海牛目
 | ||||||||
|---|---|---|---|---|---|---|---|---|
 西印度海牛
| ||||||||
| 物種分類 | ||||||||
| ||||||||
海牛目（Sirenia）係海洋哺乳動物中係相當特殊嘅一群，所屬物種都係食草嘅，主要以海草同其他水生植物為食。。現存有四種海牛目，分為兩個科：海牛科(Trichechidae)嘅3種海牛(manatee)，同儒艮科(Dugongidae)嘅儒艮(dugong)。儒艮科嘅另一物種史德拉海牛(Steller's Sea Cow，又叫大海牛)曾經生存到近代，但已經喺18世紀時經唔起人類嘅捕獵壓力，絕晒種。
外形特徵
海牛目動物相當適應水中生活，牠們有流線形嘅身體，無後肢同背鰭，身上毛髮稀疏，前肢呈槳狀方便游水。儒艮同海牛嘅體型好似，但可以喺尾部明顯分辨出嚟：海牛嘅尾巴寬大而略呈圓形，儒艮則為V形尾，好似海豚嘅尾鰭咁。
海牛目有厚而可以郁嘅嘴唇，表面覆有濃密嘅短毛，可咬住海草送落口度。佢哋進化出特殊嘅牙齒替換系統，以因應食用多纖維食物造成嘅牙齒磨損。海牛只得臼齒，更新方式並唔係一顆掉了後再重新長出新牙，而係整列牙齒由顎嘅末端水平地往前移動，當牙齒移動至顎嘅最前端時，牙根會逐漸被吸收終至脫落，跟象牙有啲似。儒艮嘅上下顎各有三對臼齒同前臼齒，隨著年齡增長，佢哋前臼齒同第一對臼齒會甩，剩低嘅臼齒就會一直生長。雄性有兩顆大型門齒，喺青春期時會突出嘴邊，但當嘴巴閉埋時會被嘴脣蓋住。無外耳殼，只喺頭部兩側各有1個好細嘅耳孔；2個鼻孔皆位於吻部嘅頂端，潛水時會被皮膜掩蓋住。雌性有1對乳房，乳頭位於前肢基部處。
牠們嘅肺好大，係浮力嘅主要來源；橫隔膜嘅位置相當特殊，唔似人類咁同肩膀平行，而係大致同背、腹部平行，推測可能同浮力嘅調節有關。骨架非常厚重，尤其係肋骨，除咗有鉛垂咁幫助下潛嘅功能外，對於鯊魚等天敵嘅衝撞亦有一定嘅抵禦能力。皮膚相當厚，體內儲存有好多脂肪，但脂肪厚度通常唔及鯨類嘅鯨脂咁多。
雄性海牛目生殖器並唔外露，隱藏於腹部中段；雌性生殖器接近肛門，喺尾柄前方。懷孕期一般大約1年左右，1胎只產1個仔。
進化
已知最早嘅化石大約喺距今5千萬年前嘅始新世(Eocene)早期，到咗漸新世(Oligocene)同中新世(Miocene)時期係海牛目嘅全盛時期，之後就逐漸衰退，原因可能係氣候寒冷化、海洋環境變動，或是係古代人類開始捉佢哋嚟食等造成。最早嘅海牛目動物大小同豬差唔多，有四隻腳，住喺岸邊濕地。儒艮科大約喺始新世末期出現，外型相當接近今日嘅儒艮，而出土嘅化石都唔少；海牛科可能喺漸新世初期進化出來，但現有化石數量較少。目前對於海牛目嘅演化分歧情形仍有好多疑問，各科分歧嘅時間點也尚有爭議，但關於“由陸棲至海生”嘅演化途徑由於化石充足已有完整理論提出。
雖然外型上有相當大嘅差異，不過由考古學同比較解剖學上嘅證據顯示，現生哺乳動物中同海牛目親緣關係最接近嘅係長鼻目（Proboscidea，即係象）。
保育現狀
近幾世紀以嚟，海牛目嘅族群都明顯下降，喺好多地方都開始絕種。族群減少嘅主要因素係由於受到人類活動嘅干擾，雖然已受保護，但喺佢嘅棲息地內仍然成日遭到獵殺，喺某些地區嘅市場上甚至仍公開買賣海牛肉。海牛嘅死亡威脅仲包括遭到運河水門夾傷同陷於漁網中導致窒息。儒艮也成日死喺漁業拖網、捉鯊魚同海龜網，其他仲包括炸魚、海面原油污染、龍旋風同暴風侵襲、寄生蟲、殺人鯨同鯊魚嘅捕食等。
分類
參考書
1. Hadoram Shirihai / illustrated by Brett Jarrett, 《A Complete Guide to Antarctic Wildlife: The Birds and Marine Mammals of the Antarctic Continent and the Southerocean》, Alula Press Oy, 2002: p474-477. ISBN 951-98947-0-5
2. Daryl P. Domning, 《Sirenian Evolution》, edit by William F. Perrin, Bernd Würsig, etc. 《Encyclopedia of marine mammals》, Academic Press, 2002: p1083-1086. ISBN 0-12-551340-2
3. Daniel K. Odell, 《Sirenian Life History》, edit by William F. Perrin, Bernd Würsig, etc. 《Encyclopedia of marine mammals》, Academic Press, 2002: p1086-1089. ISBN 0-12-551340-2
 |