黄梅雨

黄梅雨（上海闲话：⁶waon-me-yu）指春夏之交冷热空气交锋形成个锋面雨，即每年5月至6月之间华中地区、台湾、日本中南部搭韩国南部埃眼户荡持续阴势天搭仔有雨个气候现象。等黄梅天过脱，箇眼场化两样生个天气开始由太平洋副热带高压主导，正式进入热天。

梅雨发生辰光齐巧是中国江南梅子个成熟期，个咾讴“黄梅雨”。外加因得仔长期落雨，导致衣裳、食品咾啥易如发霉，梅雨貤讴“霉雨”。必过，世界浪向同纬度个别样地方呒没梅雨，华南、华北地区虽则位勒梅雨锋面带，但必过黄梅天呒没明显个梅雨现象。

成因

每年大约模张5月上旬，北方来个冷空气搭从南方北上个暖空气勒华南地区汇合，形成脱华南准静止锋。大约模张到著6月中旬，暖空气势力增强，准静止锋北移至江南、江淮地区，成江淮准静止锋（貤讴梅雨锋）。7月上旬，准静止锋再北移至日本、韩国一带。因得仔南来个暖空气夹带大量水汽，碰着较冷气团，就会产生大量对流活动。箇段辰光冷暖空气势力差勿多，以致形成滞留锋面停留拉上述埃眼户荡。

规律

梅雨开始个日脚讴“入梅”或“立梅”，结束箇日讴“出梅”或“断梅”。大致上纬度越高，入梅越晏。台湾大约模张5月中旬入梅，6月中旬出梅。长江中下游地区，平均每年6月中旬入梅，7月中旬出梅。日本本土大约模张6月上旬入梅，7月中下旬出梅。

夏历算法

入梅：在芒种起头一只丙日；出梅：在小暑起头一只未日。

入 梅	规定入梅日	芒种日脚	芒种后头一只丙日
	芒种当天为丙日	1882年6月6日（丙子）	1882年6月16日（丙戌）
	芒种后头一只丙日	2016年6月5日	2016年6月13日（丙寅）
出 梅	规定出梅日	小暑日脚	小暑后头一只未日
	小暑当天为未日	2001年7月7日（辛未）	2001年7月19日
	小暑后头一只未日	2016年7月7日	2016年7月12日（乙未）

气象算法

入梅日：前头五日天，副高来拉东经120°度个脊线≥北纬18°，外加至少有得三天日均气温高于22摄氏度；后头五日天，必须有得四天落雨。