旺角大球場

重建後嘅旺角大球場（2015年）

重建後旺角大球場進行嘅甲組足球聯賽比賽。

旺角大球場（俗稱旺角場、旺丁場；英文：Mong Kok Stadium）係香港一個主要嘅足球場，喺旺角花墟道37號，由康樂及文化事務署管理。

歷史

旺角大球場前身為陸軍球場，1961年移交前市政局。旺角大球場早期叫做市政球場，市政局喺1973年6月16號開放啟用嗰時叫做旺角大球場。

改善工程

1990年9月，第一次改善工程進行，剷除咗田徑跑道，草坪面積擴大，座位增加到7,500個。改善工程期間，香港甲組足球聯賽賽事移師深水埗運動場。第二年底，改善工程完成。

1992年，入場球迷數字上升，加上香港大球場需要重建到1994年，市政局為咗增加座位，年中喺旺角大球場加建咗兩座鋁質嘅臨時看台，令觀眾席增多1,000個位。

重建工程

由於亞洲足球協會投訴旺角大球場冇藥物檢驗室、記者室同上網設施，難以發佈賽事消息，加上旺角大球場遇上多次滿座。因為呢個情況，香港足球總會喺2008年向香港政府提出將旺角大球場嘅原有座位同臨時看台拆除，同埋重建到一座有10,000個座位同有上蓋嘅看台，以提供一個較舒適嘅環境畀球迷觀賞比賽。不過規劃建議，旺角大球場進行重建後最多只可以設置6,680席，南北兩邊嘅主看台會加建上蓋，同時增設球證休息室、球員休息室、藥物檢驗室，並且會增設閉路電視監察系統及擴充停車場泊位等。重建工程於2009年9月1號開始進行，2011年10月14號竣工，工程費用估價為2.5億港元，實際耗資2億7,550萬港元。

根據重建工程規劃，重建後嘅旺角大球場以綠色環保嘅概念做主題，位於服務大樓嘅天台設有太陽能熱水系統，以吸收太陽能為更衣室供應熱水；而且設有雨水循環使用系統，以收集雨水灌溉園景同草地等。一樓天台同南看台上層，另外亦有闢設園景，同鄰近嘅花墟同俗稱「雀仔街」嘅園圃街雀鳥花園一脈相承。香港政府盼望，旺角大球場能夠成為活化嗰區嘅地標之一。重建工程對旺角大球場主要嘅改動係喺南、北看台增設咗輕盈嘅拉篷式上蓋，同埋喺東看台安裝咗大電視熒幕。座位由以往嘅鋼製長椅改成多顏色嘅獨立膠椅，容納人數雖然由原來嘅8,500減少到6,664人，不過增加咗42個輪椅座位同升降電梯等嘅無障礙設施，座位高度亦提升咗1.5米，令球迷嘅觀賞角度更好。除此之外，8個售票亭集中喺花墟道嘅入口，刪減咗界限街嘅售票處，改為停車場。場內設施方面，增設咗藥物檢驗室同育嬰室；更衣室嘅面積大增兩倍，數量亦有兩間增至4間，淋浴間亦增至40間，比以往多22間；此外，更衣室內亦有專門用嚟清潔球靴等先進嘅設備。傳媒室嘅面積亦比以往增大。

重建後

2011年10月16號黃昏，旺角大球場舉行咗球場重建後嘅第一場賽事──香港甲組足球聯賽，晨曦對深水埗。晨曦為咗吸引更多球迷欣賞旺角大球場重建後嘅第一場比賽，將原定價值港幣60蚊嘅門票大幅度下調到港幣20蚊，共有4,499名球迷入場，創嗰個球季至2013年3月21號期間嘅最高嘅入場人數。大批球迷喺開始賣飛前嘅兩個鐘，已經聚集喺大球場門外，香港足球總會職員為咗唔想發生意外，特別提早20分鐘，即下晝3點40分開閘畀球迷入場。到傍晚6時鐘倒，依然有球迷不斷進場。

2013年3月22號，旺角大球場舉行2015年亞洲盃外圍賽香港足球代表隊主場對越南國家足球隊嘅賽事，有6,416人買飛，共有6,639名球迷入場，係旺角大球場重建後第一次爆滿，喺場外高掛起代表滿座嘅紅旗。喺當日下晝5點，得番2,000張飛賣；夜晚7點54分，香港足球總會宣佈嗰日全部飛賣晒，最終有幾百名球迷喺球場外摸門釘。

2015年，香港足球代表隊以旺角大球場做主場，舉行2018年世界盃亞洲區外圍賽第二圈暨2019亞洲盃外圍賽，6月11號、6月18號、9月8號、11月17號連續四場爆滿。6月11號香港以7-0大勝不丹，6月18號香港以2–0擊敗馬爾代夫，9月8號香港以2–3輸畀卡塔爾，11月17號香港以0–0迫和中國。

設施

重建前設施一覽

符合國際標準嘅草地球場 照明系統 三色顯示電子計分屏幕 可容納8445觀眾座位 55位貴賓席座位 四間運動員更衣室

四間運動員洗手間 兩間裁判員更衣室 兩間簡報室 一間貴賓室 一間殘疾人士洗手間 一間救護室

一座警察控制塔 一座廣播塔 一座快餐售賣亭 廿七個車位停車場 八部入閘機／售票處 一間傳媒室

重建重點

南北兩面看台將會加建上蓋 增設球證室 增設球員休息室 增設藥物檢驗室 增設傳媒中心 增設閉路電視監察系統 擴充停車場車位數目 小食亭、辦事處、貯物室、運動員更衣室、洗手間同其他附屬設施將重置喺觀眾看台台下 喺適當位置重置活動控制設施、警察控制設施同電視廣播用平台 增設大螢光幕及電子計分牌

喺服務大樓嘅主要天台同南面看台嘅上層闢設園景，重會喺球場外圍以垂直種植模式進行綠化，以收環保同美化之效 看台將會升高1.5米以確保前排觀眾視線唔會畀圍欄同後備廂座所影響 上蓋會選用同現時香港大球場類似嘅帳篷，呢種帳篷嘅物料輕巧、較為耐用同可以承受較大風力

相集

重建前

• 
  旺角大球場門牌
• 
  花墟道大閘入口
• 
  雀鳥公園側門入口
• 
  唯一有蓋嘅嘉賓席
• 
  警察控制塔同廣播塔
• 
  三色顯示電子計分屏幕
• 
  快餐售賣亭
• 
  位於看台底嘅洗手間

重建後

• 
  旺角大球場圍牆標誌
• 
  花墟道主入口
• 
  近火車橋看台及彩色顯示電子計分屏幕
• 
  花墟道主看台
• 
  界限街主看台
• 
  近界限街體育館看台

交通

港鐵太子站及旺角東站

巴士

九龍新界巴士

1	竹園邨	↔	尖沙咀碼頭
1A	中秀茂坪	↔	尖沙咀碼頭
2C	（冇資料）
2D	（冇資料）
3C	（冇資料）
6D	（冇資料）
12A	南昌鐵路站	↔	黃埔花園
24	（冇資料）
27	（冇資料）
40	（冇資料）
42	（冇資料）
95	翠林	↔	佐敦（渡華路）
81S	（冇資料）
87D	（冇資料）
203	（冇資料）
281A	（冇資料）
N216	（冇資料）

過海隧道巴士

104	（冇資料）
113	（冇資料）

出面網頁

• 旺角大球場官方網頁