An·ching Maina Isolo Bebera·na Man·a

Isolo bebera·gijagipa mande saksako, Isol dongbebeama ine chanchiman·arang basakobade dongahama
ine Jim sing·aha.

"Oe," ine Isolo bebera·gijagipa mande aganchakaha, aro iana

Jim aiao inmanpilaha.

Isolo bebera·gijagipa mande indine aganangkuaha, "Adita

bilsirang re·angaha, chingni dejakrani atchiao, ua bakgitchakko
nie romitingo anga Isolo bebera·na gitik gitik dakmanpilaha.
Bi·sako tuatramo Doanko nie romitingo, uni jaksirangko
moatmitingo uko nie roanian Isol donga ine angko
bebera·atnasiahachim."

1. JEKON DAKAHACHIM, UKO DAKGIPA MANDE DONGA

Mandeko dakgipa saoba donga ine an·ching u·ina man·a aro

u·ina nanga. Gisik a·ning bitgiparang indake agana je, mandeni taningo hajalni hajal nikgimin
bimangrangko mikosto ka·e dongimin donga, taningchi kam ka·e manderang neng·nikanirangko namatna
man·a, maia nama aro maia namja uko u·ia, aro taningchin chanchie mande sakantian an·tangtangko
nambatatna skani donga. Taningan be·en gimikko sason ka·ani ja·pangba ong·a.

Computer rangba bijolini bilchi kam ka·a, indiba computer koba mandeni taningni u·ianichisa bikota aro
kam ka·ata.

Unigimin gitko segipa mandeni bimangni aro uko Ong·atgipani gimin indine agana:
"Anga nang·ko mitelgen; maina angko dildil ong·gni aro aiao inmanani dakaha; Nang·ni kamrang
aiao inmanani ong·a aro uko angni gisik namedake u·ia." - Git 139:14.

Isolni kamko nina gita an·ching chel·bee re·angna nangja. Bring bitchip dakgipa
mandeni taning aro gipin be·enni bakrangan Isolni kamko mesoka aro Uko
changgipa tarigipa ong·a ine mesoka. Mandeni jedakgipa pump ka·ani kolko tariani
baksaba mandeni ka·tongko tosusana man·ja. Mamung computerni kamkoba
mandeni taningni kam baksa tosusana man·ja. Mamung televisionni kamba mandeni
ku·rang ba mikron baksa tosusana amani ong·ja. Mamung air condition ba ding·atani
kolrangan mandeni gingting, ka·sop aro bigilrang baksa tosusana amani ong·ja.
Indake mandeni bimangni bring bitchip dake kam ka·ania mandeko saoba dakaha
ine mesokani ong·a, aro uko dakgipa saobara Isolan ong·a.

Mandeni bimangara chu·gimik be·eno kam ka·giparangni nangrime ka·ani ong·a -

pilakan mingsa minggipin baksa nangchapchapa. Ka·soprang, aro ka·tong, an·chi
ja·dilrang aro masilrang pilakan ge·sa ge·gipino pangchakgrike aiao inmanpile kam
ka·a.

Na·a paisa bisilko ge·chikung ra·e uarangko ge·prako 1 aro ge·gipino 2 ine sulsul 10
ona setoke jepo chippilode, jeponiko nigija knoke 1 oni 10 ona segiminko sulsul
bikotpilna man·genma? Chang million chikkung koltaitaioba changsamangba sulsul
dake bikotpilna man·na ka·dongani dongja.

Da·ode ok, taning, ka·tong, an·chi ja·dil, nachil, mikron, wagam, uarang gimikni apsan
somoio kam ka·rimani gimin chanchiate nibo.
Mandeni be·enni name kam ka·na man·anini gimin nang·o mai talatani dongen?

"Aro Iso inaha, 'An·ching an·chingni jagring gita aro an·ching gita mandeko dakgen'…..Aro Isol
An·tangni jagring gita mandeko ong·ataha, me·asa aro me·chik dake uamangko ong·ataha." -
A·bachenga 1:26, 27.

Skanggipa mande skatangtang ong·banade man·jaha. Isol uamangko An·tangni bimang gita ong·ataha
ine Sastroo agana. Ua an·chingni gimin chanchie an·chingko tariaha.

2. JEKON DAKAHACHIM, UKO DAKGIPA DONGA

Isolni ong·atani kamara mandeosan bon·aija; salgisak gimikchinan Uni kam sokanga. Bijolini teng·aniko
gualbo, aro salgichi teng·aniko niatskabo. Matma Ja·kol ine an·chingni minggipara (Milky Way), millionni
million askirangni dol ong·a aro aski rongprakan an·chingni sal gita dal·dala. Agansrangode an·chingni
salba ua aski jinmaoni rongsasa ong·paaia. Ia Matma Ja·kol gita dakgipa aski jinma dam billion
ritchasana baten bangbango dongangkuenga ine telescope chi nio nikaha.
Unigimin gitko segipa indine sea:
"Salgirang Isolni rasongko aganpraka, aro bangbangan Uni jakni kamko mesoka," - Git 19:1-3.

Mandeko aro salgiko nie an·ching maiko aganna man·gen?

"Chengon Isol salgi aro a·ako ong·ataha." - A·bachenga 1:1.

"(Isol) pilakna skang ong·a, aro Uo pilak nangrime donga." - Kolosi

1:17.

Isolni dakgiminrangan Isolko Dakgipa Rugipa ine parakani ong·a.

"Chengon Isol salgi aro a·ako" ine agangipa kattarangan janggi tanganio
an·chingni u·isokgijagiparangna aganchakaniko on·a. Pilakkon dakgipa
Isol donga. Dal·gipa gisik a·ning bitgiparangan da·alo Isolo bebera·aha. Dr.
Arthur Compton, Nobel boksisko man·gipa, gisik a·ning bitgipa, Sastroo
Isolni a·gilsakko dakaniko seani gimin indine agana:

"Anga an·tangde a·gilsakko aro mandeko Dakgipa Rugipa donganiko

ma·siahaon angni bebera·aniba a·bachengbaaha. Ia bebera·aniko man·na
angna raka ong·ja, maina iano ma·sina altua je, jeon miksongani donga,
unon Isolni gisik seng·ani kam donga. A·gilsak salgisakni name kam ka·ani
aiao inmanani kaman - Chengon Isol salgi aro a·ako ong·ataha ine
mesokani ong·a."

Isol donga ine Sastroo mesokna jotton ka·ani gri, indiba Uni donganiko ua
sakki on·a. Dr. Arthur Conklin, saksa sam bolni gimin u·igipa gisik a·ning
bitgipa changsao indine seaha: "A·gilsako janggi tangania skatangtangsa ong·baaiakon ine aganania
chapa ka·ram biapo bom gopretani giminsa dictionaryko kan·dike sena man·jaha ingipamung apsan
ong·aia."

Mamungba griaonikode mamungkoba man·na ka·dongani gri ine pilakan u·ia. An·ching bosturangko taria,
daka, indiba mamungba donggijaonikode an·ching pulko ba beng·blok mangsakoba dakatna man·ja.
An·chingni samtangtango donggiparang indine an·chingna mesokani ong·a: Isol ong·ata, Isol daka aro
Isol ripinga. Ia a·gilsak aro mande maikai ong·baaha ine sing·anina aganchakanide Isolni giminsa ine
aganchakani ong·a.

3. ISOL MANDERANG BAKSA DONGRIMNA RE·BAAHA

Askiarigipa salgirangko dakgipa, aro a·gilsakko dakgipa an·ching baksa nangrimna am·enga. Ua Mose
baksa nangrim- meliaha. "Aro jedake mande ripengtangna agana, Jihova Mose baksa mikkangchakchake
agangrikachim." (Re·ongkata 33:11). Aro Isol nang baksaba ripeng ong·e nangrim-melina skenga.
An·tangko ja·rikgiparangna Jisu indine aganaha, "Na·simang angni ripengrang ong·a." (Johan 15:14).

Manderang Isolni gimin u·ina jotton ka·ronga, maina pilak manderangan toromde dongtoka.
Matburingrangde Isolko olakkina ganchi rikja. Indiba mandekode jechiba re·angbo, uamangni Isolko
olakianikode an·ching nika. Uamang gisik ka·tong ning·ode Isol baksa nangrimna skani aro Isolni ripeng
ong·na skani donga. Isolko am·na skani dongahaode Ua dongenggenma ine jajrengani an·chingo
dongjaha.

Ritcha chi·sku sotsku bilsio Russiao millionni million skango Isolko bebera·gijagipa manderang Isolo
bebera·tokaha. Saint Petersburgni Universityni saksa professor (skigipa) indine aganaha:

"Angni sandie niani kamo angni ka·dongchakna man·anian mamungba gri. Ang baksa kam
ka·parimgiparangba ang baksa apsan dake niktokaia. Niksokgija salgirangni gimin ching sandie nioe
an·tang janggi tanganio konggranganiko tosusaate nion maiba chu·onggijaniko anga nikaha. Unon
nang·ni Sastro on·atgipako anga poraie nion angni janggi tangani konggrang dakgipara gapatako
man·aha. Angni janggina ka·dongchakaniko Sastroonikosan anga man·aiaha. Anga Jisuko angni
Jokatgipa dake ra·chakaha, aro chong·motgipa tom·tomaniko aro janggi tanganio chu·ongnikaniko anga
man·aha."

Kristian mande Isolo bebera·a, maina ka·tongni nangbataniko ua Isoloniko man·a. Kristianrangni Isol
manderangna gital janggi tanganiko, gital chanchianirangko aro gital kusiniko on·na man·a.

Isolo bebera·ahaon mamung duk ba neng·nikaoni jokginok ine Isol ku·rachakja, indiba An·tangona meli-
nangrime dongna re·bagipa sakantiko dilna aro rakkina ua ku·rachaka. Da·o millionni million Kristianrang
indine aganenga je, uamang pilak an·tangtango donga gimikkon galkugen indiba Isolkode
watgaltaijawaha.

Ian pilak aiao inmananirangnaba bata je, a·gilsakko Dakgipa Rugipa mande sakanti, me·asa ba
me·chikba ong·china pilak baksan nangrime dongna skenga. Iani
gimin Daud aiao inmane indine seaha:
"Anga nang·ni salgirangko, nang·ni jaksirangni kamrangko,
nang·ni tik donsogimin jajong aro askirangko chanchie nioa;
mandea mai, na·a uko gisik ra·ara? Aro mandeni depantea mai,
na·a uko nirokara.?" - Gitrang 8:3,4.

An·chingko Dakgipa Rugipade an·ching sakantinan simsaka. Na·a

aro angasan Uni dakgiminde ingipa gita Ua an·chingna simsaka.

Unigimin an·ching Isolo bebera·na man·a: (1) Maina Ua an·chingko

aiao inmanpile dakaha. (2) Maina Uko man·jaskal an·chingni
dongtogija Uko am·na skani gimin. (3) Maina an·ching Uko am·e man·ahaon Ua an·chingni pilak
nanganirangko gapata!

4. UARA MAIDAKGIPA ISOL?

Mande baksa nangrimna sikgipa Isolsa An·tangni dakgimin manderangna Pagipani an·tang detangna gita
An·tangko parakna sikaigen. Aro Sastroo Ua An·tangkoa sawachim, aro maidakgipachim uko mesoka.

"Aro Isol an·tangni jagring gita mandeko ong·ataha, me·asa aro me·chik dake uamangko
ong·ataha." - A·bachenga 1:27.
An·chingko Isolni jagring gita dakahani gimin an·chingni changani, gisik ra·ani ka·dongani, aro chanchina
changanirang Uko teng·chakskana nanga, maina uarangko an·ching Uoniko man·a.

Isolni mongsonggipa cholonara maia?

"Isol ka·sara ong·a." - 1 Johan 4:8.

Isol ka·saani giminsa mande baksa nangrime dongna skaha. Ua ka·saa gride mamungkoba mandena
dakja.

5. ISOL MAIDAKGIPA ONG·A UKO JISU MAIKAI MESOKA?

Sastroo changni changan Isol An·tangko Pagipa dake toe mesoka.

"An·ching pilakon paa saksan ongj·ama? Isol saksan an·chingko ong·atjama?" - Malaki 2:10.

Da·ororo namgipa pagiparangko an·ching bang·en nika. Namgijagipa, ka·saninggijagipa pagiparangba

donga, indiba Isolde uandake ong·ja. Ua simsakgipa aro ma·sininggipa Pagipa ong·a. Ua An·tang
dedrangrang baksa kal·grike rona sikgipa Pagipa gita ong·a.

An·chingni ka·sagipa Pagipa An·tangko parakemangmang donainade sikja. Saniba dongrimaniko

ki·taprangoniko poraie u·iana bate nambate u·iani gita, ua mande ong·e a·gilsakona mande baksa
dongpana re·baaha, uan Jisu ong·a.

"Ua nikgija Isolni bimang, pilak dakgiminoni dejakra ong·a." - Kolosi 1:15

Uandake na·a Jisuko nikahaode Isolko nikaha gita ong·a. Ua

an·chingni gadangona re·bae - an·ching gita ong·paaha, indake
an·ching maidake kusi ong·e dongna nangna aro Isola maidakgipa
ong·a uko agane on·na man·gen. Jisuara Isolni mande ong·e
re·bagimin bimang ong·a. Ua An·tangan indine agana,

"Angko nikgipa Pagipako nikaha" (Johan 14:9).

Na·a Jisuni gimin Niam Gitalni skanggipa ki·tap kingbriko poraiao

an·chingni Salgini Pagipani gimin ga·subee seaniko poraiman·gen.
Skia man·gijagipa na·tok rim·gipa sakbrini an·tangtangni chekko gale
Kristoko ja·rikna re·angani aro Uni patianiko man·na bi·sarangni
re·baanirangko serika. Ua namjabatgipa papinaba ka·dimeaniko ra·baa
aro an·tangko toromi changipa cha·chipilgipa mandekoba ua bamata.
Ua kana ong·gipa mandeoni konchi cha·gipa manderangona
sakantikon an·sengata. Uni pilak kamrangon Jisu Isolni ka·saaniko
parakaha. Ua mandeni nanganina darang mandeni skango kam
ka·aha aro darangkoba un somoioni Ugita ka·kuja!

Jisuni Isolko bon·kame rasong chaate mesokania Uni chisolo

mesokanian ong·a.

"Maina Isol a·gilsakna inditan ka·saaha, ua an·tangni saksa kamkam Depantekon on·jok, maikai Uo
bebera·gipa sakanti gimagija jringjrotni janggiko man·gen" - Johan 3:16.

An·chingna da·o kusiniko on·ainasan Jisu siaijaha, indiba an·chingna jringjrotni janggiko on·naba
ong·aha. Bang·a chasongnan manderang Isolni gimin u·ina skaha aro Una ka·dongaha. Uamang Uni
jakni kamko salgisakoniko niaha aro Uni dakgiminrangni nitoaniko sam bolrangoniko nikaha. Uni ja·mano
chisolo chasongna jrip donganiko parak ong·ataha aro manderang Isolni ka·saani gunko nikaha.

Na·a Jisuni parakgiminko da·on Isolni gimin u·ie ra·na man·a. Uko nike ra·anian nang·ko "Apa, anga
nang·na ka·saa" ine aganatna dakchakgen.
 Maina An·ching Sastroko Bebera·na Man·a
Mingsingako man·gipa bobil dake chakatpilgiparang jemangan
Britishni jahas Bounty ko sripatahachim, uamang an·tangtangni
jatni me·chikrang baksa South Pacifico Pitcairn minggipa
chichango songdongeaha. Ua dolo Britishni kalasi saksku
Tahitioni me·asa sakdok aro me·chik sakchikkung aro bilsi
chi·bongani me·chik bi·sa saksa dongachim. Kalasirangoni
saksa chu song·na changani gimin ua chichango chu pekanian
gapaiaha. Uamango bilonge dakgrikanirang dongkamaiachim.

Ua chichangona sokbachenggipa mandede sikujachim. Ua

jahasoniko ra·ongipa dal·gipa bakosoniko Sastroko nikaha. Uko
poraie ua gipinrangnaba Sastroo maiko seachim uko agane
on·aha. Indake dakon uni janggi tangani dingtangaha aro
bon·kamao ua chichango donggipa pilakan dingtange janggi
tangtokaha.

Ua chichango dongggipa manderang a·gilsakni gipin manderangkode grongna chol man·pajachim. Indiba
1808 bilsio Americani jahas Topaz minggipa ua chichangona sokeaha. Jahasni manderang ia chichangko
silrorogipa biap jeon chu ringja aro so·otgrikja, patok nok dongja ine nikaha. Ia biapko Sastroan
dingtangataha aro a·gilsakni norok ong·aoniko Isol a·gilsakko maidakgipa ong·atna ska uandake ua
chichang ong·aha. Uandaken ua chichang da·oba ong·engkua.

Isol da·ororoba Sastrochi manderangna aganengkueng-ama? Oe. Ia kattarangko angni seengmitingo,

anga saksa chingni Sastroko poraiani Dilaniko poraie aganchakani lekako nie dongengachim. Ua leka
ka·mao indake sedapatachim: "Anga da·o patok noko dongenga aro angni dosni a·sel sina rai on·ako
man·e so·otako man·na senge dongenga. Ia Sastroni Dilanirangko poraina skangde anga gimagimin
ong·achim, indiba da·o angna maiaba ka·dongani dongaha, anga gital ka·saaniko man·aha."

Sastro manderangni janggirangko dingtangatna bilake kam ka·na man·a. Manderang Sastroko gisiko
nange poraion, janggi tanganirang aiao inmanpile dingtangbaa.

1. ISOL SASTROCHI MAIKAI AGANA

A·gilsakni skanggipa mande Adam aro Hobako dakmanahaon uamang Isol baksa mikkangchakchak
agangrikachim indiba pap ka·mano Isol uamang baksa agangrikna re·bahaon uamang maiko dakaha?

"Aro sal ka·sino uamang bario roenggipa Jihova Isolni ku·rangko

knaaha. Unon ua mande aro uni jikgipa, Jihova Isolni mikkangoni
barini bolrangni gisepo dongnuaha." - A·ba. 3:8.

Isol baksa mikkangchakchak agangrikna man·aoniko pap

dontongataha.

A·gilsakona pap napani ja·mano Isol manderang maidake

agangrikskaaha?
"Beben Gitel Jihova, ua an·tangni nokol katchinikgiparangna an·tangni ning·tua mangsonganiko
parakatgijade mamungkoba dakjawa" - Amos 3:7.

An·chingni janggi tangani aro ortoko u·iatgija Isol an·chingko andalao donja - Uni katchinikgiparangchi,
jekon Isol An·tangni pal manderangna aganskachina seokahachim, uamangchi Isol mandena
u·iatskaaha.

2. SAWA SASTROKO SEAHA?

Katchinikgiparangna Isol kattako sechina aro aganchina on·aha, aro uamangni simanoba uamangni
seanirang dongrikengkua. Indake katchinikgiparangni seaoniko Isolni dilanichi chimongaha aro ukon
an·ching Sastro ine minga.

Indiba uamangni seaniara baditana ka·dongchakna man·gipa ong·na man·a?

"Iako u·ichengbo, Sastroni pilak katchinike agana an·tangni pe·e on·ani ong·ja. Maina katchinikani
agana mandeni skachi pangnaba re·baja; indiba Gisik Rongtalgipani dilako man·gipa manderang
Isoloniko agana." - 2 Pitor 1:20, 21.

Sastroko segiparang an·tangtangni ska gita seja, indiba Isolni gisikni

dilaniko man·anichisa uamang seaha. Sastroara Isolni ki·tapan ong·a.
Sastroo Isol An·tangni gimin paraka aro mandena miksonganiko u·iata.
Batanggimin somoio obostarangko Isol maidake nikahachim aro
mikkangchi mandena Ua maiko miksonga aro namgijaniko maikai
bon·kamao bon·atsrange a·gilsakna maikai tom·tomaniko ra·bapilgen ua
pilakkon parakata.

Sastroo sea gimikan Isolni kattararama?

"Pilak Sastro Isolni dongimin ong·a, aro skiana, manengana,

ga·akgiminrangko chakatatna, toromo skiana namgni ong·a, maikai
Isolni mande chu·sokgimin, pilak nama kamna chu·soke tarigimin
ong·na man·gen." - 2 Tim. 3:16, 17.

Rongtalgipa Sastroo mandeko chu·gimik chinapata maina "pilak" Sastroni bakan "Isolni katta" ko
serikgimin ong·a. Katchinikgiparang an·tangtangni Isoloniko knagimin aro nikgiminko kattatangchi seaha,
indiba kattako uamang Isoloniko tongtong man·soachim. Uni gimin janggi tangania maiani gimin
ong·enga uko na·a u·ina skode, Rongtalgipa Sastroko poraibo. Sastroko poraianian nang·ni janggi
tanganiko dingtangatgen. Baditana na·a Isolo bi·e poraia, na·a gisikni tom·tomaniko man·batgen.

Je Rongtalgipa Gisikan Sastroko segipa katchinikgipa manderangko dilahachim, ua apsan Gisik

Rongtalgipaan na·a uko nang Sastro poraiao dilchina na·a okamode, ba bi·ode, nang·ko ua nang·ni
poraienggipa kattarangko ma·siatna dilgen.

3. SASTRONI NANGRIM-MELIANI

Sastroode ki·tap king 66 ko kadima. Niam Gitchamni ki·tap king 39 ko 1450 B.C. oni 400 B.C. jolona
seaha aro Niam Gital jeon ki·tap king 27 donga uko A.D. 50 aro A.D. 100 ni gisepo seaha.

Katchinikgipa Mose Sastroni skanggipa ki·tap king 5 ko 1400 B.C. jolna skang seaha. Watata Johan A.D.
95 jolo Sastroni bon·kamgipa ki·tapko seaha. Ia Sastroko seani bilsi 1500 jolni gisepo Sastroni skanggipa
ki·taponi bon·kamgipako seaona uko segipa komibeoba sak 38 manderang Isolni Gisikko man·e seaha.
Uamangoni mitamde bading-chiwalgiparang, mitama mes nirikgiparang, na·tok rim·giparang, sipairang,
ojarang, skiprakgiparang, rajarang - uandake dingtang dingtang janggi tanggipa manderangsa ong·a.
Indiba iano aiao inmanani donga: Jensalo ia Sastroni ki·tap king 66 jeon 1189 odhairang aro 31,173
podrang dongachim, uarangko dondimon uarang katta mingsaoni minggipin baksa meligrika.

Chanchichipe saoba mande, nang nokona re·bae do·ga doktike marble

ni bostuko ra·bae donangode aro uni ja·mano sulsul dake sak 40
manderangba marble ni bosturangko ra·bae an·tangtangni
ra·baatangtangko gatgitange donangtokenga ine chanchiatbo.
Bon·kamgipa mandeni donangahaon, uara marble ni made saksani
bimang ong·aha ine nikna na·a aiao inmanbegen. Uni ja·mano na·a
indake u·iaha je, uarangko ra·bagipa manderangara saksa sakgipinko
u·igrikja aro nikgrikkuja. Uamangoni saobarangde South Americaoni,
saobade Chinaoni, Russiaoni, Africaoni aro uandake a·gilsakni gipin
bakrangoni re·baachim. Na·a maidake chanchichote dongenchim? Je saoba saksa mande ua mandeni
bimangko tarigipa uamang gimikna bimangni teng·prak bosturangko on·e watataha ine na·a
chanchigenchim.

Uandake Sastroba mingsa kattani gimin seani kattarangsa ong·a. Saksani gisik, uan Isolni gisik uko
tariaha. Indake Sastroni aiao inmane meligrikanian Isolni gisikchi Dilaniong·aha ine mesokani ong·a.

4. NA·A SASTROO KA·DONGCHAKNA MAN·A

(1) Sastroko ripingbana man·ania aiao inmanani ong·a. Skang

Sastroko sechengarangode jakchisa segatbaahachim. Seriktimgipa-rang uarangko segate manderangna
sualachim indake segatgimin-rangode king hajalni hajal da·onaba gimakuja.

Ibri ku·sikchi segipa Niam Gitcham jean Jisuna skang bilsi 150 ba 200
ong·genchim, uko 1947 bilsio Dead Sea ni sambaoniko man·aha. Iano
indake u·ina aiao inmanani donga je, ua bilsi 2000 na skang segipa
kattarangara da·o an·chingni chapa ka·gimin Sastro baksa kattarang
apsan ong·tokaiengkua. Ian Isolni kattao pangchakna man·ani bilko
mesokani ong·a.

Niam Gitalo donggipa ki·taprangko Watatarang see uarangko Kristoni

sie chakatpilani ja·mano songa man·gimin mondolirangna
watatahachim. Ua Niam Gitalni bakrangko jakchi sea rokom 4500
rangnaba bate donga aro uarangko da·oba Europe aro Americani
museum rango nikengpiti. Tosusae nion da·o chapa ka·gimin Sastro

ua kattarang baksa dingtangja ine nikaha.

(2) Sastroko itihasni gita tosusae nioba, melie nikaha. A·ako cho·e am·e
nigiparang Sastroo serikara ong·chongmota ine nikaha. Itihasko
poraigiparang maiaba serikani aro bosturangko cho·e am·e niaoniko
tosusaon, Sastroosan skango sea ba janapa donggiparanga, itihaso
melibebea ine nikaha.

Mesokna gita: A·bachenga 11:31 o Abraham aro uni nokdangara

"Kanaan a·songchina re·na ine Kaldearangni Ur oni ong·katangaha" ine
sea donga. Sastroosan Ur a·songko janapaiani gimin saoba Sastroko
poraigiparangde a·gilsako Ur minggipa a·song dongja ine
chanchiahachim. Indiba Iraq ni Salgipengchi donggipa torom nok
ge·saoniko cho·e am·ao silmrong ge·sao Ur ine seako man·aha.
Ja·mano uamang indake u·iaha je, Urara mande jatrangni brine dongram songjinma dal·gipa ong·achim.
Da·ode uko itihasni serikao nikjaha, Sastroosan uko seaiachim. Uandake gipin sakirangko sandiode
an·ching bang·en Sastroni tik ong·e serikaniko saki on·ani donga ine nika.

(3) Tik ong·e agansoani chu·sokanirangba, Sastroko ka·dongchakna man·gipa ine mesokani ong·a.
Sastroo bang·a agansoanirang an·chingni mikkangon chu·sokengaha. Mikkang poraianirango an·ching ia
agansoani chu·sokanirangko nikgen.

5. SASTROKO MAIKAI MA·SINA MAN·GEN

Isolni kattako nang·ni niangkuao iarangko gisik ra·bo:

(1) Bi·a gnangsa Sastroko poraibo. Na·a bi·achi nang ka·tong
aro gisikko oa gnang poraiode uan Jisu baksa nangrimgrike donga
gita ong·a (Johan 16:13, 14).

(2) Sastroko salantian poraibo. Salanti Sastroko poraianian

an·chingni janggini bil ong·a (Rom 1:16).

(3) Na·a poraiengon Sastrokon an·tangko talatchina on·bo.

Indine sing·bo: ia Sastroko segipa maiko aganna miksongengachim? Miksonganiko ma·siania an·chingni
da·alni jangi tanganiona gamchatbegipa skiani ong·a.

(4) Sastroko poraion bak apsan apsanko poraibo. Sastroko

Sastroni katta baksaan tosusabo. Jisuba An·tangko Messaia ine mesokna uandaken poraie skiaha.
"Unikoa Mose aro pilak katchinikgiparang intaltal, pilak Sastrorango an·tangni gimin kattarangko
ua uamangna agane on·tokaha." Luk 24:27.

Sastroni talata gimikko chimongon an·ching tiktak dake ma·sianiko man·a.

(5) Kristona janggi tangna bilko man·na gitasa Sastroko poraibo.

Sastroko Ibri 4:12 o matsramgipa tonual baksa toa Ian lekkani jakmangmangsan ong·aija, indiba
namgijako dakgrikna tanggipa silchidareba ong·a.

(6) Sastroni kattarangchi Isolni nang·na aganengako na·a

knatimbo. Saoba Sastroni bebeko ma·sina skode uano maiko sea uko ua ja·rikna siknaba nanga (Johan
7:17). Ua an·tangni chanchiaianiko ba mondolini skianimangmangko ong·nikaiani ong·ja.

(7) Sastro nang·ni janggi tanganiko dingtangatna man·a.

"Nang·ni kattarangko oatani seng·ako on·a; gisik nom·gipana ua ma·sianiko on·a." - Gitrang
119:130.

Sastroko poraiania nang·ni ma·sianiko bariatgen, namgijagipa nosto ka·gipa dakbewalrangko gimaatna
dakchakgen, aro nang·ko be·en bimango gisik aro toromo namdapatna dakchakani ong·gen.

Sastro mandeni ka·tongna agane on·a. Mandeni janggi tanganio chagronggipa jekai, atchiani, ka·saani,
bia ka·e dongani, ma·a paa ong·ani aro sianini gimin skia. Uan mandeni pap jean mandeko ning·tubate
duk man·ata uko namatna dakchaka.

Isolni ki·tapara badiaba jatsana ba chasongnasan seaianisan

ong·aija. Salaram jolo uko seahaoba ua Saliram jolni manderangnaba
segimin ong·a. Ua kangalgipa aro man·e cha·giparangnaba segimin
ong·a. Bi·sarang uoni golporangko namnika, aro Sastrooni bilakgipa
manderang chadamberangko gisiko nangata. Sae donggiparang, sikdikdik ong·e donggiparang uo
ka·dongani aro ka·dimeaniko man·a.

Sastrochi Isol kam ka·ani gimin Sastroni bil bilaka. Ka·namgijagipa ka·ting dakgipa mandeni ka·tongkoba
ua nom·ata, aro uarangko ka·saanichi gapatskaa. Ra·seke ra·gipa mandeko aro ganja na nokkol ong·gipa
mandeko Sastro dingtangate uamangko skiprakgipa ong·atskaanikoba an·ching nikaha. Aro an·tangko
so·ote sinasienggipa mandeko, una gital ka·dongani aro janggi tanganiko on·piltaianikoba an·ching
nikaha. Tol·rakgipa aro togigipa mandeko kakkete skigipa ong·naba Sastroni manderangko dilanikoba
an·ching nikaha. Sastroan gaora dakgipa manderangko sontolataha, aro an·tangnasan chanchiagipa
manderangko jaksramataha. Sastro an·chingko bilgrimitingo bilakata, duk ong·mitingo ka·dimeata,
u·ijamiting somoio an·chingko dila aro neng·bemiting somoio an·chingko dongtoata. Uan an·chingko
ka·donge janggi tangna aro kengija sina dakchaka.

Isolni ki·tap, Sastro nang·ni janggi tanganikoba dingtangatna man·gen. Ia Am·e Nibo ingipa poraiaoniko
mikkang changrango rongtalbate nikroroanggen

Maina Sastroko an·chingna seaha? Jisu indine aganchaka:

"Jisu Isolni Depante Kristo ine na·simang maikai bebera·e uni bimungo janggiko man·gen,
iarangko seaha." - Johan 20:31.

Rongtalgipa Sastroko an·chingni poraina nangchongmotani a·selde Sastro an·chingna Jisu Kristoni gimin
rongtale talata aro an·chingna jringjrotni janggiko man·gniko agane on·a. Sastrooniko Kristoko nie
an·ching dingtangataniko man·a, aro Ugita an·ching ong·roroa. Unigimin Jisu gita ong·batna man·na gita
maina Isolni kattako poraina da·on a·bachengjawa?
 Maikai Angni Janggi Tangania Isolchi Bak Nangebebea

Basakoban salrangode a·gilsak namen an·senga. Na·a pringo chakato balwa ka·sin balao balwako
ringope bol bijakrango sal teng·chakarangko nike katchaa. Janggi tangao baditaba somoirangkode
an·ching gisik ra·tea, jekai, nang ka·sagipako wate re·nako uni mikkangko niani, nang gisik baksa
meligipa gitko knao, chongipa bi·sani nang·na ka·saaniko mesoko, aro uandake.

Indiba basakobade a·gilsakara ka·namgijagipa gita ong·a. Pringo na·a songbadoniko poraie saksa bi·sa
bom goao kana ong·aha ine seako nikahaon, saksa mande sakoba so·ottaiaha aro uni so·otara
chikkunggipa sak ong·aha, banoba karap bilongenga, chi bana re·pakaha, banggriangaha, ba dakgrika
bilongenga ine knaaniranga, mamungan a·gilsako namaan griaha ine an·chingko chanchiata.

Iarangni orto mai? Ia aiao inmanpilgipa aro namgijagipa a·gilsakko an·ching mamungba dakna
man·jawahama? An·chinga da·o iano maina dongenga? Isolara angna simsakama ba angara ia
dal·begipa a·gilsako maiaba chonbegipa janggi tanggipasama?

1. ISOL NAMGIPA A·GILSAKKON DAKAHA

A·gilsako pilak chona rema aro aiao inmangiparangko Isolan Dakgipa Rugipa
ong·a.

"Jihovani kattachin salgirangko aro Uni ku·sikni ku·bibachi uarangni

pilak ko·tokrangko dakaha…Maina ua aganaha unon uan ong·aha; ua
ge·etaha unon uan mangrake dongaha." - Gitrang 33:6 - 9.

Isol aganatnasan nangaia unon Uni nangnika gita pilakan ong·baaiaha.

2. AN·CHINGNI A·GILSAKKO DAKNA SAL DOK

"Maina sal doko Jihova salgi aro a·ako, sagalko aro uarango donggipa pilakkon dakaha aro
snigipa salo ua neng·takaha. Unigimin Jihova neng·takani salko patiaha aro uko rongtalataha." -
Re·ongkata 20:11.

Bilakbegipa jringjrotna donggipa Dakgipa Rugipa ia a·gilsakko An·tangni ku·bibachi dikdiksanon

ong·attokna man·aigenchim. Indiba iako dakna ua sal dok somoiko ra·aha. - minit dok ba second dok ba
chu·ongaigenchim. A·bachenga odhai sao salprako Isol mai rasongni kamko ka·aha?
"Aro Isol An·tangni jagring gita mandeko ong·ataha; Isolni jagring gitan uko ong·ataha, me·asa aro
me·chik dake uamangko ong·ataha." - A·bachenga 1:27.

Isol mandeko An·tang gita chanchibewalna, ka·sana u·ina man·e dakna miksongaha.
Sakantikon Isol An·tangni jagring gita ong·ataha.

Dokgipa salo a·gilsako sam bolrang aro matburingrangan gapaiaha. A·bachenga 2:7
o aganani gitade Bilakgipa Isol a·dimuoniko Adamni be·enko dakaha. Isol
baljanggiko uni gingkolo spodapatahaon ua tanggipa mande ong·aha. Ia skanggipa
mandeko Isol Adam mingaha, ua katani ortoa "mande" inesan ong·aiachim, aro
skanggipa me·chikko Hoba ine mingaha. Uni ortoa "tanggiparangni ma·a" (2:20;
3:20) ine ong·a. Ka·sagipa Dakgipa Rugipa mandena ripeng nanganiko nikaha.

Isolni jakoni re·badaldal ong·e Adam aro Hoba Isolni bimangko teng·chakgiparang
ong·achim. Nanga inode Isol uamangko robot rangko gita Eden bario re·roroate
An·tangni knana sikgipa kattarangko uamangni ku·sikoniko gam·ate donna
man·achim. Indiba iana batede Isol uamang baksa nangrimnasa sikbataha.
Robotrang ka·dingsmitna aganna ba song·na channa changa, indiba uamang
ka·sana u·ija.

Isol an·chingko Uni bimang gita ong·ate an·chingko chanchina,

basee ra·na, gisik ra·na, ma·sina aro ka·sana change dakaha.
Adam aro Hobara Isolni dedrangrang aro Uni ka·sabegiparang
ong·achim.

ONG·ATANI ANTI
Skanggipa Sal: Seng·ani, sal aro walni a·bachengani
Gnigipa Sal: A·gilsakni balwa
Gittamgipa Sal: A·a ran·a aro sam bol
Brigipa Sal: Sal, ja Aski
Bongagipa Sal: Do·o aro Matrang
Dokgipa Sal: A·gao rogipa Matburingrang aro Mandeko
Snigipa Sal: Neng·takani sal

3. NAMBEGIPA A·GILSAKNA NAMGIJA NAPAHA

Adam aro Hobako kusi ong·atna gita uamango pilak nanganirangan dongtokachim. Uamang be·en
an·senge donge nambegipa a·gilsak aro nitobegipa bario dongengachim. (A·ba. 2:8; 1:28 - 31). Isol
uamangna dedrangko patina ku·rachakaha, aro chanchina, u·ina aro uamangni jakni kamo
chu·ongnikaniko man·atna ku·rachakaha (A·bachenga 1: 28; 2:15). Uamang mikkangchakchak
an·tangtangko Dakgipa baksa agangrikna man·achim. Uamangni katchaani salrangko nosto ka·na
mamung saani aro jajrengani uamangna sokbajachim.

Maikai ia a·gilsakara duk aro saknaani ong·baskaaha? Pap maikai a·gilsakona napahachim uko
A·bachenga odhai gni aro gittam talata. Nang·ni man·a somoio uarangko poraibo. Iano kan·dike
agangopatenga.
Nambegipa a·gilsakko dakmanani aditani ja·mano Adam aro Hobako dakmajona, Dakgipa Rugipako katta
ra·atjana dakmajona Diabol Eden bariona re·baaha. Diabolni miksongania "nama aro namgijako u·iani
bol" jean barini jatchio dongachim, uachin Adam aro Hobako rim·na ine miksongani ong·achim. Ia
jiksesako ia bolni sepangchin re·angjachina aro uni biteko cha·jachina Isol mikrakatahachim. Ua bolni
biteko cha·ode uamang sigenchim.
 Indiba salsao Hoba saksan ua beng·gimin bolni sambachi roramangaha.
Diabol rang·sanan an·tangni aganani budhiko jakkalaha. Isol uamangna
tol·aha ine diabol una aganaha, aro ua bolni biteko cha·oba sijawa ine
aganaha. Rasong grianichi Hoba aro ja·mano Adamba ua bolni biteko cha·e
niaha - indake Isolko maniani aro ka·dongchakaniko uamang pe·aha.

Isolni Adam aro Hobana miksongania Isolni nokkol pamong ong·e a·gilsakko
"sason" ka·china aro nirok sandichinasa ong·achim (A·ba. 1:26). Indiba
uamang Isolo bebera·aniko pe·e diabolnasa katta ra·bataiahani gimin uamang
an·tangtangni bilko gimaataha. Da·alo a·gilsakko diabol an·tangni ine kange
ra·a aro uno donggipa manderangko an·tangni nokolrang dakata.

Basakobade an·ching namako dakna skoba an·tangtangko namgijako

dakakosa u·iaia. Maina? An·chingni nikgijagipa bobil manderangko cholono
nosto ka·na kam ka·enga.

A·bachenga odhai gittamko poraiode na·a Adam aro Hobani papni a·sel kene Isoloni dongnuaniko
nikgen. Papara pilak ong·atgiminrangkon nangchapateaha. Pul bibalrang baksa bu·surangba
ong·katbaaha. A·salrango chirang chu·ongjaha aro ge·a gamani kam rakbataha. Gisep gisep saa
ding·arang ong·katbaaha. Mandeni jato sanalani, bobil dakani barirorobaaha. Ia pilakna bate pap baksa
siani ja·chapbaaha.

4. AN·CHINGNI IA A·GILSAKKO NOSTO KA·GIPA IA DIABOLARA SAWA?

"Ua a·bachengantaltal mandeko so·otgipa aro ua bebeo chadengja, maina uo bebe gri…ua tol·gipa
aro tol·ani pagipa" - Johan 8:44

Jisuni aganani gitade diabolsa ia a·gilsakona papko ra·baa. Ua papni padot ong·a aro tol·aniba padot
ong·a.

Saksa dal·begipa chanchirakgipa English mande Thomas Caryle minggipa sakgipin mande Ralph Waldo
minggipako Londonni namjabatgipa sorokjoljol Londonni salaramchipakko re·dilangengachim. Soroko
ka·sne re·ange pilak namgijaniko uamang nikangengachim. Bon·chotao Caryle Ralphko indine sing·aha,
"Da·ode na·a diabol donga ine bebera·ahama?"

5. ISOL DIABOLKO DAKAHAMA?

Ong·ja! Namgipa Isol diabolko dakja. Indiba Sastroo indine agana je, diabol jemangkon ua
tol·napahachim, uamang baksa salgio biapko man·jaha.

"Aro salgio dakgrikani ong·achim, Mikael aro uni sa·grerang

ua drakon baksa dakgrika; aro ua drakon aro uni sa·grerang
dakgrikaha, indiba amjaha; aro uamangni biapko salgio
man·jaha. Aro ua dal·gipa drakonko, chong·motan
gitchamgipa chipu Diabol aro Satan minggipa, a·gilsak
gimikko brangatgipako galataha; a·aona galataha, aro uni
sa·grerangkoba un baksa galataha" -Parape·a 12:7 - 9.

Maidake diabolara salgio dongepaaha?

"Na·a to nonggimin pindapgipa cherub ong·achim; aro na·a

Isolni rongtalgipa a·brio dongchina anga nang·ko donaha. Wa·alni ro·ongrangni jatchio na·a
re·ruraaha. Nang·ko ong·atatchengani saloni kakketgijako nang·o nikkujana kingking na·a
an·tangni re·anirango chu·soksranggipa ong·achim" - Ezekiel 28:14, 15.

Isolde diabolko dakjachim. Ua nambegipa nitogipa Luciferkosa dakahachim, aro ua Isolni singhason
sambao chadengachim. Indiba ua pap ka·aha - Uo "namgijako man·aha." Ua salgioniko rikgalatako
man·aha, aro ua an·tangko Adam aro Hobani ripeng dakmike mandeni dal·batgipa bobil ong·skaaha.

6. LUCIFER, CHU·SOKGIPA SA·GRE MAINA PAP KA·AHA?

"Na·a mairongpile salgioni ga·akaha, O ching·gipa pringni depante! Nang·ko mairongpile a·asrek
den·peaha, na·a jatrangko onatgipa! Aro nang·ni ka·tongo na·a agane inachim, Anga salgiona
gakatgen. Isolni askirangni kosakona angni singhasonko anga chuatgen….Chubatgipa gita anga
an·tangko dakgen" - Isaia 14:12 - 14.

Ia diabol jean a·bachengode Lucifer ong·achim, uni ortoa salni aski ba

teng·sugipa inani ong·achim. Ia sa·greni ka·tongo Isolna bamna aro Uko olakina
skani pal chanchigramani aro biapna seksekaniko chanchiani ong·katskaaha. Uni
gaora dal·roroe Isolni biapko man·na skani uo dongbaaha.

Gipin salgini sa·grerangko an·tangchipak ambana Lucifer raken kam ka·enggen.

Isol maiaba namako an·tangnasan ra·aia ine matnanganirangko ua aganenggen
ine an·ching chanchiatna man·a. Isolni niamrang manina raka aro an·tangde
gimikko sason ka·a daka, ua gipinrangnade simsakja ine matnangenggen. Ua
ka·sagipa Isolko ong·gija agansretaha.
Ia salgio golmal ong·aniko maidake bon·ataha?

"Nang·ni ka·tong de·doako man·aha….unigimin anga nang·ko a·ao galaha" -

Ezekiel 28:17.

Sa·grerangni padotko uni gaora dakanian diabol pil·atskaaha. Salgio

tom·tomaniko donna man·na gita diabol aro un baksa chakpagipa pilak salgini
bak gittamni baksa sa·grerangko salgioniko rikgalataha (Parape·a 12:4, 7 - 9).

7. PAPARA SANI DAITO?

Pap ka·na man·gija dake Isolara maina manderangko ong·atja? Indake ong·atode a·gilsako papan
dongjawachim. Indiba Isolara orto gnange mande baksa meli-nangrimnasa skaha. Ua mandeko an·tang
jagring gita dakaha (A·ba. 1:27). Iani ortoa an·ching jakgitel ong·a aro an·tangtangni dakna nanggni
dingtang bak donga. An·ching Isolna ka·sana ba Uko jegalna seoke ra·na man·a.

Pilak sa·grerangna aro manderangnaba Isol jekoba dakna seoke ra·ani chol ba bilko on·aha.

"Na·simang sako manigen da·alo an·tangtangna sebo" - Joshua 24:15.

An·tangni ong·atgimin pilak manderangna ua mandeko namako seoke ra·china agana. Isolni skako
dakanian nambata ine u·ianiko Ua uamangna on·aha. Pap aro uni biteko u·ie namgijaoni an·pilchina Ua
an·chingko mikrakata.

Chanchina aro seoke ra·na man·gipa manderangsa chong·motgipa

ka·saaniko u·ia. Isol An·tangni cholonko ma·sie Uko ka·sae manina aro
sakgipinrangnaba ka·sana changgipa manderangko ong·atna ska. Isol
An·tangni ka·saaniko u·iatna skani gimin chanchina changgipa aro skatang
basee ra·na u·igipa sa·gre aro manderangko ong·atna chanchiaha. Basakobade Uni ong·atgimin
manderang an·pile Una dangdike on·na an·pilgen ine Ua u·ia. Diabolsa skang namgijako dakna seoke
ra·chengaha. Papni kengni obostara uonisa a·bachengaha (Johan 8:44; 1 Johan 3:8).

8. CHISOLCHI PAPKO NISIATNA MAN·A

Papni rog gipna skang Isolara maina Luciferko so·ote galja? Isolni sorkariko namja ine Lucifer
matnangahachim. Ua Isolni gimin tol·e aganjojoaha. Isol Luciferko rang·san so·ote galahaode gipin
sa·grerang Isolna ka·saachi ong·gija kenesa dangdike on·aignokchim. Unode Isol mande aro
sa·grerangko ong·atani miksongnai orto dongjawahachim.

Isolni kamrangan nambata ine maikai manderanga u·igen? Satanni sorkaria maidake dakskaachim uko
mesokchina Isol diabolna cholko on·aha. Unigiminsa Isol Adam aro Hobako dakmajochinaba Diabolna
on·aha.

Ia a·gilsakan ia songnok ge·gniko dake niram biap ong·aha. Sawa ong·a?

Bon·kamao sao ka·dongchakna man·bata? Lucifer inditan togirakgipa ong·ani gimin an·tangni kamni
namgijarangkode ua manderangna u·iatja. Indiba bon·kamaode pilakan indake u·igen je "papni dormaha
sia" indiba "Isolni on·ania an·chingni Gitel Jisuo jringjrotni janggi ong·a" (Rom 6:23).

Unosa pilak a·gimikni manderang indake u·igen je:

"Dal·a aro aiao inmanani kamrang, O Gitel Isol, Bilakbatgipa; torom aro bebe Nang·ni
ramarang….Sawa kenjawa aro Nang·ni bimungko rasong chaatjawa…maina pilak jatrang re·bae
Nang·ni mikkango olakigen, maina Nang·ni kakket dakanirangko parak ong·ataha" - Parape·a 15:3,
4.

Pilak manderangni papni bewal aro Satanni kamrangko mesokaniko

u·iattokahaosa Satan aro papko Isol nisiatna man·gen. Uni ka·saaniko
ra·chakgija Satanni on·aniko ra·chakgiparangkoba Ua nisiatgen.

Pap aro dukko Isol nisiatningna skenga, indiba an·chingni pangkame

seoke ra·anina aro maidaka somoio papko ong·katatpilgija gimaatkamna
man·gen ua somoina senge dongenga.

A·a aro salgiko wa·alchi nisie papko gimaatna Isol ku·rachakaha. "Uni
ku·rachakani gita an·ching gital salgirang aro gital a·ako nichaksoenga, jeo
toromi dongkama" (2 Pitor 3:13).

Diabol aro papko sawa bon·kame nisiatgen?

"Unigimin dedrang an·chi aro be·enko bak man·paani gimin ua an·tangba ugitan apsanoniko bak
man·paachim; maikai ua siachi siani bil gnanggipako, chong·motan Diabolko gimaatna amgen, aro
janggi tanga dipet siani kenanio nokol ita man·giparangko jokattokna amgen" - Ibri 2:14, 15.

Satanko tol·gipa, togigipa aro mande so·otgipa ine pilak ga·akkugijagipa sa·grerang aro gipin a·gilsakni
manderang chisolo nikaha. Dos gri Isolni Depanteko so·otatahaon Satanni chong·motgipa cholonko
mesokani ong·aha. Pilak a·gilsako donggiparang, papara badita ka·namja aro orto gri uko nikaha. Satanni
miksonganirangko chisol mesoke on·aha aro Isolni diabol aro uko ja·rikgiparangko nisiaton Isolan
kakketgipa one pilakan ra·chaktokgen.
 Pilak manderangko Satan maiko dakna am·engachim uko Jisuni chisolo
sianian paraka (Johan 12:31, 32). Chisolan Jisuko a·gilsakko Jokatgipa ineba
parakaha. Golgotha a·brio ka·saani bil maikai bilna seksekgipani kosako
dingtanga uko mesokaha.

Ka·saanisa Isolko Satan, pap aro papi manderangna maidake dakna nanga
uko dakna didiataha ine chisol mesoka.

Isolni ka·saania diabolko amaha ine chisolan mesokani ong·aha. Da·ode

a·gilsakko Satan sason ka·genma Kristoma una dakgrikani matchotaha. Uko
chisolan rai on·aha. Uan Kristo ong·na nanga.

Na·a ia pangnaba ka·saani dingtanggijagipa, tona amsokgijagipa ka·saani

donggipa Jokatgipa baksa nangrim-melina skie ra·ahama? A·gilsakona
mande ong·e re·bae nang·ni palo sichakna, nang·ko jokatna kam ka·ahani
gimin na·a maiko chanchia? Na·a da·o sko choknoke Jisuko mitele Uko nang janggi tanganiko ra·china
aganjawama?
 Nang Janggi Tanganina Maia
Daksogimin Chol Donga
"Angara Maina Jisuo Bebera·a?" ingipa kattani gimin pamong giljao skiprakmano saksa name gane chine
re·bagipa chadambe uko nokona re·ange grongeaha. "Nang·ni skiprakanide namjok, indiba nang
skiprakao Sastroonirarako na·a aganaia. Na·a iako aganchakbo: Jisu a·gilsakona re·babebeahaode Uko
maina a·gilsakni itihas (history) serika dongja?"

"Nang sing·ani nama," ine pamong aganchakaha, aro ua adita ki·taprangko badalaha. "A·gilsakni
itihasrangoba Jisu Kristoni gimin serika dongaba."

"Ua serikanirangko anga an·tang nikna skachim," ine ua pante aganchakaha.

"Iano Asia Minorni raja saksa Pliny The Younger minggipani 97 gipa chittiko 10 gipa ki·tapo "Letters of
Pliny the Younger" ingipao seako nibo. Iano Pliny an·tangni sason ka·ani a·jao ong·a obostarangko talate
chitti sea donga, Iako nibo, iano ua ia gital dol Kristianrangko maidakginok uko sing·e seata. Uamangni
dolni rang·san baribaani gimin aro uamang an·tangtang dilgipa Kristoni gimin git ring·anirangni gimin
agana. Ia chittiko Pliny A.D. 110 jolo seaha. Pliny chittiantion Kristoni gimin aro Uni bebera·ania
watatarangni somoio mai ong·ahachim uko agana.

Ua pante aiao inmane aganaha, "Angna aroba dingtangko mesokangkubo."

Pamong kinggipin ki·taponiko badale aganaha, "Sakgipin itihasko

segipa Tacitus minggipaba Plinyni somoi jolo dongachim. Uni ki·tap
Annals ingipao (Book 15, chapter 44) Romko so·mitingo Nero maikai
Kristianrangko mitchiahachim, aro Kristianrangara Kristo minggipa
mandeoni ong·kata ine talatani donga ine agana. Jisu Kristoan Kristian
toromko a·bachengatgipa aro uko Pontius Pilat Judeao sason ka·gipa
Tiberius raja ong·ani somoio Jisuko so·otna hukumko on·aha ine sea.
Iarang gimikan Sastroo serikani baksa melia.

"Pamong, angade a·gilsakni itihaso indake serikarang donga inede

u·ikujachim" ine ua pante aganaha.

Pamong una indine agandapaha, "A.D. 180 jolo Celsus minggipa mande Kristianrangko a·rik sanalani
gimin ki·tapo seaha aro uan ua somoiode Kristianrang bilakbaaha ine mesoka. Na·a jajakuenga ong·ode
Niam Gitalni skanggipa ki·tap kingbriko poraibo, uaba itihas gitan apsanaia."

A·gilsakni itihasara Sastroni itihas baksa melia ine ua pante u·iahaon Jisuara a·gilsako dongbebeaha ine
bebera·aha.

1. JISUDE SKANGONIN DONGA

Jisu namgipa mandemangmangsan ong·aija. Ua Isolba ong·a. Jisu

An·tangko Isol ong·a ine maikai paraka?

"Angko na·simang u·igenchimode, indide Apakoba u·igenchim;

aro da·ontaltal na·simang Uko u·ia, aro Uko nikaha. ……….. Angko
nikgipa Pagipako nikaha" - Johan 14:7-9.
Isolara sawa, aro Ua maidake ong·a, uko u·inade Jisuko niaibo. Ua indine agana:
"Angmung Apa apsan" - Johan 10:30.

Pagipa Isol aro Depante Jisu skangonin dongbaaha (Ibri 1:8). Jisu aro Isol pangnaba dingtang
dongkujachim. A·gilsako janggi tangmitingo Jisu maikai ka·sae mesokaha ua apsan dake ka·sae
mesokanichi Pagipa Depantena ka·saa aro simsakachim.

2. KRISTOAN, ITIHAS ARO KATCHINIKANI JA·PANG

Kristoni janggi tangania katchinike aganani chu·sokgiminsa ong·aiani gimin Uni janggi tanganikoa, Uni
atchina skangan sesoaha. Niam Gitchamo katchinikgiparanga Kristo maidake janggi tanggen, sigen aro
chakatpiltaigen uko agansoani ong·a. Niam Gitalo Uni janggi tanganiko serikania agansoani
chu·sokanisan ong·aia.

Bilsi 500 aro 1500 rangna Kristoni atchina skang Niam Gitchamni
katchinikgiparang Messiani janggi tanganiko chang 20 na baten agansoaha.
Kristoni a·gilsako kam ka·na a·bachengaoni, Uni janggi tanganiko
manderang tosusae nion uamang maidake nikaha?

"Jeni gimin Mose niamo, aro katchinikgiparango seachim, ukon chinga

man·aha, uan Josephni depante Nazarethoni Jisu" - Johan 1:45.

An·tangni gimin mesokna gita katchinike serikao chu·sokanini gimin

an·chingni Jokatgipa talataha.

"Unikoa Mose aro pilak katchinikgiparang intaltal, pilak Sastrorango

an·tangni gimin kattarangko ua uamangna agane on·tokaha" - Luk
24:27.

Agansogiminrangni chu·sokanian Jisuan ku·rachakgimin Messia ong·a ine sakiko on·a.

3. KRISTONI JANGGI TANGANIAN KATCHINIKAO CHU·SOKANIKO MESOKA

Niam Gitchamo maiko katchiknike agansoachim - aro uamangni chu·sokaniko Niam Gitalo maikai serika
uko hai nina.

UNI ATCHIANI BIAP

Niam Gitchamo katchinike agananio:
"Indiba na·a Bethlehem Ephratha Judani hajalrangni gisepo ong·na chongipa, Israelo sason
ka·gipa ong·na nang·oni angona saksa ong·katgen; uni ong·kataniara skangonin, skanggipa
salrangoni ong·a" - Mika 5:2.
Niam Gitalo chu·sokani:
"Judeani Bethlehemo Jisu atchiaha" - Mati 2:1.

ME·TRAONI ATCHIANI
Niam Gitchamo katchinike agananio:
"Nibo, me·tra saksa oko kegen, aro depanteko ba·gen, aro uni
bimungko Immanuel minggen" - Isaia 7:14.
Niam Gitalo chu·sokani:
"Joseph, nang·ni jikgipa Mariamko an·tangona rimbana da·ken;
maina uni oko kegimin Gisik Rongtalgipaoni ong·a. Ua
depanteko ba·gen aro na·a Uni bimungko Jisu mingna
nanggen, maina ua an·tang manderangko uamangni paprangoniko jokatgen" - Mati 1:20, 21.

UNI MA·KRING JUDAONI

Niam Gitchamo katchinike agananio:
"Judaoni rajani nisan, aro uni ja·ani giseponi, pamongni gol·dik tang·jawa" - A·ba. 49:10.
Niam Gitalo chu·sokani:
"Maina an·chingni Gitel Judaoni ong·kataha" - Ibri 7:14.

UKO JEGALANI
Niam Gitchamo katchinike agananio:
"Ua manderangni mitchigimin, aro watgalgimin ong·aha" - Isaia 53:3.
Niam Gitalo chu·sokani:
"Ua an·tangniona re·baaha, indiba an·tang manderang uko ra·chakjachim" -Johan 1:11.

UKO PALANI ARO DAM

Niam Gitchamo katchinike agananio:
"Angni ripengtang jeo anga ka·dongachim …… angko bobil dake
uni ja·pa ki·tikko de·aha" - Git 41:9.
"Anga uamangna aganaha, na·simang name nikode, angni
dormahako angna on·bo; indiba indake ong·jaode dondikbo. Uni
gimin uamang angni dormahana rupa shekel kolatchiko toaha" -
Zekaria 11:12.
Niam Gitalo chu·sokani:
"Unon sakchi·gnioni saksa, Iskariot Judas minggipa, kamal
dal·giparangona re·ange aganaha, anga na·simangna uni jakko
on·ode, na·simang angna maiko on·na namnika? Unon uamang una
tangka kolatchiko toaha" - Mati 26:14, 15.

UNI CHISOLO SIANI

Niam Gitchamo katchinike agananio
"Uamangni angni jakrang aro ja·arangko su·pruaha" - Git 22:16.
Niam Gitalo chu·sokani:
"Aro uamang Skobikrok minggipa biapona sokoa, (Uko) chisolo datkapaha" - Luk 23:33. (Johan
20:25 koba nibo).

UNI GOPRAMONI CHAKATPILANI

Niam Gitchamo katchinike agananio:
"Maina na·a angni janggiko a·ningna watgaljawa; aro nang·ni
rongtalgipana soako nikna on·jawa" - Git 16:10.
Niam Gitalo Chu·sokani:
"Uko a·ningo watgaljaha aro uni be·en soako nikjaha" - Watata
2:31, 32.
Iano saki bilaka je, Jisuni gimin adita agansoaniranga
ong·gakaiani ong·ja. Uni janggi tanganiko aiao inmangipa
bilchi u·isoe sesoaha. Beben, Jisuara Isolni Depante ong·a.

Ia sakirangko niani ja·mano an·ching gisiko nange Isolo bi·e

an·chingni janggi tanganio sawa Gitel ong·gen uko basee ra·na nanga. Na·a an·tangko skango Gitelna
on·kujaode na·a da·on an·tangko Jisuni jako on·genma?

4. ISOLNI DAKSOGIMIN JANGGI TANGANI

Atchina skang bilsi ritcharangna daksogimin gita, Isolni una miskongsoani gita Jisu janggi tangaha. Iako
ua gisiko ra·kame Isolni dilanina an·tangko on·kamaiaha. Kristo indine agana:
"Aro angko watatgipa ang baksa gnang. Ua angko saksan watkuja; maina anga pangnan uni
namnikgnirangko daka" - Johan 8:29.

Jisuni atchina skangan Isol una maidake janggi tangani ong·gen uko daksoman·aha, aro uandake
mandenaba Isol maidake janggi tangna nanga uko daksoman·aha. Maidake janggi tangode an·ching
chu·ongnike, chu·soke janggi tangna man·gen ukoba Isolde u·isoa.

Ray minggipa saksa mande an·tangko Isolni namnika gita tangnama

tangjanama jajaengachim. Indiba ua jensalo college chi re·na
a·bachengahaon, maiko poraigen uko dilchina aro dakchaknina Isolo bi·aha.
Bang·a salrangna ua Isolo bi·e Isolni aganchakanina senge donaha. Aditani
ja·man ua dam komigipa indiba dal·begipa Universitychina re·na gisiko
nangatako man·aha. Uano ua aiao inmangipa Kristian manderang baksa
dongrime bilsignini ja·mano uni janggi tangania skangoni baksade namen
dingtangbeaha. Ua ua biapo Campus Crusade for Christ ba "Compoundo
Donggipa Manderangko Kristoona Ambana" ine ingipa dolko
chagrongahachim.

Da·alo Ray an·tangni janggi tanganiko nipilate, maiaba raka basee ra·ani
dongode Isolni dilanina bi·rongaha aro "angni janggi tanganio Isol cholko dake
on·aha" ine ua aganrongaha.

Isol nang janggi tanganina maiko miksongenga uko na·a maikai u·igen?
(1) SASTRO.
Gitko segipani aganani gitade janggi tanganio dilgipa ki·tapara maia?
"Nang·ni katta angni ja·arangna chakki aro angni ramadilna seng·ani ong·a" - Git 119:105.
Isolni katta an·chingni gisikrangko gital dakata aro an·chingna u·ianiko on·a (Rom 12:2; Git 119:99).
An·chingni nangchongmotani-rangko u·inade salanti Isolo bi·e an·ching Sastroko poraina nanga.

(2) ISOLNI DONSOA OBOSTA.

Cholrangko dake donsoachiba Isol dila. Git 23 o Uko namgipa mes nirikgipa baksa toa. Mes nirikgipa
an·tangni mesrangko a·kawe gitaba aro a·brirang gitaba moa. Ua mesrangko nangan somoio dakchakna
changa. An·ching pangnan sepango donggipa Mes Nirikgipa an·ching baksa donga.

(3) KA·TONGNA ISOLNI TONGTONG AGANANI.

Isol an·chingna gisiko u·iatanichiba an·chingko dila. Isolni Gisik "ka·tongni mikronko" (Eph. 1:18)
mikaoatako man·a. An·ching baditana Isol baksa agangrikna jotton ka·a ua an·chingko nambate dilna
man·a. Ua an·chingni chanchiani, bichal ka·ani bilrangko namdapata, unon maiko dako nambatgen uko
an·ching u·ia.

5. DILANIA MELINABA NANGA

Na·a an·tangni skako skatang dakengoba (Toe Skiani 16:25) Isolni dilaniko ja·rikenga ine na·a
chanchiainaba man·a. an·chingni skaniranga Sastro baksaba melina nanga. kosako sebagipa
minggittamrang apsan melijaode, uko Isolni dilenga ine aganna kenani ong·a.

Mesokna gita, Jakeni obostako chanchiate nibo. Uo nambegipa jikgipa aro dedrang sakgni donga, indiba
ua sakgipin me·chikko jikburing man·engachim. "Anga iani gimin Isolo bi·beengachim, aro anga chanchia
ian Isolni skani ong·enga," ine ua ripengskarangna aganengachim.

Jakeni chanchiani aro uni gisikni u·anirang uko ong·gija ramaona dilangengachim. Ua uko Isolni dilani ine
chanchie Sastroo til·ekna beng·anikode nikna gualaha. Aro Sastro "niam aro saki" (Isaia 8:20) ong·a uan
mandeko dilanio ong·e re·na dilani ki·tap ong·a. Sastrooni bikpilangenganiko Isolni dilani ine channa
nangja.
6. ISOLNI DILANINA PAKWATANI

Diabol Jisuko bakrao dakmajona re·bahaon, ua indine aganaha, "Na·a nang·ni Pagipani nang·na daksoa
duk aro saknagipa boli on·aniko jegalode, anga nang·na a·gilsakko nang·ni jako on·gen - mingsingani,
rasong aro janggi tangao suk mahako on·gen." Jisuko dilsretna Satan Sastrokon jakalahachim. Indiba
"sea gnang" (Mati 4:1-11) ingipao Jisu rake dongaiaha. Mingsa
nambegipa kamko Jisuni janggi tangaoniko an·chingni skie ra·ania Jisuni
an·tang janggi tanganiko Pagipana pakwatanian ong·a. Gethsemani bario
dukni somoioba ua Pagipao indine bi·aha, "O Apa, ong·na man·ode ia
ringchakani angoni chel·angchina" (Mati 26:39). Pagipani nangnika gita
bilsi gittam kam ka·ani ja·mano Kristoni siango agangipa kattaranga
"Matchotjok" (Johan 19:30) ine ong·aha. Jisuni indine aganani
miksongania, "Isolni miksonga gita janggi tangani da·o chu·sokaha aro
matchotaha."

Isolni ku·rangko Uni kattaoniko Uni dilaniko ba nang·ni ka·tongo aganako

knaon, Uni dilaniko na·a ra·chakbo. Isolni nang·na miksonganiko
ja·rikanio na·a katchaaniko man·gen.
 Maikai Chu·ongnikgipa Janggi
Tanganiona Kabatako Man·na Ama
Uamang uni grengko Atlantic sagalni chichango chongipa
noko nikaha. Saoba uni songreao jabrina songreani gimin
serikanikoba nikaha. Uko 1725 bilsio uni maiba dosna
Ascension chichango dongale galangahachim. Bon·kamao
ua chi ringna skako namatna ki·singni an·chirangko ringna
nangaha. Uni be·enni dukara jrimachim, indiba uni serikanio
gitade uni dakgimin dosna ua duk man·batengachim.

Ua duk ong·bee indine seaha, "Kakket ong·ani ramako wate,

janggi tanggiparangna mairongpile dukni." Ia kalasini ua
sikdikdikgipa chichango dal·bate duk man·aniara an·tangko Isoloniko ekatako man·anian ong·a ine nikani
giminsachim. Uakosa ua bon·kamao chakna amjaha.

Manderang Adam aro Hobani beng·gimin biteko cha·ani ja·mano

(A·ba. 3:8) bolgrimo dongnuaonin ka·tongtangtango konggrang dake
nikaoniko namatna krengbeenga. Isolni uamangko okame re·baon
Adam aro Hoba kratcha·e dos ong·e nike aro kene Isoloni kataha. Ua
apsan kenanirangan da·onaba an·chingo dongengkua.

Isolko an·chingoniko maia ekataha?

"Na·simangni namgija dakanirang na·simangko aro na·simangni

Isolko ekgrikataha, aro ua knajana gita na·simangni paprang uni
mikkangko na·simangoniko donnuaha" - Isaia 59:2.

Isolko an·chingoniko ekatania Uni kam ong·ja. Isol Adam aro Hobaoni
katjaha, indiba Adam aro Hobasa Isoloni kataha.

1. AN·CHINGNI DONGNUGIMIN OKKRIATANIKO OKKATANI

Pap napna skangde Adam aro Hoba Eden bario Isol baksa kusi ong·bee nangrime dongna man·achim.
Indiba rasong grie uamang Isol gita seng·gen ine Satanni togianiko bebera·e Isolo uamangni
ka·dongchakaniko pe·aha (A·ba. 3).

Uamangko Eden barioniko a·rikmano Adam aro Hoba janggi tanganiko rakbate nikaha. Bi·sa ba·ani aro
a·bao kam ka·aniranga da·o an·chi ding·ol aro mikchi ong·esa chu·sokatako man·aiaha. Uamangni Isol
baksa meli-nangrimani be·aha, duk aro skimanirang sokbaaha aro papni a·sel uamang sikdikdik ong·e
nikaha.

Adam aro Hobani katta manigija dakahaonin pilak mandeni jatan ia apsan papni dolo ga·akpae papni
dormaha, sianiko man·na nangtokaha.

"Jedake mande saksachi pap a·gilsako napaha, aro papchi sia napaha; aro uandake sia pilak
manderangona sokaha, maina pilakan pap ka·aha" - Rom 5:12.
 An·ching pilakan ka·tongni okkrianiko gapataniko aro an·chingko naljoke
rakianiko man·na ska, jekon Isolsan- mangmang on·na man·aia. Ua
okrianiko an·ching maiba kusiniko dakanichi - kam dal·a man·na susaanichi,
chu ringe chio bilone sianichi ba maiaba katchaanirangko am·anichi gualatna
kam ka·a.

Indiba iarang pilakan Isoloni sikdikdik ong·ani giminsa ong·aia. An·chingni

janggi tanganio Isolni ka·saaniko man·pilskaode an·ching uko namatnan
man·jawa.

"Na·a angna janggini ramako mesokgen; nang·ni mikkango ka·srokani

gapa gnang; nang·ni jakrao jringjrotna an·senganirang donga" - Git 16:11.

Chu·gimik chu·ongnikanikode an·ching Isol baksa meli- nangrimatna man·ahaosa man·aigen, aro Uni
sambao dongpana man·osa ong·aigen.

2. PAP ARO SIANI A·KUANGKO JAL·ANG CHANBATANI

Papni a·selna mandesan duk man·aijaha. Adam aro Hobani pap ka·e Isoloni katahaon, Isolni ka·tongba
sapaaha. Aro Ua da·oba mandeni dukna duk man·paa. Ua an·chingni man·na skanirangko chu·sokatna
aro an·chingni gisikni saknaanirangko nampilatna ske dongenga. Ua An·tangoni ekanggiparangko niwate
donge kusi ong·e dongenga ong·ja. Pap aro siaoniko jal·ang kabate uamangko nampilatna Isol seoke
ra·aha.

"Maina Isol a·gilsakna inditan ka·saaha, ua an·tangni saksakamkam depantekon on·jok, maikai uo
bebera·gipa sakanti gimagija jringjrotni janggiko man·gen. Maina a·gilsakko bichal ka·china, Isol
An·tang Depanteko a·gil-sakona watatjachim; indiba a·gilsak maikai uachi jokna man·gen" - Johan
3:16, 17.

Isol An·tangni Depanteko papni daiko gamna man·na gita boli dake
on·aha. Uni janggi tangani, siani aro chakatpilania mandeni
dal·begipa papko kema man·ate uko jokatani chol ong·aha aro uan
Kristo aro Satanni cholonni dingtanggrikaniko mesokaniba ong·aha.
An·chi jokenggipa Kristoni be·en, paponiko an·pilatna papirangna
jal·ang chanbate on·ani gita ong·aha. Ka·saanian a·kuangko jal·ang
kabatani gita ong·aha, unon Kristoo bebera·e Uko Gitel Jokatgipa
dake ra·chakgiparangna jringjrotni janggiko man·atna cholko dakani
ong·aha.

3. JISUNI GIMIN NANG·NI U·INA NANGGIPA MINGSNIRANG

Darang a·gilsako janggi tanggipa mandeba ia Jisuni cholon mingsni gita ong·gipa dongja:
(1) Jisu Salgioni A·aona Re·baaha
Jisuara basakonin dongengachim?
"Abrahamni atchina skangon anga gnang" - Johan 8:58.

Jisu a·gilsak gimikna indine aganenga, "Anga donga". Anga skangnin dongaienga aro dongangkugen.
Jisu mande me·chikoni atchiahaoba (Mati 1:22, 23) Ua Isol baksa ong·achim. Isol mandeni bimango
atchigimin ong·a.

Dwight L. Moody, ritcha chi·sku chasongni Billy Graham, Jisuni mande ong·e atchianini gimin changsao
indine aganaha: "Jisu mande ong·e atchie sonani palango tuatako man·ahaoba, sa·grerangchi rodila aro
simsakako man·ahaoba aro sonani chamoschi cha·na man·oba, Uni salgioni re·bae a·gilsako dongania
dal·begipa on·kangani ong·kugenchim. Indiba a·gilsakko Dakgipa Rugipa mandeni be·enko ra·e kangal
ma·a paao atchie namjabatsranggipa obostarangko chagronge dal·baaha."

Jisuni atchiao sa·gre Johanna indine aganeaha:

"Ua (Mariam) depanteko ba·gen, aro na·a uni bimungko Jisu mingna
nanggen, maina ua an·tang manderangko uamangni paprangoniko
jokatgen" - Mati 1:21.

Jisu a·gilsakko dakgipa (Johan 1:1-3) an·chingni a·gilsakona re·bae

an·chingko pap aro siaoniko jokatna re·bana skengachim.

(2) Jisu Pap Gri Janggi Tangaha

"Isolni Depante Jisu …….. pap gri, pilakni gimin an·ching gita
dakmajoako man·aha" - Ibri 4:14, 15.

Pap gri janggi tanganiko Isol ku·sikchi aganmangmangaia ong·ja. Ia a·gilsako Ua mande gita janggi tange
pap gri ong·e janggi tange mesokaha. Ua pilak nambatgipa skiprakanina bate Uni janggi tanganian
nambate skiprakani ong·aha.

Kristoni bobil Satan, Jisuni a·gilsako kam ka·mitingo Uko pap ka·atna jotton ka·beahachim. Bakrao Uni
Isolna kakket ong·aoniko bilgriatna ua raken kam ka·aha (Mati 4:1-11). Chisolo so·otako man·na skang
Gethsemane bario Ua bilakbee dakmajoaniko man·aha aro an·chi ding·ol gita jokpilaha (Luk 22:44).

Indiba Kristo Diabolni pilak dakmajoaniko chakaha, aro "Ua pap

ka·jahachim." Jisu An·tangan dakmajoa aro neng·nikanirangko
chakangahani gimin Ua an·chingni neng·nikanirangkoba ma·sichaka. Ua
an·chingni bilgriao duk man·pana (Ibri 4:15) u·ia.

Jisuna maina pap gri janggi tangania nangchongmotgipa ong·a?

"Papko u·igijagipako ua chingni gimin papigipa dakaha. Chinga

maikai Uo Isolni toromi ong·gen" - 2 Kor. 5:21.

Jisu dakmajoako man·oba pap gri dongaiaha, indakesa Ua an·chingni

gitcham janggi tanganiko Uni pap gri janggi tangani baksa srena man·gen.

(3) Papko ra·angna Jisu siaha

Badita sak manderang pap ka·aha?
"Maina pilakan pap ka·aha, aro Isolni rasongko man·sokja" - Rom
3:23.

Papna sastia maia?

"Maina papni dormaha sia, indiba Isolni ka·sae on·aniara an·chingni Gitel Kristo Jisuo jringjrotni
janggi ong·a" - Rom 6:23.

Jisu maina siaha?

"Nibo, Isolni Mes Bi·sa, a·gilsakni papko ra·anggipa" - Johan 1:29.

An·ching pilakan pap ka·ahani gimin sianiko man·na nangahachim, indiba Jisu an·chingni palo siaha. Ua
"an·chingna pap" ong·skaaha. Ua an·chingko siatani daiko gamaha. Uni siania an·chingna indin on·ani
ong·a aro ua "on·ania an·chingni Gitel Kristo Jisuo jringjrotni janggi ong·a" (Rom 6:23).
An·chingna ka·sae on·ani gita Jisu An·tangni toromi ong·e janggi tanganiko on·skaaha. Indakgipa
ka·saaniko mandeni gisik u·isokja aro Uni siani a·selsa "an·ching Isol baksa tom·tomaniko man·a" (Rom
5:1).

(4) Jisu Siaoni Chakatpilaha

Jisuni kamara Uni chisolo siahaon bon·eaia ong·ja. Ua sie donge an·chingni Jokatgipa ong·na man·kuja.

"Kristo chakatatako man·kujaode na·simangni bebera·a ong·gramaia, na·simang na·simangni

paprango dongpiti. Indide Kristoo sigiparangba gimaaha" - 1 Kor. 15:17, 18.

Mohammed aro Buddha a·gilsakna adita aiao inmangipa beberangko skiaha. Uamang millionni
manderangko gisiko nangataha, indiba uamang gopramo sie bon·chipaiahani gimin uamang gipinrangna
janggiko on·na man·giparang ong·ja.

Siani gittamgipa salo Jisu chakatpilahani gimin Ua mai

ku·rachakaniko an·chingna on·na man·aha?

"Anga tanga, na·simangba tanggen" - Johan 14:19.

Jisu tangenga. Ua siani kosako bil dongani gimin Ua an·chingko

siaoniko jokatna ama aro bang·bee jringjrotna janggiko on·na
man·a. An·ching Uko an·chingni ka·tongrangona rimnapode, Ua
an·chingo donggen. An·chingni salanti nanganirangko chu·sokatna
Kristo pangnan tange dongenga.

"Nibo, sal chon·jaskal pangnan anga na·simang baksa donga" - Mati 28:20.

A·gimikoni manderang an·tangtangni namgija bewalrangoniko Jisu maikai uamangko jokatahachim, uko
gipinrangna agane on·enga.

Chingni Sastro poraiani lekkarangko poraigipa chatrorangoni saksa aganchakani lekao ia kattarangko
mitele seataha: "Anga chu ringrakgipa ong·achim. Salsao anga chu peke dongmitingo na·simangni Sastro
poraiani lekkarangko aganparake seaniko jaboldamo ga·ake dongengako anga nikaha. Anga uko kolame
gapate wataton Kristoko u·ichongmotaniko anga man·soaha. Ua lesonrangko poraiani ruutkujaon anga
angni ka·tongko Isolna on·aha, aro chu ringna skani angoni gimaangaha."

Ia mandeni janggi tanganiko Kristo ra·ahon, uni chu ringna skaniko gimaatna ua bilko man·aha. Jokatgipa
chakatpilgimin Kristo ong·ani gimin Uona dakchakaniko nange re·bagiparangna Ua dakchakna man·a.

(5) Jisu Salgichi Gadongaha

Uni chakatpilani ja·mano Jisu Pagipaona re·pilangna skang (Watata
1:9) Ua ia ku·rachakaniko Uko ja·rikgiparangna on·angaha:
"Na·simangni ka·tongko jajrengatjachina. Isolo bebera·bo angoba
bebera·bo. Apani noko dongani biap bang·a ……….. Anga
na·simangna biapko daksona re·nasia. Aro ……… Anga re·bapile
na·simangko an·tangona rimanggen, maikai anga jeo donga
uanon na·simangba dongna man·gen" - Johan 14:1-3.

(6) Jisu Salgini Kamal Ong·e Kam Ka·enga

Jisu pangnan an·chingna salgio biapko on·na kam ka·enga.
"Manderangni paprangna nangrimataniko dakna, Isolnirangni
gimin ka·sachakgipa aro bebegipa Kamal Dal·gipa ong·na gita
pilakni gimin jongadarang gita ong·na nangachim. Maina Ua
an·tangan dakmajoako man·e duk chakahani gimin dakmajoako man·giparangna dakchakna ama"
- Ibri 2:17, 18.

Manderangni papna boliko on·na Jisu a·gilsakona re·baaha, aro an·chingko papni nokolrang ong·aoniko
jokatna re·baaha. Papni a·sel duk, saknaa aro siaoniko Diabolni ra·bagipako gimaatna Jisu siaha.

Jisu an·chingni Kamal Dal·gipa ong·e "pilakni gimin jongadarang" gita ong·aha. Ua da·o Pagipani sambao
mol·molchakna pangnan dongenga. Ia apsan Jisuan jean bi·sarangna patiaha, til·ekao rim·a man·gipa
me·chikko kema watgipa, Uan an·chingni nanganirangna "dakmajoako man·giparangna" kam ka·enga.

(7) Jisu Re·bapiltaigen

Salgichi re·pilangna skang Jisu maiko ku·rachakanga?
"Anga na·simangna biapko daksona re·nasia. Anga re·bapile na·simangko an·tangona rimanggen,
maikai Anga jeo donga unon na·simangba dongna man·gen." - Johan 14:3.

Jisuni re·bapilahaon Ua an·chingko papkoniko, saknaaoniko aro siaoniko ia a·gilsakoniko jokatgnok. Aro
Ua an·chingko pangnan katchakamaigipa siani grigipa gital a·gilsakona rimchaksognok.

4. CHU·SOKGIPA KA·SAANI

Taiwan a·songo maharini bia ka·e on·na tarianini gimin golpo agana donga. Panteko U Long mingachim
aro me·trako "Golden Flower" ine mingachim. Bia ka·mano me·chikni mikkangko pingopgipa ba·rako U
Longni oprakate niahaon U Long namen duk man·aha. Ua me·trani mikkangara uri naani dak donge
ritchek ritchek daka dongachim.

Uni ja·mano U Long jikgipako gele dongaiaha. Me·chik, segipako kusi ong·atna gita man·a dipet kam
ka·aha. Indiba segipa uni kamrangna mamungkoba chanchiskajahachim.

Bia ka·e dongani bilsi chi·gnini ja·mano U Long maibakai kana ong·na a·bachengaha. Uni mikron
birongko bodolna man·jaode ua kana ong·kamgnok ine doctor una aganaha. Indiba uo korosh
dongjachim, aro mikron bodolna nanggipa manderang bang·beani gimin uko ruutani ja·manosa operate
ka·na man·aigenchim.

Golden Flower an·tangni somoi gitchaa man·ao megapni tupirangko tarie tangka man·na palna kam
ka·aha. Salsao saoba mande U Longna indine kobor on·eaha je saoba accident ong·ani ja·mano an·tang
mikronko on·na man·engahachim. Ua hospitalchi chaanggalgale mikronko man·eaha aro an·tang
mikronna uko doctorrangko an·tangko operate ka·ate tekatskaaha. Sana nambapilani ja·mano ua
an·tangko sananina tangkako jikgipani chimongahanina uko nidikesa mitelna okamataha. Jikgipani
re·baahaon ua jikgipako niatna an·pilaha. Jikgipa mikron grisa segipako nitate dongeaha, aro segipara
jikgipao mikron birong dongtokjaha ine nike jagokmanpilaha. Ua ka·a chakna amjae jikgipani ja·ako rim·e
grapaha. Aro da·osa skanggipa changna ua jikgipako ku·mituchi bimung
minge okamaha: Golden Flower.

An·tang baksa nangrimgija dake gele katgipa manderang baksa Jisu

nangrime dongna ske dongainga. Bon·kamao an·chingni Uko Jokatgipa
ine minge ra·chakaniko Ua am·enga. Ua An·tangni ka·saaniko mesokna
gita mikronmangmangko on·kangana bate be·en gimikkon an·chingna
on·kangna skaha. Uni ka·saania inditan bilakani gimin Ua papirangko
jokatna a·gilsakona re·baaha (1 Timothy 1:15).

Kristoni dal·begipa ka·saanian papirangni dal·begipa a·kung nalsachi

dongaoniko Kristoona nangrimataha. Ua apalbegipa a·kuangoniko
nang·ko An·tang jakpongrangona salbakna skaniko na·a u·iahachimma? Nang·ni bi·ao na·a indake maina
aganja, "Jisu, anga Nang·na ka·saa. Nang·ni aiao inmanpilgipa on·kanganina Nang·ko mitela. Angni
ka·tongona re·bae angko da·o jokatebo, angko chu·gimik pangnajolna jokatebo"?

JISU
Isol ong·e mandeni bimango re·baaha
An·chingni biapo pap gri janggi tangaha.
An·chingni paprangna siaha.
An·chingko jokatna siaoni chakatpilaha.
Salgio an·chingna biapko tarisona gadoangaha.
An·chingni Kamal Dal·gipa ong·e kam ka·enga.
An·tang baksa jringjrotna dongkamatna gita an·chingko rimna
re·bapilenga
 Maikai Janggi Tangao Gnigipa Chang
Cholko Man·taia
Janggi tangani bang·bata bilsirangna kingking Budhist toromo janggi tangbae da·ode saksa Kristian
toromko ra·skagipa mandeko "Pa. Lim saksa Kristian ong·e janggi tangamung aro saksa Budhist toromko
bebera·e dongamung baditana kingking dingtanggrika?" ine sing·on ua aganchake inaha, "Iade altuabea,
Jisuko angni jokatgipa ine ra·chakantal angni gisiko tom·tomanian gapaha."

Jisuo pangchakon an·chingni ka·tong gisiko tom·tomanian gapa.

"Na·a chu·sokgipa tom·tomao uko rakigen, jeni gisik nang·o pangchaka, maina ua nang·o
ka·dongaha" - Isaia 26:3.

Kristian ong·e janggi tanganio chu·sokgipa tom·tomani gnang. Rakianiko chu·soke ma·siani aro name
dongani gnang. Jerangan ia u·ianiko am·e man·aha uamang Jisuo janggi tanganina gnigipa chang cholko
man·aha.

1. JOKATANI INE AGANGIPARA GIMAGIMINRANGNA MAIKO MIKSONGA

Tange dongenggiparangba gisiko sigimin ong·na man·a.

"Na·simangkoba ua tangataha, NA·SIMANG NA·SIMANGNI

NAMGIJARANGO ARO PAPRANGO SIGMIN ong·mitingo, je
paprango skango ia a·gilsakni tanga gita bangbangni bilni
chong·motan manigijani DEDRANGO DA·O KAM KA·GIPA
GISIKNI PAMONG gita na·simang re·ruraachim" - Ephesus
2:1, 2.

Gisiko sigimin mandeko Satan pap aro manigijani bewalo

salwilwile onbatgipa gadangona ra·oe gala. Indiba nama kattao
mingsa, aiao inmananide indakpile ga·akgimin mandenaba Isol ka·sakuenga. Papo sie
dongenggiparangnaba Ua ka·saa aro chu·gimik naljokaniko uamangna on·enga.

"Indiba ka·sachakao gam gnanggipa Isol, je ka·sara bang·beachi ua an·chingna ka·saaha, uani
gimin, an·ching paprango sigimin ong·oba ……..ua maikai re·baenga chasongrango uni ka·saani
agre gamchatako Kristo Jisuo an·chingna rinok rinok dake mesokna man·gen" - Eph. 2:4-7.

Ka·sachakako man·na kraani grimitingon Ua an·chingna ka·saaha. Uni ka·sachakanian Jisu Kristoo
an·chingna gital janggiko ong·ataha. An·chingde an·tangtangko dingtangatna amja; indiba Isolde uko
dakna ama. Bebera·e an·tangko Una chu·gimik on·kangsrangon Ua an·chingna gnigipa cholko indin
on·taia.

2. MAIONI AN·CHING JOKATAKO MAN·NA NANGENGA?

(1) An·ching paponi jokatako man·na nangenga.

"Maina pilakan pap ka·aha aro Isolni rasongko man·sokjaha" - Rom 3:23.

Iako kan·dike aganode - an·chingni namani gimin u·ia gitamangba an·ching dakja. Gisiko dongtogijagipa
ma·a paa bi·satangko saidate gisiko saatnaba donga. Saksa mande gari salenggipa mandeko ka·o
nangbee jentensa uno chagaknasiaoni jokengnaba donga.
"Pilak toromi ong·gijani pap ong·a" - 1 Johan 5:17.

Pilak namgija dakbewalrangoni an·chingko jokatna nanga; jedakode - tol·a, ka·o nanga, be·enni
skanirang, namnikgija dakanirang uandake aroba minggipinrang dongenga.

"Papko ka·gipa sakantian niamkoba pe·a aro niamko pe·an pap ong·a"
- 1 Johan 3:4.

Uni gimin an·chingko paponikoba jokatna nanga.

(2) Isol baksa nangrimaoniko dingtang ong·ataoniko an·chingko

jokatna nanga.
"Indiba na·simangni namgija dakanirang na·simangko aro
na·simangni Isolko ekgrikataha, ………. Na·simangni paprang uni
mikkangko na·simangoniko donnuaha" - Isaia 59:2.

Kema watako man·gijagipa paprang an·chingko Isol baksa nangrimaoniko dingtangataha. Uni gimin Isol
ka·dongchakaniko on·taina miksonge Jisu ia a·gilsakona re·baa.

(3) Papni a·sel jringjrotna gimagnioniko an·chingko jokatna nangenga.

"Uni gimin jedake mande saksachi a·gilsako pap napaha aro papchi sia napaha aro uandake sia
pilak manderangona sokaha maina pilakan pap ka·aha" - Rom 5:12.

(4) Papo dongengaoniko, kusi ong·gijaoniko bangbango janggi tangengaoniko an·chingko jokatna
nangenga.
Papi mandenade, uni janggi tangania bon·chongdikgipa ramako re·ani gitasa ong·aia.

(5) Papan gapgipa a·gilsakoniko an·chingko jokatna nangenga.

Ia papan gapketketgipa a·gilsakoniko an·chingko jokatna nangenga.

3. SAWA AN·CHINGKO JOKATNA AMA?

Jisu mangmangsan an·chingko jokatna man·aia.

(1) Jisu an·chingko paponiko jokatna ama.

"Ua depanteko ba·gen aro na·a uni bimungko Jisu mingna nanggen maina ua an·tang
manderangko uamangni paprangoniko jokatgen" - Mati 1:21.

Saksa Hindu an·tangni saksa Kristian ripengna agane inaha, "Kristian toromo donggijagipa bang·a
kattarangkon anga Hindu toromo nikna man·a, indiba Kristian toromo mingsa gnang, uan "Jokatgipa"
ong·a. Kristian toromo mangmangsan a·gilsak gimikko jokatgipa gnang.

(2) Jisu an·chingko Isol baksa nangrimattaina ama.

"Na·simang maikai unsalo Kristooni dingtang ……… Indiba na·simang skango chel·beaogiparang
da·o Kristo Jisuo, Kristoni an·chichi sepang ong·aha" - Ephesus
2:12, 13.

Ripeng dake melie dongnade Jisuan nambatgipa ong·aia. Ua

an·chingna pilak nambatanirangkosa ra·bana skaienga. "Kristoni
an·chichi" an·chingni skangni paprangko kema wataha, aro salantio
an·chingko name janggi tangna man·na gita Ua bilko on·enga,
indake An·tangni chu·sokgipa janggi tanganiko on·enga. An·ching
ga·aka changantian an·chingko salchrona gita Ua sepango
dongenga. An·ching Una ka·saon Uni namnika gita janggi tangna skatako man·gen.

(3) Jringjrotna gimagnioniko Jisu an·chingko jokatna ama.

"Maina papni dormaha sia, indiba Isolni ka·sae on·aniara jringjrotni janggi ong·a" - Rom 6:23.

Niamko pe·giparang ong·ahani gimin an·chingde sina nangjokchim. Maina sian papni krabatgipa sasti
ong·a. Jringjrotna signioniko jokate, Jisu an·chingna jringjrotni janggiko on·skaaha.

"Maina an·ching papi oong·engon Kristo an·chingna sichakaha" - Rom 5:8.

Uni bon·changgija ka·saani giminsa Jisu an·chingna sichakaha. Uni siani aro papni biteko ra·ahani
giminsa an·chingko Isol kema ka·na man·aha.

(4) Papo kusini ong·gija dongaonikoba Jisu an·chingko jokatna ama.

"Uni gimin saoba Kristoo dongode ua gital dakgimin ong·a, gitchamrang gimaaha, nibo uarang
gital ong·aha" - 2 Kor. 5:17.

An·ching an·tangtangaride paponi jokna amja ba mangsa singhoni mes bi·sa pil·skana man·gija gita
an·chingba an·tangtangko dingtangatna man·ja. An·chingni skana baten papde bilakbata. Indiba Jisu Uni
gisikchi an·chingko bilakatna ama. An·chingni namgija dakbewalrangko Ua ka·saa, tom·toma, katchaa,
rinok rinok daka aro an·tangko bamata, iarangchi sreskana man·a

Herald Hughes an·tangko dingtangatna man·chongmotjawajok ine

chanchipiljokchim. Bang·a changna kingking ua an·tangni chu ringani
bewalko galsrangna jotton ka·bejokchim. Chu ringani a·selan ua
an·tangni jik derangko bilsi chikkungna kingking aiao inmanpile duk
ong·ataha. Salsao ua an·tangko pistolchi goe sina miksongaha. Indiba
an·tangko so·otani a·selko ua Isolna aganchengna miksongaha.
Bakrobee Isolo bi·mitingo ua namen ka·beaha aro an·tangko
dakchakchina Isolo mol·molberaha.

Isol uni bi·aniko knachakaha aro ua sal dipetan ua chu ringako

galsrangaha. Ua Sanate (USA ni Parliament House) ni saksa member
ong·paaha. An·tangko dingtangatna man·gipa Jisuko ua grongaha.

(5). Papni a·gilsakoniko Jisu an·chingko jokatna ama.

Mikkang Dilanibrirango an·ching AM·E NIBO Dilanio iani gimin talataniko nikgen.

4. ALTUABEGIPA GITTAM JA·KURANGKO DE·ACHI

AN·CHING JOKATAKO MAN·NA AMA

Skanggipa Jaku: Nangni paprangko ra·angchina Jisuko aganbo.

Paptangko watgalna gita an·ching maiko dakna nanga?

"Uni gimin na·simangni paprangko kimitna amna gita gisik pil·bo aro pil·taibo" - Watata 3:19.

Saksa mandeko maia mancha gisik pil·china didiata?

"Isolni rinok rinok daka nang·ko gisik pil·aona dila" - Rom 2:4.

"Paprangna duk ong·ani nang·ko gisik pil·china didiata" - 2 Kor. 7:9.

Batanggimin salrango ka·gimin paprangna duk ong·e pilak namgija dakbewalrangko wate uarangoni
chu·gimik an·pilakon gisik pil·a ine minga. Ian sastina kene duk ong·animangmangkosan miksongaia
ong·ja, indiba Jisuni an·chingni paprangni palo biapko ra·skaahani gimin aro Isolni ka·saanina
an·tangtangko Una on·pilskaanisa ong·a. Pap Isolko duk ong·atani gimin an·ching papko jegalna nanga.

An·ching Kristoo gital janggi tangna a·bachengahaon, man·a dipet batanggimin salrangni paprangna
kema man·na nanga (Ezekiel 33:14 - 16).

An·chingni janggi tangani gitchamko galna dakengo Isol maikai dakchaka?

Gisik pil·ani aro kema watako man·anian Isolni an·chingna indin on·anirang ong·a.

"Ukon gisik pil·ani aro pap wataniko Israelna on·na, Raja aro Jokatgipa ong·china (gita) Isol
An·tang jakrachi chuataha" - Watata 5:31.

Aro an·ching gisik pil·on, ka·sagipa Jokatgipa an·chingni paprangko kema ka·a aro paprangoniko
an·chingko rongtalata, aro uarangko sagalni tu·achi galata.

MAIKAI AN·CHING KRISTOONIKO

GITAL JANGGIKO MAN·A
1. Uko bebera·e Jokatgipa aro Gitel ine ra·chakachi.
2. Un baksa nangrimtaiachi. (Sastro poraijringania namen
nangchongmotgipa bak ong·a.)
3. Unon ua an·tang Gisikchi an·chingni namgija dakbewalrangko
uni namgipa gunrangchi sreskaa.

"An·ching an·tangtang paprangko ku·rachakode, an·chingni paprangko watna …. An·chingko

rongtalatna ua bebegipa aro toromigipa ong·a" - 1 Johan 1:9.

Jokatgipani chisolo sichakani bil an·chingni pilak paprangkon kema ka·na ama. Gitelo ka·dongchakgipa
Uo kema mangmangkosan bi·na nangaia. Kema bi·jaode Jisuni sichaka mangmangde an·chingko
jokatjawa. Ong·chongmotgipa bakde indake ong·a je, an·chingni paprangsa Uni jakrango aro ja·arango
gojalrangko napprotataha. Indiba Jisuara an·chingni skengana aro u·iana baten an·chingko kema ka·na
aro An·tang baksa nangrimpilattaina skenga.

Nokoni katbrange dongenggipa saksa pantena uni ma·gipa sinasiengjok

ine kobor sokangaha. Bang·a bilsirang batangani ja·mano ma·gipani
sinakengako knaon ua gisiko duk man·beaha aro ma·gipako bon·kame
grongrikna re·angaha. Ua tongtong ma·gipani turamona re·ange
ma·gipao grape kema bi·aha. Uno ma·gipa depanteko gipake ku·misichi
agane inaha, "Na·a kema bi·ode nang·ni re·brangani salon anga nang·ko
kema ka·aignokchim." Ia kattarangko agane ma·gipa janggi galaha.

Na·a Isoloni chel·e katangahaoba Ua nang·na sengsoenga. Maina ua

nang·na ka·saa aro Ua nang·na sichakaha.

Gnigipa Ja·ku - Jisuoniko gital janggiko ra·chakbo.

Jisuoniko gital janggi tanganiko ra·chakna nang·ni dakna nanggnide Jisu nang·ko jokatbebeaha ine na·a
bebera·na nanggen. Mamung kenchaka grian Jisu nang·ko kema wataha, aro nang·na gital janggi
tanganiko on·aha ine bebera·bo.

"Indiba badita mande uko ra·chakaha ua uamangna chong·motan uni bimungo bebera·giparangna
Isolni de ong·china bil on·aha" - Johan 1:12.

Isolni de ong·e na·a gital janggi tanganiko man·na kragipa ong·a. Agangimin gita na·a uko an·tangari
man·na amja-uan chu·gimik salgini Paani ka·sae on·anisa ong·a! An·chingni kenchakani aro
jajrenganirangoniko jakgitelatna gita Jisu an·chingna ku·rachakaha.

An·chingna gital janggiko on·anio Isolni mai bak gnang?

"Jisu aganchake inaha, Beben anga nang·na agana, kosakoni atchijaode darangba Isolni
songnokko nikna man·ja" - Johan 3:3.

Jisuni aganani gitade bebera·gipa aro paponi an·pilgipa sakantian gital janggi tanganina atchitaigiminrang
ong·a. Ian Isolni aiao inmanpile dakna amani kamsa ong·aia. Ua indine ku·rachaka:
"Gital ka·tongko anga na·simangna on·gen aro gital gisikko anga na·simangni ning·o dongen" -
Eze. 36:26.

Jisu an·chingni ka·tongko - chanchiani aro bewalrangko dingtangata, aro an·chingo donga (Kolosi 1:27).
Ia gital janggi tangania agane roe bon·atanimangmangde ong·aija, indiba ian gisikni siaoni gital janggi
tangna chakatpilani ong·a.

Gittamgipa Jaku - Sakantian Jisunasa tangbo.

Kristian jangi tanganio an·tangna chanchiaoni salanti an·pilani dongna nanga aro indake Jisuko
an·chingni ka·sagipa ripeng dake ra·na nanga. Indake an·ching ia gital janggi tanganio Jisu baksa
nangrimbatroroa. Iani ortoa, namgipa somoirangko ra·en Un baksa kakket dake nangrimani ong·a.
Toromo namrorona gita Isol an·chingna mingbonga dakchakanirangko on·aha, uaranga: Sastro poraiani,
Isolo bi·ani, gipin Kristianrang baksa nangrim-meliani, aro an·chingni bebera·aniko gipinrangna agane
on·anirangan ong·a.

Kristoo janggi tangengon an·ching dakgual-daksretgija dongna man·aha ine ong·ja. Indiba papo ja·gitoton
Jisuo kema bi·e nambate dakna jotton ka·angroroa. An·ching badiabachinade mikkangangenga, aro
Kristo an·ching ka·tongrango dongkama ine an·ching u·ina man·a.

5. GNIGIPA CHOLKO MAN·TAIANIO KATCHAANI

Uni Sanateni saksa member ong·mitingo Herold Hughes uni namgipa member ong·ani gimin bang·a
boksisrangko man·aha.

Attamsao ua Sastroko gisik nangbee poraiengachim.

Unochachaon uni sakgni chonchongipa demechikrang uni
sambao chadengeaha.

Unon chonbatgipa demechik aganaha, "Baba, chinga nang·ko

tusina skang ku·dimna re·baa."

Pagipa kusini mikchiko donnuna man·jaha. Ruuta somoirangonin

bi·sarang pagipani an·tangtangko gipakanina senge
dongaingachim. Da·o uamangni mikronrang kenani dongjaha.
Bon·kamao pagipa nokona re·bapiljok.

Jisu an·ching sakantinan gnigipa cholko on·bebeenga. Ua namjabatgipa papirangmangmangkoba

ra·chaka aro uamangna gital janggi tangtaianiko on·a.

Jokatgipa an·ching sakantini nokona bon·kamao re·baaniko nangnika. Na·a Uni ka·sae okamaniko
ra·chakahama? Uni kema ka·aniko ra·chakania pagipani detangko gipakna jakko badalata gita altuabea.

Na·a Jisuo ka·dongchake nikkujaode, da·on Uo ka·dongchake Uko nang·ni Jokatgipa ine ra·chake nibo,
aro indake bi·bo: "Batanggimin salrango angni ka·gimin paprangna anga duk ong·a Appa, angni pal
sichakchina Gitel Jisuko watatanina mitela. Jisu, ka·sapae angni paprangko kema ka·e ango dongkambo.
Anga gnigipa changna cholko man·na skenga. Nang·mung dongkamna anga skenga. Aiao inmanpile
angko dingtangatanina mitela, Amen." Na·a ia aiao inmanpilgipa am·e nikaniko nike ra·bo: An·ching
Jisuona re·baon Ua an·chingko jokata.
 Nang·ni Mikkangchini Gimin
Doctor Patricia aro David Mrazek uamangni kam ka·anio bang·a ka·beaniko man·aha. Bi·sarangni saako
sangipa doctorrang ong·e uamang bang·a bi·sarangko sanmanaha. Mitam bi·sarangara bilongbee saaoni
nambapila, indiba mitam bi·saranga sianga ine uamang nikaha. Maidake indake ong·a?

Ia sing·anirangna aganchakaniko man·na uamang am·rikkitaniko dakaha. Uamangni am·e u·iania saa
bilongaoni nambapilgiparangni gisepo indake nikaha je, ua bi·saranga namani gimin chanchikamaia aro
ka·dongani dongkama.

Dingtanggrikanide ka·dongani ong·a. Namgija obosta an·chingona sokbaon, ka·dongani an·chingna

dakchaka.

Mandeni jat ka·donganiko bilongen nangenga. Indiba maidake uko man·gen? Sastroni katchinike aganani
gita niatjaskalde ka·donganiko a·gilsako man·na amja. Ia poraianirango niksenggipa katchinike
agananirangko nigen jean bang·a manderangko bilake ka·dongna gita gisik nangataha.

1. AIAO IMMANGIPA SASTROO KATCHINIKE AGANANI

Kristoni atchina bilsi 500 mang skang Isol a·gilsakna Daniel katchinikgipachi aiao inmangipa mikkangchi
ong·gniko mesokaha. Isol a·gilsakni itihaso bilsi 2500 ni somoio ong·gniko skangon mesokman·aha, ian
Danielni somoioni an·chingni chasongona soke mesokaha. Ia katchinike aganania Babylon a·songni raja
Nebukadnezzarna Isolni on·gipa jumango a·bachenga jean bilsi 250 mang re·angaha. Ia jumangara ia
rajako gisik suk ong·atjaha indiba ua mikrakon jumangko gisik ra·jaha. Babylonni pilak gisik
seng·giparang rajako uni jumangko gisik ra·na ba orto pe·na dakchakna man·jaha. Uni ja·mano
rim·gittanga man·bagipa Ibri pante Daniel minggipa ua jumangko gisik ra·atna aro uni ortoko pe·na
okamako man·aha jean salgini Isol pilak u·igijanirangko parakna man·a ine aganachim.

Rajani mikkango ka·donga gnang chadenge aganparakataha:

"O raja, na·a niengachim, aro nibo, bimang dal·begipako nikaha. Ia bimang bilakbegipa aro
ching·batbegipa nang·ni mikkango chadengaha aro uni mikkang namen kenbeani ong·achim.

"Ia bimangara, uni sko namgipa sonani, uni ka·bak aro uni
jaktongrang rupani, uni ok aro uni ja·pingrang rangni, uni
jaktongtangranga silgrakni, uni ja·arang silgrak aro a·ste ong·achim.

"Jakchi den·otgijagipa ro·ong dotsa ua bimangni silgrak aro

a·steko dakgipa ja·ako doktonge be·kningatkujana kingking na·a
niengachim. Unon ua silgrak, a·ste, rang, rupa aro sona damsan
bekningatako man·toke ding·karini mi nakramni bebu gita
ong·tokaha; aro uamangni chin gripile balwa uamangko
balpongangaha; aro bimangko dokgipa ro·ong a·bri dal·begipa
pil·e a·gilsak gimikon gapaha" - Daniel 2:31-36.

Ia bimangara nikchengode ia chasongrango ka·donganiko man·na

gita mamung nangeani dongja gita nika, indiba sengkubo.

2. KATCHINIKE AGANANIKO ORTO PE·ANI

Nebukadnezar rajana uni jumango nika gita tiktak aganani ja·mano Daniel katchinikgipa indake talataha:
"Ian jumang, aro chinga rajani mikkango uni ortoko agangen" - Daniel 2:36.

SONANI SKO: Sonani skoa badia a·gilsakni bilko mesoka ine Daniel rajana
agana?

"Na·a O raja, rajrangni raja ong·a, nang·na salgini Isol songnokko, bilko,
aro bilakaniko aro rasongko on·aha….. Na·an ua sonani sko ong·a"- Daniel
2:37, 38.

A·gilsakni dal·batgipa a·songni sason ka·gipana Daniel aganengachim:

"Nebukadnezzar; nang·ni a·song Babylonan bimangni sonani skoko mesoka ine Isol nang·na aganenga."

KA·BAK ARO UNI JAKPONGRANG - RUPANI: Mandeni nikani gitade Babylon

a·songara jringjrotna baigen ine ong·chim. Indiba katchinike agananio uni
ja·mano mai ong·gen ine agana?

"Aro nang·ni ja·mano nang·na bate onbatgipa ge·gipin songnok

ong·katgen" - Daniel 2:39.

Isolni aro agansoani gita chu·sokgen ine Nebukadnezzarni songnok Persiani General, Kyrus 539 B.C.
bilsio dakgrike amon be·gruaha. Uandake rupani ka·bak aro jaktongrang gipin dal·gipa songnok Medo-
Persiako mesoka.

RANGNI OK ARO JA·PINGRANG

Ia dal·begipa bimangni ia bakrang maiko mesoka?

"Ge·gipin songnok …gittamgipa rangni songnok ong·katgen; uan a·gilsak

gimikko sason ka·gen" - Daniel 2:39.

Rangni ok aro ja·pingrang Greece a·songko mesoka. Alexander the Great Medo
Persiako dakgrike amaha aro Greece a·songko a·gilsakni gittamgipa songnok
ong·ataha. Ua a·song 331 B. C. oni 168 B. C. ona sason ka·aha.

SILGRAKNI JA·TONGRANG
"Aro brigipa songnok silgrak gita rakgen, maina silgrak pilakkon bnekata aro
be·kningata; aro ia pilakkon be·kningatgipa silgrak gita uan bnekate
be·kningatgen" - Daniel 2:40.

Alexanderni siani ja·mano, uni songnok bilgriangaha aro bakbak dakaha. Bon·kame
168 B.C.o Pydma o dakgrikanio Rom silgrakni songnok Greece songnokko kning
ripik dakataha.

Kaisar Agustus Romni songnokko sason ka·mitingo Jisu atchiaha. Unoni bilsi 2000
re·angaha (Luk 2:1). Kristo aro Uni Watatarang silgrakni ja·tongrangni somoio janggi
tangachim.

Ia agansoani gimin mandeni chanchiani gita dikdiksa chanchiatbo. Maidake Daniel Babylonni somoio
janggi tange ritchani ritcha bilsirang mikkangchi badita songnokrang ge·sani ja·mano gegipin sason
ka·riken ine maikai ma·sigen? A·songni man·e cha·ani on·tisani ja·mani maidake ong·gen u·ina neng·a.
Indiomangba Babylon, Medo-Persia, Greece aro Rom agansogimin gita tiktak a·songsani ja·mano a·song
gimin - katta manigipa skul bi·sarangni dre dre dake chadenga gita sason ka·angaha.
Isol mikkangchi ong·gnirangko sason ka·ama? Ia dal·begipa miksonganio pangchake an·ching ka·dongna
man·genma? Aganchakanide, Oe ong·chongmota!

SILGRAK ARO A·STE BAKSA BRINGIMIN JA·A ARO

JA·SIRANG: Bongagipa a·gilsakni bil Romni ja·mano sason
ka·genma?

"Aro na·a ja·arang aro ja·sirangko mitama indani a·ste aro

mitama silgrakko nikaha gita, uan pekwatgipa songnok
ong·gen; indiba silgrak aro a·steni brinako nang·ni nikgimin
gita uno silgrakni bil donggen. Aro ja·ani ja·sirang mitama
silgrakni aro mitama a·steni ong·a gita ua songnok adita bilaken aro adita be·ninggipa ong·gen" -
Daniel 41:42.

Katchinikgipa bongagipa a·gilsakni gimin agansoja indiba silgrakni Rom songnokni giminsa. Bimangni
ja·a aro ja·sirangchi mesokani gita Rom songnok a·song dam 10 dake ra·ronako man·gen.

Iara on·bebeahama? Ong·chongmotaha. Kristian a·bachengani brigipa aro bongagipa ritcha bilsirangni
somoio salgrooni ka·saninggijagipa skia pora donggijagipa dol Rom songnokni be·gruangengmitingo
a·songona napdrabae dakgriktaitaiaha. Bon·kamao saliram Rom songnokni bang·batakaon jat 10 ra·aha,
aro district ge 10 jakgitelgipa a·songrang dake Europe a·songni ning·o a·bachengataha. Uandake
ja·sirang da·ororoni Europeni a·songrangko mesoka.

3. SASTROO KATCHINIKE AGANANIO AN·CHINGNI CHASONG

Danielni katchinike agananio ia Europeni jakrang saksa sasong ka·gipani ning·o nangrimaniko dakna
jotton ka·aniko dakna agansoani gnangma?

"Aro silgrakni a·ste baksa brinako nika gita, uamang manderangni bitchriko kimgrike
an·tangmangko brinatgen; indioba silgrak a·ste baksa ma·gapgija gita uamangko ma·gapani
ong·jawa" - Daniel 2:43.

Pil·ni pil bilakgipa, wa·sagipa manderang Europko nangrimatna

jotton ka·aha, indiba changantian uamangni miksonganiko
chu·sokatna man·jaha. Gipinrangna bate Napoleon Europeko
nangrimatanio chu·sokatna bang·jabatahachim indiba haida ia
katchinikani kattako chanchienkon Waterloo o dakgrikao amako
man·e katangaha, ua indine inwataha, "Isol pilakna bate
dal·batgipa angna agredugaa. Kaisar Wilhelm II aro Adolf Hitler
uamangni chasongo bilakbatgipa sipairangko tom·e skiaha. Indiba
sakantian uamangni sason ka·ani ning·o Europeko nangrimatna
man·jaha. Maina? Maina Isolni katta chu·sokgija ong·jawa.
"Manderang bringimin ong·gen aro nangrimjawa." A·gilsak gimikni
changgni dakgrikanini bitea mikkangchi ong·gnirangko Isol Uni
jako rim·kepa ine mesoka. Ua bon·kame sason ka·a. Ua an·chingna ka·donganiko on·na, tom·tomani
gisikko on·na aro an·chingni janggi tangani Uni miksonganiko ka·dongna chu·onga.

JA·SI GE·CHIKKUNG - SALIRAM

ROM SONGNOKNI MONGSONGGIPA JAT CHIKKUNG
Anglo Sexons (England)
Franks (France)
Alamanni (Germany)
Lombards (Italy)
Ostrogoths (Ja·mano nisiako man·aha)
Visigoths (Spain)
Burgundians (Switzerland)
Vandals (North Africa, Ja·mano gimaaha)
Suevi (Portugal)
Heruli (Bang·gija ritcha bilsirangni ja·mano gimaaha)

4. MIKKANGCHINIKO NIATANI

Danielni katchinike aganani mingsa bakmangmangsan chu·sokgiaj dongkuenga. Ua bimngni ja·ako

doktonge ginchi pil·e natkninggipa ro·ongni ortoara maia jean a·bri pil·e a·gilsak gimikko gipata?

"Aro ua rajarangni salrango salgini Isol songnok ge·sako songgen, uan jringjrotnaba nisiatako
man·jawa; aro uni raja ong·aniko gipin jatna donangjawa; indiba uan ia pilak songnokrangko
be·kningatgen aro bon·atgen, aro uan jringjrotna dongkamgen" -Daniel 2:44.

"Ua rajarang" ingipara ua bimangni ja·a aro ja·sirangchi mesokgipa rajarangko mesoka - uarangara ia
chsongni Europe an·chingni chasongko mesoka. Uamang uni jakchi den·otgijagipa ro·ong ua bimangko
doktonggen aro be·kningatgen aro a·gilsak gimiko gapatgen (Daniel 2:34, 35, 45). Ruutgijaan Jisu
songnok ge·sako songna salgioni ong·onbagen, Uni songnokara kusini aro tom·tomani songnok ong·gen.
Unikode Kristo, chasongni chasongna Rong·brak aro rajarangni Raja a·gilsakko jringjrotna sason ka·gen!

Daniel odhai 2 o agansogiminrang pilakan chu·soktokaha, bon·kamgipana agre jean bimangko ro·ongchi
doktonganichim. Isolni donsogimin somoi gita an·ching da·o dal·batgipa ong·gniona sepangbaenga.
Kristoni an·chingni a·gilsakona re·bapilani. Jisu Kristo, Isolni Depante, mandeni itihaso ruutgipa
dakgrikaniko matchotatnasiengaha unikode Uni ka·saani jringjrotni songnokko a·bachenggen.

5. RAJANI JUMANG ARO NA·A

Ia katchinikania jatrangni chakatani aro ga·akanio Isolni dila

ine paraka. Isol ka·tongko ma·sia, aro ia Sastroni
katchinikania ua mikkangchikoba rongtalen ma·sia ine
mesoka.

Jatrangni il·lenganiko indake che·em che·em dilode, ua

sakantini janggi tanganiko dilna man·gen. "Nang·ni skooni kni
dingantikon chanmanaha, uni gimin kennabe" (Mati 10:30,
31). Isolni on·gipa bebera·ani on·ani an·chingni pilak
jajrengani aro kennanirangna namatani ong·na ama.
An·chingko Uni gisiko nangatgipa ka·dongani an·chingni
janggirangna siltin dake ong·na man·a (Ibri 6:19).

Chi·dokgipa ritcha bilsini skia man·begipa Erasmus uni sagalo songremitingo ong·a obostako agane, je
obostakon uni janggi tanga gimikoba gualna man·jahachim. Uni songreenggipa jahas mikka balwa
ta·rakao an·chengo choangna man·jahachim. Bilakgipa chipakkorerang jahasko natpakon jahas be·na
a·bachengaha. Jahasko chogiparangba kenjagoktokaha. Songregiparangba kena naptokaha.
Bang·bataan uamangni dal·nikgipa manderangna dakchakchina chrikaha, gitrangko ring·aha ba gam·bee
mol·mole bi·aniko dakaha.
 Erusmus saksa songregipana gisik nangaha jean gipinrangoni
dingtange dakachim. Erusmus indake sea: "Chinga gimikoni tom·tom
ong·batgipa aro jripjrang ong·batgipara saksa me·chikma bi·sa
gipakgipa ong·achim. Ua gipinrang gita chrikjaha aro grapjaha indiba
uni bi·sa bakgitchakko ja·pingo done Isolo bi·aha."

Erusmusni ma·siani gitade ia me·chikmani Isolo bi·ania uni

dakronggipa bi·ani bak ong·achim. Ua an·tangko Isolna on·kangaha
gita nika.

Jahas mripangna a·bachengon, ia me·chikmako bolplengo gakate bol chonako boita gita jakkalchina
on·aha. ua jaksamsa bi·sako rim·e jaksachi choangaha.

Ua mamungnaba kengija choangaha. Aro ua me·chikma aro uni bi·saan a·gaona sokchenggipa ong·aha.

Ka·dongchakna man·gipa Isolo ka·dongania dingtanganiko ong·ata - a·gilsak an·chingni wilwilao

be·kningangenga gita ong·oba. An·ching sagalo an·tangtang choenga ong·ja. Dal·batgipa jakan
an·chingko dilenga aro rim·enga.

Na·a Kristoona chu·gimik on·kange re·baode, ua nang·na

bebera·aniko on·gen jean mikka balwa ta·raka changantian nang·ko
simsakgen. Jisuni ku·rachakgipa ong·rongbewalna batgipa
tom·tomaniko am·e ra·bo.

"Tom·tom donganiko anga na·simangna donanga, angni tom·tom

donganiko anga na·simangna on·a; na·simangni ka·tong
jajrengjachina aro kenjachina" - Johan 14:27.

Ua tom·tomani nang·o gnangma? Nang·o gnangode nang·ko

jokatgipa Jisuko mitelbo. Nang·o griode da·alo nang·ni janggi
tanganina Uko okamjawama?
 Jisu Nang·na Re·baon
Bilsirangna namgija dake jakkalako man·mano Armando Valladares namen ram·beaha aro mamung
kamnaba cholijaha. Ua Krismas salsao giljanoko Isolo bi·anina Castroni patok noko dongchina bilsi 30 na
rai on·ako man·aha. Uano patoko nitimgiparang uko okumu chakataha, dokaha, indiba ua an·tangni
bebera·aniko watgalna jechakaha.

Maiaba uko bilakate rakkiaha: uara me·tra saksa Martha

minggipana uni ku·rachakanian ong·achim. Patok noko uamang
gronggrike mikcha namnikgrikaha. Martha ua mandeni
bebera·anina uko namnikaha. Uamangni patok nok sarao bia
ka·ani ruutkujaon Marthako Miamichina drae watatna nangani
dongaha.

Uamangni watgrikanio ka·beani ong·beaha. Indiba Armando

an·tangni ka·sagipana ku·rachakaniko dakna man·rikaha. Lekka
galgiminko man·e ua ku·mikchetaniko indine see una on·ataha:
"Anga nang·ona re·anggen. A·bri joljol kosako donggipa slaio donkapgipa atte su·anirangna anga kenja."

Isolni mikkango uamang damsan ong·rimna giljanoko ku·mikchetani chu·sokgen ine ia patoko donggipa
mande chanchiaha. Basakobade uamang apsan dongrimtaina man·gen, "Na·a pangnan ang baksa
donga," ine ua Marthana aganaha. Ia ku·rachakanian uni patoko dongmiting somoio jolgimiko uko
bilakataha. Saoba gipin manderangde ua dukrangko chakna ampiljawahachim, aro ia ku·rachakanian
Marthakoba bilakataha. Ua segipani obostako manderangna u·iate uko jokatna kam ka·aha. Uaba
pangnaba ka·donganiko watgaljaha.

1. KU·RACHAKANI

Ua aiao inmangipa grongrimtaianina Kristo salgioni basakoba ong·onbabebegenma ine basakobade

an·ching jajrenga gnang sing·manenga. Chinga ruutbeen ekgrikatako man·jok. Indakgipa katchae
gronggrikania ong·na ampilgijani ong·a ine chanchiatmanpila. Indiba mingsani a·sel an·chingni
ka·donganirang dimelja. Uara Jisuni re·bapilna ku·rachakani gimin ong·a. Sninggiparangko wate salgichi
re·angna skang Jisu uamangna indine aganangaha:
"Na·simangni ka·tongko jajrengatjachina. Isolo bebera·bo, angoba bebera·bo. Apani noko dongani
biap bang·a; ong·jaode anga na·simangna agangenchim; maina anga na·simangna biapko
daksona re·nasia. Aro anga re·ange na·simangna biapko daksoode, indide re·bapile na·simangko
an·tangona rimanggen; maikai anga jeo donga, na·simangba unon dongna man·gen" - Johan 14:1-
3.

Salgichi gadoangna skang Ua an·tangko ja·rikgiparangna "ANGA

RE·BAPILTAIGEN" ine aganangaha. An·tango ka·dongchakgipa pilak
manderangko, dingtangmancha An·tangni tarisogimin biapona re·bae
uamangko rimangna Ua ku·rachakaha. Uni Gnigipa re·bapiltaiani gimin
Sastroo chang 2500 mang ong·nasipile janaptaitaia. Bilsi hajalgnina
skang Uni a·gilsakona re·bae donganiko bebera·ani gitan Uni
re·bataignio an·ching bebera·a.

Ruutbea somoirang re·angaha, Messaia re·bae mandeni namgija

paprangko ua An·tango ra·gen ine Isol ku·rachaksoaha. Ua
agansogimin kattarangara bang·a bebera·gijagipa manderangnade
ong·na amgijani ong·aha. India Jisu re·bae chisolo siaha. Manderangni
chanchisoana bate rasong gnangbate ua kattarangara chu·sokaha. Uandake Uni re·bapilna
ku·rachakaniba bebean ong·gen. An·chingna ka·sae re·bapilna ku·rachakgipao an·ching ka·dongchakna
man·a, aro channa amsokgijagipa damchi bregiminrangko chimongtaignio an·ching bebera·na man·a.

Patoko dongenga gimiko Armando Marthana chittirangko aro poedorangko seatrongaha aro noksarangko
salatrongaha. Maibadake uni seanirangko Martha songbadrango gatatna man·aha. Uarangan a·gimikni
manderangko gisiko nangatani ong·aha. Gipin sorkarirang Castro sorkariko ua dos gri patoko donggipako
jakgitel watchina draaha. French a·songni Presidentba mol·molchakaha aro bon·kamao 1982 ni October
jao Armandoko Parischi bilangenggipa aeroplaneo gadoataha. Aeroplane onchokahaomangba ua
an·tangko jakgitel wataha ine bebera·nan neng·pilaha - indiba bilsi kolgrikna duk chakani aro sengani
ja·mano Armandoko, Marthani badalsoenggipa jakpongrangona chanapaha.

Adita jaarangni ja·mano ia kusi ong·begipa jiksesa Miamini St. Kieran gilja noko chadengaha aro
an·tangtangni ku·mikchetgrikgiminko mingtaiaha. Bon·kamao uamangni nangrimpilani chu·sokaha. "Anga
nang·ona re·bagen" ine ku·rachakani chu·sokaha.

Bon·chotao an·ching Kristoko mikkangchakchak nikna man·ao badita katchagen uko na·a chanchiatna
man·ama? Uni rasongo re·baanian an·chingni pilak duk mikchi aro jajrenganirangko pingoptokgnok.
Jisuni re·bapilanian an·chingni gisikni sikbeenganirangko chu·sokbatgnok, aro an·ching a·gilsak salgisako
aiao inmanbatgipa (mande) baksa jringjrotna dongkamgnok.

Jisu bakbak re·bapilenga. Na·a Uko grongsona skengama?

2. JISU MAIKAI RE·BAGEN

(1) Jisu sriksrik re·bagenma?

"Nibo anga na·simangna agansoaha. Uni gimin, nibo, ua bakrao
gnang ine uamang na·simangna inode, re·ongkatnabe; nibo, ua
nokdringo gnang ine inode bebera·nabe. Maina mikka riprapa
jedake salaramchini ong·kata, aro saliramchina nika, uandake
Mandeni Depanteni re·baoba ong·gen" - Mati 24:25-27.

Mikka riprapako chel·bea biaprangonin nikata. Uandake Jisuni

re·baaniba re·basrukani ong·gija parake re·baani ong·gen.

(2) Jisua bimangjongjong ong·e re·bataigenma?

"Nibo, mande sakgni ba·ra bokako gane uamangni (Jisuko
ja·rikgiparangni) sepango chadengaha; uamang inaha,
Na·simang Galilini manderang, na·simang maina salgichiko nie
chadenga? Ia Jisuan, jeko na·simangoniko salgiona
rimdoangaha, jekai na·simang Uko salgiona re·angako nikaha,
uandaken re·bagen" - Watata 1:10, 11.

Uni a·gilsakoni re·angan salo sninggiparangna sa·gre sakgnini

aganania, "Ia apsan Jisuan" ine ong·a. Uni gimin saoba gipin
rajarangni Raja dake re·baskagen ine ong·ja. Ia apsan Jisu - jean sagiparangko an·sengataha, aro
kanarangko nikataha. Ia apsan Jisu - jean til·ekao rim·a man·gipa me·chikna ka·sae aganaha. Ia apsan
Jisu, jean duk ong·gipa manderangni mikchiko ipakaha aro bi·sarangko ja·pingo rimaha. Ia apsan Jisu,
jean Skobikrokni chisolo sie, gopramo neng·take gittamgipa salo chakatpiltaiaha.

(3) An·chingni nikna man·e Jisu re·bapilgenma?

"Nibo ua aramrango re·baenga; aro pilak mikron uko nikgen" - Para. 1:7.
Denggurangba aro toromirangba Jisuni re·bao tange dongsogiparangde Jisuni re·bapilaniko niksogen.
Badita sak Jisuni re·bapilaniko niksogen ine Jisu An·tangan agana?

"Aro unon salgio Mandeni Depanteni chinko nikgen; aro unon a·gilsakni ma·chongrang Una
ka·ako dokgen, aro una Mandeni Depanteko bilmung aro rasong chabeamung aramo re·baako
nikgen" - Mati 24:30.

A·gilsako janggi tanggipa sakantian Jisuni re·bapilaniko niksogen.

(4) Jisuni re·baon Un baksa sawarang re·bapagen?

"Jensalo Mandeni Depante An·tang rasongo re·bagen, aro Un baksa pilak sa·grerang re·bagen, un
salo Ua An·tangni rasongni singhasono asonggen" - Mati 25:31.

"Pilak sa·grerang" baksa Jisuni re·bapilo maidake nikenchim

chanchiate nibo.

(5) Jisuni re·bapilgnini tiktak salko an·ching agansona

man·genma?
"Indiba ua sal aro kontani gimin darangba u·ija, salgini
sa·grerangba u·ija, Ang Pagipamangmang u·iaria ………
Unigimin na·simangba tarie dongbo, maina na·simangni
chanchisogijan salo Mandeni Depante re·baa" - Mati
24:36, 44.

Pilak mandean Jisuni re·bapilanikode niksogen indiba bang·gija manderangsan Uni re·bapilani salna
tarisogiminrang ong·aigen. Na·a an·tangara Jisuni re·bapilanina tariahama?

3. JISU RE·BAPILTAION MAIKO DAKGEN?

(1) Jokata man·gimin (seokgimin) rangko Jisu chimonggen.

"Aro ua singga gam·beamung An·tangni sa·grerangko watatgen aro uamang balwa dambrioni,
chong·motan salgini chon·kamaoni chon·kamaona Uni segiminrangko rimchimonggen" - Mati
24:31.

Nang·ni ka·tongo aro janggi tanganio na·a an·tangko tariatna Jisuna pakwatode, na·a Uni re·bao
katchabee Uko grongsogen.

(2) Sigimin toromi manderangko Jisu chakatatgen.

"Maina Gitel An·tangan inchroa aro pamong sa·greni ku·rang aro Isolni singga gnang salgioni
ong·onbagen; unon Kristoo sigiparang skang chakatgen" - 1 Thess. 4:16.

Gam·bee inwate Jisu salgioni ong·onbaa. Uni bilakgipa inwataniko a·gimikon knaa. Chasong jolgimikna
Jisuko ra·chake sie dongsogimin toromirangni gopramrang oako man·a. Uan mairongpile katchabeani
ong·gen.

(3) Toromi sigiminrangkosan ong·aija, indiba tange dongsoenggipa toromirangko Jisu bimang dingtang
ong·attokgen.

"Unikoa an·ching tanggiparang, dongpitigiparang, bangbango Gitelko grongna aramrango

uamang baksa damsan rimdoako man·gen; aro uandake an·ching pangnan Gitel baksa ong·gen" -
pod 17.
An·chingni signi bimangoniko nitobegipa sigijagipa bimangrang dake jringjrotna dongna Kristo an·chingko
dingtangatgen.

"Nibo anga na·simangna ning·tuako agana; an·chinga pilakan

tusiajawa, indiba dikdiksano, mikjapsao, chon·kamani singga sikao
an·ching pilakan dingtang dakako man·gen; maina singga sikgen, aro
sigimin gimagijani ong·e chakatatako man·gen, aro an·ching dingtang
dakako man·gen. Maina ia gimagnigipa gimagijaniko ganna, aro ia signi
sigijaniko ganna nanggen' - 1 Kor. 15:51-53.

Jisu re·baon an·ching pilakan dingtang ong·atako man·gen. Chanchiate nibo:

beholi saa dongjawaha, an·ma goka ong·ani ba cancer saba dongjawaha.
Hospitalrangko chipbojok. Kristo re·baaha.

(4) Pilak toromirangko Jisu salgiona rimanggen.

Jisu an·tangan indine ku·rachaka, "Anga re·bapile An·tangona na·simangko
An·tangona rimanggen" (Johan 14:1-3 ko nibo).

Piokgiminrangni man·rikaniko salgio nang·na donsoenga ine Pitor agana (1 Pitor 1:4). An·ching Isolni
aiao inmangipa songjinma Gital Jerusalemko aro salgini Pagipako ma·sibatna man·gen.

(5) Pangnajolna duk aro namgijaniko gimaatsranggnok.

Denggurang - jerangan Jisuni ka·sae okamaniko jegala uamang an·tangtangnan raiko on·manaha.
Uamang Jisuni aramrango re·baako nitatsoon uamang an·tangtangni papko niate Jisuni re·baaniko nikon,
chakna amja; uamang a·brirangna aro ro·ongrangna indine agangen: "Chingni kosako ga·akbo" (Para.
6:16). Pilakko nikaigipa Jisuni mikkango chadengani palde sinsa sikbataha.

Da·o uamangni knagipa kimpreta gita gam·gipa ku·ranga skango uamangk ka·sariri okamani
ku·rangsachim ine uamang u·iaha. Jemangan gamna ba chubata gadangna sekseke Jisuna simsakja,
uamang magnasa rikaiaha ine nikskagnok. Ian uamangna parake mesokani ong·aha. Darangba gimana
nangjawachim. Isol An·tangba denggu mandeni siao katchajachim (Ezekiel 33:11). Darangni
gimaanikoba nangnikgija pilakni gisik pil·aniko Ua am·achim (2 Pitor 3:9). Jisu an·chingko indine
okamenga: "Pilak gamgipa aro bal jrimgiparang angona re·babo" (Mati 11:28). Indiba bebera·na ampilgija
mitamde Uni okamanina knachakjawa.

4. NA·A JISUNI RE·BAANINA TARISOAHAMA?

"Angni Paani noko" na an·chingko rimnapna Jisuna dam rakbeani ong·aha. ua janggitangko gamna
nangaha.

"Kristoba bang·ani paprangko ra·chakna changsan on·gimin

ong·enba, ua aro changsa pap gri, una sengsogiparangna jokatanina
mikkang pa·gen" - Ibri 9:28.

Je Jisuan nang·ni paprangko ra·angna chisolo siahachim, uan gnigipa

changna re·bataigen aro an·tangna sengsogiparangna Ua jokataniko
ra·bagen. An·chingko jokatna gita Ua An·tangko boli ong·ataha. Indiba Jisu
gngipa changna re·bajaode, chisolara magna ong·aignokchim. Kristo
an·chingna naljokgipa noko An·tang baksa donganiko nangnika. Iako
chu·sokatna Uko an·ching ka·tongrango sason ka·china aro an·chingni
Gitel aro Jokatgipa ong·china da·on an·ching an·tangtangko Una on·na
nanga.
August 16, 1945 ni pringo saksa bi·sa Shantung compund, North Chinao katjojoe an·tangni salgio
aeroplane bilangako nikrikaniko aganaha. Pilak ong·katna man·gipa manderang noktangtangoni
ong·katbae salgichiko nigitoattokaha. Iano dongenggipa me·asa aro me·chikranga bobil a·songni
manderang ine chanako man·e patok donako man·tokengachim, aro duk, sikdikdik dakaniko
chaktokengachim. Basakobade dakgrikani bon·gnok ine ka·donganisan uamangko tange rakiaiengachim.
Ia aeroplaneara uamangnan re·baenga ine u·iahaon ua sak 1500 manderangni gisikrango goera godapa
gita ong·tokaha. Aeroplane sepangona bilbahaon, saoba inwatataha, "Nibo, Americani nisanko ua
aeroplaneni sambengo noksa sala donga." Bebera·na ampilgija uamang nie dongmitingo saoba
inwatatskaaha, "Nibo, uamang an·chingna jak ripripatenga, an·chingko uamang u·iatenga. Uamang
an·chingko rimna re·baaha."

Ia somoio uamangni gisikara chakna amana bate ding·dobataha. Uamangni chrik a·boka agreaha.
Uamang katwilwilaha, jakrangko wingwangaha aro grapaha.

Rang·sanan uamang jrip dakaha. Aeroplaneni do·ga oe uoni parachutrango

manderang bilonbaaha. Uamangko jokatmnasigiparang basakoba
re·baenga ong·ja, uamang da·alon re·baa, aro da·on, uamangni mikkangon
ong·engaha!

Uamang compundni do·gacholchina katangtokaha. Nok chu·giparangoni

slaiko nisan ka·e donggiparangni giminde darangba chanchijaha aro
kenjaha. Uamang parachuto bolinbagipa manderangona chimongbatokaha.
Dakgrikani matchotaha. Jakgitelani sokbaaha. A·gilsak gital ong·piltaiaha.

Ruutgijan an·chingni Isol, an·chingni Jokatgipa, an·chingko jokatna salgioni

ong·onbagen. Mandeni namgijani katta aro duk bon·kamao bon·gnok. Un
salo katchae inchroanirangko knagen: "Ua sepang re·baengaha.
Sa·grerangni singga sikako anga nikatenga." Gam·a barirorobaaha aro
rasongni teng·sua teng·batroroa indiba an·ching jrip donge nitataina
man·ja: "Ua angko niatenga, Ua angko u·ia." Aganna changpilgija
katchaanichi an·ching inwatgen, "Ian angni Isol, Ua angona basakoba
re·bagen ong·ja, indiba da·alon, da·on re·baa."

Rajako Uni pilak rasongo rimchaksona na·a tariama? Tarikujaode nang janggi tangaona na·a da·o Jisuko
okambo. Jisuni a·gilsakona re·baania a·gilsako neng·nikan dong·anirangko gimaatani gita nang janggi
tanganio Uni dongania nang·nia da·o neng·nikanirangko Ua gimaatgen. Ua dal·gipa neng·nikaniko
namatgipa nang·ko papni dos aro bojaoniko jokate nang·na jringjrotni janggiko on·gen.

Jisu re·bao a·gilsakko maikai dingtangatgen uandake Jisu nang·ni janggi tanganikoba dingtangatgen.
Na·a Jisuo ka·dongchakna man·a. Ua An·tangni re·baani nang·ko tariatgen, aro jringjrotni katchaani
janggi tanganiko nang·na on·gen.
 Salgiogipa Nang·ni Nok
Marco Polo jensalo a·songtang Venice ona bang·a bilsirangni ja·mano re·bapilon rama chel·ako re·bana
nangahani gimin ua goka ong·atako man·aha ine uni ripeng saksa chanchichipaha. Ua bang·bea
golporangko ku·tipgija agana amachim.

Marco sona aro rupaan gapaigipa songona

songreangaha. Am·bol gita kamna man·gipa
ran·gimin jekon darangba koela ine bimungko
agankujachim uko ua nikaha. Wal·sarechi
galsruatoba kamgijagipa ba·ra, jekon asbestos
ine mingachim ukoba ua nikbaaha. Ua dal·begipa
chipu, ku·ango an·tangni changroani baksa
apsanpilgipani giminba aro mandeni sko gita
dal·begipa bitchil aro a·ningona
ong·katbaenggipa, jekon chakki ba lamp so·na
namgipa chikoba nikbaaha ine ua
aganrongachim. Ua somoijolo darangba gorialko,
narikelko aro kerosineko darangba nikkujachim.
Ia golporangko knaon songtangni manderang
bilongen ka·dingnapaha. Adita bilsirangni
ja·mano, Marco Poloni sina skang saksa mande
uni tuanggipa palangsamo donge, nang·ni bokbokgimin golporangni gimin na·a kema bi·chongmotbo ine
didibeaha. Indiba Marco jechake aganaha: "Ua pilakan kakket aro bebe ong·a. Chong·mote, anga angni
nikbagiminoniko adhakosan agankuaienga.

Sastroo segipa katchinikgiparang salgini gimin Marco Poloni agana gitasan aganengpiti. Uamangna
mesokgimin salgini nama aro nitoaniko mande ku·chil aro srechi talatna amgipa kattarangan dongjachim.
Marco Poloni nikbagimin goloprangni ripeng saksani chanchia gitasan ong·paia. An·chingba Marco Polini
agangipa gorial aro narikelrangni gimin gisiko chanchichipe niate nina jotton ka·giparang ong·na
nanggen, maina salgide chongipa aramrango asonge knalrangko kal·e kusini giminsan Sastroo aganaija.

1. SALGIA DONGBEBEAMA?

Jisu an·chingna biap chong·motan salgio tarisoenga.

"Na·simangni ka·tongko jajrengatjachina. Isolo bebera·bo, angoba bebera·bo. Apani noko dongani
biap bang·a; ong·jaode anga na·simangna agangenchim; maina anga na·simangna biapko
daksona re·nasia. Aro anga re·ange na·simangna biapko daksoode, indide re·bapile na·simangko
an·tangona rimanggen; maikai anga jeo donga, na·simangba uanon dongna man·gen" - Johan
14:1-3.

Jisu changsatai gnigipa changna re·bapile, nitobegipa Gital

Jerusalem songjinmao donsogimin biapona an·chingko
rimdoanggen. Hajalsa bilsirangni ja·mano Kristo nitobegipa salgini
nokko ia a·gilsakona ra·onbagen. Gital Jerusalemko ra·onbaani
somoio, a·gilsak wa·alchi rongtalatako man·gen. Rongtalatgimin
a·gilsak toromirangni dongchakram biap ong·skagen (Para. 20:7-
15. Dilani20 iani gimin talbate poraianggen).
"Aro anga salgi gitalko aro a·a gitalko nikaha; maina skanggipa salgi aro skanggipa a·a re·angaha;
aro sagal dongjajok. Aro anga rongtalgipa songjinma, Jerusalem gitalko, Isolni salgioni
ong·onako nikaha; ua setangna tarisogimin namchik gita tarisoa. Aro anga ua singhasononi
gam·bee indina ku·rangko knaaha, "Nibo, manderang baksa Isolni dongchakani aro Ua uamang
baksa donggen, aro uamang Uni manderang ong·gen, aro Isol An·tangan uamang baksa ong·gen
aro Uamagni Isol ong·gen" - Para. 21:1-3.

Wa·alchi rongtalatani ja·mano sawrang gital a·gilsako donggen ine Jisu agana?

"Sontolgiparang an·senga, maina uamang a·ako man·rikgen" - Mati 5:5. Para. 21:7 koba nibo.

Kristo a·gilsakko changsatai Eden gita ong·attaigen aro sontolgipa uko man·rikgen ine Jisu ku·rachaka.

2. BE·EN BIMANG ASOLON AN·CHING SALGIO ONG·GENMA?

Jisuni chakatpilani ja·mano, sninggiparangna mikkang pa·ani somoio maidake ong·a ine agana?

"Angni jakrangko aro angni ja·arangko nibo, anga an·tangan

ong·a; angko rim·dape nibo, maina ango dongako na·simangni
nika gita me·mangni be·en aro grengrang dongja" - Luk 24:39.

Jisu manggittangan ong·pilaha; Ua Thomasko An·tangko dangtape

nichina aganaha (Johan 20:27). Ia somoio Jisu nok chong·moto nape,
manderang baksa golpo agane, cha·aniko cha·paaha (Luk 24:43).
Salgide me·mangrangni songdongram (Balpakram) ong·ja, indiba
rongtalgipa toromirangni dongramsa.

"Maina an·chingni songpangni salgio; aro unoni Jokatgipa Gitel

Jisu Kristoko an·chig nisengsoenga; ua je kamko ka·e pilakon
an·tangna bamatna ama, uandake ua an·chingni onani be·enko
rasongtangni be·en gita bimang dingtang dakgen" - Philip 3:20, 21.

Kristo maikai chakatpilan somoio be·entango gitachim uandake

an·chingba ong·gen. An·chingni ripeng aro ba·rimarangko ma·sigrikgen.

"Maina da·o an·chinga janerachi, aganmitapao nika; indiba unon mikkangchakgike nikgen. Da·o
angni u·ia chong·diksasan ong·a; indiba unon angko u·iaha gita anga u·igen" - 1 Kor. 13:12.

Salgio an·ching chu·gimikan ma·sigen. Ia a·gilsako ma·siana batpilen saksa sakgipinko ma·sigen aro
namnikgen. Sninggiparang Jisuko nikon ma·sia, maina Kristo apsan bimangon ong·a (Luk 24:36-43).
Mariamba gopramo Jisuni ku·rangko ma·sia, maina ua knaronga. Emmausni sakgni sninggiparang uni
dakbewalrangon ma·sia. Uni bi·rongbealchin uamang Uko ma·sia (Luk 24:13-35; Johan 20:14-16).
Jokgiminrang salgio mikkangchake gronggrikani donggen. Nang·ni ka·sara jik, ba se ba saoba
bewaltango ka·dingsmitako nikon, mairongpile kusinian gapgen, aro knaronggipa ku·rangko knana aro
bewalrangko nikna mairongpile katchabeani ong·gen!

3. SALGIO AN·CHING MAI DAKGEN?

Salgio an·chingna bang·bea kamrang donggen. Nang·ni miksonga nokko rikna chanchianiranga?

"Aro uamang nokrangko rike uarango dongkamgen; aro uamang draka barirangko gee uarangni
biteko cha·gen. Uamangni rikanio sakgipin uno dongkamjawa; uamangni ge·ako sakgipin
cha·jawa; maina bolni salrang gita angni manderangni salrang ong·gen, aro angni
mikchagiminrang an·tangtang jakni kamko jaroe jakalgen" - Isaia 65:17-22.

Jisu an·chingna Rongtalgipa songjinmao, Gital Jerusalemo nokrangko tarisoenga (Johan 14:1-3; Para.
21). Ia podrango janapani gitade, an·chingba nokrangko jaktangchi rikarangba donggen, haida,
nambegipa biaprangko seoke, baga barirangko dakgen. Isolni songnoko mai aiao inmanpilgipa cholrang
sengsoenga an·ching agansokja. Chasong gitalni changa sapanide, bi·sarangni kal·e roani gitasan
ong·aigen.

Na·a nitobegipa chidareko, sikdikdikgipa bakrako, chatbegipa

bolgrimrangko, aro nitobegipa bibalrangko namnikama?

"Maina Jihova Zionko ka·dimeataha, uni pilak gimaatgimin

biaprangko ua ka·dimeataha, aro uni bakrako Eden gita, aro uni
a·gisiko Jihovani bari gita dakaha; katchaani aro ka·srokaniko aro
mitelani aro knatogipa ring·ani ku·rangrangko uano man·gen" -
(Isaia 51:3).

Isol ia a·gilsak gitalko Eden ong·attaigen. Toni nisiarang, wal·kuni

gisimarang, aro a·a a·gisi ong·anirang dongjawaha, chibolrang rongtale
grike dongaigen, bolrang aro a·brirang ong·siani dongjawajok.

A·gilsakni nitoanisan ong·aijawa, indiba an·chingni u·iarangko kusi

ong·aniba baridapgen. Bilongbee, jaroe saani ja·mano sam bolrangko
skanggipa changna nikna man·taia gita chacha ong·gen. Na·a gital
bosturango, skie ra·anirango katchagipa ong·ama? Uano,
tangbanggipa gisikrangni gimin chanchijringgen. Pilak ma·siani aro
changa sapani gitaba bariatako man·gen. Ma·sianirang chong·diksa ong·ani aro ma·sisokna amgijanirang
dongjawaha. Uano nambat-chubata gadangona skie ra·anirang chotchanggija gital nika-nianirangko
man·e kakket aro bebe ong·ani gimin skie ra·gen. Pilak ong·atgiminrango donnugimin gamsengrangni
gimin jokgiminrang oprake poraia gita ma·sigen" - G. C. jak 677.

4. PAP DSALGIKO JINGJENGATTAIGENMA?

"Aro pilak mrang, aro mitchiani aro tol·ako dakgipa unona mamung dakeba napjawa; Mes Bi·sani
janggini ki·tapo segiminrangsan napgen" - Para. 21:27).

Isol pilak pap aro papni biterangko gimaatsranggen aro mamung dakeba dongtaijawaha. Jisuni re·bapilon
an·chingna ugitan ong·pagen (1 Johan 3:2). Namgija kamrangna skani gisik baksa dakgrikani palde,
Isolni ka·sachakanina daarigiparang ong·skagen.

"Aro ua uamangni mikrononi mikchiko u·sitgen aro siani dongjawaha, aro kalimani, aro chrikani
aro saknaani dongjawaha. Skango ong·giparng re·angaha" - Parape·a 21:4.

Sianiko darangba cha·tottaijawaha. Salgini songo pilakan chadambe gita ong·gen, aro budepa ba
buchuma ong·aniko darangba cha·totjawaha. Salgi papni bitekosan bon·ataija: Salgi chu·sokaniko
ong·ata. Ja·kora, jakkora aro kanarangni gimin chanchiatbo, maikai uamang chu·gimik an·senganiko
man·pilgen!

"Unon mikgrirangni mikronrangko mikaoatgen, aro nagokrangrangni nachilrangko peng·aniko

ogen. Unosa ja·koragipa mande matchok gita bilchrokgen aro ku·magipani sre git ring·gen; maina
bakrao chirang aro a·gisio chibimarang nagen" - Isaia 35:5, 6.
5. SALGIO NAMBATGIPA MAIA ONG·GEN?

Salgi-a·sakni Gitelko mikkangchakchak nikna man·gnini gimin chanchiatbo.

"……….., Nibo, manderang baksa Isolni dongchakani, aro ua uamang baksa donggen, aro uamang
uni manderang ong·gen aro Isol an·tang uamang baksa ong·gen aro uamangni Isol ong·gen" -
Para. 21:3.

Bilakgipa Isolan an·chingni ripeng aro skigipa ong·gen. Un baksa ong·na

mairongpile ka·srokbeani ong·gen. Dok·na dam·na aro sika
moanirangko changgiparang mairongpile skiako man·dapna ma·srokani
ong·begen. Aro pilak changa sapanini gimin mingsing minggamako
man·gipa manderang baksa ong·e u·ie ra·na chol mairongpile
nambegipa ong·gen.

Chanchiate nibo, pilak changa sapani aro sika moani aro gisik a·ning
bitgiparangni nokgipa baksa golpo alape rona aro talbate ma·sie ra·na
man·ani cholranga mairongpile gamchatbegipa chol ong·gen. Un baksa
olakirimanirang aro ma·sina man·ania aiao inmanani ong·gen.

"Aro indake ong·gen, ja gital changsaoni changsaona, aro

neng·takani salsaoni salgipinona pilak be·en angni mikkangona
olakina re·bagen ine Jihova agana" - Isaia 66:23.

Songjinmani jatchio rongtalbegipa Isolni singhason gnangchim. Uan

nitobegipa sundarechi duulachim, aro uni mikkang salni teng·brapa gitachim. Aro uni ja·kokkimani
ga·chakgipara nikjagringgipa tom·tomgipa sagalni chi gitachim. Ia rongtalgipa nikjagringgipa nokkrao Uni
rasongni teng·suchakani gnangchim, aro jokatako man·giminrangni de·mitelanian gapaiachim.

"Aro Jihovani naljokgiminrang re·bapilgen; aro git ring·e Zionona re·bapilgen; aro uamangni
skorangni kambeo jringjrot ka·srokani donggen; uamang katchaaniko aro ka·srokaniko man·gen,
aro kalimani aro skimani batanggen" - Isaia 35:40.

Iano saoba ka·saningbegipako nikna man·a. Uni pilak kakket aro bebe ong·ani, chakchikani aro
ka·sachakbegipa ong·ani pangnaba chotchangja. Uni rongtalgipa bimungna mitelbo!

6. AN·CHINGBA UANO ONG·PANA NANGA!

Jisu ua gronggrikanina nichaksoenga. Uni giminsa Ua nang·ko je cholchiba paponiko jokatna an·tangkon
on·kangaha. Ua on·gimin cholko na·a an·tangan gimaatgija ra·chakna nanga. na·a Jisu Kristona nang·ni
Gitel aro Jokatgipa ine on·kangna nanga. Na·a chisolo
ong·atgimin pap wataniko nanga. Maina:

"Aro pilak marang aro mitchiani aro tol·ako dakgipa

unona mamung dakeba napjawa; Mes Bi·sani janggini
ki·tapo segiminrangsan napgen" - Para. 21:27.

Jisu an·chingko paponiko naljoka. Uni bilchi pilak marang

aro rongtalgijanirangko wate an·ching Uona re·bana nanga.
Jisuan an·chingni Uni songnokona napani rama ong·a.

Aro ua songnokni a·bachengani da·alo nang·ni ka·tongon

ong·na man·a. jensalo Kristo an·chingko paponiko naljokon,
ua chongipa salgini gunko ong·ata. Ua an·chingni pilak ka·o nangani, mikbuani, kenani aro pilak
jajrenganirangko galna dakchakna ama. Salgina ka·dongsoanio an·chingni pilak neng·nikanirangoniko
jokatja beben, indiba chaktogipa gisikko ong·ata. Dake nianio indake nika je, "siani ja·mano tangpiltaina
ka·dongsogiparangni janggi tangani an·saobata aro gipinrango ka·dongchakna man·bata" ine nikna
man·a.

Kristo baksa janggi tangrimachisan na·a dingtang ong·ataniko man·na ama. Bebeo janggi tanganichi
maiko ong·atna ama Pitor maidake agana niatbo -
"Una na·simang nikjahaoba ka·sara; da·o nikjaoba uo bebera·a, na·simangni bebera·ani bon·kama
chong·motan janggirangko jokataniko man·e, aganna amgijani aro rasong chagimin katchaao
na·simang ka·sroka" - 1 Pitor 1:8, 9.

Kristo mai janggi tangani bewalko cha·tote nikatna nangnika na·a ma·siahama? Uni ka·srokgipa
ku·rangchi okamaoni na·a an·pilangnabe.

"Aro gisik aro namchik agana, Re·babo, aro knagipa aganchina, Re·babo; aro ringna sikgipa
indinari chijanggiko ra·china" - Para. 22:17.

Jisu nang baksa da·o gnang, segimin kattarangchi nang·ni ka·tongo aganenga. Ua nang·ko re·bachina
okamenga. "Re·babo." "Rebabo." Iana badepilede Ua nang·ko okamchajawa. Na·a an·tangko Una
on·kangkujaode, ia somoion na·a Uni ku·rangna aganchakbo.

Indin on·na ku·rachakaniko anga ra·chaka aro jringjrotna Un baksa ong·pana ska ine aganchakbo.
Nang·ni Una ka·saani giminba aganbo. Uni nang·na pilak dakanirangna Uko mitelbo. Nang·ni aro Isolni
gisepo maiba donggenchimode, uarangko chanjachina aganbo. Da·alo, na·a Uni ku·rangko knaode,
nang·ni ka·tongko ra·chakani dongengmitingon, chu·gimikan an·tangko Una on·kangsrangbo. Sko
choknoke aganbo: "Jisu, angni Gitel, anga Nang·ona re·baa. Anga pilakkon Nang·na on·kanga.
Pangnajolnan anga Nang·nin ong·kamgen.
 Badita Ta·rake Jisu Re·bagen
An·ching bang·bataan mikkangchini gimin am·drae nina ska. Nalsachi maia donga uko an·ching u·ina
ska. Indiba tiktakde an·ching mamungkon u·isona man·ja. An·ching knalo mikka wagenma wajawama
ukon tiktakde agansona man·rongja.

Indiba, Saoba donga je Uni mikkangchini gimin agansoanide pangnan kakket ong·aia. Jisu Kristo
An·tangni kattao, mikkangchini gimin an·chingna agana. Uo an·ching ka·dongchakna man·a. Ia poraianio
Ua An·tangni re·bapilgnini gimin maiko an·chingna agangni donga uko nigen. Maina chengo a·gilsakko
dakgipana agre sawa a·gilsak bon·gnini gimin agansona man·bata?

1. AN·CHINGNI SALO JISUNI RE·BAANI CHINRANG

Ia a·gilsakona Ua gnigipa changna re·bataigen ine sninggiparangna aganon (Mati 23:39) uamang Jisuo
maiko sing·aha?

"Uni sninggiparang unona mitino re·bae aganaha, Iarang

basako ong·gen aro nang·ni re·baani chinrang aro
a·gilsak bon·ani chin mai? Iarangko chingna aganbo" -
Mati 24:3.

Jisu namen rongtale aganaha, Mati odhai 24 aro Luk odhai 21

rango Uni re·bapilna skang maia chinrang ong·gen uko Jisu
sakina gita agansoaha. Sastroni gipin bakrangoba Kristoni
re·bapilna skang a·gilsako mai obostarang ong·gen uko
agana. Ua agansoanirang an·chingni nikaon chu·sokengahani
gimin Kristoni re·bapilania sepangbeaha ine mesoka.

Salgioni rama dakanggipao ramajoljol maia chinrangko nika aro uko da·ororo re·enggiparang maiko nike
sing·enga, hai ua Sastroni katchinikao agangipa chin ming 10 ko an·ching niatna.

Chin 1 - Duk! Kenani! Aro Jajrengani!

Bilsi 1900 bilsirang batangaha, janggi tanganio mai ong·gen uko Jisu agansoaha:

"Aro salo, aro jao, aro askirango, chinrang ong·gen; aro a·ao jatrangni duk, aro sagalni aro chi
pokpekani gam·ani gimin gisik bilding bildang ong·gen; aro a·gilsako ong·gnirangko nichaksoa,
aro kenani gimin, manderang sibokgen; maina salgini bilrang rimgrenggen. Aro unon uamang
Mandeni Depanteko, bilmung aro rasong chabeamung aramo re·baako nikgen. Indiba iarang
ong·bachengon na·simang nichaobo, sko de·chaobo; maina na·simangni piokani sepangjok" - Luk
21:25-28.

Da·alni obostako niate nibo, ia agansoana mai kakketbatgijaniko an·ching

nikenga. Manderang kene nom·boka aro a·gilsak mai ong·gen ine
kensoa. Mai, saoba nuclear dakgrikaniko a·bachengatode?

Ia so·so jengjeng chasongo Jisu ka·donganiko on·a. Ia a·gilsakni

jingjenganiranga Jisuni bakbak re·bagnini chinrang ong·enga. Mitam
manderang duk aro jajrengbee, "Nibo, a·gilsakde maiasa
ong·angsrangengjok" ine skima. Indiba Sastroo katchinikaniko
poraigipade ka·dongbee indine inwatsona man·aigen, "Nibo, sawa a·gilsakona re·baenga."

Chin 2 - A·gilsako A·sel Kotonarang

Bon·kaman salo indake ong·gen ine agansoanirang da·ororo chu·sokengahama?

"Aro banggribearang ong·gen, banoba banoba karap aro sabisi ong·gen; aro salgioni kenbeani
aro dal·gipa chinrang ong·gen. Uandakeba na·simangba iarangni ong·baengako nikon Isolni
songnok sepangaha ine u·ibo" - Luk 21:11, 31.

Karap ong·anini gimin adita chanchiate nibo. Bi·sarangni okkrie

ram·sisi ram·dengdeng dakarangko songbado gatatarangko
an·ching nika. Jajongchi mandeko watdoatna man·pilgipa a·gilsak,
mandetangnan alsokjaenga ine u·inara aiao inmanani
ong·jawama? A·gilsako karap ong·gen aro manderang
an·tangtangnasan chanchiaigen ine Jisude u·isoa.

Banggriani mai rokom? Bilsi 1999 ni World Almanac o seani gitade

indake agana je bilsi ritchaprakni gisepon banggrianirang
bariorobaenga. Ritcha chi·chet somoiode, dal·begipa banggriani
chang 6 san. Ritcha chi·sku chasongode, dam 7 aro ritcha kolgrik
chasongode, dam 100 batjok. Uni gimin ia chinrangara Jisuni re·baani sepangbatrorosrangaha ine
mesokanisan ong·aia. "Isolni songnok sepangaha." Ia an·chingni 21 gipa ritcha chasongara ritchani ritcha
banggrianirangko aro rajarangni Rajani re·baaniko ong·atgenma?

Chin 3 - Gam Chimongani

Saoba bang·gija manderangni gam bang·roroo bang·bata manderangni kangal ong·roroani ortoa maia?

"Bon·kaman salrango na·simang gam chimongaha" - Jakob

5:3.

Tangka paisao pilakkon nambatatna ine sorkario kamko ka·oba

man·e cha·gipade man·e cha·batangenga aro kangal mandede
kangalsa ong·roroangenga. Kror pati ong·anggiparangan Gitelni
re·baaniko sepangjok ine agansoani chinni bak ong·a (pod 8).

Chin 4 - Manderangni Jingjengani

Dormahana kam ka·gipa manderang maina indita jingjengenga?

"Nibo, na·simangni a·bako ragipa gamgiparangni dormaha,

jekon na·simang tol·nape rakia, uan chrika; aro ragiparangni ku·rang kotokni Gitelni nachikolo
napeaha. Na·simangba chakchikbo; ka·tongtangtangko mangrakatbo; maina Gitelni re·baa
sepangaha" - Jakob 5:4, 8.

Gamko manderangni chimongmitingo mande ba kam ka·giparangni jingjenganini gimin Jakob agansoa.
Donggiparangba aro donggijagiparangba ji·jaa. Ian Gitelni re·baani chinrangoni mingsa ong·a.

Chin 5 - Manderangni Cholon Namgijani

"Indiba iako u·ibo, bon·kamani salrango dukni salrang ong·gen. Maina manderang an·tangtangna
ka·sagipa, tangkana ka·sagipa, an·tangtangko de·mitelgipa, gaora de·gipa, kal·stapgipa, ma·a
paako manigijagipa, ka·sapilgijagipa, toromi ong·gijagipa, ka·sara grigipa, kema ka·gijagipa,
mitakgipa, an·tangtangko rakigijagipa, namana ka·sagijagipa, nampinike on·gipa,
chanchisogijagipa, gangbinggipa, Isolna bate sukna ka·sagipa, olakiani bimangko man·gipa,
indiba uni bilko jechakgipa ong·gen; aro iamangko janggilatbo. Indiba namgijagipa manderang aro
brangatgiparang, brangate aro brangatako man·e, namjaroroanggen" - 2 Timothy 3:1-5, 13.

A·gilsakni manderangni saoba talbate aganna man·genma? Camerako

jechiba mikkange ka·ataibo, maiaba obosta namgijakosa na·a photo
ka·manataigen. Bang·a chadamberangni sason gri namgija dakanirangko
na·a pilakchikon nikataigen, bi·sarangan da·ode mande so·otengjok!
Iarang pilakan Jisuni re·baani sepangaha ine u·iatsoanisa ong·a.

Chin 6 - Tol·e Skigiparangni Bariani

An·ching da·ororo maina bang·bate tol·e skianirangko nikbatenga?

"Maina Kristo dakgiparang aro katchinika dakgiparang ong·kate

dal·a chinrang aro aiao inmananirangko mesokgen; maikai ong·na man·ode, segiminrangkoba
brangatgen" - Mati 24:24.

Ian a·gilsako aiao inmanani chinrang donggniko agansoani ong·a. Me·mang muni pianirang, mejik peleki
dakachi manderangko muni nangatanirang pilakchin gipaha. Tol·gipa chinrangko mesokani aro aiao
inmananirangko dakani silbatbaroroenga. Iarang pilakan Jisuni re·bana skang ong·gen ine Jisuan
agansoaha, aro iarang ong·ania Jisun re·baani sepangaha ine mesoksoani ong·a.

Chin 7 - A·gilsak Mikraka

A·gilsak mikraka inani ortoa maia - Africani mikrakbaani, Middle East aro Far East a·songrangni
mikrakbaa inani ortoa maia?

"Jatrang an·tangtangna chakate …………. jatrangko bichal ka·na asonggen. Na·simang atchiliko
on·bo, maina mi minaha; maina uamangni denggu dakani namen dal·bea. ……… maina rae on·ani
a·kongdapo Jihovani sal sepangaha" - Joel 3:12-14.

Da·alo an·ching a·songrang jekai Asia, Africa, Europe, Soviet Union aro ua
gita a·songrangni mikrakbaaniko nika aro iarangan "Gitelni sal sepangaha"
ine mesokani ong·a.

Chin 8 - Tom·tomanina Miksongani aro Dakgrikna Tarianirang

An·ching ong·ronggijagipa a·gilsako janggi tangenga. An·ching pilakan
tom·tome dongon namgen ine ina. An·ching tom·tomanini gimin aganoba,
batanggimin bilsi 100 kattarangni gimin janape kajia ong·bataitaia. Mika aro
Joel katchinikgiparang indine agansoa je, manderangni tom·tomanini gimin
aganengo, (Mika 4:1-3) a·songsa a·song gipin baksa ka·dongchakgrikjae,
dakgrikna tarianirangko taria (Joel 3:9-13).

Skangonin Sastroo indake dakgrikanirang donggnirangko agana aro baikamgipa tom·tomanide Jisuni
a·gilsakona re·bae pangnajol sason ka·aniosa chu·sokaignok.

Chin 9 - Da·ororoni Namroroani

Maina da·o mandeni itihaso namroroani, nambate songre songgabatani aro a·songrangko
sepangbatatani dongaha?

"Bang·aan ichi uchi daariruragen aro u·iani bang·rorogen" - Daniel 12:4.

Daniel iano indake miksonge agana je, uni katchinike agananirangko ma·siani barirorogen. Indiba ia
agansoani a·gilsako mamungni giminan u·iani barigen ineba ong·a. Ia bang·gija bilsirangni gisepon
manderangni changa sapanirang namen baribaaha. Batanggimin bilsi 2000 o dingtangani bariana bate
batanggimin bilsi 50 ni gisepo dingtanganirang bataha.

"Bang·aan ichi uchi daariange, aro u·iani barigen." Bilsi 1850 jolode manderang pilakchinan gureosa
songreachim. Da·ode aeroplanerang pilakchinan bilengjok.

Bang·bate manderangni songreani aro bikotanirang bang·ania "a·gilsak bon·nasiaha" ine mesokani ong·a.

Chin 10 - A·gimiknan Nama Katta

Uni re·bapilna skang a·gimikonan nama kattako skiprakgen ine Jisu agansoa.

"Aro darang jatnan saki ong·china songnokni ia nama kattako a·gimiko aganprakgen aro unon
chon·kamani ong·gen" - Mati 24:14.

Bang·a bilsirangna a·gilsako nama kattako skiprakna beng·anirang

dongachim aro uarangchi nama kattako skiprakna napnan man·jachim.
Bilakgipa Soviet bilni bon·ahaon Berlinni pakma be·aha. Unon
a·gilsakni paksa jolgimik nama kattana oako man·aha. Nama kattam
skangna bate a·gimikchi gipangengaha. Radio aro TV rangchi
a·gilsakna nama kattako skiengaha. "Ia nama kattako a·gimiko
aganprakgen, aro unon chon·kamani ong·gen ine Jisuni agansogipa
somoio an·ching janggi tangengaha.

2. BADITA TA·RAKE JISU RE·BAPILGEN?

A·gilsako ong·gnirangni gimin Jisuni agantokmano Ua indine

agane matchotata:
"Beben anga na·simangna agana, Ia pilak ong·kujana kingking ia
chasong bon·angjawa" - Mati 24:34.

Bon·kamani sokbachongmotgen, ukode u·iaenga, aro a·gilsak Jisuni gnigipa

re·bataianiko niksochongmotgen. Uni pap aro dukko gimaate An·tangni
jringjrotni songnokko songna Ua ruutjawaha. Jisu indine mikrakata, "Darangba
ua sal aro kontako u·ija" (pod 36).

Jisu indine agana:

"Uni gimin na·simangba tarie dongbo, maina na·simangni
chanchisogijan salo Mandeni Depante re·baa" - Mati 24:44.

3. A·GILSAKNA KA·DONGANIDE JISUOSAN

A·gilsakni papko Jisusaan gimaatna man·aiani gimin Uasan a·gilsakni

ka·donganide. Pilak mandena jokaniko on·na aro namgijako chena Jisu
Skobokrok a·brio siaha.

"Pap ka·gipa Diaboloni ong·a; maina Diabol chengonin pap ka·ronga.

Iani giminan Isolni Depanteko parape·ataha, chong·motan Diabolni
kamrangko gimaatna ine" - 1 Johan 3:8.

Ia be·angenggipa a·gilsako Jisu An·tangni be·enko jal·ang chanbate

an·chingna on·aha. Ia apsan Jisuan jean salsao a·gilsakoniko papko
rongtalatgen, Uan nang janggioni papkoba da·on gimaatna man·a.
Jajrengaoni jokna aro paponi jokna na·a Jisuni gnigipa re·baaona sengna
nangja. Ia somoion Jisu nang·na An·tangni tom·tomaniko on·na ske dongenga.

Toromni tom·ani damsaona re·angpaon saksa me·chik skiprakanina namen gisiko nangbeaha. Ua Jisuni
bakbak re·bapilgnini kattako knahaon namen ong·nikbebeaha. Ua kusini katchaani tom·tomaniko badiaba
ong·gija biaprangonikosa an·tangni am·enganiko ma·siaha. Jisuan uni nangenggipako on·na man·na
nanga.

Salgipino pamong aro uko dakchakgipani ua me·chikni nokona re·angahaon ua an·tang janggi tanganio
duknirarako agane on·aha. Ua chuni nokol ong·aha aro an·tang be·enko palesa an·tangna korosh
man·paengachim. Ua me·chik grape aganaha, "Nang mejal attamo skiprakania angnasa skiaijok."
Indiba ong·chongmotade Isolni ku·rangsa uni ka·tongo nangeahachim aro Isol una ka·sae ka·sne
aganengachim. Ua janggi tangao Kristoko ra·chakaha aro da·o ua Uni bakbak re·bapilanina ka·donge
dongsoenga.

Ua somoini adita antirangni ja·mano, uni kena aro jajrenganirang gimaangaha ine ua nikaha. Skangde ua
an·tangni dukko chu ringachisa gimaatna jotton ka·achim, indiba da·o ua Jisu baksa agangrikna somoiko
ra·e tom·tomaniko man·bataha ine nikaha.

Ua banga·bea paprangko ka·aha, indiba Uni kratcha·ana batede Kristoni ka·saani aro kema ka·anian
bilakbata ine ua nikaha.

Cha·ugipa mandeni chisolo maikai Jisu baksa agangrikaha, uana ua me·chik namen gisiko nangbeaha.
Uni bon·kamgipa janggi tangani somoio Ua Dos Gri dakchakgipachi an·pile mol·molaha, Jisu, Nang·ni
songnokona re·baon angko gisik ra·bo" (Luk 23:42).

Rang·sanan Jisu Una Isolni songnoko biapko una on·na ku·rachakaha (pod 43). Ua apsan Jisu jean ua
cha·uko kema ka·aha, uan nang·naba jokataniko, kemako aro gisikna tom·tomaniko on·enga. Iako na·a
an·tang am·e nie ra·bo.

Na·a ia sinasienggipa cha·u gita bi·pana man·a: Jisu, nang songnokona re·baon, angkoba gisik ra·pabo.
Unon Jisu nang·na indine aganchakgen, "Anga re·bataigen, aro na·a ang baksa salgio ong·pagen."
 Maia Angni Janggi Tanganio U·ina Amsokgijagipa Bil
1929 bilsio Frank Morris Switzerland a·songchi re·gipa jahaso gakataha. Ua adita somoina skangan ia
songreanina nichaksoengachim. Indiba ia songreania an·tangko onatani obostako chagrongaha. Jahaso
uko simsakna donggipa mande Frankko uni kuturio walantian tala teke donaha. Ta·rake mepring cha·ani
ja·mano Frank bilakatna ranta (exercise) ka·na dikdiksa man·achim indiba bangbanggipa biapo sildeng
gnang uko simsakgipa mande re·biton achakni siliting gnang re·bita gita nikmanpilaha. Unikode uko
simsakgipa Frankko chokkio asongate donaha. Jensalo ua ripeng meligipa songrerimskako gronge rona
okamon uko simsakgipa mande uko name nitimna nanga ine agane
on·jaha.

Frank dal·gimin ong·rongbewalni nina skani aro dal·gimin mandeni

nangnikanirang gnangchim. Indiba ua nikania mikkana ong·achim. Ua
an·tangko simsakna changjawa ine uko simsakgipa chanchiachim.
Frankko jitruruna nanggipa maiba katom gita jakkalachim.

Indiba Switzerland Frankni janggi tangania namen dingtangaha. Uno

dongmitingo mikkanarangko dilrurana skigimin achakrangni gimin ua
knaaha. German Shepherd ingipa achakni jat jekon Buddy mingachim,
uko Americaona ra·ange Frank "Mikron Nikna" a·bachengaha, jean a·gilak
gimik dol kagimin (organization) ong·achim.

Da·ode Buddy uni sambao ong·e Frank pilakchin, je somoioba, je baksaba

re·na man·aha. Bon·kamao ua an·tangko jakgitele nikaha. New York
songjinmani gari bang·gipa soroko dolsa songbad segiparangni mikkango dake mesokanio, Buddy uni
giteltangko gari jakchakgija re·wilwatao sorok dilsaoni dilgipinona changbee re·dilaha. Ua Buddyo
ka·dongchakani gimin Frank altuaen nalsachina ga·batna man·aha. Nie dongenggipa songbad
setimgiparangsa man·dikbataha; saksade gariosa sorok dilgipinona re·angsrangaiaha.

Ia bang·gija jakrango an·ching Gisik Rongtalgipani gimin skie ra·gen, je Dilgipaan an·chingko an·chingni
janggirangko Uni jako donaniko nangnika. An·ching pilakan apsan mandeni bewalchi apsandake
nangchongmotgipana mikkana ong·anichi bilgriatako (handicap) man·aha. Janggi tanganio inditan
ta·raka, basakobade skang skang ong·gija ja·man ja·mansa an·tangtangni ja·rikaniko nikaiaha.
Indiomangba an·chingni Dilgipana an·chingni janggirangko ka·dongchake chu·gimik on·na an·ching
jechaka. Indiba an·chingni am·e man·anide indake ong·gen: an·chingni janggi tanga gimiko an·chingko
dilchina Gisik Rongtalgipao pangchakanichisa chong·motgipa jakgitelani aro bilko an·ching man·gen.

1. KRISTONI PALO A·GILSAKO ONG·GIPA

Jensalo Kristo salgichina gadoangna skang mangmang Ua Uni

sningiparangna gamchatbegipa on·aniko ku·rachakaha.

"Indiba anga bebekon na·simangna agana, angni re·angao na·simangna namgni ong·a; maina
anga re·angjaode UA KA·DIMEATGIPA na·simangona re·bajawa, indiba re·angode, anga uko
na·simangona watatgen …….. ua BEBENI GISIK re·bao UA NA·SIMANGKO pilak bebena DILGEN
……. UA ANGKO RASONG CHAATGEN, maina ua angoniko ra·e na·simangna aganprakgen" -
Johan 16:7, 13, 14.

Isolni miksonganio Jisu Isolni singhason mikkango "an·chingni a·sel Isolni mikkango
mikkang pa·na ine (Ibri 9:24) salgichi re·angna nangaha.
An·chingni a·sel chisolo datkapa man·gipa Gitel an·chingni palo salgio ong·engon, an·chingba ia a·gilsako
Gisik Rongtalgipa an·chingni KA·DIMEATGIPA aro DILGIPA ong·e donga. Uan Jisuni palo ong·gipa
ong·a.

Jisu iano ong·mitingo mandeni bimango ong·e pilakchi ong·na man·ja. Indiba Gisik Rongtalgipa indake
ong·ani gri; Ua channa amsokpilgija manderangna bang·a biaprangon apsan somoio paltangni
ka·dimeatgipa aro Dilgipa ong·na ama. Gisik Rongtalgipachi Kristo an·chingni nanganirangko on·na ama.

2. GISIK RONGTALGIPARA SAWA?

A·gilsako ka·sabatgipa aro simsakbatgipa pagipa dake chanchichipe an·chingni Pagipa Isol baksa
an·ching meli-nangrimna man·gen. Depante Jisuko an·ching gisiko nikatna man·a maina ua bimang
chongchong an·chingni gisepo dongangaha. Indiba Gisik Rongtalgipakode gisiko nikate nangrimaniko
dakna man·dikbata. Altuagipa mandeni bidingo tosusana an·chingo dongja. Indiomangba Sastroo Gisik
Rongtalgipani gimin dingtangmancha talataniko on·a:
Bimang Ong·ani. Jisu Gisik Rongtalgipako bimang gnanggipa dake Isolgrimni bak, Pagipa Isol, aro
Depante Isol baksa janapa.

"Na·simang re·ange pilak jatrangko sninggipa dakbo, aro PAGIPANI, ARO DEGIPANI, ARO GISIK
RONGTALGIPANI bimungo uamangko baptize ka·atbo" - Mati 28:19.

Gisik Rongtalgipao bimang dongani cholon bewalrang gnang: chanchiani gisik (Rom 2:27);
ning·tuanirangko ma·siani (1 Kor. 2:10); an·chingna ka·saani (Rom 15:30); an·chingni pap ka·o jajrenga
ba duk ong·a (Eph. 4:30); an·chingna skina man·ani (Nehemia 9:20); aro an·chingko dilna bil gnang.

A·gilsakko Ong·atanio Bak Ra·ani. An·chingni a·gilsakko ong·atanio Pagipa aro Depante baksa Gisik
Rongtalgipa bak ra·aha.

"Chengon Isol salgi aro a·ako ong·ataha ………. Aro ISOLNI JANGGI chiko ganggopengachim" -
A·ba. 1:1, 2.

3. GISIK RONGTALGIPANI KAMRANG

(1) Mandeni ka·tongko dingtangatani.

Uni Nikodemusko grongao Jisu mandeni ka·tongko dingtangatanio gisik
Rongtalgipani kamko talata.

"Beben anga nang·na agana, chionimung GISIKONI ATCHIJAODE

saksaba Isolni songnoko napna amja" - Johan 3:5.

"Gisikoni atchiani" ortoa Gisik Rongtalgipa an·chingna gital

a·bachenganiko on·a. An·chingni bewalko dingtangataan nambata.
Gisik Rongtalgipa an·chingko ning·oniko a·palona dingtangate "Gital
ka·tongkoba anga na·simangna on·gen" (Eze. 36:26) ingipa
ku·rachakaniko chu·sokata.

(2) Namgija dakaniko an·chingna ma·siatna aro rongtalna

skaniko on·a.

"Ua (Gisik Rongtalgipa) re·baoa, ua PAP aro bichalni gimin a·gilsakna namgijako U·IATGEN" -
(Johan 16:8).
Jensalo na·a saniba namgija janggi tangaoni Isolona an·pile kakketgipa segipa aro dedrangna
simsakgipa ma·a paa ong·baako nikon, uan Gisik Rongtalgipani gisik on·anichi ong·aha ine gisik ra·bo.

(3) An·chingi Kristian janggi tangao re·dilani.

Kristo an·chingna Gisik Rongtalgipani "ka·singipa chongipa ku·rang" chi aganenga.

"Na·simang jakrachi re·ekangon ba jakasichi re·ekangon, Iakai rama, na·simang iako re·bo ine
nang·ni janggilchi kattako nang·ni nachilrang knagen" - (Isaia 30:21).

Satelite gita T. V. Programmeko watatanichi a·song damsaoni noksarangko an·chingni noko man·soenga.
Gisik Rongtalgipara Isolni satelite gita Kristoni dongpaaniko salgioni a·gilsakona an·chingni
nangchongmotan somoio sepangona ra·baate kam ka·a (Johan 14:15-20).

(4) An·chingni Salanti Bi·e Janggi Tanganio Dakchaka.

"Maina nanga gita maiko bi·na nanga uko an·ching u·ija; indiba GISIK AN·TANGAN aganna amgija
skimachi AN·CHINGNA MOL·MOLCHAKA ……… Isolni nangnika gita" - (Rom 8:26, 27).

An·ching Isolo bi·o katta am·on man·kujaomangba an·chingni palo Gisik Rongtalgipa bi·chakenga.
An·ching inditan duk ong·e katta aganna man·gija Isolona ma·amatamangkoba, an·chingni dakchakanina
grapsijosijo dakamangkoba Gisik Rongtalgipa bilakgipa bi·ani gita Isolni singhason mikkangona
sokangatgen jeon Jisu da·o dangdike on·enga.

(5) Kristianni Bewal Aro Cholonko Namdapatani.

Gisikni bidingo bite grigipa manderangkomangba a·sal gnanggipa aro chae rokom rokom bite nanggipa
bol gita ong·ata.

"INDIBA GISIKNI BITERANG IARANG, ka·sara, katchaa, tom·toma, chakchika, rinok rinok daka,
nama, bebera·a, sontol daka, an·tangtangko bamata" - (Gal. 5:22, 23).

Gisikni biterang an·chingo donganian, an·ching chong·motgipa draka budu, Jisuo (Johan 15:5)
nangrimaha ine mesoka. Jisu Uni chu·sokgipa janggi tanganiko an·chingo Gisik Rongtalgipachi tangatna
man·a.

(6) An·chingko Sakkirang Dake Tariani.

Jisu indine ku·rachaka:
"Indiba GISIK RONGTALGIPANI NASIMANGONA RE·BAON na·simang bilko man·gen; …… aro
a·kitikona kingking na·simang ANGNI SAKKIRANG ONG·GEN" - (Watata 1:8).

Skani gisik donggipa pilakkon Gisik Rongtalgipa sakkirang ong·atna man·a. Pilak sing·anirangna
an·chingo aganchakanirang dongjanaba gnang, indiba Gisik Rongtalgipa manderangni ka·tong aro
gisikrangko moatgipa golporangko an·chingna on·na ama - Jisu chakatpilaoni sotbongagipa salna
skangde watatarangba agangrikanio neng·nikaniko man·achim indiba uamangni kosakona Gisik
Rongtalgipa re·baani ja·mano uamang Kristoni gimin inditan bil gnange aganprakaha, uamang a·gilsakko
bilding bildangataha" (Watata 17:6).

4. GISIKNI ON·ANIRANG

Sastroo bebera·gipa sakantina Kristian janggi tangao chegipa ong·e janggi tangna Isolni on·gipa Gisik
Rongtalgipa aro bebera·gipa sakantina Isolna chu·soke dingtang dingtang bewalo dangdike on·na
man·na gita on·gipa dingtang dingtang Gisikni on·anirangni gisepo dingtanggrikaniko mesoka.

" 'Ua (Kristo) kosakchi gakatenba ua rim·gittangako rim·aha, aro manderangna ON·ANIRANGKO
ON·AHA' Isolna chu·sokatna, dangdike on·ani kamna WATATARANG, mitama
KATCHINIKGIPARANG, mitama NAMA KATTAKO AGANPRAKGIPARANG, mitama
NITIMGIPARANG aro SKIGIPARANG ong·china ua on·aha" - (Eph. 4:8, 11-12).

Kristian sakantide pilak on·anirangko man·ja, mitamde gipinrangna bate

man·panaba donga; Gisik an·tangni ska gita sakantinan suala" (1 Kor.
12;11). Bebera·gipa sakantikon Gisikan Isolni donsogimin kamko ka·na
taria. Ua on·anirangko Uni manderangna aro Uni mondolina basako aro
bano on·ode patiani ong·batgen Isolan ma·sia.

Minggipin sulsul segimin gisikni on·anirangko 1 Korinthirangna 12:8-10

o nikna man·a, jeon gisik seng·ani, u·iani katta, bebera·ani, a·sengatani,
katchinikani, ma·manti ku·sikrangko, aro ku·sikrangko pe·e
agananirangko man·chapa.

Paul an·chingko "nambatgipa ka·sae on·anirangna bimchipchina" didia aro bon·kame "anga na·simangna
bate nambata ramako mesoka" (1 Kor. 12:31) ine agandapaha. Ia podrangni ja·mano ka·saani odhaio (1
Kor. Odhai 13) "nambata rama"ra ka·saani ong·a ine mesoka. Aro ka·saania Gisini bitean ong·a (Gal.
5:22).

An·chingni dakna nanganide Gisikni biteko on·ani ong·a unikode Gisikan Uni on·anirangko an·chingna
"an·tangni ska gita sakantinan sualchina" (1 Kor. 12:11).

5. KRISTONI CHAKATPILAONI SOTBONGAGIPA SALO GISIKNI CHU·SOKANI

Kristoni chakatpilaoni sotbongagipa salo (Pentecost) Gisikko tona

amsokpilgija rudapaha aro Jisuni ku·rachakaniko chu·sokataha.

"Indiba Gisik Rongtalgipani na·simangona re·baon na·simang

bilko man·gen; aro Jerusalemo aro Judeao aro Samaria gimikon
aro a·kitikona kingking na·simang angni saki ong·gen" - (Watata
1:8).

Pentecostni salo "salgini ning·o pilak jatrangoni" (Watata 3:3-6)

manderangni ku·siko nama kattako skiprakna Gisikan Watatarangna bil
on·aha.

Mitam Sastroni chatrorang Gisikni ong·onbaako Palestine a·songni skanggipa a·rakni mikka aro
ja·mangipa mikka baksa toa (Joel 2:23). Pentecostni salo Gisikni ga·akania a·rak karini "skanggipa mikka"
gita ong·a jean bitchilko bimik nana dakchaka aro Kristian mondolini a·bachengmitingo gisikni bidingo
bilakatani ong·aha.

6. GISIKNI JA·MANGIPA MIKKA

Sastroo katchinike agananio Isolni Gisikko mondolio rudape mondolini memberrangko saki on·na
bilakatani gimin janapani gnang (Joel 2:28, 29). Ritchani ritcha bilsirang batangaha aro jokatani nama
katta a·gilsakni bang·a bakrangchin gipangaha. Miko minate rana namna gita "ja·mangipa mikkana"
somoi da·o ong·aha.

Kristoni gnigipa re·bana skang mangmang itihas bon·chotaniona sokbaon, Isol Uni Gisikko bang·bee
rudapatanichi kakkete bebera·gipa sakantikon salgina tarisogen. Da·o na·a Gisikni "skanggipa mikkako"
chagrongengama jean mondoliko Gisikni "ja·mangipa mika"na tarienga? Na·a Gisikchi gapatako
man·gipa janggi tanganiko tangengama? Na·a Gisikchi bilakatako man·e Isolni ka·saani aro Uni bakbak
re·bapilani nama kattako gipatna Isolna an·tangko jakkalna on·genma?
7. GISIK RONGTALGIPAKO MAN·NA NANGGNI OBOSTARANG

Pentecostni salo nama kattako knagipa manderangko, "Jongadarang, chinga maiko dakgen?" (Watata
2:37) ine aganna gita Gisik Rongtalgipa gisikko on·e dilaha.

"Unon Pitor uamangna aganaha, Na·simangni paprangko

watchina na·simang salantian gisik pil·bo aro Jisu Kristoni
bimungo baptize ka·ako man·tokbo; unon na·simang, Gisik
Rongtalgipako on·ako man·gen" - (Watata 2:38).

Gisik pil·ani - papo janggi tangaoni an·pile Kristoona re·baani ong·a -

Gisikni on·aniko man·na gita indakgipa obostako chagrongna nanga.
Gisik Rongtalgipako an·chingo rudapako man·na gita an·ching skang
gisik pil·na nanga aro an·chingni janggi tanganiko Kristona
on·kangna nanga. Gisik Rongtalgipani on·aniko man·na gita dakna
nanggnirangoni mingsara Jisuko ja·rikna skani dongna nanggen aro
Uko manina nanggen ine changni chang Jisu skiaha (Johan 14:15-
17).

8. GISIKCHI GAPATAKO MAN·GIPA JANGGI TANGANI

A·gilsakko watangna skang Jisu Uni sninggiparangko indake aganangaha:

"Jerusalemko watgija Pagipani ku·rachakanina sengbo, ……….. maina Jihande chio baptize
ka·ataha; indiba na·simang sal bang·gijaan Gisik Rongtalgipaon baptize ka·ako man·gen" - (Watata
1:4, 5).

Kristianrang "Gisik Rongtalgipachi gapatako man·na nanga (Watata 2:4; 4:8; 4:31; 6:5; 7:55; 9:17; 13:9,
52; 19:6) ine pilni pil Sastroo mesoka. Gisik Rongtalgipa Kristianni janggi tanganiko chu·sokgipa aro
nitogipa ong·ata maina Gisikchi gapatako man·gipa janggi tangani Kristoni an·chingna dongimin nisanona
sokata.

Gisikchi gapatako man·gipa Kristian janggi tanganiko talatengon Paul ia bi·aniko bebera·gipa sakantina
bi·aha:
"Maikai Uni rasongni gamchata gita, Uni gisikni ning·ni mandeo, bilo bilakatako man·na
na·simangna on·gen; bebera·achi Kristo maikai na·simangni ka·tongo donggen; ……. Da·o
an·chingo kam ka·gipa bil gita an·chingi pilak bi·ani aro chanchianina bate namen bang·en dakna
amgipana" -(Eph. 3:16, 17, 20).

Frank Morrisni uni kakketgipa a·chak Buddy gita an·chingba Gisik Rongtalgipani dilanichi skangna bate
dakna man·gen. Gital skanirang aro gital changa sapanirang baksa an·ching janggi tangao neng·nikaniko
chagrongna jotton ka·ani palo an·ching ka·donge mikkangchi re·mikkangna
bilakatako man·a.

Ia Gisikchi gapatako man·aniko salantian Isolo bi·anichi aro Sastroo

poraianichi gital daktaina nanga. Isolo bi·ani an·chingko Kristo baksa nangrime
rakia aro Isolni kattako poraiania an·chingko Uni patianirango miksonganiko
rakia. Uarang Kristo aro an·chingni gisepo donggipa dongpenganiko be·ata
jean Uni gamchatbegipa Gisikni On·aniko rudapataoniko champengani
ong·naba donga. Indake an·ching dal·roroa aro namgijagipa bewalrang aro
chanchianirangko namgipa bewalrang baksa srea.
Romrangna odhai 8 - o Gisikchi gapatako man·gipa janggi tangani gimin ga·suprete talata. Uko poraie
badita chang Paul "Gisik" ko Kristian janggi tanganio bilakbatsranggipa bil dake mesoka nibo.

Na·a Gisik Rongtalgipachi gapatako man·gipa janggi tanganiko aiao inmangipa am·e man·ani dakahama?
Nang·ni janggi tanganio Gisikni dongpaaniko ma·siahama? Na·a Uni janggi sikatgipa bilko
chagrongahama? A·gilsak-salgisak gimiko dal·batgipa bilna nang·ni janggi tanganiko oprakbo.
 Dongkamjringaigipa Jokatgipako
Jensalo Scotland a·songni pante saksa Pitor minggipa pangsu- grimo
andalbegipa walo gimaahaon, Isol uko bimung minge okamaha: "Pitor!"
Jensalo salgini ku·rang okamtaion Pitor uni re·ako dontongaha aro
nionaha, unon ua galchipgimin rong·chun cho·a a·kolo ga·tuangna
ja·kusasanahachim.

An·ching sakantian Isolni an·chingni bimungko minge okamako knana

man·ode namjawachimma? Indake an·chingni ripeng meligipa ong·ode
namjawachimma - an·ching damsan asongrime an·chingni krenganirangni
gimin aro jumang niksamsoanirangni gimin agangrikna man·ode
namjawachimma?

1. SIMA ARI GRIPILE JISUKO GRONGANI CHOL

Na·simang bebera·ama ra·jama, Jisu an·ching baksa mikkang chongchong

dongaona bate da·on an·ching Uona sepangbate re·bana man·gen.
An·chingni songjinmarango Kristoko bimang chongchong dongatna
man·ode aiao inmanpile nambegenchim indiba uko nina mande jinmani sikchepchepbaani gimin
chanchiate nibo. Uni somoioko bon·atani gimin chanchibo. Janggi tanga gimiko dikdiksana Un baksa
mikangchakgrike agangrikna man·ode an·chingna nambegenchim.

An·ching sakanti baksa Kristo nangrimgrikaniko dakna skenga. Uan ia a·gilsakoni re·angani a·selrangoni
mingsa ong·a. Unode ua salgio dingtangmancha kam ka·na man·gen jedakode Ua salantian an·chingni
sambaona re·bana man·gen. Jisuni a·gilsako dongmitingo somoisano biap damsao mangmang ong·na
man·na gita ong·gija Gisik Rongtalgipani jakchi dilaniko man·na sikgipa sakantini sepango ua ong·a.

Uni salgichi gadoangna skang mangmang maia ka·dongatani ku·rachakaniko Jisu on·a?

"Sal chon·jaskal PANGNAN ANGA NA·SIMANG BAKSA DONGA" - Mati 28:20.

An·ching baksa "pangnan" dongna man·na gita Kristo salgio maiko dakenga?

"Indiba salgirangko batanggipa, Isolni Depante Jisu, an·chingni Kamal Dal·gipa ong·ani gimin
an·ching ku·rachakako kimkim rim·na hai. Maina an·chingni Kamal Dal·gipa an·chingni
bilgrirangna duk man·pana amgijagipa ong·ja, indiba pap gri pilakni gimi an·ching gita
dakmajoako man·aha. Uni gimin an·ching ka·saani singhasonona kenmangija sepangna hai maikai
an·ching ka·sachakako man·gen aro nangani salo dakchakna ka·saako man·gen" - Ibrirangna 4:14
- 16.

Jisu an·chingni palo salgio ong·na ka·songataniko nibo: "pilakni gimin an·ching gita dakmajoako
man·aha." "An·chingni bilgrianirangna ka·sachaka." "An·chingni nangani somoio an·chingna dakchaka."
Jisu an·chingni Kamal Dal·gipa ong·e an·ching chel·begipa salgioni den·sotako ba chempenganiko
man·jaha; Kristo an·chingko Isolni mikkangona rimangna man·gen. Iani giminan an·chingko "ka·saani
singhasonona kenmangija sepangangchina" didia.

Jisu salgio maidakgipa biapko ra·a?

"Índiba uan paprangni a·sel boli mingsanko on·enba, jringjrotna Isolni jakrao asongaha" - Ibri
10:12.

Tanggipa Kristo - jean ma·sininggipa ong·a - uan singhasono "Isolni jakrao" an·ching sakantini palo
asongaha.

Maidake Jisuni janggi tangania Uko an·chingni Kamal ong·na taria?

"Uni gimin manderangni paprangna nangrimataniko dakna, Isolnirangni gimin ka·sachakgipa

Kamal Dal·gipa ong·na gita, pilakni gimin jongadarang gita ong·na nangachim. Maina Ua
an·tangan dakmajoako man·e duk chakahani gimin, dakmajoako man·giparangna dakchakna ama"
- Ibri 2:17, 18

An·chingni "adagipa" jean an·ching gita mandeni bimango ong·achim Uaba an·ching gita dakmajoako
man·aha aro da·ode an·chingni Kamal Dal·gipa ong·e Pagipani jakrao asonga. "An·ching ong·atako
man·e," an·chingni duk sukrangko ma·sia. Ua okkrianiko, ringna skaniko, dakmajoaniko aro
neng·skimaniko chagrongaha. Ma·siningani aro ka·sachakaniko nanganiko Ua ma·siaha.

Indiba pilakna bateba Jisu an·chingni Kamal Dal·gpa ong·na gita kraaniko man·aha maina an·chingni
paprangna "nangrimaniko" dakna gita sichakaha. An·chingni biapo sichake an·chingni paprangna Ua
damko on·aha. Pilak mandeni jatna, pilakchinan aro pilak somoionan Namgipa Kobor ong·a.

An·chingni Sabbath Skul Directorrangoni saksa ia chagronganiko suala: "Jensalo chingni chonbatgipa
demechik bilsi gittam ong·engon tem·na man·gipa chokki (folding chair) depa man·e greng bnekatako
man·aha. Uko doctorona rimangmitingo uni saknae grapania chingni ka·tongrangko ka·beataha. Aro
dingtangmancha chingni bilsibonga ong·gipa demechikko nangchakeaha. Nogipani mata bu·ako doctorni
simsakani ja·mano uni agana kattarangko anga pangnaba gualjawa. Ua indine grapaha, " O baba, ua
angni jaksi ong·osamung!"

Jensalo pilak mandeni jat papchi bnekatako man·e jringjrotna sina jegalako man·on, Jisu inaha, "O Apa,
uamangni biapo anga ong·osamung." Pagipa Uni skako chisolo chu·sokatna Jisuna on·aha. An·chingni
Jokatgipa an·chingni chagronggimin aro una bateba pilak saknaanirangkon chagrongaha.

2. NIAM GITCHAMO DONGGIPA NAMA KATTA

Israelni manderangni Sinai a·brini ja·pao a·tip dakmitingo "a·brio

mesokgimin gita" (Re·ongkata 25:40) jitrurana man·gipa torom
tambuko Isolko olakichakna rikchina Isol Moseko ge·etaha. Bilsi 500
mangni ja·mano solomon rajani dal·begipa ro·ongni torom nok
jitrurana man·gipa torom tambuni biapko ra·skaaha. Aro ua torom
nokara jitrurana man·gipa torom tambu gitan apsan miksonganio
rikaha.

Jensalo Isol Mosena torom tambuko rikchina ge·eton Uni gisiko maia
dingtangmancha miksongani gnang?

"Aro uamang angna torom tambuko dakchina, maikai anga

uamangni gisepo dongna man·gen" - Re·o. 25:8.

Pap mande aro uko Ong·atgipani gisepo ekgrikataniko ong·ata. Torom tambuan Isol an·chingni gisepo
dongna man·a ine Isolni mesokani ong·a. Niam Gitchamni somoio torom tambuan aro ja·mano torom
nokan toromo janggi tangani aro Isolko olakianini pangchakani ong·a. Pringanti aro attamanti manderang
torom tambuko wilwile tom·dake Isolo bi·e Isolni gronggrikna ku·rachakaniko dabie (Re·o. 30:6) Isol baksa
nangrimgrikaniko dakna man·a (Luk 1:9, 10).

Niam Gitchamoba Niam Gitalni apsan jokatani nama kattako skia. Ia minggnion Jisuni an·chingna siani
aro salgini torom noko Kamal Dal·gipani kamko ka·e an·chingna dangdike on·aniko skia.

3. JISUNI AN·CHINGNA DANGDIKE ON·ANIKO TOROM NOKO PARAPE·ANI

Jisuni da·o salgini torom noko kam ka·ani aro an·chingni salanti janggi tangao dilanina aro mangrakatna
Uni kam ka·aniko torom tambuo olakiani bewalrang paraka.

A·gilsakni torom nokara salgio donggipa torom nokni bimango rikahani gimin uan Kristoni da·o dangdike
on·enggipa salgini torom nokni jagring ong·a. Re·ongkata odhai 25:40 o bakrao donggipa torom tambuo
kam ka·anirang aro manianirang che·em che·em talata. Torom nokni ning·ni bakrangko Niam Gitalo
kan·dike talata.

"Indide skanggipa niamoba olakiani dakbewal dongachim

dongade, aro torom biap, indiba a·gilsakni ….. skanggipa dring,
jeo gasa aro mej aro donsoani pita, ukon rongtalgipa minga. Aro
gnigipa ba·ara dongpengani nalsachi dringko rongtalbatsranggipa
minga. Uno sonani cha·chat so·chakani, aro pilakchin, sonako
rupripa niam sunduk gnangchim, jeo …….aro niamni
rong·plengrang gnangchim: [jeon Isol ge·eta mingchikkungko
seaha (Re·o. 10:1-5)]. ………..niamni rong·plengrang gnangchim;
aro uni kosako pap watram salakim dakgipa rasongni kiruprang
gnangchim" - Ibri 9:1-5.

Torom noko kuturi gni gnang, Rongtalgipa biap aro

Rongtalbatsranggipa biap. Torom nokni mikkango sara donachim.
Sarao pitolni ganchi dongachim jeon kamalrang bolirangko on·a aro pitolni su·srangchakani jeon
kamalrang jaksua.

Pitolni ganchio on·gipa bolirangara Jisuko mesokachim jean Uni chisolo sianichi "Isolni Mes Bi·sa,
a·gilsakni papko ra·anggipa" (Johan 1:29) ong·aha. Jensalo gisik pil·gipa papi uni boli on·ani baksa
ganchiona re·bae uni paprangko ku·rachakon, ua kema ka·ako aro rongtalatako man·a. Uandake
da·aloba Jisuni an·chichi ua papi kema ka·ani aro rongtalataniko man·a (1
Johan 1:9).

Skanggipa kuturio ba Rongtalgipa Biapo ching·kamaienggipa gasa bolsnia

Jisuko mesoka jean bon·changgijagipa "a·gilsakni seng·a" (Johan 8:12) ong·a.
On·kanggimin pitako donchakani mej ba tableara Uni an·chingni be·enni aro
gisikni okkrianiko chu·ongnikatkamaigipa "janggini cha·ani" (Johan 6:35) ong·a.
Cha·chat so·ani sonani ganchia Isolni mikkango Jisuni an·chingna bi·aniko
mesoka (Para. 8:3, 4).

Gnigipa kuturi ba Rongtalbatsranggipa Biapo sonachi rupripgimin ku·monggrikani niamni sunduk donga.
Ian Isolni singhasonko mesoka. Nangrimgrikani pindapani ba pap watramara Kristoni mol·molchakaniko
mesoka, an·chingni Kamal Dal·gipa, Isolni niamko pe·gipa papi manderangni palo mol·molchakani.
Rong·pleng dotgni jeon Isol ge·eta Mingchikkungko seaha, uko pap watramni kokkimao dona. Sonaniko
tarigipa rasongni kiruprang niam sundukni samtangtangoni pap watramko salakimdapachim. Ia Kerupni
bimang ge·gnini giseponi rasongarigipa teng·ani teng·baachim, jean Isol An·tangni dongani chin
ong·achim.
Kamalrangni manderangna torom tambuni sarao kam ka·e on·engmitingo manderangni Rongtalgipa
Biapko nikaoniko porda dongpengachim. Gnigipa porda Rongtalbatsranggipa Biapni mikkango donga
jean kamalrangni Rongtalgipa Biapona napbao Rongtalbatsranggipa Biapchiko niataoniko champenga.

Jensalo Jisu chisolo sion porda mai ong·a?

"Torom nokni ba·ra dongpenggipako kosakoni ning·ona chitgni

grinataha" - Mati 27:51.

Jensalo Jisu sion Rongtalgipa Biapko dongpenggipa porda kikgalako

man·a. Jisuni siani ja·mano rongtalgipa Isol aro kakketgipa
bebera·gipani gisepo mamung pordaba dongpengna man·jal an·chingni
Kamal Dal·gipa an·chingko Isolni mikkangona rimnapa (Ibri 10:19 - 22).
Salgini singhasonona an·ching napna man·a maina Jisuan Isolni jakrao
an·chingni Kamal Dal·gipa ong·enga. Isolni mikkangona - Pagipani
ka·saani jatchiona an·chingko Jisu napbana man·ataha. Uni gimin "hai
an·ching sambaona re·bana."

4. KRISTONI AN·CHINGKO JOKATNA SIANIKO PARAPE·ANI

Jedake a·gilsakni torom nokara salgini torom nok jeon Jisu da·o an·chingna dangdike on·enga. Uni
chonbegipa bimango dakjagringani ong·a, a·gilsakni torom noko ka·gipa kamrangara "salginirangniko
dake mesokani aro jagring" (Ibri 8:5) ong·a. Indiba niksengbegipa dingtangani gnang: a·gilsakni torom
noko dangdike on·gipa kamalrang an·tangtangde pap kema watna man·ja, indiba chisolo Jisu "da·o
sastirang matchotahaon ua changsanon an·tangko boli on·achi paprangko gimaatna mikkangpaaha" (Ibri
9:26).

Niam Gitchamni Levirangni ki·tapo torom noko ka·ani kamrangko che·em che·em talata. Olakianio
maniani niamrangko bakgni dake suala: salanti dakani aro bilsio changprak dakani . (Dilani 13 o bilsio
changprak dakani kamrangni gimin man·a.)

Salanti dakgni kamrangara, kamalrang sakprakprakna aro mande gimikna boli on·a. Jensalo mande pap
dakon ua ong·sia grigipa matburingko papni bolina ra·bagen, "an·tangni jakko papna on·anini skoni
kosako dondapchina, aro homni biapo papna on·aniko ua so·otchina" (Levi 4:29). Pap ka·gipani dosko
dos grigipa matburingona pap ku·rachakanichi aro pap dakgipani jakko matburingni skoni kosako
dondapanichi watatna nanga. Ian Sko Bikrok a·brio Kristoni an·chingni dos dakaniko ra·angako mesoka;
pap grigipako "chingni gimin papigipa dakaha" (2 Kor. 5:21). Boli on·ani matburingko so·ote an·chi
ong·atna nangaha maina uan chisolo Kristoni dal·begipa sastiko chakaniko mesoksoa.

5. MAINA AN·CHI?

"An·chi ong·gijade pap wata ong·ja" (Ibri 9:22). Niam Gitchamni torom
noko ong·a obosta Kristoni dal·begipa jokatani kamko mesoksoa.
An·chingni papni gimin simane, Ua rongtalgipa biaprango nape,
"changsano rongtalarangniona nape jringjrotna piokako man·aha" (pod
7). Jensalo Jisuni an·chi an·chingni paprangna chisolo ong·on, "torom
nokni ba·ra dongpenggipako kosakoni ning·ona chirgni grinataha" (Mati
27:51). Chisolo Jisuni an·tangko boli on·ani a·sel matburingko boli
on·na nangjaha.

Jensalo Jisu Uni an·chiko chisoloni pakon, Ua Uni chu·sokgipa katta

manie janggi tanganiko an·chingni chu·sokagijanirangni palo on·engachim. Jensalo Pagipa aro Depante
Sko Bikrok A·brio ekgrikatako man·on, Pagipa duk ong·a gnang an·pilaha aro Depante ka·tong be·e
siaha. Depante Isol An·tango papni chu·gimik biteko ra·na aro namgija dakania baditana kingking duk
ong·atani ong·a uko mesokna itihasona ga·napaha. Unikode Ua papko ramram dake nikatgija papirangko
kema ka·na man·gen. Kristo "Uni chisolni an·chichi tom·tomaniko" dakaha (Kol. 1:20).

6. JISUNI AN·CHINGKO JOKATNA JANGGI TANGANIKO PARAPE·ANI

Salgini torom noko salantini Jisuni kamara maia?

"Uni giminba uchiko Isolona sepangbagiparangko jokatsrangna ama, maina ua uamangni a·sel
mol·molchakna jringjring tanga" - Ibri 7:25.

Jisu da·o an·chingni palo Uni an·chiko, Uni boliko on·na "tanga." Da·o Ua mande sakantiko papni
obostaoniko jokatna bimchipe kam ka·enga. Mitam manderangde Jisu salgio an·chingni baltichakgipa
ong·e kema ka·na sikgijagipa Isolo an·chingko kema ka·china mol·molenga ine chanchisretenga. Batesa
an·chingni palo Uni Depanteni boli on·aniko Isol kusi ong·e ra·chaka.

Salgio an·chingni Kamal Dal·gipa ong·e Kristo mandeni jatko mol·mola.

Ua gisik nanggijagiparangko gnigipa changna Isolni ka·saako
niattaichina dakchaka. Kaa·beenggipa papirangko nama kattao
ka·donganiko rim·kepchina dakchakna aro bebera·giparangko Isolni
kattaoniko bang·a man·na aro Isolo bi·aoniko bil bang·e man·na
dakchakna Ua kam ka·a. Isolni ge·etanirang baksa nangrime Jisu
an·chingni janggi tanganirangko nol·e bimang daka aro an·chingni
cholon bewalko namdapatna dakchaka, jedakode dake nianio kimkime
chadengna man·gen.

Ia a·gilsako atchigipa sakantinan Isol Uni janggiko on·aha. Aro da·o

Kamal Dal·gipa ba Mol·molchakgipa ong·e, "Manderangni papna Uni
sichakaniko ra·chakna dilna Ua jring jring tanga." Ua An·tang baksa
pilak papo ga·akgipa papirangko chisolo nangrimatahaoba, an·ching
Uni ka·saako ra·chakjaskalde Ua an·chingko jokatna man·ja. Uamang
papirang ong·ani gimin manderang gimaatako man·jawa indiba Jisuni on·gipa kema ka·aniko ra·chakna
jechakani giminsa gimaatako man·gen.

Adam aro Hobani Isol baksa nangrimaniko pap nosto ka·aha. Indiba Jisu, Isolni Mes Bi·sa ong·e, pilak
mandeni jatko paponiko jakgitelatna aro gimagimin nangrikgrikaniko namatpilna siaha. Na·a Uko nang·ni
Kamal Dal·gipa ong·a ine ma·siahama, jean Isol baksa nang·ni nangrimgrikaniko tange aro mangrake
rakina jringjring tanga?

Kristoni sichakania dingtangmanchagipa ong·a. Kristoni salgio dangdike on·ania tosusana amsokgijagipa
ong·a. Kristosan mangmang Isolko an·chingni sepangona rimbana man·aia. Kristosan mangmang Gisik
Ringtalgipako an·chingni ka·tongo dongatna man·a. Ua an·chingko gam gnangatna gita Ua an·tangko
gam griataha. Ia apsan on·kanganikon Ua an·chingoniko dabia. Hai an·chinga Uko an·chingni janggi
tanganio Jokatgipa aro Gitel dake chu·gimik ra·chakna.
 Dos Dakgipa Papioni Kema Watako Man·gipa Toromi Ong·na Man·aniko
Jaksini chinrang dongjachim. Mamung silchidarekoba am·e man·jaha. Darangba mande so·otgipani
doctorni officeo napako nikjachim. Darangba slai goani gam·ako knajachim. Indiba doctorni uni officeni
table nalsao ja·bra jakbra dake siako nikaha. Uni cholako guli rongbongachi napongatako nikaha.
Chu·soksranggipa niam pe·ani gita nika. Police a·bachengode ja·dil-
ja·pangkon man·jachim. Indiba uamang doctorni tableo donggipa pencil
donchakanio chonbegipa silitingko nikaha. Ua silitingara ua tableni
drawerona sringangachim jeon tape recorder donga. Ua pencil
donchakanini ning·o microphone dongachim jechin doctor uona
re·bagipa sagiparang baksa agangrikani aro ku·patianirangko record
ka·rongachim.

Mande so·otaniko sandigiparang ta·rake tapeko a·bachengaona wenate

a·bachengaoni kal·taina a·bachengaha, aro maidake mande so·otani
obosta ong·aha pilakkon tapeo knaaha. Saksa mande Anthony minggipa
doctorni kuturiona napbae doctor baksa ka·o nange jegrikna
a·bachengaha. Slai goani gam·ako knaaha aro doctorni ma·ame siahaon tape bon·aha. Doctor a·o ga·ake
dongengachim. Pilak jegrikanirangko che·em che·em record ka·aha. Mande so·otgipa uni namgija daka
kamko jringjrotnan donnuna man·gen ine chanchiachim. Uni kamni mamung ja·dilko man·jana gita ua
simsakbeachim. Indiba tapeni golpoan gimikko parakaha.

Ia dilanio an·ching Isolni bon·kamgipa bichalni gimin skie ra·nasienggipa jeon manderangko "ua
ki·taprango segiminoni, kamtangtang gita, bichal ka·ako man·aha" (Para. 20:12). Jemangan Kristoko
uamangni jokatgipa dake ra·chakkuja uamangnade kobor namjawa. Indiba Kristoo naljokaniko
man·giparangnade bichalara aiao inmangipa kobor ong·a.

1. MAIKAI BICHALO KENGIJA NA·A MIKKANG PA·GEN?

Sawa a·gilsakko bichal ka·gen?

"Maina Pagipa darangkoba bichal ka·ja, indiba pilak bichal ka·ako Depantena on·aha" - Johan
5:22.

Maidake chisolara Kristoko an·chingko bichal ka·gipa ong·na tariaha?

"Bebera·achi uni an·chio, Isolni chakchikanio skang ong·gimin paprangko watchangani gimin uni
toromko mesokna ……….maikai ua Jisuo bebera·giparangko toromi ineba an·tangan kakketgipa
ong·gen" - Rom 3:25, 26.

An·chingni palo Kristoni sianichi Uko kakketgipa bichal ka·gipa aro

ka·sachakgipa ong·e toromi ine mingna man·gipa ong·e jean gisik
pil·gipa papiko kema ka·naba man·gen. Jensalo nie dongenggipa ia
sing·aniko sing·on, "Maidake mikkang nigija bichal ka·gipa dos dakgipa
mandeko dos gri ine aganna man·gen? "Kristo Uni jakrango donggipa
papirangko mesoke aganchakna man·gen. Ua an·chingni paprangna
kragipa sastiko An·tangni be·eno man·aha. Salgini ki·taprango
sakantini janggi tangani gimin serikanirang gnang aro ia see rakianiko
bichalni somoio jakalgen (Para. 20:12). Jemangan an·tangtangni
donnugimin paprang aro namgija dakanirang uamangona
sokbapiljawaha ine chanchigiparangna ian namgijagipa kobor ong·a.
Indiba jemangan Kristoko salgio uamangni baltigipa dake chakchikgiparangna aiao inmanpile nambegipa
kobor gnang." Jisuni an·chi pilak paprangoniko an·chingko rongtalata" - 1 Johan 1:7.

Papo an·chingni janggi tangani baksa srena maiko Jisu an·chingna on·a?

"Papko u·igijagipako (Jisu) ua chingni gimin papigipa dakaha, chinga maikai uo Isolni torom
ong·gen" - 2 Kor. 5:21.

An·chingni paparigipa janggi tanganiko Kristoni chu·sokgipa toromigipa janggi tangani baksa sreaha.
Jisuni pap grigipa janggi tangani aro siani a·sel Isol an·chingko kema ka·na aro pangnaba pap ka·kuja
gita channa man·a.

Maia Jisuko an·chngna Baltigipa aro Bichal Ka·gipa ong·na kragipa ong·ata?

2. KRISTO SOMOI GITA SOKBAA

Uni napbolao Jisu Gisik Rongtalgipachi to nongako man·aha:

"Unon Jisu baptize ka·atako man·e chioni bakan gakataha; aro nibo, una
salgirangko oaha, aro ua Isolni Gisik paroa gita ong·onbaako aro
an·tangni kosakona re·baako nikaha. Aro nibo, Ian angni ka·sara
Depante, iano anga namnikbea ine salgioni ku·rangko knaaha" - Mati
3:16, 17.

Uni napbolao Jisuko Gisik Rongtalgipachi to nongako man·ani ja·mano

sninggiparang indake aganprakaha:
"Chinga Messaiako man·aha, jeko aganskaode Kristo ong·a" Johan
1:41.

Ibri katta "Messiah" aro Greek katta "Kristo", ia minggnian "to nongako
man·gipa" ine orto ong·a ine Jisuni sninggiparang ma·siachim. Luk, Jisuni
sninggiparangoni saksa , Jisuko Messaia ong·na to nongani bilsiko "Tiberius
kaisarni raja ong·ani chi·bongagipa bilsi" (Luk 3:1) ine serika. An·chingnade
ua bilsiara AD 27 ong·gen.

Jisuni atchina bilsi 500 skang Daniel katchinikgipa Jisuko AD 27 bilsio Messiah ong·na to nongako
man·gen ine agansoaha.

"Jerusalemko nampilatna aro rikna ge·etani ong·katangaoni nonggiminona chong·motan

pamongona, antisni ong·gen, aro anti sotdokgni" - Daniel 9:25.

Anti sni aro anti sotdokgnia chu·gimik anti sotdoksku ba 483 salrang (7 X 69 = 483 salrang). Sastroo
katchinike agananio salsara bilsisako mesoka (Ezekiel 4:6; Chanani 14:34), uni gimin 483 salrangara 483
bilsirangmung apsan ong·a. Jerusalemko nampilatna aro rikna ge·etani donggen ine Daniel agansoa aro
ia ge·etania bilsi 483 tiktak ja·mano Messiah ong·katgen.

Donsogimin somoio Jisuara Messiah ong·e jakatahama? Jerusalemko rikpiltaina Artaxerxes raja
ge·etaniko 457 BC o on·aha (Ezra 7:7-26). 483 bilsirangara AD 27 o bon·ea (457 BC + AD 27 = 483). 457
BC o Jerusalemko rikpiltaina ge·etaniko on·aha aro Kristoko AD 27 o to nongaha, ia bilsirangara
sampraksanchim uni gimin somoiara bilsi 483 ong·a.

Donsoa somoi tiktakon AD 27 o Jisu "sal chu·sokaha" (Mark 1:15) ingipa nama katta baksa nakataha. Ia
Sastroni katchinike aganani tiktak chu·sokania Nazarethni Jisuan Messiah ong·a ine mesoka, jean
mandeni bimango Isol ong·ani.
Ku·rachakako kakket ong·a ine mesokna Jisu badita ruute nanga?

"Aro antisana ua bang·a baksa bilakgipa ku·monggrikaniko (ku·rachakani) dakgen" - Daniel 9:27,
skanggipa bak.

Jensalo an·ching salsara bilsisa ong·ani niamko ra·gaton, ia "antisa" de bilsisni ong·gen. Uni gimin bilsi
snina AD 27 oni AD 34 ona Jisu "bilakgipa ku·monggrikaniko dakgen" ba ku·rachakani, Ua Adam aro
Hoba baksa uamangni pap ka·ani ruutgijaan dakaha. An·chingni paprangna sichakgnigipa jekon Ua
watatgenchim Uni sianichi mandeni jatko paponiko Ua jokatgen ine Isol ku·monggrikaniko ba
ku·rachakaniko dakaha (A·ba. 3:15).

Sotsnigipa antini bijatchio maia ong·genchim?

"Antini samsana ua hom aro bolirangko bon·atgen" - Daniel 9:27, bon·kamgipa bak.

Jisuko AD 31 bilsio chisolo datkapaha jean "antini samsa" o ong·achim.

Kristoni siani somoio Isol "torom nokni ba·ra dongpenggipako kosakoni
ning·ona chitgni grinataha" (Mati 27:51. Boli on·ani mes bi·sa (Jisuko
mesoka jean "Isolni mes bi·sa" jekon so·otnasiengachim, kamalni jakoni
jokangaha. Ian Isolni mandeni jatni matburingko boli on·aniko nangnikjaha
ine mesokani chin ong·achim. Katchinike agananini tiktak chu·sokani gimin
Jisu boli on·angkuaniko bon·ataha. Kristoni sianichi manderang matburingko
boli on·anichi aro mande ong·gipa kamalrangchi Isolona sokna man·ja
indiba Messaiachi jean Isolni Mes Bi·sa aro an·chingni Kamal Dal·gipa
ong·a.

3. PAPKO KEMA WATANINI GIMIN KA·DONGATANI

Danielni katchinike aganani gita maina Jisu siaha?

"To nonggimin den·sotako man·gen aro uni pilakba ong·jawa" - Daniel 9:26.

Chisolo Uni sion Jisu "den·sotako man·aha." Ua siaha, indiba An·tangna ong·ja. Ua An·tangni papna sasti
ong·ja, indiba a·gilsak gimikni paprangna sastiko ra·chakna.

An·chingni pilak paprangko Isol kema ka·aha ine an·ching maikai ma·sigen?

"Pilak bebera·giparangna Jisu Kristoko bebera·achi Isolni toromko …. Pilakan pap ka·aha ……
uamang Jisu Kristoo gnanggipa piokachi indinari uni ka·saachi toromi inako man·a …….
Bebera·achi uni an·chio" - Rom 3:22-25.

Ia podrango mongsonggipa u·ina nanggnirangara: An·ching

"pilakan pap ka·aha" indiba Isolni ka·saachi pilakan "toromi" inako
man·a jemangan Kristoni rongtalatani bil gnanggipa "an·chio
bebera·achi." Jensalo an·ching toromi ine chanako man·ahaon
Isol an·chingni batanggimin paprangni dosko ra·ange an·chingko
dos gri ine agangen. Aro Isol an·chigko toromi one chana: "Jisu
Kristoko bebera·achi Isolni toromi ong·ani an·chingona sokbaa.

An·ching pilakan jemangan an·ching an·tangtang namgipa ong·na

jotton ka·e neng·skimaniko man·giparang Kristoni ka·sae
ra·chakanio chong·motgipa neng·takaniko man·gen. Ua
ku·rachaka, "Pilak gamgipa aro bal jrimgiparang angona re·babo, anga na·simangko neng·takatgen" (Mati
11:28). An·ching pilakan jemangan batanggiminrangni parichi aro chu·ongnikgijanichi aro kratcha·anichi
saknaatako man·e bal jrimatako man·giparang Kristoo tom·tomaniko man·gen.

4. BICHAL A·BACHENGANI SOMOI

Daniel odhai 8 sa·gre Danielna mikkangchi ong·gnirangni gimin parakaha. Danielni nikanirang: (1) Mes
bipa (2) Do·bok bipa aro (3) Do·bok bipani grongrangni ge·sa "chongipa grong ge·sa …. Namen
dal·roroangaha (Daniel 8:8, 9); iani chinrang: (1) Medo - Persia (2) Greek aro (3) Rom (Daniel 8:1-12, 20-
26).

Katchinike aganani brigipa bakara maia?

"Dondikgija on·ani …. Nikaniara basakona kingking ong·gen? Aro Ua angna aganaha, Hajalgni aro
ritchagittam attamrang aro pringrangpna kingking; unon rongtalgipa biap namatako man·pilgen" -
Daniel 8:13, 14.

Hajalgni ritchagittam salrangni gimin katchinike agananiko sa·greni talate on·na skang Daniel sibokaha
aro Daniel odhai 8 uani ortoko pe·ani gri bon·ataha. Indiba ja·mano sa·gre mikkang pa·taie aganaha:
"Kattako gisik nangbo aro nikaniko ma·sibo. Niam pe·aniko matchotatna aro papko bon·atna aro
dosni gimin nangrimpil·atna aro jringjrotna bon·gijagipa kakket ong·aniko ong·atna aro
……..nang·ni manderangni kosako aro nang·ni rongtalgipa songjinmani kosako anti sotsniko tik
donmanaha" - Daniel 9:22-24.

Hajalgni ritchagittam salrangara 2,300 bilsirang ong·a, salsara katchinike agansoaniode bilsida ong·a
(Ezekiel 4:6). Anti sotsni ba 490 bilsirangara 2,300 bilsirangni gimin katchinike agananini skanggipa bak
ong·a. Ia bilsirangara 457 B.C. oni a·bachenga jensalo Persia "Jerusalemko namatpilna aro rikna
ge·etaniko" on·aha. 2,300 bilsirangoniko 490 bilsirangko changalo 1,810 bilsirang dongkua. 1810
bilsirangko A.D. 34 na chandime, jensalo 490 bilsirang bon·a, an·ching A.D. 1844 ko man·a.

5. SALGINI TOROM NOKKO RONGTALATA - (BICHAL)

Sa·gre Danielna aganaha je, 1844 bilsio 2,300 bilsirangni bon·o, "rongtalgipa biap (torom nok) namatako
man·pilgen" (Daniel 8:14). Indiba iani ortoara maia? A.D. 70 bilsioni intal jensalo Romerang Jerusalemo
donggipa torom nokko nisiaha, Isolni manderangna a·gilsako torom nok dongjaha. Uni gimin 1844 bilsioni
a·bachenge rongtalatna nanggipa torom nokara salgini torom nokan ong·na nanga jeni jagringan
a·gilsakni torom nok ong·achim.
Salgini torom nokko rongtalatani ortoara maia? Skang chasongni Israelrangde a·gilsakni torom nokko
rongtalataniko Yom Kippur ba Nangrimatani Sal ine minga. Uan
bichalni sal ong·chongmotachim.

Dilani 12 o am·e man·ani gita torom noko Kristoni kam ka·ania

rokomgni gnang: (1) Salanti boli on·ani, ian kamalni torom nokni
skanggipa kuturio kam ka·ani, uan Rongtalgipa Biap. (2) Bilsio
changprak boli on·ani, ian kamal dal·gipani torom nokni gnigipa kuturio
kam ka·ani, uan Rongtalbatgipa Biap).

A·gilsakni torom noko manderang salanti uamangni paprangko

ku·rachakon, so·otgimin matburingni an·chiko ganchini noksiko
satkikia unikode Rongtalgipa Biapona ra·anga (Levi odhai 4 aro 6).
Uandake salanti ku·rachakgimin paprangko torom nokona ra·ange
dona.
Unikode bilsiantian Nangrimatani Salo torom nokoni batanggimin bilsi
gimikni chimonggimin ku·rachakgimin paprangko rongtalata (Levi odhai
16). Ia rogtalataniko chu·sokatna Kamal Dal·gipa Isolna on·kanggimin
do·bokko dingtangmancha boli on·aniko daka. Unikode ua an·chiko
Rongtalbatsranggipa Biapona ra·ange pap watramko kosako ia
an·chiko satkikia ian Jisu, re·baenggipa Piokgipa papni sastiko ra·gen
ine mesokani ong·a. Kamal Dal·gipa unikode pap ku·rachakgiparangko
torom nokoniko ra·ongkate manggipin do·bokni skoo dona jekon bakrao
sichina dilanga (Levi 16:20-22).

Ia Nangrimatani Sal, bilsio changsa manianian torom nokko paponiko

rongtalata. Manderang ia salko bichal ka·ani sal dake ra·a maina
jemangan uamangni paprangko ku·rachakna jechaka uamangko
kakketgijagipa ine chana aro uamangko Isolni manderangoniko
galatako man·a" (Levi 23:29).

Jeko Kamal Dal·gipa chinna gita bilsio changsa daka, uko Jisu, an·chingna Kamal Dal·gipa changsa dake
pilak chasongrangna bon·ata (Ibri 9:6-12). Dal·gipa bichalni salo Uko uamangni Jokatgipa dake
ra·chakgiparangni ku·rachakgimin paprangko Ua torom nokoniko ra·gala. An·ching an·chingni paprangko
ku·rachakahaode, ua somoion Ua jringjrotna an·chingni paprangko serikaoniko kimitgen (Watata 3:19). Ia
kaman bichal ka·anikam ong·a jekon Jisu 1844 bilsio a·bachengaha.

Ritchachi·chet sotbribri bilsio Isolni bichalni somoi salgio a·bachengon, bichalni somoini gimin nama
kattako a·gilsak gimiko skiprakna a·bachengaha (Para. 14:6-7). Mikkangchi poraianio ia nama kattani
gimin an·ching man·anggen.

6. BICHALO SERIKANIKO MIKKANG CHAKANI

Ritcha chi·chet bilsi intal Kristo, Bichal Ka·gipa ong·e a·gilsako atchigipa sakantini janggi tanganiko
serikaoniko am·rikkitenga jedakode Jisu re·baon sawa sawa jokatako man·gen u·ina gita. An·chingko
bichal ka·gipa ong·e, Jisu kakket dakgiparangni pilak paprangko salgio uamangni janggi tanga gimiko
serikgipaoniko "kimitgen" (Watata 3:19).

Na·a Kristoko nang·ni palo aganchakgipa dake ra·chakahaode,

jensalo nang·ni bimung bichalo nakaton nang·ni janggi tanganiko
serikaniko mikkangchakna altugen. Jensalo toromirangko bichal ka·a
matchoton, Jisu uamangna on·aniko on·na a·gilsakona re·bapilgen
(Para. 22:12, 14).

Jisuni re·baanina na·a tariahama? Ma na·a Uoniko maikoba

donnukuengama? Indake (ka·mao mesokatenggipa gita)
ku·rachakgipa baksa mamung donnuani gri kakket ong·e
nangrimgrikani nang·o gnangma?

"An·ching an·tangtang paprangko ku·rachakode, an·chingni

paprangko watna aro pilak toromi ong·gijanirangoniko an·chingko rongtalatna ua bebegipa aro
toromigipa ong·a" - 1 Johan 1:9.

An·chingni paprangko ku·rachakaniko ortoara an·chingni paprangko mikkang chakna ku·rachakani, Isolni
kema ka·aniko ra·chakani aro Isolni bil aro ka·saaniko an·chingni nanganiko ku·rachakani ong·a.

Potsdamo donggipa patok nokko niengmitingo Raja Frederick William I kema ka·china mol·molanirangko
knatimaha. Pilak koedirangan, kragija chanchichipe bichal ka·giparangni a·sel tol·e saki on·gipa
sakirangni a·sel ba tik ong·gijagipa ukilrangni a·sel uamang patoko donatako man·aha ine mikchettokaha.
Kuturisaoni kuturisaona apsan golpokon knaaha. Indiba kuturisaode saksa koediara mamungkoba
aganjaha. Aiao inmane Frederick kal·ake inaha, "Anga chanchia na·aba dos dongjaenggen mo?" "Ong·ja
Maharaj, anga dos dakaha aro man·na kraa gita anga man·enga."

Raja nitimgipaona an·pile gam·e okamataha, "Re·babo, ia dos grigipa jinmako ong·siatna skang ia
kakketgijagipa koediko ta·rake jakgitele watatbo."

Maidake an·ching bichalna tarienga? Kristoni re·baanina maidake an·ching taria? Kakketko kakket ong·e
ku·rachakanichi: angni paprangna siani sastiko anga man·na krabeachim, indiba sakgipinsa angni biapko
ra·e angna aiao inmangipa kema ka·aniko on·aha. Je a·sel ong·oba na·a Kristo baksa kakket ong·e
nangrimgrikaniko dakgen ine da·on on·kanganiko dakbo.
 Isolo Bi·anina Aganchakaniko
Man·ani Cholko Am·e Nibo
Russiani ki·tap segipa aro itihasni gimin ma·sibegipa Anatoli Levitin minggipa
Seberiani Gulag o bang·a bilsirangko re·ataha, jean uni Isolo bi·anirangko
tin·kapilaha gita nikahachim. Indiba ua gisikni bidingo bilakataniko man·e
re·bapilaha. "Pilak aiao inmanani kamrangna bate dal·batgipade Isolo bi·anian
ong·a" ine ua ki·tapo seaha. "Anga angni chanchianichi mangmang Isolona
an·pilna nangaia unikode banoniba bilko angni janggiona, angni be·en
gimikona rudapata gita ma·sia. Uara maia? Ang gita choligijagipa budepa
mande, janggi tangani gimin be·ekgipa baoniko ia bilko anga man·gen, jean
gital daktaie aro a·gilsakni kosakona chuate angko jokata? Ian angni a·paloni
re·baa - aro uko warachaksona a·gilsako bil dongja.

An·ching maikai Isolo bi·ania Isol bak nangrimgrikaniko aro Kristian janggi
tanganiko bilakatna man·gen ia poraianio nigen.

1. ISOL BAKSA AGANGRIKANI

An·ching Isolo bi·on Isol an·chingni bi·ako knaa ine an·ching maikai ma·sigen?

"Aro na·simang angko okamgen, aro na·simang re·ange ango bi·gen aro anga na·simangna
knachakgen. Aro na·simang an·tangtangni ka·tong gimikchi angko am·on, na·simang angko am·e
nikgen" - Jeremia 29:12, 13.

An·chingni bi·anirangko Ua knachakgen aro aganchakgen ine maia ka·dongataniko Jisu on·a?

"Aro anga na·simangko agana, Bi·bo, unon na·simangna on·gen; am·bo, unon na·simang nikgen;
doktikbo, unon na·simangna do·ga osogen" - Luk 11:9.

Isolo bi·ania cholgni ramachi agangrikani ogn·a. Iakon Jisu ku·rachaka:

"Nibo, anga do·gacholo chadenge doktika; saoba angni ku·rangko
knae do·ga oode, anga uona napangggen aro anga un baksa, aro
uaba ang baksa cha·gen" - Para. 3:20.

Maidake Jisu baksa meattam cha·e agangrikan man·gen? Skanggipa,

an·chingni ka·tongo donga gimikko Isolo bi·ao Una agananichi. Gnigipa,
name knatimanichi. An·ching ning·tue chanchie Isolo bi·on Isol an·ching
baksa agangrikna man·a. An·ching Isolo bi·a gnang Isolni kattako
poraion, poraiani gita Isol an·chingna agangen.

Isolo bi·ania Kristianrangni janggi tanganio bewal ong·bana man·a.

"Dondikgija bi·bo. Pilakkon mitelbo, maina na·simangni gimin ian

Kristo Jisuo Isolni namnika ong·a" - 1 Thess. 5:16-18.

Maikai an·ching "dondikgija" bi·na man·gen? An·chingara ja·sku

dipankamna nangama ba olakiani ba mol·molani kattarangko mingjringe dongna nangama? Indakede
ong·ja. Indiba an·ching Jisu baksa chapchap janggi tangna nanga aro Un baksa je somoioba aro je
biapoba jakgitele agangrikna man·na nanga.
"Mande bang·gipa sorokrango, bremiting palmitingo, Isolona mol·molanirangko watatna man·a, aro Isolni
dilanina bi·na man·a……. An·ching an·chingni ka·tongni do·gacholko oe donjringna nanga aro an·chingni
okamaniko watdoatna nanga jedakode Jisu re·bae salgini sokgipa ong·e an·chingni janggi dongna
man·gen" - Steps To Christ, jak 99.

Indakgipa ning·tugipa nangrimgrikaniko ong·atani nambatgipa cholrangoni mingsade ning·tue chanchie

Isolo bi·anian ong·a.

"Angni chanchibewala Uni namnikani ong·china. Anga Jihovao ka·srokgen" - Git 104:34.

Isolo bi·o nang·ni mol·molanirangko sulsul mingrongrongainabe. Sengbo. Knatimbo. Bi·a gnang ning·tue
chanchiani nang·ni Isol baksa nangrimgrikaniko bilakatna man·gen.

"Isolni sepangbo, unon ua na·simangni sepanggen" - Jakob 4:8.

Badita sepangge an·ching Jisuona re·baa, inditaan an·ching Uni donganiko ma·sina man·gen. Uni gimin
Jisu baksa agangrikna sepangon dongbo aro kragipa kattani aganani giminde jajrengnabe. Kakketko aro
parake ra·rikani gri aganaibo. Pilakni giminan aganbo. Ua nang·ni nangrimbegipa ripeng ong·na gita
saknae, satengtoe sianiko chagrongman·aha.

2. MAIDAKE BI·GEN

Jensalo an·ching Isolo bi·on, an·ching Gitelni Bi·aniko

mesokaniko ja·rikna man·gen, jean "chingna bi·na skibo" ine
mol·molanina Jisuni Uni sningiparangna ja·rikna gita
mesokani bi·ani ong·a.

"O salgio donggipa chingni Paa, Nang·ni bimungko

rongtala intokchina. Nang·ni songnok on·bachina. Salgio
maikai, uandake a·oba Nang·ni namnika chu·sokchina.
Chingni cha·na nangako da·alo chingna on·bo. Aro
chingna gro nanggiparangko chinga wataha gitan chingni
grorangko watbo. Aro chingko dakmajoaona rimnapnabe,
indiba namgijaoniko chingko jokatbo. Maina nang·ni
songnok, aro bil aro rasong jringjrotna nang·nin ong·china, Amen" - Mati 6:9-13.

Gitelni bi·anio Jisuni mesokani gitade an·chingara Isolona salgio donggipa Pagipa dake re·bana nanga.
Salgini pilak bakon Uni ska ong·a gita an·chingni ka·tongoba Uni ska ong·china bi·na nanga. An·chingni
be·enni nanganirangna, kema ka·anina aro kema ka·ani gnanggipa gisikna Uo an·ching am·na nanga.
An·ching papko warachakna bilko Isolonikosan man·a ine gisik ra·na nanga. Kristoni bi·aniara
de·mitelanichi matchotata.

Changgipin somoio Jisu Uni sninggiparangko Pagipana "angni bimungo" bi·china skia (Johan 16:23) -
uan Jisuni on·gimin niamrango pangchake bi·china agana. Uani giminsa Kristianrang pangnan Isolo bi·o
"Jisuni bimungo bi·a, Amen" ine bon·kamao bi·a. Amen ingipa kattara Ibri ku·sik ong·a jean "Indaken
ong·china" ine orto ong·achim.

Gitelni bi·ania maidake bi·na nanga dilaniko on·genchimoba an·chingni Isol baksa agangrikaniara
an·tangari ka·tongoni ong·katbagipa miksonganirang ba chanchianirang ong·na nanga.

An·ching pilakni giminan Isolo bi·na man·a. An·tangni paprangko kema ka·ani gimin bi·china Isol agana (1
Johan 1:9), bebera·aniko bariatani gimin (Mark 9:24), janggi tangao nangchongmotanirangni gimin (Mati
6:11), saknaani aro saa biatirangoni an·sengatani gimin (Jakob 5:15), aro Gisik Rongtalgipako rudapani
gimin (Zek. 10:1). An·chingni pilak nanganirangkon Uona ra·angna man·a; mamungni giminba bi·na
chondugaa ong·ja ine Jisu an·chingna ka·donganiko on·a.

"Na·simangni pilak sinteaniko Uni kosako donbo, maina Ua na·simangni gimin simsaka" - 1 Pitor
5:7.

An·chingni Jokatgipa an·chingni janggi tanganio pilakni gimin che·em che·em u·ina gisik nanga. Jensalo
an·chingni ka·tongrang Uona ka·saao aro bebera·ao sokangon Uni ka·tong jaksrama.

3. MITINO BI·ANI

An·chingoni bang·bataan an·chingni sepangbatgipa ripengrangmangmangnaba

u·iatna sikgijagipa obostarang gnang. Uni gimin Isol an·chingko an·chingni
bojarangko mitino bi·anio ong·atchina agana. Un baksa saksangrik. Ian uani
gimin u·ina nanga indake ong·ja. Dal·batgipa ong·e Ua an·chingni donnugipa
kenanirangko, donnugimin miksonganirangko aro galchipgimin ka·ao
nanganirangko an·ching an·tangtangna baten ma·sibata. Indiba an·chingni gimin
ning·tue u·igipa aro tona amsokpilgija ka·sagipana an·chingni ka·tongrangko
oprakna nanga. Jensalo Jisu an·chingni parirangko dangtapna man·on
an·sengatani a·bachengna man·gen.

Jensalo an·ching bi·on, Jisu an·chingni Kamal Dal·gipa an·chingko dakchakna

sepangon ong·a:-
"Maina an·chingni Kamal Dal·gipa an·chingni bilgriarangna duk man·pana amgijagipa ong·ja,
indiba pap gri pilakni gimin an·ching gita dakmajoako man·aha. Uni gimin ka·saani singhasonona
kenmangija sepangna hai, maikai an·ching ka·sachakako man·gen aro nangani salo dakchakna
ka·saako man·gen" - Ibri 4:15, 16.

Na·a jajrengengama, sinjetako man·engama, dos gnangma? Gitelni mikkango donbo. Unode Ua
an·chingni pilak nanganiko on·na man·gen.
An·chingara mitingo bi·na gita dingtangmancha biap dongna nangenma?

"Indiba na·a bian salo an·tang nokdringo napbo aro do·ga chipchange dongnue donggipa nang·ni
Paao bi·bo; unon dongnuao nikgipa nang·ni Paa nang·na on·skagen" - Mati 6:6.

Isolo bi·a baksanaba songjinmani soroko ring·mitingo, kam ka·mitingo, ba jinmao tom·dake kusi
ong·engmitingo Kristian sakantian salantio an·tang Isolo bi·na aro Sastro poraina somoi donna nanga.
Salanti Isol baksa somoi re·atna somoi tik ka·e donbo je somoion na·a gisik sranga aro gisik dingchike
chanchina man·a.

4. JINMAO BI·ANI

Jinma baksa damsan Isolo bi·ania dingtangmancha karimaniko ong·ata

aro dingtangmancha Isolni bilko bi·ani ong·a.

"Maina jeo sakgni sakgittam angni bimungo tom·a, uon anga

uamangni gisepo gnang" - Mati 18:20.

An·chingni dakna man·gipa dal·batgiparangoni mingsade nokdang

ong·e damsan Isolo bi·jringani ong·a. Na·simangni dedrangni
an·chingni nanganirangko Isolona bi·achi ra·angna man·a ine mesokna
man·gen. An·chingni salanti janggi tanganio maiba chonbegipa
bosturangni gimin bi·anina Isolni aganchakaoniko uamang nikon Isolo
bi·anini gimin gisik nangbegen. Nokdango bi·aniko dakon kusi ong·e an·tangtangini chagronganiko
sualgrikani somoi dakbo.

5. BI·ANINA AGANCHAKANI MINGSNI JA·PANGRANG

Jensalo Mose Isolo bi·on Sagal Gitchak bakgni dakaha. Jensalo Elija Isolo bi·on, salgioni wa·al
ga·akonbaaha. Danielni Isolo bi·on saksa sa·gre re·baon chikrakgipa singhorangni ku·sikrangko
ku·kipataha. Sastroo bang·a gisik nangatgipa bi·anina aganchakaniko serikanirang gnang. Isolni aiao
inmangipa bilko man·na gita Isolo bi·aniko chol rama dake jakalchina Sastroo ku·patia. Jisu indake
ku·rachaka:
"Angni bimungchi na·simang maikoba bi·ode, uko angan dakgen" - Johan 14:14.

Indiba mitam bi·anirangkode knachakja gita nika. Maina? Iano mingsni niamrang gnang jeko ja·rikon
nang·ni bi·aniko mangrakbatatna gita dakchakgen.

(1) Kristoni sepango dongbo.

"Na·simang ango dongkamode, aro angni katta na·simango dongkamode, indide jeko ska ukon
bi·bo, unon ua na·simangna on·gen" - Johan 15:7.

Jensalo an·ching Isol baksa nangrimgrikaniko skang dakon aro Un baksa nangrimaniko dakjringon
an·chingni bi·anirangna aganchakanirangko am·e, knarime dongjringgen, jekon indake dakjaode
ma·sirikjanaba donga.

(2) Isolo ka·donge dongjringbo.

"Aro bi·on bebera·e jekon bi·gen, pilakkon man·gen" - Mati 21:22.

Bebera·ani ba ka·dongani ortoa an·chingni an·chingni pilak nanganirangko on·china an·ching an·chingni
salgini Pagipaoniko bi·chongmotgen? Na·a bebera·ani dongjani gimin neng·nikaniko man·ode gisik ra·bo,
an·chingni Jokatgipa ka·dongani gri ong·e mol·molgipana aiao inmangipa kamko dakaha.

"Anga bebera·a, angni bebera·gijako dakchakbo" - Mark 9:24.

Nang·o je bebera·ani gnang ukon jakaljringbo; nango bebera·ani giminde simbranabe.

(3) Isolni skanina an·tangko tom·tome on·kangbo.

"Aro an·chingo gnanggipa Una ka·donga ian; an·ching maikoba Uni namnika bi·ode, ua
an·chingna nachil songa" - 1 Johan 5:14.

Gisik ra·bo, Isol bi·anichi an·chingna skiskaa, aro patianirangko

uchin on·na ska. Uni gimin basakobade "man·jawa" ine Ua
agana. Basakobade Ua rama cholgipin gita an·chingna on·pila.
Isolo bi·aniara Isolni skani baksa sepangbatroroe nangrimani
chol ong·a. Isolni aganchakanirangko u·ininggipa ong·na nanga
aro uarangoniko skie ra·na nanga. Dingtangmancha mol·mole
bi·anirangko sandijringode aro ua mol·molanina aganchakania
mai ong·a uko ma·siode uan dal·begipa dakchakani ong·gen.
Gisik Rongtalgipa tiktak biapona dilgen: "Gisik ……… Isolni
namnika gita rongtalgiparangna mol·molchaka" (Rom 8:27). Gisik
ra·bo, Uni nika gita an·ching nikna man·ode an·chingni skania
pangnan Uni skani baksa apsan ong·na man·gen.
(4) Isolo chakchike sengbo.
"Anga Jihovana chakchike sengsoaha; aro ua angchi so·onchokaha, aro angni grapako
knachakaha" - Git 40:1.

Iani mongsonggipa u·ina nanganide nang·ni miksonganiko Isolo donani ong·a. Uni chu·sokatanio
miksongbo. Isolni dakchakaniko dikdiksa am·e unikode ruttgijaan nang·ni neng·nikanirangko a·gilsakni
suknirangko am·anio sripatna jotton ka·nabe. Jihovao chakchike sengsoani bewalko an·ching namen
nangenga.

(5) Mamung papoba dongnabe.

"Angni ka·tongo anga namgija dakaniko nie chanchiode, Gitel kanchakjawa" - Git 66:18.

An·chingni janggi tangao u·ironggipa papko rakiode, Isolni bilko gimaatgen (Isaia 59:1, 2). Na·a
jaksamsachi papo dingdee jaksamgipinchi Isolni dakchakanina jak snilatna man·ja. Ka·tong gisik gimikchi
dakgualaniko ku·rachake gisik pil·ode neng·nikanirangko namatna man·gen.

An·ching namgija chanchiaoni, namgija kattarangoni, aro namgija kamrangoni an·tangko jakgitel ong·atna
Isolna on·na sikjaode an·chingni bi·anirang bil gnanggipa ong·jawa.

"Na·simang bi·a indiba man·ja, maina an·tangtang namnikarango chon·atna ine na·simang namgija
bi·a" - Jakob 4:3.

An·tangnirangna chanchie bi·anirangna "de on·gen" ine Isol aganchakjawa. Isolni niamo aro Uni skanina
nang·ni nachilrangko songe rakibo, unon Ua Uni nachilrangko nang·ni bi·anirangna sone rakigen.

"Niamko knatimna an·tangni nachilko songgijagipa uni bi·aniba mitchiani" - Toe Skiani 28:9.

(6) Isolko nangnikaniko ma·sibo.

Jemangan uamangni janggi tanganio Uni donganiko aro bilko bi·a uamangna Isol aganchaka.

"Toromna okkrigipa aro ringna sikgiparang an·senga; maina uamangko okaatgen" (Mati 5:6).

(7) Isolo bi·anio jotking dakbo.

An·chingni bi·anirango jotking dakna nangani gimin Jisu jotking dakgipa segri me·chikni gimin golpo
agane mesoka jean bichal ka·gipaona an·tangni mol·molani baksa re·barongachim. Gisik ding·atako
man·e bon·kamao bichal ka·gipa indake aganaha:
"Ia segri angko duk on·engani gimin anga una kakketko dakgen." Bon·kamao Jisu indake agana:
"Indide Isol An·tangni segimin, wal sal uo grapgiparangna kakket dakjawama aro uamangni gimin
chakchikgenma?" (Luk 18:5-7).

Nang·ni pilak nanganirang, ka·donganirang aro niksamsoanirangko Isol baksa chanchirimaniko dakbo.
Dingtangmanchagipa patianirangko, nangmitingkoba na·a skie ra·kujana kingking sing·e dongkamaibo
aro knatime dongkamaibo.

6. BI·GIPARANGNI NANGANIRANGNA SA·GRERANG DANGDIKE

ON·A

Sa·grerangni dangdike on·anirangchi uni bi·anirangna aganchakanina

gitko segipa kusi ong·a:
"Anga Jihovako am·aha aro ua angna knachakaha. Aro angni pilak
kenanirangoniko angko jokataha. ……… Jihovani sa·gre una
kengiparangni pilakchin a·tip daka aro uamangko jokata" - Git 34:4-7.
An·ching Isolo bi·on, an·chingni bi·anirangna aganchakna Isol sa·grerangko watata (Ibri 1:14). Kristian
sakanti baksaan nitimgipa sa·gre gnang:
"Ia chongiparangoni saksako na·simang maikai chonnikjawa, indake gisik rakbo; maina anga
na·simangna agana, Salgio uamangni sa·grerang pangnan salgio donggipa angni paani
mikkangko nika" - Mati 18:10.

An·chingni bi·anirangni a·sel:

"Gitel sepangon. Mamungnaba sintenabe, indiba mitelan baksa bi·achi aro mol·molachi Isolna
pilakni gimin na·simangni man·na nanganirangko u·iatbo. Unon na·simangni ka·tongrang aro
chanchianirangko rakigen" - Phil. 4:5-7.

7. KRISTIAN JANGGI TANGANI BEWAL

Sastroo dingtangmancha Kristianrangna janggi tangani bewalko talata.Ephesurangna 4:22-24 o seani

gitade Kristianrangko "tol·napani skarang" oni ong·bagipa gitcham janggi tangani bewalko "galna" aro
gital janggi tangani bewal jean "Isol gita daka" ko "ganna" nanga ine agana. Sastroo aro dilani 6 o
an·ching am·e man·aha je, gital atchianio Kristoo dingtang ong·na gita an·ching "ong·attaianiko" man·a.

Ia dilanio aro iani ja·mano dilani ge·doko Kristian janggi tangani bewalko talata: iarang kusi ong·e Kristian
janggi tangani donnuaniko paraka. Iarang nang·ko Kristo baksa bilakbate nangrimaniko dakna
dakchakgen jean dingtangmanchagipa Kristian janggi tangani ong·gen. Uni gimin nang·ni mikronrangko
da·alo Jisuo miksongbo aro na·a Kristoni tom·tomani sason ka·ao bon·kamgipa cheaniko maniani bak
ong·na man·gen.
 Kusi Ong·ani Cholko
Ritcha chi·sku sotbrigittam bilsio, Japanni sipairang ritchani ritcha America aro Europe a·songrangni
"bobil ong·gipa jatrang" ko China a·songni Shantung Province o patokona watataha. Uamang bang·a
jaarangna neng·nikani, ka·donga gri ong·ani, mande bang·dugaani neng·anikani, aro kenaniko chakna
nangaha. Dakgrikanirang, jegrikanirang bang·roroaha.

Indiba saksa mande gnangchim, uko patoko donggiparangoni saksa indake talata: "Ua mandean patoko
donggiparangni namnikbatgipa, mande ra·batgipa aro ka·saako man·batgipa ong·achim." Uan Eric Liddel
Scotlandni Missionary ong·achim.

Patoko donggipa Russiani me·chik ja·mano Liddelko an·tangni

nangani somoio dam gri dakchakbegipa ine agana. Uni patokona
re·bachengon ua saksanchim indiba Liddelan re·bae una
nangarangko dakeaha.

Sakgipin koedi Lidelni gimin, Uo sontol ong·gipa aro ka·ting

dakgipa manderangko ka·dingatani bewal gnang" ine agana.

Changsao koedirangni tom·anio ka·o nangan gapachim.

Chadamberangni sengnapgija dake golmal ong·enganiko saoba
namatbo ine manderangni aganon Liddel namataniko dakna a·bachengaha. Ua kal·susaanirangko, rata
tetani classko bi·sarangna a·bachengaha aro attam-attamode ua an·tangba uamang baksa dongpaaha.

Ritcha chi·sku kolgrikbri bilsini Olympic kal·susaanio Liddel 400 metre katanio gold medalko man·e
an·tangna migsinganiko aro rasongko man·aha. Indiba ua patok nokomangba an·tangko a·gilsakni gita
re·giparangchi de·mitelako man·ate Kristian katsusaanio chegipa ong·a ine mesokaha.

Maia uko dingtangmanchagipa ong·ataha? Uko dingtangmanchagipa ong·ataniko salantian pringni 6 bajio
nikna man·genchim. Ua somoio uni ripengrangni tusimitingo chongipa lampko so·e tableo note book aro
Sastroko ra·e porairongachim. Isolni kattaoniko salanti Eric Liddel ka·saaniko aro bilko am·rongachim.

1. KRISTIANNI JANGGI TANGANINA DILGIPA KI·TAP

Kristianrangna dilgipa ki·tap dake Sastroko seaha. An·ching gita

mande chong·motni golporangan gapaigipa jemangan an·chingni
salanti janggi tanganio chagronggiparangkon uamangba
chagrongahachim. Sastroni manderangko ma·siani, uamangni
katchaani aro dukrang, uamangni neng·nikanirang aro cholrang
an·chingko brigimin Kristianrang ong·na gita dakchaka.

Gitko segipa Daud an·chingni salanti Isolni kattao pangchakaniko

chaki baksa toe mesoka.

"Nang·ni katta angni ja·arangna chaki, aro angni ramadilna

seng·ani ong·a" - Git 119:105.

Sastrooniko salanti an·chingni man·enggipa seng·ania an·chingni janggi tanganio nanggipa gisikni
dal·roroaniko rongtale mesoka. Pilakna bateba Sastro an·chingna Jisu, A·gilsakna Seng·aniko on·a.
Janggi tanganio Jisu teng·suosa orto gnangata.
2. DINGTANG ONG·ATGIPA RIPENG MELIANI

Ripeng melibegipani chitti maikai chongmot ong·a ugita chacha Kristo

Sastroko an·chingna chong·mot ong·atna nangnika.

"Anga na·simangko ripeng ine inaha, maina Apaoniko angni pilak

knaako anga na·simangna u·iataha" - Johan 15:15.

Jisu an·chingna nambatakosa nangnika. Uni katta an·chingko Isolni

sepangona sokangata; jeon ka·dongchaka aro jenan Ua An·tang skia.

"Maikai na·simang angon tom·tom donganiko man·gen, uni gimin anga

iarangko na·simangna aganaha" - Johan 16:33.

Ia tom·tomaniko ma·sina, Kristo baksa naljoke nangrimaniko man·na, Uni

an·chigna seatgipa chittirangko an·ching poraina nanga. Sastroan ua salgini
chittirang ong·a. ua chittirangko kuligija donna nangja. Nang·ni nangenggipa dingtang ong·atgipa nama
katta ua kattaon ong·a.

Sastroni bilni gimin iano mingsa saki gnang: ·Anga dakchakaniko nangengachim aro anga uko Jisuo
man·aha. Pilak nanganirangko on·aha, angni janggini okkrianiko okkaataha; angnade Sastroara Kristoni
gimin parape·ani ong·a. Anga Jisuo bebera·a maina Ua angnade Jokatgipa ong·a. Anga Sastroo
bebera·a maina uan angni janggina Isolni ki·rang ong·a ine anga nikaha" - Ministry of Healing, jak 461.

3. SASTRO GITA ARO NIAM MINGCHIKKUNG GITA JANGGI TANGNA RAMA MESOKANI

Dikdiksana Niam Mingchikkungko niaton, tangna nangchongmotgipa pangchakani ine an·chingna

ma·sina dakchakgen.

Ge·etanirangko bagni dakna man·a. Skanggipa mingbri

an·chingni Isol baksa nangrimaniko mesokna, aro bon·kamgipa
mingdok an·chingni gipin manderang baksa nangrimaniko
mesoka.Uarangko Re·ongkata 20:3 - 17 o man·a.

Skanggipa minggni ge·etaniara an·chingni Isol baksa aro Uko

olakianio nangrimaniko mesoka.
I. Angana agre nang·ni gipin isolrang dongjachina."
II.Na·a an·tangna kitgimin mite dakaniko …… daknabe
…….na·a an·tangko uarangni mikkango tuchikopatnabe."

Gittamgipa aro brigipa ge·etanirang an·chingna Isolni bimung aro Uni rongtalgipa sal baksa
nangrimani gimin mesoka.
III. "Na·a Jihova nang·ni Isoln bimungko indinari ra·nabe ….."
IV. "Uko rongtala ine rakina neng·takani salko gisik ra·bo. Saldok na·a gambo aro nang·ni pilak kamko
ka·bo; indiba snigipa sal Jihova nang·ni Isolna neng·takani ong·a ……."

Bongagipa aro snigipa ge·etanirang nokdangni kaako chel·chaka.

V. "Nang·ni ma·ako aro nang·ni paako mandera·bo……"
VI. "Na·a til·eknabe."

Dokgipa, chetgipa, skugipa aro chikkunggipa ge·etani, songsal baksa nangrimgrikanio an·chingko
chelchaka.
VII. "Na·a mande so·otnabe."
VIII. Na·a cha·unabe."
IX. "Na·a nang·ni songsulna tol·e saki on·nabe."
X. "Na·a nang·ani songsulni jikgipana … ba nang·ni songsulni mamungnaba mikboknabe."

Niam Mingchikkungara an·chingni Isol baksa aro nangrimaniko mesoka. Uarangan Kristian janggi
tanganio mesoke dilgipa krongrang ong·a.

4. NIAM MINGCHIKKUNGNI GIMIN JISU MAIKO AGANA

Salsao Jisuni skiengmitingo, saksa gisik nangbegipa pante Uona sketange sing·aha, "O Skigipa, anga
jringjrotni janggiko man·na ine mai namako dakgen" (Mati 19:16). Ua uni gamni bidingo neng·nikaniko
chagrongenga ine Kristo nikaha, uni gimin uni gamko wate, "ge·etanirangko manibo" (pod 17) ine
ku·ptaiaha. Ua pante Kristoni uni neng·nikaniko ma·sianiko gelna jotton ka·e badia ge·etanirangko Ua
miksongenga ine sing·aha. Ge·eta mingchikkungoniko Ua adita sulsul aganangaha (pod 18, 19).

Bon·kamao ua "gam bang·gipa" pante an·pile duk ong·e re·angaha (pod 20-
22). Ge·eta mingchikkungko ra·chakna man·a indiba uni janggi tangao
an·tangnasan chanchiani bewalko galani niamni miksonganiko manina
man·jawa.

Niam Mingchikkungara an·chingna sima-ari ko mesoka jeni ning·o Isol baksa

aro saksa sakgipin baksa nangrimgrikani dal·rorona man·gen. Niamko
maniania chong·motgipa kusi ong·aniona rama ine Jisu mesoka.

"Na·simang angni ge·etanirangko maniode, na·simang angni ka·saon

dongkamgen; anga maikai Apani ge·etanirangko maniaha, aro Uni
ka·saon dongkama. Angni katcha·a maikai na·simangon ong·gen aro
na·simangni katcha·a maikai chu·sokgen, uni gimin anga na·simangna iarangko aganaha" - Johan
15:10, 11.

5. KUSI ONG·GIPA JANGGI TANGANIONA DILGIPA

Aganprakani ki·tapara Solomonni kusiniko am·ani gimin aganani ong·a. A·gilsakni gam jinoniko kusiniko
am·ani gimin ua see rakia: Nambegipa nokrang, bite nanggipa draka barirang, nitobegipa barirang,
cha·tobegipa biterangni barirang, chakol-nokolrangko bang·e rakiaha. Mandeni man·na ska pilakan uo
gnangchim. Indiba kusinirang uko gelangaha.

"Unon anga an·tangni jakrangni ka·gimin pilak kamrangko, aro chu·sokatna kam ka·gimin angni
kam ka·ako nipilaha; aro nibo, pilakan ong·gramaia, aro balwana tikelanisan" - Aganprakgipa 2:11.

Unikode Solomon kusiniko man·na ka·donge a·gilsakni sukko am·na an·pilaha. Ua chuchi, me·chikchi aro
gitchi togiako man·aha. Uni pilakni gimin ma·siman·e bon·kamgipa chanchianiko dakania:
"Ong·gramaianirangni ong·gramaia piakan ong·gramaia" - Aganpakgipa 12:8.

Jihova nama ine Solomon changsao nikmanaha aro cha·tote nimanahachim. A·bachengo uni Isolko
manie janggi tanganiko a·gilsakni paponiko katchaaniko uni am·chichianiko tosusaani ja·mano uni
nikania:
"Kattani bon·kamara ian, ……….. Isolna kenbo aro uni ge·etanirangko manibo; maina ian pilak
mandeni dakna nanggni" - Aganprakgipa 12:13.

A·gilsakni bewal gita janggi tanganio kusiniko seng·sota bewalchi Solomon man·na ka·dongachim. Uni
janggi tangani bon·achibara ua an·tangni dakgualaniko ku·rachakna ka·donganiko man·aha. Apsan
dakgualaoniko gipinrangko jokatna, ua indake seaha,
"Niamko rakigipa uan kusi ong·gipa" - Toe Skiani 29:18.

6. NIAM MINGCHIKKUNGAN NANGCHONGMOTGIPA NIAM GITALNI DILGIPA ONG·A

Niam Gitalo Jakob indake saki on·a:

"Maina saoba niam gimikko manie mingsao ja·gitote, pilakni
gimin gro nanggipa ong·aha. Maina Til·eknabe ine ingipa, Mande
so·otnabe ine inaba inaha. Indide na·a til·ekja, indiba mande
so·otode,na·a niamko pe·gipa ong·aha. Jakgitelni niamchi bichal
ka·ako man·nasigiparang gita, na·simang indaken aganbo aro
indaken dakbo" - Jakob 2:10-12.

Charles Spurgeon, mingsinggipa Baptist mondolini skiprakgipa indake

agana: Isolni niamara rongtalgipa, salgionigipa, chu·soksranggipa
ong·a …….. uano bang·dugae ge·etani gri; uano komidugaaba ong·ja,
indiba inditan tosusasa man·gijagipa ong·a. Uani chu·soksranggipa
ong·anian Isoloni ong·a ine mesoka.

John Wesley, Methodist mondoliko a·bachengdilgiparangoni saksa,

niamni baikamani gimin indake sea: "Niam Mingchikkungko ………
Ua (Kristo) ra·angjaha ….. Ia niamni pilak bakan pilak mandeni jatna
pilak chasongon ong·a" - Sermons, Vol. 1, jak 221, 222.

Billi Graham, a·gilsako mandera·ako man·batgipa skiprakgipa Ge·eta

Mingchikkungko inditan dal·e ra·a ua uarangni Kristianrangna nangchongmotani ong·ani gimin ki·tap
kingsako seaha.

7. NIAMKO MANINA BIL

Sastro aro Ge·eta Mingchikkungara kusi ong·e janggi tanganina dingtanggijagipa nangchongmotgipa,
chu·sokgipa dilgipa ong·a. Indiomangba ka·tongrango meligrikgijanirang dongkuenga. Saksa iani gimin
indake agana: "Ge·eta Mingchikkungko manina nangkuenga ine anga bebera·a, uarangko manion kusi
ong·aniona dilgen ine ma·sia. Anga niamko manina jotton ka·aha, indiba anga man·chongmotja.
Darangba niamko manina man·jawa ine bebera·na anga
a·bachengaha."

Mandeni ong·rongbewal skanide Isolni ge·etanirangko manie janggi

tanganian ong·achim. Indiba indake jotton ka·nioni changni chang
papigipa ka·tongoni re·bagipa duk ong·e aganchakania, "Anga
manina amja!" ine ong·a. Maina?

A·selde:
"Maina be·enni chanchianiara Isolna bobil ong·ani ong·a; maina
ua Isolni niamna bamja, aro amaba amja" - Rom 8:7.

Niam Mingchikkungni miksonganiara maia?

"Maina niamchi paprangko u·iani ong·a" - Rom 3:20.

An·chingara ka·donga grigipa ong·e Jokatgipako nangenggipa gimagimin papirang ine tale ma·sianiona
dilanian niamni kam ong·a.
"Indake an·ching bebera·achi toromi inako man·china Kristoona niam an·chingna rodilgipa
ong·aha" Galati 3:24.

Jisuan aganchakani ong·a! Jensalo an·ching kusi ong·e Jisuni ja·o ong·on, bebera·achi an·ching
an·chingni paprangna kema ka·aniko man·na aro Uni ge·etanirangko manina Uni bilko man·gen.

8. GE·ETA MINGCHIKKUNGKO KA·SAE MANIANI

Maniania ka·saani bite ine Jisu an·chingna agana.

"Angna ka·saode, indide na·simang angni ge·etanirangko manibo" - Johan 14:15.

An·ching Isolna ka·saode, an·ching skanggipa mingbrigipa ge·etanirangko manigen jean an·chingni Isol
baksa nangrimaniko paraka; aro an·ching manderangna ka·saode an·ching bon·kamgipa mingdok
ge·etanirangko manigen jean gipinrang baksa an·chingni nangrimaniko paraka.

Je mandean ge·eta Niam Mingchikkungko ga·belbela ua pap ka·a.

"Papko ka·gipa sakantian niamkoba pe·a, aro niamko pe·an pap

ong·a" - 1 Johan 3:4.

Indiba Isolko mitelbo, an·chingo Jokatgipa gnang jean ia a·gilsakona

re·baaha aro siaha, chakatpilaha aro da·o mingsa miksonganina tangna:
"Aro paprangko ra·angna ine uko parape·ataha ine na·simang u·ia" 1
Johan 3:5.

An·chingni Jokatgipa kema ka·a aro an·chingni paprangko wata (1 Johan 1:9). Unikode ua an·chingna
Uni ka·saako an·chingna ka·sachakaha gita on·na ku·rachaka - an·tangna chanchie janggi tangani aro
namatani sam.

"Maina an·chingna on·gimin Gisik Rongtalgipachi Isolni ka·saako an·chingni ka·tongrango

rudapaha" - Rom 5:5.

Isolni niamko rakina an·ching an·tangtango bil gri. "Isolni ka·saako an·chingni ka·tongrango rudapa" nian
an·chingni ka·dongani ong·a.

9. ISOLNI KA·SAANI ARO NIAMKO MANIANI

Jokania on·ani ong·a. An·ching uko man·na amja. An·ching uko bebera·achi mangmang ra·chakna man·a.
An·ching toromi ine chanako boksis dake Isolni ka·saani giminsan bebera·achi man·a.

"Maina ka·sao bebera·achi na·simangko jokataha, aro ua na·simangoni ong·ja, Isolni on·asa" -
Ephesus 2:8.

An·ching an·tangtangni kamrangchi - jotton ka·anichi an·ching

ge·etanirangko rakina man·ja. Jokatako man·na gita an·ching
ge·etanirangko manina man·ja. Indiba jensalo an·ching bebera·achi;
aro on·kanga gnang Jisuona re·baon aro jokatako man·on Uni ka·saa
an·chingni ka·tongrangko gapata. Ia Isolni ka·saani aro ra·chakani a·sel
an·ching Uko ja·rikna aro an·chingni ka·tongo donggipa Uni ka·saani
bilchi Uko manina ska (Rom 5:5).
Mandeni bilni namgni gri ong·aniko Paul dingchike agana aro jokaniko man·na niamni ning·o ong·ja indiba
"ka·saani ning·o ong·a" ine agana.

"Niamni ning·o ong·gija ka·saani ning·o ong·ani gimin an·ching pap ka·genma? Ong·jachina" -
Rom 6:15.

Maini a·sel? Maina ka·saachi didiatako man·gipa ka·tong ka·sae mangipa janggi tanganiko ong·ata! (Rom
13:10). Kristona ka·saania Uko maniani ong·a:
"Angni ge·etanirangko manie uarnagko manigipa uan angna ka·sara" - Johan 14:21.

Obostarangni namjabatgipa somoiomangba je mandean bil baksa nangrimaniko man·e, chu·ongnike,

katta manie janggi tanganiko tangna man·a ine Eric Liddel mesokaha. Dukni aro kenani somoio
namnikatgipa ka·saaniko Liddel mesokaha. Uni Kristona ka·saa gnang nangrimgrikanian Gisik
Rongtalgipa baksa uko bilakataha aro "niamni ge·etako chu·sokatna" man·ataha (Rom 8:1-4). Chisolo
datkapako man·gipa aro chakatpilgipa Jokatgipa baksa ka·sae nangrimgrikania namgipa janggi tanganiko
ong·ata.

Na·a ia cholko an·tangna am·e man·ahama? Jisuni nang·na ka·saani Uko Uni janggiko nang·ni papna
on·chakna dilaha. Uni ka·saani baksa nang·ni pilak nangrimgrikanirangko Ua bilakatna, "Uni namnikako
dakchina ……… na·simangko pilak namaon chu·sokatchina" (Ibri 13;21) Ua bilko on·a. Nang·ni
aganchakani maidake ong·gen?
 Salgini Neng·takani Cholko
Bang·gija bilsirangsan re·angaienga, jakkalna chang·pilgija agitchaa somoiko an·ching man·gen ine
mitam manderang agansoengachim. Ka·dongbee agansoanina namgipa a·selrang gnangchim. A·gilsak
songjinmarango computerrang jasani kamko secondsa nanggijaan matchotatengachim. Aro dal·dalgipa
karkanarango dal·dalgipa kamrangko robotrangchi kam
ka·atengachim.

Computerrang kam bang·ako mikjapsano matchotomangba

an·ching skangona batemangba rang·spenan man·kuja. Pilakna
bateba nokdangni manderangba somoikon chu·ongatjaenga.
Segiparang aro jikgiparang an·tangtangni bi·sarang baksa somoi
re·atnan man·jaenga, an·tangtang baksade komibatsranga.

Chongipa gittimoniko am·rikkite nianio nikani gitade pagipani

bi·sarang baksa somoi re·ataniko sandie nion salprako second
37 sanchim! Nokdangrango somoi dongja, gronggrikna man·ja.

Maidake an·ching chu·onga gita sket bakket dakgija gronggrikna man·gen?

1. GISIK DING·E JANGGI TANGANIKO NAMATANI

Nokdangrangni neng·nikani, jajrenganirangko Jisu ma·sia. Aro gisikni bidingo neng·takania namgipa
janggi tangani bak ong·a ine an·chingni ma·sianiko Ua nangnika:
"Pilak gamgipa aro bal jrimgiparang angona re·babo, anga na·simangko neng·takatgen. Angni
pakripeko an·tangtangni gitoko gatbo aro ango skibo; maina anga sontol aro gisiko ongipa; unon
na·simang an·tangtangni janggina neng·takaniko man·gen" - Mati 11:28, 29.

Sastroo ku·patiani gitade an·ching indakgipa neng·takaniko rokomgni cholrangchi man·gen: Salantio aro
anti antio Kristoona re·baanichi.

2. SALANTI JISU BAKSA NANGRIMANI

Mande jinma Jisuni gisik on·aniko man·na chrikrongachim. Indiba Kristoa tom·tome Uni sepango
donggiparangnasa skirongachim. Maidake? Ua salantian Uni salgini Pagipa baksa agangrikrongachim.
Janggi tangani ra·bianirangko mikkangchakna An·tangni Pagipao pangnan nanganirangna
pangchakrongachim (Johan 6:57).

Uni sikdikdikgipa, ka·dongan gapgipa janggi tangani gita an·ching janggi tangna gitade pangnan Jisuo
pangchakna nanggen - Uni katta aro Gisikchi an·chingo gapatna an·chingko bimang ong·atna nanggen.
An·chingni janggi tangao an·chingko bon·atna tikkelenggipa bilrang; an·chingni nokdangrangko gugraatna
jotton ka·ani bilko wearachakna nambatgipa chol ramade Kristo baksa bang·e somoi re·atanian ong·a. Ua
an·chingna agana:
"Angon dongkambo, aro anga na·simangon dongkamgen ….. Angan agre na·simang
mamungkoba dakna amja" - Johan 15:4, 5.

An·chingni chasongni dal·batgipa nanganirangko salanti Jisu

baksa nangrimaniko dake man·anian ong·achim. An·chingni
Kristo baksa nangrimgrikanio mingsa nangchongmotgipade
chisolo Uni matchotgimin kam ong·a. Uni siangengmitingo
"Matchotjok" (Johan 19:30) ine chrikania Jisu dal·begipa
chu·sokaniko miksongachim. Ia dal·begipa chu·sokani gimin mangmangsan chong·motgipa neng·takani
aro naljokaniko man·na ama. "Matchotjok" ingipa kattani ortoa Uni an·chingko piokani kamko matchotaha
ine ong·achim.

"Ua changsanon an·tangko boli on·achi paprangko gimaatna mikkang pa·aha" - Ibri 9:26.

Jensalo Jisu sion, Ua "paprangko gimaataha." Uni giminsa je bebera·gipaan an·tang paprangko
ku·rachakaha ua Kristoni matchotgimin kamo "neng·takna" man·gen. An·ching ra·chakako man·aha.

Da·alo an·chingni janggi tangani ja·kuantion dos donge nikani gnang. Indiba Jisu dos donge nikani
neng·nikaniko changsanon pilakna chisolo namataha. Jisuni matchotjok ine chrikanian Uni "Anga
na·simangko neng·takatgen" ine ku·rachakaniko kakket ong·a ine mohor su·aha. Skobikrok a·brio
an·chingko piokani kamko Kristo matchotaha (Titus 2:14), unikode Sabbath salo Ua gopramo
neng·takaha aro Robibar pringo pap aro siani kosako chegipa ong·e gopramoni chakataha. Kristoni
matchotgimin kamo neng·takana agre dal·bata ka·dongani Kristianrangna gri.

"An·ching bebegipa ka·tongchi bebera·srangao sepangbana hai …… an·ching ka·dongani

ku·rachakaniko il·engatgija kimkim rim·na hai; maina ku·rachakgipa bebegipa ong·a" - Ibri 10:22,
23.

"Ku·rachakgipa bebegipa ong·a" ni gimin Jisuni ku·rachakgipa jokatani neng·takanio an·ching napna
man·gen. Salanti Jisuo an·chingni chagrongenggipa kimkimani, tom·tomani aro neng·takania an·chingni
maikoba dakani bite ong·ja indiba Uni chisolo kam ka·ahani bitesa.

An·ching Kristoo neng·takna man·a maina an·chingni jokanina ka·dongatako man·aha. Ua ka·dongatani
an·chingko salanti Kristo baksa somoi ra·e Uni kattako cha·na aro Isolo bi·anio salgini balwako ringopna
didiata. Jisu baksa grongania gisik ding·an gapgipa janggi tanganiko tom·tomatgipa aro miksonganian
gapgipa janggi tanganiko tom·tomgipa aro miksonganian gapgipa janggi tangani ong·atna dakchaka.

3. ANTI-ANTI JISU BAKSA NANGRIMANI

Kristo a·gilsakko saldoko ong·atani ja·mano (Kol. 1:16, 17) ua

neng·takani salko on·aha. Iano Un baksa an·chingni antiprako
nangrimgrikaniko dakani namgipa chol ong·a.

"Aro Isol an·tangni dakgiminko nitokaha, aro nibo, nambejok. Aro

attam aro pring ong·ahaon saldok ong·aha. Indake salgi aro a·a, aro
uarangni kotokko matchotaha. Aro salsnini salo Isol an·tangni
dakgimin kamko chon·aha; aro ua salsnini salo Ua an·tangni pilak
dakgimin kamoni neng·takaha. Aro ua salsnini salko patie
rongtalataha; maina ua salo Isol an·tangni ong·ate dakgimin pilak kamrangoni neng·takaha" -
A·ba. 1:31- 2:3.

Uamangko ong·atgipa ong·e Jisu Adam aro Hoba baksa skanggipa Sabbatho "neng·takaha" aro ua
Sabbath salko "patiaha" aro "rongtalataha." Isol antisao salsni ong·gipako ong·aton An·tangni namgnina
ong·atjaha, indiba Adam aro Hobana aro da·ororo an·chingni namgnina ong·ataha. Uni ong·atgipa
mandena Ua inditan simsakani gimin snigipa sal antio uamangni janggi tanga gimiko Uni dongpaaniko
am·anina on·kangchina miksongaha. Sabbath changantian Uni aganani gita be·enni neng·takaniko aro
gisikko gital dakani sal ong·achim. An·chingni a·gilsakona papni napbaanichi Sabbathko nanganiko
gamchatbatataha.

Apsan Jokatgipa jean Jean Adam aro Hobana "neng·takaniko ku·rachakaha, hajalgni bilsirangni ja·mano
Sinai a·brio Mosena niamko on·aha (1 Kor. 10:1-4). Jisu Sabbathni gimin ge·etaniko Ge·eta Niam
Mingchikkungni jatchio donna gita Jisu seokaha. Brigipa ge·etani indake agana:
"Uko rongtala ine rakina neng·takani salko gisik ra·bo. Saldok na·a gambo, aro nang·ni pilak
kamko ka·bo; indiba snigipa sal Jihova nang·ni Isolna neng·takani ong·a; uno na·a mamung
kamkoba ka·nabe, na·a, aro nang·ni depante, aro nang·ni demechik, nang·ni nokol me·asa aro
nang·ni nokol me·chik, aro nang·ni jilanirang, aro nang·ni guareni do·garangni ning·oni mande
a·gital; maina saldoko Jihova salgi aro a·ako, sagalko aro uarnago donggipa pilakkon dakaha, aro
snigipa salo Ua neng·takaha; uni gimin Jihova neng·takani salko patiaha, aro uko rongtalataha" -
Re·ongkata 20:8-11.

Iso neng·takani salko salgi aro a·gilsakko dakgipa Jihovako gisik ra·na dakaha. Neng·takani salara
antiprakprako an·chingko Ong·atgipa baksa nangrimata jean ia salko patiaha aro rongtalataha.

Jisuni a·gilsako dongmitingo Ua chol mingantikon Pagipa baksa nangrimaniko dakna jakalaha.
Neng·takani salo Isolko olakie ua namgniko man·aha. Lukni agana gita:
"Aro ua an·tangko dal·atram Nazarethona re·baaha; aro an·tang dakbewal gita, neng·takan salo
gilja noko nape poraina chadengaha" - Luk 4:16.

Isol-mande pil·gipa Jisuan neng·takani salo Pagipani mikkango neng·takna nangode, an·ching mande
ong·e baditan nangbatgen. Neng·takani salo Isolko olakianio Jihudirang dingtang niamrangko donaniko
Jisu satprake gale (Mati 12:1-12) neng·takani salko manderangna namgni ong·china Isol dakaha ine
mesokaha.

"Aro ua uamangna aganaha, Neng·takani sal mandena ong·aha, indiba mande neng·takani salna
ong·jachim. Uni gimin Mandeni Depante neng·takani salniba nokgipa ong·a" - Mark 2:27, 28.

Neng·takani salni nangchongmotaniko Jisu Uni sianioba mesoka. Ua Sukrobar salo sia, "ua sachisoani
sal, aro neng·takani sal a·bachengbaengachim" (Luk 23:54). Ua somoion Ua "Matchotjok" ine agana, uni
ortode Uni a·gilsakona re·bae mandeni jatni palo sichakani kam matchotaha (Johan 19:30; 4:34; 5:30).
Unikode Uni matchotaniko manina gita Jisu gopramo Neng·takani salo neng·takaha.

Jedake Kristo ong·atani kamko dokgipa salo matchote snigipa salo neng·takaha uandake chisolo sianichi
Ua Uni piokani kamko dokgipa salo matchotaha unikode snigipa
salo neng·takaha.

Robibar pringo Jisu chea man·gipa Jokatgipa ong·e gopramoni

ong·katbaaha (Luk 24:1-7). Uni chakatpilani ja·manomangba Ua
Uni sninggiparangko Neng·takani salko manichina aganahachim.
Jerusalemko nisiatani gimin aganon, jean Uni siani bilsi
sotbrimangni ja·mano ong·aha. Ua Uni sninggiparangko indake
ge·etaha:
"Aro na·simangni katanga sin·kario, ba neng·takani salo
maikai ong·jagen, uni gimin bi·bo" - Mati 24:20.

An·chingni Jokatgipa Uni sninggiparangko aro uamangni janggi

ambagiparangko Uni uamangna skigiminrangko ja·rikaniko nangnika (Johan 15:15, 16). Ua uamangni
jokatanini neng·takani aro Sabbathni neng·takaniko chagronganiko nangnika. Uamang Uko duk
ong·atjaha. Kristoni siani ja·manomangba sninggiparang Neng·takani salko manikuengachim (Luk 23:54-
56; Watata 13:14; 14:16; 13; 17:2; 18:1-4).

Ka·saako man·gipa Watata Johan Neng·takani salo Kristo baksa nangrimaniko daka. Adita bilsirangni
ja·mano ua indake sea: "Anga Gitelni salo Gisiko ong·engachim" (Para. 1:10). Jisuni aganani gitade,
"Gitelni salara Neng·takani salan ong·achim." "Mandeni Depante Neng·takani salni nokgipa ong·a" (Mati
12:8).
Neng·takani salo an·cing Isolni minggni dal·batgipa an·chingni palo chu·sokanirangko mania, uarangara:
an·chingko ong·atani aro jokatani. Neng·takani salko maniania salgio dongangkugen:
"Maina angni dakgnigipa gital salgirang aro gital a·gilsak maikai angni mikkango dongkamgen
…… neng·takani salsaoni neng·takani salgipinona pilak be·en angni mikkangona olakina re·bagen
ine Jihova agana" - Isaia 66:22, 23.

4. NENG·TAKANI SALNI NAMGNIRANG

Da·ororoni manderang uamangni janggi tanganio gisik ding·anichi saksa sakgipino ja·gitotenga.
Manderang bon·angenga. Nokdangrang be·grua. Indiba Isol Neng·takani salko name janggi tangani chol
rama dake on·aha.
Neng·takani salo neng·takanini mitam dingtangmanchagipa namgnirangko niate nina:

(1) Neng·takani salara ong·ataniko gisik ra·ani ong·a aro uko rongtale rakianichi an·chingni ong·atgipana
gisik ra·aniko songdoani ong·a. Ia salni rongtalgipa somoirangara Isolni ong·atgiminoniko an·chingni
ja·dilrangko sandiani aiao inmangipa chol ong·a. na·aba nang·ni nokdang bolgrim rama ba rong·brakni
chiringni nitoaniko jripjranggipa biapo bon·kame somoi re·atania basakochim? Jisu baksa somoi re·atna
aro Uni an·chingna dakgimin aiao inmangiparangko niatna Neng·takani sal an·chingna chol aro somoiko
on·a.

(2) Neng·takani salo Isolko olakie aro gipin Kristianrang baksa

nangrimgrike an·ching katchaaniko man·a. Gipin olakirimskarang
baksa Isolko de·mitelanio namgniko man·a. Neng·takani sal
an·chingna mondoli ong·e tom·dake an·chingni gisikni batteryrangko
charge ka·na ba bilakatna dingtangmancha somoiko on·a.

(3) Neng·takani sal chanchibewale ka·saani kamrangko ka·na

cholrangko on·a. Antini gisepo nang·ni grongena somoi dongjamitingo
nang·ni noksul saenggenchimma? Jensalo ripeng saksa segipa sie
ka·dimeataniko nangmitingo salantini kamrangchi uko gronge
ka·dimeani kattarangko aganena jakchakjachimma? Jisu indake
ku·patia: "Neng·takani salo namgniko dakmala" (Mati 12:12).

(4) Neng·takani salara nokdangni nangrimgrikaniko bilakdapatani sal og·a. Neng·takanin salo mamung
kamkoba ka·nabe" (Re·ongkata 20:10) ine Kristo ge·eton kam ka·na gong·begipa pagiparang aro
jakchakgija gisik ding·atako man·gipa ma·giparangna iana bate nambata ku·patianiko on·na
man·jawachim. Neng·takani salara dal·begipa DONTONGBO ine nokdangrangna see donani ong·achim.
Nangchongmotbatgipa kamrangchi nangchongmotgipa dakgnirangko champenganiko dontongatani
ong·a. Neng·takani salara, sinjetaniko bi·ani baksa, kam ka·aniko ka·dingani baksa, jakchakgijaniko
jripjrang biapo chanchie somoi re·atani baksa sregrikani sal ong·a. Neng·takani salo neng·takania
nokdangni mande gimiknan Kristo baksa nangrimaniko dakna somoi on·a aro Uni gisikni bilko man·ani
somoi ong·a.

(5)Neng·takani salara dingtangmancha Jisuni sambao re·baani somoi ong·a. Pilak nangrimanirangan
somoi bang·e nanga uandake an·chingni Jisu baksa nangrimaniba apsan ong·a. Antiprako salsa gimikko
Kristona on·kangania an·chingni Un baksa ripeng ong·aniko gital dake aro gisik nange rakiani dal·gipa
chol ong·a. Neng·takani sal an·chingna Sastro poraina aro Isolo bi·na bang·bate somoiko on·a,
jripjranggipa biapo Isol baksa saksan ong·na aro knatimna somoi bang·bate on·a.

Uni donganina ku·rachake Jisu "neng·takani salko patiaha aro rongtalataha (A·ba. 2:3). Sonibar sal, antini
snigipa salko neng·takani sal dake manina maina nangchongmota na·a ma·sigen maina ia salko Kristo
a·gilsakko ong·atmitingo dingtangmancha an·ching baksa agangrina dingtang dake donaha.
Kristo Neng·takani salko ong·aton dingtangmancha an·chingni chasongko gisiko chanchie dakaha gita
nika. Ia gita tiktakan an·chingni gisik ding·an gapgipa chasongo an·ching nanga:- uan pilakni
ma·eksranggipa sal Isolko olakiani sal, ong·atgimin baksa nangrimtaiani sal, aro bosturangni pal
nangrimanio ning·tuao chanchiani sal ong·a.

5. SALGINI NENG·TAKANIKO CHA·TOTANI

Jisu baksa salanti aro anti-anti gronggrike nangrimaniko dakani namgniko an·ching dondrimna man·a -
uan neng·takani. "Neng·takani sal" ba "Sabbath" ara Ibri kattaoni ong·baa, uani ortoara neng·takani, uni
gimin Sastroo snigipa salko "Neng·takani sal" inon aiao inmanani ong·ja (Levi 23:3).

"Maina sal snini gimin ua banoba indake aganaha, Aro Isol ua sal snini salo an·tang pilak
kamrangoni neng·takaha …. Isolni manderangna neng·takani sal dongenga ….. Uni gimin ua
neng·akanio napna an·ching gisik nangna" - Ibri 4:4-11.

Salgini chu·soksranggipa neng·takaniko an·chingni Neng·takani salo

neng·takaniko chagrongania katchaaniko chagronggnini antio changprak
cha·totaniko on·a. Ia neng·takania kam ka·gipa mangmang dongani ong·ja,
ia naljokaniko, tom·tomani aro an·seng baljoke donganiko miksonga, jean
chong·motgipa chu·soke janggi tangani pangchakanio donga. Indakgipa
gisikni neng·takanikoa chagronganichisa mangmang gamchatako ma·sina
man·a. Jokatani neng·takaniko aro Neng·takani salni neng·takaniko
chagronggiparangni saki on·nania pilakchi ong·a. Salanti aro anti antio Un
baksa nangrimanichi na·a Jisuni neng·takanio nape, na·a janggi tangao
dal·batgipa katchaaniko am·e man·gen.

Uni neng·takaniko on·anina na·a Jisuko mitelna sikgenchimma? Salanti

janggi tangao ra·bianirangko warachakna gita jokatanini neng·takaniko
ku·rachakanina aro antiprako Un baksa nang·ni nangrimaniko mangrakatna
neng·takani salni neng·takaniko ku·rachakanina na·a Uko sikjawama? Na·a
indake pangnaba dakkuja ong·ode, Uni on·enggipa jokaniko ra·chakna
sikgenchimma? Antiprakprakon Uni Neng·takani salko na·a rkina sak ine
Una agnna sikgenma? "Oe Gitel! Nang·ni dongimin salo katchaaniko
man·na anga ska" ine na·a aganna sikgenma? Indakgipa on·kanganiko maina da·o dakja?

[Na·a iarangko u·ina siknaba gnang: Sawa Neng·takani salko Sonibar, antini snigipa saloni, Robibar,
antini skanggipa salona dingtangataha? Dingtangataniko basako ong·ataha? Dingtangatna Isolan bilko
on·ama? Ia sing·anirangko Dilani 21 o aganchakgen.]
 Sualgrikanichi Dal·roroanina
(Donnugimin Gun) Cholko Am·e Nibo
Japanni chaako ringe aro mioniko tarigimin cha·anirangko cha·joljole Larry Komorini noko gipin
ripengrangmung an·senge agangrike roengmitingon uni gipin ripengrang Bible koldingdange uamangna
Sastroni gimin skie on·china aganaha. Larry chaa ringa gipikna am·pile maikon agangen jajaaha maina
uade kusi ong·e rotokengasa ine chanchiachim.

Larry bang·a changon Japano Christian English Schoolo Bible Classrangko ra·rongachim. Indiba
uarangkoara tarisamsoesa ra·achim. Sastroni gimin agane on·ainade altuaen man·a indiba Isolni gimin
skiprakjoljolaniara namen dingtanga.

Sastroni golporangko Larry bi·samitingonin knatokmanaha. Indiba uni bini

janggi tanganide bang·e dingtanganiko ra·bajachim. Isolni nikanio namja
ine u·iakomangba uara dakaengachim. Maidake Isolni gimin an·tangan
name u·ijaoara gipinrangna agane on·gnok?

Da·o gipinrangni biko nitate uni agananina senge dogtokengon uade

gisikan bingbrangangpilengjok. Indake kenjagokani somoio ua Gisik
Rongtalgipaan manderangni mikkango saki on·na gita kattarangko on·gen
ingipa podko gisik ra·ataha (Luk 12:12). Ua gisiko nangbee Isolo bi·aha aro
altuabate uni gisik ra·na nanggipa golpoko - Branggipa Depanteni gimin
aganna a·bachengaha.

Maidake Isol An·tangni katbranggipa mandena ka·saachim uko talatengon

ua an·tangni ka·tongoni ia kattarangko aganenga ine nikaha. Uni agana
kattaranga gipinrangnaba chinapangengachim. Uni janggi tanganio
skanggipa changna Larry baditana Isol una ka·saachim uko ma·siaha.
Un walo Larry an·tangni turamona re·angon, Isolna an·tangni janggiko on·kange ja·sku dipane bi·aha.
Isolni kattako sualanichi ua uni janggi tanganio ramram golpo ine ra·aigija una aiao inmangipa katta
ong·baaha.

1. SUALANICHI DAL·ROROCHINA GITA JISU AN·CHINGKO RA·BIA

Bilsi gittam adhana sninggiparang Jisuni kam aro kattarangko aro bon·kamao Uni siani aro
chakatpilanikoba ra·chakaha. Jensalo ua salgichi gadoangpilengon sninggiparangko Una saki on·gipa
ong·china indake aganangaha:
"Gisik Rongtalgipani na·simangona re·baon na·simang bilko man·gen …… aro a·kitikona kingking
na·simang angni saki ong·gen" - Watata 1:8.

Jensalo Kristoni sninggiparang mamung salrika gri an·tangtangni ka·tongko Una Pentecosto
on·kangahaon, chakatpilgipa Kristo Gisikni bilchi uamangni janggirangko dingtangataha. Kristoni be·enni
chakatpilani aro salgichi gadoangpilani giminsan ong·aigija uamangni janggirangko dingtangatna amgipa
Uni chakatpilani bilni giminba saki on·giparang ong·aha.

An·chingba Kristianrang ong·e Jisuni chakatpilanina saki on·giparang ong·a, maina an·chingni janggi
tanganio Uni gital dakpiltaina man·ani bilko an·chingba chagrongaha.

"Indiba ka·sachakao gam gnanggipa Isol, je ka·sara bang·beachi ua an·chingna ka·saaha, uani
gimin, an·ching paprango sigimin ong·oba, ua an·chingko Kristo baksa tangchaataha - ka·saachin
na·simang jokatako man·aha, aro Kristo Jisuo an·chingko un baksa chakatataha …….. maikai
re·baenga chasongrango uni ka·saani agre gamchatako Kristo Jisuo an·chingna rinok rinok dake
mesokna man·gen" - Ephesus 2:4-7.

An·ching Kristo baksa tangatako man·aha, uni gimin uni ka·saani agre
gamchatako ……. mesokna man·gen." Aro manderangni janggi
tanganio Uni dakna amani namgipa koborko a·gilsak gimikonan
sokatchina gita Ua an·chingko agana, aro iako dakengon ua an·ching
baksa dongpagen ine ku·rachaka (Mati 28:19-20).

Voice of Prophecyni radiochi skiprakaniko a·bachengatgipa HMS

Richards indine saki on·a: "Kristoni nama kattako knatimgiparangni
ka·tong dingtang ong·aniko anga nikaha. Uni mondolini nama katako
ra·angkuja dipet Isolni aro Kristoni gimin knakugijagipa a·songrangchi
anga songreangaha. Ia manderangni mitchigipa obostaoni rongtale
janggi tanganiko, sabisirangoni an·senganiona aro namgijagipa gisikrangna kenanioni kusi ong·gipa
ong·e Kristian janggi tanganiko anga nikaha. Anga u·ia, "Kristoni nama katta ….. janggi jokaniona Isolni
bil ong·a" (Rom 1:16). Anga u·ia, jensalo mondoli ia nama kattako skiprakon bang·a manderangni
ka·tongrangko aro nokdangrango dingtangani sokbaa aro okamaniko knachakgipa manderangni janggi
tanganio iarangko nikna man·a."

Isol an·ching gita bilgrigipa mandeni jatna ia dingtangmanchagipa kamko ka·china on·aha, maina
an·chingni dal·roroanina sualgrikania nangchongmotgipa ong·a. An·chingni bebera·aniko mangrake
rakina gita iako dakna nanga. Larry an·tangni obostao iako u·ie ra·aha gita, an·chingni bebera·aniko
sualaniara an·chingko bebera·ao mangrakata aro dal·rorona dakchaka.

2. AN·CHINGNI JANGGI TANGANI BEWALCHIN KRISTOKO SUALPAANI ONG·A

Saksa pante jean nokdango dekdo on·aniko man·e dal·baachim indake agana: "Anga angni ma·a paani
dakmesokaniko niaton uamang angna Isolni gimin ong·gija ma·sianikosa on·a. Bigil gnanggiparangoni
angna ka·sae dakmesokaniko anga nangpajaha." An·chingni wilwilao donggiparang Isolni gimin nama
dakmesokaniko on·gipa manderangko namen nangenga. Uamang saoba "bigil gnanggiparangoni" Isolni
nama gunrangko dakmesokgiparangko nanga. Bang·bata changon an·chingni bilakbatgipa skiprakanide
an·chingni janggi tangani bewalan ong·a. Manderang na·a badita u·iani gnang una simsakna skang na·a
manderangna badita simsaka uko u·ichengna nanga. Pitor indine
agana:
"Gipin jatrangni gisepo an·tangtangni dakanriangko nama
ong·atbo; …….. na·simangni nama kamrangko nikani gimin
sandiani salo Isolko rasong chaatgen. ……. maina Kristoba
…….na·simang uni ja·kolko ja·rikchina na·simangna dake
mesokangaha" - 1 Pitor 2:12, 21.

Skobikroko Kristo an·chingna duk chakahani gimin, an·chingni

sepangon on·kanggipa ka·saai dakmesokaniko an·ching nika. Ia
ka·saaniko an·chingni janggi tanganio mesokna man·ode
bebera·kugijagiparangko Kristoni jakona dilbana bilakbegipa ostro
ong·gen.

3. AN·CHINGNI CHANCHIANI GITAN AN·CHING KRISTOKO SUALA

Jensalo Diabol Jisuko bakrao cha·anichi, gaora de·anichi aro chanchichipsoanirangchi dakmajoe
chadrapahaon Jisu Sastroo sea gnang kattarangchi warachaksoaha (Mati 4:4, 7, 10). Sastroni kattarang
uni chanchianio gapani gimin Kristo tarisogimin ong·aha.
An·chingni gisikon dakgrikaniko chea ba gimaata.

"Maina gisiktango uni chanchia gian ua ong·a" - Toe Skiani 23:7.

Dal·roroenggipa Kristianrang salgichina miksonga. Uamang nama kbewalrangko man·na gita

chanchijringa.

"Gitelo pangnan katchabo ….indiba mitelan baksa bi·achi aro mol·molachi Isolna pilakni gimin
na·simangni man·na nanganirangko u·iatbo. Unon pilak u·iana batgipa Isoln tom·toma Kristo Jisuo
na·simangni ka·tongrang aro chanchianirangko rakigen. Ja·manni katta ian, jongadarang, jerang
bebe ong·a, jerang mikchikima, jerang kakket, jerang rongtala, jerang namnikani, jerang nama
inani, maiba namani ong·ode, maiba mitelani ong·ode, iarangko chanchibo ……. Unon tom·tomani
Isol na·simang baksa ong·gen" - Philippi 4:4-9.

An·chingni gisikona maiko ra·baa uan an·chingko dingtangata. Jabolko ra·baode, jabolan ong·katgen.
Isolni kattako ra·baode, Isolni gita janggi tangani ong·katgen.

4. AN·CHINGKO JEDAKE NIKA UANDAKEN KRISTOKO MESOKA

Kristona chadenggiparang ong·e Kristianrang uamangko nikani ba nianinaba

krakra dake pilak dugaanirangko gelgen.

"Saoba katako manijaode, ………. rongtalgipa dakanirangko nike, katta

gri uamangni dakanirangchi rimbaako man·gen. Uamangni tariani,
a·palni tariani, kni sakani aro sonanirangko ganani, aro ba·rarangko
ganani ong·jachina. Indiba ka·tongni donnua mande, Isolni mikkango
gamchatbegipa sontol aro tom·tomgipa gisikni sogijani tarianio
on·china. Maina uandake skango Isolo ka·donggipa rongtalgipa
me·chikrangba …..an·tangtangko tariaha" - 1 Pitor 3:1-5.

Tarianio aro gana chinanio krae dakaniara Kristo gita ong·aniko mesokani
ong·a. Chong·motan, gipinrang Kristianrangni rokomari gana chinanichi
ong·gija an·chingni janggi tanganiko niesa Jisuona salbaako man·gen.

5. AN·CHINGNI DAKA KAMRANGCHI KRISTOKO SUALANI

Itihasko segipa Edward Gibbon an·chingna indake sea, jensalo Persiarangni a·tipko Galerius chadrape
ra·seke ra·engon, saksa sipai, gamchatgipa muktani ro·ongrangan gapgipa ching·chetgipa bigilni monako
man·aha.Ua uni ning·o donggipa gamchatgipa ro·ongrangkode pakrurue galatenba ua nitobegipa
monakosa simsakbee rakiaha ine agana.

Je manderangna a·gilsakni on·gipa a·palni katchaanirangkosa dal·nika, uamangde gamchatbegipa damni

mukta - Jisuko jegalanichi ia ra·seke ra·gipa sipainamangba namjabata. An·chingni jakoni gamchatbegipa
gamsan jokangaigen ong·ja, indiba jringjrotna jokatanian. Uni gimin Sastro agana:
"Na·simang a·gilsakna aro a·gilsaknirangnaba ka·sanade. Saoba a·gilsakna ka·saode, Pagipana
ka·sara uko gri; maina a·gilsakoni pilakan, be·enni ska, aro mikronni ska aro janggi tanganina
gangbinga, pagipaoni ong·ja, indiba a·gilsakonin - Aro a·gilsak aro uni ska re·angenga; indiba
Isolni namnikako dakgipa jringjrotna dongkama" - 1 Johan 2:15-17.

Nisiatgnigipa paprangko aro namjabatgipa dakbewalrangko sonachi

rupripdapna gita Satan rakbee kam ka·enga. Pekatgipa ringanirangko palna
u·iparakatanirango nitogipa bimchipgipa aro namen kusi ong·gipa chadambe
manderangkosa mesokatenga. Mamung dakeba chu ringe gitilgropna
am·enggipa mandeni chu dokanoni chuko bree ong·katbaenggipa noksarangchi mesokparakataniko
nikjawa.

Ripeng dakanirango Kristian ong·ani gunrangko watgaljana gita an·ching simsakna nanga (2 Kor. 6:14).
Beben Kristo an·chingko Kristian ong·kugijagipa ripengrangonaba re·anganiko nangnika. Ripeng
dakanichisan an·chingni bebera·aniko sualna man·a. Indiba nang·ni ripengrangchi nang·ni gitcham
bewalona salangako man·na on·nabe.

An·chingni janggi tanganioba an·ching maiko ra·gata, jekai kusi ong·e rona nianirangmangko, an·chingni
gisikni gita, janggi tanganiko dingtangata. An·chingni gisikna an·ching maiko alduenga una simsakna
nanga.

"Angni mikkango anga mamung ong·sigipako donjawa" - Git 101:3.

An·chingni janggina an·ching nambatakosa alduode, namjabatgiparang an·chingko ona gadangona

salonangna amjawa. Chugipa gadangrangkosa an·chingni nokdangona aro gisikrangona ra·baode,
an·chingni janggi tanganiko salonjawa. Kristian ong·e kusi ong·atani pilakna bateba gnang.

"Nang·ni mikkango ka·srokani gapa gnang; nang·ni jakrao jringjrotna an·senganirang donga" - Git
16:11.

6. AN·CHINGNI ON·ANI BEWALCHIBA KRISTOKO SUALA

Pator H.M.S. Richards sagi, bebera·gital saksako napbolatna dakengon, uni

jepo tangka katom gnang re·baako nike, "nang·ni tangkarangko donbana
gualakon" ine uo sing·aha. "Angaba aro angni tangkaba napbolgen" ine ua
aganchakaha. Ia mande chong·motgipa Kristian ong·ani gisikko man·aha
jechin ua gipinrangko dakchakskana skachim. Kristianrang on·anichi
dal·roroa, aro uni giminsa Jisuba agana: "Man·ana bate on·aan kusi
ong·batani ong·a" (Watata 20:35).

Isolni songnokko bariatna an·chingni on·aniara jringjrotnan gamchate baia.

"Na·simang a·gilsako an·tangtangna gam chimongnabe, jeo jo·ong aro

maram gimaata, aro jeo cha·ugiparang cho·ponge cha·ua. Indiba salgio
an·tangtangna gam chimongbo …. Maina jeo nang·ni gam, unon nang·ni ka·tongba ong·gen" - Mati
6:19-21.

Na·a on·engon iako gisik ra·bo: "A·a Jihovanin ong·a, ……aro uano donggiparang" (Git 24:1, sona aro
ruparangba (Hagai 2:8). An·ching an·tangtangba Isolnin ong·a, maina Ua an·chingko ong·atahaaro
an·tangni an·chitangko on·en an·chingko damna breaha (1 Kor. 6:19-20). An·chingni pilak gnang Isolnin
ong·a "maina uan gamko man·china nang·na bilko on·a" (Deut. 8:18).

Baditana kingking an·chingna sichakgipa aro chakatpilgipa Gitel Un baksa nama kattako gipinrangna
sualpachina an·chingko okama?

"Mande Isoloniko togie ra·genma? Indiba na·simang angoniko togie ra·aha. Indiba na·simang
agana; chinga nang·oniko maikai togie ra·aha? "BAKCHIKKUNGNI BAKRANGO ARO
ON·ANIRANGO. ………. Na·simang bak chikkungni baksani gimikko bandalona ra·babo, maikai
angni noko cha·ani donggen. Da·o iachi angko dake nibo ine kotokrangni Jihova agana, Anga
na·simangna salgini kelkirangko oe, na·simangna patianiko chakjapile rudapgenma rudapjawa" -
Malaki 3:8-10.
Ian an·chingni "man·dapaoni" "bakchikkungni baksa" (Deut. 14:22; A·ba.
28:22). Game cha·gipa ba badinggipanade koros ka·aniko changalman·e
nang·ni man·dapgipa chakkri ka·gipanade nang·ni chu·gimik dormahaoni.
Bakchikkungni baksako on·aniara an·chingna Isolni niam ong·a maina ian
an·chingni cholono nangea. Iako on·jaode Isolko togie ra·a ong·a.
Bakchikkungni baksa Isolni ong·a aro uko Kristoni kamko ka·nasan
mangmang jakalna nanga (1 Kor. 9:14) aro a·gilsako Uni kamko
matchotatna jedakode ua re·bapilna man·gen (Mati 24:14).

Jensalo Jisu an·ching baksa dongna re·baon, Niam Gitalni somoio

bakchikkungni baksako on·anikoba ua ra·chaka (Mati 23:23).

On·anirangkoara badita on·gen? On·anirangde sakprakprakni miksongani

gitasan ong·a. Sakantian "ka·tongtangtango mangsonga gita on·china" (2
Kor. 9:5-7). Isolnade on·badena man·ja:
"On·bo, unon na·simangna on·gen; uamang nama toanio sikjetjete, morekreke, suake,
na·simangni ka·bako on·gen" - Luk 6:38.

H.M.S. Richards changsao ia ong·a obostako agana:

"Janggi tanga gimik joa kal·gipa mande angni Los Angeleso tom·aniona re·bae tom·ram biapni ki·sangchi
re·bae saksan ang baksa agangrikako anga gualnan man·jawa. Ua an·tangni jeponi tangka dol·ako bikote
$ 500 angna on·e aganaha, "Ian angni skanggipa bak chingchikkungni baksa."
Ia mande an·sengjaengachim, aro ua mamungkoba dakgija bilsi 30 ba 40 mangna joa kal·simsimaiachim,
uni gimin anga sing·aha, "Na·a maikai janggi tanggen?"

Ua aganchakaha, "Ango dollar bonga ba dok mangsan dongaiaha, indiba uade Isolnin ong·a."

Unon anga sing·taiaha, "Na·a maiko dakginok?"

"Anga u·ija, indiba angni bakchikkungni baksako anga Isolna on·na nanga aro Uan angna simsakgen" ine
ua aganchakaha.

Aro Isol uandaken dakbebeaha. Ia mandeni gisik pil·aniara kakket ong·a. Ua an·tangni miksonganiko
kakketen ra·aha aro uni Kristian janggi tanganio kusi ong·e janggi tangangaha. Aro uni janggi tanga dipet
Isol una patiaha. Kakket ong·e bebera·gipa sakantiko Isol man·e cha·atgen ine ku·rachakja. Indiba
an·chingko Ong·atgipa an·chingni janggina nanganirangko on·gen ine ka·dongatani gnang.

Kristo an·chingna gimikkon on·jok. Hai an·ching an·chingni ka·tong gimikkon Una da·on on·na. Hai
an·chingni janggi tanganichi, nianichi, chanchianichi, kam ka·anichi aro on·anichi an·chingara gipinrangna
Kristoko sualgiparang ong·na. Hai Kristoko gipinrangna sualanichi ka·srokaniko am·e nikna aro Uni aiao
inmangipa ka·saanio dal·rorona.
 An·senge Janggi Tangani Cholko
Da·ororoni sandianiko dakgiparang jotton ka·anichi bebeko seaha jeko skangon Sastro mangrakataha je:
Mandeara nangrimgrikgipa chu·gimik bimang ong·a, Jekon an·ching be·en, gisik aro janggini gimin
chanchianirang ine mandeko bak dakachim, iarang pilakan bakatna man·gijagipa nangrimgrika ine
nikaha. An·chingni janggi tanganini gimin chanchiani bewalrang be·enni bakrangoba nangchakea.
An·chinga gimikko man·gopesa mande chu·gimik ong·a.

Toatna gita, Scienceni gita sandie am·giparang, kusian gape ka·dinganio mandeni
be·eno saanirangko chel·chakna amani bil namen baribata ine nikaha. Bebeko
aganode nang·ni kusi ong·e janggit anganichi sabisirangko chel·chaksona nang·ni
be·en ambatgen. Ia sandie niani maikai gisikni chanchiani aro be·enni bakrang
damsan kam ka·a uko mesoka.

Hajalni hajal bilsirangna skangan Isolni katta, gisik aro be·enni gisepo ia
nangrimgrikaniko mesokahachim jekon a·gilsak da·o ruutkugija salosa ra·chakaha.

"Ka·srokgipa ka·tong an·sengatani ong·a; indiba be·gimin gisik grengrangko

ran·ata" - Toe Skiani 17:22.

Watata Johanni agana gita baditana an·chingni gisik, be·en aro janggi sepange
nangrimgrika?

"Ka·sara, nang·ni janggini namroroa gitan, na·a pilakni gimin namrorochina aro
an·sengchina anga bi·a" - 3 Johan 2.

An·chingko Ong·atgipa an·chingni "an·senganio katchachina" nangnika. Isolni katta

an·chingni an·seng baljokanina aro jringjrotni janggina chumik gita ong·a.

Be·en, gisik aro janggini an·seng baljokani apsan apsan re·rimani gimin watata Paul
ia mol·molaniko daka:
"Uni gimin na·simang cha·oba, ringoba, jeko dakoba, pilakkon Isolni rasongna dakbo" - 1 Kor.
10:31.

Nama kattao be·enni aro gisikni ia minggniko nampilatanikon man·gopa. An·seng baljoke janggi tangani
kusi ong·gipa Kristian ong·na gita dakchaka.

Na·a an·sengbate aro chu·sokbate janggi tangna skode iano mingchet ja·rikna nanggipa niamrang gnang:

1. RONGTALGIPA BALWA

Rongtalgipa, gitalgipa balwako an·seng baljokanina nanga. Salo aro walo tusimitingo an·chingni noko aro
kam ka·ram biapo balwa napbaanirang dongode an·chingni an·chirang be·en gimikonan oxygen balwako
sokatanggen. Pringo re·ramarango ning·tue rang·sitode an·chingni be·erangona oxygenko bang·e
sokatna ama.

Maidaka balwako an·ching rang·sita iaba namen gamchata. Maiba u·igija biaponi wal·kurang, bibarang ba
bacteria donggipa balwarangna namen simsakbena nanga. Wal·kurang balwako da·ororo namen nosto
ka·a aro a·gilsako dal·batgipa so·otgipa ong·enga. Scienceni gita sandie nianio ta·maku aro ka·sopni
induria (cancer) pari, emphysema, aro ka·tongni sabisirang re·chapa ine nikaha. Mandeni be·eno
cigarette donggipa nicotineni (bisi) a·sel ringna sikdraatani bewalko pe·na rakbatgipa ong·a. Da·oni kri kri
bilsianti apsan bewalo manderang ringangkuode, 2020 bilsio sak 12,000,000 manderangko bilsiprakon
siatgen.

2. SALNI TENG·SUA

"Salni teng·suaoniko namgniko man·ani bang·a:

(1) Salanti pringo ba attamo minute 15 oni 30 mangna salni teng·suao
donggenchimode mandeni be·eno bigilna nangchong-motgipa vitamin D ko
man·ata. Vitamin D ara grengko rikgipa tarigipa calcium aro phosphorusko
ong·katatna gita an·china dakchaka.

(2) Salni teng·suaniara bacteriarangko so·otna ba chel·chakna gita kam ka·a.

(3) Salni teng·suaniara sam bolrangna chi aro carbondi-oxideoniko

carbohydraterangko bikotatatna bilko on·a. Ia ong·jagenchimode manderang
aro matburungrang okumu chake sigenchim.

(4) Salni teng·ania mandena walni kamrangko ka·anio meliatna dakchaka aro
andalgipa salrangna gisikni dukrangko ritchengata.

"Mikrakatani kattade: Salni teng·suanio kengniba gnang. Ruutdugae sal

chakode bigilrangko kama, bigilni parirangko (cancer) ong·katataniba chol gnang, budepa ong·ningata,
mikronko nosto ka·e mikgurirangko ong·atnaba ama." - Look Up and Live: a Guide to Health oniko
segatgimin.

3. NENG·TAKANI

Be·en, an·tangko taripilna gita neng·takaniko nanga. An·chingni kamna neng·sikimarangoni aro
nokdangni kamko ka·arangoni olgrokatako man·na gita a·palchi re·ongkate bal an·seng ringna aro
neng·takna somoiko nanga. Chu·onga gita neng·takaniko man·jaode manderang gisik dongtogijani,
simbraani aro ka·o nangrakanirangko man·a. Iandakgipa gisikni neng·gokanirang saanirangona dila, jean
an·chingko be·enni ruuta somoina nangenggipa neng·takaniko ra·na draata.

Walo namgipa tusianina mamung gipin sreani dongja. Salantio an·chingni gisikni batterirangko
bilakataianiba an·chingni be·ena nangchongmotgipa ong·a. Kristian mande sakantini salantio Isol baksa
somoi ra·e bi·ani aro Sastro poraiani gisik aro janggiko an·sengatasan ong·aigija, be·ennaba
an·senganiko on·gen. An·chingni salantini kamrangoniba anti anti neng·takani salko, bilsiprako ba bilsnini
samsaprako re·ongkate an·saoatani somoirangkoba nanga.

4. BE·ENNI RANTA KA·ANI

Be·enko ranta ka·ani (exercise) an·seng baljokanina nangchongmotgipa ong·a.

(1) Be·enko ranta ka·aniara an·chi su·pekanirangko srongata.

(2) Be·enko ranta ka·aniara be·enni pilak bakrangonan an·chiko sokate ja·a
jakrangko ding·ata.

(3) Ben·enko ranta ka·anichi be·enni aro gisikni neng·skimanirangko chel·ate

janggi tangniko nambate nikna dakchaka. Be·en ranta ka·anian jajrengani aro
simbraanirangna nambatgipa an·sengatani ong·a
(4) Be·en ranta ka·aniara taningna aro u·iani ja·dilrangna karrentni bilko on·a. Be·enna warachaksoani
bilrangko on·e an·senganiko on·a. Jensalo be·enko ranta ka·anichi an·senge rakion gisikrangba nambate
chanchina aro kam ka·na man·a.
Nang·ni bigilrangko rinoke be·enko sronge rakina dakchaka.

(5) Be·enko ranta ka·ania nangkoba bil gnangbatate be·enni aro gisikni neng·gokgnioniko ruutbate rakina
amata.

(6) Uan taningo rokomsa bostuko ong·katate an·seng baljokbate nikatna dakchake saknaanirangko
chaknaba ambatata."

Na·a be·enko ranta ka·aniko dakkujaengode, ka·sine aro onti onti bariroroe dakna a·bachengbo.
A·bachengna skang nang·ni doctorni ku·patianiko ra·chengode nambatgen. Nang·ni nisanara, antiprako
salbri ba salbongasa mile sako minute 15 prako re·na man·na gita hisape joton ka·bo.

5. CHI

An·chingni be·enni pilak bakrangnan chiko nangani gimin bang·e chiko ringna
nanga.
(1) Jrimani gitade an·chingni be·eno chian ritchasaoni bak 70 mang ong·a.

(2) An·chingni be·en salgimiko chi litar gitammangko salgimikni kamna nanga.
Ia kamranga, an·chiko jokruraatna, jabolrangko galna, cha·anirangko
sualatna aro cha·aniko hojom ka·na nanga.

(3) Mande saksao billion 15 oni billion 40 taningni cellrang gnang. Ua

bakrango ritchaprako 0 oni 85de chian ong·a. Ia cellrangna chu·onga gita
chiko on·genchimode nang·ni chanchianirangko mikrakatbate aro duk
sinjetanirangko chel·chaksoe rakina amgen.

(4) Nang·ni chi ringasan nangchongmotaia ong·ja. Ka·sina ba bo·om bo·om

dakachi sal sal auaniba nang·ni be·eno an·chi jokanirangko nambatate aro
be·enko aro gisikko bilakatbatgen. Chi rudapani ba auanichi dongtogijagipa ja·dilrangko dongtoate
saanirangko chel·chakatgipa bilrangko dakchake an·sengbate rakkigen. Auaniara be·eno
rongtalgijanirangko talata aro be·en ding·anirangkoba komiata."

6. KRAA CHA·ANI

Ong·atani somoio Isol Adam aro Hobana bite aro bitchri gnanggiparangko
cha·china ona·ha (A·ba. 1:29). Adam aro Hobani pap ka·ani ja·mano me·su
samjakrangkoba cha·achina on·dapaha (A·ba. 3:18). Chi dubiani ja·mano
Ong·atgipaan "rongtalgipa" matburungni be·enko cha·china on·aha (A·ba. 7:2-
3, 9:1-6).

Matburungrangni be·enrango tin·kagipa mitim aro an·chi jokaniko

champengatgipa bosturang gnang, jean an·chi ditpeke saani, gitilkrope saani,
ka·tongni sabisi, induria, mildugaani, be·en dite saani, aro gipin gipin
sabisirangko ong·katata. Da·ororo bang·a sana bangiparangan be·en
cha·giparangna mitim gri be·enrarako, name mine song·gimin be·enko aro
na·tokrangko komibeesan cha·china ku·patia.
Me·su samjakrangkosan cha·aigiparangan an·sengbate aro rutbate janggi tangani gimin cha·a ringani
bidingo u·igiparang skango Isolni on·chenggipa cha·ani biterang aro bitchilrangko, unbaksana me·su
samjakrangko cha·aniona re·bapilchina didienga.

Na·a me·su samjakrangko cha·aniona re·bapilna miksongode skanggipa be·en gri cha·anio maikai kraa
gita be·enna nanganirangko nang·ni cha·anio man·gen uko u·ie ra·chengna nanga. Salantian rokomanti
biterang, bitchilrang, dalrang aro me·su samjakrangko man·na nanga. Tangsekgipa aro rimitgipa me·su
samjakrang aro mesengchita gnanggipa biterangko namen nangchongmota. Chu·gimik bnekatgimin
ginchirang (ata aro uni rokomrang) aro bokdugae su·gija gitchaksria gnanggipa merongrangan nambata.
Salantio nang·ni cha·gipa matburungrangoniko man·gipa mitim ba torangni pal (butter, cream aro
cheeserang) me·su samjakoniko bikotgipa torangko jakalskabo).

Koako janapgipa cha·anirangan be·en griba matchu dutrangko jakalode chu·ongbea.

Jerangan be·enko uamangni cha·ani bak dake ra·gatna skode Sastroo rongtalgipa aro mandeni cha·na
kragipa ine segiparangkosan cha·china. Jensalo Isol chidubiani ja·mano cha·china be·enko on·on (A·ba.
7:2-3; Levi. 11:47), Ua badia be·enrang 'rongtala' aro 'rongtalja' uko janapa.

Levirang odhai 11 aro Deuteronomy odhai 14 o do·drangrang, matburungrang aro na·tokrangoniko

marang gnanggiparangko mesokaha. Ia odhairango gitade matburungrango ja·sikep pekgni dakna aro
el·bue chobaigipa ong·na nanggen. Rongtalgipa na·tokrango gangchingrang aro bisingkaprang dongna
nanggen. Jabolrang ba manggisirangko cha·gipa do·orangko gelna nanga.

Marang gnanggipa matburungrangni giseponiko wakko dingtangmancha janapa aro jegala (Deut. 14:8).
Bang·a manderangni siani a·selko sandina be·enko nianio Trichinae ingipa jo·ongni a·sel ine nikaha. Ia
chonbegipa jo·ongrangkoara mandeona wakni be·enko cha·oni re·bara. Da·ororo Scienceni gita sandie
nianio maina mitam be·enrangko Isol rongtalja ine inachim, uarangni a·selko bang·bate nikrorobaenga.
Mingsa a·selde sabisirangna kengnini a·sel, jekai wakni be·enoniko 'Trichina' jo·ongko man·a gita.
Minggipin a·selara mandeni cha·aniko hojom ka·ani ramarango tin·kagipa mitimrangni a·selba ong·gen.

7. SAKNAATNASIGIPA BOSTURANGKO GELBO

Pekatgipa ringanirangni gimin Sastro mai mikrakataniko on·a?

"Chu ka·dingstekgipa aro pekgipani ringani aganwatwatgipa, Aro uchi

pekkatako man·gipa pilakan gisik gnanggipa ong·ja." - Toe Skiani 20:1.

"Ba cha·ugiparang, ba mikbokgiparang, ba pekgiparang, ba saigiparang,

ba cha·bokgiparnag Isolni songnokko man·rikjawa." - 1 Kor. 6:10.

Chuara be·enni bakrangoni iarangko ong·siata:

(1) Sabisiko champengsoani bakrang - Chuara an·chini grikgipa bakrang jean
sabisiko dakrikchaksoachim uko bilgriata, uandake pneumonia, tuberculosis,
hepatitis aro gipin parini sabisirangko altuae man·sona kengni gnang.

(2) Bi·sa ba·ani bakrang: - Salo glass sa ba glass gni chu ringaniba bi·sa
ba·galani, bi·sa sie atchiani ba somoina skang atchianirangna kengni baribata.

(3) An·chi jokrurani bakrang: - chuko jakalanio ka·tongni sabisiko altuae man·ani cholko bariata, an·chio
donggipa chianiko komiata, an·chini mitimrangko bariata, an·chi ditpekaniko bariata aro gisikko
ding·doatani baria.
(4) Cha·aniko hojom ka·ani bakrang - Chuara okko dongtoatja, jean gastric an·chi jokaniko ong·katata.
Chuko jakaljringani bewal dongahaon bikao mitim dakani, holdiasop saani aro bika sikrepanirangkoba
ra·baani kengni gnang.

Chuan bang·a an·tangtangko so·ote sianirangko, gario sianirangko, bi·sarangko nosto ka·anirangko aro
nokdango kajiarangko ra·bagipa ong·a.

8. ISOLNI BILO KA·DONGANI

Je mandean dostangni ba kenanichi rim·kepako man·enga, uade iano janapgipa an·seng baljokanina
ranta ka·aoniko chu·gimik namgniko man·jawa. Indiba Isolo bebera·e katchagiparangsa ia an·seng
baljokaniko man·na amgen.

"Jihova namchina inbo, O angni janggi, aro Uni pilak namgnirangko gualnabe; ua nang·ni pilak
namgijarangko wata; ua nang·ni pilak saarangko namata; ua gimaataoniko nang·ni janggiko
pioka." - Git. 103:2-4.

David Larson, United Statesni National Institute of Mental Healthni

ku·pattigipa, torom aro an·sengbaljokani nangrimgrikaniko sandie
poraianiko dakaha. Uni sandianio Kristian on·kangani aro an·seng
baljokani baksa namen nangrimgrikani gnang ine mesoka. Ua iako
nikna gita aiao inmanaha: jerangan giljachi re·ronga, uamang
re·ronggijarangna bate ruutbate janggi tanga. Giljachi
re·ronggiparang ka·tong sae nom·anirang, an·chi ja·dilrangni
rakanganirang, an·chi ditpeke saanirang aro gipin sabisirangba
kombata. Je manderangan Isolo bebera·a, uamang nambate janggi
tanga maina uamang duk ong·anirangko man·breja.

Chu pekgiparang ong·ja, dosna jelo chipatako man·ja ba bia ka·e donganio kusi ong·gijaona salangako
man·rongbreja. Isolni bilo pangchakania mandeni an·senge aro kusi ong·e janggi tanganina chabi gita
ong·a.

Bilsi kolatchini gisepo California a·songomangmang sak 50,000 Seventh-day Adventistrangni gisepo
porai-sandianiko dakaha. Iano indake nikaha je, ramram manderangna bate Adventist me·asarang bilsi
8.9 bate janggi tanga, aro me·chikranga bilsi 7.5 bate janggi tanga. Uandake Hollando, Norwayo aro
Pollando donggipa Adventistrangni giminba apsan apsan nikaniko man·aha. Iako porai-sandie nigiparang
Adventistrangni bakrobate janggi tangniko iano janapgipa mingchet a·selrangni gimin ong·na nanga ine
agana. Ia niamrangko jakkalgipa manderang ruutbate janggi tangasan ong·aija indiba nambata janggi
tanganikoba man·a.

Sastroni gita niate an·chingni janggi tanganirangko dingtang dingtang dakbewalrangchi ja·rikataode
a·gilsakni toromrangni gisepo Kristian toroman kragipa aro ja·rikna nambatgipa ine nike ra·chakna
altuagipa ong·a. Ian manderangko uamangni chanchianio aro uamangni kamo aro uamangni janggi
tangani bewalo dingtangata.

Uni gimin gisikmung be·enmung aro chanchianirangmung sepangbegipa nangrimgrikani dongani gimin
Isolni Katta gita janggi tanggipa Kristianrang Jisu Kristoni gnigipa re·baanina tarisoengon, an·sengbaljoke
janggi tangani bewalrangko rakina sikgen (1 Johan 3:1-3). Kristo Uni re·bapiko an·chingni tarie
dongsoanikosan nangaia ong·ja, indiba da·o an·chingni janggi tangani obostakoba nambatatna skani
ong·a. Isolni on·a an·sengbaljokani niamrangko ja·rike, hai an·chingba Un baksa ku·mongrimna.

Uni "an·chingo kam ka·gipa bilchi" pilak ong·siatgipa bewalrangoniko an·chingko naljokatna Jisu
ku·rachaka (Ephesus 3:20). Na·a an·tang be·enko nosto ka·enggipa bewalrangko, chong·motan sada
ringani ba chu ringani bewalrangko galna joton ka·engon chu·sokgijanirango bon·chongdikronga. Indiba
nang·o kam ka·enggipa Isolni bilko ra·genchimode Ua Isol nang·na chena gita bilko on·gen. Isolni katta
indake ku·rachaka: "angko bilakatgipao anga pilakkon dakna ama." (Philippi 4:13).

Kristian Janggi Tanganiona Napaniko

Am·e Nibo
Africao Bible Skulni mande saksani nambee segimin chittiko iano nikgen.

Bilsibongana skang, patoko dongenggipa saksa Bible Skulni chatro

grongechina mol·molani chittiko anga Voice of Prophecyoniko man·soaha.
Patokko nirokgiparangna ia mol·molaniko aganon uamang angko
knachakaha. Ia chittio Sastroko ma·sie ra·na gisik nangani gimin anga uko
grongejringaha.

Uko grongechengaoni jadokni ja·mano, napbole mondolio bakrimpana gita

ua ango bi·aha. patok ning·on napbolataniko dakna gita patok nokgiparang
biaprangko tarie on·aha. Angni napbolatanirangoni gispeo ia ka·tongo
nangatbatgipa napbolataniko nina gita patoko donggiparang aro
nirokgiparangba re·batokaha.

Ruutgijaan, ia chatro patokoni jokani somoi sokkujaomangba ua watako

man·aha. maidake jokaha ine angni sing·on, uni janggi tanganio aiao
inmanpile dingtanganiko nikaha, aro Jokatgipana aro toromna kakketgipa
saki ong·ahani gimin, ua koedi ine chanako man·na aro patoko dongna
krajaha ine u·ina man·aha.

Ia mande nokdang baksa nangrimattaiako man·e, da·ode dal·gipa mondoli ge·sani dilgipa ong·skaaha.

1. NAPBOLANI ORTOARA MAIA?

Ia koedi Kristian ong·ahaon aro uni janggi tanganio chu·gimik

dingtangani ong·ahaon, unara maina napbolaniara
nangchongmotgipa ong·a? Nikodimus, saksa songsarni dilgipa jean
Jisuona walo re·bae, baksa agangrikanio, napbolna
nangchongmotani aro uni ortoko Jisu u·iataha:
"Kosakoni atchijaode, darangba Isolni songnokko nikna
man·ja. Chionimung Gisikoni atchijaode saksaba Isolni
songnoko napna amja" - Johan 3:3, 5.

Jisuni aganani gitade, an·ching "chionimung aro Gisikonimung

atchitaina nanga." "Gisikoni atchia" ra gisiko aro ka·tongo gital ong·e janggi tanganiko miksonga. Maina
Isolni songnoko napnade gital ong·atako man·na nanga, gitcham cholon bewalko pa·daptaiani ong·ja,
ukosa atchitaia ina. Chio sim·bolara ning·achi dingtanganiko a·palo parakani chin ong·a.

Bible Skulo ka·gipa mande, ia koedi Kristoko ra·chake Gisik Rongtalgipani uko kam ka·e dingtanganiko
ra·baaha ine ra·chakani chin gita uko napbolata.

2. ANGARA MAINA NAPBOLNA NANGA?

An·chingko jokataniara, Kristoni dal·begipa kam minggittamo pangchaka:
"Sastroni gitade Kristo an·chingni paprangna sichakaha ….. ua gopako man·aha ……. Sastroni
gita Ua gittamgipa salo chakatatako man·aha" - 1 Kor. 15:3, 4.

Sichakachi, gopako man·achi aro chakatatako man·achi Kristo jokataniko ra·baaha.

"An·ching badita Kristo Jisuna baptize ka·a man·aha, an·ching Uni siana baptize ka·a man·aha ine
na·simang u·ijama? Uni gimin Uni siana baptize ka·achi an·ching Un baksa gopako man·aha,
jedake Kristo Pagipani rasongchi sigiminrangoni chakatpilako man·aha, uandake an·chingba
maikai janggini gital ong·ao re·ruragen" - Rom 3:3, 4.

Kristo an·chingni paprangna sichakaha. Ua gopako man·aha, unikode an·chingna rongtalgipa gital
janggiko on·na gita gopramoni chakatpilaha. Napbolachi an·ching Jisuni sianio, gopa man·anio aro
chakatpilanio bak ra·paa. Napbolani ortoara Kristo baksa papna sipaani, pap gnanggipa gitcham janggiko
Kristo baksa gopani aro Kristo baksa gital ong·e tangna chakatpilani ong·a. Kristoni siani aro
chakatpilaniara an·chingni siani aro chakatpilani ong·a. An·chingko chisolo datkapaha gitan Isol
an·chingko papna siatna man·a. An·chingko siaoni chakatatpilaha gita Gisikrango gita tangatpilnaba
man·a.

Napbolanian be·enni gita gisik pil·na ja·ku de·aniko mesoka. Skanggipa,

chiona onata unikode chu·gimik sim·bola jekai sigimin mandeko a·kolona
dingonate uko pindapa. Ian an·chingni Kristo baksa sie gitcham janggi
tanganiko gope galna skaniko paraka. Napbolania sigiminko gope galani,
janggi tangao papan gapgipa ong·aniko watatani kam ong·a. Unikode,
an·ching napbolatgipachi chioniko salchroako man·a, jekai mande
gopramoni chakatpila. Ian an·chingara "gital ong·atgimin," "gital janggi
tangna" Isol chu·gimik on·aha ine u·iatani ong·a.

Sim·bolachisa mangmang napbolani - siani, gopani aro atchitaiani ortoko

talatna man·a. Chiko satkikie napbolatachide atchitaiani chinko tik ong·e
mesokja.

Kristo baksa sianiara maiko miksongchongmota?

"An·ching maikai papni nokol ong·jawaha, papni be·enko gimaatna ine, an·chingni mande gitcham
un baksa chisolo datkapako man·aha ine an·ching u·ia" - Rom 6:6.

Napbolaniara mandeni gisiko mai ong·engachim, chong·motan Jisuna on·kanganiko manderangna

mesokani ong·a. An·ching Isoloniko maikoba ra·rikode, "papni nokol" ong·e donggen. An·ching
an·tangtangko chu·gimik Kristona on·kangon, an·chingni namgija skanirang bilgrigen aro unon gisik
dingtangatako man·na a·bachenggen.

Dingtangatako man·nara sani kam ong·a?

"Kristo baksa anga chisolo datkapako man·aha; …… aro da·o be·eno angni janggi tanga
bebera·ao, chong·motan angna ka·sae angni gimin an·tangko on·gipa Isolni Depanteko bebera·ao
janggi tanga" - Galati 2:20.

Jensalo anga napbolachi Kristoni chisolo sichakani baksa an·tangko chapaton, anga bilakgipa bilko
an·tangona ra·bana on·a - "Kristo ango tangaha."

Nang·ni janggi tanganiko Kristoni jako chu·gimik pakwatna gitade skanggipa Kristoni chisolo sianiko
niatchengbo. Nang·ko kenjagokatenggipa paprangko niatnabe; aro nang·ni gitcham kamrangko niate
ma·amnabe; indiba Jisuchiko niatbo. Kristoni ka·sabee aro ka·dongbee Skobikroko sianiko nikaton, Ua
baksa nang·ni dongpaaniko indake mesokna man·gen: "Chisolni bilo anga angni gitcham bewalrangoni
sijok aro Isolni okamanina re·baenga. Anga Kristo baksa damsan chadenga. Da·ontal dipet anga angna
ka·sagipa aro an·tangko on·chakgipa Isolni Depanteo bebera·e tanggen."

An·ching Kristoni sichakani aro chakatpilani bilo pangchakon, an·chingni gitcham bewalrangni pal Uni
nama gunrangko bate bate nikna man·gen.

"Uni gimin saoba Kristoo dongode ua gital dakgimin ong·a; gitchamrang gimaaha; nibo, uarang
gital ong·aha" - 2 Kor. 5:17.

Napbolanichi an· ching Kristo baksa janggi tangna aro gital, nambata janggi tanganiko Kristoo man·na ine
an·chingni skaniko mesokani ong·a. Jisu an·ching an·tangtangni dakna amgijako chu·sokatna ama.
An·ching chioni gital ong·atgimin ong·e chakata; Ua an·chingna gital janggiko tangna gita bilko on·a.

3. MAINA JISU NAPBOLAHA?

Sal sotbongani salo an·tangtangni dosrangna olgrokataniko am·enggiparangna Pitor "gisik pil·e
napbolatako man·bo" unon Kristo "na·simangni paprangko" kema ka·gen ine aganaha (Watata 2:38). Jisu
pap mingsakoba dakkujani gimin, maina Ua an·tangko maina Ua an·tangko napbolatna on·aha?

"Unon Johanni jakchi baptize ka·atako man·na ine Jisu galiliona uni
mikkangona, Jordanona re·baa ……..maina indake drang toromko
chu·sokatan an·chingna kraa" - Mati 3:13, 15.

Jisu pap grichim. Uo pap ingipana gisik nanganian gri…….. Ua "darang

toromkon chu·sokatna" gitasa napbolaha. Napbolatako man·anichi Jisu
an·ching bilgrigipa aro papigipa mandeni jatna nama dakmesokaniko
on`aha. Kristo An·tangni sninggiparangko Uni sokkugijagipachinade
re·angchina mamung dakeba ge·etja. Uni gimin jensalo bebera·giparang
chio sim·bole napbolatako man·on, uamang Gitelni ja·kurangkosa
ja·rikengachim.

Kristo an·chingna sichakahani gimin, Ua Uni toromi ong·aniko on·na

man·a.

"Papko u·igijagipako ua chingni gimin papigipa dakaha, chinga maikai Uo Isolni torom ong·gen" -
2 Kor. 5:21.

Isolni nikanio papigiparangoniko toromigiparang pilakan an·ching ua rongtalanio dal·roroa, aro uandake
an·ching Kristoo gital janggi tanga.

4. MAINA ANGA SIM·BOLAKO MAN·NA NANGA?

Kristoba Uni napbolao sim·bolako man·achim; Ua chichi satkikidapako man·jaha. Johan Uko Jordan
chibimaosa napbolataha "maina uano chi bang·achim" (Johan 3:23). Jensalo Jisu napbolahaon, Ua
chiona ong·onangaha, aro Jisu baptize ka·atako (Greek ku·sikode sim·bola) man·ahaon, Ua chioni
gadobaaha (Mati 3:16).

Jensalo an·ching napbolani chon·mot miksonganiko ma·sion, maidaka bewalo napbolata uko altuae
ma·sichakna man·a. "Baptize" ka·a ingipa katta Greek katta baptizo ingipaoni re·baa, jeni ortoan sim·bola
ba ning·o dona inani orto ong·a.
John Wesleyni americaona 1737 bilsio re·baon mondolini sak 34 manderang uni Mr. Parkerni bi·sako
sim·bolgijade napbolatna jechakahani gimin, ong·ronggija bichal ka·aha. Methodistrangni padotba
bebera·giparangko sim·bolesa napbolata ine mesoka.

Nampilataniko dakgipa John Calvin indake agana: Skangni mondolini

dakbewalde sim·bolesa napbolata ine u·ichongmota. - Institutes of the
Christian Religion, Bk. 4, Chap. 15, Sec. 19.

Skangni mondolini itihaso napbolanian sim·bolachisa ie rongtalen mesoka.

Church of Englandni Dean Stenley minggipa mande saksa indake sea:
"Skanggipa ritchagittam bilsirangnade, a·gimikchin napbolaniko ja·rikania
Niam Gitalo poraiani gitan apsan ong·achim, jean "baptize" ingipa kattani
miksongani gita napbolgipa sakantiko chio sripata, sim·bola, napsrimata. -
Christian Institutes, jak 21.

Brigipa aro chi·brigipa ritcha bilsirango Europe aro Asiao rikgipa gilja nokrang;
jekai Pisa, Italyo aro Romo rikgipa Johnni Cathedral jean dal·batgipa gilja nok
ong·achim uarangoba sim·bole napbolatna tarigimin napbolchakram biaprang
gnang.

Ritcha chi·bonga bilsini a·bachengachibara Council of Ravennako tom·kujana kingking Catholic

mondoliba satkikie napbolatako aro sim·bole napbolatakoba apsan dake ra·chakkuengachim. Mondolini
dakbewalrangko sandirikitgija an·ching Kristoni aro Uni watatarangni skianikosa ja·rikna nanga.

Bang·a kakketgipa Kristianrangan dakbewal gita bi·sako napbolataniko ja·rika, aro an·chingni bi·sarangko
a·bachengaoni Isolna on·kanganiara kragipa ong·a. Indiba Sastroo rongtalen agana je, napbolna skang
mandeko janggi jokani ramani gimin skie on·chengna nanga (Mati 28:19, 20), napbolana skang je
mandeba Jisuo bebera·chengna nanga (Watata 8:35-38), aro napbolatna skang manderang, uamangni
paprangoni gisik pil·na aro kema watako man·na nanga (Watata 2:38). Bi·sa bakgitchakde bebera·na,
gisik pil·na ba ku·rachakna man·ja, jerangkon napbolatna skangsa dakna nangachim.

5. NAPBOLANIARA MAINA NANGCHONGMOTGIPA ONG·A?

Jisuni aganani gitade, salgichi re·na sikgipa sakantian napbolna nanga.

"Chionimung Gisikoni atchijaode, saksaba Isolni songnoko napna amja" - Johan 3:5.

Jisu mingsakosan watchanggalaha. Chisolsako sigipa cha·u gisikoni atchitaiaha. Indiba ua chisoloni
ong·one uni ka·tongoni dingtanganiko mesokna gita chio sim·bolataniko man·jaha. Aro Jisu Uni
songnokona re·baon An·tang baksa ong·pagen ine una ku·rachakaha (Luk 23:42, 43). Ia cha·unade
"chionimung gisikoni atchitaianiara" uni paprangna Jisuni jokanggipa an·chian mesokskaengachim.
Augustine indake agana, "Siani turamo gisik pil·ani gimin mingsasan serikani gnang, uan gisik pil·gipa
cha·uni gimin, je, darangba ka·bena nangja; aro mingsa je,
darangba chu·ongnikaina nangja."

Jisu An·tangan ia mikrakatanio on·aha:

"Je mande bebera·a aro baptize ka·atako man·a, uako jokatgen;
indiba je mande bebera·ja, una sastiko agangen" - Mark 16:16.

Skobikroko an·chingni pal sichakanichi Jisu mande jinma Uni

an·chingna ka·saaniko mesokaha. An·chingba napbolatanichi
mande jinmani mikkangon kracha·a gri an·chingni Kristona
on·kanganiko mesokna nanga. Na·a Kristoo gital janggi tangahama aro mikkangchi napbolna gita
tarijawama?

6. NAPBOLANIARA A·BACHENGANISAN ONG·A

Napbolaniara Kristian janggi tanganina an·chingni on·kanganiko mesoka. Indiba napbolao an·chingni
on·kangani janggi tanga gimiknan chu·ongaignok indake ong·ja.

Jensalo bi·sa atchion kusi ong·e alanide ong·rongbewal ong·a.

Atchiani sal badeahaode, katchaani salrang dingtang ong·aha.
Bi·sa bakgitchakna salanti alduna nanga, salanti auatna
nanga, aro salantian una simsakna nanga. Uandake
napbolaniba apsan ong·a. Paul an·tangni gimin indake agana,
"Anga salanti sia" - 1 Kor. 15:31. Salantio an·tangnasan
chanchiaiarangoni an·pile, an·ching Kristoona Uni okamanina
bate bate knachaka.

Napbolani niamara bia ka·ata gitan aiao inmanpilgipa

ka·sagrikani dal·roroani a·bachenganiko mesokata gita ong·a.
An·ching dontonggija dal·rorona gita an·tangtangko Kristona
salanti on·kangna nanggen aro bi·anichi, Sastro poraianichi
salanti gital janggi tanganiko ra·chakna nanggen.

7. KA·SROKANI KAM

Napbolanina namen katchabena kraa, maina Jisu Kristoo bebera·giparangna jringjrotni janggiko
ku·rachakani gnang, "Je mande bebera·a aro baptize ka·atako man·a, uako jokatgen" (Mark 16:16).
Jensalo an·ching napbolahaon an·ching jringjrotni kusi ong·ani ramao gadoangenga.

Napbolaniara Kristo baksa da·o kusi ong·rimaniko mesokaniba ong·a. Ua brena amsokgijagipa Gisik
Rongtalgipako napbolgiparangna ku·rachaka (Watata 2:38). Ia Gisik baksana "Gisikni Biterang" -
"Ka·sara," jean janggi tanganio "chakchika, ka·sara, namani, kakketani, sontol dakani aro an·tangko
rakianirangchi gapata" (Galati 5:22, 23). Uni Gisik Rongtalgipachi Jisu an·chingo dongon, an·chingna
chu·ongnikaniko on·a. Maina Gisik Rongtalgipa an·chingko Isolni depanterang ong·a ine saki on·a (Rom
8:15, 16).

Ia naljokgipa Isol baksa nangrimania an·chingna bang·a namgnirangko ra·baa, indiba neng·nikani gri
janggi tanganikode ku·rachakja. Bebeko aganode, Kristona on·kanganiko dakdaldalgipa manderangna
bobil neng·nikbatgipa obostarango galonna jotton ka·a. Indiba an·ching Isolni jako ong·ahaon,
an·chingona nama ba namgija, je obosta sokbaoba an·chingni dal·rorogni aro skanina ong·a ine u·ina
nanga (Rom 8:28 ko nibo).

Saksa me·chikma dambe an·tangni segipa uko wate galna am·omangba Kristona an·tngni janggiko on·e
napbolna miksongaha. Segipa uni gital bebera·anio mamung bak ra·pana sikjaha, indiba ua Jisuko
ra·chake skangna bate nambagipa jikgipa ong·na jotton ka·aha. Dikdiksa somoinade uni segipa
nokdangona neng·nikanirangko ra·baaha. Indiba bon·chotao uni jechakna man·gijagipachi chong·motan
uni jikgipani dingtangbegimin janggi tanganichi salbaako man·aha. Ia mandeba an·tangni janggiko
Kristona on·kange napbolatako man·aha.

Je obostaoba Kristoko rim·kingkingako watgaljaode an·ching Uni jako bilakgipa ostrorang ong·na man·a.
An·ching Una on·kanganio mamung rakirika grian on·kangna man·a maina uaba mamung ra·rika grian
an·chingni paprangna chisolo damko on·aha. an·chingni ka·saaniko aro Una pakwataniko mande jinmani
mikkango mesokna mairongpile nambegipa chol ong·a! Na·a iako dakkuja ong·ode, maina nang·ni
ka·tongko Kristona on·kangja? Gisik Rongtalgipachi nang·o gital janggi tanganiko on·china Uo bi·bo aro
Kristona baptize ka·atako man·bo.

Nangrimgrike Dongachi Dal·roroaniko

Am·e Nibo
1960 bilsio Hollandoni mande, Brother Andrew uni VW gario Sastro katomrangko sruk sruk Communist
sipairangni gisep gita Romaniani simako ra·batangaha. Ua hotelo nape namgipa Kirstian dolrangona
dilchina gita Isolo bi·aha, jerangan ia Sastrorangko name jakkalgenchim.

Ua antini bon·achi Andrew hotelni seriktimgipaona re·ange, bano gilja donga uko sing·aha. Ia seriktimgipa
on·tisa jajrenga gnang uko nie aganchakaha, "Chingode indakgiparangde bang·e dongja ine na·an u·ia,
un baksanaba na·ara uamangni ku·sikko ma·sijawa."

"Na·a u·ijama?" ine Andrew aganchakaha, "Kristianrangde rokomsa a·gimikni ku·sikko agana."

"O mai ku·sikko?"

"Uko Agape minga."

Ia seriktimgipa pangnaba iako knakujachim. Indiba Andrew una aganaha, "ian a·gilsako knatobatgipa
ku·sik ong·a."

Andrew ua jolo adita dolrangko sandie man·aha, aro torom ge·sani President aro Secretary baksa
tom·aniko ong·atna tik ka·e donaha.

Rasong grianichi andrew aro ia manderang adita Europeni ku·sikrangko u·iahaoba, saksa sakgipinni u·ina
man·gipa ku·sikon man·jaha. Uandake uamang saksa sakgipinko nitatgrikaiaha. Andrew indita
gamchatgipa bosturangko ra·e bang·a kenbegnigipa ramarangko songrebajok. Indiba da·o iamangara
kakketgipa Kristianrangma, ma Governmentni nirikkigipa manderangsama, uko u·iani cholkon man·jaha
gita nikpilaha.

Bon·kamao, ua Romaniani Bible kingsako office tebil kosako

nikaha. Andrew an·tangni jeponiko Dutch Bibleko bikotaha. Ua 1
Korintirangna 16:20 ko badale, ki·tapni bimungko mesoke
on·aha. Rang·sanan uamangni mikkangrang ching·baaha.
Uamang Romaniani Sastroko rang·san badale apsan odai aro
podko poraiaha: "Pilak jongadarang na·simangna salam on·ata,
Na·simang rongtala ku·dimachi saksa sakgipinko salam
ka·grikbo."
Ia manderang Andrewko kusi ong·bee niaha. Uamangoni saksa
an·tangtangni Sastroko badale Toe Skiani 25:25 ko mesokaha.
Andrewba ua podko nike poraiaha: "Chel·gipa a·songoni
namgipa kattarang neng·gipa janggina ka·singipa chi gita ong·a."
Ia manderang adha kantamangna Sastroko badalanichi saksa sakgipin baksa sualgrike somoi re·ataha.
Ia nangrimgrikanio pilak jatni dingtanggrikanirangko guale uamangni mikronrangona mikchirang
ong·katpile kusi ong·bee ka·dingaha.

Andrew an·tangni jongadarangko grongaha ine u·iaha. Jensalo ua an·tangni ra·bagipa Biblerangko
uamangna mesokon, Romaniani manderang jagokmanpilaha aro uamang gipakgriktaitaiaha.
Un attamo hotelni seriktimgipa Andrewona re·bae aganaha, "Nibo anga dictionaryoniko agape ingipako
am·aha. Ua bimungchide mamung ku·sikba dongja. Uara Greek ku·siko ka·saa inanisan ong·aia."

Andrew aganchakaha, "Uan tik ong·a. Anga ia attam gimikan ua ku·sikchi agangrikaha."

Na·simangba ua knatogipa ku·sikko am·e nikahama? Ia dilanio Isol maikkai Uni dal·begipa ka·saani
ning·ona an·chingko rimbana ama, uko skie ra·gen.

1. MONDOLIKO NANGRIMGRIKE DONGCHINA ONG·ATAHA

Mandena nangchongmotgipa alduani aro pangchakgrikaniko

on·na gita Jisu mondoliko songe donaha. An·ching pilakan nanganirang gnang. Ianasa mondolini
miksongani ong·a. Ia biapona an·ching nangrimgrikaniko aro dakchakgrikaniko man·a re·ara. Sastroo
an·chingna ching·chagipa watatarangni mondoliko paraka jean me·a aro me·chikrangko kusi ong·gipa
nangrimgrikaniona okama, jean Bilakbatsranggipaonaba sokanga.

"Jeko chinga nikaha aro knaaha, uko na·simangnaba chinga aganata, maikai na·simangba ching
baksa bak man·pagen; aro chingni bak man·paode Pagipa baksa, aro Uni Depante Jisu Kristo
baksa gnang. Aro iarangko chinga seaha, maikai an·chingni katchaa chu·sokgen." - 1 Johan 1:3,4.

Jisu baksa aro saksa sakgipin baksa nangrimanichi ka·tongrangko kadimgimin dolsa 'kusi' ong·aniko
chu·gimik man·na amgen. Uamangara mingsa ku·sikko, chong·motan ka·saani ku·sikko agangen.

Kristianrang jorarikrikgipa nokdangni bak ong·a. Uamang Kristoo jongada aro noabirang ong·baa maina
uamango jongadani gisik gnang. Badita bebera·anio apalbata nangrimani gnang, inditan uamangni
Kristian nangrimgrikani bilakbata.

Jisuni Watatarangni rikgipa mondolini memberrang uamangni apsan apsan bebera·anirangchi, Isolna
ka·saanichi, aro Una dangdike on·na aro a·gilsakna Uni ka·saaniko sualna sikanichi apsan karimako
man·a. Ia apsan nangrimanichi kaako man·on ia bilgrigipa aro bang·gijagipa dol, a·rik sanalako man·oba
a·gilsak gimikkon bikpilatna man·aha.

2. MONDOLIKO KRISTO SONGAHA

Kristoo mondoli dongama? Ma ia toromni dol dakaniara mandeni banaianisama? Jisu aganchaka:
"Ia ro·ongni kosako anga angni mondoliko rikgen, aro uko a·ningni do·garang amjawa" - Mati
16:18.

Jisuan kaprikgipa Rong·brak, Uni Mondolini Noksikni ro·ong. Badia dol

pangchakgipa bakrang ong·a?

"Aro Watatarang aro katchinikgiparngni pangchake donani kosako

na·simang rikako man·aha, Kristo Jisu uni ki·tikni skotong ro·ong ong·a"
- Ephesus 2:20.

Jensalo Nama Katako skiprakon Gitel maiko chu·sokata?

"Aro Gitel uamang baksa jokna man·enggiparangko salanti

chapatachim" - Watata 2:47.

Jensalo Jisu mondoliko songahaon, "a·ningni do·garangba uko ona amjawa"

ine ku·rachaka." (Mati 16:18), aro Kristian Mondoli tangkuaenga. Una bilakgipa bobilrang nakataha -
romni rajarangoni Communist sason ka·dragiparangona - indiba so·ota man·giparangni an·chi bilakbate
dal·roronasa dakchakaha. Jensalo saksa Kristianko wa·alo so·e ba singhoni a·kolona galon, bang·bata
gipinrang uni biapko ra·na chakatbaskaha. Bebera·gija ka·dingstekgiparang Kristian mondoliko uamangni
katachi gimaatna gita an·tangtangni ama gita joton ka·aha. Indiba Kristianrangni bebe kata Scienceni ba
songsalni chasongomangba rongtalbate agansusakuaenga.

Mondolina dal·batgipa ra·bianide Romni sorkarini a·songni torom ine ra·chakani ja·manon
a·bachengbaaha. Mondoli silrorobaaha - aro ka·sine ong·siroroaha. Andalgipa chasongo gisikni gita
sigimin ong·a gita nikpilaha. Indiba Gitel kakketgipa aro ka·donggipa bebera·giparangko pangnan ripinga,
jerangan dimelgipa aro neng·begipa somoirango jajong grigipa walo teng·sugipa askirang gita
teng·suaha.

Paul, Kristoni Uni mondoli baksa nangrimaniko segipani

jikgipana rinoka aro ganggopani gnang nangrimgrika baksa toata (Ephesus 5:23-25). Mondoliara
nokdang ong·a, jeon member saksa sakgipin baksa nangrimgrikaniko mangrakata aro sakgipinni name
donganina simsakgrika (Ephesus 2:19).

Paul mondoliko tanggipa be·en baksa toata, jeni skotong Kristo an·tangan ong·a (Kolosi. 1:18).

Jensalo an·ching napbolahaon, an·chingni Jisuo bebera·aniko aro ua be·enni ba mondolini bakrang
ong·paa ine paraka.

"Maina an·ching … pilakan Gisik saksano be·en an·sanna baptize ka·ako man·aha" - 1 Kor. 12:13.

Parape·ani ki·tapo chakatpilgipa Kristoko mondolirangni gisepo re·roroengako agane, Uni simsakaniko
mesoka (Para. 1:20,12,13). Kristo an·tangni manderangko pangnaba watgalkuja aro ua mamung dakeba
watgaljawa.

3. MIKSONGA GNANGGIPA MONDOLI

Giljachi re·aniara Kristian mandena nangchongmotgipa ong·a. an·ching gipinrangni dakchakaniko

an·chingni bebera·aniko rakina aro dal·rorona gita nanga.

Mondoli gipin minggitam mongsonggipa kamrango bakko ra·paa!

(1) Mondoli bebeko simsake rakia.
"Bebeni krong aro pangchakani" ong·e (1 tim. 3:15), mondoli Isolni bebeko
a·gilsakni mikkango de·doa aro chelchake rakia. An·ching gipin
bebera·rimskarangni dondima gisik seng·aniko, Sastroni
nangchongmotgipa beberangko niatna gita, nanga.

(2) Isolni ka·saani papirangna maiko dakna man·achim uko mondoli

dakmesokgipa ong·a. Bebera·giparangni janggi tanganio dingtangataniko
ra·bagipa Kristo "uni aiao inmangipa seng·aniona okamgipa Isolna
rasongko on·a (1 Pitor 2:9).

(3) Nangenggipa a·gilsakna Isolni manderang Una sakki on·giparang

ong·a. Ua salgichina re·angna skang, Uni sninggiparangna Jisu
ku·rachakaniko daka:
"Indiba Gisik Rongtalgipani na·simangona re·baon na·simang bilko
man·gen; aro Jerusalemo aro Judeao aro Samaria gimikon aro
a·kitikona kingking na·simang angni sakki ong·gen" - Watata 1:8.

Isolni suakpila ka·saaniko a·gilsak gimikchina sualniara maikai mondolina nambegipa chol ong·a?
4. BILAKANINA DOL DAKAHA

Kristoni songgimin mondolia miksongani gnangsa dol dakaha. Sakoba bakrimatna man·a, ba sakoba
a·pal galna nanga (Mti 18:15-18). Isolni mondoli dilgiparangko songa aro a·gimikni skotong aro songo
tom·ram biaprangba gnang (Watata. 8:14; 14:23; 15:2; 1 Tim. 3:1-13). Jensalo uamang napbolahaon
bebera·giparang nangrime dol dake dongaha (Watata 2:41 aro 47).

Mondoli saksa sakgipin didigrikna gita dongenga.

"Aro mitamni dakronga gita ong·gija an·chingde chimonggrikako wtgalgija mol·molgrike ka·saana
aro nama kamna didina saksa sakgipinko nigrikna; aro salni sepangbaengako badita nika indita
bate mol·molna hai" - Ibri 10:24,25.

Ian an·seng mangrake donggipa mondolini dakgni ong·a. Uni memberrang

saksa sakgipinko bebeo rika ro didigrika. Isol an·tangni manderangko
bilakatna ro a·gilsakna dangdike on·na gita mondoliko songaha. An·ching
sakprak sakprak dake kam ka·ana bate apsan nangrime bang·bata
kamrangko chu·sokatna man·gen. Mingsako toatna gita ra·na: Seventh-day
Adventist Mondoli. An·ching a·gilsak gimikchin sana banani kamko apalen
ra·a - songjinmarango garirangchi sana bananiko dakaoni diltugipa South
Pacific chichangrango clinicrangko kuliaona kingking. An·chingni poraiani
biaprango hajalni hajal chadamberangko Kristoo nambate janggi tangna
u·iatna - Loma Linda Universityo, ka·tong gitalko on·jotna dakdilaoni Africani
ning·tubatgipa biaprango chongipa mission skulrangko kulianiona kam
ka·aha. An·ching akal karap ong·ani aro duk kotona ong·anirango ADRA ni jakchi dakchakaniko on·a.
Songni mondolirang kangal aro nokgrirangna gana chinani aro cha·anirangko hajalni hajal Songo
Dangdike On·ram biaprango dakchakaniko on·a. Aro Adventist bebera·giparang dam 200 songnokrangna
baten janggi jokani nama ktako sualenga. Name doldake on·kange ka·gipa Kristianrangsan mangmang
indake a·gimikchin gipsokatna ama.

Kristo aro watatarang mondoliko be·enni bakrang baksa toa, aro pilak be·enni bakrangkon nanga ine
mesoka (1 Kor. 12:21-28). Pilak be·enni bakrangan tiktak apsande ong·ja, indioba pilakan
nangchongmotgipa ong·a aro pilakan kam ka·na nanga. Mikron be·enni a·pal ong·ahaode nikna man·ja.
den·sotgimin jaksima, jeba ong·ja maina, an·ching an·tangaride Kristona jakde gamchata dongja.
An·chingara mikronma, jakma ba chu·sokgipa ong·e ka·na man·ja. Mondoli baksa bak ong·ania, gipin
be·enni bakrang baksa ku·mong nangrimania, an·ching Kristianrangko mangrakatgen.

5. OLAKIANIO KATCHAANI

An·chingni ka·tongni ning·onin Isolko olakina skani gnang, aro uko an·ching chu·sokatna man·jaode ua
skani dimelangnaba gnang. Gitrangko segipa olakiram biapchi re·angani gimin maiko chanchia?

"An·ching Jihovani nokona re·angna, hai ine angna aganon anga

katchaaha" - Git. 122:1.

Sika moanirang jinma olakianio mai bak gnang?

"Ka·sroke Jihovana dangdike on·bo, ring·ani gnang uni mikkangona

re·bab." - Git 100:2.

Isolko olakiani bak gita on·anirangko ra·baaniara kragipa ong·a ine Sastroo
an·chingna agana.
"On·aniko ra·bae Uni sararango napabo. Rongtalgipa gananirango Jihovako olakibo" -Git. 96:8-9.

Mande jinmao olakianio bi·aniba nangchongmotgipa ong·a.

Re·babo, an·ching olakina aro tugopna hai; Jihova an·chingko Dakgipani mikkango an·ching
ja·sku dipanna hai" - Git 95:6.

Niam Gitalni olakiao, Sastroko skiani aro skiprakanian mongsongbatgipa ong·a. Watata odai 2-o Pitorni
sal sotbongagipao a·brioni skiprakao a·bachenge, aro Protestant Namdapatgiparangni somoioni
da·alona, toromni bidingo mikrakatna skigiparang pilakan Sastroo pangchake skiaha. Maini gimin? Maina,
Isolni kata tanga aro bimchipa. Matsramgipa pilak tonualna bate matbata." (Ibri 4:12-13).

6. MONDOLINARA MAIA KRAA?

Mondolio namgijagipa manderangan gapa ine mitam mandeang matnanga. Henry Ward Beecherni agana
kattarangan kakket ong·a: "Mondlide mingsinggipa Kristianrangko mesokna tom·chakram ong·ja, indiba
chu·sokgijaparangna skie ra·chakram biapsa ong·a."

An·ching sakantian chu·sokgiparang ong·jani gimin, mondoliba chu·sokgipa ong·na man·jawa. Jisu Uni
toe aganao namgipa mi baksa maran chabrinani golpoko aganaha (Mati 13:24-30 ).

Niam gitalo Paulni segimin chitirangko poraion, Watatarangni mondlio dal·a golmalrang gnang ine
an·ching nikatna man·a. Uandake da·aloba mondolio bang·a ong·sianirang dongronga. Indiba iako gisik
ra·na, mondolini dal·gipa pangchakgipa ro·ong Jisu Kristoko darang ong·sigipa mondoli ba dolba nosto
ka·na ba golmal ka·na man·jawa. Uni gimin chu·sokgijagipa mondolirang an·chingna dangdike on·gipa
Jokatgipachiniko niatkame dongna nanga. Ong·sia gnangoba mondoliara Unin ong·a, uni gimin
Kristochiko niatjringbo.

"Kristoba mondlina ka·saaha, aro uani gimin an·tangko on·aha; ua maikai, simteka aro
sicheparang ba indakarang donggija, torom aro matnanga gri ong·china, rongchinge mondoliko
an·tangan an·tangni mikkango donna man·na gita, uko katao chichi auatachi rongtalatenba torom
ong·atna man·gen" - Ephesusrangna 5:25-27.

Mondoliara Jisuna inditan gamchatani gimin Ua Uni sichakachi sakprakpraknan aro mondoli dol gimiknan
an·tangkon on·aha. Uni gimin mondlini member ong·aniara nang·naba nangchongmotgipa ong·a. Na·ara
Kirstoni bak ba member ong·ama?

7. MONDOLIKO SANDIANI

A·gilsako Jisu Kristoara badita kakketgipa bebe ra·anirangko donaha?

"Be·en an·san ong·a, aro Gisik saksan … Gitel saksan, bebera·a mingsan, baptize ka·a mingsan"
Ephesus 4:4-6.

Kristo bebera·a mingsan ong·aiani gimin badia ong·a uko an·ching maikai u·igen? Jisu an·chingna u·iani
chinko on·aha:
Saoba Uni namnikako dakna skode, indide ua skia Isoloni ong·ama, ma an·tangoniko aganana,
iako ua u·igen" - Johan 7:17 (Johan 8:31, 32 koba nibo).

Jensalo an·ching Isolni skako dakna on·kangahaon, ua skianirangara

Isolonima ma mandeni dakritingasama uko nikna gita dakchakgen.
Mondoliko am·e nikna gita mingsa cholde uni Isolni kattana mande
ra·aniko aro on·kangniko sandianichi man·gen. Chong·motgipa
nangrimgrikanide Sastroosa pangchake rika, saoba dilna changipa ba dal·gipa dolo pangchakede ong·ja.

Ia dilanirangoniko am·e nianiko dakangkue, Sastrooniko Isolni nang·ni parape·ani seng·ao re·rurabo, aro
uan uni nang·na miksonganiko oprake on·gen. Dal·rorogipa Kristianara an·tangni ka·tongko oprake aro
Uni kattaoniko Isolni parape·gimin bebeko ra·chakna sikgipa gisik ong·gen.
 Mande Bang·batgipa Dol Sretna Man·ama?
Dilani 16 gipao an·ching am·e nikaha je, Sabbathko rakianiara da·ororo simbrae janggi tangania
nangchongmotgipa sam ong·a. Isol an·chingni pilak nanganirangko u·iani gimin be·enna neng·takani aro
gisikko mikselatanina snigipa sal changantiko ua mangrakate donaha. An·chingni a·gilsakko saldokna
ong·ani ja·mano Ua snigipa salo "neng·takaha," "patiaha" aro
"rongtalataha" (A·ba. 2:1-3).

Jensalo Isol An·tangni manderangna, Israelna, Ge·etani

Mingchikkungko on·on, Ua snigipa sal, neng·takani salko manichina
ge·etaniko, Uni niamni jatchion donaha (Re·ongkata 20:8-11). Ia
ge·etani gitade Neng·takani salara Isolni ong·atani bilko gisik ra·ani,
dikdiksa neng·take Uni ong·atani aiao inmangipa kamrangko aro
nitoaniko chanchiatna salsa ja·nengtake Ong·atgipani sambaona
re·bana aro an·chingni Un baksa nangrimani ning·tuaniko nipilatani
ong·a.

Jisuni a·gilsako tangmitingo Uaba neng·takani salko rakiaha (Luk 14:16). Aro ia salo Kristianrangna
namgniko ra·bagipa ong·a ine ra·chakaha (Mark 2:27, 28). Watatarangni ki·taponi adita podrang Kristoni
sninggiparangba Uni chakatpilani somoio neng·takan salo olakiaha ine rongtalen mesoka (Watata 13:14;
16:13; 17:22; 15:1-4, 11).

1. JAJAATGIPA SING·ANI

Bang·a manderangni jajagipa chanchianiona da·o an·ching sokbaaha. A·gilsako Kristian dolrang adita
somoina dingtang dingtang sal minggniko manibaenga. Mingsara bang·bata Kristianrangan gisiko
nangbee antini skanggipa sal Robibar salko Kristoni chakatpilani salko gisik ra·ani sal ine bebera·e ine
manibaenga. Aro minggipinara, bang·a Kristianrang dolrangan apsan gisik nanga gnang Sastroo snigipa
sal neng·takani salkosa mandera·a aro darangba Robibarni rongtalaniko janapa dongja.

Indide badia salko neng·takani sal ine manianio maiba dingtangani dongama? Kakketgipa aro
bimchipgipa bebeko u·ina sikgipa manderang an·tangtango indake sing·na nanggen: Jisuara maia ong·a?
Angkoara Jisu maidakako nangnika?

Iani gimin miksonganiko daknade adita ma·sie ra·chenganirangko dakna nanggen: Sawa neng·takani sal,
Sonibar sal, antini snigipa saloniko Robibar, antini skanggipa salona dingtangataha? Sastroara indake
dingtangatna bil on·ama? Indake ong·ode Isolara, Kristoara ba Watataranga dingtangataniko dakahama?

An·ching iarang pilakkon niangkuna.

2. ISOLAN SALKO DINGTANGATAHAMA?

Neng·takani salo snigipa saloniko antini skanggipa salona dingtangataha

ine Isolni agangimin banoba dongama?

Bang·bata Kristianrangan Ge·eta Mingchikkungko janggi tanganio

pangchakani dake ra·chaka. Maina uarangara Isolni dingtangmancha
mandeni jatna segimin ong·a. ua rong·pilengo jaktangchi seahani gimin
(Re·ongkata 31:18) uarang namen gamchata.
Brigipa ge·etanio Isol an·chingna indake ge·eta: "

"Uko rongtala ine rakina neng·takani salko gisik ra·bo. Saldok na·a gambo aro nang·ni pilak
kamko ka·bo; indiba SNIGIPA SAL JIHOVA NANG·NI ISOLNA NENG·TAKANI ONG·A; uno na·a
mamung kamkoba ka·nabe … maina saldoko Jihova salgi aro a·ako sagalko aro uarango donggipa
pilakkon dakaha, aro snigipa salo Ua NENG·TAKAHA; uni gimin jihova neng·takani salko PATIAHA
aro uko RONGTALATAHA" - Re·oangkata 20:8-11.

Isol ge·eta mingchikkungko Uni manderangna on·ahaon Uni rongtalgipa ku·sikchi ge·etgiminrangko
darang mandeba sedapjachina ba dingtangatjachina gita aganaha.

"Maikai na·simang angni na·simangna ge·etgimin na·simangni Isol Jihovani ge·etanirangko rakina
man·gen, na·simang angni na·simangna ge·etgimin kattana ON·DAPNA BA UONIKO KOMIATNA
NANGJA" - Deut. 4:2.

Isol an·tangba an·tangni ge·etgiminrangko dingtangatjana ku·rachaka.

"Angni songgigrikaniko anga RAMRAM DAKJAWA, aro angni KU·CHIKRANGONI

ONG·KATGIPAKO ANGA DINGTANG DAKJAWA" - Git 89:34.

Neng·takani salo antini skanggipa saloni skanggipa salona dingtangatja ine Sastroo rongtalen mesoka.

3. NENG·TAKANI SALKO JISU DINGTANGATAHAMA?

Jisuni aganani gitade Ge·eta Mingchikkungko dingtangatna man·ja:

"Anga niamko aro katchinikgiparangni kattako gimaatna
re·baaha ine daa chanchi; gimaatna re·baja, indiba
chu·sokatna. Maina beben anga na·simangna agana, a·a aro
salgi gimajana kingking pilakan ong·jaskal niamoni on·ti
min·tiba gimjawa" - Mati 5:17, 18.

Neng·takani salo gilja noko nape olakiara Jisuni dakbewal ong·a ine
an·ching Dilani 16 gipao nikbaaha (Luk 4:16). Aro Jisu An·tangni sninggiparangko kusi aro ka·srokaniko
man·na gita Neng·takani salko kakkete rakkiangkuaniko nangnika (Mati 24:20).

Jisuni skiani aro dakmesokanirangan Neng·takani salkoara neng·takna, gisik olgrokatna aro Isol baksa
somoi ra·na gita nangkuenga ine talata.

4. NENG·TAKANI SALKO WATATARANG DINGTANGATAHAMA?

Jakob, skanggipa Kristian mondolini dilgipa, Ge·eta Mingchikkungni gimin

indine sea:
"Maina saoba niam gimikko manie mingsao ja·gidote pilakni gimin
gro nanggipa ong·aha. Maina til·eknabe ine ingipa, mande so·otnabe
inaba inaha, indide na·a til·ekja indiba mande so·otode na·a niamko
pe·gipa ong·aha" - Jakob 2:10, 11.

Luk, saksa sangipa bangipa aro skanggipa mondolio skiprakgipa indine

agana,
"Neng·takan salo cholgugani a·palchina chibimani rikamona, jeo
bi·ani biap donga ine chanchiachim uchina re·angaha; aro chinga
asonge tom·dakgipa me·chikrangna aganaha" - Watata 16:13.
Niam Gitalni ki·tap, Watatarango Kristoni ja·rikgiparang Neng·takan salko maniaha ine chang 84 na
janapa, uarang pilakan Jisuni chakatpiltaiani bilsi 14 mang batangpilaoni ong·a: Sabbath changgni
Antioko (Watata 13:14, 42, 44); Philippio changsa (Watata 16:13); Thessalonikao changgittam (Watata
17:2, 3); Korinthio chang 78 (Watata 18:4, 11).

Johan, sninggipa sak 12 oni bon·kame segipa, Sabbathko rakiaha. Ua indake sea:
"Anga Gitelni salo Gisiko ong·e, angni janggilchi singga sika gita gam·bea kurangko knaaha" -
Parape·a 1:10.

Jisuni katta gitade Gitelni salara Sabbath ong·a.

"Maina Mandeni Dapante Neng·takani salni nokgipa ong·a" - Mati 12:8.

Sastroni sakirangko sandie nianio Watatarang Isolni Neng·takan salko snigipa saloniko antini skanggipa
salona dingtangatna jotton ka·jaha ine mesoka. Niam Gitalo antini skanggipa salko chang 8 san janapaia.
Iarang pilakon antini skanggipa rongtalgipa sal ine aganja ba ua salko olakiani sal inemangba mesokna
jotton ka·ani dongja. Namedake ia mingchet podrangko sandie antini skanggipa sal Robibarni gimin
indake nikgen:

(1) Me·chikrang antini skanggipa salo gopramona re·baa (Mati 28:1).

(2) "Neng·takani ssal badeango" me·chikrang antini skanggipa salo salarini kamrangko ka·na
a·bachengaha (Mark 16:1, 2).
(3) Jisu Magdaleneni Mariamna antini skanggipa salo mikkang pa·chengaha (Mark 16:9).
(4) Jisuni sninggiparang antini skanggipa salo salarini kamrangko ka·na a·bachengaha (Luk 24:1).
(5) Mariam antini skanggipa salo Jisuni gopramona re·ange gopram konggrang ong·a ine nikeaha (Johan
20:1).
(6) Sninggiparang antini skanggipa salo Jihudirangna kene (olakina ong·ja) tom·dakaha (Johan 20:19).
(7) Paul mondolini memberrangko antini skanggipa salo uamangni chimonggipa tangkarangko chane
Jerusdalemchi kangalrangna dingtang ma·eke donchina agana (1 Kor. 16:1, 2). Ia podo mamung toromni
tom·dakani gimin janapja.
(8) Watatarang 20:7 o Paulni antini skanggipa salo watgriknasiengani gimin skiprakaniko janapa. Beben
Paul salantian skipraka aro salantian pita pe·a (Watata 2:46).

Ia pilaka Sastroni pilak bakrangon Watatarang snigipa sal Neng·takani salko mania dontongna
miksongani gnang ine mesokani gri. Watatarang Neng·takani salko antini snigipa saloniko antini
skanggipa salona dingtangatahani gimin janapja. Niam Gitalo, Neng·takani salko antini snigipa sal
Sonibaroniko antini skanggipa sal Robibarona dingtangata dongja ine rongtalbeen mesoka.
Dingtangatani Jisuni aro Watatarangni ja·manosa re·baaha Aro maidake basako maidake dingtangatani
sokbaaha uko itihasoniko niatna nanggen.

5. BANONI ROBIBAR SAL RE·BAA?

Niam Gitalni Kristianrangni skiaoni mitam Kristianrangde branganggen ine

Watatarang "Uni gimin …….. mikrakbo" ine mikrakataniko on·a (Wat. 20:29-
31). Aro uandaken ong·bebeaha. Ka·dongchakna man·gipa itihasko
segiparang maikai Kristianrang Watatarangni rongtala skiarangoni
brangangachim uko rongtalen serika. Dakritinganirang aro skianirang jekon
Paul, Pitor aro gipin Kristian mondoliko a·bachengdilgiparang ra·chakjachim
uarangba mondolio ka·sine napbaaha.

Neng·takani salko maniaoni Robibar salko maniaona Niam Gitalko sea

matchotahaosa aro pilak Watatarangan sie bon·ahaosa a·bachengbaaha.
Itihaso serikani gnang je Kristianrang ka·sin ka·sin snigipa salo maniani pal
antini skanggipa salosa neng·takna aro olakina re·baskaaha. Indiba
bebera·giparang rang·sande snigipa salko Robibar salko Gitelni sal ine manina dontongaijaha.
Seng·gnangbatgipa name serika donge Robibar salko Kristianrangni manichengbaanidde Italyo Jisuni
siani ja·mano bilsi 250 mang a·bachengaha. Uni ja·mano ruuta somoinan Kristianrang salgnikon
maniachim, indiomangba mitamrang Neng·takan salkon rakiaha.

March 7, 321 AD o, Constantine raja dal·gipa, Romni songnok

gimikon, game cha·giparangna agre, pilak manderangkon draate,
Robibar salko maniani niamko dakaha. Ian baksana gipin
mingbonga a·songni niamrang baksa Constantineni niam dakanichi
Robibarko maniani niam da·ona kingking cholko ra·baaha. Brigipa
ritcha chasongo Laodikiani Councilo Kristianrangni Neng·takani salo
kam ka·china aro Robibar salo man·a dipet kam ka·jachina gita
niamko dakaha.

Itihas indake mesoka je, Robibarko olakiani sal dake ra·ania

mandeni ong·atanisa ong·a. Brigipa Ge·etanio antini snigipa salko galatna gita Sastroo mamung bil on·ani
dongja. Kristianrangni chasongo tol·pinapgipa bil Isolni niamko dingtangatna jotton ka·gen ine Daniel
katchinikgipa agansoaha (Daniel 7:25).

6. SAWA DINGTANGATAHA?

Sawa parake Neng·takani salko antini snigipa saloniko antini skanggipa salona dingtangataha? Catholic
Mondoli iako dakaha ine ku·rachaka. Be·ruruangenggipa Romni songnokko rakirikna, nama miksongani
gnang mondolini dilgiparang bebeko watgale olakiani salko Sonibaroniko Robibarona dingtangatna jotton
ka·aha.

Roman Catholic sea:

"Sing·ani: Badia Neng·takani sal?

"Aganchakani: Sonibar, Neng·takani sal ong·a.

"Sing·ani: Indide maina Sonibarni pal Robibarko an·ching maniskaa?

"Aganchakani: An·ching Sonibarni pal Robibarko mania maina Catholic

Mondoli Sonibaro maniaoniko Robibarona dingtangataha" - Peter
Geirmann, The Converts Cathecism of Catholic Doctrine (1957 edition), jak 50.
Catholic Mondolini rasonggragra mondoliko dilgipa manderangsa ia dingtangataniko dakaha ine
aganparaka.

"Rongtalgipa sal, Neng·takan salko Sonibaroniko Robibarona dingtangatania ……… Sastroni mamung
dilaniko man·e ong·ja indiba mondoli an·tangni bilo pangchakesa ……… Je manderangan Sastrosan
mangmang pangchakani ong·na nanga ine chanchichipgiparang katta gita re·ode Seventh-day
Adventistrang ong·na nanga, aro Sonibarko rongtale rakigen. - Cardinal Maida, Archbishop of Detrait,
Saint Catherine Catholic Church Sentinel, Algonac, Michigan, May 21, 1995.

7. MITAM PROTESTANT MONDOLIRANG MAIKO AGANA?

Adita Protestant dolrangni bebera·anirangko serikani gitade uamangba Robibarko manianina Sastroo
mamung bilkoba nikja ine ku·rachaka.

Marthin Luther, Lutheran Mondoliko a·bachengdilgipa, Augsburg Confessiono, Artick 28, paragraph 9
gipao indake sea:
"Uamang (Roman Catholicrang) Neng·takani saloniko, Gitelni sal, Robibar salona, Niam Mingchikkung
gita ong·gija dingtangataha ine kanga. ………. Neng·takani salko dingtangatana agre uamangni gaora
de·ani gipin nambata dakmesokani gri. Ge·eta Mingchikkungoni mingsako galatahani gimin, mondolini bil
aro bilakani dal·a ine uamang agana."

Methodist theologianrang, Amos Binney aro Daniel Steele agana:

"Beben, bi·sa bakgitchakko napbolatna mamung ge·eta dongja …… ba antini skanggipa salko rongtale
rakianiba dongja." - Theologian Compound (New York: Methodist Book Concern, 1902), jak 180, 181.

Dr. N. Summerbell, Disciples of Christ ba Christian Chirchni itihasko segipa indake sea:
Roman mondoli chu·gimikan brangangaha ……… Isolni kattani Neng·takani salko pe·gale Robibarko
rongtalgipa sal dake songaniara Brigipa Ge·etanikon bikpilataha. - A True History of the Christian and the
Christian Church, jak 417, 418.

8. ONG·CHONGMOTARA MAIASA?

Ian an·chingna mikkangchakchak sing·aniko ra·baa. Sastroni hukum gri maina bang·a Kristianrang
Robibarko mania? Iana bate nangchongmotania, angara badita salko rakigen? Antini gisepo salsako
jekoba maniaioba ong·aia ine ingiparangko anga ja·rikpagenma? Ba a·gilsakko Jisuni manipbaaniko
dakbagipa, aro ge·eta Niam Mingchikkung o "Snigipa Sal …….. Neng·takani Sal" ingipako ja·rikgenma?

Iani an·ching ramram manie roaiani giminde aganjaenga indiba

Sastro gita badia ong·a uko sandiani ong·enga. Nangchongmotgipa
bakde Jisuko manina nanganian ong·a. An·chingni Dakgipa Rugipa
antini snigipa salko "rongtalgipa sal" dake donaha, aro ua salo
an·ching an·chingni nokdangni manderang baksa aro Un baksa
sepangbate dongna man·e bilakbatatna aro gisik ka·srokbatna
man·a. Angara sako manigen? Isolni Depante Kristoko manigenma
mandeni dakbewalko? Seoke ra·anide rongtala: manderangni
skianikoma Isolni ge·etaniko. Manderangni kattakoma Isolni kattako.
Mandeni donjegiminkoma Isolni ge·etaniko.

Dongimin somoi aro niamrangko dingtangatna (Daniel 7:25) jotton ka·gnini gimin Daniel katchinikgipa
mikrakatsoa. Isol An·tangni manderangko katta manie dongchina okampiltokenga. Una kakket ong·ani
aro ka·saaniko mesokani gita Neng·takani salko manichina Ua okamenga.

Jisu indine agana, "Angna ka·saode angni ge·etanirangko manibo" (Johan 14:15). Una ka·sae Uni
ge·etanirangko maniode uamangni kusi ong·ani gapgen ine Ua ku·rachaka (Johan 15:9-11). An·chingo
aiao inmanpilgipa Jokatgipa donga. An·chingko Ua An·tangni ka·saaniko chu·gimik mesokna skenga.
Katta manigipa ka·tongan Ua ka·saaniko rimnapna dal·bee do·ga osoani ong·a.

Gethsemane bario chisol aro a·gilsakni papni boja uko sinjetengoba An·tangni Pagipani skana Kristo
chu·gimik on·kangaha. Ua Isolna indine inaha, "Ia ringchakaniko angoniko ra·angbo." Ua mol·molengon,
bama gnangsa indine aganaha, "Indiba angni namnika ong·ja, nang·ni namnikasa" (Mark 14:36).

Chu·gimik bame on·kange janggi tanganio chu·sokaniko an·chingko man·atna Kristo skenga. Aro
Neng·takani salo neng·take katchaaniko man·atnaba skenga. Pilak janggi tangani saomoirangon
an·chingko An·tango ka·dongchakaniko Ua nangnikenga. Na·a Isolni okamanina aro Uni ge·etanirangko
manina ku·rachakode Jisuni katchaania "nang·o" aro nang·ni katchaania "chu·sokgen" (Johan 15:11) ine
Ua ku·rachaka.
 Isol Kakketchimma, Am·e Nibo
Sonjinmani jatchio, noko home work dakenggipa me·a bi·sa
tang·brangbagipa slai guli nange so·otako man·aha.

Songsaoni ma·gipa saksa, an·chi on·chakaniko man·e uni degipa AIDS

sabisiko man·aha ine ma·siaha.

Duknirang uandaken a·gilsako gapaiaha. An·ching pilakan iarangna

aganchakaniko nangnika. Ia orto gri a·gilsako, indakgipa obostao Isolara
bano? A·gilsako Isolni ka·saan gapaia ine Daud Gitrang 33:5 - o janapa.
Indake ong·genchimode, maini giminsa Isolara duknirangko bon·atja?
Parape·a odhai 20 - o Isol maikai aro basako indongarangko bon·kimitatgen
an·chingna mesokaha.

1. HAJALSA BILSIRANGNI GIMIN TALATA

Johan hajalsa bilsirangni gimin aganon, Kristoni gnigipa re·bapilani

somoionin a·bachenggen ine Parape·a odhai 20 - o janapa. Pap a·gilsako napantal Satanni Kristo baksa
bobil dakaniba hajalsa bilsirangni a·bachengahaosa matchotgen.

Ia bobil dingania salgio Luciferni Kristoni kosako mikbue salgini

rongtalgipa sa·grerang baksa dakgrikani ja·mano, a·gilsakona
galonataha. Ia bobil dingania a·gilsakoba Eden bario
a·bachengaha aro Kristoko a·gilsakni manderangni jakchi chisolo
datkapdilaha. Ia dukni golpoko Dilani 3 oniko niatpiltaina man·gen.
Ia bobil dingania hajalsa bilsirangni bon·ao aro a·gilsakko wa·alchi
rongtalatosa matchotgen. Ia 1000 bilsikoa rokomgni
chakatpilanichi ma·eke mesoka.

Skanggipa chakatpilanio sawarang bakko man·gen?

"Skanggipa chakatpilanio bakko man·giparang rongtala aro an·senga. Gnigipa siani iamangni
kosako bil man·ja, indiba uamag Isolni aro Kristoni kamalrang ong·gen aro bilsi hajalsana Un
baksa raja ong·gen." (Parape·a 20:6). (Iano on·gimin Sastroni odhai podranga NIV - oni ong·a).

"Rongtala aro an·senga," iamanga Jisuko an·tangtangni Jokatgipa ine ra·chake, "skanggipa
chakatpilanio" bakko man·giparang ong·a. Toromirang Jisu baksa bilsi 1000 - na "sason ka·genchimode,"
uamang skanggipa chakatpilanio, chong·motan hajalsa bilsini a·bachengao chakatgiparang ong·na
nanga.

Hajalsa bilsirangni bon·ao sawarangsa gnigipa chakatpilanio bakko man·pagen?

"Dongpitigipa sigiminrang bilsi hajalsa matchotkujana kingking janggi tangatako man·jaha," ine
Parape·a 20:5 - o janapa.

"Bang·a sigiminrang" ingipa papi sigiminrangna agre gipin dongja, maina toromi sigiminrangde "rongtala
aro an·senga" dolde bilsi 1000 a·bachengantal chakatatako man·manjok.
Unigimin, 1000 bilsirangni a·bachenga aro bon·kamaniko rokomgni chakatpilanichi ma·teke mesoka,
chong·motan toromirangni aro papirangni chakatpilanichi ong·a.

2. KRISTONI RE·BAPILAO CHAKATGIPA

Skanggipa chakatpilani, toromirangna, Kristoni gnigipa re·bapilanio ong·a.

"Maina Gitel an·tangan inchroa aro pamong sa·greni ku·rang, aro Isolni
singga gnang salgioni ong·onbagen, unon KRISTOO SIGIMINRANG
SKANG CHAKATGEN. Unikoa AN·CHING TANGGIPA
DONGPITIGIPARANG BANGBANGO GITELKO GRONGNA
ARAMRANGO UAMANG BAKSA DAMSAN RIMDOAKO MAN·GEN, aro
uandake an·ching pangnan Gitel baksa ong·gen." 1 Thess. 4:16, 17.

Jisu ia a·gilsakona re·bataion, Kristoo sigiparangko chakatate, tangenggipa

toromirang baksa salgiona rimdoanggen. Papirangde papni ramakon watna
amja maina, uamang Rongtalgipa Isolni nikao tangna amja, aro uamang
pilakan Kristoni rasongchi so·otako man·gen.

3. SATAN 1000 BILSINA A·GILSAKO KAAKO MAN·A

Jensalo 1000 bilsi a·bachengon, toromirangde salgichi dongmanjok aro papiranga sitokaha. Ia 1000
bilsirangna a·gilsak maidake ong·gen?

"Aro anga salgioni sa·gre ong·onbaako nikaha, uo tu·beani chabi, aro uni jako dal·gipa siliting
gnangchim. Aro ua drakon, chong·motan gitchamgipa chipu, Diabol ba Satan ong·gipako rim·e
bilsi hajalsana uko kaaha, aro tu·beaona uko galataha aro chipe uni kosako mohor su·aha, maikai
hajalsa bilsi matchotkujana kingking jatrangko brangatjawaha. Iarangni ja·mano dikdiksana uko
engna nanggen" - (Para. 20:1-3).

Jisuni re·bapilani somoio Satan kaako man·aha aro hajalsa bilsi

matchotkujana kingking kaako man·gen. Satanara bano chipkete donako
man·a? Ki·tikbri tu·beao donako man·aha. A·gilsak ong·kugijamitingo maikai
ong·achim, ua ong·a obostako Greek ku·sikode, "tu·begipa, ba najokagni
tu·begipa" ine miksongachi a·gilsakni obostako Isolni ong·atna skangde
ong·achim ine janapa. An·chingni a·gilsakan tu·begipa biap jeon Satanko
donnasienggipa ong·achim.

Sastroode Satanko dal·begipa silitingchi kagniko agansoa. Iara siliting asolko

miksongama? Ong·ja, uan obostani silitingchi kagnikosa miksonga. Satan
an·tangni tol·pinapani kamko 1000 bilsirangni somoioba dakangkina
namnikbegenchim. Indiba ua darang toromi mandeko majona gita man·jawaha, maina uamang pilakan
salgiosa ong·gen. Aro darang otoromi (papi) manderangba uamangko dilna man·jawajok, maina uamang
pilakan sitokginok; ua darangkoba majona ba rurana man·jae, uni kamchi ong·siatgimin sikdikdikgipa
a·gilsako re·rorona draatako man·aha.

4. TOROMIRANG PAPIRANGKO BICHAL KA·GEN

Hajalsa bilsini somoion bichal ka·ani somoiba ong·gen. Indiba iako gisiko ra·bo, bichal rokombri
gadangrang donggen:-
(1)Kristoni gnigipa re·bapilna skang toromirangko sandichengani bichal donggen.
(2)Kristoni gnigipa re·bapilanio toromirangna man·gni donggen.
(3)Hajalsa bilsini somoirangon papirangko bichal ka·ani ong·gen.
(4)Satan aro papirang bichalni ja·mano man·gniko man·gen.
(Iani gimin talbatna skode Dilani 13 o talatgipa, sandie bichal ka·anini gimin nipiltaibo).

Kristoni gnigipa re·bapilani somoion sigimin toromirang aro tange dongenggipa toromirangde rimdoako
man·ginok. Uamang hajalsa bilsina salgio ong·gen. Uamanga ua somoimitingo maiko dakgen?

"Rongtalgipa (jokgimin) a·gilsakko bichal ka·gen ine na·simang u·ijama? ……………….. An·ching
sa·grerangko bichal ka·gen ine u·ijama?" - (1 Kor. 6:2-3).

"Aro anga singhasonrangko nikaha, aro uarango asonggiparangna bichal ka·aniko on·aha.
……………….aro uamang hajalsa bilsirangna Kristo naksa tange raja ong·aha" - (Para. 20:4).

Hajalsa bilsirangni somoio, papirang, ga·akgimin sa·grerang aro

uamangni dilgipa Satanni giminba uamangni kamrangni gimin
nipiltaigen. Mairongpile papirangni kosako Isolni bichalni gimin so·ota
man·giparang, cheako man·giparang aro nama kattako skiana doka
sata man·giparangni gimin nipilate nina chol ong·pagen.

Isol jokgimin manderangna Uni papirangni kosako bichalni gimin

ma·sie ra·na on·anian uni ka·sachakbeaniko nikani chol ong·gen.
Indakgipa bang·bea sing·anirang dongnaba donga; "Maini giminsa
angni adeara salgio ong·na man·pajaha? Uko angade nama inesa
chanchiachim." Sa·grerangni serikgimin ki·taponiko niate nie, Isolni
bichalni gimin niaton, uamangni kamni kri bichal kakketan ong·aha
ine an·ching ma·sigen. Rongtalgipa Gisik maikai uamangko Isolona dilahachim an·ching ukoba ma·sigen.

5. HAJALSA BILSINI BON·AO SATANKO WATA

Bilsi hajalsani bon·anini gimin Sastroo janapa:

"Aro anga salgiogipa rongtalgipa gital Jerusalemko, Isolni ong·onbaako nikaha; ua setangna
tarisogimin namchik gita tarisoa" (Para. 21:2).

Ia aiao inmanpilgipa songjinmara toromirangni 1000 bilsirangna dongchakbagipa nokan ong·achim.

Jokgiminrang baksa salgioniko a·aona ra·onbaaha. Satanara ia 1000 bilsini bon·ao maiko dakgen?

"Aro bilsi 1000 matchoto Satanko uni patokoniko enggen; aro ua a·ani ki·tikbrini jatrangko, Gog
aro magogko brangatna, aro uamangko dakgrikaniona chimongna ong·katgen. Uamangni bang·a
sagalni an·cheng gitachim. Aro uamang a·ani apalako re·sotangaha. Aro rongtalgiparangni a·tipko
aro Isolni namnikgipa songjinmako dulaha" (Para. 20:7-9).

Sigimin papirang 1000 bilsini matchoto chakatatako man·tokgen.

Toromirangko Rongtalgipa songjinma baksa rimonbaon aro sigimin
papirangko chakatatahaon, Satan dikdiksana jakgitelaniko man·gen.
Toromirangni kosako chakatna Satan changsatai papirangko diltaigen.
Somoiko gimaatgijaan, dikdiksani somoion Satan bang·bea kotok
sipairangko chimonggen. Satan ua songjinmako chadrape ra·sekna
hukumko on·gen. Gital Jerusalemko chadrape ra·sekna re·mikkangon
uamang jringjrotna gimaaniona ga·akaha ine ma·sitokgen.

6. BON·KAMGIPA BICHAL

Ia somoion skanggipa changna pilak mande jatrangan mikkangchrak

gronggriktokgen. Songjinmaogipa jokgimin toromirangko Jisu An·tangan
dilgen. Songjinmani a·palogipa papi kotok jinmako Satan dilskagen. Ia bijatchi somoion Isol bon·kamgipa
bichalko ong·atgen aro papirang uamangni man·gniko un salo man·gen.

"Aro anga dal·gipa, bokgipa singhasonko, aro uno asonggipako nikaha, uni mikkangoni a·a aro
salgi katangaha, aro uarangna biap man·jaha. Aro anga sigiminrangko, dal·a aro chona
singhasonni mikkango chadengako nikaha. Aro ki·taprangko oaha. ………… aro sigiminrang ua
ki·taprango segimin gita, uamangni kamrangni kri bichal ka·ako man·aha" (Para. 20:11, 12).

Papirang bichalni mikkango chadengon, uamangni pilak donnugimin kamrangan parak ong·aha.
ga·akgimin me·a, me·chik aro sa·grerangna maikai Jisu kamko ka·achim, salgini ki·tapo serikgimin gita
parak ong·e golpoko mesokaha.

Salgi a·sak pilakan gisik nangbee niaha. Isolni singhasonni mikkango

chadenge Jisu An·tangni papirangna naljokani kamni gimin nikatna
gita sakpraknan on·aha. Gimagiminrangko sandie jokatna Ua
re·baaha ine Ua parakaha. Mandeni rokomo Ua a·gilsakona
re·baaha, majoa aro ruraarangko ame pap gri tangaha, aro chisolo
sichake da·o Uan salgio kamal ong·e an·chingna baltichakenga.
Bon·kame, jensalo Kristo duk ong·bee Uni ka·saaniko
ra·chaktelgijarangna raiko on·ani ong·ahaon, pilak salgi-a·sakni
rongtalgiparang kakket bichal ka·aniko namnikpagen.

"Maina an·ching pilakan Isolni bichal ka·ramni mikkango

chadenggen. Maina sea gnang, Gitel agana, Angni tangbanggipa ong·ani gita, pilakan Angna
tubamgen, aro pilak srean Isolna ku·rachakgen" - (Rom 14:10-11).

"Maikai salgi aro a·ao aro a·ningo pilakni ja·skuan Jisuni bimungna tubamgen, aro Jisu Kristoan
Gitel ine Pagipa Isolni rasongna pilak srean ku·rachakgen" - (Philip 2:10, 11).

Pap a·bachengantal, Satan Isolni bewalko chonikaha aro kakketgijagipa ine mingaha. Indiba pilak
chanchichipani aganchaka aro kenchakanirangko parak ong·ataha. Salgi-a·sak pilakan Jisu, Isolni Mes
Bi·sana ka·sana aro Uko olakina kraa ine ma·siaha. Isolni pilak miksonga aro kamrang parak ong·atako
man·e Isolni bewal aro cholon kakketgipa ong·a ine mesokaha.

Jokgiminrangsan ong·aigija, Satan aro uni sa·grerangba, Satanan dilsretaha, Isol kakketgipa ong·a ine
ku·rachakgen. Pilakan namgijani aro mikbuania dukni aro bon·chongdikanionasan dilaia ine nikaha.

7. PAP BON·CHONGDIKA

Satan aro bang·bea namgijagipa manderang, Isolan kakketgipa ong·a ine ma·sigenchimoba, uamangni
ka·tongde dingtang ong·atako man·jachim, aro uamangni bewalranga apsanon ong·engpitichim. Aro
bichalni raiko man·manoa:

"Aro uamang rongtalgiparangni a·tipko aro ka·sara songjinmako ra·sekna a·ani apalako doange
changdulaha. Unon salgioni wa·al ga·akonba·e uamangko minokaha. Aro uamangko brangatgipa
Diabolko gondokni wa·alona galsruataha………. Aro siani aro norokkoba wa·alona galonataha.
Wa·alni wario nisiatanian gnigipa siani ong·a. Aro jemangni bimungrangan janggini ki·tapo
napjachim, wa·alni wariona galatako man·aha" - (Para. 20: 9-15).

Bon·kamgipa bichalni ja·mano, pap aro papko rim·kingkinge

donggiparangko jringjrotni Isolni wa·alchi gimaatako man·gen. Satan aro
pilak gimagniogiparang ia "gnigipa sianio" bakko man·giparang
chakattaipilani chol gri jringjrotna sichotginok. Uamangni bobil dakani gisik
papirangna kusini griata, aro uamanga Satan aro uni sa·grerang baksa gimaatako man·aha. Papchi
ong·siatgimin a·gilsak salgini wa·alchi rongtalatako man·ahaon, papchi mamung dakeba ong·siatako
man·taijawaha. Nama aro namgija, Kristo aro Satan baksa dakgrikani matchotginok aro Kristo sason
ka·ginok. Pap aro uni kamrang bon·atako man·e, jringjrotna bon·changgijagipa rasongarigipa a·gilsaksa
ong·skaginok.

8. A·GILSAK RONGTALATAKO MAN·E GITAL ONG·ATA

Kamchetchetgimin a·gilsakoniko Isol gital a·gilsakko ong·atgen:

"Unikoa anga gital salgi aro gital a·gislakko nikaha, maina skanggipa salgi aro a·gilsak gimaatako
man·aha. …………. Anga Rongtalgipa, gital Jerusalemko Isoloni ong·onbaako nikaha. …….. Isolni
dongram manderang baksaan ong·gen aro uamang baksa dongkamgen; Nibo, manderang baksa
Isolni dongchakani, aro ua uamang baksa donggen, aro uamang uni manderang ong·gen, aro Isol
An·tangan uamang baksa ong·gen aro uamangni Isol ong·gen" - (Para. 21:1-5).

Ong·chengao gita nitobegipa a·gilsak jokgiminrangni jringjrotna dongchakram

biap ong·skaginok. Mikbokanirangoni jakgitelaniko man·e, ong·atgiminrang
a·gilsak gimikko nikna aro Jisuni ja·o damsan asonge knatimna, skie ra·na
aro Una ka·sana man·gen. (Chu·gimik Gital A·gilsakni gimin talbatna skode
Dilani 9 ko poraitaibo).

Na·ara ua somoimitingo bano ong·gen? Na·aba rongtalgiparangni

songjinmao Kristo baksa ong·pana miksongahama? Ma, na·ara jringjrotna
Kristo gri songjinmani a·palosa ong·skagenma? Na·a nang·ni janggiko Jisuni
jako on·manahaode, na·a mamung saloba jringjrotna gimagni aro kenbegnio
ga·akjawa. Na·a je rokomo janggi tanggenchimoba, na·a da·o Jisuni jako
on·genchimode, na·aba Kristo baksa aro jokgimin toromirang baksa songjinmani ning·o ong·pana
man·gen. Na·a on·kujaode, na·a da·alo nang·ni ka·tongko Kristona on·bo, Ua nang·ko kema ka·e
ka·saachi ganggopsogen. Ian nang·na chol. Da·alan nang·na jokatani sal ong·a.
 Noroka Maia Aro Bano?
Skulchi re·angenggipa bi·sarangko mande saksa an·tangni slaichi
gorimrimataha aro bang·a bi·sarangan so·otako man·aha. Kam
wata man·gipa an·tangni officerni dringona napange uko slaichi
goe so·otaha. Ma·gipa saksa an·tangni bi·sa sakgniko gario
asongate chibolona rongrongataha.

A·song damgnio, dakgrikachi bang·a hajalrang siaha. Ritcha

bilsirangni gisepo, dolgni ba bang·a dolrangchi todonggrikanirang
ong·aha. Manderang, me·chikmarang, bi·sarang aro bakgitchak
awarangba so·otako man·aha, doka satako man·aha aro mitam
me·chikrangde drae kal·ako man·aha.

Ka·namgija kamrangna uamangni kosako sastirangni gimin aganon, saobade manggittang so·otaniko
namniktokaha. Dolgipinranga, indakgipa sastide kraja, songsarekni bewalsa ine aganaha. Aro ia denggu
manderangnara naljokani chol dongjahama ine sing·aha.

Namgijagipa manderangna kragipa raia maia namgen? Bijolini chokkima? Saobarangde, sam bisiko biji
su·e siaton uamangna saknaaniko man·jawa ine aganaha. Gipinrang aganaha, pasi on·on uamang
dikdiksani somoion sigen.

Indiba uamangni sastina agangrikanio, darangba dongkuengipa so·otani cholkode agankujachim.

Ka·sachaka gri so·otrakgipa manderangko satengtobatgipa cholchi sastiko on·esa uamangko so·otaan
krabataigen ine agangipa darangba dongkujachim. Darangba ua so·otrakgipa manderangko ka·sine
wa·alchi so·retrete siataan uamangna kraa ine agankujachim.

Bang·a kakketgipa Kristianrangan salgini Isolde uana badepilen sasti on·gen ine chanchiachim. Uamang
indake agangenchim, uamangni paprangna krae, satengtobeachi sasti on·na nanga. Isolni ka·o nangani
sastide pangnajolna kamretretatde uamangko sasti on·gen ine mitam Kristianrang aganachim.

Papirangna maidake ong·chongmotgen? Ka·sagipa Isol aro Uni bichal maidake papirangni kosako
ong·gen? Sastro maidake aganchaka hai niatna.

1. JISUNI BON·KAMGIPA KA·BEANI

Hajaldok bilsirangna a·gilsakni manderang baksa mol·molchaengachim:

"Angni tanga gita, Tangbanggipa Gitel agana, Anga saksa denggu mandeni sianinaba kusi ong·ja,
indiba uamangni an·pile janggi tangaosa" - (Eze. 33:11) NIV.

Chisolan ga·akgimin mandeko jokatna Isol baditana gisiko nangnike dongachim

mesoka. Jensalo Jisu chrikwate, "Apa, uamangko kema watbo, maina uamang
maiko dakenga ma·sija." Ua An·tangkon on·kangaha( Luk 23:34). Kattako
chrikwatani ja·mantapan, Ua janggi galaha, saobarangde, Ua ka·beani giminsa
siaha ine bebera·a (Johan 19:30, 34). Rongtala ka·saachi bil gnangbee
parape·genchimoba bang·a manderangan Jisuona an·pilbakuja. Pap a·gilsakko
sason ka·kuenga dipetde, duknirang bariroroangkugen. Uni gimin pap nisiatako
man·na nanga. Isol maikai papko nisiatna miksongani donga?
"Gitelni sal sokbahaon ………. Salgi il·ilari bon·anggen aro dakgiminrang kame jronggen aro a·a
aro uano donggipa kamrangko kamgen" - (2 Pitor 3:10).

Papko ma·kimae, Isol a·gilsakko chu·gimik rongtalatna nanga. Jerangan papo dongkamachim. Satan aro
uni sa·grerangna tarisogimin wa·alchi nisiatako man·gen. Jokataniko ra·chakgijagiparangko wa·alchi
nisiatako nikon mairongpile Jisu ka·begenchim.

2. NOROKA BANO ARO BASAKO KAMGEN?

Mitam manderangni chanchichipsoani gita, Isol kamenggipa NOROK - ko

biap gipino da·o donsojaenga. Norok, ian jensalo a·gilsakko wa·alchi
rongtalatani somoio ong·gen. 1000 bilsini bon·aosa Isol denggu
manderangko nisiatna senge dongenga. (Para. 20:9-15).

"Dukrangoniko Gitel rongtalgiparangko ripinga aro papirangko

bichalni salona rakia" - (2 Pitor 2:9).

Ua an·chingni a·gilsakko rongtalatgipa wa·alchi rongtalata.

Rongtalatani wa·alchi Ua a·gilsakkoba rongtalata. "Ia salgi aro a·gilsakko

wa·alna rakiaha aro rongtalgijagiparangko bichal aro gimaaniona
rakienga" - (2 Pitor 3:7).

Isol mamung dakeba, darangkoba norokni wa·alo galna miksongsoa dongja. Indiba jensalo manderang
Satanoni ma·ekna jechake paptango rim·kingkote donggiparang, uamangni seoke ra·ani biteko bon·kame
man·gen.

Unon Ua Uni jakasio donggiparangna ingen, "Na·simang saoko man·giminrang, Satan aro uni
sa·grerangna donsogimin jringjrotni wa·alona angoni re·angbo" - (Mat. 25:41).

Jisuni aganani kride, norokni wa·al basako kamgen?

Uni gimin maikai maranko chimonge wa·alo so·a, uandake a·gilsak bon·kamao ong·gen. Mandeni
Depante An·tangni sa·grerangko watatgen, aro uamang uni songnokniko pilak ja·gitotanirangko
aro namgija dakgiparangko chimonge wa·alni chankolo (noroko) uamangko galgen; unon grapa
aro wagam chikmijilani ong·gen" - (Mat. 13:40-42).

Tol·pinapanirang, denggugiparang, a·gilsak bon·aosa kamako man·gen.

Salgini Isolan kakket aro bebe ong·a ine a·gilsak gimikan nikmanahaosa ua
indakgipa raiko on·gen. Dilani 22 - o talatani gita, Kristo aro Satan baksa
dakgrikanio Satanara, papni (rama) bewalan nambatgipa ong·a ine mesokna
jotton ka·enga, aro Jisuara bamanian an·saobatgipa janggi tanganina Isolsa
ong·a ine dakmesokenga. Ia dakmesokanide 1000 bilsini bon·ao Satan, uni
sa·grerangni kosako bichal ka·manosa bon·chongdikgen. Sakprakni gimin
serikani ki·tapko oe parakani ja·manosa, Isol Satanko, siako aro gopram
(norok) ko aro jerangni bimungkon janggi ki·tapo sea dongjachim, wa·alo
galako man·gen (Para. 20:14-15). Minggipin podo janapa gita, Isol a·gilsakni
papko wa·alchi rongtalatmanosa, Ua gital salgi aro gital a·gilsakko·
ong·attaigen.

3. NOROK BADITANA RUUTE KAMGEN?

Bang·bea manderangan norokde jringjrotoni jringjrotona kame, chotchanggija sastiko on·gen ine
bebera·a. An·ching hai simsakbee, pap aro papirangko Isol maidake dakgen ine Sastroo talata nie nina.

"Maina Isolko u·igijagiparang aro an·chingni Gitel Jisuni Nama Kattako manigijagiparangna
jakbikpilaniko on·e wal·sareni wa·alo ………………… Uamang Gitelni mikkangoni aro Uni bilni
rasongoni sastiko, chong·motan jringjrotna gimaako man·gen" (2 Thess. 1:6-9).

Iakon gisik ra·bo, "Jringjrotna gimaatani" ingipade mamung saloba, "Jringjrotna sasti" inede ong·ja. Ia
miksonganide jringjrotna gimaatako man·aha. Bichalni sal aro papirangni gimaani gimin Pitor, (2 Pitor 3:7)
o talata.

Mati 10:28 o, Jisu indake agana, "Indiba be·enkomung janggiko noroko nisiatna amgipana kenbo." A·brio
skiprakao, "Apchongipa rama janggiona dila" aro apalgipa rama gimaaniona dila" ine skia (Mati 7:13, 14).
Johan 3:16 o, Jisu indake talata je, "Isol An·tangni saksakamkam Depantekon on·jok, je dakode Uo
bebera·gipa, gimagija jringjrotni janggiko man·gen." Jringjrotna tangani, ba gimaani giminsa Jisu agana,
jringjrotna kamani giminde aganja. Uni gimin, ·Norok· bon·chongdikani donga, uan denggurangni sie
gimaaniko agana.

Sastro gimiko janapaan, denggurangni giminsa aganaia. "Denggurang bon·atako man·gen" (Git 37:28),
"Uamang gimagen" (2 Pitor 2:12), "Wal·ku gita uamang bon·anggen" (Git 37:20), "Wa·al uamangko
tappra changatgen" (Malaki 4:1-3), "Papni dormaha sia ong·a," noroko jringjrotna tanggniko aganja;
indiba, "Isolni on·a jringjrotni janggi ong·a" (Rom 6:23). Norokni wa·alchi bon·kame gimaataniara
paparigipa a·gilsakko, gital ong·attaiani ja·mano jringjrotna pap gri ong·na chu·gimik nisiatgen. An·tangko
chisolo datkapgiparangko kema watna amgipa Kristoa papirangko jringjrotna noroko kamretretako nikna
namen chaktogijani ong·genchim.

Norok jringjrotna ong·a. 1000 bilsirangni matchotao, Satan aro uni

sa·grerangko aro denggu manderangko salgioni wa·alni gondrokchi
chu·gimik nisiatgen. "Salgioni wa·al ga·akonbae uamangko minoka" (Para.
20:9).

Ia wa·alkon Jisu "kimitna amgijagipa" ine minga (Mati 3:12). Mamung

cholchiba ia wa·alko kimitna amjawa, ua kamchone an·tangan bon·jaskal.

Ia rongtalgipa wa·alni ja·mano Isol gital a·gilsakko ong·atgen, aro

duknirang dongjawaha ine Isolni ku·rachaka donga, "Uano darangni grap-
mikoani ku·rangkoba knajawaha" (Isa. 65:16-19).

Uan mairongpilgipa ong·gen! Pilak ka·beanirangan dongjawajok. Pilakni

ka·tongrangonikon papni dakrangko Isol kimitsranggen, aro chu·gimik kusinian gapaiginok.

4. SASTROO PANGNAJOLNA INGIPA

(Mati 25:41) o Jisu, Satan aro uni sa·grerangna tarigimin "jringjrotni wa·al" ine janapa. Noroka jringjrotna
ine ong·ama (Juda 7). Juda, jringjrotni wa·al maidake ong·genchim, Sodom aro Gomorrahna ong·a
bewalko mesoke agana. Ua Sodom aro Gomorrah songjinmarangko da·alo kamjajok. Indiba wa·al
jringjrotni kamkon ka·jok, maina Sodom aro Gomorroah jringjrotna gimaatako man·jok.

(2 Pitor 2:6) oba Pitor jringjrotni wa·alni gimin janapa. Pitorba Sodom aro Gomorrahko tappra change
kamate, otoromirangko wa·alchi nisigen ine mesokani ong·china so·aha inesa rongtalbee janapa.
Da·alona kingking Sodom aro Gomorroahni otoromirang wa·alni kamana satengtoengako man·jajok.
Uamang tappra change kame bon·angaha. Beben, uamangko kamgipa wa·alko jringjrotna
kamchonataha. Jringjrotna ingipa kattade, jringjrotna sasti on·chaaniko miksongja, jringjrotna
gimaanikosa.

Parape·ani ki·tapo indakgipa kattachi jakale mesokahani gimin,

mitam manderang ma·sisretaha. Mesokna gita, gimagiminrangni
gimin (Para. 14:11) o agana, "Uamangko kamani wal·ku
chotchanggija chadoaha. Jringjrotna sastini gimin aganenga gita
nikbebea. Indiba Sastroni kattako Sastroan pe·china.

(Re·ongkata 21:6) o aganani gita, nokol me·chik ba me·asani

nachilko jringjrotna chin ong·china kolpuchina agana. Jringjrotna
ingipa kattade, nokkol me·chik ba me·asani sikkujana kingking. Jonah, na·tokni okningo sal gittam wal
gittam ong·a ine (Mati 12:40) ine janapa, aro Jonah jringjrotna ine aganskaa (Jonah 2:6). Beben,
rimilbegipa na·tokni okningo sal gittam wal gittamna ong·ania jringjrotna ong·aha gitan
ong·nikbebeenggen.

Sastroo jakalgipa kattaranga mai miksongani bewalo ba poedoni bewaloma uarangko ma·sina simsakbee
niatna nanga. Chankolni wal·ku jringjrotna chadoangania jringjrotna kamchonaniko mesokna jakalgimin
kattasan ong·a. (Para. 21:8) o aganani gita, wa·alni gondrokchi kamane, gnigipa sianiko ong·atgen. Norok
pangkamgipa ong·ja. Papirang kamchonako man·gen; uamang chu·gimik gimaatako man·gen.

5. MAINI GIMIN NOROK DONGNA NANGA?

Isol a·gilsakko chu·sokbeen a·bachengon ong·atahachim. Indiba pap,

gimaani aro sia-bon·aniko a·gilsakona ra·baaha. Nang·ni nokona cha·urang
nape nokko pe·giminko nikeon na·a uandaken dongkamaigenma? Ong·ja.
na·a jabolrangko itroke-saroke gale rongtalatgen. Isolba indaken dakgen.
Ua papchi ong·siatgimin a·gilsakko rongtalate jringjrotna dona gita, gital
ong·attaina Isolni miksongani ong·a.

Indiba Isolni nengnikani mingsa donga, pap a·gilsakkosan ong·siataijaha,

manderangkoba pap ong·siataha. Pap an·chingni Isol baksa nangrimaniko
aro mandeska baksa nangrimanikoba ekataha. Mandeni jatrang, rokomanti
duknirangko, tom·tomgijanirangko aro mitchigni kamrangko dakangkuenga.
Papko Isol changsaode gimaatna nangchongmotgen, maina pap
manderangko gimaatenga. Isolni neng·nikanide maikai papni bisringko a·gilsakoniko bon·atgen aro mai
cholchi papo ga·akgimin manderangko jokatgen? Uni mingsa cholde, papni bisiko An·tangan chile,
chisolo papni biatiko gimaatanian ong·a. Ia cholni gimin:
An·ching, an·chingni paprangko ku·rachakgenchimode, ua an·chingni paprangko kema watgen
aro an·chingni pilak rongtalgijanirangko rongtalatgen" (1 Johan 1:9).

Paponi jakgitel ong·anina Isol pilaknan chol on·enga. Indiba, dukni katta ian, mitamrangde papni sabision
dongangkuna namnikkuenga. Aro Isol darangkoba jringjrotni janggiko man·na basechina drajawa.
Jemangan Uni naljokani cholko jegalachim uamang papchi cha·minokako man·gen. Norokko donsoanide
ian:
"Nibo anga okamahachim, indiba na·a knachakjaha, anga aganachim, indiba na·a nachil songja.
Angni nikanio na·a namgijako dakaha aro angni namnikgijako dakna na·a baseaha" (Isa. 65:12).

An·tangtangni namnikako dakanichi papirang Jisuoni ekatako man·gen aro jringjrotna siana agre
mamung chol dongjaha ine uamang ma·sigen.

6. GIMAANIA MAIA?
 Norokni wa·alchi chotchanggija sastini gimin Sastroo
aganjagenchimoba, gimaania namen kenbegnigipa chagrongani
ong·gen ine nikatna man·a. Kakketgijagiparang jringjrotni janggiko
gimaatgen. Chasongni chasongna Isol baksa dongrime an·saoaniko
jaktuataha ine ma·sion uamangna kenjagokani gapgen. A·gilsakni
papni a·sel chisolo Kristo dingdeako man·miting somoio Ua Paani
mikkangoni dingtangatako man·e, jringjrotna gimaania maikai ong·gen
cha·tote nikmanaha. Papirang jringjrotna gimaaniko nikatsoahaon,
andalmitmat ong·anikosan nikataiaha. Gnigipa chakatpilanina
ka·dongsoani gri uamang sina nanggen. Aro uamang Kristoni
ka·saaniko changni chang ra·chakgija jegalaniko gisik ra·ataha. Aro
bon·kame Isolni bichal aro Uni ka·saanian bebe aro kakket ong·achim ine uamang tubame ku·chake
parakgen (Philip 2:10, 11).

Sastro segiparang an·chingna basee ra·anini gimin aro Kristoni kange ra·anini gimin agana.

"Isolni ka·sachakaniko indinari ra·chaknabe ine chinga na·simangko mol·mola. Maina ua agana,
Ra·chakani salo anga nang·ko knaaha aro jokatani salo nang·ko dakchakaha; nibo, da·o
ra·chakani sal; nibo, da·o jokatani sal" (2 Kor. 6:1, 2).

Angni chanchiani gitade, Jisuni dam gri jokatna on·chakaniko jegale, gimaani ramako basee ra·anian
dal·batgipa duk ong·aiginok. An·chingko jringjrotna gimaani, ba jringjrotna Kristo baksa ong·aoni, aro
Isolni mikkangoni ekanian ong·a. Na·a maiko basee ra·a? Maina Kristo baksa re·ruraaniko da·alon am·e
nija?
 Saoba Sijokon Una Mai Ong·a?
Siara mai chong·mot ine bi·sani sing·on an·ching aganchakna jajaa. Nokdangoni saoba siani gimin
agannade kusi ong·ja. Siara pilakchin pilaknan ramramgipa manderangni bobil ong·a. Siani gimin
sing·anina mai aganchaknirang donga? Siani ja·mano janggi dongrikkuama? Ka·sara sigiminrangko
an·ching niktaikugenma?

1. SIANINA KENGIJANI

An·ching pilaknan ka·sara ba ripengrang wate re·angon an·chingni oko

konggrang ong·e sikdik ong·aniko janggi watangon ong·rikronga.

Ia nangchongmotgipa, gisik ka·tongko rim·gipa, siani gimin, baoniko

maidake siani ja·mano ong·chongmota talna man·gen? Rasong
gnangbee, Kristoni a·gilsako ong·mitingo sianina kenbeanichi
rim·grepako man·giparangna jakgitelaniko on·aha (Ibri 2:15). Sastroo,
Jisu ka·dimeani kattarangko mesokaha aro rongtalbee an·chingni
kenchakanirangna aganchakaha.

2. ISOL AN·CHINGKO MAIKAI DAKAHA?

Sastrooniko chong·mot siani gimin ma·sie ra·na, hai a·bachengo Isol

maikai ong·ataha nichengna.

Gitel Isol mandeko Adam, Ibri ku·siko) a·ani (adamah, Ibri ku·siko) a·dimuoniko ra·e dakaha, aro
(mandeni) gingkolo baljanggiko rang·sitdapataha aro mande TANGGIPA (janggi, Ibri ku·siko)
ong·aha" - (A·ba. 2:7).

Ong·atchengon Isol Adamko a·ani a·dimuoniko dakaha. Ua chanchina changgipa

ong·na gita taning donga; an·chi jokna gita ja·dilrang dongaha. Unikode, Isol
"baljanggiko" rang·sitdapataha aro Adam tanggipa (Ibrirang - janggi gnanggipa)
ong·aha. Simsakbee chanchie nibo, Sastroo Adam janggiko man·aha ine ong·ja,
indiba tanggipa ba janggi gnanggipa ong·aha. Isolni rang·sitdapaton, mande
il·engani ba janggi tanganiko Isoloniko man·soaha. Be·en aro baljanggiko dondime
adam ·tanggipa· ba ·janggi gnanggipa· ong·aha. Uni gimin mandeko dakanini gimin
indake see mesokna man·gen:

"A·ani a·dimu" + "Baljanggi = Janggi gnanggipa: Tanggipa.

Manggisi be·en + Isoloni baljanggi = Tanggipa ong·a.

An·ching sakprakan be·en aro chanchiani gisik donga. Rang·sitenga dipetde

an·ching tangenggipa ong·a.

3. SIJOKON MANDENA MAI ONG·A?

Sijokon mande maikai a·aniko dakchengo janggi gri, apsan bewalon ong·a: (A·ba. 2:7).

"Aro a·dimu skang gitan a·aona pil·angkujana. Aro janggi (baljanggi) an·tangko on·gipa Isolona
pil·angkujana kingking gisik ra·bo" - (Aganprakgipa 12:7).
Sastroo "rang·sita" aro "janggi" ia katta minggniko Ibri ku·siko apsan jakkalaia. Jensalo mande siahaon,
be·en "a·mang" ong·piltaia, aro janggi (baljanggi jekon Isol mandeni gingkolo rang·sitdapatachim)
Isolonan, (baljanggini nokgipa) re·angpila.

"Gitel Jihova indine agana, Angni tanga gita, ……. Nibo, pilak janggirangan angnin, ……….. Pap
ka·gipa mande sigen" - (Eze. 18:3, 4).

Janggi sia! Pangkamgipa ong·ja, gimagipasan ong·aia.

Uni gimin A·ba. 2:7 o janapgipa arithmatic gita, jensalo Isol mandeko a·oniko dakachim, unonan
ong·angpilaia.

"A·ani a·dimu" - "Baljanggi" = Sigimin mande (manggisi).

"Il·enggijagipa Bimang" - "Isolni Ku·biba" = "Manggisi."

Siara janggi griani ong·a. Bimang sojrongon a·mang pil·a. Isolni ku·biba (janggi) Isolonan sokangpila.
An·chinga il·enggipa janggi gnanggipa ong·a, indiba sijokon, il·engna amgijagipa bimang, manggisi ong·a.
Uni gimin sijokon mamung ma·siani dongjaha. Jensalo Isol on·gimin baljanggiko ra·pilahaon, mande sia.
Indiba ia poraianio janapani gitade, Kristoo an·chingna ka·dongani gnang.

4. SIGIMIN MANDE BADITANA MA·SIA

Mande sijokon, taningba sojronga; ua (taning) mamung ma·siani aro gisik ra·ani dongjajok. Siao pilak
mandeni bewalrangba bon·a.

"Aroba uamangni mitchia, aro mikbua aro uamangni ka·saaba gimasomanaha" - (Aganprakgipa
9:6).

Siao ma·siani dongja, uni gimin mai ong·engachim uamang ma·sija. Tangenggipa baksa mamung mingsa
cholchiba ma·si - meligrikani dongja.

"Maina uamang sigen ine tangenggiparang u·ia; indiba sigiminrang mamungkoba u·ija" -
(Aganprakgipa 9:5).

Siade jumang gri tusia gitasan ong·aia - Sastroode, siakoa "tusia"

inesa chang 54 na janapani gnang. Jisude siako tusia inesa
aganaia. Ua sninggiparangna indine agana:

"An·chingni ripeng Lazarus tusidapaha, indiba Anga uko

de·mesana re·enga. Uni sninggiparang aganchake inaha,
"Gitel ua tusiode, una nambatgen." Jisuara uni (Lazarusni)
siani giminsa aganengachim, indiba sninggiparang
tusibebeakosa chanchiatskaaha. Uni gimin Ua aganchake
inaha, "Lazarus siaha" - (Johan 11:11-14).

Lazarusara Jisuni re·angna skangan salbrina sisoman·aha. Indiba Jisu uni gopramona sokeon,
tusienggipa ripengko de·mesaenga gitasa, sigimin mandeko tangchaatna Isolna mamung neng·nikani gri
ine mesokaha.

Ian dal·begipa ka·dimeani katta an·chingna u·ina nangani, an·chingni ka·sarang Kristoo tom·tome
neng·takenga. An·chingba salsaode, siani nokkimao tom·tome tusigen.

5. SIAO TUSIGIPA MANDEKO ISOL GUALAMA?

Siao tusigipa golpode bon·kuja. Gopramo, Jisu Lazarusni abigipa Marthana aganaha,
"Angan chakatpila aro janggi, ua sigenchimoba, Ango bebera·genchimode ua tanggen" - (Johan
11:25).

Kristoo sigiparang gopramo tusia - indiba mikkangchi dal·a ka·dongani dongengpiti. An·chingni skoni
kniko channa amgipa an·chingko gualjawa. An·ching sie a·dimu pil·naba donga, indiba Ua sakprakni
bimangkon An·tangni gisiko rongtalen rakiaha. Jensalo Jisu re·bapilon, Ua Lazarusko gopramoniko
de·mesae okama gita, toromi sigiminrangko chakatatpilgen.

"Tusigiparangni gimin na·simang u·igija dongchina chinga sikja,

jongadarang; na·simang maikai ka·donga grigipa gipinrang gita duk
man·jawa. Maina Gitel An·tangan, inchroa aro pamong sa·greni ku·rang, aro
Isolni singga gnang, salgioni ong·onbagen; unon Kristoo sigiparang skang
chakatgen. Unikoa an·ching tangenggiparang, dongpitigiparang,
bangbango Gitelko grongna aramrango uamang baksa damsan rimdoako
man·gen, aro uandake an·ching pangnan Gitel baksa ong·gen. Uni gimin ia
kattarangchi saksa sakgipinko ka·dimeatgrikbo" - (1 Thess. 4:13, 16-18).

Chakatpilani salo, sigiminrang dikdiksa neng·takani gitasan nikaigen. Sigiminrang

somoini re·angani giminde ma·siani dongja. Jemangan Kristoko jokatgipa ine
ra·chakachim, Uni aiao inmanpilgipa ku·rangna a·ani gopramo tusienggiparang
chakatgen.

Chakatpilanina ka·donganio man·gni gnang. Salgini nokna ka·dongani jeon Isol

An·tangan donga, aro pilak mikrononi mikchirangko u·sitgen. Uano siani ba kalimani, ba grapani, ba
saknaani griwaha" (Para. 21:4). Isolna ka·sagiparangde sianina kenna nangja. Isol baksa jringjrotna
tangrimanian jokgiminrangna ong·a. Jisuan siani chabi gnanggipa ong·a (Para. 1:18). Kristo gride, sianina
agre mamung gipin chol dongja, indiba Kristo baksa mikkangchi janggi tangangkuna ka·dongani
dongengpiti.

6. DA·O AN·CHINGNA TANGBANGGIPA ONG·AMA?

Adam aro Hobako ong·aton, tangbanggipa ong·china dakako

man·ja. Isolna bamao uamang janggi tanggenchimode
sijawachim. Uamang pap ka·ahaon, janggi tangangkugniko
ra·chakjaha. Gitokreng rakanichi uamang siaonasa re·angaha.
Uamangni papni a·sel pilak mandeni jatrangan papni sabisiko
man·riktokaha, aro pilakan pap ka·ahani gimin siaonasa
ong·tokaiaha (Rom 5:12). Sastroo darangoba siani ja·mano
janggide tangkuenga ingipa kattaan dongja.

Siani ja·mano, janggi tangkamgipa ong·skaa ine Sastroo janapanian dongja. Ibri aro Greek ku·siko janggi
(soul), janggi (spirit) aro balwa ba rang·sita ine jakala kattarang chang 1700 Sastroo janapa.
Changsamangba mandeni janggi ba gisik ba rang·sita tangbanggipa ong·a ine mesoka dongja.

"Isolsan mangmang jringjrotoni jringjrotona tangkamgipa ong·aia. "Uosan sigijani gnang" - (1

Tim. 6;15, 16).

Sastroo rongtalen mandeo sigijani dongja ine agana. Indiba jensalo Jisu gnigipa changna re·baon,
an·chingni bewal dingtangataniko man·gen.

"Nibo, anga na·simangna ning·tuako agana, an·ching pilakan tusijawa, indiba dikdiksano,
mikjapsano, chon·kamani singga sikao, an·ching pilakan dingtang dakako man·gen, maina singga
sikgen aro sigiminrang gimagijani ong·e chakatatako man·gen, aro an·ching dingtang dakako
man·gen" - (1 Kor. 15:51-53).

An·chinga mandesan, gimagijaniko man·giparang ong·ja. Indiba Kristianrangna ia ka·dongani gnang,

Jisuni gnigipa changna re·bao gimagijaniko an·chingba man·pagen. Ia ku·rachakaniko kakket ine ma·sina
man·anide, Kristoni chakatpilachisa ma·sina amaia.

"Indiba da·o an·chingko Jokatgipa Kristo Jisuni mikkang pa·achi parape·ako man·aha; uan siako
gimaataha aro nama kattachi janggi aro gimagijako niksengataha" - (2 Tim. 1:10).

Isolni mandena donsogiminde rongtalbea: Kristoko jegale paptango rim·kingkinggiparangna jringjrotna

siani, aro Jisuko paltangni Gitel aro Jokatgipa ine ra·chakgiparangna sigijaniko on·gen.

7. SIAKO CHAGRONGANI

Ka·sara ripeng ba mandetangni signina bilongen dukko man·a. Gimaani

aro sikdikdik ong·anirangkode gualna man·a. Mandetangrangni
gimaanina duko ka·dimeatanikode Kristosa on·na ama. Iakon gisik ra·bo,
mandetang sianggiminrang tusiasa, Kristoo neng·takenggiparang Jisuni
gnigipa re·bapilan salo chakatatako man·gen.

Isol nambegipa gronggrikani salko donsamsoenga. Bi·sarangko ma·a

paarang man·piltaigen. Jik aro segiparang gipalgrikgen. Dingtang ong·ani
dongtaijawaha. Cheachi sianiko gimaatginok (1 Kor. 15:54).

Mitamrangde sigimin mandetangrangna ka·oksie uamang baksa

agangrikna me·mang muni pigiparangchi re·e golpo ka·grikanirangko
dakronga. Indiba an·chingko indakgipa bewalrangchi ka·beaniko namatna dakaniko Sastroo beng·a.

"Aro do·o chongipa gita mikogipa aro aganmitugipa me·mang muni pigiparangko aro montol
dakgiparangko am·bo ine uamang na·simangna aganoa (indine aganchakbo), Manderang
an·tangmangni Isolko am·na nangjama? Janggi tangenggiparangna sigiminrangko (am·na
nangama)" - (Isaia 8:19).

Maini gimin? Sastroo rongtalbeen sigiminrango ma·siani, ba u·iani dongja ine parakaha. Indakgipa dukna
ka·dimeaniko on·nade Jisuna agrede darang gipin gri. Dukni somoi salrango Kristo baksa somoiko
re·ataan nambatgipa ong·aia. Iakosan pangnan gisik ra·bo, Kristoni gnigipa re·bapilani salosan
mangmang, sigiminrangni chakatahaosan agangrikna ba gronggrikna man·gen.

8. SIANIKO KENMANGIJA MIKKANGCHAKANI

Sia an·chingoniko pilakkon ra·sekaha. Indiba an·chingoniko Kristoko ra·angna man·ja, aro Kristoan
pilakkon namatpiltaigen. Sia ia a·gilsakko sason ka·na man·chajawa. Gnigipa sianio, Satan, denggurang,
siani aro norok wa·alni chankolo bon·atako man·gen (Para. 20:14).

Iano sianiko kenmangija mikkangchakna on·gimin kattarang gnang:

(1) Kristoo panchaka gnang ka·donge janggi tangbo, unon na·a sianina je somoioba kenjawa.
(2) Gisik Rongtalgipani on·gimin bilchi, Kristoni niamrangna bambo, unon na·a jringjrotna janggi tanganio
napena tarigipa ong·gen.
(3) Siani gimin dikdiksana tusia gitasan ra·aibo. Jisuni ku·rangna Uni gnigipa re·bapilanio chakataigen.
(4) Jisu baksa salgio jringjrotna dongkamgnini gimin agangimin kattarangko chanchijringbo.
Sastroo siana kenaoniko jakgitelata, maina Jisuko sia chena amjaha. Jensalo Jisu an·chingni janggi
tanganio ong·ahaon, Ua an·chingna tom·tom ong·aniko on·na:
"Tom·tom donganiko anga na·simangna donanga, angni tom·tom donganiko anga na·simangna
on·na ……. Na·simangni ka·tong jajrengjachina aro kenjachina" - (Johan 14:27).

Jisuba an·chingna, nokdangni mande sian - bon·an salo ka·dimeatani kattachi sokna gita on·aha. Jisu
an·tangan siani salakimo tangangaha; Uan an·chingni ma·sisokgijanirangko u·ia.

"Uni gimin dedrang an·chi aro be·enko bak man·paani gimin, ua an·tangko ugitan apsanoniko bak
man·paachim; maikai ua siachi siani bil gnanggipako, chong·motan, Diabolko gimaatna amgen;
aro janggi tanga dipet siani kenanio nokol ita man·giparangko jokatna amgen" - (Ibri 2:14, 15).

Dr. James Simpson, sibokatani samko (anaesthesia) dakchenggipa,

demechik dejakra sion namen gimanikbeaha. Ua gipin ma·a paa gitaan
namen dukko man·beaha. Indiba ua maiba ka·dongani cholko nikaha.
Ka·sabegipa demechikni gopramo, Jisuni agangimin kattako "Jeba Ong·chong
Anga Tanga" ingipako see donaha.

Iakosan janapaia. An·chingni dukrang basakobade a·sak salgi gimikkon

chipchanga gita nikatman·pila; jeba ong·chong Jisu Tanggipa Ong·a!

Kristoo an·ching siani ja·manoba, ka·donganiko man·piti. Uan chakatpila aro

janggi ong·a (Johan 11:25) aro Uni ku·rachaka gnang, "Anga tanggipa ong·ani
gimin, na·simangba tanggen" (Johan 14:19). Kristoo mangmangsan sio an·chingni ka·dongani. Aro
jensalo Ua re·bapilon, pangnaba sigijaniko an·chingna on·gen. An·ching mamung dakeba siani jagringo
janggi tangtaijawaha, maina an·ching jringjrotni janggiko man·ginok. Na·aba ia dal·begipa ka·donganiko
nikmanahama, jedakode an·chingni dukni salrango ka·dimeaniko man·na gita? Jisuko na·a an·tangni
Jokatgipa ine ra·chakkujaode, da·alo na·a ra·chakjawama?
 Isolni Mondoliko Da·alo Anga Man·genma?
Chasonganti nanganinan Isol dingtangmancha kattarangko
ja·manchakgijaan on·a. Pap ka·ani ja·mano Adam aro Hobanaba on·aha.
A·gilsakko chichi dubiatna skangba on·aha, Assyria ba Babylonni
Israelrangko tomki on·ani somoioba Isolni katta uamangna gnangchim. Jisu
Uni chasongo dingtangmancha kattarangko ra·baaha, aro Isol an·chingni
chasongna dingtangmanchagipa kattarangko sokattaiaha. Parape·a odhai
12 aro odhai 14 rango Isolni dingtangmancha an·chingni chasongna
on·tegipa kattarang gnang. Ia poraianirango talbate an·ching poraie
nikanggen.

1. KRISTOCHI SONGGIMIN MONDOLI

Jisuni skiani aro Uni janggi tanganio bebera·anio ku·cholsan ong·aniko

ge·songangaha, aro watatarangni mondolio stitgrike melie donganiko Ua
songaha. Kristo baksa be·ensan gita melianiko watatarang dakangaha. Ia
nangrimaniko Paul bia ka·achi nangrimani baksa toata.

"Maina anga na·simangna mikbua, Isolni mikbuachi ong·a; maina rongtalgipa me·tra ine Kristona
on·na anga na·simangko segipa saksana ku·pakaha" - (2 Kor. 11:2).

Paulni katta gitade, Kristian mondolia rongtalgipa me·chik, Kristoni namchik ine Kristoni mondoliko
mesokna jakala.

Niam Gitchamoba, Isolni basegimin manderang Israelrangkoba me·chik gitaan toe agana. Isol Israelni
gimin indine agana; "namchik gitan na·a angna ka·saaha" (Jere. 2:2). "Angan nang·ni segipa" (Jere.
3:14).

Parape·ani ki·tapoba mondoliko me·chikko gita janapa:

"Aro dal·gipa chinko salgio nikaha; salko gangipa me·chik aro uni ja·arangni ka·mao jajong aro
uni skoo aski rongchigni mukut aro biolo gnangchim" - (Para. 12:1).

(1) Salko gangipa me·chik. Kristoni rasongko gane ching·atako man·gipa

mondoliko mesoka ine nikatna man·a. Jisuan a·gilsakni seng·a (Johan 8:12) aro
mondolini memborrangchi a·gilsakni seng·aniko on·skagiparang ong·a (Mat.
5:19).
(2) Jajongo ga·chakgipa me·chik. Niam Gitchamni somoio, hom-boli aro
on·anirango nama kattani teng·chakaniko mesoka. Me·chikni ja·kokkimao
jajongni ong·a gita dakjagringgiparangko Kristoni on·chakachi chong·motko
mesoka.
(3) Aski rongchignigipa mukut. Sninggipa sakchigni jemangni Kristoni gimin sakia
da·alona kingkingba dimelja. Johan parape·ani talatani gita, Kristoni
ge·songgimin Kristian mondolia Israelrang chasong Niam Gitchamo chu·sokea.
Sal, jajong aro askirang. Kristian mondolini Nama Kattako gipatani kamchi
mesoka.

2. SATANKO AMANI GOLPO

Me·chikni bimangchi dal·begipa golpoko ong·ata.

"Ua biolo gnangchim, aro an·pakna saknae chrikaha. Aro gipin chinko salgio nikaha, aro nibo, sko
dotsni aro grong gongchikkung gnanggipa dal·gipa drakon gitchakgipa; aro uni skorango ka·desil
ge·sni. Aro uni ki·me salgini askirangni bak gittamni baksako salanga, aro uarangko a·aona
galataha. Aro ua drakon an·paknasienggipa me·chikni mikkango chadengaha, maikai ua an·pakoa
ua uni deko minokna man·gen. Aro ua depanteko an·pakaha, ua me·a bi·sa, silni gol·dikchi pilak
jatko nirikgen. Aro uni deko Isolona aro uni singhasonona rimsekangaha" (Para. 12:2-5).

Ia golpoko dol gittam bakko ra·paa.

(1) Me·chik, uan Isolni mondoli ine knaman·aha.
(2) Me·chikni an·pakgipa me·a bi·sa, jekon Isolona aro uni singhasonona rimsekangako man·achim,
Kristo ong·a, ua changsao pilak jatrangni sason ka·gipa ong·gen.
(3) Drakon, Diabol ba Satan.
"Aro salgio dakgrikani ong·achim. Maikel aro Uni sa·grerang
ua drakon baksa dakgrikaha aro ua drakon aro uni
sa·grerang dakgrikchakaha, indiba amjaha: aro uamangni
biapko salgio man·jaha. Aro ia dal·gipa drakonko
chong·motan gitchamgipa chipu. Diabol aro Satan minggipa,
a·gilsak gimikko brangatgipako a·ona galataha, aro uni
sa·grerangkoba un baksa galonataha" (Parape·a 12:7-9).

Chinrangko ma·siahaon, miksongako talbate ma·sina man·a.

Jensalo Diabol aro uni sa·grerang biap dongjahaon, uamanga
a·ona galonatako man·aha. Jensalo Jisu a·gilsako mande ong·e
atchion, Diabol uko nisiatna jotton ka·beahachim. Ua amsokjaha,
aro Jisu Isolni singhasonona rimsekangako man·aha.

Unikode, Satan Kristoni ge·songgimin Kristian mondoliko kimite galna kamko ka·skaaha. Watata Johan
jean Parape·ani ki·tapko seachim, dal·begipa Satanni Kristo baksa ia a·gilsako dakgrikaniko on·tisa
janapaha. Ia dakgrikani bon·achibara Kristoko chisolo datkapani ja·mano Johan salgioni inwatgipa
ku·rangko knaaha,

"Aro anga salgio gam·bee indine ku·rangko knaaha, Da·on jokatani, aro bil, aro songnok chingni
Isolni aro Uni Kristoni nokgipa ong·ani ong·baaha. Maina an·chingni jong-adarangko
matnanggipako, chong·motan sal-wal an·chigni Isolni mikkango,
uamangko matnanggipako galataha" - (Parape·a 12:10), (Johan 12:31
aro Luk 10:18) ko baksa tosusabo,
Chisolo Jisu Satanko amsrangaha. Unikode ua jokatani cholko oe, chalaki
Satanko warachakani bilkosa on·aha. Isolni songnokko kimkimate
Jokatgipana Dal·gipa Kamal aro Raja ong·na bilko on·aha. "Da·o jokatani
sokbaaha" ine itihasko ong·ataha. A·gilsakko Jokatgipa Kristo atchiaha.
Satanni rakbegipa majoanirangko chee, Jisu pap gri tange, sie aro
chakatpile sia aro papni kosako chegipa ong·aha. Satanko
chekamsrangaha. Chisolo Uni chu·gimik bilko parakaha (pod 5, 7-10).
Aganprakanide, "Da·on jokatani sokbaaha." Johannasan ong·aija, indiba
a·gilsak gimiknan.

"Uni gimin kusi ong·bo, salgirang aro na·simang uarango

donggiparang. A·ana aro sagalna duk; maina Diabol uni sal on·titisan
ine u·ie, ka·onangbee na·simangona ong·onangaha" - (Para. 12:12).

Pilak salgini kotokrangan Kristoni cheaniko mandera·aha. Kristo satanko ame Satanni nokgipa ong·aniko
jringjrotnan gimaatsrangaha.

3. KRISTIAN MONDOLIKO SATANNI BOBIL DINGANI

Jisuni salgichina doangna skang Ua Kristian mondoliko songangaha (jekon rongtalgipa me·chikchi chinko
on·achim). Uni chisolo sianichi Kristian mondolina Satanni kosako cheani bilko on·aha.

"Aro Mes Bi·sani an·chini gimin, aro uamangni saki on·ani kattani gimin uamang uko amaha; aro
uamang siaona kingking janggitangtangnaba ka·sajaha" - (Para. 12:11).

Kristo da·o Uni mondolina cheani bilko on·na amgipa ong·a. Jisu
chisolo Satanko chesranggipa ong·aha aro ua da·oba Uni mondoli
Satanko chegipa ong·engpiti. Bewal rokomgittam chegipa mondoliko
mesoka:
(1) "Mes Bi·sani an·chichi uamang uko cheaha." Jisua Isolni
singhasonona rimsekangako man·aha, jedakode Uni sninggiparang
Uni an·chichi cheaniko man·gen. Uni pakgimin an·chichi jokatna aro
an·chingni paprangko rongtalatna ama (1 Johan 1:7) aro salsalanti
an·chingna bilakgipa Kristian ong·na bilko on·a.
(2) Uamanga janggitangtangko on·kangnaba kenjaha. "Mes Bi·sani
an·chi" uamangko Kristoni gimin sinaba kenatjaha. Isol bangbee
dukko chakaha, uni gimin ia Kristian bebera·giparang sastina aro sianinaba jajrengjaha.
Bi·sarangmangba janggitangko on·kangna kenjaha. A·songni niamna
bate Kristona on·kangahani gimin ma·gipa saksako Romanrang
singhona alaha. Uni chongipa demechik kenjagokani pal Kristona
on·kangani gisik baridaoskaaha. Singhorang ma·gipako chikengon, ua
chadenge chrikaha, "Angaba Kristian ong·a." Roman Officialrang
ukoba rim·e okkrigipa singhorangona galonataha.
(3) "Uamang uko uamangni sakichi cheaha." Kattarang ong·ja, indiba
uamangni kattani saki - uamangni tangbewal, Uni Nama Katta aro
Jisuni bilna saki ong·e tangani. Andalbatsranggipa Kristian chasongni
somoio, Kristian pagitchamrang kakketona re·bapilna kamko ka·aha
aro Diabol ka·namgija kamko dakachim, indiba bilakgipa sakiko uamangni janggichi mesokaha.

Parape·a 12:11 o chegipa mondolio chegiparangni gimin mesoka. Watatarang, so·ota man·giparang,
kakketona re·dilgiparang aro gipin kakketgipa Kristianrang. Uamangni ka·saningbeani, kakket ong·ani,
ka·dongani aro cheani chasongni chasongna a·gilsakko dingtangata.
Jisuko Satan a·gilsako gimaatna amjahani gimin, da·o ua mondoliko gimaatna cholrangko sandiskaenga.

"Aro drakon an·tangko a·aona galatako nikoa, ua me·asako an·pakgipa me·chikko; aro ua
me·chikna do·reng dal·gipani gangpong ge·gniko on·aha. Maikai ua bakraona biaptangona
bilangna ama, uano ua, chipuni mikkangoni bilsisa, bilsigni aro adha bilsina alduako man·aha. Aro
ua chipu ua me·chikko ta·rakao balpakatna ine ja·man ja·man, chibima gita chiko ku·siktangoniko
galataha. Aro a·an ua me·chikko dakchakaha, aro a·a ku·siktangko oaha, aro ua drakonni
ku·sikrangoniko ong·atgipa chibimako minokaha" (Parape·a
12:13-16).

Agansogimin gitaan, Satan andalgipa chasongo, Kristian

mondoliko gimaatna bilakbee a·riksanalaha. Rokom rokom
cholrangchi Satan Kristian mondolio Kristoni bewalrangko
gimaatna kamrangko ka·beaha. Drakon Satanko mesoka. Indiba
iakon gisik ra·bo, Satan mandeni bil jakchi uni miksonga kamko
aro Isolni manderangko bobil dingaha. Atchia baktap, Satan
Herod, Roman rajani jakchi so·otna tikelaha. Toromni
dilgiparangni jakchi Kristoko sandirikite bobil dinge chisolo
datkapaha. Indiba Satanni amna miksongania dal·begipa
cheanikosa on·skaaha. An·tangko chisolo amsrangahani gimin, Satan Jisuni mondoliko bilonge ka·o
nangaha. Kristoni chisolo siani ja·mano hajalni hajal Kristian janggirang Romanrangni jakchi rokom rokom
bewalrangchi so·otako man·aha.
Indiba Watatarangni ja·mano, mondolina dingtang bewalrangko ra·gatbaanirangko dakaha. Gnigipa,
gittamgipa aro brigipa chasongrangode, Kristo aro Watatarangni skibagimin nama kattarangko srete
skibana a·bachengaha. Mitam torom dilgiparangde, kakket aro bebeo donggipa Kristianrangko a·rik-
sanalna a·bachengbaaha.

Hisape chane nigiparangni aganani gitade 500,000,000 sak kakketgipa Kristianrang janggitangtangko
on·kangaha. Mondoliko ma·kimaatna aro gimaatna Diabolni ong·atgipa a·rik-sanalani chibima mondoliko
gimaatna ong·achim. Indiba a·a, a·rik-sanalani aro srete skiani chibimako minoke me·a bi·sani ma·gipako
jokataha.

Dal·begipa a·rik-sanalani somoio, kakketgipa mondoli, kakketgijagipa mondolini dilgiparang baksa bakko
ra·pajaha aro a·gisirangchi katange ma·chakeaha jeon uamangko 1,260 salrangna alduamittangahachim
(Para. 12:6). Ia agansogimin katchinikani kattaranga 538 AD bilsioni 1798 AD bilsiona, dal·begipa toromni
dilgipa aro rajarangni jakchi tik somoi gita chu·sokangaha (bilsi ba salko hisapna Ezekiel 4:6 ko nibo).

Ia andalgipa chasongo, Sastroo kakket bebera·gipa Kristianrang. Italini Waldensian a·kaweo, Franceni
Salaram jolo aro British chichangni Celtic olakiram nokrango, jeo uamang katnapna man·a, uamang
katnape chakaha.

Da·alna Isolni mondoli Ritcha chi·sni sotskuchet A.D. bilsini kakket mondoli
dongengpiti. Da·alomangba Drakon Isolni manderangko ka·onangkuenga.
Dal·begipa sriksrik dakgrikani dongengpiti. Bebeko agangenchimode, Jisuni
re·bana skangmangmangba mondoliko Satan bobil dingkuenga.

"Aro ua Drakon me·chikko (Isolni mondoliko) ka·ongnangbeaha, aro

Isolni ge·etaniko rakigipa aro Jisuni saki gnanggipa, uni Dongpitigipa
Bitchrirang baksa dakgrikna re·angaha" (Para. 12:17).

Ia katchinike agansoania an·chingni chasongo ong·nasienggipaan ong·a.

Satan bilongbee ka·ongaha. Dongpitigipa me·chikni bitchri, Isolni manderang
baksa dakgrika. Uamangko ma·siani chinrangko niatbo:

(1) Jisuni sakio bebe aro kakket ong·e dongkamgiparang. Sastroni (Isolni) katta gita tiktak bringija, kakket
bebera·e dongenggiparang, uamanga nama Kristian janggi tanganichi Jisuna saki on·giparang.

(2) Ia Kristianranga, katchinikani gisik (u·iani gisik) gnangipa manderang. Jisu Kristoni gimin sakiko
man·soe Johan parape·ani ki·tapko sena gita amsoka (Para. 1:1-3).

Bangki mondolio bebera·e donggipana ia man·rikani gnang: basegimin a·gilsakni mandechi Isol
parape·aniko on·a. Katchinikaniko on·anichi bon·kaman salona Isolni parape·aniko agansoa.

(3) Ia Kristianrangkoa, Isolni ge·etanirangko rakigipa (manigipa) ine minga. Uamanga Niam
Mingchikkungko rakigipasan ong·aija, uamanga manigiparangba ong·a. Isolni kamrangna ka·saania,
uamangni ka·tongo ka·srokbee manina skani gisikkoba ong·ata (Rom 5:5; 13:8-10).

Ia Kristian dolara Kristoni bewalko aro skanggipa mondolini bewalko ja·rike, Isolni ge·etanirangko
(Niamko) manigiparang ong·a. Uamangni kakket ong·ania Drakon - Diabolko bilongen ka·chichaataha. Ua
dongpitigipa me·chikni bitchrirang baksa dakgrikaha, maina uamanga Isolna ka·saachi niamna bamani
gisikko ong·ata ine saki on·a. Jisuni aganani gita:
"Na·simang angna ka·sagenchimode, indide na·simang angni ge·etaniko manigen" - (Johan 14:15).

Skanggipa sason ka·giparangni jakchi a·rik sanalako man·aha. Bisnok mondoli Kristianranga Isolna
an·chingni pilak gisik ka·tong gimikchi ka·sana aro gipinrangnaba an·tangna gitan ka·sana amsoka ine
uamangni tangbewalchi mesoka. Jisuni katta gitade, Isolna ka·saao aro mandena ka·saao Isolni Niam
Mingchikkungni niamranga chu·gimik ong·a (Mati 22:35-40).

Niam Mingchikkungni brigipa ge·etanio, anitini snigipa (Sonibar) salko Neng·takani sal ine rakichina
agana. Kristona ka·saanian uamangni ka·tongo dongkamahani gimin bisnok mondolini Kristianranga
neng·takani salko rakigiparang ong·a.

Parape·ani ki·tapo, Neng·takani salan Isolni manderangna bon·kamgipa kattarang ong·a (Parape·a 12:17
aro 14:6, 12-15). Pilak salgini kattarangoba bisnok mondolini Kristian dolni gimin aganchipilani gnang.
Kristoan uamangni ripeng aro Gisik Rongtalgipani kamrang uamangko mangrakata. Ia ku·rachakani
kakketgipa ong·a. Uamang Jisuni saki aro Mes Bi·sani an·chichi Satanko chegen (Parape·a 12:11).

Na·aba bisnok mondolio, jemangan Isolni ge·etaniko mania aro Kristoni sakiko rakiachim, ua dolo
ong·pana skama? Na·aba da·alon chanchianiko dakjawama?
 Da·alo An·chingna Dingtangmancha
Isolni Katta Dongama?
Ramon Umashankar - a Brahmin ong·e atchiachim. Uni chonengmitingon na·ade miteni gun gnanggipa
ong·a, uni gimin nang·ni rongtalgipa ong·aniko ma·sie rongtalako dakna aro bi·jringna ranta ka·bo ine uni
skigiparang agane on·aha. Indiba chadambe salrangni somoio ong·e Ramon mite nokrango olakie angara
Isolko man·na amchongmotgenma ine chanchibewalachim.

Ramon Kristoni gimin Sastrooniko poraie nina a·bachengaha. Jisuni

namgipa sontol mande ong·anini gimin ua pangnan
mandera·achim, indiba da·ode ua Jisuan Isolni Depante
ong·chongmota ine knaaha. Aro bilsi bakrobee man·na amgijagipa
tom·tom ong·aniko bang·a Kristianrango donga ine ua nikaha.
Roman indimangba Hindu toromonikon kakketko am·na
mangsonga dongaha.

Indiba ua Kristoni janggi tangani gimin chanchianian gapaiaha. Skanggipa changna ua Jisukoba duk aro
kena sin·ani gisik mande gitan donga ine ma·siaha. Iana skangde, ua Jisuni chisolo datkapaniko man·on
Ua Isol ong·e saknaako chakchikna amsoka inesa chanchiaiachim. Indiba da·o ua chisolni gimin talate
on·na amsokja. Papi manderangna maikai indake dakna amsoka ine chanchibewalrongachim.

Kristoni sianini gimin Ramon chanchijringe, ka·saani bilko ua nikaha. Ua Brahmin ong·e dongani
gadangko watgale, Kristo Jokatgipana an·tangni janggiko on·kangna chanchiskaaha. Kristoni
on·kanggipa ka·saan baksa toate, Ramon indine aganaha, "Pilakan mamung gitaba ong·angja."

Ia chadambe Brahmin, Kristianni ga·brong bebeko nikaha. Jisu, a·gilsakna jokaniko on·gipa ine ma·siaha.

1. BADIA TOROMO JOKANI GNANG?

Jisuan rama - jokatani rama chong·mot

"Aro sakgipino pilakoba jokani gri: maina salgini ning·o manderango on·a gipin bimung gri, jechi
an·ching jokna nanga" - (Wat. 4:12).

An·chinga papchi gimaatako man·giminrang ong·a ine Sastroo rongtalbee mesoka, uandake pap sianiko
on·a (Rom 6:23). Pilakan pap ka·aha aro siao bon·anisan ong·aia. Papni biteoniko naljokna amgipade
Jisuna agre gipin dongja.

"Maina ang Pagipani namnika ian, Depanteko nie Uo bebera·gipa pilakan maikai jringjrotni
janggiko man·gen aro uko anga chon·kaman salo chakatatgen" (Johan 6:40).

Kakketgipa torom mingsasan (dolsasan):

"Gitel saksan, BEBERA·A MINGSAN, napola mingsan," ine (eph. 4:5 o janapa.

2. ISOLO DA·ALNI KRISTIANRANGNA DINGTANG-MANCHA

KATTA DONGAMA?

Oe, ia rokomgittam kattarangko Parape·a 14:6-16 o nikna

man·a. Iarangoni bon·kamgipa Kristoni gnigipa changna
re·bapilengani gimin aganchota.
(1) Skanggipa sa·greni katta:
"Aro anga salgini jatchio bilanggipa sakgipin sa·greko nikaha, ua a·ao donggiparangna, aro pilak
jat aro ma·chong aro ku·sik aro mandena aganprakna jringjrotni nama kattako man·e, gam·bee
indine aganaha, Isolna kenbo aro Una rasongko on·bo; maina Uni bichalni konta sokbaaha. Aro
salgiko aro a·ako aro sagalko aro chirangni chimikrangko dakgipako olakibo" - (Parape·a 14:6, 7).

Sastroo katta minggittamko sa·gre sakgittamni ra·baa gita agangenchimode, Isolni manderangni jakchisa
kattarangko gipatna chu·sokata. Uamang gipin gital kattarangko ra·baja, indiba "jringjrotni nama kattako"
a·gimikna, jat, ma·chong, ku·sik aro manderangna ra·baaha. Jisuni nama kattara, Niam Gitchamo
"bebera·achi" ra·chake jokaniko man·na amgipa apsan kattaan ong·a (Ibri 3:16-19; 4:2; 11:1-40) - ia
apsan skianikon Jisuba skia; ia apsan kattakon sninggiparangba a·gilsakna skia; ia apsan nama kattakon
Kristian chasong gimikon skibaaha.

Hajalsa bilsirangna batpilen Andalgipa chasongni salrango ia apsan nama kattaranga gimaanaspile
onatako man·aha, indiba Nampiltaianiko dakgiparang kakket aro bebeko tangchaattaiaha, aro Isolni
manderang a·gilsak gimiko da·alo aganprakenga. Skanggipa sa·gre ia apsan kattakon inwataha, aro uan
dingtang bewalosa ong·skaaha - Kristoni gnigipa re·bapilna skang dongenggipa a·gimikni manderangona
sokangani cholko on·aha.

Jemangan ia nama kattako ra·chakachim, "Isolna kenao Una rasongko on·china" okamako man·aha.
Uamang a·gilsakna Isolni ka·saani cholon-bewalko mesoka. Uamangni kattachisan ong·aija, indiba
uamangni janggi tangbewalchi saki on·aha. Kristoni gisikchi gapatako man·gipa manderangko Isol
jakkalna ama ine mairongpile parakaniko uamangchi parakaha.

Basako ia sa·gre sakgittamni kattarangkoa a·gimikona gipatani ong·a? Isolni

bichalni konta sokbaahaon ine janapa. Dilani 13 o an·chingna 1844 bilsi A.D.
oni bichalna sandiani kamko Jisu a·bachengaha ine talataniko man·beaha. Ua
apsan bilsion, 1844 bilsio, Jisu a·gilsakni manderangni gisikko ching·chaate
pilak a·gilsakni bokrangonan Parape·a odhai 14 o agangipa nama kattako
aganprakaha. Ia katta an·chingko "salgi aro a·ako dakgipa Isolko olakichina"
okamaniko janapa. Isol "Neng·takani salko gisik ra·na aro uko rongtale
rakichina" an·chingko agana, maina saldoko Isol a·gilsak aro salgirangko
ong·ataha" ine Re·ongkata 20:8-11 o janapa. 1844 A.D. bilsio Charles
Darwinni ong·telaigipa bewalosa pilakan ong·aha ine bilakbee saki on·ani
salrangon Isolba, Ong·atgipa Isolko olakichina manderangko okamaha. Aro ia
apsan somoion, sa·gre sakgittamni agana katta gitan snigipa salo
neng·takaniko salgi aro a·ako ong·atgipako mandera·e rakiaha.

(2) Gnigipa Sa·greni Katta:

"Aro gipin gnigipa sa·gre, ja·rike inaha, Ga·akaha, ga·akaha dal·gipa Babylon, pilak jatrangko
an·tangi til·ekani ka·o nangani draka bitchiko ringatgipa" -
(Parape·a 14:8).

Gnigipa sa·gre ia mikrakataniko on·aha, "Ga·akaha, Dal·gipa Babylon."

Parape·a odhai 17 o gisikni "Babylon" ko mesoka - uan kakket aro bebe
grigipa Kristian dol ong·a, aro uko bewal-cholono ong·sigipa "Me·chik"
baksa toa (Para. 17:5). Parape·a odhai 12 o janapgipa rongtalgipa
me·chik kakket aro bebegipa mondolini bobilchim. Babylonni bimungo
mesokgipa me·chikara ga·akgimin, jean "uni til·ekrakani draka bitchichi
pilak jat aro ma·chongrangko pekatachim." Srete skiani draka bitchia,
bringimin Kristianko ong·ata.

Babylonni bewalchi rokom rokom ra·gate skigipa Kristian mondoliko

mesoka. Ua mondolia namen kenbegni ong·a maina ua Isolni gimin
dingtang bewalo mesoka: Isolkoa bobil dingrakgipa aro an·tangnasan dakaigipa gita, ba paprangko
sandirikitna namnikgipa atchu namchagijagipa gita mesoka. Kakketgipa mondolide, Isolni kakket bewalko
aro Uni kakket ong·ani aro ka·sachakbeania Isol ka·sagipa ong·a ine mesoka. Isol manderangko
Babylononi "ong·katchina" okama (Para. 18:4). Sastroni gita ong·gija skianirangko jegalna aro Kristoni
skiao ja·rikchina okama.

(3) Gittamgipa Sa·greni Katta:

"Aro gipin gittamgipa sa·gre, ja·rike gam·bee inaha, saoba ua matburingko aro uni bimangko
olakiode, aro an·tangni mikkingo ba an·tangni jako uni chinko ra·ode, uaba uni ka·o nangani
ringchakanio bringija tarisogimin Isolni ka·o nangani draka bitchiko ringgen; aro ua rongtalgipa
sa·grerangni mikkango, aro Mes Bi·sani mikkango wa·al aro gondroko saknaako man·gen
…………. Aro matburingko aro uni bimangko olakigiparang aro uni bimungni chinko ra·gipa, sal
aro wal neng·takaniko man·ja. ianon rongtalgiparangni, chong·motan Isolni ge·etani aro Jisuko
bebera·ako rakigiparangni, chakchika gnang" - (Parape·a 14:9-12).

Gittamgipa sa·greni kattao a·gilsak gimikko dolgni suale mesoka. Kakketgijagipa mondoli, jemangan
matburingko aro uni bimangko olakiachim, aro matburingni chin uamangni mikkingo ba jakpao ra·achim.
Gipin dolsara, matburingni biljakko jegale Isolni ge·etaniko manigipa aro Jisuna kakket ong·gipa toromni
dolrang ong·achim.

Ia dolgnini gimin nisusae niatbo. Matburingni chinko ra·giparanga. Mandeni chanchibewalao dakdragimin
skiani aro dakanirangko mangipa ba ja·rikgipa ong·a. Toromirangde ma·tekani gnang, uamangde:
"Chakchikani gnang" Isolni niam/ge·etaniko rakkigiparang aro uamanga "Jisuna kakketao
dongkamgiparang ong·a.

Ia minggittam skianirang chu·sokahaon, Jisu sigimin-rangko

a·gilsakoniko chimongna re·bagen.

"Aro anga nikaha, aro nibo, aram gipok; ua aramo asonggipa

Mandeni Depante saksa gitachim, aro Uni skoo sonani mukut
aro uni jako matgipa atchili. Aro sakgipin sa·gre nokdringoni
ong·kate aramo asonggipana gam·bee chrikaha; Nang·ni
atchiliko watate rabo; maina raani konta sokbaaha; maina
a·ako raani minsrangbeaha. Aro aramo asonggipa an·tangni
atchiliko a·ao galahaoa a·a raako man·aha" (Para. 14:14-16).

3. BON·KAMGIPA SALO KRISTONI MONDOLI

Bilak kimkimgipa Kristian mandeni on·kangani, chakchikani, bebe ong·ani aro uni gisikni gita tangna
skanina aiao inmanahama? An·chingni somoina Isolchi dingtangtegipa kattako Parape·a odhai 14 o
on·aha, maina uachi namako ong·atna ama. Dilani 25 o (Parape·a 12:17 oniko man·bagimin gita, Isolni
bon·kamgipa mondoli, Isolni ge·etaniko manigen aro Jisuni sakiko rakigen. Parape·a 14;12 o janapgipa
gita, ia apsan dolrangan, "Isolni ge·etanirangko manie Jisuna kakket ong·e dongkamgiparang ong·gen.

Hai an·ching ia Kristian dolni bewalrangko niate nina.

(1) "Uamanga Kristoni sakiko rakigipa." Satanni ka·chichaa uamangni kosako ong·genchimoba uamanga
"Jisuo kakket dongkamgipa" ong·a. Uamangni kakket ong·ania an·tangtangni ong·ja, Isolni on·giminsa
(Eph. 2:8). Ia mondolia Kristoko bang·bate rongtalbate nike Uni bewalko aro Uni ka·sachakao bebera·e
tanggipa ong·e Kristoni uamango dongkamaniko parakgipa ong·a.

(2) Uamanga "Jisuo bebera·ako rakigiparang" ong·a (Para. 14:12). Uamangni ka·tongrang, Jisuni bebeo
janggi tangani, Uni skiani aro Uni bebe ong·anian gapaia. Uamanga Isolni kattasan dongaija, indiba
"katta" ko rakgiparangba ong·a aro ugita janggi tanggipa ong·a. Uamangnade toroman janggi, kamo
bebera·anikoba mesoka, aro uamango bebe aro bamani gnang. Jisuni bebera·ani cholonko uamango
nikna man·a. Uamanga salanti janggi tanganio Sastroni katta gita tanggenchimode namgipa Kristian
janggi tanganio tangna ama ine ma·sia. Sastroni kakket kattao ka·saani aro Kristona on·kanganichi
mande ka·tongo pilak nangnikanirangna chu·ongnikaniko on·na ama ine nika.

(3) Uamanga "Isolni Niam mingchikkungko manigipa" ong·a.

Niam Mingchikkung, Isolni cholonni niam.Uamanga pilak Isolni
ge·etako aro Isolni nangnikanio pangnan ong·kamna ska.
Uamang Isolna ka·saaniko mesokna aro brigipa ge·etanini
neng·takani salko rakie aro pilak ge·etanirangko manie mande
skana ka·saaniko mesoka.

(4) Uamanga "Nama Kattako" a·gimikna gipatani bakko

ra·giparang ong·a (Para. 14:6). Ia nama kattara, Jisu an·chingni
papna sichakaha aro Uni gopramoni chakatpilanichi an·chingba
Un baksa bakko man·giparang ong·paa ine paraka. Kristoni
bangki mondoli pilak manderangkon pilakchikon branggimin
mondolioni ong·kate Sastroni kakket skianio mangmang pangchake Jisu baksa ong·na okamenga.

(5) Uamanga bichalni konta sepangako ma·sie, "raani konta sokbaha" ta·raken kakket aro bebeona
an·pilbaaha, aro Kristoko man·kugijagiparang bang·engpiti (Para. 14;15).

(6) Uamanga Isolni on·gimin kamchi gapatako man·giparang ong·a. Dal·gipa Babylon ga·akahani gimin
"Uoni ong·katchina" uamang mol·mole okamaniko dakgipa ong·a (Para. 18:4). Pilak baksaba katchaanina
aro Jisu baksa nangrimanina uamangni skani gnang.

Sa·gre sakgittamni kattachi ong·katna okamako man·gipa bang·a manderang ka·tong mingsano
nangrimatako man·gen. Uamangni kusian gapgipa janggi watata Johan baksa ia okamaniko nang·na
on·gen:
"Jeko chinga nikaha aro knaaha, uko na·simangnaba chinga aganata, maikai na·simangba ching
baksa bak man·pagen; aro chingni bak man·paade Pagipa baksa aro Uni Depante Jisu Kristo
baksa gnang. Aro iarnagko chinga sea, maikai an·chingni katchaa chu·sokgen" (1 Johan 1:3, 4).

Uni Gisikchi aro Uni mondolichi, Jisu nang·koba An·tangna on·kangna okamenga:
"Aro Gisik aro namchik agana, Re·babo; aro knagipa aganchina, Re·babo; aro ringna sikgipa
re·bachina; aro sikgipa indinari chijanggiko ra·china" (Para. 22:17).

4. ROKOMGNI MI RAANI

Pilak jokgiminrangko rimna Jisuni a·gilsakona re·bataiosa sa·gre sakgittamni nama katta matchotgen
(Para. 14:14-16). Salgio tarisogimin bang·begipa dongramona Jisu joka man·giminrangko rimdoanggen
(Johan 14:1-3). Ua pangnajolna pap, sabisi, duknirang aro sianiko gimaatgen. Toromirang rasongarigipa
gital janggi tangani Un baksa jringjrotna tanggen (Para.
21:1-4).

Jisuni re·bapilani somoio papirangkoba "chimongani"

donggen.

"Aro sakgipin sa·gre salgiogipa torom okdringoni

ong·kataha; uaba matgipa atchiliko man·aha. Aro
sakgipin sa·gre ganchioni ong·kataha, ………………
aro ua matgipa atchiliko man·gipana gam·bee indine
inwataha, Nang·ni matgipa atchiliko watate a·ani draka
buduni chokchimrangko chimongbo, maina ua bite
minsrangaha. Aro ua sa·gre an·tangni atchiliko a·aona gale, drakako chimongaha, aro Isolni ka·o
nangani dal·gipa sepchakanio gala. Aro ia sepchakaniko songjinmani a·palo ga·bekbekaha, aro
an·chi ua sepchakanioni gureni lagamona dipet kros ritchasaona ong·katangaha" (Para. 14:17-20).

Ian bon·kamgipa papirangko gimaatani ong·gen, uan Kristoni jokataniko jegalgiparangko gimaatanio
Jisuni dal·begipa dukni somoiba ong·gen. Jisu "papirang baksa chakchikbeenga, maina Ua saksani
gimaanikoba nangnikja, indiba sakantini an·pilbaaniko nangnikenga" (2 Pitor 3:9).

Jensalo Jisu an·tangnirangko chimongna re·baon, na·ara badiagipa dolo ong·gen? Na·ara gamchatgipa
birongrang baksa chadenggiparango ong·pagenma? Ba ka·o nanganio gimanasigipa minblekgipa draka
biteni dolosa ong·genma? (Parape·a 14:17-20).

Ia ong·nasiako rongtalen mesoka. Paksachi Jisu An·tangni datprota

man·gipa jakko snile, Isolni ge·etaniko manigipa aro Jisuni bebeko
rakigipa toromirang baksa ong·pachina mol·molchaenga (Para.
14:12). Pak gipinchi mandeni ku·rangchi, Sastroko chu·gimik
manina nangja aro Isolni ge·etanirangba nangchongmotani
dongjaha ine aganskaenga.

Pilat rajani bichal ka·ram dringo indake changsao ong·aha.

Paksachi Jisu - Isol - mande ong·gipa. Pakgipinchi Barabas aro ia
dukni salo dongpagipa mande jinma. Indiba jensalo Pilate rajani bil
gnangbee, "Iamang sakgnioniko sako na·simangna watbo?" ine
sing·on, jinma uamang ka·o nangbeani ku·rangchi "Barabasko" ine
chrikattokaha.

Pilat aganchake inaha, "Jokatgipa minggipa, Jisukoa anga maidakskagen?" Unon jinma ku·rangsano
chrike inaha, "Chisolo datkapbo! Uko chisolo datkapbo!" Da·nang dos gri Jisu chisolo datkapako
man·aha, aro papi (dos gnangipa) jakgitelaniko man·aha (Mat. 27:20-26).

Da·alo, na·a sako basee ra·a, Barabaskoma, ba Jisuko? Na·a mandeni dakjegimin skianirangko ra·chake,
Isolni ge·etani aro Jisuni kakket kattarangko jegalgenma? Ba, Isolni ge·etanirangko manie Jisuna kakket
dongna skama? Iakon gisik ra·bo, Jisusan mangmang, Uni Rongtalgipa Gisikchi, ma·sisokgijan salo
ma·siatna, dukni salo an·senganiko on·na aro nang·ko chu·ongnikatna ku·rachakgipa ong·a.