HOSPITAL SUNDAY THUCHAH 2013 DAMNA KIM ISUA Tin, Tlai lamah ni a tlak hnu chuan, damlo zawng

zawng leh ramhuai mante a hnenah an rawn hruai a. A khuain kawngkhar bulah an lo awm khawm ta mup a. Tin, mi tam tak nat tinrenga nate chu a tidam a, ramhuai tam tak a hnawt chhuak bawk a; ramhuaite chuan amah chu an hriat avangin an tawng a phal lo (Marka 1:32-34 ) Mihring puitling chin tawh phawt chuan tidamtu kan mamawhzia kan hre vek awm e. Dam manhla zia hre lo khawpa kan lo la hrisel a nih pawhin Pathian khawngaihna vang a ni tih erawh theih nghilh lo ila. Khawvelah finna leh thiamnate lo sang zelin, hmasawnna hi eng ang pawhin \hang lian sela, natna leh vanduainate hi phum bo a ni dawn lo, tidamtu kan mamawh reng dawn. Dik tak chuan khawvel \hang zelah hian natna leh vanduainate hi a pung ta sauh zawk niin a lang. Kan hriat ngai loh natna hlauhawm pui pui kan hre chhuak thar ta zel a, vanduainain mihringte min hliam na ta tial tial zawk a nih hi. Heng zawng zawngah hian keini Kristiante hi chuan tidamtu Isua kan nei tih i hre thar leh teh ang. 1. Isuan natna chi tinrenga nate a tidam \hin : Lal Isua rawngbawlna chanchin kan en chuan a tihdam rawngbawlna hi thil langsar ber a ni hial awm e. He tihdam rawngbawlna hi a thilmak tih tam ber zinga mi pawh a ni. Khawvelin tihdam theiha a ngaih tawh loh mitdelte hial pawhin tihdamna an chang a. Chu tihdamna chu mipui tam takin an zuina chhan pawh niin a lang Lal Isua rawngbawlnaah khan he tihdamna hi a pawimawh hle a ni ang. Chawlhni bawhchhiat phah hial nan pawh a hmang a nih kha! Kan Bible chang tarlan tak hian Lal Isua tihdam rawngbawl hna famkimzia chu nat tinrenga na hian a ti chiang hle. Lal Isua kha a khawnawtin an rawn pan a ni ber mai a, mahnia pan thei lote pawh chhungkhat leh \henrual \hate pawn an rawn hruai ni ngei tur a ni. Kawngkhar bulah chuan an awm khawm ta mup mup mai tih Bible-ah kan hmu, natna tinreng mai khan an rawn pan a ni mai a, Lal Isua bulah chuan damna an chang ta zel a ni. |henkhat chu thu maia a tih dam te, kuta a khawiha a tihdam thu te kan hre bawk. A hunlaia natna khirh ber ber thiamna leh finnaina a tihdam theih loh thleng khan an rawn pan zel a, damna kim Isua hnenah chuan tihdamin an lo awm ta zel mai a ni. A hmutute pawhin mak an ti a, inhnialna nasa tak a chhuah phah ta hial a nih kha, \henkhat mak ti lutuk phei chuan ramhuai hnathawhah te hial an puh a, mahse ramhuaite hial hnawtchhuak bawk si chuan ram tinah a chanchin a ti thang ta hut hut mai a ni. Hetiang taka tidamtu ropui Isua neitu kan ni hi kan va han vannei teh lul em. 2. Taksa leh thlarau, mihring pumpui tidamtu a ni : Lal Isua tihdam rawngbawlna kan thlir chuan taksa damna mai ni lovin, rilru leh thlarau damna kan hmu tel ngei \hin. Damna changtute chuan an lawmzia an lantir a, mite mak tih khawpin an hlimna a lo lang chhuak \hin. Pathian chawimawi leh Isua chanchin hrilin an hman hlel \hin a, a tidamtu chanchin chu an thupui ber a ni lo thei lo. Hei hian Lal Isua tihdamna chuan taksa, rilru leh thlarau tidamin chu tihdamna changtute chuan hlimna leh phurna thar nen an nun an lo hmang tawh \hin a ni. Bethesda dila damlo kum 38 chuang zet lo mu tawh, tuifawna dam beisei ve ngei pawh khan tuman an ngaihsak loh thu Lal Isua hnenah khan a lo sawi a; hetiangin, Ka pu, tui a fawnin dila min dahtu ka nei lo va, ka kal chhungin midangin min pen thlak khalh \hin (Johana 5 : 5-7) tiin vui hmui a lo pu a nih kha. A taksa natna chuan a thinlung leh a thlarau a hliam a, Isua lo lan hma kha chuan rilru leh thinlung na takin a lo awm a, beidawngin a kun a ni, Lal Isua a lo lan meuh chuan, Tho la, i awngphah la la, kein kal tawh rawh tia hmangaihtu aw chu a tan damna famkim a lo ni ta. Chawlhni ni mahse tuma khap zawh rual a ni ta lo, a tidamtu thu chu
www.mizoramsynod.org

a nun ti kaltu a lo ni ta. Kum rei tak chhung hmeichhe thi put khawvela damna zawnga hmu si lo khan Isua chanchin a lo hriat meuh khan beiseina thar nei ve lehin a puan hmawr chauh pawh deha dam inbeiseina a nei ve leh ta tlat mai a, a rin leh beisei ang ngei chuan mipui zi nuai nuai karah chuan a puan hmawr a va dek ta a, Lal Isua a\ang chuan thil tih theihna a chhuak ta, tihdamin a lo awm ta; chutiang tak rinna chuan Lal Isua pawh chu a tiding ta chawt mai a, chutiang tak rinna nei chu hmuh ve ngei a duh ta a ni ang, tunge ka puan dektu kha tiin a hawi kir a, chu hmeichhia chu a hmaah bawk khupin a rawn inpuang ta. Chu veleh Isuan ka fa thlamuang takin kal rawh a ti a, helai thuah hian Lal Isua tihdamnaah hian taksa damna mai hi Lal Isua tum a ni lo, he hmeichhia hi mangang thla barin kum rei tak a lo awm tawh a, a beisei damna hmu loin kum tam a liam tawh a, chu tak chu Lal Isuan damna kim pek a duh, thlamuang taka a dam chhung nite hmang ve tur in a duh a ni. Timaia fapa kutdawh mitdel kawng sira lo \hu pawh khan Isua lo kal thawm a hriat chuan ring takin a au va, Isu, Davida fapa, mi kawngaih rawh, tiin. Mi tam takin ngawi tura an khap pawhin a au ring zual sauh va, chutah meuh chuan Lal Isuan kal tlang san chi a ni lo tih a hria a, mitdel chu a han kova, Eng nge tih sak che ila i duh a ti a. Chutah zet chuan chu mitdel chuan damna kim Isua hnenah khawvela a thil duh ber leh chak ber sawi chhuahna hun a nei ta, Rabboni hmuh theih ka duh tiin. Chutiang taka Lal Isuaa rinna a lo nghaha, a duhthusam tinreng pe theitu hnenah a nun a han leih buak meuh chuan, Kal tawh rawh i rinna i dampui a ni e tih chu a thu dawn a lo ni ta, lawm em emin a tidamtu hnung chu a zui ta a ni. 3. Isua chu mihring leh a chenna khawvel tidamtu a ni: Natna tinreng tidamtu Isua hi mihringte tan damna famkim a ni tak zet. Kan taksa, rilru leh thlaru tidamtu a ni a, kan chenna khawvel tidamtu a ni bawk. Khawvel hian damna a mamawh ber a, chu chu mihringin a zawn ber pawh a ni. Sum leh pai rohlu tinreng duh a, kan intlan siakna chhante pawh hi kan chhungril lam damna kan zawn vang a ni ber. Hlimna leh lawmna kan duh a, kan zawng a, \henkhatin sum leh paiah an zawng a, \henkhatin khawvel nawmchennaah an zawng a, mahse an hmu lo vek. Khawvela sawrkar lian ber berte pawh hian midang aia ropui an duh a, ramdang aia hausa leh thiltithei nih an duh a, rilru nuam leh thlamuang taka awm an duh vang a ni. Chutiang neih tum chuan hausaknaah te, ralthuam neih \hatah te, an intlansiak chiam a, a tawpah chuan an ralthuam neih \hatte chu an mahni tithlaphangtu leh tiluhaitu an ni leh tho. Hausa ber berte pawh nun beidawngin an intihlum a, nawmsak thlahlelho lah nawmna reng hmu zo loin an intihlum leh nawlh bawk \hin, damna Isua an hriat loh vang a ni. Lal Isua chu khawvel tidamtu a ni a, thinlung tidamtu a ni bawk a, ramhuai leh thlarau sualte hneha ngamtu a ni. He khawvelah hian kan taksa chu a dam a ni thei e, mahse thlarau sualin kan chhungril a tina a, a tihliam a, lungawina kan hmu zo \hin lo. Sum leh pai chu engzat pawh nei ila, hlimna leh lungawina lei theih a ni chuang lo. Khawvel hian remna leh muanna duhin theih tawp chhuah mah sela, remna Lal Isua tel lo chuan an hmu dawn chuang lo. Sual leh ramhuaite titlawma ngamtu Isua hi mihring leh a chenna khawvel tidamtu awm chhun a ni. He Hospital Sunday kan hman mekah hian, Kohhranhoten Isua Krista tihdam rawngbawl hna chhun zawmtu kan ni tih hre thar leh ila, kan velah damlo leh chaklote, sual hliam tuar te, ngaihsakin thinlung hliamte tuam dam ila, kan chenna khawvel tidam turin damna Isua chanchin i tlangaupui leh ang u. Synod Hospital-a thawktu zawng zawngte tan nasa lehzualin \awngtai ila, kan tih ve theih ang ang te, tlem lua thlu lovin i \ang tlang thar leh ang u, kan tih tawh reng \hin ang khan. Mahnia nachang hre lo te pawh damna Isua hnen hruai thleng ila, mite inpekna cho thar chung leh chanchin \ha timawi zuala, he khawvel hian damna a chan theihna turin Kohhranhoten theih tawp i chhuah ang u. Tunlai hian natna tlanglawn tak AIDS kan tih te pawh hi \henkhatte chuan kan thinhrik deuhte pawh niin a lang a. A veite ngei pawh hmuhsit leh endawngna hnuaiah an awm mek, pharte ngei pawh mahni kuta khawiha tidamtu Isua rawngbawlna kha i hre thar leh ang u. Taksaa tuarna aimaha an thinlunga an tuarna hi a let tamin a na zawk tih te hi hriatsak ila, nat
www.mizoramsynod.org

tinrenga na tidamtu Isua hnungzuitute hian endawng leh thlauhthlak nei lovin, damna kim Isua hnung zui turin i inbuatsaih thar leh teh ang u. Lalpan a thu malsawm rawh se.

Sd/Dr. VANLALRUATA Secretary, Synod Hospital Board. & Director, Synod Hospital.

Sd/Rev. LALRAMLIANA PACHUAU Chairman, Synod Hospital Board. & Moderator, Mizoram Presbyterian Church Synod.

www.mizoramsynod.org