Anguis colchica

Anguis colchica é unha especie de réptil da orde dos escamosos, familia dos ánguidos e subfamilia dos anguinos, unha das cinco comprendidas dentro do xénero Anguis.

Taxonomía

Descrición

A especie foi descrita en 1840 polo botánico, zoólogo e paleontólogo finlandés de orixe sueca e súbdito do Imperio ruso Alexander von Nordmann, baixo o nome de Otophis eryx var. colchica.

Etimoloxías

Para a do xénero, véxase Anguis.

O epíteto específico, colchica, é o nominativo feminino do adxectivo latino colchĭcus, -a, -um, "da Cólquida, rexión de Asia Menor".

Sinónimos

Ademais de polo nome actualmente válido, a especie coñeceuse tmen polos sinónimos:

• Anguis incerta Krynicki, 1837
• Anguis fragalis var. colchica Werner, 1903
• Anguis fragilis colchicus Roitberg et al., 2000
• Anguis fragilis colchicus Bischoff, 2002
• Anguis fragilis colchicus Sos, 2007
• Anguis fragilis colchicus Rastegar-Pouyani et al., 2008
• Anguis fragilis colchica Razzetti et al. in Zuffi, 2006
• Anguis colchica Jablonski & Meduna, 2010
• Anguis colchica incerta Jablonski & Meduna, 2010
• Anguis colchica colchica Gvoždík et al., 2010
• Anguis colchica incerta Gvoždík et al., 2010
• Anguis colchica orientalis Gvoždík et al., 2010
• Otophis eryx var. colchica Nordmann, 1840 (protónimo)

Notas taxonómicas

Esta especie foi considerada durante moito tempo unha subespecie de Anguis fragilis. Hoxe considérase unha especie separada.

Gvoždík et al. distinguen seis grupos xenéticos no xénero Anguis: Anguis cephallonica, Anguis fragilis, Anguis graeca, Anguis colchica colchica, Anguis colchica incerta e Anguis colchica orientalis.

Características

A lonxitude total desta especie alcanza até os 59 cm (a cabeza e o tronco, até os 29 cm). As femias son un pouco máis grandes que os machos. Os animais novos teñen unha lonxitude total de 6 a 12 cm. O corpo é alongado, sepentiforme, sen patas. Case sempre se ve unha abertura do oído externo. No medio do corpo hai de 26 a 30 fileiras lonxitudinais de escamas. As femias teñen as partes superiores claras de cor chumbo, que destacan dos flancos máis escuros e, normalmente, presentan unha liña traseira escura. Os machos teñen a cabeza máis grosa que as femias. Son de cor agrisada, parda clara ou parda avermellada nas partes superiores, e non son tan ricos en contraste como as femias ou os animais novos; a miúdo carecen da liña central, pero adoitan ter pequenas pregas no lado superior, que son moito máis raras nas femias. Os animais novos son moi claros nas partes superiores, de cor de case esbrancuxada a amarelada pálida, dourada ou gris prateada, e teñen marcas marróns escuras en forma de bágoa e unha liña estreita de cor marrón negra.^{[Cómpre referencia]}

Distribución xeográfica

Anguis colchica encóntrase en Bulgaria, Eslovaquia, Lituania, Polonia, República Checa, Romenia, Rusia, en Europa, e en Irán.

Véxase tamén

Bibliografía

• Glandt, Dieter (2015): Die Amphibien und Reptilien Europas: Alle Arten im Porträt. 2. Wiebelsheim: Quelle & Meyer Verlag. ISBN 978-3-494-01581-1, pp. 329–330.

Outros artigos

• Ánguidos
• Anguis