經驗值

經驗值ging1 jim6 zik6（英文：experience point，EXP / XP）係喺好多遊戲當中模擬 ｢經驗｣ 嘅一種簡單嘅數學模型，通常係單單一個數值，代表一個遊戲角色「幾有經驗」，係 RPG 嘅定義性特徵。

每當個玩家用個角色達成某啲工作（例如係打低敵人或者完成任務等），個角色就會得到經驗值；喺絕大多數嘅 RPG 當中，玩家角色喺開頭係好弱嘅（各種能力值好低），但隨住佢哋得到經驗值，佢哋嘅其他能力值會提升，甚至仲可以得到新嘅異能，令到佢哋戰鬥力變得更勁；而且亦都有唔少遊戲會要求玩家角色起碼有一定量嘅經驗值先可以進入地圖某啲地帶，嗰啲地帶往往會有好好打嘅敵人等玩家。有遊戲設計學者指，能力值俾玩家有一種「進展緊」嘅感覺，令佢哋有意慾投放時間落隻遊戲嗰度。

相關用語

• 代練（power leveling）：一個等級低嘅玩家用某啲方法－好多時係依靠一個等級高嘅玩家－令自己角色或者戶口升呢嘅速度遠遠快過正常。例如可能兩個玩家一齊玩，一個高等級一個低等級，個勁玩家將一個敵人打到瀕死，再專登俾個弱玩家偷佢怪，而如果隻遊戲係按殺敵數分經驗值、而且個敵人係個弱玩家靠自己打唔低嘅話，呢個情況就算係代練。

睇埋

• RPG