命令提示符

早期日製 PC-8801 嘅命令提示符係 ｢Ok｣

  想搵Microsoft Windows 叫 ｢命令提示符｣ 或者 ｢命令提示字元｣ 嘅程式嘅話，請睇cmd.exe。

命令提示符（英文：command prompt 或者簡稱 prompt）或者命令提示字元（prompt character）係指任何命令行直譯器用來話畀你知佢 ｢準備就緒，你可以打命令｣ 嘅字或者符號。

唔同嘅操作系統有唔同嘅命令提示符或者命令提示字元。例如類Unix系統嘅標準命令提示符係一個單一嘅命令提示字元$，表示你係一個用標準介面嘅普通用家，或者%，表示你係用 C shell 嘅普通用家，或者#，表示你目前嘅身份係管理員；CP/M、MS-DOS 同 cmd.exe 嘅標準命令提示符都係磁碟機名或者路徑名再加>。呢啲操作系統都有提供方法改命令提示符，可以顯示多一啲有用嘅嘢。

唔係操作系統嘅其他命令行直譯器都有唔同嘅命令提示符。例如 Python 嘅標準命令提示符係>>> 。

早期嘅微型電腦嘅操作系統好多時係 BASIC，好多呢啲系統嘅命令提示符都有 ｢Ready｣ 或者 ｢Ok｣ 嘅字樣。Apple II 係少數例外，用嘅係單一嘅命令提示字元；> 表示用緊整數 BASIC，] 表示用緊浮點數 BASIC，* 表示用緊監督程式（機械語言）。