Minkowski-Diagramm

E Minkowski-Diagramm mit em Ruesüsteem (x,t), em bewegte Süsteem (x′,t′), em Liechtchäigel, und de Hüperble wo Ruum und Zit im Bezuug uf e Koordinateursprung bestimme. Dr Tangens vom Winggel Φ isch s Verheltnis zwüsche dr relative Gschwindikäit v zwüsche de bäide Bezuugssüsteem und dr Liechtgschwindikäit c.

S Minkowski-Diagramm isch 1908 vom Hermann Minkowski entwigglet worde und wird brucht, zum d Äigeschafte vo Ruum und Zit in dr spezielle Relatiwidäätstheorii aaschaulig mache. Es macht s mööglig Fenomeen wie zum Bischbil d Zitdilatazioon und d Lengikontrakzioon ooni Formle kwantitativ z verstoo.

S Minkowski-Diagramm isch e Ruum-Zit-Diagramm mit nume äinere Ruum-Dimension. Es überlaageret d Koordinatesüsteem für zwäiBeobachter, wo sich relativ zuenander mit konstanter Gschwindikäit beweege, so dass mä für d Orts- und Zitkoordinate x und t, wo dr äint Beobachder brucht, zum s Eräignis z beschriibe, diräkt d Koordinate x′ und t′ vom andere Beobachder chönne abglääse wärde und umkeert. Us dere Zueordnig vo x und t zu x′ und t′, wo grafisch äiäidütig isch, gseet mä diräkt, ass e Hufe Ussaage vo dr Relatiwidäätstheorii, wo paradox erschiine, wirklig widerspruchsfrei si. Au ass d Liechtgschwindikäit en ooberi Gränze isch, gseet mä grafisch as Konsekwänz vo de Äigeschafte vo Ruum und Zit. D Form vom Diagramm chunnt diräkt und ooni Formle us de Bostulat vo dr spezielle Relatiwidäätstheorii und macht dütlig, wie äng Ruum und Zit verbandlet si, wie s d Relatiwidäätstheorii bostuliert. En Erwiterig vom Minkowski-Diagramm isch s Penrose-Diagramm, wo mä mit em die globali Struktur vo allgemäinere, au krümmte, Ruumzite cha daarstelle.

Lueg au

• Dr Minkowski-Ruum

Weblingg

 Commons: Minkowski-Diagramm – Sammlig vo Multimediadateie

• Interaktivs Minkowski-Diagramm (Uni Konstanz)
• Erkläärig vom Minkowski-Diagramm bi LEIFI-Physik

Dä Artikel basiert uff ere fräie Übersetzig vum Artikel „Minkowski-Diagramm“ vu de dütsche Wikipedia. E Liste vu de Autore un Versione isch do z finde.