乾炒牛河

乾炒牛河

乾炒牛河係廣東菜色嘅一種，以芽菜、韭菜、河粉、牛肉等炒成。喺廣州、香港以至海外嘅粵菜酒家、香港嘅茶餐廳，乾炒牛河幾乎成為必備嘅菜色。

製法

乾炒牛河嘅主要材料河粉，通常煮法係放湯，或炒製。炒製就分為加入茨汁嘅濕炒，同唔加茨汁嘅乾炒。乾炒牛河嘅製法係先將嫩牛肉炒至半熟。然後落油，炒香芽菜、韭菜同洋蔥，落河粉快炒，加入醬油同熟油，最後再放入之前嘅牛肉炒勻。乾炒牛河講究「鑊氣」，一定要猛火快炒。要炒勻之餘，手勢唔可以太快，唔係啲粉就會碎。炒出嚟啲河粉要乾身，油嘅份量亦一定要準確控制，油太多就會出油咁就唔好食，油大少又黐底。因此乾炒牛河被認為係考驗廣東廚師炒菜技術嘅一大測試，手藝好壞一試就知。