Truman Capote

Truman Capote
Truman Capote
	Truman Capote in 1980
Gebore	Truman Streckfus Persons; 30 September 1924; New Orleans, Louisiana
Sterf	25 Augustus 1984 (op 59); Los Angeles, Kalifornië
Nasionaliteit	Verenigde State
Beroep	Skrywer, akteur
Bekend vir	In Cold Blood, Breakfast at Tiffany's
Ouer(s)	Lillie Mae Faulk; Archulus Persons
Handtekening

Truman Garcia Capote (New Orleans, 30 September 1924 – 25 Augustus 1984) was 'n Amerikaanse akteur en skrywer. Hy het fiksie, niefiksie, kortverhale én toneelstukke geskryf. Sy bekendste werk was In Cold Blood (1966. Deur B.A. Schoeman In Afrikaans vertaal as "Koelbloedig") en die novelle Breakfast at Tiffany's). Minstens 20 rolprente en televisiereekse is al van sy werk gemaak. Sien Breakfast at Tiffany's, die rolprent.^[1]

Biografie

Jeug

Capote word as Truman Streckfus Persons in New Orleans gebore. Hy is 'n eensaame kind en leer homself lees voordat hy skool toe gaan.^[2]

Op sy vierde verjaarsdag verhuis die gesin na Monroeville waar hy bevriend raak met Harper Lee, die buurmeisie. Hy het 'n lewenslange vriendskap met haar en het 'n invloed op haar bekendste werk, To Kill a Mockingbird.^[3]

Capote begin op sy agtste verjaarsdag skryf^[4] en beweer hy het op nege al 'n boek geskryf. Toe hy 11 word, begin hy ernstig te skryf. In 1933 verhuis hy na New York Stad om saam met sy moeder en dié se tweede eggenoot, Joseph Garcia Capote, te gaan woon.^[5] Dié neem hom aan en hernoem hom "Truman Garcia Capote".

Toe hy sewentien word, begin hy vir die tydskrif The New Yorker skryf.

Aktiwiteite as skrywer

Sy debuutroman is Other Voices, Other Rooms (1948), wat 'n groot sukses en blitsverkoper word. Die boek bly meer as nege weke boaan die letterkundelys van die New York Times.

Ná Other Voices, Other Rooms volg werke soos Breakfast at Tiffany's, wat 'n sukses is, en In Cold Blood, 'n niefiksieroman oor 'n wrede moord op 'n gesin in Holcomb, Kansas. Capote doen diepgaande navorsing en praat met almal betrokke in die saak, onder wie die twee ter dood veroordeelde moordenaars. Hy raak bevriend met die moordenaars, wat dit vir hom moeilik maak om die boek te voltooi. Hierdie konflik is die grondslag van die prent oor dié tydperk van sy lewe, Capote (2005). Capote word in hierdie film gespeel deur Philip Seymour Hoffman, wat vir sy rol in 2006 'n Oscar wen as beste akteur.^[6]

Karakter

Capote was openlik homoseksueel in 'n tyd toe dit nog nie algemeen was nie. Hy het uitgestaan as gevolg van sy hoë, lispelende stem en unieke kleredrag. Hy was beroemd in die letterkundige kringe van die Verenigde State en het beweer dat hy baie beroemdes intiem ken, wat nie altyd waar blyk te gewees het nie. Op 28 November 1966 gee hy 'n legendariese gemaskerde bal in die groot balsaal van die Plaza Hotel in New York ter ere van die uitgewer Katharine Graham.

Latere lewe en dood

In sy latere lewe bly Capote grootliks in afsondering. Hy raak verslaaf aan drank en dwelms. Dit het 'n groot inpak op sy gesondheid en hy beleef gereeld hallusinasies. Hy sterf op 25 Augustus 1984 op 59-jarige leeftyd as gevolg van 'n dwelmoordosis in die huis van Joanne Carson, voormalig eggenote van die TV-aanbieder Johnny Carson.

Verwysings

↑ HAT Taal-en-feitegids, Pearson, Desember 2013, ISBN 978-1-77578-243-8
↑ "Truman Capote is Dead at 59; Novelist of Style and Clarity". The New York Times. 26 Augustus 1984. Geargiveer vanaf die oorspronklike op 15 Oktober 2009. Besoek op 8 Maart 2010.
↑ Barra, Allen Geargiveer 23 Februarie 2007 op Wayback Machine "Screenings: The Triumph of Capote," American Heritage, Junie/Julie 2006.
↑ The Dick Cavett Show, 21 Augustus 1980
↑ "El escritor Truman Capote y su vínculo adoptivo con el municipio de El Paso | Diario de Avisos". Diario de Avisos (in European Spanish). 19 Oktober 2016. Geargiveer vanaf die oorspronklike op 3 Januarie 2018. Besoek op 2 Januarie 2018.
↑ "The 78th Academy Awards (2006) Nominees and Winners". oscars.org (in Engels). Geargiveer vanaf die oorspronklike op 1 Oktober 2014. Besoek op 20 November 2011.

Eksterne skakels

Truman Capote in die Internet-rolprentdatabasis
Truman Capote in die Internet-Broadway-databasis

[HAT_Taal-en-feitegids-1] HAT Taal-en-feitegids, Pearson, Desember 2013, ISBN 978-1-77578-243-8

[2] "Truman Capote is Dead at 59; Novelist of Style and Clarity". The New York Times. 26 Augustus 1984. Geargiveer vanaf die oorspronklike op 15 Oktober 2009. Besoek op 8 Maart 2010.

[Barra-3] Barra, Allen Geargiveer 23 Februarie 2007 op Wayback Machine "Screenings: The Triumph of Capote," American Heritage, Junie/Julie 2006.

[4] The Dick Cavett Show, 21 Augustus 1980

[5] "El escritor Truman Capote y su vínculo adoptivo con el municipio de El Paso | Diario de Avisos". Diario de Avisos (in European Spanish). 19 Oktober 2016. Geargiveer vanaf die oorspronklike op 3 Januarie 2018. Besoek op 2 Januarie 2018.

[Oscars2006-6] "The 78th Academy Awards (2006) Nominees and Winners". oscars.org (in Engels). Geargiveer vanaf die oorspronklike op 1 Oktober 2014. Besoek op 20 November 2011.

[1]

[2]

[3]

[4]

[5]

[6]