Lourensii

Lourensii

103	3 8 32 32 18 8 2
Lr 262,11
Lourensii

Lourensii (Lr — lawrencium latinan kelel) om 103nz' himine element himižiden elementoiden periodižes tabludes, aktinoidoiden gruppaspäi (koumanz' grupp, seičemenz' period), vanhtunuden klassifikacijan mödhe sijazihe koumanden gruppan laptalagruppas (IIIB).

Ühthine ümbrikirjutand

Ei ole lourensijad londuses. Se om ratud element. Nevondkundaline Georgii Flörov-fizikantedomez' kollegidenke avaižiba lourensijan Dubn-lidnas vll 1961−1965, i mugažo tedomehiden amerikaine grupp ripmata heišpäi Nacionaližes laboratorijas Lourensan nimed (Berkli) vn 1961 uhokus.

Element om nimitadud Ernest Lourens-fizikantedomehen muštoks, hän tegi melel ciklotronad samha uzid elementoid da henegid.

Fizižed ičendad

Lourensii om radioaktivine metall. Kristalline segluz om geksagonaline kinged (endustuz).

Atommass — 262,11. Ninevuz (normaližiš arvoimižiš) — 15,6..16,6 g/sm³ (lugustusen mödhe). Suladandlämuz — 1900 K (1627 C°, ezimeletaden).

Vodele 2024 kaik om 14 avaitud izotopad 251...262, 264 da 266 atommassanke, i üks' izomär (253m, T_½=1,5 sekundad). Kaikiš hätkemban eläjan lourensii-266-izotopan pol'čihodamižen pord om 11 časud, ²⁶⁴Lr-izotop om kahtenz' hätkte (T_½=3 časud) i ²⁶²Lr om koumanz' (216 minutad). Izotopad 251, 264 i 266 hajetas südäitukun spontanižen jagamižen kal't täuzin, izotopad 252..257, 259 i 260 nomeranke — α-, β-čihodamižen i südäitukun spontanižen jagamižen kal't, izotopad 258 i 262 — α- i β-čihodamižen kal't, lourensii-261 — südäitukun spontanižen jagamižen kal't i erasti α-čihodamižen kal't. Izotopad 251, 264 i 266 kändasoiš erazvuiččikš elementoikš täuzin, izotopad 252..257, 259 i 260 — mendelevijaks, nobelijaks da erazvuiččikš elementoikš, izotopad 258 i 262 — mendelevijaks i nobelijaks, lourensii-261 — erazvuiččikš elementoikš i harvoin mendelevijaks.

Himižed ičendad

Lourensii om päličmänendmetall. Elementan muigotandmär om +3 ühtnendoiš.

Kävutand

Sadas elementad henegiden pigustimil — aktinoidoiden bombardiruindal kebnoil ionil, mugažo dubnijan pol'čihodamižen rezul'tataks.

Lourensii-260-izotop (pol'čihodamižen pord om 2,7 minutad) kävutase himijas paksumb, sikš miše om kebnemb sada sidä znamasižes verdas berklijan i hapanikan ühtištusel.

Irdkosketused

• Lourensii webelements.com-saital. (angl.)
• Kirjutuz lourensijas Himižiden elementoiden populärižes n-t.ru-kirjištos. (venäkelel)