Yuan Dynasty Tangthu le Ciimnuai Khuasat Hun

Yuan Dynasty Tangthu le Ciimnuai Khuasat Hun Bagan (Pagan) hun; Bagan gam a kipat tung AD 849 pawlin thahat pahlo hi. Anawrahta hong khan ciang, AD 1044 pawl teh Bagan kumpi hong suak aa Bagan gam (kingdom) hong thahat hi. Tua ciangin Kawlte mi tampi lom omkhop theihna, nuntak khuasakzia aa kipan biakna le ngeinate khantohna hong kipan hi. Anawrahta pen kumpi a suahin kum 30 kiim pha hi. Anawrahta pen AD 1077 kiim pawlin si aa kum 62 pha hi. Bagan Kingdom Anawarahta a sihkhit, AD 1277 kum pawl ciang, Narathihapate in Bagan kumpi sem hi. Ama kumpi sep laitak Mongols (Mogolian) te in Temur Khan ii makaihna tawh Bagan gam simh uhhi. Kawlte le Mongols te kidona pen kum 10 kiim a sawtkhit ciang, Mongols te in gal zo uhhi. Mongols te in Kawlte a zawhkhit phet, Bagan gam beipahlo hi. Kawlte in a lelhkhit zawh uh kum 10 kiim langdo suak lai uh aa, AD 1297 kiim teh Bagan ukna bei siang hi. Hih hun aa Mogols phualpi emperor Yuan Dynasty pen Yuan emperor (Yuan Dynasty) kici hi. 1 Gennop Bulpi; Mogols te in Bagan a uk laitak, a phualpi uh Yuan Dynasty pen Sente (Ming Dynasty) in AD 1368 pawlin na do uhhi. AD 1370 kiim teh Bagan gam a uk Mogols te in Bagan gam nusia uhhi. (A phualpi vuah gal huh dingin a ciah tawh, ciah nawnlo aa, Bagan kiim ah a kithehthang tawh om hi dingin upmawh Ming Dynasty huai hi.) Mogols te ii Yuan Dynasty in Sente ii Ming Dynasty pen AD 1388 ciang lel siangta uhhi. AD 1370 kiim pawlin Mongols te kithehthang uhhi. AD 1420 kiim pawlin Zomite in Ciimnuai khua kisat hi. Mongols te kithehthang hun le Ciimnuai khuasat hun pen kum 50 bek kihal hi. • Bagan le Ciimnuai pen tulai mawtaw lam tawh miles (tai) 276 kiim kigamla hi. (Ciimnuai khua pen Saizang khua gei hi.) • Bagan le Mindat khua pen tulai mawtaw lam tawh miles (tai) 115 kiim kigamla hi. • Bagan le Kanpetlet khua pen tulai mawtaw lam tawh miles (tai) 100 kiim kigamla hi. • Bagan le Gangaw khua pen tulai mawtaw lam Bagan pan Ciimnuai Kikal tawh miles (tai) 140 kiim kigamla hi. • Bagan le Saw khua pen tulai mawtaw lam tawh miles (tai) 88 kiim kigamla hi. 2 Mawtaw lam tawh hiloin khe tawh kipai hi leh, kotlo ding ahih manin naizaw lai ding cih theih hi. Yuan Dynasty hong buaikhit ciangin, Mogols te kithehthangna Bagan khua kiim (tai 300 humna sung ah), Kawlte ahilo Yaw minam kici tampi teng uhhi. Saw khua cih zongh om hi. Tuni dong Kawlte in Yaw te khua ci-in a ciapteh uh khua tampi om hi. Asho kici minam zongh om hi. Zo kici minam zongh om hi. Sente ii Zhou Dynasty le Qhin Dynasty tangthu tawh Mongols te ii Yuan Dynasty tangthu i etkhop ciang, Zomite mun le mual ahi zong khuasat hunte pen Mogols te ii Yuan Dyansty tangthu tawh kinaizaw cih theih hi. Yuan panin, Yaw, Zo, Asho cih bang dan minte a kikhel/a ka toto ahi kha diam cih nop huai hi. Kithehtang aa kizopna a omloh zawh a sawt ciang, paulehamte zongh damdamin hong kidang cih theih thu hi. Zuatna tuamtek zui-in munlemual tungtawn pan ahi zong, pauleham tungtawn pan ahi zong minlepuamte zongh hong kibanglo tektek cih theih hi. Gtn. Ciimnuai hun bek pan zongh kikhenkhiatna a omkhit ciang, beh tuamtuam a thakthak piang thuahthuah hi. Pagan hun pek pan hi leh bel, min tampi a piang thuahthuah thei thu mah hi. Chin/Zomi a kicite sung aa kipan, Kuki/Thahdo a kicite sung le Naga, Meitei a kicite sung aa om minam/namke tampite ii kammal (pau) zat a kibang tampi om hi. Lungdam LTTuang (Lian Than Tuang) 07 May 2024 3