Motto : Zir la. Tanpui la.

Humhim rawh

Theme :Pathian zarah huaitakin kan ti ang - Sam 108:13

ZIRLAITE KHAWNVAR
Vol. VIII Issue No.12 An official organ of the Mizo Students` Association, Bangalore Sunday January 6. 2013

ZIRLAITE TUKVERH
#. Tunlai hian Karnataka State Law University hnuaia LL.B zirlaite chuan Semester exam an nei mek a ni. #. Dr. AIT Zirlaite pawhin tunlai hian Semester exam an nei ve mek a. An zawh hun tur hi Semester tinah a inruallo nuaih a. Amaherawhchu, January thla chhung hi chuan exam an zawhfel hman vek beisei a ni. #. Hetihlai hian UVCE zirlaite chuan tun thla ni 12 atang hian Semester exam an nei tan ve dawn chiah a. Tun thla vek ni 23 hian an zofel thei ang. #. Mt.Carmel College-a degree Course ho te pawhin karleh atang hian Internal exam an nei dawn. #. Kan President tanglai Tv. K.Remruatfela chu tun thla ni 8 hian exam chawlh hmangin Zoramah min hawsan dawn a. Thlaleh tir lampangah a lo chhuk leh kan beisei. #. Kan member Krismas chawlh hmanga Zoram lama haw te pawhin an zirna hmun lam panin Bangalore hmun an lo thleng thla leh tan mek tawh a. Hetihlaiin Professional leh Technical Course zirlaite chuan chawlh hmangin Zoram lama haw an tum ve mek thung hlawm a ni. #. Mizo awm tamna College, hruaitute la tlawhpawh si loh kan awm a nih chuan inthlahrung hauh lovin hruaitu tupawh hnenah kan inhriattir zel dawn a. A remchang danin kan lo intlawhchhuak zel ang. MSA hi Zirlaite tan liau liau a ni e.

MSA BASAKETBALL TOURNAMENT

(Basketball Player te kan inpeih tawh em le???) MSA chuan kum danga kan lo tih thin ang bawkin thlaleh ni 9 leh ni 16 hian MSA Basketball Tournament ropui tak huaihawt turin a inpeih leh ta a. Kum danga kan tih thin dan ang mai ni lovin, kum hmasa lama kan lo tih tin tawh dan zawng zawng lehpela, changtlung leh ropui taka huaihawt tum a ni. Ruahmanna hmasaah khan chuan MSA Basketball Tournament satliah mai ni lo va North East Level Basketball Tournament ang zawnga huaihawt tum kha a ni a. Hemi chungchang inbuatsaihna pawh a la kal reng a. Amaherawhchu member te atanga kum danga MSA in kan lo tih thin dan pangngai anga a North East ang pui pui ni lova Mizo leh Mizo ten inpawhtlang taka inelna kan lo neih thin chu a pangngai anga chhunzawm leh an duh zawk avang leh North East level anga kalpui chuan Mizo Player tam takte tana harsatna awm thei dawna an hriat vangin an mi ngenna anga hetianga MSA Basketball Tournament pangngaia anga kalpui leh ta zawk hi a ni. Thlaleh mai hi Tournament tan hun a nih tawh avangin Basketball player te pawh a rang lama ngaihvena in lak fit pawh a hun angreng tawh hle a. Lawmman tha tawk tak siam tum a nih avangin kan inbuatsaih uluk pawh a ngai dawn hle a ni. Mitinte hian thiambik talent kan nei theuh a. Chung kan talent hrang hrang, a tangkai leh a hlawkthlak thei ang bera peipunsak chu MSA hian a ngaihpawimawh ber a ni a. Education thil tum chu Hmasawnna chikim thlen tih a nih angin, MSA chuan kan member te talent hrang hrang a tangkai thei ang bera khaichhuaksak turin a inpeih reng a ni.

HRIATTUR PAWIMAWH TE: 1. Entry Fee man hi Team khat zelah Rs 500/- a ni ang. 2. Entry Fee pekna tur te: a) Siama Sailo (9739517024) b) Vanhmingliani Hnamte (9535365525) c) Z.D. Lalruatsangi (9986734041) 3. Entry fee submit tawp hun chu ni 5th. February 2013 a ni ang. 4. MSA member-a inziaklut chiah an tel thei ang.. 5. Hriattur tul dangte chu issue lehah emaw MSA Official Facebook groupah leh MSA Website-ah rawn tarlan thin a ni ang.

ZIRLAITE KHAWNVAR, MSA, BANGALORE SUNDAY, JANUARY 6, 2013. Editor in Chief : K. Remruatfela Mob. : 9036515569 Editor : John Vanlalruata Sailo Mob. : 8884952151 Jt. Editor : K. Zohmingmawii Mob. : 8884952153 Cir. Manager :R.K. Lalrinsangi K. Lalrinhlua

KUM 2012-2013 MSA, BANGALORE HRUAITUTE

President Vice President . Secretary Asst. Secretary Treasurer Fin. Secretary - Tv. K.Remruatfela, KLE Law College - Tv. Laldintluanga, UVCE - Tv. K.Malsawmthanga, Krupanidhi College - Tv. Benjamin Vanlalruata, Darshan College - Nl. R.K. Lalrinsangi, KLE Law College - Nl. Vanhmingliani Hnamte, Jyoti Nivas College

Editorial:
LEHKHA CHHIAR HI
Lehkhachhiar pawimawhzia hi mi thiam tam tak ten an lo ziak kurnuai tawh a. A bik takin keini zirlai pheite chuan hriat pawh kan hre tam tawh hle ang. Maahhse, Thawnthuhlui chu min hrilh rawh tih ang deuhin hriat tamin pawi luat a nei lova. Chuvangin, ka Zirlaipui duhtakte u, lehkha hi chhiar tam rawh u tiin ka fuih leh duh hram che u a ni e. America President zinga hming thang ber te zing a mi Abraham Lincoln-a pawh kha a lehkha chhiar tam avanga hetiang dinhmuna awm thei kha a ni. Chhungkaw rethei tak atangin a lo thanglian chho a, a naupanlai pawhin an retheih avangin sikul a kal thei lova zirlai naupangte lehkha paih te chharkhawn in, a hmuh theih ang ang lehkhabu chu a chhiar chhuak vek zel a. Hei vang hian keini khawvel hmun kil khawr tak atang pawh hian kan lo hmel hriat ve theih phah a ni. Chuvangin, mi hlawhtling leh mi fing nih kan duh chuan lehkha hi kan chhiar tam a ngai em em a. Kan text book chhungah ringawt inkhurkhung lo hian kan vela awm Lehkhabu a tam thei ang ber chhiar zel tum tawh ila. Lehkha chhiar tam hi Kumthar thutiamah pawh i nei vek ang u.

Conveners: 1. Information & Publicity 2. Academy 3. Cultures, Games & Sport Tv. Lalrinfela, Dr.AIT Nl. Lalianmawii, Kristu Jayanti College Tv. P.C. Lalnunpuia, Dr. AIT

Senior Advisers : 1. Prof. Lalrinawmi Ralte 2. Pu Lalrokhuma Pachuau DG & IGP 3. Pu Lalhriatrenga Chhangte 4. Tv. Samuel Lalrozama Hmar 5. Nl. Blessy sailo 6. Pu Ajay L.O. Mizoram House 7. Nl. Lalropuii Committee Members: 1. Tv. John Vanlalruata Sailo, KLE College 2. Nl. Zomuani Ralte, KLE College 3. Nl. Mary Chalthandingi, Research worker 4. Tv. Samuel Lalfakzuala, Darshan College 5. Nl. Zothanpuii, Kristu Jayanti College 6. Tv. Jacob Lalremsiama, UVCE 7. Tv. Vanlalhruaia, UVCE 8. Nl. Lalhmingsangi, Mt. Carmel College 9. Nl. K. Zomuanpuii, Hosmat College 10. Nl. Z.D. Lalruatsangi, Hosmat College of Psyiotherapy 11. Tv. Eliza Vanlalpeka, Dr. AIT 12. Tv. Vanlalpeka, UTC 13. Tv. Peter Lalrinsanga, Christ University 14. Nl. Lalngaihawmi Sailo, Christ University 15. Tv. Moses Lalfakzuala, St. Joseph College 16. Nl. Lalchhantluangi, Christ University 17. Tv. Lalthachungnunga, Indian Academy 18. Tv. Vanlalhruaitluanga, St. Joseph College 19. Tv. Lalrinsanga, Krupanidhi College

Kan Chanchinbu hi tun session chhung kan Adviser Pu Lalhriatrenga`n min sponsor sak dawn a. A chungah kan lawm em em a ni.

ZIRLAITE KHAWNVAR, MSA, BANGALORE SUNDAY, JANUARY 6, 2013.

MSA DAY ROPUI TAKA HMAN A NI

Ni 8th. December 2012 (Sat) tlai dar 4-9 inkar khan kan Adviser Pu Lalrokhuma Pachuau (DG & IGP) kawtzawlah ah Mizo Students Association, Bangalore day vawi 7-na ropui taka lawm a ni. Hemi ni-ah hian College hrang hranga Mizo Zirlaite atangin item hmunnawm tak tak an entir bakah an Adviser Nl.Lalropuii hnen atangin fuihna thuchah tha tak ngaihthlak a ni a. Jyoti Nivas nula ten lam mawi tak an entir bakah an zaithiam chhuanvawr Nl. Lalramzauvi hnen atangin zai mawi tak ngaihthlak a ni a. Hemi bakah hian zai mawi tak Tv C.Lalrindika (UVCE) hnen atanga ngaihthlak bawk niin, UVCE atang vek Tv. Stephen`an lam mawi tak a entir bawk a. Item pangngai a zawh hnuah Request programme hawn niin programme hlimawm tak hman zui nghal bawk a ni a. St. Joseph mipaten lam mawi tak an entir a. Boruaka an invawrhvir vel kha chu hmuhnawm tak a ni. Request Programme a nih avangin Official leh member indaidanna awm tawh lovin kan President Fela leh Vice President Dintluanga te pawh an zai lawp lawp a. Mipui mit a tlaiin hmuhnawm an ti nangiang hle. Hemi ni-a sawihmaih theih hauh loh tur chu kan host te pahnih Chhantluangi leh Moses te beisei phak baka boruak an lo ngam leh mipui hmaa han chet vel an thiam kha a ni a. Hemi ni-a an chet dan ngat kha chu International level ah pawh a zahpuiawmlo ngawt ang le. Co-host Moses-a magic show mawlh mai te kha aw!!! Tin, hemi ni vek hian kan President tanglai Tv. K.Remruatfela lehkhabu ziah ZORAM KHAWTHLIR tih bu chu Pi Lalmuankimi (Pu Rotea nupui) chuan a release nghal bawk a. Krismas hla te hlim taka sakho a nih hnunah Biryani Dinner tui taka hmanga day hi khar a ni.

M.S.A. REPORT (2012)

MSA, Bangalore chuan Pathian khawngaihna azarah Term chanve a hmang zo awrh tihah Bangalore Mizo Zirlaite tana thiltih sawi tur a nei ve nual tawh a. Tun term chhunga hmalakna kan neih tawhte a tlangpui thu a mal malin lo lawr zur zur ila: Hmalaktawhna te: (a) MSA website changtlung tak, MSA chungchang leh College information tarlannan siam a ni tawh a. Domain name atan www.msabangalore.org tih a ni. (b) MSA Official Newsletter Zirlaite Khawnvar chanchinbu chu copy 200, thlakhatah vawi 2 chhuah thin a ni a. Amaherawhchu min sponsor tu transfer-a a awm avangin thlakhatah vawi 1 chauh tihchhuah a ni ta a ni. (c) BMA in Summer Sport MSA kutah awm ve tawh se tia a ngenna chu pawm a ni a. June thla khan Aizawl a Summer Sport neih naa Bangalore hminga tel te, MSA in kan enkawl a ni. (d) Bangalore hmuna Admission lo ti thar tur te a theih ang anga tanpui leh kawng kawhhmuh thin a ni a. Help line te siam niin a then Airport ah te hmuakin a hmun thlengin Admission te tihpui thin a ni. (e) Scholarship form awl sam baka Bangalore-a lei theih nan chahthlak leh zawrh a ni bawk. (f) MSA chuan Zirlai rethei harsa zual 3 Chhippui khua mite chu an lehkhazirna tur atan Rs 5000 theuhin a sponsor mek a ni. (g) Zirna Kutpui cum GB meeting, Sept 8th ah neih a ni a. Hemi ni hian Quiz-te, Debate-te, Extempore Speechte, solo leh group item hrang hranga in elna neih tawh a ni a. Hemi ni hian Zirlai rual 400 dawn kalkhawmin ruai tui tak kilhho nghal bawk a ni. He Kutpui atan hian sum leh pai invole pawh a tam angreng hle. (h) Bangalore chhunga Mizo Zirlaite tamna college te tlawh a nih bakah Mysore leh Mandya zirlaite tlawh an ni bawk. (i) Ni 8th. Dec 2012 khan Pu Lalrokhuma Pachuau DG & IGP quarter ah MSA Day ropui taka lawm a ni.

ZORAM KHAWTHLIR
Lehkhabu thlenphak lohna ram chu a thimin, In ropui tak, mahse eng luhna tur a tukverh nei lo In thim tak ang hi ani ringawt mai. India ram Prime Minister hlui Morarji Desai pawh khan tar at na nei mai lova kum 97 thleng a awm theih chhan kha a lehkha chhiar tam vang niin a sawi. Lehkha chhiar hian Hriatna a pai a. Hriatna chuan Finna min pe a. A tawpah mi thil ti theiah min siam thin a ni. Chu Finna chu Rs 120/lekin ZORAM KHAWTHLIR tih bu ziaktu, kan President tanglai ni bawk Tv. K.Remruatfela hnenah emaw BMK leh BMCF Reception Counter-ah a leitheih asin!!! Finna chu kawtthlerah a au a. A au ri chuan Bangalore khawpui meuh pawh a fan chhuak ta.

ZIRLAITE KHAWNVAR, MSA, BANGALORE SUNDAY, JANUARY 6, 2013.

POST MODERN KHAWVEL-AH HISTORY ZIR KAN HNUALSUAT DAWN MAW???

K.Remruatfela KLE Law College Tunhnaiah mii tam tak chuan Post Modern khawvela hmanlai thil hlui chanchin zir chu thil inhmehloah leh tul lovah an ngai tan a, fiamthu thawh nan te an hmang hial thin. Hei hi an sual vang hrim hrim ai mahin history tangkaina an man fuh tawk loh vang zawkin niin a lang. I dem lo ang u. Anni tan liau liauin History nihphung han hlui ila. History tih hi Greek tawng Historia tih atanga lak a ni a. A literal meaning chu tun hma thil thleng tihna satliah mai a ni a. Mahse, chu chuan a huamzau hle thung. Tun hma lama mi khan eng nge an tih a, eng nge an lo ngaihtuah a, engtin nge tunhi a lo inherchhuah tihte hi history atangin kan hre thei a ni. History chuan hun kal tawh chanchin hriattir mai hi a tum a ni lova. Chumi hun kal tawh a an khawsak dan chu darthlalanga hmanga, tun kan khawsakna atana inenfiah nana hman hi a thil tum ber chu a ni. Thil eng pawh hian history an nei vek a. Kan pian tirh atanga kan thihni thleng chanchin chu kan life - history a ni. History hian kan nunah hmun pawimawh tak a chang a. Kan dam laia thil tha leh sulhnu ropui tak tak kan tih chuan kan thih hnuah mite hriat reng kan hlawh ang a. Nimahsela, duhdah taka nun hmang kan nih chuan kan thlanlung a tlukdarh rual ruala thamral mai tur kan ni. America President hmasa ber George Washington-a leh a Finance Minister Alexander Hamilton-a te ten kum zabi 18-na tawp dawn lama an thawhrah chu America chuan tun anga ram hausa nih theih phah nan an hmang a. Abraham Lincoln-an kum 1860 hnu lawk a America mihangte an bawih nihna ata zalenna pek chu tun tlengin America mi hangten zalen phah nan an la hmang bawk. Khawvel mi ropui ber berte an lo neih theih phah a ni. Russia ram kan han thlir a, ram ropui leh changkang Communism hming mak puite chu Karl Marx-a hi an mi ropui berah an la chhal a nih hi. Napoleon Ropuia chu kum 1769-1821 lai vel chuan khawvel pum tinghing dat khawpin a ropui a. A thiltihtheihzia leh an hnam ropuizia French hovin an ngaihtuah chang chuan an ngai a, an lung a leng thin a ni. Ani avanga khawvel ram ropui ni thei hi an ni si a. Mi ropuite chu an hlu reng e. India ram hmeichhe Prime Minister hmasa ber Indira Gandhi-in India ram hausakna mi tlemteiin an hui vek chu tha a ti lova, kum 1970 ah Commercial Bank lian 14 lai a nationalised a; Economic History of India ah chuan thangthar zel ten an fak dawn chauh a ni. Tin, India ram chuan khawvel ram hriat thama a chakzia Pakistan a entirna te, Bangladesh a lo zalen phah dan te hi thangthar mipui maktaduai tam takte chuan Pi Indira Gandhi chu a thih hnuah pawh a rawn fak zui dawn niin a lang. Chuvang alawm, Lal Solomona, Isuan pian hma kum sang tam tak a mi tawh pawh tun thleng in a finzia khawvelin a hrilhfak a, a thu leh hla te rorelna fung bera an la hman ni. Isua pian laia khawchhak mifing, amah chibai rawn buk tu te kha zawlnei hrilhlawk,History -a Isua pian tur thu sawina lo hre lawk hlauh lo se chuan an buai thui viau mai awm ma nge. Indian history kan thlir chuan Hindu lalte an inngeih loh avanga Muslim hovin an rawn awpbeh tak thu kan hmu a. Tin, sakhaw pakhat vohbik hlur tum chu an hlawhtling ngai lo tih kan hre bawk a, hei hi kan tan inzirna pawimawh tak a tling. Tin, Russia leh French history kan thlir atangin lal nunrawng theih loh zia kan hmu bawk a. An mipui te an rahbeh avangin France leh Russia rama revolution a chhuah thu kan hrethei a ni. Chutiang bawkin, English history -ah lal chite leh mipui vantlang intihbuai thu kan hmu bawk a. Mipui thu ngaichang lova mahni ngaihdan ngawt kaltlangpui tum chu an tlakchhiat thin thu kan hmu. Hei hi hun kal zel tur atana inzirna pawimawh tak a tling. Chutiang a nih avang chuan history tel lo chuan a khawsak theih loh pawh ti hial ila kan sawisual tampui lovang chu. History tel lo chuan Political Science leh subject dang reng reng hi a famkim tawklo a ni. Historian ropui Mathaia, Marka, Luka, Johana te khan Isua thil tih kha lo chhinchhiah lo chu nise, Kristian sakhua pawh hian awmzia a nei mang lovang. Chuti ni suh se ram hran hran a mite chuan sakhaw khat bia tih inhre lo khawpin kan biak dan leh rin dan a hrang daih mai thei asin. Church History atangin a ni Pastor te pawhin kohhran awp dan an thiam thin ni. Chutiang chuan History zir pawimawhni hi sawisen rual a ni lo va. Tunhnaiah mi tam takin Science & Technology khawvela hmanlai thl thleng satliah han zir ringatw mai chu a hmn tangkaina a vang duh awm e mai an lo tih ringawt thin chhan pawh hi history nihna dik tak leh a pawimawhzia an la hriatfiah tawk loh vang leh he article hi an la chhiar ve loh vang a ni ngei awm e. Hria se la Ropuina Lalpa hi an khengbet tawp lo ang. History zir hi i uar sauh sauh ang u. Mite anga rualpawl ve i duh a nih chuan...