Sociedade Real de Numismática de Bélxica
| Sociedade Real de Numismática de Bélxica | |
|---|---|
 Entrada da Biblioteca Real de Bélxica, sede da Sociedade Real de Numismática de Bélxica  | |
| Tipo | sociedade científica |
| Data de fundación | 1841 |
| En | Bruxelas |
| País | Bélxica |
| Na rede | |
| http://www.numisbel.be/index.html | |
| [ editar datos en Wikidata ] | |
A Sociedade Real de Numismática de Bélxica (en francés: Société royale de numismatique de Belgique; en neerlandés: 'Koninklijk Belgisch Genootschap voor Numismatiek') é unha asociación sen ánimo de lucro fundada en Bruxelas en 1841 co obxectivo da promoción e o progreso da numismática, a sixilografía e as disciplinas relacionadas en Bélxica.[1]
A Sociedade Real de Numismática de Bélxica comparte a súa sede co Gabinete de Moedas e Medallas da Biblioteca Real de Bélxica (Bibliothèque royale de Belgique), no número 4 de Boulevard de l'Empereur, en Bruxelas.[2]
Historia
[editar | editar a fonte]Fundada en 1841 por un grupo de coleccionistas de moedas antigas, trátase dunha das entidades de carácter numismático máis antigas que manteñen a súa actividade. Entre os seus fundadores cómpre salientar a personalidade do historiador polaco Joachim Lelewel, un dos pais da numismática moderna, que naquela época estaba exiliado en Bélxica e a quen os outros membros lle ofreceron de inmediato a presidencia honoraria da sociedade. Outras figuras notables do grupo orixinal foron os historiadores e numismáticos belgas Constant-Philippe Serrure e Charles Piot.[3][4]
O primeiro labor dos fundadores foi a publicación dunha revista, ao estilo da Revue de la Numismatique Française da Sociedade Francesa de Numismática, que comezara a súa andaina uns anos antes, en 1835. Baixo a cabeceira de Revue de la Numismatique Belge publicouse un primeiro folleto en 1842 e non foi ata 1846 cando a publicación pasou a ter unha periodicidade anual. En 1875, a revista pasou a denominarse Revue Belgue de Numismatique e, en 1908, cambiou novamente a Revue Belgue de Numismatique et de Sigillografie.[5][6] Ata 1980 non se lle engadiu á cabeceira a súa versión en neerlandés: Belgisch Tijdschift voor Numismatiek en Zegelkunde.[7]
En 1866, con motivo do seu 25 aniversario, a sociedade recibiu do rei Leopoldo II a autorización para denominarse "sociedade real" (société royale). O recoñecemento internacional da entidade veulle en 1891, cando se lle encomendou a organización da primeira edición do Congreso Internacional de Numismática, con participantes procedentes principalmente de Francia, Italia, os Países Baixos e Alemaña.[8][9][10]
Logo da segunda edición de París en 1900, en xuño de 1910 encargouse tamén da organización do terceiro Congreso Internacional de Numismática, esta vez en colaboración coa Société Hollando-Belge des Amis de la Médaille d'Art.[11][12] No seu transcurso, manifestouse o desexo de que o ensino da numismática e da sixilografía pasasen a formar parte do ensino superior, e varios membros da sociedade, entre eles o numismático Victor Tourneur, estableceron as bases para o ensino da numismática en Bélxica, no Instituto Superior de Historia da Arte e de Arqueoloxía e no Instituto de Estudos Superiores de Bélxica, ambos en Bruxelas. Uns anos máis tarde, a sociedade organizou o primeiro curso de numismática nunha universidade belga, na Universidade Católica de Lovaina.
Durante os dous conflitos mundiais, a sociedade interrompeu as súas actividades, o que explica que non puidese celebrar nin o seu 75 aniversario nin o seu centenario; isto fixo que os actos de celebración do 125 aniversario, en 1966, fosen particularmente solemnes. Naquelta celebración utilizouse por vez primeira a variedade flamenga do neerlandés nunha actividade da sociedade, que ata a data utilizara exclusivamente o francés no seu labor social. A partir dese momento, o flamengo comezou a utilizarse tamén na redacción de diversos artigos da Revue Belgue de Numismatique et de Sigillografie.[13]
En setembro de 1991, a sociedade celebrou o seu 150 aniversario durante o desenvolvemento, novamente en Bruxelas, do XI Congreso Internacional de Numismática, coorganizado co Consello Internacional de Numismática, onde se encargou paralelamente da exposición "Unha moeda para Europa".[14][15]
En 2016 conmemorouse o 175 aniversario cun coloquio sobre a numismática en Bélxica.[16]
Actividades
[editar | editar a fonte]Ademais da publicación da Revue Belgue de Numismatique et de Sigillografie, a sociedade organiza reunións mensuais e conferencias e encárgase, así mesmo, da publicación, a partir de 1988, dunha bibliografía anual sobre numismática.
Premios
[editar | editar a fonte]- Premio da Sociedade Real de Numismática de Bélxica. Outórgaselle cada catro anos a un estudo científico orixinal e inédito no campo da numismática ou da sixilografía. Estableceuse en 1976, aínda que a primeira concesión data de 1981:[17]
- (1981): Maria Theresia Rath.
- (1998): François de Callataÿ.[18]
- (2001): Christophe Flament.[19]
- (2014): Lyce Jankowski.[20]
- Premio Hubertus Goltzius. Con carácter trienal, recoñe un estudo orixinal e científico inédito no ámbito da numismática dos séculos VI a XXI das rexións belgas. Concédese por vez primeira en 2019.[21]
Publicacións históricas da SRNB
[editar | editar a fonte]Á parte das numerosas publicacións de carácter numismático realizadas polos seus membros de maneira particular, ao longo da súa historia, a sociedade promoveu a publicación de diversas monografías, entre as que cabe salientar as seguintes:
- (1885): Souvenirs numismatiques du cinquantième anniversaire de l’Indépendance de la Belgique.
- (1869-1919): Médailles historiques de Belgique. Vol. I. Vol. II. Vol. III.
- (1891). Congrès International de Numismatique. Procès-verbaux et Mémoires.
Presidentes da SRNB
[editar | editar a fonte]- 1841-1848: Joachim Lelewel (presidente honorario).
- 1848-1887: Renier Chalon.
- 1887-1889: Alphonse de Schodt.
- 1889-1925: Baudouin de Jonghe.
- 1925-1949: Victor Tourneur.
- 1949-1955: Marcel Hoc.
- 1955-1961: Jules Desneux.
- 1961-1967: Paul Naster.
- 1967-1970: Marcel Hoc.
- 1970-1976: Jean Jadot.
- 1976-1980: Émile Wheelbarrow.
- 1980-1982: Paul De Baeck.
- 1982-1988: Maurice Colaert.
- 1988-1990: Tony Hackens.
- 1990-1996: Luc Smolderen.
- 1996-1999: Hubert Frère.
- 1999-2005: Pierre Cockshaw.
- 2005-2008: Raf van Laere.
- 2008-2011: Jean-Luc Dengis.
- 2011-2017: Johan van Heesch.
- >2017: François de Callataÿ.
Notas
[editar | editar a fonte]- ↑ "Qui sommes-nous?". No sitio web da SRNB.
- ↑ "Quelques renseignements utiles". No sitio web da SRNB.
- ↑ Claes, L. "Docendo discimus: the history of numismatic education in Belgium and some recommendations for the future". En Moens, J. (ed). Colloquium Belgian Numismatics in Perspective. Bruxelas. 2017.
- ↑ Colaert, M. (1991). Páxinas V-VII.
- ↑ Doyen, Jean-Marc. "Numismatique et Archéologie: une approche bibliometrique de la Revue Belge de Numismatique [et de Sigillographie] (1842-2015)". En Moens, J. (ed). Colloquium Belgian Numismatics in Perspective. Bruxelas. 2017.
- ↑ "Revue Belgue de Numismatique et de Sigillografie". En Archaeology Matters. Acceso á consulta en liña de todos os seus números.
- ↑ Vanhoudt, H. "Numismatische genootschappen in België (19de - 21ste eeuw)". En Moens, J. (ed). Colloquium Belgian Numismatics in Perspective. Bruxelas. 2017.
- ↑ "The International Numismatic Congress at Brussels". En American Journal of Numismatics, and Bulletin of the American Numismatic and Archaeological Society. Vol. 26. Nº 2. Outubro de 1891. Páxinas 25-27.
- ↑ Cumont, G.; De Witte, A. Congrès international de numismatique organisé et réuni à Bruxelles. J. Goemaere. Bruxelas. 1891.
- ↑ Colaert, M. (1991). Páxina XXIX.
- ↑ Comte de Castellane, H.; Blanchet, A. Congrès international de numismatique réuni à Paris. Société Fraçaise de Numismatique. 1900.
- ↑ Colaert, M. (1991). Páxinas XXX-XXXI.
- ↑ Colaert, M. (1991). Páxinas XXXVIII-XXXIX
- ↑ Burnet, A. "Numismatique: science, art, hobby, commerce. A Bruxelles du 8 au 13 sept.91". En Le Soir. 4 de setembro de 1991.
- ↑ Burnet, A. "Bien plus que des monnaies à admirer... Vingt-six siècles de frappe sur des coins d'Europe Arquivado 16 de setembro de 2019 en Wayback Machine.". En Le Soir. 17 de setembro de 1991.
- ↑ "175 years of the Royal Numismatic Society of Belgium". En Coins Weekly.
- ↑ "Règlement pour participer au prix quadriennal de la Société". No sitio web da SRNB.
- ↑ "François de Callataÿ". Foundation Francqui-Stichting.
- ↑ "Christophe Flament". Université de Namur.
- ↑ "Lyce Jankowski". En Coins Weekly.
- ↑ "Règlement pour participer au Prix triennal "Hubertus Goltzius" de la Société". No sitio web da SRNB.
Véxase tamén
[editar | editar a fonte]Outros artigos
[editar | editar a fonte]- Lista de asociacións numismáticas
- Gabinete de Medallas da Biblioteca Real de Bélxica
- Casa da Moeda Real de Bélxica
Bibliografía
[editar | editar a fonte]- Colaert, M. "A travers cent cinquante années d'histoire de la Société royale de numismatique de Belgique". En Revue Belge de Numismatique. CXXXVII, 1991.
