Qué diz ixa mesacha? y Moncayo 900. Tierra de barrenaus 5x10

Gravación de QDIM Vermut Edition

En la vida d'as activistas, d'a chent que treballamos en asociacions, gosamos de trobar-nos con muitas atras personas bien activas. D'ixas que a sobén te fas cruces de cómo aduben a tot: lo suyo treballo, las suyas aficions y la suya militancia. Tamién n'i hai que antimás tienen maneras de veyer lo mundo que siempre te aportan cosas nuevas, que te dan muitos argumentos pa continar treballando. En iste Tierra de barrenaus tiengo lo luxo d'entrevistar-ne a dos d'ixas personas: Dabi y Elena. Totz dos, con nuevas iniciativas que fan la suya parte de treballo pa fer d'Aragón y d'o mundo un puesto mas poliu a on que vivir.



Moncayo 900 ye una nueva iniciativa naixida en la redolada d'ixe mitico y repoliu mont. Empecipiando con la recuperación d'un dance, y con la sincusa d'o 900 aniversario d'a incorporación d'ixas tierras a un Aragón que en aquellas envueltas yera encara fendo garras, han iu ixamplando las suyas actividatz y arias d'actuación. Tot un eixemplo de treballo en lo territorio por la recuperación d'a cultura popular, organizada y autochestionada. Dabi nos charra d'o treballo que se ye fendo-ie y nos da bella clau muit intresatn sobre la chestión y actualización d'as nuestras tradicions.

Viachamos ent'o sur pa charrar con Elena, la responsable d'o nuevo programa de radio en aragonés "Qué diz ixa mesacha?", que podetz sentir en Radio Montalbán los chueves. Ye tot un goyo poder charrar con la millor companyía que podría tener en la poqueta radio en aragonés que se fa por lo país. Lo suyo programa, transfeminista y antiespecista, torna a contrimostrar, con feitos, que l'aragonés ye una sobrebuena ferramienta pa charrar d'o que calga y que ye viable fer-lo en qualsiquier lugar, barrio u ciudat.

Antimás, tos presiento dos nuevas propuestas mosicals trayidas dende lo Viñarock, a on que disfruté d'os suyos directos: Ira y Valira. Todas dos grans collas con muitismo futuro por debant. Aspero que tos faiga firme goyo y aguardo a los vuestros comentarios

Abril en aragonés 2018 y lei de luengas. Tierra de barrenaus 4x09

Grabación d'o debat.
(Foto: Cherardo Callejón)

Encara que iste anyo Nogara no fació servir lo lema de Abril en aragonés, la verdat ye que quedó un mes rebutient d'actividatz arredol d'a nuestra luenga. L'aragonés contina vivo, y la chent que amamos y desfendemos ista luenga, no reblamos nunca. Lo programa preba de resumir bell poquet de tot lo viviu en istos diyas.



Empecipio, prou que sí, con las XXV Chornadas d'as luengas d'Aragón, organizadas por Nogara y an que teniemos actividatz bien diferents. Amás d'as charradas (1), una cursa, un recital de poesía, un taste de quesos, una exposición, y un concierto, implioron lo programa d'estianyo. Entrevisté a Dabi Lahiguera, autor de "A fabla de Moncayo", qui nos charró d'o libro suyo con toda la pasión que tenió tamién en la charrada.

Quasi sin tiempo pa alentar, plegó lo Diya d'a Cultura Aragonesa, que se celebró en la Plaza d'o Pilar de Zaragoza. Un diya pleno de bailes, tallers, mosica, .... y an que participé fendo un programa con publico. En ixe programa debatié, con Rubén Ramos y Juan Pablo Martínez, sobre l'aragonés en los diferents estatutos d'autonomía que hemos sufriu, y sobre las tres leis de luengas que s'han feito en Aragón: l'anteprochecto de 2001, que nunca no plegó a estar vichent, y las leis de 2009 y 2013, ista zaguera actualment en vigor. Ixe mesmo maitin, Silvia Cebolla fació un taller de cocina en aragonés, que recuenta en lo programa, dando-me antimás la primicia d'o diya que se presentará lo suyo libro. Si quiers saber-lo, ya sabes qué has de fer.

A l'atro diya se celebraba Sant Chorche, Diya oficial d'Aragón. Un anyo mas lo Paseyo Independencia y la Plaza Aragón acullioron en lo Diya d'o Libro, las paradetas de editorials y librerías presentando-ie las suyas novedatz. Beluna d'ellas en aragonés, prou que sí. Silvia y Dabi charran tamién d'a suya experiencia en la de Transiberiano. Entrevisto tamién a Chuse Raul Usón, editor de Xordica, qui presienta las zaguers novedatz en aragonés d'a suya editorial: Chen de Chistén y Tío Chuaquín.

Asinas que, pocas pero bien movidas, las activistas de l'aragonés hemos teniu un mes con tot fueras d'aburrimiento. Que tot sirva pa continar dando-le aliento a ista luenga!

(1) Sobre dos d'as charradas escribié post: L'asturiano y la finestra d'oportunidat y L'aragonés en Moncayo, y por totz los cabos.

L'aragonés en Moncayo, y por totz los cabos

Ascuitar a Dabi Lahiguera siempre ye intresant. Si antimás presienta un d'os treballos d'a suya vida, y lo fa con la suya cutiana pasión, no saldrás d'a cambra sin cosas pa pensar-ie. La charrada sobre lo suyo libro "A fabla de Moncayo. Estudio comparativo con a lengua aragonesa", adintro d'as XXV Chornadas d'as luengas d'Aragón, organizadas por Nogara, me deixó qualques reflexions que siempre son de buen fer y que habrían d'estar en los debatz cutianos de qualsiquier aragonés.

Lo radiu conoiximiento popular d'as luengas, ya no nomas de l'aragonés, ye una d'as qüestions que estió present en la charrada en qualques momentos. D'una man, qui s'intresa por l'aragonés no gosa de tener guaires conoiximientos sobre la propia luenga en conchunto. Pa entender la nuestra luenga cal tener una envista bien ampla y no mirar-nos nomas lo momento actual y las variedatz referencials, sino tirar enta zaga historicament y ixamplar lo mapa dica lo sur y mesmo dillá d'as nuestras buegas actuals. S'estudea poco, y yo en soi buen eixemplo, l'aragonés historico y de vez, se desprecia qualsiquier parola u expresión replegada a lo sur d'a buega que cada estudioso u asociación proposa como la "pura".

D'atra man, los conceptos que la mayoría d'a chent tien sobre la esencia y lo funcionamiento d'una luenga son reflexo d'una educación mal chestionada. Bien sia por ignorancia, bien por nacionalismo lingüistico. Lo propio castellano, como bien desfendió Dabi, no s'amuestra con toda la variedat que tien. De feito s'amuestra mirando de correchir qualsiquier forma esbarrada d'a regla fixada. Accentos, lexicos, expresions, chiros, .... d'una parte importantisma d'a comunidat de fablants d'o castellano son refusaus sistematicament. Y, prou que sí, en ixo se incluye las peculiaridatz d'o castellano charrau en Aragón.

Ye curioso, pensando-ie, con que naturalidat asumimos que lo bueno pa una cria ye que aprenda la norma castellana estandar, encara que dimpués charre la suya variedat (lochicament), y cómo nos la pillamos dimpués con papel de fumar si en Echo amostramos una forma propia d'Ansó, u que se perdió fa trenta anyos. Qüestions de prestichio y autoridat d'as luengas, entre atras cosas.

La educación en lo tocant a las luengas, a todas, habría de fer un chiro de tot. No sé cómo serán las cosas agora. Por lo que tiengo entendiu continan si fa u no fa como quan yo yera mocet. Y en aquellas envueltas, de tot isto que veigo, leigo y ascuito agora, brenca.

Una d'as orichinalidatz d'o libro ye l'uso de metodos matematicos y estadisticos pa refirmar las suyas aseveracions. Lo que s'agradeixe. No ye una cosa realment orichinal, pues ye aplicada de cutio en atras obras lingüisticas. Manimenos creigo que ye un d'os primers (sino lo primer) treballo sobre l'aragonés an que se fa servir istas ferramientas. A lo menos de manera tant funda. Una vegada mas, Dabi creba ista buega, tant horrible como imachinaria, entre sciencias y letras. Una separación que nos fican en lo tozuelo dende chiquetas y que a muitas nos privoron de poder estudiar seguntes qué cosas en seguntes qué etapas d'a nuestra educación. La ultraespecialización nos leva a un analfabetismo practico en la mayoria de materias y habría de refusar-se por qualsiquier sociedat que quiera abanzar tecnolochicament y social.

Las personas que hue charramos aragonés, lo haigamos aprendiu de casa u d'adultas, femos parte d'una comunidat lingüistica con una historia y un territorio. Responsabilidat nuestra ye conoixer todas dos lo millor posible pa poder tener una envista de tot lo conchunto que formamos. Obras como "A fabla de Moncayo" y charradas como la que fació Dabi en istas chornadas aduyan, y muito, a fer ixo posible.

Si i faltetz, podetz sentir la charrada mas abaixo, y mercar lo libro en iste vinclo.

Sociolingüistica, grafias, y Moncayo en aragonés. Tierra de barrenaus radio 3x11

Que l'aragonés ye bien vivo lo contrimuestran muitas cosas. No son evidents, ni salen en las noticias terne que terne. Pero buena cosa de activistas treballamos por cada diya por fer reviscolar-se ista luenga nuestra tant morediza.

En Tierra de barrenaus siempre he prebau de no dar guaire mal con l'aragonés. La ideya d'o blog ye fer servir l'aragonés pa charrar d'as cosas que m'agane. Manimenos, ye quasi imposible no fer de cabo ta quan un programa con toda las cosas que pasan arredol d'a luenga. Sobre tot, si vusatras, quiestas lectoras y ascuitadoras, me lo demandatz. Asinas que aqui queda un programazo que en ye gracias a los quatro convidaus de luxo que he teniu.

Prencipio con una entrevista a Chabier Gimeno, que fa parte d'o Seminario Aragonés de Sociolingüistica. Ye ista una iniciativa que leva ya bell anyo funcionando y que ye fendo una fayena a saber que intresant, replegando datos importantismos pa tener en cuenta a la hora de fer politicas arredol d'as nuestras luengas, y fendo uns analisis que ya caleba. Lo suyo treballo podetz conoixer-lo en iste programa y leyer-lo en la suya web.

En la segunda parte, la mas larga, entrevisto a Juan Pablo Martínez y Chuse Raul Usón, representants respectivament d'a EFA y a SLA, qui charroron sobre la propuesta grafica d'a DGPL y lo comunicau que facioron istas dos entidatz refusando-la.

Pa rematar lo programa, Dabi Lahiguera charra d'o suyo libro recient publicau "A fabla de Moncayo. Estudio comparativo con a lengua aragonesa". Transiberiano edicions contina asinas con a suya linia editorial Selgua que empecipió con o diccionario de Fernando Romanos. Iste nuevo libro, antimás de replegar lo vocabulario d'a zona de Moncayo, charra de muitos aspectos historicos de l'aragonés. Una nueva obra imprescindible pa las amants d'a nuestra luenga.

Entre entrevista y entrevista, tot temazos, prou que sí. Y de fundo, sentiretz a Vegetal Jam que tienen nuevo disco publicau, y que si no lo tenetz, ya tardatz a fer-tos con ell.