São Filipe
São Filipe (op Creolo: San Filipi) is de Hööftstadt op dat Eiland Fogo in de Republiek Kap Verde. Se ist togliek de Sitt vun de Gemeen (Concelho) São Filipe un de weertschopplich bedüdenste Oort vun’t Eiland.
Geografie
[ännern | Bornkood ännern]Landschop un Stadtbild
[ännern | Bornkood ännern]
De Stadt São Filipe liggt ümgeven vun en schrate, steppenordige Landschop an de Süüdwestküst vun’t Eiland op’n Hööch vun middlere achtig Meter över’n Seespegel. De Hööch kummt dorvun, dat de Stadt an en Pielküst liggt. Ünner de Stadt liggt dor en Strandstriepen, de vun de Stadt ut över twee Treppenanlagen un ut swarten basaltischen Sand besteiht. Vun wegen den starken Seegang an de Küst is de Strand aver kuum to’n Baden egent[1].
Över de Inwahnertall vun de Stadt sülvst gifft dat ünnerscheedliche Angaven. Se liggt ruchweg bi 7.000 bit 8.500 Minschen, womit São Filipe to de gröttsten Städer vun de Kapverden tellt. In de Vörmiddagsstünnen is in de Stadt veel los, wenn de Minschen vun’t hele Eiland op’n Markt jemehrn Inkoop maakt. An’n Namiddag, wenn de Temperaturen hooch gaht, un an de Wekenennen geiht dat dorgegen veel sütjer to[1].
De Alto San Pedro is en langen parkordig anleggten Platz, de en bedüdende Ass dorstellt un de Böver- un de Ünnerstadt vunenanner scheedt. In de Böverstadt („Vila Riba“) hebbt in histoorsche Tieten de Slaven leevt, wiel de rieken Lüüd an’t Water in de Ünnerstadt („Vila Baixa“) wahnen deen. De Ünnerstadt warrt vun smucke olle Hüüs in’n Kolonialstil – de Sobrados – bestimmt. Se staht ünners üm de Praça 12 de Setembro, woneem ok dat Raathuus steiht. En beten wieter tsieht ok de eenfache Kark Igreja Nossa Senhora da Conceição, de de portugeeschen Schuulhilligen, de Empfängnismadonna weiht is[1].
De Hüüs staht to’n groten Deel an’n Rand to’n Verfall, man siet 2000 gifft dat jümmer mehr ok Lüüd, de disse Hüüs in privaten Besitt övernehmt un restaureert. De Stadtverwalten sett sik dorför in, dat dit kulturelle Arv behollen blifft. De Stadt is vörslahn worrn för de List vun dat Weltarv vun de UNESCO.
Klima
[ännern | Bornkood ännern]De dörsnittlichen Temperaturen an’n Dag wesselt över’t Johr twüschen 23 °C un 28 °C, mit de warmsten Maanden vun Juli bit Anfang November. Regen fallt in São Filipe blots wenig. De Mannden mit de gröttsten Regenwohrschienlichkeit sünd August un September, wobi de Nedderslag in’n Snitt in beide Maanden ünenr 100 mm blifft[2].
Weertschop
[ännern | Bornkood ännern]
São Filipe is för Fogo de Verbinnen nu de Butenwelt un somit de weertschoppliche Levensader vun’t Eiland. De Hannelsworen kamt tomeist mit Scheep över den Haven Vale dos Cavaleiros na Fogo, de ruchweg veer Kilometer wieter na Noorden liggt. In’n Haven leegt ok de Fischerbööd; as ok bi de annern Eilannen vun de Kapverden, stellt Fisch en wichtige Grundlaag för de Etensversorgen vun de Inwahners dor. Hannels- un Fährschipp hebbt den Haven vun Fogo dreemol in de Week anstüert, man to Tiet is de Versorgen nich regelmatig, as de Fährlien dorhen 2008 twee Scheep verloren hett. Eenmol in de Week fohrt en Fährschipp röver na’t Navereiland Brava.
De tweete Verbinnen na annere Eilannen is de Flaaghaven (IATA-Kood: SFL), de ruchweg dree Kilometer in’n Oosten vun de Stadt liggt.
Borns
[ännern | Bornkood ännern]- ↑ a b c Kapverdische Inseln, Dumont Reisetaschenbuch, 3. Oplaag, 2007, ISBN 3-7701-5968-3
- ↑ Landkoort Fogo Brava 1:60.000, Attila-Bertalen-Kartenverlag, Karlsruhe, 2002, ISBN 3-934262-03-1
Weblenken
[ännern | Bornkood ännern]
Koordinaten:14° 54′ N, 24° 30′ W