Lublin
Lublin is de up acht nå grötste stad van Polen en eyn nå grötste stad van et historiske Klein-Polen. Et is de höyvdstad un swöärdepunt van et Voivodeskop Lublin un der woanden in 2021 sou'n 336.000 lüde. Lublin is de grötste poolske stad up et ousten van de Vistula un ligt ungeväär 170 kilometer når et süüdousten vanaf Warsjau.
De stad hevt vöäle te danken an de Poolsk-Litouwske Uny van Krewo van 1385. Lublin leade günstig vöär den handel tüsken Vilnius un Krakau. A'j in Lublin woanden möäg y vry handelen in et Grouthartogdom Litouwen. In 1569 unstünd der noch nen nauweren band, do as et Poolsk-Litouwske Gemeynebest esticht wör. In de 16. eywe makeden de stad de Reformaty van kortby med. Der wör ne kalvinistiske gemeynde sticht un grupen fyne arianisten kümmen in de stad to woanen.
Vöär at et heyle spül upedeyld wör teagen et ende van de 18. eywe was Lublin ne köäninglike stad van et Köäningryk Polen. Ingeseatenen van de stad un ädelen mochten meddoon an de köäninglike verkesingen. In 1578 wör Lublin aneweysen as stad van et Krountribunaal, et höygste gerechtshov van et Gemeynebest. Eywenlange tröäk dat vöärnaam volk an, wat ouk good was vöär de stadskas.
In 2011 weys de Financial Times Group Lublin an as eyne van de beste sakenstäden van Polen. Lublin steyt bekend üm de gröne gebeden un houge leavensstandaard. In 2023 wör et eköäsen as Europääske Jöägdstad. De historiske binnenstad is eyne van Polens nationale monumenten (Pomnik historii) un steyt under beheyr van de Nationale Arvgoodråd van Polen.