Onegamaer

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

't Onegamaer (Róssisch: Онежское озеро Oneschskoje osero; Karelisch: Oniegu; Fins: Ääninen of Äänisjärvi) is e maer in 't wèste van Róslandj en is nao 't Ladogamaer 't grótste maer van Europa. De oppervlaakdje bedruueg 9.616 km² en 't deepste stök ligk op 127 maeter ónger 't water. 't Maer zelf ligk op 'n huuegdje van 33 maeter baove zieëspegel. 't Is mitte reveer de Svir verbónje mit 't zuudwèsteliker gelaenge Ladogamaer, wovanoet dore Neva 't water wiejer ziene waege vindj nao de Finse Golf.

In 't maer ligke taal aan eilenj, wovan Kizji wichtig is veure houtere (kirk)arsjitektuur, woveur 't ouch inne Werreldirfgoodlies steit. De grótste stad aan 't maer is de Karelische houfstad Petrozavodsk ane wèskantj.

't Maer maak e deil oet van wichtige sjeepvaartwaeg. Sieër 1933 verbindj e knaal van 227 kilomaeter lank 't maer mitte Witte Zieë. Dit knaal, 't Witte Zieë-Baltische Zieëknaal is 't langste van Europa. Ouch is 't maer door 't Wolga-Oeaszieëknaal verbónje mit 't Stoewmaer van Rybinsk inne Wolga.

Ane zuudwèskantj van 't Onegamaer wone de naordelike Wepse, 'n etnische minderheid die 'n spraok höbbe die nej-verwantj is aan 't Fins, 't Wepsisch.

Anen oeaskantj van 't maer haet me zujelik vanne munjing vanne Vodla inne neugentieëndjen ieëf wichtige petrogliefe vónje. Dees zeen intrintj 6000 jaor aad en waere toegesjreven ane veureljers vanne hujige Wepsen en Finne.