Hamid Dalwai

“இன்றைய சமூகம் எது சரி, எது தவறு என்ற தார்மிகக் கோட்பாட்டின் அடிப்படையிலேயே அமைந்திருக்கிறது. இந்தக் கோட்பாடுகள் எந்தவொரு மதத்தையும் சார்ந்தவையல்ல. மனித உரிமைகளைப்பற்றி இன்று நாம் அறியும் விதத்தில் - மதங்களில் அதிகம் சொல்லப்படவில்லை. நமது சமூகப் பிரக்ஞையைப்பற்றி முழுவதாக அறிந்துகொள்ள மதத்தின் உதவி தேவையில்லை. நாம் அனைவரும் ஏற்றுக்கொண்டுள்ள ஜனநாயகக் கொள்கைகளிலேயே அந்தப் பிரக்ஞையும் அடங்கியிருக்கிறது. இந்த ஜனநாயகக் கோட்பாட்டில் பல்வேறுபட்ட மக்களுக்கும் எண்ணங்களுக்கும் இடமுண்டு. ஒரு நாடு மதச்சார்பற்ற நாடாக, அதாவது ஒரு மதத்துடனும் தொடர்பில்லாத நாடாக இருந்தால்தான் அது ஜனநாயக நாடாகத் தொடரும். அப்படிப்பட்ட நாட்டில் வாழும் அனைத்து மக்களும் அங்கு செயல்படும் ஸ்தாபனங்களும் அடிப்படையான ஜனநாயகக் கோட்பாடுகளுக்குக் கட்டுப்படவேண்டும்.

பல இடங்களில் மனித உரிமைகளுக்கும் மத அடிப்படையில் நாம் கொண்டுள்ள எண்ணங்களுக்குமிடையே வேறுபாடுகள் எழுகின்றன. இவை தவிர்க்க முடியாதவை. இத்தகைய சந்தர்ப்பங்களில் இன்றைய ஜனநாயகவாதிகள் என்ற நிலையில் நாம் செய்யவேண்டியதெல்லாம் இதுதான்: மதத்தின் பெயரால் மக்களாட்சிக்குப் போடப்படும் தடைக்கற்களை நீக்கவேண்டும். இந்தியாவில் இந்துக்கள் பெரும்பான்மையினராக உள்ளனர் என்றும், முஸ்லிம்கள் சிறுபான்மையினர் என்றும் சொல்வதுகூட நாம் இப்போதும் மதத்தைச் சார்ந்திருக்கிறோம் என்பதைத்தான் சுட்டிக் காண்பிக்கிறது. மதத்தினடிப்படையில்தான் நமது சிந்தனை ஓட்டங்கள் தொடர்கின்றன. அரசியல் கட்சிகளோ பெரும்பான்மையினர், சிறுபான்மையினர் என்ற வர்ணனைகள் சரிதான் என்று நினைக்கின்றன. மதரீதியாக இல்லாமல் மக்களை வேறு ஏதாவது ஒரு வழியில் பிரிப்பதுதான் சரியாக இருக்கும். உதாரணமாக, தொழிலாளிகளின் தலைவர் என ஒருவரைக் கூப்பிடும்போது அங்கு மதமில்லை. ஆனால் அவரை இந்துக்களின் தலைவர் என்றால் அங்கு மதத்துக்குத்தான் முதலிடம் தரப்படுகிறது.”
― Hamid Dalwai