God strikkejul frå Vottelauget

God jul til alle strikkeglade som har følgd oss denne adventstida! Her på fotoet har den nystrikka #julevotten2021 av Tori fått selskap av #julevotten2020 og #julevotten2018 av Wenche, pluss dei julete vottane Grantreet av Møyfrid.

Hugs at om du rekk å strikke ferdig eit par av årets julevott – som no altså har fått namnet Grepa julevott – før nyttårsaftan 31. desember (dvs ny og forlenga frist) og legg ut foto på Raverly, donerer Tori 10 kr per ferdige par til Røde Kors. 

Så strikkar vi den fjerde vott ...

Vottar kan brukast til så mangt, både til å varme frosne fingrar – og til å lyse opp som dekorasjon på hendene eller i heimen. Ei strikkeoppskrift kan også varierast i det uendelege:

Desse fuglane dukka først opp som tommelmønster på dei julete vottane Grantreet (fotoet under), som også er tittelen på eit vakkert og vemodig eventyr av ein av mine litterære favorittar: H. C. Andersen. Deretter landa dei på babyvottane Tommelise (på fotoet over i rolla som fire adventslys) som har henta namnet sitt frå eit anna eventyr av den danske meisteren. 

Og dei to fuglane vart så forelska at dei ville kvitre til kvarandre både vinter og vår, så dermed heng dei også her på veggen i hjarteform. 

Raudglødande masker

 

Ein av mine favorittfargar er raudt. Raudt er vulkansk energi, boblande kjærleik – og julestemning! Og raude vottar varmar ekstra godt, gjer dei ikkje det ...? Her er fire single vottar som kosar seg i lag på brannsikkert adventsparty. 

Frå venstre: Eventyrlauv, Nordstjerna, Gullfuglen og Grantreet - alle frå boka vår Eventyrvotter. 

Fuglane er landa. Og kven vann?

Foto/copyright: Kathrin Storheil (montasje: M. Engeset).

I heile september har vakre fuglar blitt forma i masker og viste fram, både i Facebook-gruppa vår, og på Instagram under emneknaggen #vottefugl. Hurra for alle som har deltatt i septembersamstrikkinga!

Kathrin Storheil starta med  å leggje ut eit undervegs-foto (til venstre) seint ein måndagskveld, då følgde ho nemleg valvaka på tv. Og ikkje lenge etter dukka det ferdige votteparet opp: Nattergalen i delikate, avdempa fargar i garnet Drops Karisma. Gratulerer, Kathrin, du vart uttrekt som vinnar mellom alle bidraga som kom inn på Facebook. Den spesiallaga strikkeposen vår er snart undervegs til deg, med nokre mjuke overraskingar oppi.

Foto/copyright: Mari Stormo (montasje: M. Engeset)

På Instagram trekte vi ut profilen marihonasknit, altså Mari Stormo, som under den korrekte knaggen #vottefugl viste fram to søte Tommelise-par strikka i restegarn.  Mari har også skrive om desse babyvottane på bloggen Marihønas lille garnverden, og det er moro å sjå at ho allereie er i gang med eit nytt par frå boka vår, nemleg Bukkene Bruse.

Gratulerer Mari, du får snart premien i posten, nemleg eit strikkepinneetui - med vottemotiv (så klart!).

Foto/copyright: Turid Engløkk (montasje: M. Engeset)

Aller helst skulle vi ha gitt premie til absolutt alle som deltok, men i tillegg til dei to vinnarane (som altså var tilfeldig trekning) vil vi gjerne gi ekstra applaus til Turid Engløkk, som stilte med heile fire ferdigstrikka par i denne uhøgtidelege konkurransen. Tre ulike Grantreet-vottar (alle med stilige stjerner påsydde i toppen), pluss eit vakkert par Gullfuglen i finull. Turid, strikkeposen vår med Eventyrvotter-motivet er snart på veg til deg. 

Vel, no har vi vinka farvel til september, og seier hallo til oktober, med #votteflora. For no blir det nye vinnar-sjansar! Denne månaden vil vi altså inspirere til frodige vottefoto på Instagram. Ta gjerne med deg dei ferdigstrikka fuglevottane frå september, eller anna og nytt strikk frå boka vår, og ta ein tur utandørs på jakt etter fotomotiv.

Her er dei fire vinnarane!

Gratulerer til Ullugla, som var den kjappaste til å gjette rett tittel på mønsteret Tre nøtter til Askepott av Tori. Gratulerer også til den andre vinnaren, Martha Joy, som vart trekt ut mellom alle som la inn kommentar på denne gjettekonkurransen.

Hurra! seier vi også til Veronica A., som var først til å gi heilt korrekt tittel på mønsteret til Frida: Grantreet, inspirert av eventyret til H. C. Andersen. Namnet på den andre vinnaren er: Aase, ved tilfeldig trekning. 

Til alle fire: Send e-postadressa di (og Raverly-kallenamn om du har) til oss på frida.fielding(krøllalfa)yahoo.com 

slik at vi kan få gitt deg e-boka. 

Vonlegvis får desse fire denne premien allereie i morgon,  tysdag 16. desember, for då lanserer vi den nye e-boka vår! 

PS: Litt seinare i dag presenterer vi det tredje av dei sju nye vottemønstera våre, og dét namnet kan vi rope høgt: Askeladden!