Giografia de la Libia

La Libia la xe on paexe del Nord Africa e la fa parte de la rejon del Maghreb. Ci i so 1 760 000 km² la Libia la xe la quarta naxion africana par estension. La Libia la ga na longa costa sol Mar Mediteraneo sol Golfo de la Sirte, i confin de tera i toca la Tunixia, l’Algeria. El Nizer, el Ciad, el Sudan e l’Egito. de frecuente i confini del paexe i xe na linea reta che no la segue i riliegi o altri riferimenti ziogràfeghi. Questo parché i confin de la Libia i xe fruto de tratati tra Italia, Francia e Regno Unio e i no corisponde a la rejon ziogràfega.

Dati generali

Area:
Totale: 1 759 540 km²
Tere: 1 759 540 km²
Aque: 0 km²

Confini de tera:
Totale: 4 383 km
Paesi confinanti: Algeria 982 km, Chad 1 055 km, Egito 1 150 km, Nizer 354 km, Sudan 383 km, Tunixia 459 km

Linea de costa: 1 770 km

Punti estremi:
Punto pi basso: depresion de Sabkhat Ghuzayyil -47 m s.l.m.
Punto pi alto: Bikku Bitti 2 267 m s.l.m.

Morfołozia

La Libia la presenta tri rejoni ziogràfeghe e storiche:

la Sirenaica, che la ocupa tuta la fasia orientale del teritorio libico, longo el confin co l'Egito, dal mar Mediteraneo, al confin co el Sudan e el Ciad;
la Tripolitania, che la ocupa la fasia setentrionale, longo il Mediteraneo, dal confin co la Tunixia, fin a la fin del Golfo de la Sirte;
el Fezan, chel ocupa el deserto a sud de la Tripolitania, dal confin co l'Algeria fin a la Sirenaica, longo el confin co Nizer e Ciad.

Coste

La costa de la Tripolitania la xe piata, sensa tanta vegetazion e co spiage de sabia. Da Bengasi fin al confi co l’Egito, la costa la diventa rociosa e le àcue pi profonde. El golfo de Tobruck el xe el pi grande e profondo de la costa libica.

Rilievi

EL paexe el xe quasi tutto soto i 1000 metri de altitudine. Montagne le se cata al confin co el Sudan (Massiccio de Auenat) e in tel Fezan.

Aque

La Libia, quasi tuta arida o semi-arida, no la ga fiumi permanenti. I uadi – torenti tenporanei – i score al tenpo de le piove. Se cata torenti co aqua tuto l’ano in Tripolitania e in Sirenaica. La piova la casca so la costa, e a l’interno solo raramente. La falda acquiferea la xe poareta ma la ge da vita a de le oasi in Sirenaica e in tel Fezan.

Clima

El clima el xe mediteraneo so la costa e el diventa senpre pi caldo e seco verso l’interno. La piova la xe poca so la costa (300 – 400 mm l’ano), e anca pi scarsa a l’interno.