Renkontiĝo de Esperantistaj Familioj

REF
Nomo	Renkontiĝo de Esperantistaj Familioj
Regiono	Eŭropo
Periodo	somero
Organizanto	diversaj
Ekzistas ekde	1978
Celgrupo	familioj
Informa retpaĝo	Esperantistaj familioj
Fota retpaĝo	REF 2005

Renkont(iĝ)o de Esperantistaj Familioj aŭ mallonge REF estas tradicia ĉiujara renkontiĝo de Esperantaj familioj kun infanoj, kiuj aktive aŭ pasive uzas Esperanton en la familia vivo.

La ĉefa ideo de REF estas, ke ĝi estas komuna aranĝo de ĉiuj familioj, por ĉiuj kune. En la kreado kaj realigo de la programo tial aktive partoprenas ĉiuj gepatroj. Tio montriĝas ne nur en la preparado de la programeroj mem, sed ankaŭ en neformala, persona komunikado kun infanoj de aliaj gepatroj. Tiel la infanoj unuflanke aŭdas kaj spertas alian lingvaĵon ol la gepatran kaj aliflanke sentas sin kvazaŭ en parenca medio kun multaj geonkloj.

Se vi volas esti regule informita pri la organizado de la venonta REF, aliĝu al la grupo REFanoj ĉe Google Groups.

Pasintaj kaj planitaj renkontiĝoj

(-a: Kiom-a | F: nombro de Familioj | L: nombro de Landoj | H: nombro de Homoj | T: nombro de Tagoj)

-a	Urbo	Lando	Jaro	F	L	H	Organizantoj	T
1	Hódmezővásárhely	Hungario	1979	7	4	25	Csiszár	7
2	Szombathely	Hungario	1980	10	4	27	Wacha	7
	Krom-REF Pápa	Hungario	1981	14	9	94	Csiszár	7
3	Žilina	Slovakio	1981	11	5	29	Csiszár+slovakoj	7
4	Augusztin-tanya	Hungario	1982	5	3	18	Csiszár	7
5	Sümeg	Hungario	1983	15	16	74	Csiszár	7
6	Veszprém	Hungario	1984	13	6	42	Csiszár	7
7	Pag	Kroatio	1985	6	4	27	Tišljar	7
8	Zagornik	Pollando	1986	12	6	39	Pochanke	7
9	Őriszentpéter	Hungario	1987	13	7	46	Csiszár	7
10	Szentgotthárd	Hungario	1988	-	9	-	Csiszár	7
11	Győr	Hungario	1989	21	9	63	Horvath	8
12	Slovaka Paradizo	Slovakio	1990	18	7	56	Reinvart	7
13	Őriszentpéter	Hungario	1991	15	8	48	Csiszár	7
14	Őriszentpéter	Hungario	1992	14	9	45	Csiszár	7
15	Sümeg	Hungario	1993	16	9	51	Csiszár	7
16	Maribor	Slovenio	1994	20	8	60	Tišljar Pajo	7
17	Tata	Hungario	1995	23	7	76	Besenyei Anna	7
18	Bratislava	Slovakio	1996	25	13	78	Reinvart	8
19	Savudrija	Kroatio	1997	19	10	65	Tišljar-Jagnjic	14
20	Mosonmagyaróvár	Hungario	1998	22	12	73	Slezák	7
21	Przytok	Pollando	1999	11	8	32	Knabe+Lu Wunsch	14
22	Vác	Hungario	2000	13	8	52	Bagó	14
23	Savudrija + FF	Kroatio	2001	-	-	72	Tišljar-Jagnjic	14
24	Sikonda	Hungario	2002	20	11	72	Slezák	?
25	Kastelo Greziljono, Baugé	Francio	2003	21	11	79	Schumann	7
26	Mali Iđoš-Kishegyes	Serbio	2004	24	10	92	Csőke	8
27	Cierzpięty, Piecki	Pollando	2005	19	11	79	Sözüer	10
28	Pilský Mlýn, Písek	Ĉeĥio	2006	26	11	93	Dvořák(ová)	14
29	Nagyvisnyó	Hungario	2007	20	10	68	Vas-Szegedi Julianna	14
30	Kastelo Greziljono, Baugé	Francio	2008	20	13	74	Schumann	7
31	Mali Iđoš-Kishegyes	Serbio	2009	24	14	79	Csőke	12
32	Stara Sušica	Kroatio	2010	15	11	59	Radovanović, Filipčić	14
33	Lesjöfors	Svedio	2011	13	12	51	Lundberg	10
34	Sayda	Germanio	2012	22	12	69	Diestel, Schlesinger	12
35	Kastelo Greziljono, Baugé	Francio	2013	25	10	80	Hurstel	7
36	Lesjöfors	Svedio	2014	9	9	33	Petrović Lundberg	10
37	Esztergom-Búbánatvölgy	Hungario	2015	20	12	61	Dévai, Acsádi	11
38	Fužine	Kroatio	2016	20	12	71	Radovanović, Filipčić	11
39	Rudnik Arkivigite je 2018-03-19 per la retarkivo Wayback Machine	Serbio	2017	14	12	46	Petrović, Lundberg	10
40	Mühlhausen (Turingio)	Germanio	2018	20	10	67	Weemeyer	11
41	Mühlhausen (Turingio)	Germanio	2019	24	10	73	Weemeyer kaj Zesch	11
42	Gosau	Aŭstrio	2021	8	6	29	Cramer	10
43	Hegyhátszentjakab	Hungario	2022	8	5	35	Acsádi	11
44	Kastelo Greziljono, Baugé	Francio	2023	?	?	?	Godivier, Cramer, Weemeyer	11

REF 2023

La 44-a REF okazis de la 25-a de julio ĝis la 4-a de aŭgusto 2023 en Kastelo Grezijono, Baugé, Francio. Retpaĝo: [1]

REF 2022

La 43-a REF okazis inter la 21-a kaj la 31-a de julio 2022 en Hegyhátszentjakab (Hungario). Ĝin organizis Veronika Acsádi. Retpaĝo: [2]

REF 2021

La 42-a REF estis origine planita por inter la 22-a de julio kaj la 1-a de aŭgusto 2021 en Ispánk (Hungario) kun ĉeforganizantino Veronika Acsádi, sed ne povis okazi tie pro vojaĝlimigoj en Hungario rilataj la kronvirusa pandemio. La plano por REF en Hungario estis prokrastitia al julio 2022. Anstataŭe REF okazis de la 2-a ĝis la 11-a de aŭgusto 2021 en Gosau (Aŭstrio). Ĝi estis malpli granda ol kutime kaj estis lastmomente organizita de familio Cramer kun helpo de aliaj partoprenantoj.

REF 2020

La 42-a REF estis planita por inter la 23-a de julio kaj la 2-a de aŭgusto 2020 en Ispánk (Hungario) kun ĉeforganizantino Veronika Acsádi, sed ne okazis pro la kronviruso kaj estis prokrastitia al julio 2021.

REF 2019

La 41-a REF okazis inter la 22-a de julio kaj la 1-a de aŭgusto 2019 en la sama urbo kiel en la antaŭa jaro, Mühlhausen (Turingio) (Germanio). Ĝin organizis Carolin kaj Robert Weemeyer kaj Felix Zesch. Retpaĝo: [3]

REF 2018

La 40-a REF okazis inter la 21-a kaj la 31-a de julio 2018 en Mühlhausen (Turingio) (Germanio). Ĝin organizis Carolin kaj Robert Weemeyer. Retpaĝo: [4]

REF 2017

La 39-a REF okazis inter la 21-a kaj la 31-a de julio en Rudnik (Serbio). Ĝin organizis Radojica Petrović kaj Sonja Petrović-Lundberg. Retpaĝo: [5]

REF 2016

La 38-a REF okazis inter la 18-a kaj la 29-a de julio en Fužine en Kroatio. Ĝin organizis familio Radovanović/Filipčić. Retpaĝo: [6]

REF 2015

La 37-a REF okazis inter la 15-a kaj la 26-a de julio en Esztergom Búbánatvölgy en Hungario. Ĝin organizis Veronika Acsádi kaj Krisztina Dévainé Gede. Retpaĝo: [7]

REF 2014

La 36-a REF okazis inter la 1-a kaj la 10-a de aŭgusto en la Esperanto-Domo en Leŝeforso en Svedio. Ĝin organizis Hokan Lundberg kaj Sonja Petrović Lundberg. Retpaĝo: [8]

REF 2013

La 35-a REF en okazis inter la 27-a de julio kaj la 3-a de augusto ree en la kastelo Grezijono. Ĝin organizis familio Hurstel. Retpaĝo: [9]. Kelkaj familioj plilongigis sian restadon kaj partoprenis Festan Semajnon por infanoj kaj familioj [10]

REF 2012

La 34-a REF okazis inter la 29-a de julio kaj la 10-a de augusto ĉe la urbo Sayda en la federacia lando Saksio de Germanio. La renkontiĝo estas organizita de Christine Brücker, Constanze Schlesinger, Lars Sözüer kaj Wolfram Diestel. Retpaĝo: [11]

REF 2011

La 33a REF okazis inter la 22-a kaj la 31-a de julio en la Esperanto-Domo en Leŝeforso en Svedio. Ĝi estis organizata de Hokan Lundberg kaj Sonja Petrović Lundberg. Retpaĝo: [12] Arkivigite je 2010-12-15 per la retarkivo Wayback Machine Fotoj: [13]

REF 2010

La 32-a REF okazis inter la 25-a de julio kaj la 8-a de aŭgusto 2010 en la infanripozejo/kasteleto Stara Sušica en Kroatio, en la montara regiono Gorski Kotar duonvoje inter Zagreb kaj Rijeka. Ĝi estis organizata de Vanja Radovanović el Zagrebo. Retpaĝo: [14] Arkivigite je 2010-04-05 per la retarkivo Wayback Machine

REF 2009

La REF 2009 okazis de la 3-a ĝis la 15-a de aŭgusto 2009 en la hungarlingva vilaĝo Mali Idjoŝ en Vojvodino en Serbio. Jen la hejmpaĝo de la Renkontiĝo de Esperantistaj Familioj (REF) 2009.

REF 2008

La 30-a REF 2008 ree okazis en la kastelo Grezijono. Ĝis estis organizita de Bert Schumann. Jen ĝiaj hejmpaĝo kaj fotaro Arkivigite je 2017-03-02 per la retarkivo Wayback Machine.

REF 2007

La REF 2007 okazis inter 22.7. kaj 4.8.2007 en Nagyvisnyó en orienta Hungario, por esti geografie pli facile atingebla ankaŭ por event. novaj E-familioj el orienta kaj sudorienta Eŭropo.-

REF 2006

REF 2006 - komuna foto

La 28-a renkontiĝo okazis inter la 15-a kaj 29-a de julio en Pilský Mlýn apud Sedlice (Ĉeĥio, Sudbohemia regiono). Ĝin partoprenis entute 86 personoj (inter ili pli ol 40 ĉiuaĝaj infanoj) el 11 landoj de Eŭropo (15 kompletaj familioj, 6 duonfamilioj, 1 paro kaj 4 unuopuloj alfabetvicorde el Belgio, Britio, Ĉeĥio, Danio, Hungario, Francio, Germanio, Kroatio, Norvegio, Pollando kaj Svislando).

Aktivaĵoj

Post ĉiutaga antaŭtagmeza kantado okazadis manlaboraj kursetoj - produktado kaj ornamado de papero, dratado, origamio, kirigamio, ornamado de T-ĉemizoj, konstruado de kasteloj el kartono ktp. Pro granda sukceso jam la trian jaron denove okazis ornamado de marcipankuketoj, kiujn infanoj tuj post la ekspozicieto povis mem formanĝi aŭ donaci.

Malgrandaj infanoj povis ĝui en sia ludĉambro plurfoje posttagmanĝan fabellegadon kaj vesperan fabelprojekciadon (plej furoris famaj ĉeĥaj filmetoj pri "Talpeto", sukceson havis ankaŭ tutvespera filmfabelo "Lotrando kaj Zubejda", kiun esperante komplete subtitoligis membroj de Ĉeĥa esperanto-Junularo.

Pluraj knabinoj partoprenis en la Fabela ateliero, en kiu ili mem elpensis, enkomputiligis kaj eĉ surscenigis propran fabelon; kelkaj aliaj infanoj ekz. mem kreis siajn proprajn ilustritajn libretojn en Esperanto.

Krom populara ŝak- kaj tablotenisa turniro, banado kaj remado en apuda fiŝlago, instruado de sudoku, netradiciaj olimpikoj kaj futbala matĉo infanoj kontraŭ gepatroj oni multe ĝuis ankaŭ t.n. homan futbalon, dum kiu oni ne ludis kun pilko, sed la golo estis atribuita, se iu ludanto sukcesis netuŝite trakuri la golejon. Ne mankis ankaŭ diversaj travivaĵludoj en la naturo, nokta kuraĝludo, dum kiu la infanoj vizitis la arbaran spiriton en lia kabanaĉo kaj dum kies preparado bone amuziĝis ankaŭ la plenkreskuloj ktp.

Vespere oni lernis komune danci diversajn popolajn kaj latinamerikajn dancojn (plejparte kun vive ludata muziko), ĝuis teatraĵetojn, preparitajn de la partoprenantoj mem, rostis bongustaĵojn sur la bivakfajro, spektis E-filmojn, vojaĝprezenton pri Islando, sed ankaŭ simple kartludis aŭ babilis sub stelbrila nokta ĉielo ....

Ekskursoj

Ankaŭ la karaktero de la ekskursoj estis laŭeble adaptita al bezonoj kaj interesoj de infanoj: ekz. dum la vizito de la proksima urbo Písek ne okazis kutima promenado kun ĉiĉerono, sed kreiĝintaj grupetoj trairis mem laŭ la priskribo kaj mapo la itineron kaj solvis taskojn de la urba serĉludo. Same en la bestoĝardeno la infanoj devis pli atente rigardi, ĉar ilia premiota tasko estis trovi, kiu el la dek fotitaj bestoj en la bestoĝardeno tute ne troviĝas ....

Unu el ĉi-jaraj REF-novaĵoj, preparitaj de la lokaj organizantoj, estis granda ludo, daŭranta dum la tuta aranĝo, dum kiu la infanoj helpis resanigi fabelan,Esperante-parolantan karpon Jakobon, loĝantan en la apuda fiŝlago, per siaj agoj kolektante monon por la mirakla kuracakvo. Krome pro aktiva partopreno en unuopaj programeroj ili ricevis de la karpo fabelan monon, kiun ili povis la lastan tagon uzi dum aĉetado en porinfanaj butikoj kun diversaj bongustaĵoj kaj ludiloj.

Muzikumado

Sendube nelastvice jam tradicia parto de REFoj estas komuna muzikludado - la muzikemaj partoprenantoj (plenkreskuloj kune kun la infanoj) ĉi-jare per komunaj fortoj i.a. okazigis eĉ du koncertojn, unu pri renesanca muziko en la kasteleto Kratochvíle, kaj unu diversstilan publikan koncerton en la urbo Písek.

Organizintoj

Organizinta familio estas Pavla kaj Vladimir Dvorak el Písek. La retpaĝon de REF 2006 eblas vidi en http://www.ref.esperanto.cz

Literaturo

DVOŘÁKOVÁ, Pavla. (La 28-a) Renkontiĝo de Esperanto-Familioj la unuaj fojon en sia historio okazis en Ĉeĥio. En: Starto, 2006- n-ro 3, pp. 83-85 ([15])

REF 2005

En 2005 13 - 23-a de julio okazis REF en la feriejo "Stanica Wodna" ĉe la lago "Mokre", Mazurio, norda Pollando.

Informojn: PHU Stanica Wodna S.C., Ośrodek Sportowo - Turystyczny, Cierzpięty, PL-11-710 Piecki, Pollando

Jen ĝia hejmpaĝaro kaj la fotaro.

REF 2004

REF 2004 - komuna foto

En 2004, inter la 31-a de julio ĝis la 7-a de aŭgusto 2004 okazis en Mali Idjoš, aŭtonoma provinco en Serbio, la 26-a Renkontiĝo de Esperantistaj Familioj. Partoprenis ĝin 92 familianoj, el kiuj 51 infanoj el 10 landoj. Okazis du interesaj ekskursoj al Subotica kaj al la lago Palič, kie troviĝas alloga zooĝardeno.

La ĉiutaga gazeto Dnevnik aperigis la 15-an de aŭgusto preskaŭ tutpaĝan artikolon pri REF kun la titolo Parolu Esperanton por ke ĉiu komprenu vin. Por la renkontiĝo estis farita bela kolora afiŝo.

REF 2003

Inter la 5-a kaj 12-a de julio, la renkontiĝo okazis en Kastelo Grezijono en Francio. Jen ĝia hejmpaĝaro (web archive), jen fotopaĝaro.

Eksteraj ligiloj

• Tabelo pri la renkontiĝejoj ekde la unua
• Raporto pri REF 2018 sur la blogo Stela ĉiam nur kritikas
• Denaskuloj en danĝero, fabelo kaj filmeto kreita dum REF 2018 en Mühlhausen, Germanio
• La lupdraka ludo kaj la timema princo, fabelo kaj filmeto kreita dum REF 2019 en Mühlhausen, Germanio