Showing posts with label handmade. Show all posts
Showing posts with label handmade. Show all posts

28 February 2015

Вярнулася!!! Запрашаю на гарбату!

Я вярнулася да цябе, маё блогаўскае жыццё і абяцаю больш не пакідаць цябе, бложык, так на доўга больш ніколі! B маіх чытачоў, якія, спадзяюся, вярнуцца да мяне,  а калі і не - то буду пісаць для сябе ))

У маім жыцці быў цяжкі перыяд, і натхненне з уседлівасю таксама мяне пакінулі. А бягучы год будзе не лягчэйшым... І я адчула, што мне няма куды перанакіраваць думкі, адцягнуць увагу. Таму зараз я ўзяла сябе ў рукі, а дакладней - нагадала рукам іх першае прызначэнне ў маім жыцці - і накірую сваю волю на ...

Яшчэ не ведаю... І вязаць хочацца, і скура, СКУРА, да якой я іду-іду.... і ніяк на вазьму яе ў ахапку. А яшчэ я стала вандроўнічаць, а справаздач пакуль нідзе не пісала. Так што будзе чым развеяць публіку )) Для інтрыгі толькі паведамлю, што была ў Індыі, і гэта было не ГОА, а Пенджаб - штат сікхаў.

А пакуль запрашаю на гарбату!

Посуд звязаны даўным-даўно для Вольгі Гарчычка, якая не толькі дзіцячы фатограф, але і выдатны кулінар!

Унізе яшчэ фоткі ))

22 September 2013

Бірузовая ільняная торба / Turquoise linen bag

Падарунак на Народзіны для маёй сястры, у яе любімых бірузовых танах.

Асабіста я такія адценні блакітнага на дух не пераношу, і магу нават прытомнасць згубіць, на яго гледзячы, што са мной ледзь не здарылася, пакуль я была ў вязальным працэсе. А вось сястра, толькі кінуўшы вока на торбу, усклікнула: "О, гэта ж арызонская мята!" (ці якая там) і дужа абрадавалася практычнаму падарунку пад свой гардэроб, ды яшчэ і біжутэрыі ў камплект.

Падкладку сястра-партніха прапанавала зробіць самой.

Ніткі - 100% лён "Камтэкс", вязала ў 2 ніці. Пайшло роўна 300 г. Замаўляла сабе нешта адно са спісу ў зямельна-тэракотава-балотных танах, а прыйшло гэта (( Зараз у роздумах, што б для сябе прыдумаць, каб з колерам не прамахнуцца. На вязанае валянне гляджу ))

16 April 2013

Пакунак / pack

Сёння пакажу упакоўку для сваіх прац - мяшэчкі, візітоўкі і цэтлікі. Ільняныя зялёныя мяшэчкі рознага памеру нашыла ўжо даўно. А вось візітоўкі і цэтлікі ў мяне з’явіліся толькі што - гэта быў падарунак для мяне на Народзіны ад выдавецкага дому "Молпрэс", у якім працуе мой сябра. Усё ў адным стылі - пад блог, і цяпер я такая шчаслівая )))))))


07 January 2013

Першы выйгрыш - Францішак для Францішка / My first win - Francišak for Francišak

Першы дзень 2013 года ў нашай сям’і быў адзначаны вельмі радасным і такім чаканым падарункам - я першы раз у жыцці выйграла рукадзельны падарунак-цукерачку! Думаю, тут спрацавала магія імёнаў - гэты мядзведзік носіць такое ж імя, як і мой сын, яны абодва Францішкі!

З творчасцю Юліі Прашковіч я ўжо была знаёмая праз сваіх блогерскіх сябровак. Юля шые і валяе зверанят і аксэсуары. Нядаўна яна праводзіла розыгрыш - разыгрывала свайго мядзведзіка Францішка. Мой сын, які з мяккімі цацкамі як сапраўдны мужчына не гуляе ніяк, на свайго цёзку адрэагаваў на дзіва радасна. Магчыма, гэта тлумачыцца тым, што да сустрэчы з гэтым мілым, мяккім і разумным, ён бачыў Францішкаў толькі старых, афіцыйных, ды яшчэ і памерлых. Так што - зламалі стэрэатып )) У сына нават з’явіўся рытуальны танец пад назвай "Мы выйгралі мядзведзіка", які нам прыйшлося цэлымі днямі вытанцоўваць, толькі не пытайце, як ))))

Пад катам - як мы пасылку атрымоўвалі і пазіравалі

28 August 2012

Дзіцячае крэсла, перацягнутае джынсам

Новае дзіцячае крэсла з цыраты пачало рвацца вельмі хутка. Каб спыніць разбурэнне, вырашыла абцягнуць яго джынсам. Люблю працаваць з карыстаным джынсам, бо гэта экалагічна - даваць другое жыццё натуральнаму матэрыялу.


Працай сваёй я засталася так задаволена, часта здымаць і мыць не планавала, таму паўстала пытанне пра чахлы. Лянота - рухавік прагрэсу, таму я хадзіла па Сэканд-хэндах і шукала штаны вялікага памеру, з шырынёй штанін не меней 47 см, каб не перашываць іх ))) Атрымалася 2 штукі на змену. Калі-небудзь і прадаць крэсла будзе не сорамна)))) І сын, і котка адразу палюбілі сядзець на ім ))))


14 August 2012

Скураны заплечнік (майстар-клас) / Leather backpack

Не так даўно лазіла па Інтэрнэце па скураных пытаннях і... першы раз у жыцці знайшла сябе!!! Не толькі сваю працу, але і сябе! 5 год назад я пісала некалькі артыкулаў па вязанню і мастацкай апрацоўцы скуры ў газету  "Толока. Делаем сами". І таму, калі я ўбачыла на гэтым сайце свае фотакарткі, у мяне ўзнікла першая думка  - мяне сплагіацілі. Але аказалася, што яны не толькі захавалі аўтарства і першакрыніцу, але і падрэзалі мне галаву на ўсялякі выпадак ))

Перапісываць і перакладаць свой майстар-клас не бачу сэнсу, а вось фотакарткі прымацую. Чытаць тэкст па-расейску тут.
Люблю я вельмі-вельмі свой заплечнік! Служыць ён мне верай і праўдай вось ужо 8 год. Я з ім і на тэлебачанне была запрошана, па ім мяне пазнаюць у горадзе, ён прыцягвае да сябе шмат увагі - так і хочацца ўсім яго патрымаць у руках! З часам колер яго змяніўся, швы трошкі зацёрліся, але хоць ні ў водным месцы ён не быў прашыты на машынцы - ён захаваўся вельмі трывалым. Бачна, што я рабіла яго з любоўю і на доўгае агульнае сяброўскае жыццё )))

Шмат фота з дэталямі пад катам.

22 July 2012

Ігольніца-манекен / Needle case "Mannequin"

Для сваёй любімай сястрыцы на Народзіны зрабіла сувенір, які будзе мець для яе вялікае практычнае прызнаначэнне, бо працуе мая сястра ў Менскім Купалаўскім тэатру ў пашывачным цэху канструктарам! Хвалявалася я дужа, бо партніха з мяне ніякая, а замахнулася здзівіць прафесіянала! І якая ж я была шчаслівая, калі пачула, што сястра колькі хвілін у руках манекен круціла, і ўсё думала, што ён у краме куплены ))) Лепшы камплімент для рукадзельніцы )))

15 June 2012

Купальнік, вязаны кручком / Crochet swimsuit

Ну вось, да пачатку новага летняга сезону паспела для сваёй сястры Волі зрабіць прэзент - купальнік у яе любімых танах. Блакітны меланжавы я звязала ёй раней, сястра яго насіла. Але зараз у продажы з'явіліся стрэйчавыя ніткі, і мы вырашылі перавязаць трусы, каб яны сталі зручнымі ў нашэнні. Ну, і кветачак давязала, каб спалучыць абедзве часткі.

Мы з сястрой не такія мадэлі, каб сябе выстаўляць публічна, таму фота толькі на манекене )))


03 June 2012

Вязаная карона для фотасесіі / Knitted crown for a photoshoot

Як проста стаць прынцам альбо прынцэсай у нашыя дні - ужо не трэба даказываць наяўнасць высокіх тытулаў, дастаткова толькі зрабіць фотасэсію ў адпаведным строі. Можна абыйсціся без вычварных убораў, але ніяк не без кароны. Напрыклад, такой - ажурнай і маленькай, выкананай у высакародным металічным колеры )))


09 May 2012

Летняя шапачка, вязаная кручком, са зменнымі кветкамі / Summer crochet сap with removable flowers

На першыя Народзіны сваёй пляменніцы вырашыла парадаваць яе летняй шапачкай са зменнымі кветкамі. Кветкі прымацавала магнітнымі кнопкамі, па-сучаснаму ))

Сын мой, у адрозненне ад іншых дзетак, галаўныя ўборы любіць, - у гэтай шапачцы доўгі час красаваўся перад люстэркам і з радасцю пагадзіўся выступіць у ролі мадэлі, хоць і памер галавы ў яго даўно перарос гадавалыя нормы )))

Такую самую звязала для яшчэ адной гадавалай дамы - дачцэ маёй сяброўкі. Буду чакаць фота )))


11 April 2012

Торба, вязаная кручком / Crochet purse

Мая першая торба знайшла сваю гаспадыню - я доўга і старальна працавала над ёю дзеля прэзенту на Народзіны маёй новай, але ў той жа час такой блізкай па духу, сяброўцы Юліі. Торбачка звязана з 36 элементаў, пасаджана на падкладку, мае ўзмоцненыя шнурамі ручкі. Юля засталася давольна абноўкай!

10 April 2012

Жоўты шалік у тэхніцы стужкавых карункаў / Yellow scarf in the technique of tape laces

Нядаўна вязала такі ажурны чырвоны шалік для сяброўкі - вядома, захацелася і сабе :) Такога яркага і чыстага жоўтага колеру ў краме была толькі мерсіраваная бавоўна. Ніткі - вельмі прыгожыя!!! 50% віскозы. Але вязанне было жудасным: ніткі слаіліся, і таму працэс вельмі зацягнуўся. Затое вынікам я засталася задаволеная!


09 April 2012

Арганайзер для спіц і кручкоў / Knitting needle organizer

Нарэшце!!! Колькі стала парадку на працоўным месцы!!!

Шыццё - адна з нешматлікіх галін рукадзелля, у якой я слабачка. Строчку зрабіць - усё, на што я здатна. Мой 100-гадовы "Зінгер", што перайшоў мне ў спадчыну, часам нават выконвае свой прамы абавязак, акрамя як дапаўняць інтэр'ер :) - дапамагае мне ў маіх намаганнях. Толькі ён змог безпраблемна прастрачыць 8 слаёў джынса!!!


05 March 2012

Вязаны кактус "Lophophora" / Crochet cactus

Калі я прэзентавала знаёмай па танцах Юліі падстаўку пад алоўкі, яна пашкадавала іх туды ставіць. Я падстаўку забрала, вырашыла што-небудзь связаць у яе, каб выкарыстоўваць у якасці вазы. І я звязала кактус. А ён прапарцыйна не падыйшоў да вазы, і, такім чынам, у Юліі атрымалася 2 падарунка :)
А кактус - быў падобны на "Astrophytum", але ў таго кветкі жоўтыя. Ну, няхай будзе "Lophophora" (толькі ў яго дзетка не так тырчыць), так цікавей! ))


Шалік у тэхніцы стужкавых карунак / Scarf in the technique of tape laces

Мой першы вопыт вязання стужкавых карунак. Гэты шалік - мой падарунак сяброўцы на 8 сакавіка. Мы з ёй так доўга выбіралі мадэль: я прапаноўвала кветкавыя пышныя ўзоры, але дзяўчыне захацелась нешта болей сціплае, аднатоннае чырвонае. Пасля заўтрашняга ўручэння мы арганізуем фотасэссію ў поўным камплекце - разам з чырвонымі ботамі, торбай, і комплектам чорна-чырвоных браслетаў, якія я прзентавала ёй год назад. Чакаем...


18 February 2012

Сувенір "Падстаўка пад алоўкі" / Pencil holder

Ёсць у мяне знаёмая Юлія, калега па танцах, і працуе яна галоўным бухгалтарам. На Народзіны вельмі мне хацелася зрабіць для Юлі які-небудзь самаробны падарунак. А так як я чалавек вельмі практычны, то і да выбару падарункаў таксама стаўлюся сур'ёзна - каб падарунак не на паліцы пыліўся, а быў у актыўным выкарыстанні. Такім чынам з'явілася падстаўка пад алоўкі і асадкі.


04 February 2012

Візітніца са скуры / Leather business card holder

Вельмі мне хацелася павіншаваць з Калядамі маіх сяброў у Польшчы. Вядома, вырашыла прэзентаваць нешта сваё самаробнае. Акрямя агульных падарункаў - елкі і сняжынак, Катажына атрымала мае "фірмовыя" бранзалеты :), а муж яе, Анджэй, імянную візітніцу. Гэта быў мой першы вопыт пасля 5-гадовага перапынку працы са скурай, таму я вельмі хвалявалася, але рэзультат мяне задаволіў.




29 January 2012

Шалікі "Dantela"/"Flamenko" / Scarves

Даўно не вязала сабе шалікаў, а павальнае захапленне маіх сябровак вязаннем з пражы "FLAMENKO", прымусіла і мяне падбраць сабе колер. Вось уж праўда: апранула яго і адразу - зорка!


А гэты прыгожы пяшчотны ружовы колер мы з сяброўкай падабралі для яе на вясну ў якасці абноўкі. І атрымалася вось так:


Беларуская паштоўка на Валянцінаў дзень / Belarusian postcard for Valentine's Day

Мая першая паштоўка! І колеры мае любімыя: шакалад і бэж. А катоў люблю таму, што гэта касмічныя стварэнні, яны пасланыя на Зямлю, каб навучыць людзей дабрыні і пяшчоце. Мая Руся шмат чаму добраму навучыла, жывучы са мной. Любові ў першую чаргу. Кахання вам усім, мае сябры і заёмыя, а хоць і незнаёмыя, але няхай і вы будзеце жыць у любові )))


Вязаная шапка для мужа / Knitted hat for my husband

Быў у майго мужа шалік, даўно мною куплены, з модным спалучэннем колераў: шакалад, аліўка, беж, белы. І вельмі ж мне захацелася мужу на Новы Год звязаць шапачку ў камплект - цёмна-шакаладную, але з салатавай каёмачкай. Доўга шукала гэтую нітку для аддзелкі, але ўсё атрымалася! Я засталася вельмі давольна сваёй акуратнай працай, а муж, у сваю чаргу, - сваім падарункам!

ЗЫ: ніткі шакаладнага колеру засталіся, іх хопіць на яшчэ адну шапачку. Можа каму трэба таксама
падабраць пад любімы шалік?!