ნიუ-იორკიშ უნივერსიტეტი
| ნიუ-იორკიშ უნივერსიტეტი ინგლ. New York University | |
  ლათ.: Universitas Neo Eboracensis | |
| დევიზი | Perstare et praestare (ლათ.) |
|---|---|
| დირსხუ | 1831 |
| ტიპი | კერზო |
| ფონდეფი | $ 5.8 მლრდ. (2021) |
| წორომახანდე | 9,835 (აკადემიური) |
| პრეზიდენტი | ენდრიუ ჰამილტონი |
| პროვოსტი | კატერინ ფლემინგი |
| სტუდენტი | 51,848 (2018) |
| ორენი |  ნიუ-იორკი, ნიუ-იორკი, ააშ
|
| კამპუსი | ურბანული |
| საიტი | www.nyu.edu |
ნიუ-იორკიშ უნივერსიტეტი (ინგლ. New York University) — კერზო უნივერსიტეტი ნიუ-იორკის. უნივერსიტეტიქ დირსხჷ 1831 წანას ამერიკალი პოლიტიკოსიშ დო დიპლომატიშ ალბერტ გალატინიშ ინიციატივათ. სტუდენტეფიშ მუდანობათ ნიუ-იორკიშ უნივერსიტეტი ამერიკაშ უკაბეტაში კერზო უნივერსიტეტი რე. უნივერსიტეტის, 2018 წანაშ მუნაჩემეფით, ჸუნდჷ 51,848 სტუდენტი, 9,835 აკადემიური პერსონალი დო 2,242 ადმინისტრაციული პერსონალი.
ნიუ-იორკიშ უნივერსიტეტი იკათუანს შხვადოშხვა სკოლეფს დო აკადემიურ ცენტრეფს: ხელუანობეფიშ დო მენცარობეფიშ კოლეჯის, ბიზნესიშ სკოლას, ინჟინერიაშ სკოლას, მედიცინაშ სკოლას, იურისპრუდენციაშ სკოლას, მათემატიკური მენცარობეფიშ ინსტიტუტის, ანტიკური მოსოფელიშ რკვიებეფიშ ცენტრის დო შხვა. ნიუ-იორკიშ უნივერსიტეტი გლობალური უნივერსიტეტი რე დო თის უღჷ კამპუსეფი აბუ-დაბის დო შანხაის, თაშნეშე აკადემიური ცენტრეფი: აკრას, ბერლინს, ბუენოს-აირესის, ფლორენციას, ლონდონს, ლოს-ანჯელესის, მადრიდის, პარიზის, პრაღას, სიდნეის, თელ-ავივს დო ვაშინგტონს.
2021 წანაშ მუნაჩემეფით, ნიუ-იორკიშ უნივერსიტეტიშ კურსნათებუეფი დო უნივერსიტეტიწკჷმა აფილირაფილეფი რდეს: ნობელიშ პრემიაშ 38 ლაურეატი, ტიურინგიშ პრემიაშ 8 ლაურეატი, ფილდსიშ მენდალიშ 5 ლაურეატი, 31 მაკარტურიშ სტიპენდიანტი, პულიცერიშ პრემიაშ 26 ლაურეატი, 5 ააშ გუბერნატორი, ნიუ-იორკიშ 4 მერი, ააშ-იშ 12 სენატორი, წჷმმარინაფალეფიშ პალატაშ 58 მაკათური, ფედერალური ორეზერვე სისტემაშ 2 მადუდე, ტონიშ ჯილდოშ 25 გომორძგვილი, გრემიშ ჯილდოშ 12 გომორძგვილი, 17 მილიარდერი დო ოლიმპიადეფიშ 7 მედალოსანი.