Novočerkassk

Novočerkassk
Новочеркасск

Lidnanznam	Flag
Valdkund	Venäma
Eläjiden lugu (2021)	163,674 ristitud
Pind	134,12 km²
Pämez'	Jurii Lisenko (uhoku 2020—, Юрий Лысенко)
Telefonkod	+7−8635-xxx-xxx
Avtokod	61, 161
Aigvö	UTC+3 (MSK+0)

Novočerkassk (ven.: Новочерка́сск) om Venäman lidn da lidnümbrik Rostovan agjan päivlaskmas. Se om Rostovan Donal pohjoine ezilidn, agjan nellänz'-videnz' lidn eläjiden lugun mödhe.

Istorii

Eländpunktan aluz om pandud ülüdel kaičemha tahod kebnas vl 1805 semendkun 18. (30.) päiväl kuti Donan sodavägiden man (agj vspäi 1870) Uz' Čerkassk-pälidn (ven.: Новый Черкасск). Edeline agjan pälidn oli Čerkassk (nüg. Staročerkasskai-stanic Aksai-lidnanno) Donan randal, i se alištui sur'vezile joga vodel. Raudte läbiti lidnad vl 1864. Novočerkassk oli okkupiruidud nacistoil (25.07.1942 — 13.02.1943). Oli Novočerkasskan rajonan (1944−1963) administrativižeks keskuseks. Tedotihe Novočerkasskad kozakišton mail'man pälidnaks ühtenzoittud suiman aigan Moskvas vn 1993 heinkus.

Novočerkassk šingotase elektrovedimiden tegimel, Novočerkasskan GRES:al, raudmetallurgijan tegesiden pästandal (elektrodad, magnitad), aviamašiništon tegimel, lämuzmašiništon edheotandal, sömtegimištol (lihakombinat, oludtegim), koumel omblendedheotandal (naižsobad, specialižed sobad), mugažo 20 tedoinstitutad ratas lidnas.

Geografijan andmused

Lidn sijadase Aksai-jogen (Donan oiged ližajogi) i sen Tuzlov-ližajogen randoil, 101 m ü.m.t. keskmäižel korktusel. Matkad Rostovan Donal röunhasai om 20 km suvipäivlaskmha orhal, 25 km avtotel vai raudtel, keskushesai — 37 km orhal vai 42 km avtotel. Toižed lähembaižed lidnad oma Šahti 22 km pohjoižhe orhal, 27 km avtotedme vai raudtedme, i Aksai 24 km suvipäivlaskmha-suvhe orhal, 26 km avtotedme vai raudtedme.

Kaik koume raudtestancijad ratas lidnas, suvespäi pohjoižhe: Novočerkassk, Hotunok, Lokomotivstroi. «Don»-avtote (M4) ümbärdab lidnad päivlaskmaspäi, vižkilometrine sarak tuleb lidnha sišpäi.

Tobmuz

Novočerkassk om lidnümbrikon üks'jäižeks eländpunktaks. Röunatab Aksain rajonanke suves i päivlaskmas, Oktäbrin rajonanke pohjoižes i päivnouzmas.

Lidnümbrikon tobmuden pämez' om sen Administracijan pämez' (mer). Edeline lidnan Administracijan pämez' om Igor' Züzin (tal'vku 2017 — tal'vku 2019).

Eläjad

Vl 1939 lidnan ristitišt oli 81 tuhad eläjid. Vn 2010 Venäman rahvahanlugemižen mödhe lidnan eläjiden lugu oli 168 746 ristitud, vn 2021 — 163 674 ristitud. Kaik 168 766 eläjad oli lidnas vl 2017. Kaikiš suremb lidnan ristitišt oli 185..189 tuhad eläjid vll 1985−1999 (189 tuh. rist. vozil 1991 i 1994).

Rahvahad (2010): venälaižed — 93,8 %, ukrainalaižed — 1,7 %, armenijalaižed — 1,6 %, toižed rahvahad — 2,9 %.

Ortodoksižen hristanuskondan kaks'kümne kahesa pühäpertid oma kaičenus i saudud lidnas: Sündun Voznesenjan kafedraline päjumalanpert', üks'toštkümne jumalanpertid, 11 kodijumalanpertid i viž časounäd. Niiden ližaks seičeme jumalanpertid i koume časounäd ei ole kaičenus.

Professionaližen keskopendusen aluzkundad oma seičeme kolledžad, sidä kesken Novočerkasskan tegimištoližtehnologijoiden da ohjandusen kolledž, tehnikum-internat, Suvorovan škol i kadetkorpus. Üläopendusen aluzkundoiden kaks' filialad ratas lidnas.

Galerei

• 
  Sündun Voznesenjan kafedraline päjumalanpert' sodavägiden täht, vn 2011 nägu
• 
  Novočerkasskan GRES vl 2007
• 
  Novočerkasskan elektrodtegim vl 2007
• 
  Kozakišton teatr (2007)
• 
  Avtovagzal vl 2011
• 
  Novočerkassk-stancii vl 2007

Irdkosketused

• Novočerkasskan-lidnan Duman oficialine sait (nduma.ru). (ven.)
• Novočerkasskan Administracijan oficialine sait (novochgrad.donland.ru) i sen vanh versii (novochgrad.ru, om täuttud vn 2024 elokuhusai). (ven.)