Sum Khanggui

{ $um Khanggui } [ LT TUANG ] 03 MAY 2022 Zol Olna K h e n p i ( 1 ) ................................................................................................................... 3 Van Kikhekna (Sum Masa = Van) ............................................................................................. 3 Van Kileina (Sum Nihna = Kham) ............................................................................................ 3 Sumbawl Sumbuk Khualzin Kipatna ......................................................................................... 4 Bank Kipatna ............................................................................................................................. 4 Company Kipatna ...................................................................................................................... 4 Customer Service Bulphuh Kipatna........................................................................................... 5 Bankcruptcy Kipatna ................................................................................................................. 6 K h e n p i ( 2 ) ................................................................................................................... 6 Kumpite le Kham Kemte ........................................................................................................... 6 Sumdal Kipatna (Sum Thumna = Laidal) .................................................................................. 7 Summan Kiamna (Inflation Masa)............................................................................................. 7 Sumngo Kipatna (Sum Lina = Ngun) ........................................................................................ 8 A Nih Veina Summan Kiamna (Inflation Nihna) ...................................................................... 9 Sumnen Tuamtuam Kipatna (Sum Ngana = Ngun, Haak) ........................................................ 9 Kham Pen Vankhaam A Suakna .............................................................................................. 10 K h e n p i ( 3 ) ................................................................................................................. 10 Gam Khatlekhat Sum Tha Kidemna ........................................................................................ 10 Coupon Kilimzatna (Sum Gukna = Coupon) .......................................................................... 10 Voucher le Cheque Cihte Kipatna ........................................................................................... 11 Token Kipatna .......................................................................................................................... 11 Sum le Siatna, Hoihna.............................................................................................................. 11 K h e n p i ( 4 ) ................................................................................................................. 12 Banks Khempeuh Kumpi In A Letna....................................................................................... 12 Sumdal ii Manphatna ............................................................................................................... 13 Sumdal A Kip Paisuakna le A Kizelhna .................................................................................. 13 Sum Tungah Thuneihna ........................................................................................................... 14 K h e n p i ( 5 ) ................................................................................................................. 15 Gam Khatlekhat Sumdal Man Tawh Kidemzia ....................................................................... 15 Sumdal Tungah Muanna Hong Bei.......................................................................................... 15 K h e n p i ( 6 ) ................................................................................................................. 15 Digital Sum Hong Kizangh ...................................................................................................... 15 1 LT TUANG K h e n p i ( 7 ) ................................................................................................................. 15 Crypto Sum Hong Kipan ......................................................................................................... 15 2 LT TUANG Khenpi (1) Van Kikhekna (Sum Masa = Van) Sum cih bang a omma, van lei van zuak cih bang zongh omlo hi. Gip zong le khuai zong bangin deihtuak kikhek tek uhhi. Gtn. Lokhote in sa a duh vua leh, gankhawite tawh a khawhsa uh mehteh mehgahte va khek uhhi. Hih pen khat le khat kikal deihtuak kikhekzia a masapen hi. Van le van kikhek pen a deihte lam pan a khek nop uhhang' a langkhatte in a khekna vante a deihkei vua leh, van kikhek ding a lemlo hong suak hi. Tua panin a deihte lam pan bang tawh kikhek ding cih dot kulta aa, van hoih penpen mah kingen nuam ciat uhhi. Tua van hoihte le a deih van khat lah a manphatna Van deih a tam leh, tua van in man hong nei semsem kikhailua ahih manin a deihte lam pan suak hi. A deih tamin a van tawm semsem lai leh, a khek ngamlo zel uh cih bang om thei van neite ii thuthu hong suak hi. A van neite sak hi. Ahi zongin kisam mahmah peuh zahzah tawh kikhek (lei) mah hong kul hi. uh leh khekloh lah phamawh veve cih bang hi. Van Kileina (Sum Nihna = Kham) Van neite ii cih bangbang tawh a deihte lam pan khek det ding pen suplawhna tampi hong piang hi. Mikim in a deih, kham (gold) pen van khat peuhpeuh tawh khek ding ci leh, van neite lam pan a nial kiomlo hi. Tua kham lah van neng khat tawh khek ding lemlo ahih manin tua khamte nensuak aa (coin) khamtangin kibawl hi. Tua akipan van le van kikhek nawnloin khamtang tawh van khatpeuh kikhek ta hi. Van le van kikhek ding sangin van le kham kikhek ding pen kihona lemzaw hi. Tua vankhek pen tuhun teh "lei" cih tawh hong kibang hi. I deih khat hong kipiak nading, hong pia dingte lam pan bang deih thei uhhiam, bang tawh khek nuam ding uhhiam cih tel lehang i deih khatpeuh ngah ding baihzaw thei hi. 3 LT TUANG Sumbawl Sumbuk Khualzin Kipatna Van le van kikhek hun lai-in ei nasep ciat bek kisem hi. Kham tawh vankhek hun ciangin kham deihte in nasep ngeina dan bek hinawnlo aa neihsate zuakna, mi kiang pan tan aa zuaksawnna cih bang hong kipan uhhi. Hih pen sumbawl kipatna, sumbuk (sai) zuak kipatna hong suak hi. Khua khat le khat, gam khat le khat dongah zinin van hoih tuamtuam tawh kham khek dingin zin kawikawi uhhi. Hih pen sumbawl khualzin kipatna hong suak hi. Sumhau nuamte in a kivak nading bek uh nasemlo hi. A nektawm khop bek tawh lungkimlo uhhi. Bank Kipatna Kham neite in a khamte uh mansuah thei hi. Kigu thei hi. Kisut kiluh thei hi. Tua ahih manin khamhau tadingin lungmuanna hong om nawnlo hi. Khamhau tading a neihsa uh a bit nading pen vai thupi mahmah khat hong suak hi. Tua panin mi thahatte cial aa a neihsa uh cingsak hi. Neihsa kepbit ding a thupit lam pen mi thahatte in zongh a tel semsem uh ciang khamhaute tungah tokaai kulloh lam hong phawk uhhi. Khamhaute in mi thahatte lungkimsakkei leh, khamhau tading mah supna tamzaw ding hi. Tua ahih manin khamhaute in kham cingte pen lehmai-et ding a kulzaw dinmun hong tung hi. Khamhaute khutnuai ah mi thahatte in nasem nuam nawnlo uhhi. Amau le amau in kipawlna ding aa, tua a kipawlna vuah khamhaute in a kham uh a kepsak nadingin va lehpuak ta uhhi. Hih pen bank kipatna hong suak hi. Mite’ haksatna a huh, mite’ kisap a sem theite pen sumbawl siam ahi uhhi. Company Kipatna Mi thahatte in khamkep nasep hong semin kham kepman la uhhi. Tua mi thahatte in khamcing ding, kham phazah ciamteh ding cih bangin nasem mi cial thuahthuah uhhi. Hih pen company (employer le employee) kipatna hi. Tuama aa te pen to le sila, sumbawl le nungzui, mimalin sumhau le nasem cih dan bek hi aa company danin nasep pia, nasep sam, khasum pia, a siamna zui-in cial cih bang dan omlozaw hi. (A tel nop dingin hih munah sum cih kammal i zat hi.) I hauh semsem leh, pawl i kisam semsem ding hi. Hong huh ding, hong seppih ding mi i kisam semsem ding hi. Hauh ciang a kiphasakte, kuamah a awlmawhlote in sawt khomlozaw theipah uhhi. 4 LT TUANG Customer Service Bulphuh Kipatna Kham koih tampite in a kisap zah uh bek lakhia aa, a mette pen kham kepna ah va khol thuahtuahzaw uhhi. A neih zahzah uh inn-ah kem gailo, a pua-ah puakhialo, zangkhialo uhhi. Tua ahih manin kham kemte' khutsungah kham tampitak kizangloin om kinken den hi. Tua ciangin kham neite in bang hun aa hong la zel uh, bangzah tabang hong la thei uh cihte limtakin en uh aa, a laakloh hun sung, a laakloh zah teng pen mun dang, khua dang ah lo lei, gan lei, inn lei-in khamte pei uhhi. Tua a leite uh zuakkik zelin a hunlap aa khamkepna ah koihkik zel uhhi. A koihkik manloh uhhang a kilakhia zel zah sangin a om zah tamzaw den ahih manin tua khamte amau thu-in a zeektawm lam uh kilang tuanlo hi. Mi dangte tungah tua khamte a met tawh leitawi gawp uhhi. Tua nangawn zongh kham neite in kham kepna pan a laakkhiat nop zahzah uh a ngah theih naak vua leh, tua bangin kham kemte in a pei uh pen poisalo uhhi. Tua panin hih khamkep nasep pen khamkem bek hi nawnlo aa sumbawlna lianpi hong suak hi. Amau kiangah kham tampipi a kikoih ding deihna tawh kham kepman khiam, kham kepman la nawnlo aa khamkep nasep a sem kipawlna tuamtuam hong kibehlap hi. Kham kepman tawmzaw le mimal kizopna a hoihzaw, a siamzaw hong kidem ngeingai uhhi. Hih pen customer first ci aa, service kidemna kipatna hong suak hi. Kham neite in kham kepman a kiman theithei mah teel uhhi. Limtakin a hopih siam tata mah teel uhhi. A lungkimsak zawzawte kiang mah ah a khamte uh koih nuamzaw uhhi. Ahi zongin, kham kemte in a kham kepsakte uh bangci kep, bangci sen, bangci zat cihte kin masakin na nei khalo uhhi. Tua hangin kham kemte in tua a kep uh khamte pen amau met nading, amau hamphat nadingin na pei uhhi. Na khatpeuh pen a mawkna-in hong kipia, hong kizangsak, hong kikepsak leh, thu khatpeuh ah limktakin ong kihopih, hong kithupit bawl leh, tuate ii nungah a geelsa uh a deihna khat na om khinkhian thei hi cih pen phawk gige huai hi. 5 LT TUANG Bankcruptcy Kipatna Kham kemte in a kikemsak khamte mi dangte tungah a met tawh leitawi na piasawn uhhi. A hunlapin a met ngah manlo cih bang om thei hi. A leitawi teng mahmah uh zongh ngahkiklo cih bang zongh om thei hi. Tua bek thamlo, a kikemsak khamte tawh innlelo, gan le van tuamtuam a leite uh khamin suahkik manlo, I neihsa khatpeuh, suahkik zolo, suplawh cih bang zongh om thei hi. Tua mi dangte khut ciangin kham kemte in kham neite ii deih hunhunin, a sungah a om khit deih zahzah uh piakik zo nawnlo hi. Tua panin kham naak leh, ei aa cih neite in kham kemte (kham kep nasepna) muang zo ding hamsa thei hi. nawnlo uhhi. Kham kemte tungah heh mahmah, muang nawnlo cih bek tawh hong manlo hi. Kham kemte in a piakik nuamlo uhhilo aa, a piakik zolo uhhita ahih manin a kepsakte uh ngetkik zawh thu, sutkik zawh thu tawh kingahkik thei nawnlo hi. Tua ahih manin kham neite le kham kemte kikalah buaina lianpi hong so semsem hi. Tua panin kumpi thuneite tungah hong kitun uhhi. Khenpi (2) Kumpite le Kham Kemte Kham kemte in kham neite tungah khamte a piakkikpah zawhloh uhhang, a khut sung vuah neihsa tampi om lai hi. Tua a kikemsak khamte pen innmun logamin a kep om hi. Mi dangte tung pan a ngahkik ding uh zongh om hi. Tuate pen kham neite ii deih hun aa, kham suahkik manlo uh ahih manin a piakik zolo bek uh ahi hi. Tua ahih manin kham kemte in a piakkik zawhloh uhhang bangmah neilo cihna hilo hi. Lam khat pan lah, nei napi piakik zolo hong suak zel hi. Tua ahih manin a manlang theithei-in piakkik a kulte pen suplawhsa in a neihsate uh zuak aa kham neite piakik uhhi. Ahi zong, a neihsa khempeuh suplawhsa in piakik ding hi leh, kham a kikemsak khempeuh piakik zolo ding uhhi. Tua ahih manin kham ahilo, a van aa piakik, a van aa la, a van aa sutkik cih tawh zongh hih buaina pen hong veng theilo hi. Sum i zatna, i zeekna zui-in, i khut sungah atawm atam kep den huai hi. A van bekbekin a om leh, sum kisap ciang, tua vante pen a kimanin zuakkhiat kul kha thei hi. Kham kemte in kham neite a piakkikpah zawhloh uh ciang, kumpi thuneite in thukhensak hong kulta hi. Kumpite lam pan kham kemte ii neihsa tampi a om lam thei uhhi. Ahi zongin tua neihsate a kimanin zuakkik aa lohna tawh zongh loh gai zolo ding cih thei uhhi. A met ahk a sumbul zah mah tawh zuakkik aa loh ding lah, bang hun ciang loh zo ding cih kitheilo hi. Kumpite in tua kham kemte man leh lah, kham neite in a neihsa uh a ngahkik ding uhhi tuanlo hi. Kham kemte zongh, kham neite zongh a nihun suplawhzaw ding hi. Kham neite in a kepsak zah mah uh ngahkik nuam uhhi. A kepsak zah lian uh lah, kham kemte in piakikpah zolo uhhi. Tua ahih manin kumpite in lampi khat hong zong uhhi. 6 LT TUANG Sumdal Kipatna (Sum Thumna = Laidal) Kumpite ii theihpihna tawh kham kemte in kham neite tungah kham khat teh kham neihna laidal khat ta pia hi. Kham sawm neite in kham neihna laidal sawm ngah kha uhhi. A kham teekteekin a keploh uhhang, tua kham neihna laidal khat a neih vua leh, kham khat ta a nei-in kumpite in ciaptehsak hi. Tua aa kipan, van kilei ciangin kham tawh kikhek nawnlo aa, tua kham neihna laidal tawh kikhek uhhi. Tua laidal khat a neih naak leh kham khat nei cih bangin kisim uhhi. Kham nga man van a kilei vua leh, kham nga neihna laidal pen kipia uhhi. Tua panin tua kham neihna laidal tawh kham taktak zongh kikhek thei hi. Pawlkhat in khekpahin pawlkhat in khekpahlo hi. Kumpi theihpihna tawh a kibawl laidal ahih manin khat le khat kikal sumbawl vanzuakna ah kham sangin kham neihna laidal a zangzaw zongh kiom hi. Tua laidal a kizat sungin kham kemte in a neihsate uh zuakkik aa, kham neihna laidal a phazah leh kham om zah a kikimin koihkik zawh ding ahi hi. Kham neihna laidal phazah le kham om takpi zah a kikim kul hi. Kham neihna laidal tamin kham om takpi zah a tawmzawk leh kham neihna laidal tawh kham a kikhek ciang khamteng bei aa kham neihna laidal val lai ding hi. Tua a val lai khem neihna laidalte pen a mawkna, laidal val suak ding hi. Tua ahih manin kham neihna laidal phazah leh kham om takpi zah a kikim kul hi. Summan Kiamna (Inflation Masa) Mipite in kham tangin laidal hong zangh uhhi. Tua laidal tawh kham a kheksimun a khek zahzah uh kingah ahih manin, tua laidal in man hong nei hi. Tua ahih manin mipite in laidal vive mah tawh kemzaw le sumbawlzaw ta uhhi. Khasum, thamante zongh laidal vive tawh kipia hi. Laidal ahih hangin kham kemte tungah tua sum neihna laidal va lak uh leh, kham kemte in tua sum neihna laidal tawh a kikim khamte pia uhhi. A kham taktak tawh sangin zongh laidal pen kepna zatna lemzaw hi. Hong sawtsawt ciangin, a tamzaw thamtham in laidal vive bek tawh nasem hi. Tua panin kham kemte le kumpite in kham neihna laidal pen tampipi hong bawlkhia uh aa, a kep uh, a neih uh kham taktak a om zah sangin laidal (sumdal) pen hong tamzaw hi. Sumdal hong tam semsem hi. Ahi zongin, mipite in tua laidal bangzah pha aa, kham taktak a om zah lian bangzah pha cih theilo uh ahih manin awlmawhlo uhhi. Mipite sung pan thu thei, khuaphawkte in laidal phazah le kham phazah kikim dingin umlo uhhi. Kham taktak a om laitak, a laidal neihte uh tawh a kikimin kham taktakte khek samsam uhhi. Tua panin mi dangte in zongh tua laidal tawh khamte a khekkhek vua leh, a kham piak ding uh kicinglo aa, kham neihna laidalte hong val hi. Laidal sangin a kham limlim aa tawmzaw ta ahih manin, laidal nih teh kham khat cih bangin a khek nuamzaw mai zongh hong om ta hi. Laidal nih kimanna neiloin kepkep sangin kham khat kem nuamzaw ta uhhi. Tua panin kham khat teh laidal nih hong manto suakta hi. Tua pen laidal (sum) man hong kiamin, kham man hong khang hita hi. 7 LT TUANG A kibawl tawm thei laidal pen tampi om thei ahih manin laidal val thei hi. A val naak leh a manphatna kiam cihna hita hi. A kibawl tawm theilo kham taktak pen tampi om theilo ahih manin val theilo hi. Vallo ahih manin a man pen kah semsem ahk a kibawltawm thei ziauziaute zahin a man kiampah hanhan samlo hi. Tua ahih manin, na khatpeuh, van khatpeuh pen a kibawl tawm thei nam ahih naak leh a mante kiam lam manawhzaw thei hi. A kibawl tawm theilo, kham, leitang cihte ahih leh mankhan lam manawhzaw thei hi. Sumngo Kipatna (Sum Lina = Ngun) Mipite in laidal pen kham tawh a kikimin a kikhek theih nawnloh ciang man nei hong sa nawnlo uhhi. Hong zangh nuam nawnlo uhhi. Tua laidalte mei tawh haltumin lungphona hong nei uhhi. Tua ciangin kumpite in, laidal val tampi zongh a bawlsa uh tawh a vekin kham aa a kikhek theih nading lampi hong zong hi. Kham zonna, kham tawhna tawh leisung sum piangte tampi ngah ding hong hanciam uhhi. Ahi zongin kham taktak pen a kicingin ngah zolo uhhi. Leisung sumpiang mah ahi; ngun (silver), haak (bronze) cih dan a manpha veve tampi bel hong ngah thuah uhhi. Tua panin kumpite in kham le ngunte helhin khamtang hong bawl thak uhhi. Gtn. Kham 10 pen ngun 5 tawh a helh bang uhhi leh, kham 10 tawh khamtang 15 suah thei hi. Tua ciangin ladal a bawlzah uh pen khamtang tawh kicingtakin hong khekkik sak zo uhhi. Tua pen khamtang taktak hi nawnlo aa sumngo hita hi. Hih bang dan nasepna tawh kumpi thuneite le kham kem bankers te pen hong kipawl, na hong semkhawm toto ahi hi. 8 LT TUANG A Nih Veina Summan Kiamna (Inflation Nihna) Kham kem nasemte in kumpi thuneite theihpihna tawh kham tampitak ngun tawh helhin khamtang (sumtang) tampi hong bawlkhia uhhi. Mipite in a kham taktakte uh va kemsak aa, a ngahkik uh ciang, ngun tawh kihelh khamtang bek hong ngahkik uhhi. Tua khamtang a kheksak uh, kham le ngun a helhte uh pen kham taktak ahihloh lam kinung theih veve-in mipite kilungkim zo tuanlo hi. Kham kicilo aa sumngo kici hi. Kham taktak mah a khek nop uh ciang hong haksa lai veve bek thamlo, kham tampite pen sumngo bawl nadingin kizangh ahih manin kham hoih taktak pen hong tawm semsem hi. Kham hoih taktak ngah ding hong haksa semsem aa, kham ii manphatna hong kah tektek hi. Tua ciangin sumngo tamin kham taktak tawh a phazah hong kikim nawnlo hi. Kham taktak deihte in sumngo 2 le 3 tawh a khek ciang bek kham taktak 1 khawng ngah kha pan uhhi. Sumdal tampipi kibawlkhia semsem leh sum tam semsemin tua summan pen kiam semsem hi. Tua hangin kumpite in sumdal pen a bawlkhia pakpaklo uhhi. A gam sum uh a mankiam ding deihlohna hi. Gamneu khat, gam khangtolo khat sangin gamlian, gam khangto khat ii sumdal bel tamzaw kha mah ding hi. Ahi zongin a kizatna mun, tua sum a kisapna tawh kileekkimin i etciang, tua sumdalte pen tawm lai, tampi kisam lai ahih manin, tua gam khangtote ii sum pen manpha semsem hi. Sumdal tawm le tam cih pen a phazah tawh hilo aa, a kizat a kizekna ah a kisam zah le a om zah tawh atawm le atam kikhen ahi hi. Sumnen Tuamtuam Kipatna (Sum Ngana = Ngun, Haak) Van kikhek (lei/zuak) nadingin kham bekbek a kizat pen kham haksatna tawh hong lem zo nawnlo hi. Kumpite in ngun (silver) tawh kham helhin a bawlsa uh zat suak ding hong kipsak ta hi. Tua bek thamlo, kham le haak (bronze) tawh zongh a helh uh pawlkhat omsak beh lai hi. A sumtang manphatna zui-in kham bek, kham le ngun kihelh, kham le haak kihelh cih bangin sumnen hong khen uhhi. Kumpi thuneite ii thukhun hong suak ahih manin mipite in deih le deihloh kisailo a zat mah uh hong kul ta hi. Kham a deih tentan mipite in ngun sum, hak sumte tawh khek aa, kham man pen kiam zel kah zel cih bang hong om thei ta hi. Sum le kham aman kikimna hong bei ta hi. Kumpi in sumdal bawl beh ding a cih naak leh, sumdal kibehlap ding cihna hita hi. Sumdal a kibehlap hangin kham pen kibehlap tuanlo hi. Tua ahih manin kham phazah le sumdal phazah a kihawm ciang, kham khat pen sumdal a tamto semsem tawh hong kikim hi. Tua pen vanman khanna le summan kiatna ahi hi. 9 LT TUANG Kham Pen Vankhaam A Suakna Gam sungah kham pen van leina/zuakna-in hong kizat nawnloh teh, kham kisapna hong kiam pian hi. Kham man hong kiam hi. Ahi zongin gamdang, mundang ah kham mah a kisap veve laina om thei hi. Tuate ah a khamte uh va zuak hi. Amau gam sungah a zuak sangun tua gamdangte ah zuak uh leh tam ngahzaw uhhi. An, Puan, Van hoih tuamtuam tawh tua khamte khek uhhi. Tua vante pen a gam vuah zuakkik uhhi. Gam khatlekhat kikal van kileina ah kham mah tawh kikhek hi. Tua pen a gamsung vua kham manphate gamdang ah kipuak ahih manin kumpite in zuakloh ding kham uhhi. Kizuak sim teitei hi. Kumpi in kham aa zuaksim a kul teh haksa semsem ahih manin a man khang tektekzaw lai hi. Tua aa kipan kham pen kumpi theihpihnalo tawh a kizuak ciang vankhaam hong suak hi. Khenpi (3) Gam Khatlekhat Sum Tha Kidemna Gam tuamtuam aa kumpite in a sumte uh kham tawh a manphatna a kikim theithei dingin hanciam uhhi. Banghang hiam cih leh, kham tawh a kikim zawzaw sum pen sum manpha suak hi. Sum manpha zawzaw pen kuakua cih omlo, mikim in manphat bawl hi. Tua sum mah kizongzaw, kideihzaw tek hi. Tua ahih manin tua sum mah gam khat le khat kikal ah sumbawlna-in kizangzawpah hi. Tua in, a gam uh Sum tha ah a hat zawzaw vangliansak hi. Tua ahih manin gam tuamtuam in power nei cihna hi. kumpite in a sum uh kham tawh aman a kikim theithei dingin hanciam uhhi. Coupon Kilimzatna (Sum Gukna = Coupon) Kham mah manpha kisa hi. Kumpi ii seh, ngun le haakte pen sumin kizangh hi. Ahi zongin, khuazin mite in kham, ngun, haakte puakna haksa kisa hi. Tua bek thamlo, nasem mi khatpeuh tungah sum ap ding, khualzin mi khatpeuh tungtawnin sum khak ding pen muanhuailo thei hi. Tua panin sumbawlte in laidal tawh khat le khat kikal ah sumvai kigen, kamciam kipia-in mun khat le mun khat ah lai kigaal khak uhhi. Kumpite in sumdal a bawllai un, kham om zah tawh kikimlo ahih manin, tua sumdal in man neilo hi. Kumpite in sumdal a bawl uhhangin mipite in sang zolo uhhi. Mipte in kumpite umlo, muang zokhin taktaklo uh cihna hi. Ahi zongin, sumbawlte kikal ah khat le khat kimuanna tawh sum tangin laidal (coupon) pen lim zat semsem uhhi. Sumdal ii manphatna pen kham tungah kinga mah taleh, sumbawlna pen khat le khat kimuanna tungah kingazaw hi. 10 LT TUANG Voucher le Cheque Cihte Kipatna Sumbawlte in kumpi ii seh sum tangin amau ii bawltawm laidal (coupon) hong zatzat khit uh ciang, sum piakna (tuhun teh Cheque), sum piak ding kamciamna (tuhun teh Bond), sum batna (tuhun teh Credit) le sum tangin zat theih (tuhun teh Token) cih bangin tua laidalte a nam tuamtuamin hong khen uhhi. Pawlkhatte ah laidal zangloin savun, singpek cih bang danin sawtvei kimang dingte zangh uhhi. Hih bang ciangin tua laidalte, savunte, singpekte a manpha hilo aa, khat le khat kiup kimuanna, a pia nu, a pia pa ii kamciam muanhuaina ii manphatna hizaw hi. Na khatpeuh ahi zong, nasepna le sumbawlnate a manphasak pen a muanhuaina tungah tampi kinga hi. Token Kipatna Sumbawlte in a nasemte uh sum lensak nuamlo uhhi. Tua ahih manin token cih ngaihsutna hong piang hi. Van deihte in sumbawlte ii nasem vanzuakte tungah sum pialo aa van neipa tungah a kipiak ding ngaihsun uhhi. Tua panin van deihte in sumbawlpa tungah token lei masa uhhi. Tua token tawh sumbawlpa ii nasem vanzuakte tungah van kilei theisak hi. Tua hi leh a sum taktak pen sumbawlpa tungah tung aa, vanzuakte in nesim thei nawnlo uhhi. Sumbawlpa Sumbawlna hi taleh, nasepna khatpeuh ah sepzia, sepdan, kilamzia system a cih in tha hong dawn mahmah hi. System hoih leh nasepzia lemtangsak tuam mahmah hi. Lam khat pan gen lehang, business model hoih neih ding thupi hi. in a nasem vanzuakte tung pan van khot zah tokens te a ngahkik nawnkei zongin sum taktak pen ama khutsungah om khin ahih manin lungmuang hi. Tua tokens te pen van lei mite in sum tawh a khekkik nop vua leh, kikhekkik theisak ahih manin, van lei mite adingin zongh tua tokens te zat ding lem veve hi. Sum le Siatna, Hoihna Gam kumpite in ngun le haak pen sum dingin a zat kawmkawm mahun, kham hauh Sum hang veve; sum om leh ding hanciam uh aa, kham lei kawikawi, thuhoih piangzaw thei aa, omkei zong kawikawi uhhi. Gam khempeuh phial ah leh thusia piangzaw thei hi. kham om zah sangin kumpi ii sum om zah mah tamzaw den ahih manin a sumte uh kham zahin manpha thei ngeilo hi. Mimal sumbawl bek hilo, kumpite zongh gam khat le khat kikal sumbawl uhhi. Mimalin hi taleh, gamin hi taleh sumbawlna ah a sumh om, a met om hi. A hauzaw, a zawngzaw om hi. Leiba nei om, leibat ngah ding om hi. 11 LT TUANG Gam khat le khat sumbawlna hong liat semsem ciang, a kham neih zah uh a sum om zah tawh kikim ding kideih semsem hi. Tua hileh, a sum uh muanhuai semsem aa, mikim gamkimin zangh semsem ding hi. Tua panin gam pawlkhatte kham tampi deihna tawh kham a pianna gamte ah gal va do maita uhhi. Gam pawlkhatte leuleu ciang, sumbatte lohkik nuamlo aa, a batte uh va leh do maita uhhi. Gam pawlkhatte leuleu ciang, sum kisapna hangin a zawh ngap peuhpeuh uh gal va do ta hi. Hih galdona in gam tampi, mi tampi zawngsak aa, gal zote hausak hi. Mimal in zongh sum kisap ciang sumsut, vansut, guta buluh kisuak thei hi. Sum tawh na hoih tampi a kisep theih mah bangin siatna tampi zongh piangsak thei hi. Ahi zongin sum hang veve; sum om leh thuhoih piangzaw thei aa, omkei leh thusia piangzaw thei hi. Sum neilo khat bangzah ta-in, a thumaan nop hang’ leibat loh zokei leh, thumaanlo, zuaukhem a tang ding hiziau hi. Sum neite itna, veina a nei, mi a hehpih, a khual, midik, thumaan, kamciam pelhlo, mihoih suah ding baihzaw hi. Gilo nuam le uh zongh gitloh ding baihzaw thei lai veve hi. Khenpi (4) Banks Khempeuh Kumpi In A Letna Sum khanggui hong kikhelsuksuk khitciang, gamkim, minamkim phial ah, sumdal dinmun, sumdal zat hun hong tungta hi. Ahi zongin, gam kumpite in tua sumdalte pen kham (gold) tawh kikim sak zo maw, kikim sak zolo cih tungtawnin gam khat le khat ii sumdal manphatnate kikimlo hi. Gam kumpi in kham tam a neih semsem aa leh, a sumdal un man nei semsem hi. A sumdal phazah le a kham om zah a kikim leh, kham khat teh sumdal khat kikim ding ahi hi. Tua ahih manin sumbawl kham haute in kham a kepsak uh, khamkemte pen kumpi tawh kipawlin, khamkepna khempeuh le kumpi kizom hi. Kham om khempeuh pen kumpi theihpihna suak aa, kham tampitak a om hong suak hi. Tua in, a gam uh ii sumdal man khangsak hi. Tua khamkemte pen bank suak aa, kumpi in a control nadingin central bank ci-in, banks khempeuh ii phungpi khat phut hi. Tuhun ciang, central bank in kham tuam kep, tuam neih ta hi. Tua central bank panin bank khat peuhpeuh pen direct in ahi zong, indirect in ahi zong, atawm atam control hi. Gtn. Gamdang sung khekna (tua tungtawnin sumkhek man control), summet laak zah ciangtanna, cbd. Tua banks te le kumpite ii theihpihloh kham (gold) zongh tampi om hi. Kham zuakte in kumpi theihpihna tawh a zuak/lei nading un thupia hi. Tua panin kham zongh vankham danin khualzin mi sumbawl tampite in pua uh, zuak uh, lei uhhi. Na khatpeuhpeuh pen kumpi in a kham leh, vankham a suak hilel hi. Van hoih, mi lungnop nading van manpha, van etlawm khat zongh kumpi in a kham leh, mat thuak theihna vankham hong suak hi. Van hoihlo, mite siat nading khat zongh, kumpi in a khamkei leh (ahk) ciangtanna tawh phalna a piak leh, tua van pen vankham hilo ziau hi. Tua ahih manin thukham/thukhun bawlte le thukhun a len thuneite in amau mimal hamphat nadingin thukunte lehzat nuam baih mahmah hi. A lehzat theih nadingun thukhun khel nuam thei lai uhhi. 12 LT TUANG Sumdal ii Manphatna Gam pawlkhat pen a gam leitang uh pan kham (gold) pianglo hi. Sumbawlna tuamtuam tawh kham a tam theithei a ngah nadingun lampi tuamtuam zong uhhi. Atawpna ah paulap tuamtuam tawh gamdangte va doin mi gam pan aa piang leisung sumpiangte va laaksak uhhi. Kham (gold) lian bek ahilo, suang manpha nam tuamtuam le namgimtui dongin laaksak uhhi. Sumdal ii manphatna pen kham tung bekah a kingak ciang, sumdal pen deih zahzah kibawl beh ngamlo hi. Sumdal manphatna kep nadingin kham (gold) om zah tawh a kikim theithei ding zah bek sumdal kibawlkhia nuamzaw hi. Sumdal bawl ding a baih hangin kibawlkhia mengmeng ngamlo hi. Kham om zah kibehlaplopi-in sumdal a kibawl beh ciang, kham tawh sumdal phazah kihal semsem aa sumdal man kiam semsem hi. Lam khat leuleu pan, sumdal a kibawl behloh ciang, milip lah tam semsem ahih manin, sumdal le milip phazah hong kileekkimlo zel hi. Mi tamin sumdal a tawm ciang, sum hong haksa semsem hi. Tua panin a zawngte zawng semsem aa, a haute bek haucip suak pian hi. Tua ahih manin kham a kibehlaploh hang’ sumdal bawl beh ding hoih kisa hi. Kham kibehlaplopi-in sumdal bawl lah, tua sumdalte in man nei tuanlo zel ding hi. Tua panin, sumdal ii manphatna pen kham bek tawh teh nawnloin ngun, haak cih bangte tawh kitehto ta hi. Tua kawmkawmin leitung khantohna tawh kizui aa sumbawlna ah a kilim zat mahmah le, ngun le kham sang zongh kimanna a neizaw pen namgimtui hong suak hi. Gamsung gampua sumbawlna ah namgimtui man tungtawnin khualzinman, van puakman, vanman cihte hong kikhel hi. Namgimtui a tawm leh, ngah ding haksa ahih manin a man khang hi. Namgimtui man a khan leh, adang khualzinman, van puakman, vanman cihte zongh hong khangpah hi. Tua ahih manin theihloh kaalin sum, van, nisim nuntakna pen namgimtui tungah hong kinga hi. Sumdal ii manphatna pen kham, suang manpha tuamtuamte bek thamlo ama thu-in namgimtui tungah zongh atawm atam hong kinga ta hi. Kimanna nei na khatpeuh, mi khatpeuh ahih naak leh, a man khang hi. Mite in kisam hi. Nasepna ah kideih hi. Ama adingin mun om hi. Ama tungah a kinga tampi hong om hi. Mi ading kimanna a pia, a sem nasep ahih naak leh, sumbawlna ahihloh hang, hun khat ciang hamphatna piang veve hi. Sumdal A Kip Paisuakna le A Kizelhna Sumdal ii manphatna pen kham tung bekah hong kingak nawnloh ciang sumdal tampi kibawlkhia beh hi. Kham le suang manpha tuamtuamte bek thamlo, namgimtui aa kipan kumpite ii sumbawl siamna le van manpha tuamtuam neihna tawh sumdal ii manphatna hong kitehto hi. Gtn. Van hoihnono bawlin, amau sumdal bek tawh kilei theisak hi. Tua a van hoihte i lei nop leh, a sumdal uh khek masak kul hi. A sumdal pen a khek a tam leh, sumdal a kideih, a kisam tam cihna hi aa, sumkhek man kahpah hi. Tua bang dan tawh sum manphatna pen hong kikhelkhel hi. Kham om zah a kilaihloh hang’ sum bawl siam le siamlohna tungtawnin sum man pen kiam zel kah zel hi. 13 LT TUANG Sumdal ii manphatna pen kham tung bekah hong kingak nawnloh ciang sumdal tampi kibawlkhia beh ahih manin sumdal pen gambup ading bek thamlo, gamdang aa mi dang tading zongh hong kicing hi. Sumdal tampi a kibehlap hangin kumpi hoih/pil/siamte in sumbawl siamna tawh tua sum ii manphatna pen kem zo, a manpha dingin bawl zo lai veve uhhi. Tua panin sumdal a kicin mahmah teh leitung gam tampite in tua sum pen gam khat le khat kikal aa zat ding sumtaang bangin hong nei uhhi. Sumdal tampi bawl aa sumbawl a siamlo kumpite ii sum bel kuaman zatpih tuanlo aa, a gam sung vuah zongh man neilo hi. Na khatpeuh ii manphatna pen a pianpih manphatna a om mah bangin, pilna siamna tawh a kibawltawm, a manphatna a kilamsangtawm thei zongh om hi. A omsa khat, a om bangbang, ahihna bangbangin koihcip sangin ngaihsut siamna tawh kikhelna piangsak theih ding, khantohsak theih ding hoihzaw hi. Sum Tungah Thuneihna Sumbawl siamna tungtawnin sum man khang zel kiam zel thei ahih manin, banks khempeuh a control, kham tampi a kemkem thunei kumpite bek in sum tungah thu nei zo nawnlo uhhi. Sumbawl siam kipawlna/company tampite tungah sumdal kisapna le kisaplohna pen atawm atam hong kinga ahih manin, sumbawl siam kipawlnate tungah sumkhek kah ding le kiam ding atawm atam hong kinga ta hi. Namgimtui zuak company te pen pawlkhat in khat khit khat baan leilei uh aa namgimtui zuak pen amau bek hong suak hi. Atawpna ah namgimtui man pen amau a khansak leh, gambup ah namgimtui man hong khang suak hi. Namgimtui man khang leh, khualzinman, van puakmante khang aa vanman zongh hong khangpah hi. Vanman le sumdal manphatna cihte pen namgimtui tungah tampi kinga ahih manin namgimtui company neite tungah mipite ii khualzinman, van puakman le vanmante hong kinga hi. Kumpite tungah tua zahpi-in hong kinga nawnlo hi. Tua ahih manin gam khatpeuh ah sumkhekman le vanman, mipite ii nisim khualzinna le khuasaknate a control nuam diakte in namgimtui nasep pen sem hamtangzawpian uhhi. Tua panin kumpite in tua bang namgimtui company te pen phelkhapin a nei tampi a phak nading vaihawm uhhi. Sumbawlna nam khat pen kipawlna/company khat bek ii let ding deihlo uhhi. A sem tampi om aa, kidem ding vaihawm uhhi. Tua aa kipan democracy a zangh a suakta gamte nangawn ah, nasep nam khat pen company khat bek ii sep ding kikham hi. Company khat le khat kidem leh khantohna piangzawin mipite kihamphazaw hi. Company khatpeuh hong liatluat leh, kumpi in satkhap ding mah hoihsazaw ta uhhi. Company liante in a neute deep baih pahpah ahih manin, deep thuak ding veve ci aa, tua a nasepnate uh company liante in a deih naak leh zuak pahpah uhhi. Tua bang tawh nasepna nam khat pen company khat bek in luah thei lai veve hi. Tua ahih manin sumbawlna ah khat le khat oltakin kideep theihloh nading thukhun hoihte kumpi in bawl hi. Thukhun om bangin khat le khat kidem ding hoih kisa hi. Mikim in suahtakna le hamphatna kikimin ngah theih nading, sum tha tawh khat le khat kideep theihloh nading, sum neilo tading zongh hanciam theih nading thukhun hoih kisam hi. 14 LT TUANG Khenpi (5) Gam Khatlekhat Sumdal Man Tawh Kidemzia Sumkhek man a tam khempeuh gam hoih, gam khangto cihna hipah tuanlo aa, sumkhek man a tawm leh zongh gam hoihlo, gam khangtolo, kumpite a siamlo cihna zongh hipah tuanlo hi. Zopsuak lai ding hi…. Korea, Japan te sumkhek man sanglo napi, a gam uh khangto hi. Kuwaiti sum, Bahraini sum cihte pen US, UK, EU sumte sang’ sangzaw napi kizatpih mello hi. Hih thu ah thulu neuneu pawlkhat om ding hi. Sumdal Tungah Muanna Hong Bei Hih nuai ah thulu neuneu pawlkhat om ding hi. Khenpi (6) Digital Sum Hong Kizangh Hih nuai ah thulu neuneu pawlkhat om ding hi. (Sum Sagihna hong hi diam?) Khenpi (7) Crypto Sum Hong Kipan Hih nuai ah thulu neuneu pawlkhat om ding hi. (Sum Giatna hong hi diam?) Hih tan dong nong simsak tangtang, lungdam mahmah hi. Topa Thupha LTTuang 15 LT TUANG