Sigurd
Sigurd (norsce vea: Sigurðr) o Siegfried (deutx alta media: Sîvrit) es un eroe lejendal de mitolojia germanica antica (incluinte mitolojia norsce antica), ci ia mata un dragon e ia es plu tarda matada se mesma. Lo es posible ce el ia es inspirada par un o plu figures de la dinastia merovingian de la francos, con Sigebert 1 como la posible plu popular. Studias plu vea lia el a veses con Arminio, la vinsor de la batalia de la foresta de Teutoburg. El pote ance es sola de un orijina mitolojial. La nara de Sigurd ia es prima atestada sur un serie de siselidas, incluinte petras de runas de Sveria e cruses de petra de Britan, datida de la sentenio 11.
En la tradisiones norsce e deutx continental, Sigurd es mostrada como morinte como la resulta de un disputa entre sua sposa (Gudrun/Kriemhild) e un otra fem, Brunhild, ci Sigurd ia engana per sposi la re burgundian Gunnar/Gunther. Sua mata de un dragon e posese de la tesoros de la nibelungen es ance comun en ambos tradisiones. En otra casos, la du tradisiones diverje. La obras la plu importante cual inclui Sigurd es la Nibelungenlied, la saga Volsunga, e la Edda poesial. El ance apare en multe otra obras de la mundo germanica, incluinte un serie e baladas medieval e temprana moderna de Scandinavia.
Richard Wagner ia usa la lejendas de Sigurd/Siegfried en sua operas Siegfried e la Gotterdammerung. Wagner ia depende multe de la tradision norsce en crea sua varia de Siegfried, e ia influe multe otra varias. En la sentenios 19 e 20, Siegfried ia deveni forte asosiada con nasionalisme deutx.
La Thidrekssaga fini sua nara de Sigurd como esta:
Tota ia dise ce no om vivente aora o sempre pos ta nase ci ta es egal a el en fortia, coraje, e tota otra tipos de cortesia, e ance en osa e jenerosia cual el ia ave supra tota omes, e ce sua nom ta mori nunca en la lingua deutx, e la mesma ia es vera con la norsces.