Stqarrijiet ta’ Ewropew Malti (silta) - Alfred Sant / Kevin Saliba (trad)

Fl-Istitut fejn kont immur kull filgħodu għal-lezzjoni tal-Franċiż sibt messaġġ mill-uffiċċju tal-istages jitlobni mmur inkellimhom minnufih. Ilmara inkarigata għarrfitni b’appartament ta’ kamra waħda u tagħtni lindirizz. Ma kienx ’il bogħod mill-Istitut d’Administration Publique. Tlaqt mal-ħaġra t-tajn naqbad il-metro lejn l-indirizz li tagħtni f’Rue des Carmes, fil-qalba tal-kwartier Latin. Laqagħni anzjan għadu jidher f’saħħtu, b’ras xuxa bajda u bi Franċiż bizzarr. Wara sirt naf li kien mill-Belorussja. Urieni l-appartament żgħir iżda mgħammar li kien sar disponibbli fl-ewwel sular. Kien kamra ta’ daqs medju. Kellu tieqa kbira tagħti fuq bitħa interna, parkett griż f’kundizzjoni tajba, sodda bil-kutri, mejda u żewġ siġġijiet. Filġenb kellu fuklar ċkejken tal-gass bħal dawk li jużaw fis-siti tal-kampeġġi. F’alkova fuq il-lemin int u dieħel kien hemm doċċa, sink u loki. Il-post kien ideali għal dak li ridt iżda l-kera kienet mill-għalja. B’danakollu ddeċidejt li kien vallapena. U hemm kont... mill-għada stess azzettat f’Rues des Carmes, għaxar minuti mixi ħafif mill-Istitut fi blokk bini msejjaħ Studios Queney. Għadu magħruf hekk sal-lum. Minn naħa minnhom, it-tmiem ta’ Rues des Carmes jinsab f’tisliba mal-Boulevard Saint Germain. Fi tmiem in-naħa l-oħra ssibek miexi qrib il-Pantheon, fejn jindifnu l-persunaġġi Franċiżi f’ġieħ listatura erojka tagħhom. Il-kwartier Latin jinqasam f’erba’ partijiet mhux daqstant indaqs millBoulevard Saint Michelle li jibqa’ nieżel sax-xmara Seine u b’mod “perpendikulari” miegħu mill-Boulevard Saint Germain, li jibqa’ għaddej b’mod parallel max-xmara. B’dik it-taħlita ta’ kafes, ristoranti, ħwienet talkotba, ċinemas żgħar imsejħa “d’art et d’essai,” lukandi, residenzi talistudenti u b’dak l-għadd ġmielu ta’ fakultajiet Universitarji u kulleġġi, kien inevitabbli li bdejt nqisu bħala l-arrondissement “tiegħi.” Il-bulvarijiet u ttoroq dojoq, li jinżlu mill-Odeon u mis-Sorbonne lejn moll ix-xmara li jħares fuq il-Katidral Notre Dame, fil-biċċa l-kbira kienu jkunu maħnuqa bil-ħsejjes tan-nies u tal-karozzi. Il-bankini kienu jkunu mimlijin b’nies jippassiġġaw – minn żgħażagħ sa turisti u ħaddiema immigranti, bi mwejjed tal-kafè u gabarrejiet juru kotba u vinils sekondaman għall-bejgħ. Dawl il-jum u l-pass tal-ġemgħat tan-nies ikkargaw qatigħ tul ftit ġimgħat ta’ temp ta’ ħarifa mill-isbaħ. Xi ħadd qalli li t-toroq bit-tarmakk ġdid sa ftit xhur qabel kienu ċċangati. Matul l-irvellijiet ta’ Mejju l-folol qalgħu ċċangaturi u xeħtuhom lejn il-pulizija. Meta mbagħad qagħad it-trab lawtoritajiet qatgħuha li jkun jaqbel ma jerġgħux ipoġġu ċ-ċangaturi... Fis-sew il-memorja ta’ dak li kien ġara kienet għadha friska, għalkemm xi ħadd għadu ġej bħali ried iż-żmien biex jaqbad is-sinifikat tax-xarabanks suwed daqsiex tal-pulizija pparkjati qrib salib it-toroq bejn Saint Michel u Saint Germain. Fihom kien ikun hemm il-pulizija, il-mistmerra CRS, jissajjaw bil-paċenzja kollha ħalli jilqgħu minn qabel kull inkwiet. Ilkwartier Latin (magħruf ukoll bħala s-sitt arrondissement) kien fil-qalba tarrewwixta ta’ Mejju. Xi minn daqqiet kienet tiġri xnieha li tkun qiegħda tinħema xi dimostrazzjoni u l-pulizija kienu jinżlu mix-xarabanks u jistazzjonaw ruħhom għall-azzjoni f’fillieri marsusin f’salib it-toroq. Xhur wara l-iżjed alert qawwi qam meta tħejjew xi dimostrazzjonijiet għaż-żjara f’Pariġi ta’ Richard Nixon, li kien għadu kif inħatar President tal-Istati Uniti. Xorta waħda, akkont, kollox baqa’ kwiet matul iż-żmien li kont hemmhekk.