CHHINLUNG

CHHINLUNG - MIZO PI PUTE LO CHHUAHNA
C. Lalaudinga
MUP, Ramhlun Venglai Branch
Chhinlung hi eng nge ni?

Mizo pipute chuan Chhinlung hi pûk pakhat, chuta ṭang chuan mihring hi
lo chhuakin, an chhuah tam tâk hnû chuan Ralte-ho hi an lo chhuak a, an
bengchheng ta êm êm a, kawngkhâr vêngtu chuan an tam tawh e, tiin lung
kawngkhâr chu a khâr ta a, a chhuak hman zawng te kha ni ta angin an sawi mai
ṭhin a ni. Mizo hnam pêng hrang hrangte hian an lo chhuahna chu Chhinlung
emaw Sinlung emaw tiin kan sawi deuh vek mai.
A hming kan sawi dân erawh chu tlêm tlêmin a dang hret hret a. Lusei
Duhlian chuan, Chhinlung an ti a. Hmar chuan Sinlung an ti a. Chawhtein
Khurpi, Komin Khur, Aimolin Khul, Lamkangin Khul, Zomiin Khul, Chiruin
Khur, Thahdo Kuki-in Khul an ti a.
Chhinlung chu khawiah nge a awma an hriat leh an rin?
Mizo pi pute chuan Chhinlung hi China ram laili vêl emaw China ram
chhim lam Yunnan leh Sichuan Province tlângram vêlah hian awmin an ring
deuh ber. Sawi dân dang dang a tam mai. Mizo History ziaktu hmasa pawl
Pastor Vanchhunga chuan Mandalaya kâwl mi sawmli lai a kawmte leh
Homelin-a kâwl leh vai a kawmte sawi dân chuan, “China lal fapa Chhinlunga
hian a ṭhuihhruai mi engemaw zât nên China ram chhim lamah lo chhuakin
Augpataung tlângah khua an din a, an Lal hming châwiin chu khua chu
Chhinlung khua tih a ni. An Lal a lo thih hnû chuan amah anga hruaitu tling leh
mi huikhâwm thei an awm ta lo va, chuti chuan, kan lo darh zo ta a ni,” tiin a
ziak a. Augpataung chu Duhlian Lusei ṭawng chuan Awksatlang kan tih: Run
leh Kabaw-kale phai inkâra tlâng hi a ni.
Chhinlung aṭang chuan hnam bing tê tê-a an darh hnû chuan Paite sam
phiarho chuan Thantlang (Âwksatlang) run lui chhak an lo thleng a. Saizang
khaw mawng Chinhnuai hmunah awmhmun an khuar a, chu hmunah chuan
Chinhnuai pûk a awm a, anmahni chuan Chinhnuai chhuak an inti a. Tin, a
kiang lawkah Geltui a awm bawk a, Paite hnam ṭhenkhat chuan an chhuahnaah
an ngai bawk. Chuti chuan, Paite zawng zawng chuan an chhuahna chu
Chinhnuai leh Geltui an ti a, an sakhaw thiam hlaah pawh an chham tel zêl a ni.
Tin, Pawih chhip leh hma lama sam zial zawng zawngte chuan Thantlang
lâwn liamin Run lui an kân a, Falam kal pêlin Lailun pûk vêlah awmhmun an
khuar a, an lo chhuahna chu Lailun pûk an ti mai a. A lo rei a, Lailun chhuan an
ti a, anmahni pawh Laimi an inti ṭhin. An sakhaw thiam hlaah pawh Lailun pûk
chu an chham tel zêl ṭhin.
Duhlian Lusei-hote chuan Âwksatlang aṭanga Chhinlung an kal hnû

chuan, ni tlâkna lam Run lui kal kaiin Sumpuiah hmun an khuar a, chumi hnuah
Dailungah, Dailung aṭang chuan a kiang lawk Sipuiah awmhmun an khuar ta a
ni. Tichuan, tukhum lama sam zial Duhlian Lusei-ho chuan Seipui hi an
khawpui hlun chu a ni ta a. A kiang lawka Muchhip tlâng chu an bia a, an
sakhaw thiam hlaah pawh Muchhip tlâng chu an chham tel ziah ṭhin.
Rev. Lalremliana chuan China ram Sichuan Province-a Yalong lui kamah
SINLUNG khua chu a awm a. Ni 20.3.2012 khân he khua hi a han tlawh ngei
thu leh chu khuaah chuan ni 3 lai a han châm a, chu thu chu ni 25.7.2019
(Zirtawpni)-ah Chhinlung Sympocium neihnaah a sawi. A lehkhabua map
inziakah pawh fel takin he khua hi a chuang nghe nghe a. He khuaah hian mi
4000 lai an chêng a, anmahni pawh chu Tibet hnam an ni a, Buddha sakhaw bia
an ni deuh vek bawk.
Hemi ni vêka Sympocium-ah chuan Pu Rema Chhakchhuak, Linguistic

zir, China tawng pawh thiam thawkhat tak chuan Yellow River, Yangtze,
Mekong, Salween lui hnâr vêla Tibet-ho ramah hian Tibeto Burman ṭawng
hrang hrang hmangtute chu an kim khawp mai a. Mizo ṭawng ang dâwn dâwna
ṭawng pawh an awm niin a sawi. Chhinlung hi awm pawh nise, hêng lai vêl hi a
awmna ni maiin a ring deuh ber.
Chhinlung hi ṭhenkhat chuan awm tak takin an ngai lo va, kan Mizo pi
pute thawnthu pakhat ni ve maiah an ngai bawk. Chhinlung hi pûk a ni emaw,
lal hming a ni emaw, khaw hming a ni emaw, engemaw tak hi chu awm ngei
turah ngai ila, a dik zawk ang. Heti taka kan pi leh puten an lo sawi hlawm deuh
vek mai thei hi chu rin loh tur a ni dawn em ni! Israel fate chuan mihring hmasa
ber leh an thlahtu bul chênna chu Edenah niin Bible chuan a sawi a. Mahse,
Eden awmna tak chu hei hi a ni tih an la kâwk chat thei bik lo va. Awmah an
ngai a, an ring ve chawt mai a ni. Sodom leh Gomorra khawpui, mei leh kâta
kâng ta pawh an sawi ṭhin. Mahse, vawiin ni thleng hian Sodom leh Gomorra
chu hei hi a ni tih theih pawh an la nei lo. An zinga ṭhenkhat chuan Dead Sea hi
a ni ang, te an ti vêl ve mai mai bawk. Mahse, awm ngei chuan an ring tho si.
Japan-hote chuan an lo chhuahna chu Ni aṭangin a ni, an ti a, an ring ve tawp
mai a ni. Keini Mizo hnahthlâk zawng zawngte pawh hian kan lo chhuahna chu
Chhinlung aṭangin kan ti deuh vek mai a, rinhlelh tûr a ni bik dâwn em ni ang?
Chhinlung chu pûk a ni, han tih hian Lungpûk mi pahnih thum tawm
theihna lek kan ngaihtuah mai thei a. Chutiang lek a ni lo vang tih pawh ring ila.
Vawi khat chu kum 2015 December 12 khan Tour-a Malaysia kan kal ṭumin, an
khawpui Kuala Lumpur daia ‘Batu Cave’ pûk kan tlawh a. He pûk hi chhâwng
hnih a ni a, a lo lian ve ve hle a, mi za têl tehmeuh an leng ve ve ang. A
chhûngah chuan vai sakhaw puithiamte chuan an pathian lem an lo zuar a,
dawrtute pawh an awm. Chumi hnû chuan Tlângpang pûk beh chhana khawpui
Hotel Genting Highland Resort kan fang Ieh a. He hotel-ah hian dawr chi hrang
hrang, intihhlimna, lehkhadena inkhelhna a awm a, a chhûnga thil awm hi sawi
sên pawh a ni lo. Mi tam tak an riak a. Zan khatah mi 70000 lai an riak thei.
Chu tlangpang puk behchhana Hotel ropui tak mai chu suangtuah phâk loh
khawpa mak leh ropui zu ni a.
Mizote hi Mongolian thlah zinga mi kan ni tih a ni. China ram vêla kan
awm lai chuan Lal Chhinlunga pawh lo awm se, a mak lo va. Tin, China kulh
ropui sak laia an lo chhawr rei theih zinga mi pawh kan pi leh pute kha lo ni
pawh nise a mak lo. Tin, hnam tin hian mâwl lai leh harsat lai neiin, khâm pûk
leh thingzâr thlâr bêl a, ramhnuaia Kamrah rin lai pawh neih a ni thei bawk. Red
Indian America mite pawh kum 1500 hma lamah kha chuan Thingbul, khâmpui
leh chhâwl bûkah theirah leh ramsa ringin kawr leh silhfên pawh an nei
hleinêm!
A chunga mi ang bawk hian hêng China ram Sichuan leh Yunnan
Province tlângramah te hian khâmpûk/pûk chu a tam mai an ti a. A nih loh
pawhin Mekong Ieh Salween lui hnar Tibet ram vêlah hian Chhinlung hi a awm
ngei turah ngai ila. Tin, Rev. Lalremliana’n Yalong luikama Chhinlung/Sinlung
khua leh a chhehvêl hi Mizo pi pute lo chhuah thlâkna Sinlung chu ti mai ila a
ṭha.
Kan Mizo hnahthlâk zawng zawngte chuan Chhinlung/Sinlung chu pûk,

khur an ti vek a, kan pi pute chu chhuahna thuhmun, chhul khat kual, thlah khat,
tual tlânza leh unau laichîn-a min phuarkhâwmtu a ni. Chuvangin, a awm ngei
ang tih hi rin tawp mai hi a finthlâk ber ang. Chutichuan, Chhinlung chu kan
Mizote lo chhuahna a ni ngei a nih chu.

CHHINLUNG

Uploaded by

Copyright:

Available Formats

CHHINLUNG

Uploaded by

Document Information

Copyright

Available Formats

Share this document

Share or Embed Document

Sharing Options

Did you find this document useful?

Is this content inappropriate?

Copyright:

Available Formats

CHHINLUNG

Uploaded by

Copyright:

Available Formats

CHHINLUNG - MIZO PI PUTE LO CHHUAHNA

Chhinlung hi eng nge ni?

Chhinlung chu khawiah nge a awma an hriat leh an rin?

Duhlian Lusei-hote chuan Âwksatlang aṭanga Chhinlung an kal hnû

Hemi ni vêka Sympocium-ah chuan Pu Rema Chhakchhuak, Linguistic

Kan Mizo hnahthlâk zawng zawngte chuan Chhinlung/Sinlung chu pûk,

You might also like