THURIN

1.Thuthlung Hlui leh Thuthlung Thar Bute hi Pathian Thu a ni a, hêng chauh hi rinna leh thiltih tehna
diklo theilo a ni.

2. Pathian pakhat chauh a awm a, Amah chauh chu biak tûr a ni. Amah chu Thlarau, mahnia awma,
hmun tina awm, thlarau dang zawng zawng leh thil dang rêng rêng laka hrang si a ni a. A miziaah te,
finnaah te, thiltihtheihnaah te, thianghlimnaah te, diknaah te, thatnaah te, taknaah te leh
hmangaihnaah te tâwp chin neilo, chatuan mi, danglam ngai lo a ni.

3. Pathian ah chuan Minung pathum, Pa leh Fapa leh Thlarau Thianghlim an awm a, an pathum hian
Pathian pakhat an ni a, nihna thuhmun, thiltihtheihna leh ropuinaa intluk an ni.

4. Lei leh vân leh a chhûnga thil awm zawng zawng siamtu Pathian chuan mihringte hi, hriatna, felna
leh thianghlimnaa Ama anpuiin mipaah leh hmeichhiaah a siama. Mi zawng zawng hi bul thuhmun
leh chhûngkaw khata unau anga inthui khâwm vek kan ni.

5. Mihring chuan anmahni duhthû ngeiin Pathian dân an bawhchhia a, thiam lohna leh chhiatnaah
chuan anmahni an inbarh lût ta a. Chu thiam lohna leh chhiatna leh sual hremna ata chu anmahni
chhanchhuak tûr leh, chatuan nunna pe tûrin, hmangaihna tâwp nei lo Pathian chuan, A chatuan
Fapa neih chhun Lal Isua Krista chu khawvêlah a rawn tîr a; Ama zârah chauh chuan mihringte hi
chhandam in an awm thei a. Chu Chatuan fapa chu mihring takah a lo chang a, minung pakhat mize
pahnih nei, Pathian tak leh mihring tak a ni kumkhua ta a ni. Thlarau Thianghlim thiltihtheihnain nula
thianghlim Mari chuan a pai a, a hring a; mahse, sual a nei lo.Mi sualte tân Pathian dân chu a zâwm
famkim a, Pathianin dikna a phût hlen chhuak tûr leh mihringte Pathian remtir tûrin, inthawina tak
leh famkim atân a inhlân a, krawsah a thi a, phûmin a awm a, ni thum niah mitthi zing ata a tho leh a.
Pathian ding lamah a han chho va, chutah chuan a mite tân a dilsak reng a, chuta tang chuan mitthite
kaitho tûr leh khawvêl rorêl tûrin a lo kal leh ang.

6. Thlarau Thianghlim, Pa leh Fapa ata lo chhuak chuan mihringte chu chhandamna changtuah a siam
a, an sualzia leh chungpikziate a hriat chiantir a. Krista hriatna kawngah an rilru a tivâr a, an
duhthlannate chawk thovin, Isua Krista chu an Lalpa leh chhandamtua pawm tûra ngenin, pawm thei
tûrin a pui a, anmahniah felna rah chi tinrêng a thawk chhuak thin.

7. Pathianin Kristaah chuan mi zawng zawng hnênah chhandamna famkim chu a thlâwnin a rawn
hlan a, an sualte sim tûr leh Lal Isua Krista chu an chhandamtu atâna ring tûr te,Amah ewntawna,
Pathian duh ang taka inngaitlawm leh thianghlima nung tûr tein thu a pe a. Krista chu ringa a thu
zâwmtute chu chhandam an ni a, sual ngaihdamna te, thiam chantirna te, Pathian fa nihna te,
Thlarau Thianghlim chênpuina azâra tihthianghlimna te, chatuan ropuina te an chang a. Ringtute
chuan tûn dam chhûng pawhin chhandam nih inhriatchianna lâwmawm tak chu an chang thei a.
Thlarau Thianghlim chuan khawngaihna hna a thawhin, thu te, sakramen te, tawngtaina te hi
hmanruaah a hmang deuh bik thin a ni.

8. Krista din chhuah Sakramen-te chu Baptisma leh Lalpa Zanriahte hi an ni. Baptisma chu Pa leh
Fapa leh Thlarau Thianghlim hminga tuia sil a ni. Hei hi Krista nêna kan zawmna te, Thlarau
Thianghlim zâra piantharna leh tihnunna chhinchhiahna leh nemnghehna a ni a, Lalpa hnêna kan
inhlanna thiltih a ni bawk. An sualte sima, Krista chu an chhandamtu atân an ring tih puangtute leh
an fate chantir tûr a ni.

Lalpa Zanriah chu Krista thihna hriat reng nâna chhang leh uain chanho hi a ni a, ringtuten
Krista thihnaa hlâwkna an chan chhinchhiahna leh nemnghehna a ni. Ama mite chuan Amah leh a
inhlanna an pawmzia te, an hlâwkpui zia te, a rawngbâwl tura an inpêk zêlna te, Amah an pâwlna leh
mi dang nêna an inpâwlna te entir nân, A lo kal leh hma loh chuan an chang ho thin tûr a ni.
Sakramen hlâwknate chu Krista malsâwmna avâng leh rinnaa changtuah A Thlarauvin a thawh
avânga lo awm a ni.

9. Ringtu zawng zawng tih tûr chu Kohhran inpâwl honaa tel te, Krista Sakramen leh a thil serh dang
vawn that te, A dân zawm te, tawngtai zêl te, Lalpa Ni serh thianghlim te, Amah be ho tûra inkhâwm
te, A Thu hril ngun taka ngaihthlâk te, Pathian malsâwmna an dawn ang zêla hlim taka pêk ve thung
te, anmahni ho zingah leh mi zawng zawng zingah Krista nungchang ang tihlan te, khawvêl puma
Krista ram tizau tûra beih te, ropui taka a lo kal lehna hun nghah te hi a ni.

10. Ni hnuhnûngah chuan mitthite chu kaihthawhin an awm anga, mi zawng zawng Krista rorêlna
thutphah hmaah an lang ang a, he dam chhûnga an thiltih that leh that loh ang zêlin rêlsak an ni ang.
Ringlote leh misualte chuan thiam loh changin an sual hremna an tuar ang; Krista ring a, A thu
zâwmtute erawh chu a langchanga thiam chantirin an awm ang a, ropuinaa lawm luhin an awm ang.