跳去內容

中國人民解放軍駐香港部隊

出自維基百科，自由嘅百科全書

駐港部隊陸軍臂章，2007年至今

中國人民解放軍駐香港部隊zung1 gwok3 jan4 man4 gaai2 fong3 gwan1 zyu3 hoeng1 gong2 bou6 deoi2（簡稱駐港部隊、香港駐軍[註 1]；英文：People's Liberation Army Hong Kong Garrison），係中華人民共和國中央人民政府派駐香港特別行政區，負責防務嘅武裝力量，由陸軍、海軍同空軍組成，隸屬中華人民共和國中央軍事委員會，響1993年初開始組建，1996年1月組建完，1997年7月1號0時進駐香港[1]，取代駐港英軍接管香港嘅防務[註 2]，軍費由中央人民政府負擔，香港居民都唔需要加入駐港解放軍[2]。

駐港部隊同香港特別行政區互不干預，亦都唔隸屬香港特區[3]。

歷史

[編輯]

駐軍問題

[編輯]
駐港部隊由1997年至2007年用嘅臂章

自從中英兩國就香港前途問題會談，駐軍問題一直係兩國爭議嘅焦點。英國曾經向中國提出，因為中港邊界連接，而港人又對解放軍駐港有戒心，建議中國唔使喺香港駐軍。對於駐唔駐軍，北京內部當時亦都有唔同意見。

當時嘅中共中央軍委主席鄧小平一直無公開表態，但早係響1984年，佢已經話「在港駐軍呢一條必須堅持，無得讓步」[4]；而時任全國人大常委會副委員長嘅耿飆響1984年5月同香港記者話，中央政府喺1997年之後唔會喺香港駐軍，香港居民亦唔需要負擔中國嘅軍費，結果激嬲咗中央軍委主席鄧小平，於是佢喺會晤出席全國政協嘅港澳委員嗰陣公開表態[5]，「黃華[註 3]、耿飆兩位亂噏一通，講嘅香港駐軍問題唔係中央嘅意見......香港要駐軍嘅，既然係中國嘅領土，點解唔可以駐軍？英國嘅外相同我會面嘅時候，開頭佢哋話中國唔駐軍，用另一種形式，但係佢哋承認中國政府既然收返主權，有權響香港駐軍，呢個好明確，連咁嘅權力都無，重邊道叫中國領土？[6]」

1984年10月，鄧小平重申中國政府喺香港駐軍係行使主權嘅體現，又有防止動亂嘅作用[7]；最終兩國達成協議，響《中英聯合聲明》附件一「中華人民共和國政府對香港的基本方針政策的具體說明」入面訂明「香港特別行政區嘅社會治安由香港特別行政區政府負責維持。中央人民政府派駐香港特別行政區負責防務嘅部隊唔干預香港特別行政區嘅內部事務，駐軍軍費由中央人民政府負擔[8]」，而1990年頒佈嘅《中華人民共和國香港特別行政區基本法》第十四條又訂明：

  • 中央人民政府負責管理香港特別行政區嘅防務。
  • 香港特別行政區政府負責維持香港特別行政區嘅社會治安。
  • 中央人民政府派駐香港特別行政區負責防務嘅軍隊唔干預香港特別行政區嘅地方事務。香港特別行政區政府響必要時，可向中央人民政府請求駐軍協助維 持社會治安同救助災害。
  • 駐軍人員除咗要遵守全國性嘅法律外，重要遵守香港特別行政區嘅法律。
  • 駐軍費用由中央人民政府負擔。

組建

[編輯]
駐港部隊嘅直-8KH運輸搜救直升機

駐港部隊響1993年起喺深圳開始組建，1994年10月25號響深圳舉行成立大會，正式成軍。1995年12月7號正式向外亮相，1996年1月28號由中國國務院、中央軍委公告組建完畢[9]。深圳市響特區撥出500幾畝嘅土地，作為駐港部隊嘅基地建設用地[9]。

為咗同駐港部隊建立法律規範，中央軍委響1991年成立「香港駐軍法律問題小組」，由中央軍委法制局研究起草駐軍各項法案同法律準備工作，1996年8月就《中華人民共和國香港特別行政區駐軍法》草案進行研究，並喺12月通過。[9]

駐港部隊軍官喺全軍範圍內選拔，大部分都經軍校培訓兼有大專學歷；士兵一般需要高中以上嘅學歷，入伍後經一年訓練，再補入部隊[9]。

進駐

[編輯]
駐港部隊嘅074型登陸艦

中央軍委主席江澤民喺1997年6月30號向駐港部隊發出命令，要喺7月1號0時開始履行香港嘅防務職責[9]。嗰晚9點，根據中英聯合聯絡小組嘅協議，509人組成嘅駐港部隊進入香港，安排軍營嘅接管事宜[9]。

11點58分，兩軍響威爾斯軍營進行軍營交接儀式。駐港部隊中校譚善愛用普通話同英軍艾利斯中校講：「艾利斯中校，我代表中國人民解放軍駐香港部隊接管軍營。你哋可以下崗，我哋上崗。祝你哋一路平安。」。講完之後，雙方握手，又互相敬禮，艾利斯命令尐士兵步操離開軍營大門。而駐港部隊響7月1號0時0分喺軍營升起國旗，象徵駐港部隊正式接管香港嘅防務[9]。

駐港部隊嘅陸海空主力部隊響7月1號6點正進入香港。陸軍從文錦渡、皇崗同沙頭角三個口岸進入香港，車隊喺6點15分駛經上水馬會道，群眾夾道歡迎，有尐人重獻花；艦艇部隊嘅船喺4點55分起錨，從深圳媽灣軍港前往香港水域，響7點到達昂船洲海軍基地；空軍直升機部隊因為有雷雨而延後起飛，6架直-9直升機響8點35分抵達石崗機場。[9]

2000年之後

[編輯]

響2009年至2011年，駐港部隊主力戰鬥嘅裝備進行咗部分更新同更換。陸軍嘅快速機動、火力突擊同特種偵察能力增強咗，同時擴充裝甲、特種作戰、工兵同防化分隊；海軍嘅近海防衞同對空防護能力亦都提升咗，亦會換一批艦艇[10]；空軍換咗新嘅警戒雷達、運輸搜救型直升機、指揮偵察型直升機、武裝直升機同防空武器，增強對香港空域嘅警戒防護能力。[11][12]

駐港部隊總共有超過4,300名軍人評做訓練尖子[13]，新兵嘅訓練優良率逐年升，並且保持喺97%以上[14]。

2012年11月，駐港部隊進行一年一度嘅輪換[15][16]，幾十部通訊車同裝甲車喺清晨時份由皇崗口岸進入香港同進駐於各個軍營，由香港警隊護送組沿途協助。

2013年3月24號，中央電視台中文國際頻道首次播出駐港部隊進行實彈訓練嘅影像，呢個係第一次喺香港境內進行實彈訓練[17][18][19][20]。

2014年1月，有政治團體「香港人優先」嘅成員闖入駐港部隊總部抗議，警方中區重案組調查之後拉咗涉案人士[21]，係駐港部隊軍營第一次俾人專登闖入[22]；不過，以前都曾經有市民唔小心進入軍營，例如曾經有人玩滑翔傘嗰陣架滑翔傘失控，響赤柱軍營降落[23]。

責任

[編輯]
駐港部隊空軍臂章（2007年至今）

駐港部隊人員去香港之前，要學習《基本法》、《駐軍法》、香港法律同瞭解香港社會嘅情況[24]。佢哋喺香港既要遵守全國性法律，亦都要遵守香港法律；佢哋涉及嘅非職務犯罪案件由香港司法機構審理[註 4]。

根據《駐軍法》[註 5]，駐港部隊要：

  • 防備同抵抗侵略，保衛香港特別行政區嘅安全
  • 擔負防衛勤務
  • 管理軍事設施
  • 承辦有關嘅涉外軍事事宜

同市民嘅關係

[編輯]
第六屆軍事夏令營學員大合照

中國人民解放軍駐香港部隊有時會參與一尐慈善活動，例如「樂施毅行者」[25]。響2007年尾，香港理工大學接待咗駐港部隊嘅八十位年輕官兵參觀校園，體驗大學生活[26]；駐港部隊亦都有同香港教育局合辦香港青少年軍事夏令營，藉以磨練學生嘅意志力[27]。駐港部隊有時會開放軍營畀市民參觀，市民可以親手揸下啲槍荷實彈[28]，亦都會有唔同嘅表演[29]。解放軍駐港部隊響2014年開始參與幻彩詠香江，喺中國人民解放軍駐香港部隊大廈，用霓虹燈打出「中國人民解放軍」七個字[30]。

香港大學有個喺2011年公佈嘅民意調查顯示，香港市民對駐港解放軍嘅不滿比率接近零[31]。不過，有尐人不滿中環部分海濱用地改劃做軍事用地，畀駐港部隊起軍用碼頭，話係犧牲香港人利益[32]；有尐香港人亦都對駐港部隊有戒心[33]，更加有人話要解放軍撤出香港[34]。

軍事設施

[編輯]
遠攝中國人民解放軍駐香港部隊大廈

根據中英聯合聯絡小組就香港軍事用地未來安排達成嘅協議，駐港英軍原來駐守嘅39幅軍事用地入面，14幅會由駐港部隊接管，作為防衛用途[35]。根據《軍事設施禁區令》[36]同《防衞(射擊練習區)條例》[37]，以下18個地點目前係軍事禁區或者認可爲射擊練習區：

註

[編輯]
  1. ↑ 《中華人民共和國香港特别行政區駐軍法》第二條
  2. ↑ 睇埋香港主權移交。
  3. ↑ 事實上，時任全國人大常委會副委員長嘅黃華無提過駐軍問題，鄧小平後嚟都認搞錯咗。
  4. ↑ 〈論一國兩制法學及其形成和發展〉。《法學期刊》。北大法律信息網 (2): 50。｢基本法第14條規定，中央人民政府派駐香港特區的軍隊既要遵守全國性法律，也要遵守香港特區的法律。《中華人民共和國香港特别行政區駐軍法》第16條也作了相同的規定。同時，《駐軍法》第23條還規定，駐軍人員的非職務犯罪案件，由香港特區司法機關管轄。｣
  5. ↑ 全文

參考

[編輯]
  1. ↑ 中國人民解放軍駐香港部隊（解放軍駐港部隊）, 新華網.
  2. ↑ 華明。〈本刊特稿 - 如何認識"一國兩制"下港人當兵問題〉。《香港政治經濟文化學會》。{{cite web}}: CS1 maint: url-status (link)
  3. ↑ 《大陸常用辭語彙編》。大陸常用辭語編輯委員會。2009。頁 221。ISBN 9862211555。
  4. ↑ 「周南憶述:中英香港問題談判小平一語定乾坤 互聯網檔案館嘅歸檔，歸檔日期2015年10月30號，.」《人民日報》海外版，2007年6月26日
  5. ↑ 駐軍之爭 互聯網檔案館嘅歸檔，歸檔日期2008年11月18號，.《解密百年香港》第34集文字版本
  6. ↑ 鄧小平談駐軍問題，亞洲電視新聞，1984年5月25日
  7. ↑ 鄧小平：保持香港的繁榮和穩定
  8. ↑ 中華人民共和國政府對香港的基本方針政策的具體說明《中英聯合聲明》附件一，政制及內地事務局網站
  9. ↑ 9.0 9.1 9.2 9.3 9.4 9.5 9.6 9.7 《中國人民解放軍駐香港部隊寫真》新華社解放軍分社，新華出版社編著，1997年7月
  10. ↑ 駐軍加強裝備秘密演練 《東方日報》 2012年6月21日
  11. ↑ 駐港解放軍展示新裝備 《星島日報》 2011年12月7日
  12. ↑ 〈駐港部隊舉行「盾牌－７號」聯合實兵演習〉。原著喺2012年7月7號歸檔。喺2014年4月23號搵到。
  13. ↑ 駐港解放軍武器大革新 《星島日報》 2012年6月21日
  14. ↑ 駐港部隊將配備新型輕護衛艦 互聯網檔案館嘅歸檔，歸檔日期2012年6月23號，. 《明報》 2012年6月20日
  15. ↑ 解放軍駐港部隊完成輪換行動[失咗效嘅鏈]
  16. ↑ 解放軍駐港部隊完成輪換 Archive.is嘅歸檔，歸檔日期2013年1月5號， 《明報》 2012年11月25日
  17. ↑ 駐港部隊直升機首次在港實彈射靶 《東方日報》 2013年3月22日
  18. ↑ 駐港部隊直升機首實彈訓練 互聯網檔案館嘅歸檔，歸檔日期2013年6月5號，. 《明報》 2013年3月23日
  19. ↑ 駐港部隊武裝直升機首次在港實彈訓練
  20. ↑ 央視播駐港軍機實彈訓練 《東方日報》 2013年3月25日
  21. ↑ 〈擅闖駐港部隊總部 「香港人優先」四人被捕〉。《晴報》。
  22. ↑ 〈解放軍駐港部隊就軍營被闖反應強硬〉。《BBC中文網》。
  23. ↑ 〈空降客誤闖軍營 最離奇〉。《世界新聞網》。2014。原著喺2020年8月5號歸檔。喺2014年4月24號搵到。
  24. ↑ 〈駐港部隊特種兵「獵人」演練全程曝光〉。《多維新聞》。{{cite news}}: CS1 maint: url-status (link)
  25. ↑ 梁珍。〈慈善秀造假 駐港部隊爆醜〉。{{cite news}}: CS1 maint: url-status (link)
  26. ↑ 〈駐港部隊官兵體驗理大校園生活〉。《香港理工大學》。2007-10-12。
  27. ↑ 〈香港青年體驗駐港部隊生活：團結自律 終生受用〉。2014-03-24。原著喺2020-03-15歸檔。喺2014-04-23搵到。
  28. ↑ 〈香港大學生與駐港部隊「零距離」接觸 稱極富親和力〉。《中國新聞網》。2014。
  29. ↑ 〈駐港部隊「七一」舉辦「軍營開放日」〉。《新華網》。2013。
  30. ↑ 〈駐港部隊加入維港燈光秀 引來關注目光〉。《香港南華早報》。2014-06-12。原著喺2014-06-16歸檔。喺2014-06-19搵到。
  31. ↑ 〈震撼中外！超四千香港居民簽名爭取自願入解放軍〉。2011。原著喺2015年10月13號歸檔。喺2014年4月24號搵到。
  32. ↑ 〈駐港部隊軍用碼頭用地或港同意反對派大肆批評〉。《搜狐軍事頻道》。原著喺2020年3月15號歸檔。喺2014年4月23號搵到。
  33. ↑ 〈解放軍駐港部隊十五年來未得民心〉。
  34. ↑ 〈「港獨」胆真肥，竟然 要求解放軍撤出香港〉。《鐵血網》。2014-01-20。原著喺2014-04-27歸檔。喺2014-04-24搵到。
  35. ↑ 立法會財務委員會人事編制小組委員會討論文件，1997年9月2日
  36. ↑ 《軍事設施禁區令》
  37. ↑ 《防衞(射擊練習區)條例》
  38. ↑ 38.0 38.1 38.2 38.3 38.4 38.5 38.6 38.7 38.8 駐港部隊部分軍營更改名稱 互聯網檔案館嘅歸檔，歸檔日期2005年5月6號，.，人民網
  39. ↑ 《香港深度之旅》。2004。ISBN 9621427509。
  40. ↑ [1][失咗效嘅鏈]
  41. ↑ 〈立法會秘書處就中國人民解放軍駐香港部隊擬備的文件(資料摘要)〉 (PDF)。原著 (PDF)喺2021年1月27號歸檔。喺2014年4月24號搵到。
  42. ↑ 〈駐港部隊〉。原著喺2008年10月7號歸檔。喺2014年4月23號搵到。
  43. ↑ [2][失咗效嘅鏈]
  44. ↑ 顯示舊大澳警署及大澳軍營位置的地圖

睇埋

[編輯]
由「https://zh-yue.wikipedia.org/w/index.php?title=中國人民解放軍駐香港部隊&oldid=2178424」收