《開腦儆探》（英文：Paranormal Mind），係香港電視網絡拍嘅電視劇，由黃日華、李璨琛、黃芝琪、關楚耀、丁樂鍶、黃芷晴、陳穎妍、盧海鵬、湯怡、盧希萊、梁寶琪、林嘉華、林利、古天祥、麥子樂領銜主演，喺2012年9月開拍。
故事主角辛紀元原本係重案組督察，喺經歷佢個仔離奇猝死嘅打擊之後，觸發咗佢能夠閱讀同捕捉其他人意識嘅潛能，過程中佢出現咗雙重性格嘅徵象，老婆同其他人都以為佢患咗精神病，其實佢深信佢個仔係喺「意識空間」俾人殺死！紀元從此著力鑽研「閱讀人意識」嘅潛能，以私家偵探身份協助警方調查超自然案件，希望有一日查出喺意識空間殺死佢個仔嘅真兇⋯⋯
