ნიანგეფი თაშნეშე ნიანგერეფი, ნიანგვერეფი (ლათ. Crocodilia) — ჩხოლარეფი ქვერქვენწეფიშ რანწკიშე. თინეფიშ სიგჷნძა 2-5 მეტრი რე, ოშა-გოშათ (ნილოსიშ ნიანგეფი, ჯიქალი ნიანგეფი) — 7 მეტრშახ რე. უღჷნა გჷნძე, ხასჷლეფშე ეკობირტყელი კუდელი, წჷმოგჷნძარსფილი ნიჩვი, კუნტა კუჩხეფი, უკახალენი ბორჯეფს შქას გინოზინდილი რე დსცხი. პინჩეფი დო თოლეფი (ვერტიკალური თოლნსკაკათ) ჟილეშე რე ეკინელი, ნამუთ თინეფს საშველს არზენს წყარშე ხვალე თოლეფი დო პინჩეფი უჩქუდანი. პინჩეფი დო ჸუჯიშ რხვილეფი თხილერი რე ოფორალეფით. რსხული, კუდელი დო ბორკეფი ფორილი რე თინკუნთხუამი ბაკა ფარეფით. ჩხვინდი დო ნოჸორი გიშართილი რე პიჯიშ გვამშე მაჟირაშული ყვილამი სასათ. „ქვარაშ ხასჷლაშ ყვილეფი“ უღჷნა, ლაბერწი — ვარი. დუდიშ ტვინი ძალამ გოვითარაფილი რე. გუშეგორუაფჷნა ჯგირი რჩქილათ დო რწყებათ. გურიშ ლაგუჯეფი ედომუშამო გინოკიდელი რე, მარა აორტაშ მიკეფი ართოანწკჷმა რხვილეფით რე მერსხილი, ნამუშ გეშა არტერიული დო ვენური ზისხირი ართიანს აწყორუ. ბჟღერიშ ბუშტი ვა უღჷნა. ფიჟვეფი ჯგირო რე გოვითარაფილი. ნინა უყარუ რე. ცეკური კიბირეფი ფოსვეფს ინოხე. ნიანგეფი ხე ტროპიკულ ორტყაფუს. შეულებჷნა ართი წყარინოხვილშე მაჟირაშა კაბეტი მეძენაშა გინულა. აქტიურეფი რენა სერით. ჭკომჷნა უმენტაშო ჩხომეფს, წყარიშ შხვა ჩხოლარეფს, რსხულით კაბეტი ნიანგეფი გეთმიანთხჷნა კაბეტ ჩხოლარეფს (ორინჯეფსჷთ) დო ადამიერს (გიშაკერზაფილო ოშქურანჯი რე ჯიქალი ნიანგეფი). დადული ნიანგეფი ქვიშას (უმენტაშო მეჩეჩის) დვანს 20-100 მანგარხეჭამ მარქვალს, გჷთმარზუნა 80-100 წანას. ნიანგეფიშ ხორცის ოჭკომალო გჷმირინუანა, ტყების — შხვადოშხვა საგალანტერეე ნოკეთობეფიშ ოკეთებელო. ასე ნიანგეფქ ოგჷნაფკეთ მიჯალაგჷ. ხე თეხანური ნიანგეფიშ 21 გვარობა, ნამუეფჷთ აკოკათელი რე 3 ფანიას: გავიალეფი, ნანდული ნიანგეფი დო ალიგატორეფი.
- მუსხელიშვილი თ., ქსე, ტ. 7, ხს. 407, ქთ., 1984
