侯賽因 (約旦王儲)

約旦王儲侯賽因
約旦王儲
在位	2009年ー
前任	哈姆扎·賓·侯賽因
私人明細
皇族	哈希姆王朝
父	阿卜杜拉二世
母	拉尼婭王后
出世	(1994-06-28) 1994年6月28號  約旦安曼

侯賽因（羅馬化阿拉伯文：Hussein，1994年6月28號—），全名侯賽因·賓·阿卜杜拉·賓·侯賽因·賓·塔利拉（羅馬化阿拉伯文：Hussein bin Abdullah bin Hussein bin Talal），係現任約旦王儲，國王阿卜杜拉二世同拉尼亞王后大仔。

簡歷

1994年6月28號，侯賽因響約旦首都安曼出世，係王子阿卜杜拉同拉尼亞共同嘅大仔。當時，老豆阿卜杜拉只係一個王子，而阿媽拉尼亞只不過同老公結婚一年。跟據族譜，佢係哈希姆王朝成員，亦係穆罕默德第42代女系後人。

而「侯賽因」呢個名，由阿爺侯賽因一世改嘅。

佢響Choueifat國際學校開始返小學，之後升讀安曼國際學院，最後響2012年畢業於米底巴國王學院（呢間學校由佢老豆阿卜杜拉成立，而佢本人又係個間學校第一代畢業生）。中學畢業之後，佢到美國佐治城大學嘅Edmund A. Walsh School of Foreign Service讀國際歷史，2016年畢業之後又到英國桑赫斯特皇家軍事學院留學，一年後畢業。

依家佢隸屬約旦皇家陸軍，銜頭係「中尉」。

王儲、外交

2019年，王儲侯賽因同日本首相安倍晉三

侯賽因個老豆阿卜杜拉，雖然係侯賽因一世國王大仔，但本身係冇可能繼位；因為阿拉伯世界有個傳統叫「兄終弟及」，即大佬死咗王位由細佬繼承，加上當時約旦政局唔夠穩定，所以侯賽因一世一早就立咗細佬哈桑·賓·塔利拉做王儲。不過，侯賽因一世響臨死前，決定改立大仔做王位繼承人，所以阿卜杜拉最終響1999年2月7號登基做國王。

阿卜杜拉響登基之後，曾經立細佬哈姆扎·賓·侯賽因做王儲。但響2004年，阿卜杜拉取消哈姆扎嘅一切銜頭。由於跟返約旦憲法，當國家未有王儲嗰陣，國王嘅大仔就係王位繼承人，所以侯賽因響嗰時開始就係實際上嘅王儲。最終去到2009年7月2號，侯賽因正式畀老豆冊立做「約旦王儲」。

侯賽因第一次代表王室出席公開活動係2010年6月，代表父王出席阿拉伯起義紀念活動。身為王儲嘅佢，多次響父王唔響國家嗰陣做攝政王。

2015年4月23號，當時只有20歲嘅佢，成為有史以嚟最後生嘅聯合國安理會會議主席。會議期間，佢主持咗一場有關「點樣阻止後生仔加入極端主義組織」嘅會議。

2017年5月，佢響世界經濟論壇上發表歡迎辭。同年佢又響聯合國大會上發表演講。

個人生活

王儲響Instagram已經有超過三百萬Fans。從佢響IG發嘅相，可以睇得出佢中意睇書同埋運動（主要係足球同埋籃球）。

榮譽

• 約旦 約旦之星勳章騎士 (Knight of the Order of the Star of Jordan)

• 巴林 一等哈馬德國王文藝復興勳章 (First Class of the King Hamad Order of the Renaissance)
• 挪威 聖奧拉夫騎士大十字勳章 (Knight Grand Cross of the Order of St. Olav)