Flufi taurina

Iste maitin, como toz os maitins, pillaba os papers ixos que dan de baldes (entre atras cosas porque dengún o pagaría por els) y me trobaba con l'anunzio d'a foto que he meso a o canto. Abaxo, en a cantonada d'a dreita d'a portada de l'ADN (un buen fascal de diners, por zierto). Aragón TB promozionando a cultura aragonesa, como siempre. No he bisto guaires anunzios d'os programas de Aragón TB. De feito, no en he bisto mica. Pero parixe estar que isto, concretamén ista TORTURA a un animal cal que siga espardida y que toz os zaragozanos (mesmo os ninos) nos enteremos de que podemos beyer y gronxiar a TORTURA d'un animal. Porqué? Por que se promoziona iste programa y no atro? Ye malo que se continen fendo istas cosas. Mesmo pior que se emitan (y en orario ta ninos). Pero ye que antimás lo promozionan! Puestar que prenzipie a alticamar-les a presión sozial? Alabez imos por buen camín. Talmén siga que ta la plaza no i ba dengún y de bel puesto cal quitar diners, no? Y como os sadicos taurinos cada diya son menos lo bosamos entre toz y au! Menos mal que o nuestro gubierno ye progre....

Isto yera de maitins, pero de tardis me plega un mensache en o correu con declarazions d'un tal Antonio Silva de Pablos que parixe que ye Direutor de comunicazión de Expo Zaragoza 2008 (ixa d'o desembolique sostenible y a ecoloxía y ixas cosas de jipis). Diz, iste pardal, en una carta tetulada Los toros, fiesta cultural (prenzipia bien):

"...Pero lo encabezo así con el convencimiento de que los toros son una de las fiestas culturales más importantes de nuestro país. Maltratar a los animales evidentemente no es de recibo, pero sinceramente no creo que se hable de maltrato en la lucha cuerpo a cuerpo de un hombre y una fiera que genéticamente ha nacido para eso. Para luchar y dejarse la vida en un ruedo."

No comments. Pero dimpués de dezir en a mesma frase que no se fabla de maltrato cuan a "fiera" (se refiere a o toro) muere porque ya naxida ta morir (l'ombre ye naxiu ta maltratar animals, ye de dar...) contina:

"Sería una pérdida de personalidad evidente ante el resto de identidades culturales. Un elevado número de ciudadanos no entenderíamos un paso atrás en la definición cultural de España si el Ministerio de Medio Ambiente inicia su anunciada cruzada contra el toreo. Puestos a prohibir que prohiban a los directivos de fútbol ser tan cafres y dar espectáculos tan bochornosos como los de Betis y Sevilla. Eso sí que es maltrato, pero a las personas."

A personalidat d'Españñña pende en o maltrato a os toros. Bien! En ixo ya somos más d'alcuerdo. Ixa ye a Españñña con tres "ñ" cañññi, coññño que tantismo fastio me fa y a la que representa chentota como iste. Maltrato yes tú, mozet! Maltrato a la intelichenzia.

Lo pior de tot, ye que iste, y atros personaches como iste, son los que son parando a Expo. "A nuestra finestra ent'o mundo". Ista ye a mena de chen que queremos ufrir t'o mundo?
A carta entera la tenez en http://www.aragondigital.com/asp/noticia.asp?notid=31748&secid=21. Ta plorar...

Primers notizias de Future Sight

Encara mancan dos meses ta las presentazions de Future Sight (a terzer colezión d'o bloque d'Espiral d'o tiempo) y prenzipian a saber-se bellas cosetas. Por agora son custions mas que mas esteticas como o logo, os debuxos d'os sobres y caxas y asinas-asinas. Si en Espiral d'o tiempo se charraba d'o pasau de Magic y se reeditaban cartas biellas y en Caos Planar d'o presen y se editan cartas clasicas d'un color en atro, en Future Sight ("Güellada t'o futuro") as cartas "aibadas" serán cartas que dimpués se publicarán en atras edizions d'o chuego. En ista ocasión no creigo que creye tantismo intrés como as atras. Toz querebanos saber que cartas se reeditarían u que colors podrían cambiar d'estratechias, pero agora todas as cartas serán nuebas de raso. Simplemen belunas se tornarán a editar más entaban.
Tornan a aparixer-ie belunas d'as carauteristicas d'o bloque como as mecanicas de "penchar" u "troz de segundo" y prou que os "slivers" (istos no goso traduzir-los porque no sé ni lo que ye en inglés). Aspero que tamién continen salindo-ie os fongos que tantismo goyo me fan.
Si querez saber-ne más tenez as zaguers informazions y rumors en: www.rebellion.es/magicrebel y www.magicmadrid.es.
Freakland ye esbiellando a suya pachina web, asinas que conto que en bels diyas tamién podremos trobar-ie informazión. Por agora, en o suyo foro(www.freaklandgames.com) , i han penchau os torneus de Marzo.

Culebrón en Calatayú

Os guionistas de cualsiquier culebrón no podrían amillorar lo que ye pasando en Calatayú. Dende aqueras "anonimas" menazas a Basanta (CHA), dica la fuyida de Sanmiguel (antismas man dreita de Fernando Martín I) t'o PAR han pasau asabelo capitols bien grans: obras de teatro biedadas, manifestazions surrealistas, menazas y acoso a os propios compañers de partiu (PP)... de tot.
O zaguer capitol, que publica güe o periodico, pero que yera cantau dende fa diyas, ye que Sanmiguel (exconzeller d'o PP de Calatayú y presiden d'a redolada) s'ha pasau t'o PAR y que ya se ye pensando en fer un tripartito (PSOE-CHA-PAR, entiendo) ta forachitar a Fernandicus. Cal remerar que o PAR no teneba representazión en o conzello dica que se i pasó Sanmiguel.
Dixando a un costau os feitos, que podrían dar ta diez blogs, lo que siempre he trobau curioso ye a capazidat de bellas personas ta cambiar de chaqueta en custión de diyas u mesmo oras. O fenomeno d'o transfugismo, le dizen. Que ya s'ha tornau una ferramienta d'os puliticos, pos dengún no luita de berdat contra isto, pero toz la fan sebir d'una u atra traza y en una u atra mida.
Como ye posible que una persona siga un diya una pieza alazetal d'o gubierno monezipal más dreitoso y caziquil de tot Aragón y bels diyas dimpués dentre en un partiu que presume de zentrista y de rechionalista? Ye de dar que tamién puestar que istos dos partius no sigan tan diferens y que en reyalidat o PAR siga tan españolista, dreitoso y caziquil como o PP. Si almiten a chen como iste ixo ye platero. Pero tenemos elezions en tres meses y, en istas calendatas tot bale. A lo menos o cambio de chaqueta d'iste no ye masiau gran. Bi abió atros que pasón d'un coleutibo de cuchas nazionalista aragonés a un amarillismo independién refirmando a chen cuasi de ultradreita por o camin... Esprisions, mozet!
Lo que me dixa enluzernau y me fa un fastio que m'he de tapar o naso, ye que a ista chentota antimás se le recompiensa. En o caso de Sanmiguel puestar que siga o primer d'a lista d'o PAR por Calatayú. Qué pensarán a chen d'o partiu en Calatayú cuan, dimpués de treballar tantas añadas por bella cosa plega un traidor y lo meten primer d'a lista? (En isto o PAR tampoco no ye l'unico)

Sons del Matarranya

Voldria escriure això en català però encara no sigues prou. O Matarranya, una redolada catalanoparlán en o Sur d'Aragón, con poca chen y malas comunicazions, torna a dar-nos una lizión con una d'as iniziatibas más orichinals de tot Aragón y que ye un siñal de lo que i ye pasando mosical y sozialmen.

Organizau por l'Associació Cultural del Matarranya, Sons del Matarranya ye un procheuto doble: d'una man se son fendo conziertos de collas de mosica d'o Matarranya u bincladas de bella traza a ista redolada y d'atra man se grabará un disco con as cantas (prou que todas en catalán) de ixas collas. Os conziertos prenzipión o pasau 2 d'Abiento y rematarán o 31 de Marzo con l'actuazión de Azero en Queretes, an que son estaus a más gran parti d'os conziertos. O disco se suposa que se prenzipiará a bender en a Semana Santa.

En ista iniziatiba son partizipando collas de mosica tan quiestas y conoxidas (a lo menos ta yo) como Prau, Dechusban, Azero, Los Draps, Asalto Liriko, Mallacán... y atros muitos que encara no conoxco pero que de seguras que son buena cosa. En a suya paxina web (www.sonsdelmatarranya.tk) podez trobar asabelo informazión sobre os conziertos, as collas, os organizadors, o prochecto y asinas-asinas.

Los Draps premiaus

A colla matarranyenca Los Draps estión premiaus por Aragón Musical en os zaguers "premios d'a mosica aragonesa". (http://www.aragonmusical.com/noticias/leer-noticia/0/1285/) Partizipaban en a categoría "Canta en luenga minorizata d'Aragón" con a suya canta en catalán Cultura popular. Os atros candidatos yeran Merezina de Lurtero de Lurte, Espiellos, beires y fierros de Ulut y Te debo una canzión de Angel Petisme (a orichinal yera en castellano y de Ixo Rai!). Dende aquí quiero felizitar a Los Draps que prenzipian a beyer como se reconoix o sobrebueno treballo que leban una ripa d'añadas fendo.

O feito de que bi aiga un premio a cantas en luengas minorizatas ye bueno y malo de bez. D'una man, muita chen que le fa goyo a mosica en cheneral escubre cantas y collas que no ese conoxiu d'atra traza. D'atra man porque no yera Cultura Popular candidata simplamen a millor canta y prou?

De todas trazas, beyendo a mosica que se fa en aragonés y catalán, aspero que en bels pocos años aigan de reconoxer a suya calidat y bella colla partizipará en a resta de premios "normals"

Cronica de carnabals d'A Fueba

Como o cabo de semana pasau, en rematar a clase, marchemos escopetiaus ent’A Fueba. Por o camín abiemos d’aturar pos o nuestro nino de bentitantos eba de pichar (que pazenzia!). A lo menos nusatros sabebanos como ir-ie y tenebanos gasolina, que atros no. Unatro año dormibanos en a mesma casa de Tierrantona, ista begada con salón y tot. China chana nos femos biellos pos no bi ha guaire que contar d’a primer nuei fueras d’os clasicos empentons en os leitos y que dengún no dormió en o sofa.
O sabado de maitins beluns ebanos de rematar os zaguers detalles d’os disbrazes y belatros eban de fer-los de raso. Ya en a plaza de Tierrantona, tatimientres belun ficaba gasolina en a suya furgoneta, a resta desayunabanos y nos trobabanos con a charanga, o chicolate, a coca y a chen de toz os años. En Troncedo a colla se completaba y os treze (zinco Duffman, zinco San Pancracios, Pippi Längstrum, o mosén y l’arabe) prenzipiaban a minchar como si nunca no lo esen feito. Dimpués Formigales, Elumo con as suyas chiretas, Palo con as sardinetas... ibanos beyendo os nuebos disbrazes y os "autos barrenaus". A moda d’iste año estión os musclos zebra. Pleguemos a contar zinco modelos diferens. Os autos d’os mozos iban de Funeraria de Fago y Piratas bombarderos cremando o motor y fendo de l’alcorze un arte. L’auto d’a funeraria estoi que s’estricalló ascape porque dimpués de Troncedo no lo tornemos a beyer.
Ta qui no i siga estau nunca, istos autos los ben de pillar de bel esgüaze, lo apañan lo chusto ta qu’endure o diya de carnabal, lo disbrazan y lo fican, a toda belozidat por os camins y por an que calga ta ir de lugar en lugar. Atros años le ficaban tamién un arbol por o teito, pero iste año un d’os autos lebaba un atabul y l’atro un pichorro d’ixos que fan rudio ta que jopen os muxons d’os arbols.
O bin iba fendo o suyo treballo y a calor crexeba tanto que os San Pancrazios (que ya no yeran San Pancrazios) abión de sacar-se os balons mientres chentabanos. Ixo y as almendreras en flor prou que tampoco no son siñals d’o cambio de l’orache!. Siempre ha feito muita calor en o Pirineu en Febrero!. En rematar a chenta tocaba un d’os lugars que más m’estimo, pero que nunca no remero o suyo nombre. Ixe an que fan a mazedonia. Puestar que siga Morillo de Monclús (si beluno lo sabe que m’escriba). Antiparti de por a mazedonia – que ye sobrebuena – iste lugar me fa asabelo goyo por a suya ilesia. Luego meteré una foto d’ella.
A resta de lugars no se guaire bien cuals yeran. Creigo que Rañín, Elumo de rañín, Charo, Loporzano, La cabezonada, Solipueyo (u iste lo ebanos pasau ya?)... Tornemos a trobar o lugar d’as trunfas de bolsa (bieeeeeeen) y unatro an que feban un pastel de chicolate buenismo. Os Sanpancrazios ya no sabeban guaire bien de que iban disbrazaus (birchens, luitadors de sumo, cacharros, musulmans, senadors romanos u caperuzitas bampiros) pero se pedeban que pudiba en a furgoneta como si esen minchau carnuz. No torno a puyar-ie nunca!. Os mosens qu’eban acosau a las Duffwomen de maitins ya s’eban cansau (por fin!!!!) y prenzipiaban ixos lugars an que nos fican en una nabe con a charanga. Ye increyible como puez ascuitar mientres tot lo diya as mesmas diez cantas y no fartar-te-ne. En rematar a borina de Charo, a ixo d’as diez d’a nuei, tornabanos enta casa. Encara que prebemos de remanir dispiertos belunos no lo consiguiemos y ya no baxemos ta la berbena (ya he dito antismas que nos femos biellos). Beluns d'os eroes que i fuon estión forachitaus de l’eszenario u acosaus por zagalas barrenadas asinas que a nuei continó dica las seis coladas an que dezidión trayer-nos presens a qui yeranos dormindo. Grazias por pensar en nusatros, boques!
De maitins les tornemos a fabor. Fotos dormindo con o culo de chen en a cara u a donzaina en a orella estión os nuestros presens. Como caleba chentar en bel puesto y menazaba o diya con pretar a plebar marchemos ta l’Aínsa dimpués de desayunar con os Rastas de Tarragona (esprisions!). Como tenebanos una coxa dezidiemos puyar ta lo más alto de l’Aínsa. En rematar abiemos de tornar t’as nuestras ziudaz (más que más, Zaragoza) con tot lo penar.
Dica l’año benién A Fueba! De seguras que me xublido de asabelo cosas. Si i estiez iste año u belatro dixaz o buestro comentario. Esprisions a toz!

Nobedaz editorials en Nogara

Dende Nogara plegan dos nobedaz editorials. La una, o nuebo numer de l'Espiello con bels cambios chiquez en a maquetazión pero con os contenius de siempre. Ya son 20 os numers que leba ista rebista de raso en aragonés, y cada diya con más calidat. Encara no la he leyida entera pero tos recomiendo por agora l'articlo que firma Guillén Tomás sobre l'Archibo d'a Corona d'Aragón. Muito bueno ta qui no conoxebanos toda a istoria y muitismo más t'aclarir bellas cosas a muita chen.

L'atra nobedat ye a publicazión de o primer libro de Nogara. O suyo titol ye "Ucronía" y l'autor Dabi Lahiguera. Como he dito, ista nobela ye o primer libro que publica Nogara, con a intenzión de publicar-ne más si funzionan as bendas. Asinas que, dende aquí, deseyo tot lo millor a Nogara y a Dabi ta que continen publicando os primers y escribindo o segundo. Podez mercar o Espiello y Ucronía en o local de Nogara (C / Gavín, 6, Zaragoza). Qui bibaz en Zaragoza podrez mercar-lo tamién si tos amanaz por o puesto que meterá Nogara en a Zincomarzada.

O conzello que cabida y malfurria

Leigo o periodico y me trobo con buenas notizias d'iste, o nuestro conzello. Y ye que, s'ha dezidiu cambiar tot lo software de l'almenistrazión zaragozana por software libre. Ista dezisión ferá cabidar asabelo diners a o conzello (y a toz nusatros) pero antimás ye tot un simbolo. Ta qui no confite en o software libre beyerá como lo mundo contina funzionando igual de bien (u de mal). Microsoft ferá bels millons menos, que ixo siempre ye bueno, os equipos endurarán más, más chen conoxerá istos sistemas... Tot bentallas. Ixo y lo de o concurso "A tot estrús" ya iban dos cosas buenas en pocos diyas.
Pero no tot iba a estar buenas notizias. Bellas paxinas más entabán leigo un tetular "Seleccionados ocho diseños para los uniformes del personal de la Expo". Dios! Ya m'he xorrontau! Cuasi esgargallo o café. Y ye que cada begada que leigo bella cosa d'a Expo tremolo (con más razons cada diya). En a letra de l'articlo charra d'os uniformes d'a Expo - que serán ta fer-la más ortera si ixo ye posible- y de que s'han trigau güeito diseños d'an que saldrá o definitibo que portarán os treballadors (les cuaque u no). Y en isto, en ista fatera, se dixarán más de 100.000 euros. Ala! Y toz tan tranquilos... Que pincha ye a Expo! Y cuantos dinericos trayerá....
Pos lo cabidau por lo malfurriau. Por zierto si querez beyer os diners que dan a qui fa os uniformes d'a Expo lo tenez en: www.elperiodicodearagon.com/noticias/noticia.asp?pkid=302095. Y si no tenez guaire treballo podez contimparar-lo con os premios de A tot estrús: http://www.popyrock.com/premios.php.

Biñarock marcha ta Benicàssim contra a criminalizazión

Con PP u con PSOE contina a criminalizazión d’as ideyas y d’os mosicos que no son obediens. Os organizadors d’o Biñarock han dezidiu dixar de fer-lo en Billarobledo (Albazete) an que se ha feito istos zaguers onze años y marchar ta Benicàssim. En primeras Matarile S.L. (a interpresa organizadera) dizió que yera por custions de infraestruturas. Que eban demandau a o conzello de Billarobledo asabelo begadas que amillorase as instalazions y que, como no les feba caso, que yeran cansos y marchaban.
L’alcalde se carrrañó y contestó que Matarile y o conzello de Benicàssim yeran unos boques que no quereban que fartar-se a ganar diners. Asinas que Matarile fazió unatro comunicau de respuesta esplicando os berdaderos motibos ta marchar de Billarobledo.
Parixe que, como as calendatas (27 a 29 d’Abril) son asabelo amanadas a las elezions (27 Mayo) o conzello no quereba garra polemica como atrás añadas y quereba biedar que i tañesen bellas collas. Traduziu: que no i tañese S.A. Cal remerar que en a edizión pasada tamién bi abió polemica con S.A. que fazió que Coca-Cola no patrozinase o Biña (os de Pepsi encantaus). Asinas que o Matarile dezidió marchar t’atro puesto y en Benicàssim no metión condizions.
En os foros bi ha asabelo rufiertas sobre si os de Matarile son unos radius que no buscan que l’esquilmen (Fote! Son una interpresa!), que si o conzello de Billarobledo ye una ramada boques y lo de Benicàssim ancheloz u de rebés y asinas asinas. Lo que ye platero ye que en Benicàssim ban a tañer, antimás de S.A. collas como Fermín Muguruza u Obrint Pas. Con lo que ha pasau S.A. (y Fermín y tantos atros) con a suya criminalizazión y chuizios no creigo que isen ta Benicàssim si o problema estase atro que a zensura.
L’alcalde de Billarobledo ha dito que, de todas trazas se ferá festibal en o suyo lugar. Caldrá beyer qui bi ba. Yo, si puedo, iré t’an que baiga S.A. y a resta de collas criminalizadas. M’estimo más confitar en els que no en una interpresa u en un conzello d’Albazete u Castellón.
Si quiers saber-ne más a paxina ofizial d’o Biña ye www.vinarock.com y tiens foros y rufiertas en www.vinarock.tk y www.vinarock.net. Sobre a criminalizazion besita www.stopcriminalizacion.com u www.soziedadalkoholika.com.

Carta sobre l'amostranza publica

Aparixe güe publicada en o Periodico d'Aragón una carta sobre as demandas d'os profesors d'a conzertada de tener o mesmo chornal que os d'a publica. Alto u baxo coinzido con o testo d'a carta, que me parixe sobrebuena. Ista ye una d'as caras de bella cosa tan estendillada en a soziedat como ye ixe "o tuyo treballo ye un chollo". Sí en ye, ¿porqué no treballas an que lo foi yo?

Soi farto de sentir a la chen dizir lo bien que biben os profesors u os funzionarios en cheneral. Y ye berdat que tienen arrienda bacanzas, pocas oras de treballo, seguranza en os achustes y dreitos que a resta de treballadors nian suenian. Pero a puerta ye ubierta patalera. Porqué toz ixos que charran asinas d'os funzionarios no fan una oposizión. Muitos tienen a carrera ta fer-la pero puestar que no quieran foter-se de tres a quemisió d'años estudiando ta conseguir estar mayestro en un lugarón cazegau en o preto de bella sierra perdida de bes-te-ne tú a saber do.

A toz ixos y a qui abió de marchar d'a suya tierra por estar profesor/a les re-imbío ista carta. Grazias, Javier.

ENSEÑANZA/ Pública o concertada
En la contraportada de su periódico del día 13 de noviembre aparece un profesor de la enseñanza concertada reivindicando los problemas que, a su juicio, sufre este colectivo. El señor Sancho comenta que sus condiciones no se asemejan "ni de lejos" a los profesores de la enseñanza pública. Me gustaría hacerle algunas apreciaciones.
En primer lugar debe tener en cuenta que si usted fuera un trabajador de la escuela pública no llevaría 25 años en un colegio de Zaragoza, sino que en ese hubiera sido el periodo de tiempo que le hubiera costado llegar a esa ciudad. Entre tanto habría pasado por no menos de cinco centros, o tal vez hubiera tenido que ejercer de itinerante poniendo su propio vehículo. Por cierto, se ha perdido una experiencia maravillosa como es la escuela rural.
En segundo lugar no debe olvidar que los puestos de trabajo en los centros concertados, a pesar de estar sostenidos con fondos públicos, se deciden arbitrariamente y que por tanto estos "sufridos" trabajadores son puestos a dedo en función de su afinidad a los idearios del centro. En cambio los trabajadores de la enseñanza pública deben someterse a una oposición que supone años de estudio y esfuerzo. Sería justo entonces que todos los puestos de trabajo sostenidos con fondos públicos fueran ocupados de la misma manera.
En tercer lugar debo recordarle que entre el 80 y el 85% de los alumnos inmigrantes se escolarizan en centros públicos así como los alumnos con necesidades educativas especiales.
Esto es gracias a esos adecuados filtros que los centros ponen en forma de cuotas obligatorias del APA, donaciones "voluntarias", etc.
Así que, en mi opinión, para ser honestos a la hora de reclamar una equiparación de los trabajadores del sector público y privado concertado se debe comentar las ventajas y desventajas de cada uno de los sistemas y no hacer una visión parcial.
*Javier Cortés Gayarre (Zaragoza)

Cronica de Meyebals

O biernes, en rematar a clase d’aragonés saliemos escapaus enta Teruel. Dimpués de bel trafuque trobemos a endrezera correuta y dos oras más tardi plegabanos en a Billa meyebal. O conzierto de Lurte ya eba prenzipiau pero encara podiemos gronxiar as millors cantas. Y dezaga de Lurte a tortura d’o chunda – chunda d’a carpa nos forachitó y abiemos de marchar t’a peña d’os Almugabars. La resta d’a nuei bailando y zorriando. As nobedaz d’iste año: o mozet que prebó de ligar con yo y o clabillar que m’estricallé (grazias, conzello, por todas ixas zanchas y foraus).
O sabado de maitins comprebé que amenistaba una chanca dimpués d’una gambada por o mercau. Y si yo amenisto una chanca belún amensita que le fotan de lapos dica que le dentre l’esmo. En metat d’o mercau, en un puesto bien bistero, nos trobemos con a puta Flufi (u Chisla, como s’abría de dezir) bestida de ¿meyebal? ¿baquillera? Qui sabe... Lo podez chuzgar busatros mesmos en a foto. Qui tenió a ideya?, qui le dixó fer-lo? y porqué lo han consentíu os teruelanos? Ixe ye o rigor istorico que baladrían os organizadors d’as Bodas? Penible.
De tardis beyiemos o torneu meyebal en a plaza de Toros que bien podeba dedicar-se nomás que a cosas como ista. Dimpués d'emplir a pancha con unas pizzas buenismas que feban unos archentinos (estoi que en yeran por a traza de charrar), tornaban a tañer os Lurte. Si o conzierto d’o Biernes yera estau de puta mai, en iste dixón bien alto o ran t’añadas beniens. O publico cuasi no les dixa marchar (abión de fer tres bises). Cuan prenzipiaba a tortura cutiana d'o punchadiscos marchemos t’o Tozal an que se fazió un concurso improbisau de bailes meyebals. (Isto zaguer lo remero más por as fotos que trobé en a camara que por atra cosa).
O domingo de maitins se feba o tradizional beso. Con a ziudat en obras eban cambiau o puesto an que se feba y meya ziudat nos cazegemos, aprofeitando ta fer una mica de turismo. A la fin trobemos a balconada d’o Museu Probinzial (que l’edifizio no lo conoxeba, pero ye asabelo pincho). Astí, y dimpués d’una canta que puyó toz os rans de zucres en sangre (que pastelazo, dios mío!), nos diemos o beso de toz os años asinas que en 2008 i tornaremos chuntos, con clabillar y asperemos que sin Flufi.
Y como somos personas amenistadas d’adrenalina, dezidiemos tornar en o "rechional" Teruel – Zaragoza. Millor que fer puenting con gomas de pelo! Ixe chacacha d’o tren u te torna enchugardiu u te fa gomecar. Siempre fa goyo besitar una ziudat tan repolida como Teruel, pero en istas calendatas, y a penar d’a fredor, ye una marabilla beyer l’ambién que se i fa. Dica l’año benién, meyebals! Nos beyemos en Chulio, Teruel! Que beluno seuestre a ista Flufi tamién!

Pasando d'o bucardo

A D.Ch.A., tamién conoxius como os Mielsa – Men, nos dixa güe atra notizia exemplo d’a dexadez cutiana d’iste, o nuestro gubierno. Informa o Periodico d’Aragón que o procheuto de clonazión d’o bucardo fa años que ye aturau porque o gubierno aragonés (y l’español) no da perras. Isto que ya sería grau de por sí, ye mesmo pior si continamos leyendo y nos enteramos que, fa cuatro años l’equipo zientifico que treballaba en iste afer consiguió que naxise un bucardet, encara que morió pasaus bels pocos diyas por aber feito a zesarea masiau luego.
Y continando con a mielsa, en ista ocasión d’o departamento de Boné, o zaguer bucardo ye disecau en un taller tacsidermista dende fa cuatro años sin que o gubierno faiga cosa con él. Seguntes o Periodico, puestar que lo amostren en a Expo (sin comentarios).
L’articlo d’o Periodico ye amplo y intresán, dende ambiestas puliticas, meyoambientals y zientificas asinas que tos recomiendo que le faigaz una güelladeta. (www.elperiodicodearagon.com/noticias/seccion.asp?pkid=102)

Charrada contra la Mina de Borobia

O miercols benién Chobenalla Aragonesista y UCA (Unibersidá - Coleutibo Aragonesista) han organizau una charrada contra a Mina de Borobia en a facultat de Filosofía y Letras a las 19:15. Iste ye un procheuto que preba de fer una mina en o lugar de Borobia (Soria) a o canto d'a muga con a probinzia de Zaragoza, asinas que perchudicaría a buena parti d'a cuenca d'o Xalón. Ya s'han feito cualques manifestazions en a redolada de Calatayú y agora se preba d'espardir a luita enta Zaragoza y, más que más, que a chen conoxca o problema que no ye que atro siñal d'a pulitica especuladera que se ye fendo en atros puestos con os entibos, pistas d'esquí, campos de golf, macrourbanizazions y asinas asinas.
Si quiers saber más sobre ista atra esferra que nos quieren fer bes ta la charrada u mira-te a web: www.noalaminadeborobia.com (u fe as dos cosas que ye lo millor).

A tot estrús

O conzello ye organizando un concurso de mosica que se diz "Popyrock. A tot estrús 2007". Antiparti que o nombre siga en aragonés, que ye un buen prenzipio, se troban a faltar más iniziatibas como ista. Por agora ya se i han apuntau bellas 30 collas (l'añada pasada en estión 116) y o plazo ta inscribir-se-ir ye remata l'onze de Marzo. O concurso ye trestallau en categoría Pop u Rock (qui faiga pop-rock no se an s'apuntará) y en a paxina web - www.popyrock.com - puez ascuitar cantas d'as collas y leyer bella coseta sobre ellas. Me pienso que ye importán que toz os que nos fa goyo a mosica en cheneral y que queremos refirmar a mosica aragonesa, emos de partizipar en iste concurso. A primer parti d'o concurso ye una botazión en Internet, asinas que no nos cal nian salir de casa y antimas conoxeremos nuebas collas. A segunda, que ye la más intresán, son conziertos que as 24 collas que aigan pasau a primer fase ferán en o Zentro Zibico de l'Almozara en Marzo y Abril.

A unica colla que conoxco por agora, y que antimás canta en aragonés son os Dechusban, a qui tos animo que botez u que, a lo menos, ascuitez.

X edizion con marguin negra

Encara mancan cuasi cuatro meses y ya se prenzipian a saber cosas d'a dezena edizión de Magic. Fa tiempos que se conoxeban bellas d'as cartas que se reeditarán como Trol Aszeta u Inzinerar. Agora han feito publico o logo d'a edizión y... a gran notizia: ta zelebrar que ye a dezena edizión y que, ascape en 2008 Magic fa quinze añadas, ista edizión tendrá as maguins negras!!! (Ta qui no lo sepa, nomás as primers edizions tienen as marguins negras y por ixo ye bien difizil conseguir seguntes que cartas con marguins negras). De seguras que os puretas que tantismo criticón Ravnica (pero bien que feban serbir os confidens) por o suyo ran de cartas, y Caos Planar por crebar "l'esprito" d'as colors, no les fa mica goyo ista notizia. A berdat ye que a yo rai, pero me ferá goyo tener bella carteta (d'ixas que les pillas cariño encara que no sirban ta cosa) con marguin negra. Toda la informazión la tiens en a paxina ofizial: www.wizards.com/default.asp?x=mtgcom/arcana/1271

DEF CON DOS teneba razón

En o disco Ultramemia de DEF CON DOS, en a canta Ultramemia se charraba d’o modelo de bida d’agora y d’a semisión d’os ziudadans. Cuan a canta remataba se podeba sentir dos collas de manifestans chilando unos “autobús, autobús!!!” y atros “metro, metro!!!” como exemplo d’o ran de rufierta pulitica (u a lo menos ixo entendié yo).
O caso ye que en Zaragoza se fa bistero lo que deziban DCD fa asabelo añadas. O problema más importán parixe estar que ye, chunto con an se costruye un campo de futbol d’una interpresa pribada, si se fa una metro u un trambía. Estando importán o modelo de transporte publico masibo ta una ziudat – más que más, si por desgracia, crexe a ista belozidat – o ran d’os nuestros puliticos plega en puestos que fan que t’agane plorar. Frases como “Es un error estratégico porque se piensa en el pasado, no en el futuro” u “Es una agresión bárbara” (Buesa dixit) contrimuestran a barra que tien ista chentota. A primera ye tot un exerzizio de analisis pulitico dinno d'estudiar-se en o benién congreso d'as "Nuebas Chenerazions". A segunda, dita por una persona que ha refirmau a guerra d’Iraq, as esferras meyoambientals d’Aramón, a represión pulizial, o trascole, os entibos y asinas asinas, aclara cual ye a escala de balors que tien iste “ziudadan de Zaragoza”.
Que faigan metro, trambía, carril – bizi, parquins publicos, que amilloren as linias d’autobús… pero no condenen a os ziudadans de Zaragoza a beyer cosas tan penibles, por fabor, que ye un insulto contra a nuestra intelichenzia. U puestar, que lo que quieren ye que charremos d’ixo y no d’atra cosas, no?
Podez trobar a letra d’a canta Ultramemia en http://www.nomorelyrics.net/song/151839.html

Meyebals de Teruel

Dende o 15 dica o 18 de febrero se celebran en Teruel as Bodas de Isabel y Diego, conocidas popularmen como os Meyebals. Toda a ziudat torna t’o sieglo XIII ta rebibir o romanze d’os Amantes de Teruel. Ta qui nunca no i sigaz estaus, toda la billa s’imple con mercaus y haimas y con cuasi toda la chen bestida de meyebal. Beyer a toda una ziudat tan bulcada con una fiesta como ista ye tot un exemplo de lo que se puede fer cuan a chen partizipa y s’embreca en a suya ziudat.
Mientres istos tres diyas os teruelanos s’organizan en collas que se chuntan en locals u haimas, toz bestias d’o mesmo (poetisas mudejares, almugabars, leprosos y asinas asinas…). Por toz os cabos de Teruel se fan chicorronas obras de teyatro de toda mena: somardas, d’amor, historicas… Y de nueis a borina ye asegurada. Iste año Lurte actuará as dos nueis en a carpa que bi ha a o costau d’a gara d’autobuses. Ta qui le faigan goyo dimpués puede ir ta la peña d’os Almugabars an que contina toda la nuei “l’ambién almugabar” con mosica en bibo, cheras, alcol…

O Domingo de meyodiyas, ta qui tienga parella, se rematan as bodas con una besada coleutiba. Se suposa que qui se besa en ixa plaza a l'atra añada i tornará con a mesma parella. Por agora, a yo, m'ha funzionau...
Si querez informar-tos a paxina oficial ye: http://www.bodasdeisabel.com/.

L'aragonés ye perigloso

Como deziba fa bels diyas, iste cabo de semana se fazió o socalze por l'aragonés. L'acto estió bien pincho. Nos i chuntemos asabelo chen, muitos pasón por a mesa a informar-se sobre l'aragonés, se sintión gaitas y donzainas... mesmo i aparixió bel meyo de comunicazión. (www.aragondigital.com/asp/noticia.asp?notid=31252&secid=9)

Pero parixe estar que, a penar de contar con o permiso d'o conzello y de tener-lo tot legal y de no aber creyau mica problema l'aragonés - u o chicolate u as gaitas, qui sabe - be d'estar perigloso. Porque tot lo tiempo bi estió una tozinera y un auto d'a polizía de l'estau. En primeras no se sabeba guaire bien si yera por nusatros, por unos cristianos que bi eba a o canto u por unos que protestaban contra a puyada de pres de os mobils ixe mesmo maitin bella ora antis. A la fin os efiziens funzionarios, fartos d'estar en l'auto charrando d'as suyas cosas u por mandato de belún, s'amanón a os "furos manifestans" armaus con basos de chicolatey trunfetas de bolsa y les identificón. A la pregunta de porqué se nos identificaba, un d'os polizías dizió que "yeran estaus un ratet asperando y que, abendo comprobau que no pasaba res, eban dezidiu identificar-nos" ( ¿?) A la siguién y lochica pregunta de "y si plega a pasar bella cosa, que nos fez?" ya no respondión.

Quedemo-nos con lo pincho que salió o socalze y pasemos d'istos matutans. Charramos y no reblamos! L'aragonés ofizial!

Siñals cuasi acotolaus

Fa bels meses se tornón a bender siñals estrelaus d'Aragón. Dimpués de tantismo tiempo sin bender-se-ne s'asperaba un gran esito, pero ye que ya cuasi no'n quedan. Asinas que, como no sabemos cuan se tornará a fer-ne nian si se'n ferán más, puez demandar o tuyo siñal en [email protected] por un pre de nomas 8 euros (más lo que cueste nimbiar-lo t'an que siga, si cal).

PARagón TBiel

Que a TB publica ye de qui gubierna ya ye un feito que toz asumimos a toz os rans. Remeremos como o PP obligó a fer a Linea 900 un programa dizindo qué bien se chestionaba l’augua en Murzia dimpués d’emitir unatro sobre os campos de golf d’a Rechión. Agora con o PSOE fan una mica más de disimulo pero alto u baxo tot contina igual. No he bisto Telemadrid pero me han dito que ye begüeñoso y por a chen que conoxco que la beye y le cuaca soi seguro que ye más facha que Franco. Y asinas podríanos continar con muitas más.
Y yera de dar que, malas que prenzipiase a funcionar, Aragón TB no iba a estar menos. Fa pocos diyas beyé un programa que fan de rufiertas. Fa unas semanas i charrón sobre a OTAN, por ejemplo, y estió intresán. Pero ixe diya o tema yera “o turismo en Aragón y a suya crisis”. “Qué bien! –pensé – a la fin una rufierta sobre a nieu en Aragón, as barbaridaz que se son fendo y a insostenibilidat d’ixe modelo de desembolique tanto a ran ecolochico como economico.” Error.
Por un regular en o programa bi ha tres persona a fabor y tres en contra d’o que siga. En iste yeran seis personas charrando de cómo se podeba fer que ise más chen a las pistas d’esqui. Ixa yera toda la rufierta que amenista o turismo d’Aragón.
Isto no ye que un ejemplo. Biel, en un ataque de sinzeridat, en un fallo d’o suyo susconszién u simplamén porque ya ye crexiu dizió en un mitín –y copio de El Periodico de Aragón – “no veáis los telediarios de las nueve y de las tres, ved los que se hacen aquí”. Ala! Y astí queda ixo! “Beyez los d’aquí, que los escribo yo!” – Ese puesto adibir-ie.
Dimpués dizió atrás como “los ciudadanos se deben incorporar a nuestro proyecto, si no, que luego no me pidan explicaciones” que ye como “si no botas a o PAR no tiens dreito a quexar-te” pero ixo ya ye t’atro diya.

Dreito a borina

Os chuezes, tan saputazes els, han feito unatra chanzota d’ixas que fan de cabo ta cuan. Soi fablando de l’afer de Tenerife, an que un chuez ha dito que no se pueden fer os carnabals porque l’estrapaluzio que se i fa no respeta o dreito a descansar d’as “personas” que lo denunzión. (as cometas no son una errata). Y a chen se sorprende!!!
Entre toz ixos que agora se sorprenden, y que mesmo se carrañan y meten a parir a o chuez, dezindo que ye rematando con a cultura popular, seguro que bi ha muitismos que no han dixau de dar mal y tirar-se d’os pels por os chobens capins d’o rollo, as botelladas u os conziertos en a Romareda.
Prou que a chen tien dreito a descansar ! No ba a tener-ne! Ixo ye de dar! Y a la borina? Y a o descanso d’a men? Y si yo descanso indo de borina? Qui me puede dixar sin ixe dreito? Y porque o mio dreito a borina u a o descanso como me agane ye menos importan que o dreito a o descanso d’istos boques que trancan bars, salas de conziertos y acotolan as fiestas porpulars?
Ya de paso: Qué ye manifestazión cultural y que no? Porque se monta tanta istoria con o carnabal y no cuan trancan una sala de conciertos? Ixo no ye cultura? Un pasabillas tampoco no’n ye? Porque os bars no pueden fer rudio a las 4 d’o maitín y as campanas d’a ilesia si que puede a las 12 d’o meyodiya d’un domingo?
Si continamos fendo caso a toda ista mena de chentota, en bels pocos años no bi abrá garra cosa dibertida que fer, todas as drogas (l’alcol y o tabaco tamién) serán biedadas fueras d’os tranquilizans de farmacia y toda manifestación cultural serán os acusticos de Bisbal…

Aragón, tierra de tebeos

En o zentro Joaquín Roncal d'a CAI (C/ San Braulio 5-7, Zgz) se fazió ayer a debantadera d'una muestra sobre o comic aragonés. I trobaremos treballos de asabelo autors de toz os tiempos d'iste arte tan poco quiesto y esconoxiu por la más gran parti d'a soziedat. Amás d'a muestra se ferán charradas os sabados de tardis y tallers y autibidaz de toda mena.

S'aprobeita tamién ta promozionar a biblioteca Cubit que se ferá en l'antiga zucrerera y que s'espezializará en comic, y ta meter-ie un punto de replega de comics biellos que irán t'os zentros zibicos.

Ista iniziatiba contrimuestra, una begada más como o comic ye bibo en a nuestra ziudat y en o nuestro país, con artistas tan reconoxius como Luis Royo. Y buena parti d'a culpa d'ixo la tien l'asoziazión Malavida que ye treballando firme y bien por espardir o comic y normalizar-lo como esprision cultural que ye.

Tiens toda a informazión sobre ista esposizión en: www.asociacionmalavida.com y un articlo que publica o Periodico en www.elperiodicodearagon.com/noticias/noticia.asp?pkid=299238. Asperemos que tot isto baiga bien y se continen fendo todas istas autibidaz. Nos i beyemos!

Socalze por l'aragonés

Iste Sabado, dende as 12 d'o maitín, en a plaza Espa?a, se ferá un socalze por l'aragonés. L'aragonés, y os aragonesofablans tornamos a salir t'a carrera a reibindicar os nuestros dreitos y mesmo a nuestra esistenzia dimpués de tornar a estar xublidaus en o nuebo estatuto. Como diz o cartel "Charramos y no reblamos".

Combido a toz os qui leigan isto a que se i pasen y se faigan un chicolate bien calién que, con l'orache que fa, ya agana.

"Que bergüeña!" u "L'estatuto que nos han feito"

Anuei se siñaba en as Cortes d’Españññña a bergüeña nazional d’Aragón conoxida como Estatuto. En un inte an que Aragón S.L. (Siempre Leal) podeba prebar de conseguir tener una miquirrina d’autogubierno, en un inte an que se podeba reconoxer a nuestra reyalidat trilingüe, os nuestros dreitos istoricos.... ban y nos fan isto
L’estatuto que nos aprebarán (porque cal remerar que en Aragón S.L. os ziudadans sisquiá imos a botar-lo) no ye que siga un güeña por o suyo testo (que tamién) pero ye que si lo contimparamos con la resta, "güeña" ye un afalago.
A soziedat aragonesa (S.L. tamién) l’han distrayida con a fata rufierta sobre os ectometros cubicos que ibanos a fer serbir y fateras de parellana ensundia. Taninientres perpetraban un testo que nos dixa sin garra guaranzia economica y que s’abergüeña d’a nuestra istoria y cultura dixando-la en un calaxo d’as Cortes Aragonesas.
Ta los que no conoxcaz o testo ni os estatutos d’os paises bezins (y no bezins) en CHA han feito un documento en Power Point an que s’amuestran as prenzipals diferenzias entre l’estatuto aragonés y a resta. Ista tardi lo presentan en o Zentro d’historia (19:30) pero lo puez trobar en a suya web (http://www.chunta.com)/. Si dimpués de beyer-lo no te bulle a sangre tu mesmo, pero yo me lo miraría....
Cal que remeremos a os culpables de tot isto: PSOE y PP, que yera d’asperar que queresen tener contentos a os suyos mainates españols, PAR, que no tienen ixa escusa, pero a istos, con que tiengan ta entibos y pistas d’esqui, rai tot lo demás, y IU, que mira.-te que se podeba parixer una mica a EB u ICV, pero no, en Aragón nos tocan los fatos. Y asabelo d’aragoneses más: los que han conseguiu que o mobimiento aragonesista siga dormiu, as organizazions sindicals, chobens y de toda mena que han pasau d’o tema, os unibersitarios que ni estudean ni reibindican (de berdat que no se que feran) ... y en cheneral toz os que no somos pretando-le fuego a ista chentota que nos gubierna. (Ta que no m’engarcholen: cuan digo "pretar fuego" ye una metafora)
Bi ha begadas que me pienso de cambiar o nombre d’o blog por Tierra de fatos u, en omenache a la zorrera d’un luitador, "Tierra d’españols".

Como exemplo dixo aqui un articlo que aparixe en o Periodico de güe (bien chicorrón):

"Un fuerte recorte a la exposición de la identidad histórica aragonesa
Las enmiendas redactadas conjuntamente por los grupos del PSOE, PP, IU y Partido Aragonés (PAR) a la reforma del Estatuto de Aragón propone una redacción de la exposición de motivos de la propuesta que elimina muchas de las referencias históricas de la original aprobada en las Cortes autonómicas, según informó Efe. El comienzo de la exposición de motivos indica lo siguiente: "La Comunidad Autónoma de Aragón, reconocida hoy como nacionalidad histórica (...)". Sin embargo, el arranque de la propuesta que llegó al Congreso establecía que "Aragón es una nacionalidad con más de doce siglos de historia". Tampoco figuran las referencias a la Guerra de Sucesión o a los Decretos de Nueva Planta ni el Proyecto de Estatuto de Caspe de 1936."

L'aragonés en o curriclo "aragonés"

Aparixeba ayer publicau en o BOA o curriclo educatibo aragonés ta l'añada benién. I mete bellas cosetas sobre l'aragonés, como por exemplo:
"Artículo 24. Enseñanzas relacionadas con las lenguas propias. Los centros que impartan enseñanzas relacionados con las lenguas propias de la Comunidad Autónoma de Aragón, aragonés y catalán, deberán desarrollar proyectos lingüísticos que faciliten el aprendizaje funcional de las mismas, conforme a lo establecido por el Departamento de Educación, Cultura yDeporte."
Bueno! A lo menos nombran a l'aragonés y a o catalán por os suyos nombres! U siga que esisten! Y en l'estatuto porque no i salen??? Asperemos que toz ixos zentros (los ¿cuatro?) que charra faigan os procheutos. No sé si les bagará de leyer-los toz...

Contina o curriclo y, entre os ochetibos d'as zienzias sozials i leyemos:
14. Utilización de un vocabulario y de una expresión oral y escrita adecuada, precisa y correcta en castellano y, donde proceda, en las lenguas propias.
A primer pregunta ye platera: an prozede? (As luengas propias estoi que serán as de l'articlo 24) A segunda ye: como se guaranziará l'emplego correuto d'as luengas propias?

Dimpués torna a aparixer l'aragonés en atros articlos. Bellas begadas con o suyo nombre, reconoxendo a D.Ch.A. asinas de facto a suya esistenzia y categoría de luenga. O curriclo no fa cosa por l'aragonés. Pero ye que si a lo menos se cumplise lo que i mete ya sería un tranguet. Bi ha un plazo d'enmiendas de quinze diyas. Si no tenez cosa millor que fer ya sabez...

Charrada sobre conzienzia lingüistica

La Colla de Lingüistica de Nogara (www.nogara-religada.org) organiza ista tardi a charrada "Istoria d'a conzienzia lingüistica en Aragón". Será a las 19:30 en o local de l'asoziazión (C / Gabín nº 6, bico d'a Madalena, Zaragoza) y la ferán Guillén Tomás y Juanjo Segura.

Ista charrada ye endrezada, más que más a l'alunnalla, mayestros y sozios de Nogara pero pueden ir-ie cualsiquier (y yo tos lo consello). Cal dezir que o treballo que son fendo ye sobrebueno con charradas muito a ormino, articlos en l'espiello ... y que aspero que continen con ista faina que buena onra le fa a l'aragonés.

Nobedaz en Charrando TB

Dimpués de bels meses, a la fin bi ha nobedaz en Charrando TB. Tres nuebos documentos prou intresans: dos bideos de actuazions de Mallacán y Dechusban y una entrebista con Francho Beltrán en o 2005 cuan se prenzipiaban a dar os primers trangos enta o segundo Congreso de l'aragonés. Iste zaguer bideo lo fazió a chen de Chino - Chano (www.fuenferrada.net/creaba) que ye un programa que se fa en a TB local d'Andorra (Sierra d'Arcos - Teruel). Iste programa leba ya un buen fascal d'añadas emitindo-se en un lugar an que fa muito tiempo que no se i charra encara que i sobrebiben asabelo parolas y esprisions. Si no m'entiboco, ye l'unico programa que s'ha feito en aragonés chunto con o breu "O mirallo TB" que fazió Nogara y que puez trobar tamién en Charrando TB (www.charrandotb.com).