Tavd (lidn)

Tavd
Тавда

Lidnanznam	Flag
Valdkund	Venäma
Eläjiden lugu (2023)	32,272 ristitud
Pind	148 km²
Pämez'	Valentin Mironov (eloku 2021—)
Telefonkod	+7−34 360-xx-xxx
Avtokod	66, 96, 196
Aigvö	UTC+5 (MSK+2)

Tavd (ven.: Тавда́) om Venäman lidn Sverdlovskan agjan päivnouzmas. Se om Tavdan lidnümbrikon administrativine keskuz, agjan kaikiš päivnouzmaižemb lidn.

Istorii

Mansilaižed oma igähine rahvaz lidnümbrikon tahondal, tāğl, tāgt znamoičeb «täuz'» heiden kelel i libub amuižen ezikelen «*täwde»-sanantüvespäi. Ezmäižen eländpunktan aluz lidnan territorijal oli pandud Karatunk-jogensunno 1870-nzil vozil kuti Karatunk-külä (ven.: Каратунка, nügüd' üks' irdoišpäi) vatefabrikanno. Tavd-žilo sündui vl 1910 varatoitamha Transsiban sauvondad puižil špaloil, nimitihe jogen mödhe. Saudihe Tavd-raudtestancijad vl 1916. Žilo sai lidnan statusad vn 1937 20. päiväl heinkud. Vodele 1969 jätktihe raudted lidnaspäi Jugraha mecad varhapanemha.

Tavd šingotase mectegimel (pertiden sauvond), meckombinatal (pilindmaterialad i tehnologine pärzak), faneran kombinatal i leibäntegimel. Ende mehanine tegim (mecavtotehnik), gidrolizan tegim, suks'fabrik, kaks' raudtedepod i maidtegim radoiba.

Vn 1992 lidnanznam

Geografijan andmused

Lidn sijadase Tavd-laivjogen oiktal randal (Tobolan hura ližajogi, Obin hurapol'ne bassein), 70 m ü.m.t. keskmäižel korktusel.

Matkad Jekaterinburghasai om 310 km suvipäivlaskmha orhal, 358 km avtotedme vai üks'teižedme raudtedme. Lendimport om lidnan pohjoižes, se ei ole rados passažiroiden täht. Lähembaižed lidnad oma Tümen' (Tümenin agj) 100 km suvhe orhal vai 128 km avtotedme i Turinsk 93 km päivlaskmha orhal, 105 km avtotedme vai raudtel.

Kaik om 260 irdad lidnas, kaks' torgud oma saudud: Keskuzline i Vägestusen.

Tobmuz

Lidnümbrikon tobmuden pämez' om sen Administracijan pämez'. Edeline lidnümbrikon pämez' om Viktor Lačimov (tal'vku 2010 — semendku 2021). Lidnümbrikon Duman ezimez' om Dmitrii Nohrin vn 2017 sulakuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 35 421 ristitud, lidnümbrikon nell' videndest, vn 2021 — 32 749 ristitud. Kaik 33 666 eläjad oli lidnas vl 2017. Kaikiš suremb lidnan ristitišt oli 49 tuhad eläjid vl 1967.

Rahvahad (ozutadud rahvahudenke vl 2010): venälaižed — 95,6 %, totarlaižed — 1,0 %, toižed rahvahad — 3,4 %.

Ortodoksižen hristanuskondan ph. Mikulai-čudonsädajan puine jumalanpert' om saudud lidnas vll 2004−2014.

Lapsiden opendusen aluzkundad oma koumetoštkümne päivkodid (nomer 1..6, 11,..14, 18, 22, 25), kaks' aluzškolad (nomer 8, 14), kuz' keskškolad (1, 2, 7, 9, 11, 18), specialine korrekcine VIII toižendan škol, sädamižšingotesen i gumanitarižen opendusen «Garmonija»-keskuz, muzikškol, čomamahtoiden škol, lapsiden da norišton sportškol. Tavdan tehnikum Agei Jelohinan nimed om lidnan professionaližen opendusen aluzkundaks.

Irdkosketused

• Lidnümbrikon Duman oficialine sait (duma-tavda.ru). (ven.)
• Lidnümbrikon Administracijan oficialine sait (adm-tavda.ru). (ven.)