Loodreg
In Wiskunde is twee voorwerpe loodreg aan mekaar wanneer hulle 'n hoek van 90° by hulle kruispunt vorm. Daar word ook gesê dat hulle dan reghoekig aan mekaar is. Op die manier kan twee reguit lyne, of vektore, of twee vlakke, of 'n reguit lyn en 'n vlak, loodreg aan mekaar wees. Oorspronklik het die woord loodreg na die gebruik van 'n skietlood (tou met 'n gewig aan sy onderpunt wat reguit afwaarts hang, en in die boukunde gebruik word) verwys. Die skietlood het die vertikaal verskaf, wat dan loodreg aan 'n horisontale oppervlak was.
