新舊黨爭
新舊黨爭係北宋神宗熙寧二年（1069年），因執行王安石變法所引發嘅一場黨爭。
宋神宗力圖改革宋仁宗慶曆新政以來留低嘅弊端，拜王安石為宰相，開以新政，叫做王安石變法。新政雖切中時弊，但實行上出咗啲問題，而且得罪朝中保守派大臣嘅既得利益，受到舊黨極力反對。舊黨中唔少有影響力嘅人物，如韓琦、司馬光、歐陽修、蘇軾等，王安石唯有晉用呂惠卿、曾布、章惇及韓絳等新人，予以抗衡。
黨爭最初因為政見唔同而起，後來演變成排除異己嘅奪權之爭。新黨支持王安石嘅新政，舊黨反對新政。兩派官吏互相攻擊，黨爭期間變法時興時廢，一得勢就貶斥另一派士大夫。王安石同司馬光死後，黨爭依然持續。最終新黨因皇帝支持而贏咗，但造成北宋政局唔穩定，都對北宋嘅政治產生頗大影響。先後持續五十幾年，最終導致北宋滅亡。
經過
[編輯]最初爭論只係書生意氣之爭，司馬光批評王安石變法嘅理由之一係南人唔可以當政，曾輕言：『閩人狡險，楚人輕易，今二相皆閩人，二參政皆楚人，必將引鄉黨之士，天下風俗，何由得更淳厚！』[1]由於新、舊兩黨更迭執政，王安石曾兩度退職，新政時行時廢，臣民無所適從。
元豐八年（1085年）三月，在位十八年嘅宋神宗病逝，宋哲宗即位，喺宣仁聖烈皇后主導下，以司馬光專權，因帶有個人情緒嘅報復，致力於盡罷新法，所謂「元祐更化」，恢復「祖宗舊制」，前後歷時九年，呢個時期改革派人士幾乎全招迫害貶職。蔡確、章惇等被貶至嶺南（今廣東一帶），開啟北宋貶官至嶺南嘅先例。
元祐元年（1086年）王安石同司馬光相繼病逝，守舊派繼續掌握大權，黨爭仍無止息，朝廷分裂成正反兩黨，得勢舊黨又分成三派：
洛黨朱光庭、賈易等攻擊蘇軾誣衊宋仁宗不如漢文帝，宋神宗不如漢宣帝，以為係對先皇不敬。呢個時候呂陶、上官均挺身而出為蘇軾辯護，史稱蜀洛黨爭。到呢個時候黨爭只淪為意氣之爭，終使朝綱不振，政風日壞。
元祐九年（1094年），宣仁聖烈皇后病逝，宋哲宗親政，章惇入汴京，拜尚書省左僕射兼門下侍郎，恢復宋神宗嘅新法，史稱「紹述」，意為繼承父業，除曾布為翰林學士，晉張商英為右正言。
章惇當政期間，對元祐諸臣大肆清洗，以『抵毀先帝、變易法度』嘅罪名，剝奪咗司馬光、呂公著等人嘅贈官諡號，絕大部分嘅舊黨黨人都被流放或罷黜，貶到嶺南等蠻荒地區，又企圖追廢宣仁太后，為哲宗所止。但喺公家事務上，章惇甚為正派，未曾以官爵私其親信。
宋徽宗即位後，臨朝聽政嘅向太后將章惇則以罪貶逐於外，改用韓忠彥、曾布為宰相，試圖化解黨爭，但黨爭已經係無可化解。徽宗親政後，起用蔡京，恢復新法，但係蔡京奸到出汁，同太監童貫等勾結，立「元祐黨人碑」，將司馬光等309人定為奸黨，碑上有名者同佢哋子孫永遠冇得做官，皇家子女亦不得同名單上諸臣後代通婚；結果忠良盡去，國事不堪聞問，加速北宋覆亡。
影響
[編輯]余英時講：『黨爭係宋代士大夫政治文化中一個重要嘅構成部分。』[2]，又講『喺熙寧變法以前，皇帝係超越於黨爭之上嘅；但喺神宗同王安石「共定國是」以後，皇帝事實上已經同以宰相為首嘅執政派聯成一黨，唔再具有超越嘅地位。』[3]。