Gioxeppe Marzari

Gioxeppe Marzari (Zena, 31 zenâ 1900 - Zena, 4 zùgno 1974) compoxitô, attô, muxiçista e cantante, o fu un artista fenomenale e un di scimboli da Zena do XX seccolo.

Biografia

Nasciuo a Zena into 1900 de famiggia istrian-a, so poæ o l'ea o diretô da banda da l'UITE (Union Italian-a Tranvie Elettriche), o l'exordì into 1921 a-o tiatro "A Bombonea" de via Frugon.

Artista d'avanspetaccolo, o l'interpretava caregatue, monolloghi, scenette e cansoin commiche e romantiche, scrite da diversci aotoî, tra i quæ Giggio Ansermi e Dario G. Martini, mentre e muxiche o se-e scriveiva da lê.

O l'ea dito Nafta perchè, pâ che, comme i motori diesel, o ghe mettesse in po pe piggiâ l'asbrio, ma 'na votta partîo no ti l'afermavi ciue.

O l'ha incizo ciu che 3000 dischi, vendui in mioin de copie e o l'è stæto traduto inte squæxi tutte e lengoe regionale italian-e e inte quarche lengua foresta ascì, intrando into repertoio di comici de meza Europa.

Sciben ch'o foise 'n artista de atiscima levatua o no l'è mai ariescio a impon-ise a livello naçionâ.

Into 1947, za stæto çernuo comme protagonista do spettacolo radiofonico “La Bisarca”, foscia pe 'n'incompatibilitæ de carattere co-i fonsionai da RAI, o fu sostituio co-o Riccardo Billi.

A partî da-o 1946, scin a-a fin, o l'ha parteçipou a-o programma radiofonnico A Lanterna pe 'n totale de 392 transmiscioin. Lê o l'impersonava o çellebre Sciô Ratælla e a so rubrica a s'intitolava Il Bazar del mugugno. L'aotô d'i scriti o l'ea o Darrio G. Martin ch'o pigiava e lettie di ascoltatoî e o-e metteiva in rimma insemme a-a risposta da daghe adattandole a-a melodia de cansoin ciù in veuga do momento, a l'uso quelle do Festival de Sanremmo, e o Marzari o e cantava. A muxica da sigla invece, scelta da-o Martin, ma composta anni avanti da-o Marzari, a l'ea quella do ritornello da "Tomata da Babilonnia".

O primmo riconoscimento ufiçiale o gh'è arrivou solo che into 1971, durante un’ediçion speciale de A Lanterna.

Un anno primma da so morte, o l'ebbe a sodisfaçion de comparî insce a televixon naçionâ inta comeddia La locandiera di Sampierdarena, adattamento do Darrio G. Martin de Ra locandera de San Pê d'Areña do Steva de Franchi, co-a parte do "Ghigermo" e co-a Lin-a Volonghi inte quella de l'Argentin-a.

O moì o 4 de zugno do 1974.

O l'ha lasciou ciu dischi che palanche.

Discografia

Pe 'na lista parçiale e aproscimativa di peççi do Marzari vanni a-a paggina chi de d’âto.

Filmografia

O so nomme o compâ into cast de træ peliccole italian-e:

• Solo per te, Lucia, 1952
• Martin Toccaferro, 1953
• Dramma nel porto, 1955

Ligammi esterni

• Canson a-a reversa, in sce youtube.com. URL consultòu o 18 màzzo 2021.
• Il barbiere di Soziglia, in sce youtube.com. URL consultòu o 18 màzzo 2021.
• Roba da matti, in sce youtube.com. URL consultòu o 18 màzzo 2021.
• Toponomastega zeneize, in sce youtube.com. URL consultòu o 18 màzzo 2021.
• A paggina do scito de l'Academmia Ligustega do Brennno dedicâ a G. Marzari
• A paggina de Dumsinandi dedicâ a G. Marzari, in sce youtube.com. URL consultòu o 18 màzzo 2021.
• (EN) Giuseppe Marzari, in sce discogs.com. URL consultòu o 25 arvî 2021.
• Testo do dilûvvio universâle, in sce oocities.org. URL consultòu o 18 màzzo 2021.