Deixatz a las vuestras novias

Me plega un mensache a la sola colla de WhatsApp que tiengo a on que nomás somos tíos. Miedo me fa cada vegada que veigo mensaches sin leyer astí. Con razón. Ye un video. I amaneixe un hombre, de bells cinquanta anyos, y diz:

"A ver, pregunta: Si ahora cuando acabe la desescalada y termine todo esto, te dan a elegir entre irte con tu parienta, tu novia, tu mujer, tu esposa a un lugar soñado durante una semana o irte con tus colegas a hartarte de vino y a comerte un buen chuletón, ¿qué escogerías? a) poco hecho, b) al punto, o c) muy hecho"

Sé que qui lo ninvia no tien garra mala intención. Que, de feito, adora a la suya muller y le fa goyo de pasar tiempo con ella. Lo ninvia porque fa parte d'ixe imachinario colectivo imperant a on que los hombres somos uns menors d'edat que nomás queremos pasar-nos-lo bien con los nuestros amigotz y las mullers son unas bruixas que no nos deixan fer-lo, que nomás quieren que faigamos cosas "de tías", veyer pelis "de besos" u charrar de sentimientos, ¡qué catenazo!

Un relato prou ixemenau y que, quan no i participas, se te miran como si fueses bell marciano. "A iste lo tien bien ligau la parella", se piensa mas d'un. No entienden que no quieras estar-te rodiau de nomás hombres, comentando lo que piensan sobre lo fisico de toda zagala que traviese lo suyo campo visual u las fetas esportivas d'a semana. No entienden bella cosa tant basica y de buen entender como que he esleixiu compartir la mía vida con la mía parella porque, antimás de querer-la, me lo paso bien con ella. Me fa goyo de pasar tiempo a lo suyo costau.

Quan veyeba lo video, talment porque m'entrefilaba la fin, no quereba deixar-lo acabar. Sin saber la segunda opción, la respuesta ye "sí". Quan acabe la desescalada quiero marchar con la mía parella ta bell cabo que nos faiga goyo. Estar-nos chuntas dillá d'as quatre paretz de casa nuestra, y d'as mugas d'a ciudat u lo país. Fer-nos bella cursa, conoixer mundo, compartir ratos diferents a los d'a rutina d'o días de cada día. Porque una d'as cosas buenas d'istos días de confinamiento precisament ye estau lo tiempo que hemos disfrutau chuntas: los podcasts grabaus, las partidas con la consola u a chuegos de mesa, las cintas, las bieras en la balconada...

Prou que de cabo ta quan a las dos nos fa goyo d'ir-nos-ne con atras personas. U mesmo d'estar-nos solas. Que no ye incompatible. Disfruto a-saber-lo los ratos con las mías amistatz, masculinas y femeninas, quan ye ella, y quan no i ye. Apreciso, de cabo ta quan, que no i sía, porque tamién tenemos los nuestros problemas y circumstancias y me cal charrar-los con belún, prou que sí.

Hombres que queretz estar-tos tot lo tiempo con los vuestros amigotz fendo bieras y veyendo lo futbol sin que denguna tos faiga estorbo: he trobau la solución. Deixatz a las vuestras novias, parientas, contrarias, mullers, esposas, chorbas, chochos... Deixatz-las ya y no habretz de patir todas ixas incomodidatz que fican en la vuestra vida cutiana. Podretz estar-tos tot lo día minchando chuletons y chugando a la Play u veyendo lo futbol en coritatis. Talment sisquiá haigatz de seguir todas ixas indicacions absurdas sobre la vuestra hichiene. Ye tant facil como ixo: deixatz a las vuestras novias. En istos tiempos y en istas latitutz, a dengún  se le obliga a casar-se u a convivir con dengún. Lo fetz voluntariament. No bi ha habiu suegro con escopeta apuntando-tos entre que pronunciabatz los vuestros votos. Sotz amos d'o vuestro destín. Podetz deixar a las vuestras mullers y, si no adubitz a pagar lo loguer, siempre podetz compartir casa con bell amigo. U mesmo con bells quantos. ¡Qué palacio de borinas y chuegos tos podríatz montar!

Sé que son gromas "innocents". Que pocas vegadas i hai mala intención en qui fa circular ista mena de mensaches. ¡Pero en son de penibles! Por la parte que nos toca, hombres que me leyetz, ¿hetz parau cuenta bella vegada d'o nuestro papel en ixe relato? ¿de verdat creyetz que las vuestras mullers son "mais 2.0", con las suyas fayenas socialment asignadas? ¿de verdat queretz que en sigan? ¿Sotz argüellosos d'as vuestras incapacidatz? ¿de preferir la companyía de qualsiquier a la d'a persona con qui has trigau vivir? Si ye en serio, repito: deixatz a las vuestras novias. Si no en ye, deixatz d'ixemenar mensaches que las deixan a ellas como unas gripias y a nusatros como un desucaus.

Ah, y pa forro de bota, no me fa goyo lo chuletón. A la mía parella sí, por cierto.

Chelo negro regalau. Cronicas pilaristas 2018 I

No soi guaire amigo d'os tributos, ni d'os AC/DC, pero de Black Ice (tributo a AC/DC) m'heban charrau tanto y tant bien, que lo martes de Pilars va decidir d'ir a veyer-los t'a carpa d'os Food Trucks. Antiparte, ixe dia no i heba cosa mas que fer adintro d'a mia achenda pilarista, asinas que a priori, yera un buen plan. L'ambient entre lo publico yera variau. Heavies de todas las edatz, prou que sí, pero tamién muita chent "sin pintas".

De tributos, por si nunca no hetz estau en garra evento d'ista mena, n'i hai que simplament fan la mosica d'o grupo que pertoque, y n'i hai que preban de pareixer-se-ie tamién en lo vestuache, la forma de mover-se por lo scenario u cosas asinas. Black Ice son d'os segundos. Los mosicos, mas que mas lo cantaire y lo guitarrista que feba d'Angus Young imitaban a los suyos alter egos australianos, con ixas maneras d'estar sobre las tablas tant caracteristicas. Lo vocalista mesmo se va marcar una gambadeta por dencima d'as barras animando a un publico que en primeras pareixeba una mica fredo. 

Pero entre canción y canción, se colaban falcas publicitarias mica afortunadas. Va acumular las primers fateras que va decir lo cantaire a un remedo d'una hipotetica actitut de farute de l'orichinal d'AC/DC. No los conoixco tanto como ta saber si l'orichinal ye asinas, por lo que va decidir suposar ixo. Un d'os primers "chistes" va arribar a cuenta de que l'equipo de futbol masculino de Uesca, diz que iba zaguero en la liga. "Futbol, localismo, .... bueno, rai. Cosas d'os futbolers que no adubo a entender..." me va pensar. Ya dimpués en van arribar de mas grieus.

Un d'os temas cunyaus d'istos Pilars va estar lo d'os lazos amarillos que se van colocar en Zaragoza y Fraga recordando a los presos politicos catalans en l'aniversario d'o suyo engarcholamiento, y la coincidencia d'iste feito con que belun va pintar d'amarillo un simbolo cristiano que i hai en l'Aneto. En una d'as pausas entre canción y canción, se va tractar como chent de radida intelichencia a los autors d'istos feitos, sin mica critica, prou que no, a que un anyo dimpués la democracia espanyola contine tenendo presas u obligadas a l'exilio a una serie de politicos y activistas por haber posibilitau que la chent podese opinar sobre lo suyo futuro. Un afer que poco u mica tien relación con AC/DC. Manimenos no va sentir garra parola sobre los suyos companyers de profesión Valtonyc, Pablo Hasél u Strawberry, por eixemplo.

La zaguera que va sentir, porque va marchar-ne poco dimpués, va estar la pior. Va empecipiar lo suyo innecesario speech con una critica a lo reggaeton. Ya va comentar en un post anterior, que la mayoria de criticas d'a chent enta ixa mosica, amás de fer evident que qui las fa no la conoixe mica, nos aviella anyos a embute. Soi seguro que si qui la deciba fuese naixiu d'os anyos trenta u quaranta, hese teniu la mesma actitut ent'o rock duro y los AC/DC. Lo speech remataba la suya critica a tot un chenero mosical con que "teneban unas letras que les feban muito goyo a las feminazis". I hai parolas y expresions que son sinyaleras y que nomas con decir-las contrimuestras toda una ideyolochía: Vascongadas, progremitas, l'anterior chefe de l'estau, lazi, farmafia, rechión, .... y prou que sí, feminazi. (Si queretz saber mas sobre l'orichen d'ista parola, aqui tenetz un buen video).

Ye la rematadera que lo faiga dende un chenero tant masclista como lo heavy a on que nos trobamos letras en toda la suya historia, que fan que Maluma pareixca d'o 8M. Regular que como son en anglés, y lo conoiximiento meyo d'a luenga ye tant radiu, talment no n'hesenos parau cuenta. Pero quan fas un tributo a AC/DC puet estar que haigas de leyer un poquet las suya letras, por si i hese qualcosa que no en podeses presumir guaire.

Va marchar ta casa sin que hese rematau lo concierto, comentando con las mias amigas la pena que yera que un grupo tant potent mosicalment, deixase que se malmetese un show prou bueno, por tener un cantaire tant cazurro y bocatoba. Prou que la colla tien dreito a decir lo que quiera aproveitando lo suyo microfono. Y yo a criticar los suyos mensaches baturristas y de tot gratuitos en un homenache a AC/DC.

Las mozas. Historias d'un cole de mosens XI

Un ser imachinario charró a los chefes d'o mio colechio y les dició que lo millor pa la nuestra educación yera que nos separasen d'a mitat d'a población, trigando como criterio los nuestros chenitals. Ixo, que los chueces fachas d'un estau aconfesional han decidiu que paguemos entre todas, tien conseqüencias educativas muit grieus, como que me plantase con tretze anyos sin haber puesto creixer con zagalas d'a mia edat y tener alavez un problema de relacions prou grieu con ellas, dica que me i facié.

Las mesachas nos embabiecaban a muitos de nusatros dende crietz. T'a part d'alavez sí que yeran ixos "sers misteriosos" que diz lo topico masclista. Sers que no hesen estau misteriosos si hesenos creixiu sin troixar-nos. Pero como no las tenebanos en casa, hebanos d'ir a buscar-las por la redolada.

Lo primer colechio an que nos aventuremos, como Livinsgtones preadolescents, estió lo Gascón y Marín. Un companyer de clase - no me preguntetz cómo lo aconsiguió- festellaba con una zagaleta d'ixa escuela. Con ixa enchaquia, una colla d'amigos quedabanos con los dos y marchabanos ta un callizo d'o Paseyo la Mina, an que viyebanos como se besuquiaban toda la tarde. Totz dos levaban aparato dental, y siempre febanos chanzas con las posibilidat de que las suyas ferrallas d'enganchasen y no podesen desbesar-se, habendo d'avisar a sus pais pa que venisen y los descubrisen pecando. La resta mirabanos de charrar con las mesachas, avergonyaus de tot, mirando de fer-nos con una novia, sin saber guaire bien lo que ixo yera.

Las siguients expedicions nos levoron ta Carmelitas. Astí conoixeba a una zagaleta, filla d'uns amigos de mis pais. Pasabanos por la puerta quan en saliban a viyer si escunzabanos con la que nos fese goyo. Pa quan feban fiesta d'o cole, y bella tarde que las monchas andasen espisguardadas, gosabanos de colar-nos-ie pa alparciar qué podeba haber-ie de diferent en aquell patio misterioso freqüentau nomas por zagalas. Las dificultatz pa entrar-ie, y lo feito de que me pareixeban una mica pixautas, fació que a escape chirasenos t'o tercer destin en lo nuestro viache en busca de companyía femenina.

Asinas pleguemos en lo que mas nos duró. Lo colechio publico Miraflores. Lo tenebanos bien cerqueta y lo patio suyo yera a ran d'a carrera y d'o parque. Una cleta nos separaba, pero nos apanyabanos, charrando a lo tuyo traviés, u mesmo pasando-nos los libros de textos pa que nos i sinyasen y nos metesen bella ixautada de crietas. Ya faríanos once u dotze anyos y, tot y estando encara bien patantons, las hormonas empecipiaban a alticamar-se. Ellas, ye claro, se nos ne rediban. No yeran como las de Carmelitas, pixautas y d'un cole no mixto. Yeran bien feitas a lo contacto con atros ninos. No febanos que decir fateretas propias d'ixa edat y con que nos adedicasen bella floreta, ya marchabanos de tornada ta casa a dos palmos de tierra.

Las mesachas me ubrioron, en ixos zaguers anyos de cole y en los primers d'instituto, un mundo diferent, an que las relacions entre las personas no teneban ixa pudor de masto violento marcando territorio que tanto se cautivaba en Corazonistas. Quan a la fin en conoixié y podié tener las relacions normals que habría de tener qualsiquier choven, trobé una companyía muito millor en ellas que no pas en ells. La mia cuadrilla, durant muitos anyos, yera formada muit mayoritariament por zagalas. Una opción que la educación segregada, trigada por mis pais, desfendida por la ilesia, y subvencionada encara hue por los impuestos de todas, me negó.

En marchar t'o instituto publico, s'encertó que beluna d'ixas mesachas d'o Miraflores fue con yo ta clase. Mesmo con bell par contino tenendo amistanza dimpués de tantas anyadas. No puedo evitar fer-me a riseta cada vegada que recuerdo ixos meyodiyas en lo parque, charrutiando de fateras, con miedo mesmo a acercar-nos-ie. Ni evitar pensar en tot lo diferent que hese estau la mia vida d'haber puesto relacionar-me con mesachas d'una manera normal durant los mios primers anyos d'existencia.

Passengers: romanticismos y mala sci-fi

Sabado tarde. A l'atro diya tiengo corrida de maitins y no salgo. Quedamos bellas quantas amigas y decidimos de viyer una cinta. En teneba baixada una dende feba tiempo. Goso de minchar-me qualsiquier cosa que tienga una nau espacial en o suyo argumento. Por o trailer, pareixeba una d'ixas cintas espacials que barrachan terror y sciencia ficción. Pero a sola cosa que feba miedo yera o guión. ¿Quiers perder 116 minutos d'a tuya vida? Mira-te Passengers.

Passenger no nomas ye una penible cinta en o chenero d'a sciencia ficción. Ye antimas un exercicio terrible de chustificación de l'acoso y a dominación, vendendo-nos un concepto d'amor que da ansias, y que, por desgracia, ye mas ixemenau que no nos pensamos.

Una d'as razons pa viyer a cinta ye a hipotesi que planteya, que a priori pareixeba intresant: una nau viacha dende a Tierra enta atra planeta, colonizada por a humanidat. Cal 120 anyos pa fer ixe viache, asinas que os pasachers van hibernaus. Una d'as capsulas falla y fa dispertar a un pasachero dimpués de nomas 30 anyos de viache, asinas que, en quedar-le-ne 90 mas, prencipia un relato de l'angunia de saber que va a morir solo, pasando la resta d'a vida suya en ixa nau. Dica astí, va tot alto u baixo bien.

O pasachero, interpretau por Chriss Pratt, precipia a baruquiar con una zagala que ye hibernada. Se la mira terne que terne adintro d'a suya capsula, investiga la suya vida y motivacions, y asinas asinas. A la fin, decide, "porque ell lo vale", quitar-la d'o suenio hibernant y que tienga a mesma "suerte" que ell. Ye decir, decide unilateralment que ella tamien va a morir acompanyada nomas por ell, en ixa nau que ye una garchola "de luxo".

A historia se podría interpretar, dica iste momento, como un thriller psicolochico. Un hombre normal, en estar isolau en o bell meyo d'a galaxia, se torna barrenau, y dispierta a una mesacha, que ha de mirar de fuyir d'as suyas basemias. Pero a cinta esvarra por una endrecera de tot diferent, fendo d'iste relato de terror una historia pretendidament romantica. No creigo que as cintas haigan de dar licions, ni tener lecturas morals necesariament. Pero vete-me que ista en tien, y ye bien mala. Toda la resta d'a cinta ye una apolochia d'ixe concepto de romanticismo masclista an que Chris Pratt deixa sin capacidat pa esleixir a Jennifer Lawrence (que ye lo millor d'a cinta, chunto con os FX) y condena la suya vida. Encara que o personache femenino tien un momento de venganza contra o suyo captor, dimpués se'n arrepiente y remata entendendo que ye "incapable de vivir sin ell".

Antimás d'a historia por sí mesma, toda la cinta ye plena de topicos d'ixe romanticismo rancio. Ell, un inchenier de clase baixa que suenia con fer-le una casa a la mesacha. Ella, una periodista romantica, de familia de perras, pero de vez, moderna, aventurera y esportista. Con o toque chusto d'independencia pa que siga atractiva, pero no "indomable" pa un masto como ell.

Deixando analisi sociolochicos a un costau, si ye que ixo ye posible, como pura sciencia ficción ye pesima tamién. Nomas o disenyo d'a nau y bell momento, como quan s'esmarchina o simulador de gravedat, pueden contar-se como puntos a favor. A menaza pa la supervivencia d'a tripulación no ye que un mal funcionamiento, que no s'explica en garra momento, y a solución ye un deus ex machina, feito pa que Jennifer Lawrence (que antimas vien de fer os papels de Katniss Everdeen, y Mystique) pare cuenta de que a suya vida no vale cosa sin o masto a o canto.

No esmachino una cinta, por suposar, an que Ortega Lara fese pachas con a ETA, y se'n isen de borina por Hernani, cantando Ikusi menditzaleak, con una banda sonora romanticona sonando. O sindrome d'Estocolmo esdevien en Passengers, una repolida y deseyable historia.

Lo preocupant de tot isto no ye que Hollywood contine fendo istos licotes en 2017. Leva con iste ferrete toda la vida. Lo que mas me ha preocupau en istos diyas ye que, quan recontamos l'argumento, mas d'una persona nos ha preguntau por a on viyebanos o problema, u mesmo han chustificau a lo personache masculino. Tamién nos hemos trobau con qui no fació ixa lectura d'a cinta en viyer-la. Por ixo fa tanta falta as "lunetas moradas". Por ixo nos cal estar siempre a la tisva y fer una lectura critica contina d'as historias mainstream. Somos cansas porque cal estar-ne. Porque sino, muita chent continará pensando que acosar y decidir sobre as vidas d'atras personas no nomas no ye detestable, sino que, pa forro de bota, ye romantico.

Lo molinero y o folk combativo

En gravando o programa sobre versions de Tierra de barrenaus radio, m'aturé a ascuitar con ficancia a letra de Lo molinero, una pieza clasica d'o folk, en a versión gravada por a Ronda de Gudar "Astí queda ixo". La heba ascuitada un ciento de vegadas pero, por un regular, como qui siente plever. Y prou que sin lunetas moradas.

A letra charra d'un molinero que se suposa que buque con as zagalas que i levan o trigo pa fer farina. A canta preba d'avisar-les d'iste feito y les advierte de que si fan foriquetas con o moliner dimpués os mozos d'o lugar no las "pretenderán". No sabemos, pues en a canta no lo diz, si ixas trobadas sexuals son consentidas u no pas. No sabemos d'as estrucias sexuals d'o moliner, que talment sigan un reclamo, u si as mozas d'o lugars lo fan servir como alivio sexual, en una sociedat plena de "cazurros sexuals". En qualsiquier d'os casos, toda la canta ye una descripción de l'heteropatriarcau rural (l'urbano tien atros topicos) que, estando bien pensaus, decora con una napa de picaresca, a lo "ixotas de picadillo".

Si as mozas son forzadas por lo moliner, lo que se diz en a canta (que pa forro de bota ye bien animada), ye terrible. Si no en son, as mozas d'o lugar se suposa que tienen una vida sexual prou mierdera u que, en qualsiquier caso, o feito de vivir ixa sexualidat con o moliner, las fará estar refusadas en o lugar. Jodo petaca.

Tot isto me fació pensar bell rato sobre as letras en as letras d'as cantas folkis aragonesas. Si en os libros en aragonés, poquet a poquet imos salindo d'os topicos "crabas-cosas d'antes mas- a guerra -mont", pareixe que en a mosica, cuesta de salir-se-ne. A tematica d'os grupos folkis continan estando rurals, agroganaderas y "d'as cosas d'antes mas". Con bella excepción radida, u quan charran de "temas universals", o folk ye d'as pocas menas de mosica an que no trobamos una envista "combativa".

As pocas cancions que charran de qualcosa pareixida a la liberación d'a muller, lo fan en terminos nomás sexuals u coyunturals. As mullers son libres pa Santa Agueda. U bella muller punctual ye una persona con muito caracter que se imposa, y que destaca entre una población femenina de tot sozmesa. As mullers en o folk sufren, ploran, deseyan y son deseyadas, treballan ... pero qui vive aventuras, qui fa cosas importants, qui ye un heroi siempre ye un hombre.

Pocos temas politicos, fueras de l'aria agroganadera, protagonizan a mosica d'iste chenero. No se'n fa porque a o publico no lis faria goyo, u como no se'n fa, no bi ha publico folki "combativo"? Encara que no ye a mosica que más me cuaca, puyo totz os anyos t'o PIR y t'atros festivals, que tienen toda u buena parte d'a programación d'ista coda. A mayor parte d'a programación, por muit buena que siga, ye previsible y repetitiva. Mesmo o publico somos os mesmos dende fa muito tiempo. Ya nos conoixemos todas, u muitas. Y ye un publico que sí que me lo trobo dimpués en l'activismo politico y social. Que antimás reacciona por un regular prou bien a las innovacions en a mosica, y que ye bien ubierto.

Quiero pensar que cosas tant pinchas como "Mullers" de La Chaminera, que tenié a suerte de viyer en iste zaguer PIR, no quedará en una cosa punctual, sino que va fendo tranya pa la chent que quiere fer mosica "tradicional", pero con ixa component politica que tanto trobamos a faltar muitas. U que a la que ya existe, le quiere dar la interpretación historica critica que tanto cal. A mitificación de lo rural no puet ideyalizar seguntes que comportamientos ni normalizar seguntes qué relacions de poder.

Como en tantas atras cosas, en Aragón somos muit poquetas. Ya quasi no queda chent que faiga mosica en aragonés, como luenga principal. De collas folkis, por cada dia en tenemos menos tamién. Pero cuento que de buens mosicos, de publico, de ganas, y de espacio pa innovar bi'n ha a boticiegas.

¿Ye incapable lo folk de fer lo que por un regular entendemos por "mosica combativa"? Cal que no. A mesma Ronda se'n ye salida de cabo ta quan d'ixe "paisachismo". Os Chotos, facioron aquell "No más pantanos" que tamién se fació himno. Falta nomás un paset entabant pa que una colla folki faiga letras como las de Habeas Corpus. ¿Belun se i anima?

O vecin y o mercau. Complicidat falica vol. 2

Tornaba ta casa dende o mercau, con dos bolsas cargadas a caramullo. Me trobé un vecin d'o vico y, aduyar-me no, pero limpio capaciar.

A conversa prencipió asinas:

- Que t'ha mandau a muller a mercar u qué?
- No, que he veniu yo solico
- Hombre, pero te mandará a mercar
- No, voi quan cal y prou
- Cal obedeixer-las, que sino... Tu l'obedeixerás, no?
- Hombre, pues quan tien razón sí, y quan no, pues no.
- Pues seretz tot lo dia tricolotiando-tos
- No. Charramos prou. No tenemos grans problemas, a verdat.

O capazo dimpués continó sin guaire suco. Qué tal a familia, o treballo, y tot ixo. Pero me costó esvarrar-le d'a complicidat falica, concepto que expliqué fa tiempo y que hue nomás viengo a ixamplar y eixemplificar.

De nuevas, me trobo con ixa supuesta complicidat basada nomás en os nuestros atributos chenitals. Con ixa persona no tiengo guaire en común. Nos conoixemos a traviés de unatra persona, parient suya, y nunca no hemos teniu confianza. Simplament somos vecins. Pero o "colegueo", entre "tios-tios" se da por supuesto.

No, quiesto vecin, a mia parella no gosa de mandar-me a mercar. Quan cal bella cosa en casa, belun d'os dos baixa t'o mercau y lo merca. ¿En veras cal que a tuya parella te diga quan cal mercar y qué?

Quanto a lo de obedeixer, a escuchetes se podeba sentir o canso discurso de "le obedeixco encara que no tienga razón, simplament pa que no me chile, porque ya sabes como son as tias, que chilan asinas sin mica sentiu ni razón...". Pues no, no le doi la razón porque sí. Si discrepamos, se charra, se preba de plegar en un alcuerdo, y sino bi ha manera, en una solución que sigamos as dos d'alcuedo.

Tricolotiar-nos, prou que nos tricolotiamos. ¿Más u menos que qualsiquier atra parella? Pues no lo sé. As dos somos tozolicas, asinas que talment más. Pero as dos sabemos fer venir a plego a l'atra, asinas que talment menos.

No, a nuestra parella no ye ideyal. Pero quiero creyer que ye lochica. Que prebamos de fer as cosas normalment, y no como ixa cultura "machota" nos diz que cal fer-lo. Que somos dos adultas, capables de chestionar as suyas necesidatz y deseyos individuals y tamién as comunas.

Me niego a que lo mio chenero siga representau por un cliché d'una persona incapable de viyer qué cosas faltan en a fresquera y os almarios, que obedeix acriticament, u que lo fa porque no tien argumentos con que concarar-se. Soi con a mia parella porque quiero y porque la quiero, no porque a mia supervivencia penda d'ella u por resignación.Y me fa muita pena que ixo no siga lo cutiano entre as personas d'o chenero que dicen que i perteneixco.

A tortilla de mai

O maitin d'antes heba feito una tortilla de trunfas. Con un poquet de cebolla y muito amor, que ye un ingredient que siempre cal en una buena cocina. Cocinar ye una d'as cosas que más goyo me fa de fer en o mio tiempo libre. Ye una d'ixas cosas que foi solet y que goso d'aprofitar pa sentir ixe nuevo disco que tiengo por astí ixuplidau y pa pensar en as mias cosetas. A tortilla, seguntes a tastadora oficial, me quedó de bitibomba. Como pocas en a vida. Penaba, porque yera pa vender-la, pa mirar de quitar bella perra pa una causa.

En o cartel, que vendeba a mia y muitas atras tortillas, meteba "tortilla de patatas de madre". Entiendo lo concepto, prou que sí, pa oposar-lo a "de fabrica". Pero lo contrario a "de fabrica" u a "precocinada" no ye "de mai". En tot caso ye "casera". Porque, por muito bien que cocine mi mai, no ye ella qui la ha feita. Ni ye o suyo papel en ista vida. Y si queremos cambiar os rols asignaus por l'heteropatriarcau, no podemos acumular-le a "la mai" a faina y a exclusividat en a elaboración de tortilla.

Me niego a o rol que me toca d'estar un "fillo imbecil d'o heteropatriarcau" incapable de fer-se una tortilla de trunfas, de mercar-se a suya ropa, de fer-se a maleta u de opinar sobre a belleza d'atro hombre. Me niego a la mia suposada incapacidat de fer dos cosas de vez, como contrimuestro cada vegada que cocino.

Me sorprendió a-saber-lo aquell cartel en un evento pleno de revolucionarias y revolucionarios y que dengún, incluyiu yo mesmo, no tartisenos. Si qui creyemos en o feminismo, y mesmo en l'autochestión y o DIY, continamos con istos mensaches, que no son que bella mena de heteropatriarcau banal, mal andamos.

Complicidat falica

"No ye estar masclista, ya sabes como son as mullers" me deciba ell, buscando la mia complicidat. Por o contexto, encara no sé si se referiba a irracionals, concieteras u talment tozolas. Igual me tiene. No buscaba la mia complicidat contra ixa metat d'a población por estar oprimiu por ellas. Ni sisquiá porque yo hese pasau por una situación pareixida a la que ell me yera recontando. Simplament lo feba porque os dos tenemos os mesmos chenitals y ixo se suposa que nos da unas valors y comportamientos que hemos de compartir y mesmo fer-ne argüello.
Como quasi totz os perchuicios, pa qui no'n ye feito, son de millor trobar si se fa con negros u chudeus. "No ye estar racista, pero ya sabes como son os negros". A que no te queda dubda, quieso lector masclista?

A complicidat falica ye qualcosa que, dende que prencipié a experimentar, me traye muitos problemas socials y personals. Siempre soi ixe tio raro que no se autosegrega por chenero en as fiesta d'o lugar. U que en as despedidas de soltero - fiesta que nunca no he entendiu - s'estima más una charanga y quatre bieras, que o "tradicionalismo y divertidismo capea - stripper - putas.

Pero antiparte d'eixemplos tant evidents, mesmo m'importunan más atras manifestacions d'ixe fenomeno. Creyer que me fa goyo os esportes, u que entiendo d'autos. U ixas cucadas de uello u cenyos quan pasa una mesacha beroya. Independientement de que a zagala me pareixca polida u no pas, o feito de que quiera compartir ixa opinión con a persona que tiengo a o canto, penderá d'o grau de confianza que tengamos, no pas d'os suyos atributos sexuals. No quiero que creyas, quiesto lector masclista, que por compartir chenitals tiengo la casa desordenada, u que me fan goyo los videochuegos violentos, u que tiengo una vida sexual insatisfactoria y que he de medicar a la mia parella quan se troba mal ta que podamos fer-lo. U que a imachen de dos tíos besando-se me faiga fastio y la de dos tías me meta a saber que berriondo. Cada vegada que das por supuestas todas ixas cosas, que buscas ixa complicidat falica, nomas trobarás a vergüenya de chenero que me fetz sentir tant a soben. No m'avergüenyo d'os mios chenitals u a mia sexualidat. M'avergüenyo d'a companyia de viache que a sociedat m'acumula y por ixe refuso as etiquetas y que me fiquen en ixe atro truixo, entre tantos que nos n'imposan.

O feminismo ye de mal aprender, como buena revolución que ye. Cal fer buenos esfuerzos mentals ta desaprender y reaprender tantas cosas que nos gravoron a fuego en l'esmo dende bien chiquetz. Totz ixos comportamientos que aprendemos de viyer-los terne que terne en o mundo que tenemos arredol sin aturar-nos a reflexionar-ie. Cal estar bien a la tisva y concarar-te con una sociedat que no se reconoixe masclista pero que en ye.

Pero, antiparte d'a luita por si mesma, o feminismo m'ha alportau tamién muitas solucions y satisfaccions en a mia vida cutiana. Una d'ellas, aprender a identificar, comprender y crebar ixa complicidat falica.

O soberanismo (2/2). Tierra de barrenaus radio 2x08

Una d’as cosas más dificils d’o mundo ye desaprender lo aprendiu de chiquet. Lo que te tatuan en o celebro. Ye por ixo que, por muitos poders que faigamos, ye cutiano esbarizar y trobar-te decindo bella cunyadada u, como me pasó a yo, trobar-te con un masclismo tant interiorizau que has de pensar-ie dos vegadas ta parar-ne cuenta.

Quan decidié de fer un programa sobre soberanismo, como de cutio, prencipié a fer a lista de posibles convidaus. Un, dos, tres,... dica o seiseno nombre, garra muller. Estió chusto quan pensé en ixa muller quan paré cuenta de que a resta yeran tot hombres. As mullers que yera pensando de convidar-ie valeban, prou que sí, tanto como os suyos companyers. Teneban atras trachectorias vitals y politicas y trazas diferents de viyer o soberanismo como ye natural. Por o simple feito d’estar personas diferents y tamién por sufrir en carne propia atra opresión como ye la de l’heteropatriarcau.

Caleba poder ascuitar a las aragonesas soberanistas. Pensé en bella alternativa ta fer-lo posible y a la fin me decidié por fer un programa con nomás ellas. O resultau lo hetz de chuzgar todas vusatras y vusatros. Os dos programas fan conchunto y, encara que son intresants por si mesmos, en son muito más si s’ascuitan os dos, parando cuenta antimás d’as semellanzas y as diferencias.

Talment no caldría que comentase isto. Ya claro que no caldría chustificar que en un programa de #TdBradio bi hese nomás hombres u nomás mullers. Pero como he dito bella vez, iste blog tamién ye una mena de terapia t’a suya autora. D’atra man, creigo que o proceso de creyación ye intresant y puede aduyar a que atros se planteyen porque quan piensan en tal u qual cosa, piensan nomás (u en un primer puesto) en hombres u mullers. Porque, por muit feministas que nos creigamos, continamos tenendo l’heteropatriarcau gravau en a parte más funda d’a nuestra educación y cultura.

Personalment, estió muit enriquidor, intresant y mesmo emocionant en bell inte. Un gran programa an que conté con a companyía de quatre grans luitadoras, que son construyindo ixe Aragón que tanto nos cal. Aspero que tos faiga tanto goyo como a yo.

Etiquetau

Fa ya bell anyo faciemos una trobada en Madrit de companyers d’una interpresa an que treballaba. Un d’ells prencipió a preguntar a la resta por o suyo signo d’o zodiaco. A la fin plegó lo mio turno, encara que yera prebando d’amagar-me ta escusar-me haber-le de refusar. Quan me preguntó o signo mio le respondié con un “mira manyo, no me defino ni como hombre, como ta encasillar-me en una chorrada d’ixas”. No yera una respuesta que hese pensau. Me salió de bien adintro. L’hombre se quedó enarcau de tot y, encara que insistió una segunda vegada con un “pero, quan naixiés?”, cuento que o mio luengache corporal le fació revlar.

Aquello me fació dimpués pensar sobre tot l’etiquetache que somos sometius. Ixe encerrinamiento que bi ha en trestallar-lo tot en categorías zarradas. Por un regular con foscas intencions antimás. Porque qui etiqueta, masiau a soben, lo que quiere ye que a chent de tal u qual colla no tiengan os mesmos dreitos u sigan refusaus de bella traza.

D’etiquetas en ista vida, siempre me’n ha sobrau. Nunca no he sabiu guaire bien como definir-me politicament, por eixemplo. Encara que si me preguntas por qüestions en concreto te sé responder. Fa tiempo facié un test d’ixos que te va preguntando por as opinions sobre temas politicos y me situaba en un socialismo radical. “Pues muito bien”, me pensé, y continé alparceando Facebook. Siempre que me preguntan por ixo, contino sin saber definir-me como una cosa u atra. As definicions, ta otri.

As zapatistas lo tienen bien platero y levan con argüello a indefinición (1). U millor dito ixa propia definición. Dillá d’as etiquetas que les hesen levau ta una ortodoxia de mal aplicar en un territorio como lo chiapanenco, habioron de fer-se a suya propia teoria politica, alazetada en ideyas “de cuchas”, prou que sí, pero fendo un camin propio y,encara que pareixca imposible, pragmatico de vez que utopico.

En ixa tendencia mia a refusar as etiquetas, me sorprende a-saber-lo o goyo que le fa a la chent autoetiquetar-se y ficar-se aintro d’un d’ixos truixos. Y mesmo más me soprende a poca reflexión que fan antes d’etiquetar-se. Una d’as que más curiosas me pareixen y que ye sinyalera d’a nuestra sociedat ye l’etiquetache relichioso. A soben leyemos ixo de “o X % d’a población espanyola se define como catolico”. A ilesia catolica ye practicament o solo argumento que tienen ta esfender toda mena de inchusticias, privilechios y demás. Pero, como ya comenté bell diya por Twitter, caldría cambiar la pregunta. De feito, caldría fer-ne quantas, ta definir a la población como catolica u no pas. “¿Creye vusté en la transubstanciación? ¿Y en la trinidat? ¿Qué opina sobre a vericidat de l’antigo Testamento? ¿Quantos pecaus ha cometiu ista semana? ¿Quantas vegadas ha iu t’a ilesia en o zaguer mes? ¿Quantas vegadas se ha confesau? ¿Plegó virchen t’o matrimonio? ¿Creye que o Papa ye o portavoz de Dios en a tierra?” serían preguntas millor feitas y que, probablement, fesen baixar prou o porcentache de catolicas.

Lo que uno ye u no ye, siempre ye de mal definir. Si estar un hombre ye gronxiar-te con o futbol, fer-te bamba d’as conquistas sexuals con os amiguetz, ninviar toneladas de porno por WhatsApp, quedar-te en a barra entre que tanye a orquesta, ...que no conten con yo. Os mios chenitals no definirán a mia personalidat. Ixa uellada tant heteropatriarcal que s’imposa socialment d’a masculinidat fa que me trobe muito incomodo masiau a soben, u que tienga bien pocos amigos con “o”.

Cuanto a la identidat nacional, a definición tamién gosa d’estar un aria de mal etiquetar. Cuento que os espanyolistas no saben cuanto han feito por l’independentismo en asociar inevitablement a identidat espanyola a o maltracto animal, l’apolochía d’o carnivorismo, a relichión catolica, l’heteropatriarcau, a galvana, o monolingüismo y a “picaresca” como argüello,  …. y tantas atras cosas. Tot resumiu en ixa repolida frase de “Si quien a un Viva España con un Viva no responde, si es hombre no es español, y si es español no es hombre”. Pues ye claro, ni hombre, ni espanyol.

Zapatero primero y Iglesias dimpués han prebau de costruyir una identidat nacional espanyola alternativa. O primer con aquello d’o patriotismo constitucional, con muit poco exito. O segundo con bell remedo d’o patriotismo latinoamericano, que no acabar de chupir precisament. Os dos lo tienen bien dificil. Antimás de l’herencio de sieglos de construcción nacional espanyola, reforzaus por quaranta anyos de dictadura militar nacionalista y trenta y pico de nacionalismo banal no son de buen cambiar, asinas de rapiconté.

A identidat aragonesa, siempre supeditada a la espanyola, ye entendida por muita chent como una prolongación d’ista con bell rasgo propio. Concretament bella expresión floklorica, chilar una mica más, una mica de ruralismo y, sobre tot, un mayor odio a l’enemigo común que ye Catalunya. Y de cabo ta quan Euskal Herria. Creigo, u quiero creyer, que si l’independentismo aragonés bell diya trunfa, será porque habrá creyau una identidat nacional aragonesa en as antipodas d’ixe cazurrismo espanyol.

Por os chenitals mios me quereban meter una etiqueta, por o puesto an que naixié u vivo unatra, por as personas que me fan goi u tiengo sexo, as ideyas politicas mias, a mosica que ascuito, as drogas que prengo, as cosas que estudeo, as trazas de minchar,... y mesmo por a posición relativa que teneba bella estrela respecto a la Tierra fa bell sieglo. Pues no. Tot ye muito más embolicau que quatre etiquetas, y no tos feré o treballo facil.

NOTA:

(1) Copio a traducción un texto d'as zapatistas que charra sobre isto y que me pasó Arale d'aqui.
En buscando a l'otri, una y atra vegada fracasemos. A qui trobabanos u nos quereba menar u quereba que le menasenos. Bi heba qui se acercaban y lo feban con a intención de emplegar-nos, u ta mirar-se enta dezaga, siga con o recosiro antropolochico, siga con o recosiro militant.
Asinas, ta uns yeranos comunistas, t'atros trotskistas, t'atros anarquistas, t'atros maoístas, t'atros milenaristas, y astí les deixo qualque "ista" ta que metan lo que conoixcan.
Asinas estió dica la Seisena Declaración d'a Selva Lacandona, la más peligarcera y la más zapatista d'as iniciativas que hemos feito dica agora. Con a seisena a la fin hemos trobau qui se nos mira de frent y nos saluda y abraza y asinas se saluda y abraza. Con a Seisena a la fin los trobemos a vustés.

(Micro)masclismos en l'escusau

Campanya en Sant Sabastián
ta que a chent no pichase en
a carrera

Qualques feitos se chuntan ta fer-me una persona prou preocupada por a chestión d’escusaus en macroeventos como conciertos, festivals u fiestas "patronals". D’una man a mia vuixiga tien a grandaria d’un MicroMachine, chusto lo contrario que a mia afición a la biera, a bebida mas diuretica que conoixco. D’atra man, soi un “vergüenyicas”, por lo que lo de pichar en paret, rodiau de atros mozos, no me fa guaire goi. Más si, como de cutio, ixos atros mozos perteneixen a o “cunyarcato” (1) y adedican as charradas de pichader a bambiar sobre as suyas aptitutz sexuals u fateras parellanas (2).

Ya charré fa anyos sobre a ineficaz “chestión d’escusaus” d’a Feria d’a biera y en charraba d’iste y atros temas. Pero talment calga afundar-ne una mica más. Ye un tema fato? Sí, pero ta muitas de nusatras, que vivimos de festival en festival, de concierto en concierto y d’evento en evento ye más important que no pareixe. Antimás, y lo más important, a chestión d’escusaus tien dezaga un amiro de micromasclismos. U masclismos simplament. Como de cutio, ilustraré con dos anecdotas que m’han pasau iste estiu.

A primer, en un festival aragonés. A organización heba meso bell par d’escusaus “d’obra”. En yeran prou y no gosaba d’haber-ie ringleras. A o canto d’an que se feban os conciertos bi heba bien de campo, asinas que muitas personas tamién lo febanos servir de pichader. En os dos escusaus d’obra bi heba un apegallo an que saliban dos figuras antropomorfas calvas. La una pareixeba levar sayas, u talment un chersé enreligau en a cintura. L'atra portiaba balons u yera en coritatis. A cultura popular diz que un d’ixos quiere decir “personas con pene” y l’atro “personas con vachina”. Como ye normal, todas as personas febanos una ringlera y seguntes uno u l’atro se iba quedando vuedo dentrabanos en ixe. No nos preocupaba os chenitals de cadagún ni si portiabanos sayas u chersés en a cintura. Pero be-te-me que en bell inte, una persona con pene se creyó con dreito a blincar-se toda la ringlera de personas con vachina que bi heba alavez, ta dentrar en o que teneba o pegallo que creyeba que le pertocaba. As mullers (por fer servir terminos más comuns, que sino me canso), en un primer inte, lo ninvioron ta dezaga. En primeras, ell acochó lo tozuelo y reculó, fendo bella "grometa", pero a escuchetes. No sabemos encara de do, apareixió una mesacha chilando y fendo aparatos esfendendo l’hipotetico dreito d’ixe mozo a dentrar primer en l’escusau “porque le pertocaba” y clamando “ridiculas” a la resta. A la fin no plegoron a foter-se lapos, pero estioron bien amanadas a fer-lo. Cal decir que o mozo(3), en viyer a la moza que lo “esfendeba” se “creixió” y prencipió a reivindicar ixe hipotetico debantdito dreito. 

En iste caso, a organización yera correcta. Prou que o problema no lo heba creyau ella. No bi heba, de feito, garra problema, dica que dos personas, con diferents chenitals, pero todas dos masclistas, pensoron que por tener una u atra cosa entre as garras puetz entrar antes u dimpués ta un escusau.

A segunda, estió en Sant Sabastián (Donostia), fa bell diya. Como ya ye quasi un costumbre i fuemos t’a Semana Gran. Bi ha una plaza prou ubierta an que programan conciertos. Os escusaus, dica l’anyo pasau, yeran d’obra y bi’n heba prous. Con tot y con ixo, l’afluyencia yera masiva, y muita chent pichaba en a carrera por no asperar. Gosaba d’haber-ie escusaus “trancaus”, con puertas y tot ixo, y atra mena d’escusaus, d’istos que no son que una paret de metal por an que baixa augua, y a que trigan a mayoría de personas con pene. Estianyo, no sé porqué razón, se cambió ixa chestión, alto u baixo acertada, por un autobús prou pincho, pero infinitament más inutil. Teneba dos cambras. Una “ta hombres” con tres escusaus con puerta y cinco de piet, y atra “ta mullers” que cuento que no sería guaire más gran. Como yera d’asperar, a ringlera d’as mullers se prolargaba y cada viache ta l’escusau yera un buen rato d’aguardar. Manimenos cada vegada que dentraba en l’escusau d’hombres, me trobaba con bell puesto vuedo. Arale, en que viyó que caleba fer ringlera, me preguntó por si bi heba guaire chent y le’n conté. Prou que, como ye lochico, bi dentró y pichó. En salir, lo comentó con as zagalas que yeran fendo ringlera. Cada vegada que bi iba, heba de fer lo mesmo. As respuestas estioron bien variadas. En dentrar as zagalas en l’escusau de zagals, bell estripatorruecos se’n queixó, encara que bell par d’os que i yeranos esfendiemos o dreito d’a moza a entrar t’an que querese y le convidemos a animar a atras zagalas a fer nomás una ringlera ta entrar en l’autobús. L’escusau a escape se dividiba entre albarcudos “cunyaus” y lo que lo menos yo considero que habría d’estar normal. Tanimientres a ringlera se dividiba tamién entre as que feban servir qualsiquier escusau y as que nomás dentraban an que o pegallo les deixaba. 

Puerta d'un escusau en o Viñarock
de 2014, festival an que no bi ha
garra monyaca en as puertas

Pero lo que me deixó sin sangre en a pocha, estió a respuesta que le dioron a Arale en un d’istos convites a desobedeixer a lo pegallo. Ella simplament les yera decindo que “en l’escusau de tíos no bi ha ringlera, a metat d’os escusaus son vuedos y no son guaire puercos ya que los que tienen puerta quasi ni los fan servir”. “No tos cal aguardar y quedar-tos sin viyer o concierto” - adhibiba. Una d’as chicas que yeran asperando-ie, le respondió “yo m’estimo más de cumplir as normas”.

Unas normas que te dicen an puetz pichar u no pas seguntes os chenitals que tiengas. Que dengún no fa cumplir. Que no t’arrisgas sisquiá a que te pille a policia. Yera obedeixendo una norma dictada por un confuso apegallo en una puerta. Una norma que nomás les importa que cumplas a estripatorruecos a qui, probablement, les flore que crebes qualsiquier norma que te faiga (más) libre.

Bien se vale que, en l'atro costau, bi yeran un trapacil de mozas que, malas que Arale crebó ixa norma, decidioron de crebar-la tamién. A zaguer vegada que visité l'escusau "d'hombres" ya yera rebutient de mesachas.

Todas dos situacions se continan dando en un 2015 an que me pensaba de más choven que todas istas cosas ya habrían cambiau. Ta quan se cambiará la chestión d’escusaus en istos macroeventos? De verdat cal sacar totz os pegallos d’as puertas? Yo, tos convido a todas y totz a tapar-los de traza que dengún no pueda endevinar qui va t’a on. Que o pegallo que mande siga un de convivencia, respeto, empatía y igualdat. Que haigan de dar razons a porqué uns pueden pichar en dos minutos y a atras les cal aguardar-ne vinte.

Quiero pensar que sí que se van cambiando istas actitutz, encara que bien a moniquet. De man de todas as personas, tiengan os chenitals que tiengan. Más en seguntes que ambients. Pero encara queda muito camín a fer. O “cunyarcato” no deixará que replanteyemos os privilechios que les da controlar os pegallos d’os escusaus. Caldrá continar luitando. Prou que isto no ye lo más important, pero si queremos ocupar totz os espacios no podemos deixar-nos-ne garra.

NOTAS:

(1) Cunyarcato: Se diz de o conchunto de "cunyaus". "Cunyau": Se diz d'a persona capable de opinar de tot, d'estar o más gran saputo de totz os temas, siempre a pur de topicos, y a sapiencia popular que da a "universidat d'a vida". Qui, antimás, fa d'a suya parola dogma, "lo de toda la vida", "lo normal"... Alto u baixo. O termen de cunyarcato no ye mío, que les ne sintié por primer vegada a las mesachas de Mullers y Cordials y les ne copio.

(2) En o festival que'n charro, una d'as sanseladas de que bambiaba uno yera de fer un pichau bien largo. "Yo no entiendo ista chent que vien ta l'escusau a pichar un "chupito". hehehe gronf gronf", deciba entre que se zarraba os balons.

(3) A l’altro diya nos enteremos de que iste mozo ye, ta forro de bota, un exemplar d’a especie “gilipollas d’acampada”, uns infrasers que tendrán o suyo propio post en que tienga un rato.

No me demandetz que sía queda. De Faktoria Lila

Imachen amprada de
Faktoria Lila

No me cal fer garra comentario a iste sobrebuen articlo de Faktoria Lila que me pasoron. Charra solet

No me demandetz que sía queda
(Publicau orichinalment en castellano en Faktoria Lila)

Porque antesdahiere, tres d'os vuestros asesinoron a las mullers que deciban que quereban, y dos más preboron de fer-lo. Porque me fa miedo de cumplir as estadisticas de violacions y agresions. Porque cobro menos que no vusatros por fer a mesma faina. Porque cudio de valdes a os fillos vuestros, cocino de valdes a vuestra virolla, escosco de valdes l'escusau a on que cagatz y tos cudio de valdes quan sotz malaudos. Porque he aprendiu a no tartir quan charratz, a qüestionar-me quan me qüestionatz, a que ganetz quan decitz a parola más altera.

Porque vusatros no sabetz lo que ye que te faiga miedo d'andar - simplament - por a carrera. Porque no sabetz lo que son as uelladas que te fan fastio dica tener ansias. Porque no entendetz lo que ye sentir o cuerpo incomodo, os uellos pegallosos, dica ulorar as babas, nomás por caminar, vestir, fer una gambada, treballar, - simplament - estar en o cuerpo nuestro.

Porque vusatros no hetz de recatiar o condón. Porque vusatros no sabetz lo que ye que no s'ascuite o tuyo no. Porque vusatros no entendetz que insistir u exichir en o sexo, se pareixe muito a una violación. Proque a vusatros, o nuestro miedo, tos pareixe victimismo, histeria, loqueria, chantache, como minimo, una exacheración. Porque los que no fetz mica d'isto, bellas vegadas lo fetz, pero no queretz creyer-lo. Porque beluns ni lo fetz ni itz a fer-lo, pero no tenetz a valor, a solidaridat - os uegos - de reconoixer y sinyalar a qui lo fan a lo vuestro arredol, de desmarcar-tos d'ells, de sentir vergüenya de chenero.

Porque no podetz negar-me que lo que digo ye cierto. Que a las mullers nos violan, nos matan, nos pagan menos. Que cudiamos más, que sacrificamos más, que tenemos razons ta que nos faigatz miedo.

No podetz reconoixer-me tot ixo, y demandar-me que siga queda. Que no chile, que no m'encarranye, que lo la "faiga", que no m'esfienda, por lo menos.

No podetz decir-me que a metat d'a chent puet estar una menaza y demandar-me que dimpues contine queda. Cambiatz, protestatz, rebelatz-tos contra qui nos oprimen dende o vuestro chenero.

Y dimpués, si queretz, charramos d'os mios niervols.

A floreta. Por Amparo Rubiales

Sin ixublidar tot lo que hemos enantau, a o feminismo le queda muita luita por debant dica que se considere humanas a las mullers, como deciba o lema. Iste articlo me fació firme goyo en tractar un tema muito asumiu como normal por a mayoría de personas (muito más en os hombre, prou que sí) y en haber resumiu en muitas pocas parolas y de trazas muito plateras as argumentacions contra as floretas (piropos en castellano). L'articlo orichinal, de Amparo Rubiales estió publicau en a versión en castellano de Huffington Post dimpués d'unas declaracions d'a presidenta de l'Observatorio contra la Violencia de Chenero d'o Consello Cheneral d'o Poder Chudicial, Ángeles Carmina en contra d'as floretas.

Encara soi sin sangre en a pocha por l'estrapalucio que se fació a causa d'as declaracions d'a presidenta de l'Observatorio contra la Violencia de Chenero d'o Consello Cheneral d'o Poder Chudicial, Ángeles Carmina, que i expresó que a floreta ye "una invasión a la intimidat d'a muller", por lo que esfendió a importancia de eliminar-lo, encara que siga afalagador. Quasi totz os articulistas y comentaristas masculins d'iste país han feito as suyas graciosas apostillas cuanto a ello, que contrimuestran, atra vegada más, que isto d'o masclismo d'a sociedat ye más perén que no queresenos creyer. T'os millors, ye nomás unatro exceso más d'isto d'a igualdat de chenero que tanto les cuesta d'asumir, lo que contrumuestra lo luen que somos de conseguir que hombres y mullers podamos estar lo que somos: diversos, pero iguals.

S'han dito muitas cosas como conseqüencia d'istas declaracions: que a floreta ye polida, un enradigau costumbre de sieglos, que traviesa todas as culturas y civilizacions, encara que nusatros (os espanyols) creigamos que ye qualcosa "muito nuestra".Lo que dengún no diz ye qui decide ixo de que ye poliu, ni destacan que ye siempre un hombre qui le'n diz a una muller, en publico y de traza anonima, sin que bi haiga relación d'afectividat y sin que dengún no le'n demande. A muller no demanda opinión sobre o suyo cuerpo y, alavez, no son lechitimarus ta dar-la. Que os hombres, en estar hombres, tiengan un dreito historico a fer floretas a las muller ye, ciertament, una fatera masclista más d'as muitas que somos feitas por a sociedat en que vivimos, porque son as reglas d'o sistema patriarcal, y crebar con os suyos costumbres, grans y chicotz, les cuesta a las mullers fer un gran poder, antimás d'haber d'estar obchecto d'as suyas moflas. No ye que una antiga construcción d'a identidat de l'hombre a costa d'as mullers, consideradas obchecto d'a suya pertenencia. Atro estereotipo más. Antesmas tamién se deciba ixo de "o mio mariu me fote lo normal"; hue talment no se diga, pero lo continan fendo.

¿Que ye agradable que te faiga floretas? Sin dubda, pero en privau y con mutuo consentimiento. Nos fa goyo a floreta, prou que sí, pero no pas en publico ni anonimament, que ye lo que censuramos, porque antimás, en a más gran parte d'os casos, son expresions fierizas y que enristen contra la intimidat, que ye lo que denuncia a presidenta de l'Observatorio contra a violencia de Chenero. Y no tien mica a viyer con a maravillosa poesía amorosa ni con os madrigals de Gutiérrez de Cetina ni con tantas cosas repolidas que s'han escrito y dito sobre as mullers, que no, que se tracta d'atra cosa, d'o masclismo que, en o millor d'os casos, no quieren parar cuento de lo muito que encara tira entabant.

Os mastos d'iste país han feito servir toda la suya artillería moflona contra ista persona, como la ferán servir con yo y con as que antes han escrito tamién sobre a floreta, porque sostenemos, sí, que ye una mena más d'o masclismo social que vivimos. Han plegau a la rematadera, no nomás de continar fendo-se a mofla d'o feminismo y d'as feministas, sino, mesmo, de l'aspecto fisico d'a propia autora d'a reflexión, muito propicio, seguntes ells t'a floreta, "por a suya vistera presencia fisica", que la invalidaba ta decir cosa en contra d'o mesmo. Increyible, pero cierto.

L'ambito d'as mullers estió, por decisión d'os hombres, o privau y, precisament por ixo, o mundo nuestro ye un mundo de sentimientos; as mullers femos muitas más floretas que no los hombres, que tienen pior exteriorizar os sentimientos; lo femos con mullers, con menors y con os propios hombres, pero siempre en privau. Os hombres no se fan floretas entre ells, ni lo polius que son ni cosas d'ixas tant polidas que nos decimos as mullers. No somos en contra d'ixo, de revés, les animamos a que sigan más expresivos. Repito, d'o que somo en contra ye d'a floreta en publico y anonima. Ixe ye, chustament, o que consideramos atra mena d'agresión verbal que no queremos. ¿Queda platera a esferencia?

Ta rematar, anyadiré que no ye qualcosa que nomás ocurra en Espanya; pasa en tot lo mundo, y as mullers de totz os paises lo denuncian con más rasmia que no nusatras. Sé que soi cheneralizando y que a gran mayoria d'os hombres no fan floretas en publico ni de trazas anonimas a las mullers, pero muitos esfienden ixe costumbre porque piensan que ye un dreito adquiriu que no quieren que les furten. A beluns les fa espanto que, de continar asinas, acabemos estando realment iguals.