Laeliwot va TanzaniaKilimanjaro mefta, ane ontine ke Tanzania is Afrika
Pozlakelor is savsafa azekexa is tculktraspuxa
Tanzaniaxo va taltef kelor ke Rift Valley koe Ronefa Afrika ( kerelenaf gu Tanganyika uzda isu Rukwa isu Malawi ) is India welfa walenir. Va pakavapa ke ontinafa azekexa ke Uzdapaxo kale darefo taltefo selorxo, is va titefo krimtaxo wale Usambara mefteem is bostartexo ke Ruvuma baton ruldar. Kene bato krimtaxo konaka pokefa ewala tigid, telyona logijafa tisa Pemba is Zanzibar is Mafia.
Maji-Maji tcumivera ke 1905Julius Nyerere, taneaf taneagadesik va Tanzania
Arabafa turestara
Tela taneafa izvafa vuestexa va krimteem ke Ronefa Afrika is noelafa tadavafa Tanzania is Pemba ewala isu Zanzibar tid koe « Anamekoyara va Ertra bira » suteks sutelayan gan dolekik ke Aliskanderia moni II-eafa decemda. Tir totarafa is kazafa nyaperaneva icde molteem ke Araba is Barata is Ronefa Afrika ( savsugalikeem kan Ertra Bira va Kerafa Bira is India Welfa is Araba Witalu belcon yoltayar ). Koeon ravet da tozi fird gubefa skeda ixam krulded wale taneon Araba is Mesopotamia is dere do krimta is ewala se ke Ronefa Afrika kale Rapta ( mepilkomodana widava ke Tanganyika, lanon kaike Rufiji riska ). Lodelimafa cenkaxa gan arabaf koyasik isu tawavopik ( Al Masudi is Ibn Xaukal is Al Idrisi ) azon zo dafud.
Towara ke sanelia ke TanzaniaOlduvai ecor, debak ke jontiki seri
Mali "Homo habilis" kali lonoeltaf frofas grelt
Re, Tanzaniaxo tir telo xo videyeso va lokulaf is losavsaf conyuteem ke taneaf ayikkoraf tisik is ayikdunol. Bak 1959, moe Olduvai ecorxo debak kosmara va xim ke Zinjanthropus ( 1 750 000–daf autralopithecus ) gan Leakey, noveyer da afrikaf abdiugal is ayizva warzon zo koafiyid. Kuritcafa is warnafa bada ke serixo va tisuca ke losavsaf ayikdunol ( Homo habilis ) azon ( 1963 ) ve razduyud. Tere, koe lotitefa bada, va 600 000-daf xim ke Homo erectus divsidayad. Strabrega ke ilbodeyena xeka isu dri trasiyina koe lonoeltafa bada va elubkuca ke ayexonenuca koe bata gola ke Roneafrika vrutad.
Prostewafa kudja ke TanzaniaNyama choma estuxa bak Koroga Kapava koe Nairobi
Burmotaropa
Nyama choma estuxa tir kum deaxolafa pustayana atela, sanegapafa koe Kenya ( lize wetce ana vedeyafa estuxa ) is Tanzania. Nyama choma muxaks vas « pustarotafa atela » swaxiliavon sugdalar. Egara : Koe Kenya, deaxolafa atela zo abdualbar, voxen jaftola dere zo faver. Ta garifa nyama choma estuxa, eip is culo anton zo loplekud, voxen yontan koe aotceks dem nyorku is biolma is glefayan betcelek do abico pofo rizo is vobekratela taneon koljed.
