as umanas y a las periodistas y actibistas las menazaron, mesmo plegando a cremar l’auto d’un mozo d’o lugar que, seguntes ellas, estió qui informó a PACMA y a las TB’s. Prou que con a pasibidat d’a resta d’o lugar y d’a guardia zibil. Penible. En ista web tenetz más info sobre o caso de Galapagos que se suma a tantas y tantas atrás barbaridatz feitas a os animals y consentidas y mesmo subenzionadas por l’Estau espanyol.

O PAR ye una mafia. Ixo ye vox populi dende fa muitos y muitos años. Ya cuasi ye parti d’o imachinario colectibo aragonés. Ixa mena de Status Quo no gosa d’estar denunziau, pero leyié (en l’Eraldo!) que PP y CHA demandaban esplicazions por a chestión d’Ordesa. Podrían demandar-las por tantas y tantas cosas... pero a lo menos ye un primer trango. Cuento que no irá guaire dillá, porque totz os partius quieren fer lo mesmo cuan tiengan o poder, pero que a lo menos aigan de disimular bel poquet. Bergüeña de país...!

D’Estrasburgo plegan buenas notizias t’a libertat de todas. A lo menos as instituzions europeas tienen un poquet más platero ixo d’as libertatz relichiosas, porque aquí continan los cruzifixos por totz os cabos. En istos diyas de fundamentalismo catolico, siempre nos quedará Estrasburgo. Y MHUEL, que organiza, de cabo ta cuan, apostasías masibas. A pachina web suya feba tiempos que no me la miraba y ban adibindo-ie arrienda contenius repinchos. Un d’els, un Howto de l’apostasía. Por lo que charré con ellas, por ista bía no te dan guaire mal y en poco tiempo se consigue apostatar. Grazias, MHUEL, por empentar istas iniziatibas que tanto calen.

Ta rematar un zaguer binclo a un articlo que penchó Florencio en Desde Banarús sobre l’Alakrana. O caso iste ye tot un eixemplo de l’ipocresía y l’esconoiximiento d’o mundo que tien a más grand parti d’a chent. De bideos, tos ne pencho un de recosiros. As que tiengatz si fa u no fa a edat mía ista canta tos ne trayerá ambute, de recosiros.

Ampraus 032

Fa tiempos que no feba un “ampraus” y se me ban chuntando cosas, antimás muito diferents, asinas que astí tos ne ban arrienda, y bien mezcloteyadas. Prenzipiemos con proselitismo:

Caracol Zaragoza organiza unas chornadas que prenzipian güe mesmo con un “festibal de narrantes” en o Z.Z. Gara d’o Norte (biyer cartel penchau y más info en Salud, amor y rebeldía). Continará con cualques charradas achuntadas baixo lo titol “autonomía aquí y allá: ¿Podemos vivir sin capitalismo?” Tamién se podría fer l’atra pregunta de ¿podremos continar guaire tiempo bibindo con capitalismo?.... Buenizas charradas. Si tenetz un ratet itz-ie y, sino, conseguitz ixe tiempo que de seguras que será bien emplegau.

Nogará y Fablans ya han ubierto as matriclas. Ya podetz apuntar-tos t’os cursos d’aragonés que fan totz os años y que, si leyetz iste blog, cuento que no tos calen guaire, pero bueno... Aprofeito ta animar a las lectoras a que, antiparti de fer os cursos, dimpués continen en fablilandia, en cualsiquier d’as asoziazions que bi ha güe, que nos cal muita chent ta esfender l’aragonés. Por experienzia tos guaranzia que se puede partizipar-ie, tener parella, salir de borina y fer un blog y encara tener tiempo ta chugar a Magic u a Guitar Hero de cabo ta cuan.

O diaple d’o gadget me ye ganando en frikismo, en zagueras. Me caldrá contraatacar. Iré pensando-ie. Tanimientres he de reblar debant d’a entrada que fazió sobre o Guitar Hero ta PC. Impresionant. Tamién m’enfolgó un maitín biyendo os bideos que penchó en o blog suyo, ampraus de bez de Oregón TV, sobre a Wii peñista. Que faigan ixe bideochuego ya!!! Que yo soi naixiu de Zaragoza, y me costó asabelo d’adaptar-me a las zorreras y borinas rural. (Bueno, en reyalidat, tampoco no guaire, que con o goi que me fan....)

Maltrato animal: Iste berano se’n ha charrau muito sobre os toros. Ye de dar que porque han muerto muitas personas y ixo parix que sí que importa. No tanto como si las ese muerto a gripe A u ETA, porque ni bi ha lutos estatals ni fan leis ta biedar ixa mena d’actos ni engarcholan a qui los organiza. En o país nuestro, en Billarquemado, concretament, morió una d’ixas personas. O diario de Teruel publicó una carta d’un ziudadano d’ixe lugar prou bien escrita. Atros, con menos sensibilidat, u con mica, se adedican a matar mixins y qui les chuzga ye tan borde como él. A istos dos (torturador y chuez), caldría foter-les un buen perdigonazo a biyer si sufren u no pas. Leyetz l’articlo de Publico. Tamién en Publico, escribió Ignacio Escolar una reflexión sobre as coinzidenzias de boto de PSOE y PP en zagueras sobre bels afers. Muito bueno l’articlo y o periodico que ye d’o millor que bi ha agora en meyos de masas. Prou que con o ran tan baixo que bi ha, ixo tampoco no ye guaire...

Bideo JERC: No sé porqué, pero l’atro diya remeré o bideo que pencho contino. Cuan se fazió m’esmelique de tot, porque antimás yera a puenda aquella que no dixaban de dar mal en a TB con ERC. Cuan teneban güeito diputaus. O bideo ye feito a modo de reportache de Telemadrid sobre l’Acampada Jove. Atenzión a o catalán d’o mozo que charra ent’a fin d’o bideo. Buenismo, y sincusaz-me si ya lo penché en 2007, pero me foi biello y he muerto muitas neuronas.

microbarrenaus: rebistas zientificas

Miro una rebista zientifica. La teneba la chirmana mía pero se la lebó y m'aganaba de leyer un d'os articlos. Manimenos no la trobo en a papelería. Bi ha dos rebistas sobrer torturar toros, una sobre components electronicos, cualques repalmars adedicaus a alparzeyos u bideochuegos, milenta de superstizions, pero de zienzia ni brenca ni meya...

Ampraus 029

Torno t’o blog, que en iste berano ye masiau quedo, ta una nueba dentrega d’Ampraus. Replegando-ne soi dende fa semanas, china chana, pues he teniu arrienda treballo y en estar solo en casa no he adubiu que a sobrebibir... A lo menos ixo se soluziona ista nuei. T’as lectoras que me/nos conoixetz, Arale plega ista mesma nuei, asinas que itz parando-tos t’as sesions de fotos chiapanencas que tos tocará d’aguantar.

Ateismo: A iste afer le podría adedicar una seczión todas as semanas. Siempre bi ha cosetas intresants, cuento que por lo absurdo d’as relichions. Tan absurdas que, a tamás de foter-se meya bida rogando a un (u más) dios que les proteixa de totz os mals d’o mundo, dimpués han d’ir a besar mantas sagradas con una mascarota no sía que dios siga con reseco y ixublide abentar os birus d’a debandita manta. Qué dios puede dixar a las suyas fidels pillar ixas malotías? Que mena de chent ba a besar mantas creyendo que ixo puede cambiar o suyo destino u que asinas se comunica con dengún? Sino estase relichión, diríanos que son barrenadas de tot, pero...

Debant d’isto bi somos muita chent. Pero agora ye alto u baixo fazil. Encara que continamos estando minoría os ateus que nos concaramos de berdat con todas as relichions y que diya a diya esfendemos un mundo que no aiga de achenullar-se debant de dengún, ya bi’n eba antismás. En Fendo Orella leyié ista intresant notizia sobre l'ateu Federico qui, mesmo en a suya muerte continó fidel a os ideyal suyos ¡ent’a fin d’o sieglo XIX! Bien por Fede!

Una d’as trazas de luitar contra as relichions ye ridiculizar-las analizando os mitos suyos. O mixín penchó un cartelon que podetz biyer punchando a o canto, an que, en inglés, fan una descripzión bien azertada d’o cristianismo: “A creyenzia que un zombi cosmico chodigo que ye su propio pai puede fer-te vivir ta cutio si minchas simbolicament a suya pizca y le dizes, telepaticament, que lo azeptas como mayestro, ta que pueda abentar una fuerza mala de l’alma tuya que ye present en a umanidat porque una muller-costilla estió combenzida por una sirpient charrina que minchase d’un arbol machico... Prou que tien sentiu!”

In-chustizia: O nazionalismo banal contina con lo suyo. Agora nos ban a quillar un siñal aragonés a o canto de l’español. Puestar que en a zeremonia i baiga a baturraina, en no tener eixerzito propio, y canten unas joticas, tan aragonesas como españolas, d’ixas de “Es de España y sus regiones Aragón la más hermosa”. O chustizia encantau. Aragón mola, pero aintro d’España. Tanimientres tamién podemos trobar unatra campaña d’o megaespañol conzello zaragozano. Ixos cartels que biyetz en a foto, que encara no sé guaire bien ta que balen, pero que en un d’els mete “Mi río. Que haga correr el espíritu de mi ciudad por España y a España por mi ciudad. Una persona mejor de una ciudad mejor en un mundo mejor.” Bella muestra millor de nazionalismo banal?

Zerbantes omosexual?: Ixo ye lo que diz un libro. Y mesmo pior: catalán! A notizia me parixió curiosa por fata. Qué importa reyalment con qui fese foriquetas Zerbantes u d’an estase naixiu? Ixo a la chent normal. Pero lo bueno d’a notizia ye que de seguras que muitas españolistas ya yeran carrañadas con l’autor por dezir que un d’os mitos suyos yera catalán y manflorita. Se puede estar más antiespañol? Jejeje...

Dreitos animals: PETA ha denunziau a o zirco Ringling por abatanar a beluns d’os bichos que tienen engarcholaus. Mesmo consiguión grabar un bideo contrimostrando-lo con una camara amagada. No sé como rematará a cosa. Cuento que continarán librando-se. Ya sabetz que a chustizia no fa guaire caso a istas cosas. Pero sí que podemos fer cosas. Y ye que ixe zirco bendrá ta Zaragoza en Nobiembre. Bellas asoziazions ya han prenzipiau a protestar. Cal prenzipiar a organizar-nos ta que no biengan u a lo menos que as ziudadanas no leben a la suya catrinalla a biyer animals torturaus.

Ta rematar, güe no meto bideos de lemurs. Soi estau escoscando un poquet a casa y he meso o conzierto d’Obrint Pas “Un poble en moviment” en a TB. Ye buenizo de tot, y pencho contino una d’as millors cantas suyas, y en a bersión en directo una d’as más emozionants, por a partizipazión de Belén Agulló, chirmana de Guillem Agulló.

Ampraus 028

O millor d’a semana muere güe, dixando paso a Ampraus. Asobent no ye estau lo millor y bellas begadas nian ye estau d’a semana, asinas que, cuento que ye millor ixublidar-lo. Con tot y con ixo, como me fa goi, y ye bien fazil, de penchar articlos publicaus por otri, continaré con ixa dinamica. Agora será atemporal, pues no quiero obligar-me a cosa y menos de berano, que no feré que treballar, zorriar y trobar a faltar a Arale.

Arroba: L’articlo de Purnas sobre l’arroba me fazió muito goi en leyer-lo. Ye bien curioso y contrimuestra muitas cosas sobre os treballos d’istoriador y de periodista. Antimás he teniu eco dillá fablogilandia, lo que ye bien difizil. Norabuena, Chorche!

Botellada: Muitas begadas he pensau d’escribir sobre as botelladas. Mesmo puestar que lo aiga feito y no lo remere agora mesmo. Tamién sobre a parola botellada, que a tele española nos furtó. O caso ye que en La Enredadera lo han feito ya y muito millor que no ese puesto fer-lo yo. Un articlo repincho!

Nombrar en femenino: Fa bels diyas escribiba sobre fer serbir o femenino chenerico y o luengache masclista. En Tiempos de Desidias tamién i escriben y bi penchan un d’ixos correus que nos imbían de cabo ta cuan chent creyendo que nos ferá grazia. Por mensaches como ixe me he pasau a lo femenino...

Mularroya: Isto sí que estió lo millor d’a semana. Pencho lo binclo t’o blog de SOA-STA, pero cuento que ya abretz leyiu un d’o ziento d’articlos que s’han publicau sobre Mularroya. Que no tos etz enterau? Jibo! Aón bibitz?

Prou de tortura: Entre que belunas torturan animals en Iruña, atros preban d’esfender os dreitos suyos. Como no, en Catalunya, un d’os puestos más zibilizaus en iste tema. Cuanto nos cal aprender! Cal dezir que ye curioso (de bez que penible) as trestalladas que fan istos afers. Lo contrimuestra o feito que PSC, ERC y CiU aigan dau libertat de boto a los cargos suyos. Ixo no se fa guaire asobent. Ya sabetz que lo de los partius y a libertat no ba guaire en chunto...

Iste ye un binclo ta unatro bideo de lemurs que, no se porqué no me dixa embedear-lo...

http://www.youtube.com/watch?v=0CTgEP0SIVg