Buhar

Buhar
Buxoro

Valdkund	Uzbekistan
Eläjiden lugu (2014)	272,500 ristitud
Pind	39,4 km²
Pämez'	Uktam Barnoev (tal'vku 2016—)
Telefonkod	+998−65
Aigvö	UTC+5

Buhar (uzb.: Buxoro [bʊχɒˈɾɒ], tadž.: Бухоро, pers.: بخارا Boxârâ [boχɒːˈɾɒː], ven.: Бухара [bʊxɐˈra]) om Uzbekistanan lidn valdkundan keskuzpalan päivlaskmas. Se om Buharan agjan administrativine keskuz.

Istorii

Eländpunktan aluz om pandud 6. voz'sadal EME. Läz 140 sauvust da monumentad om kaičenus lidnas amussai, istorine keskuz mülüb UNESCO:n Mail'man jäl'gusen nimikirjuteshe.

Buhar šingotase edheotandoil sijaližel torhudel: londuseližen gazan i kivivoin ümbriradmižel, tekstil'tegimištol (puvillan ümbriradmine i pövuiden tehmine karakulišpäi), sauvondmaterialiden pästandal (mramor, savič), sömtegimištol (liha, jauh, vin), mugažo kengiden tegimel, rahvahan pramozloiden produkcijal i turizmal. Puvillan eksperimentaline kazvatuz tegese lidnas.

Geografijan andmused

Lidnan sijaduz agjas i valdkundas vn 2015 kartal

Lidn sijadase 225 metrad keskmäižel korktusel valdmeren pindan päl. Zeravšan-jogi Buharan keskuzkollektoraks (lankteb Karakulän oazisha i kadotab letetazangištos) ümbärdab lidnad lodehližes polespäi, sen Šahrud-kanal läbitab lidnan keskust.

Lähembaine järed lidn om Navoi sadas kilometras päivnouzmha raudtedme, Navoin agj zavodiše ani pohjoižpäivnouzmha Buharaspäi.

Klimat om kontinentaline kuiv. Keza om räk lujas, tal'v om pehmed. Voden keskmäine lämuz om +15,8 C°, kezakun-elokun +27,6..+29,8 C°, tal'vkun-uhokun +1,8..+4,1 C°. Ekstremumad oma −23,5 C° (viluku) i +46,2 C° (kezaku, heinku). Ei voi panda halad semendkus-sügüz'kus, sulakun minimum om 0 C°. Il'man lämuz voib ületada +34 C° keväz'kus-redukus. Paneb sadegid 132 mm vodes, enamba uhokus-sulakus (22..25 mm kus), kuiv sezon oleskeleb kezakus-redukus (6 mm pordos). Paneb lunt kümne päiväd tal'ves keskmäras. Kun keskmäine relätivine nepsuz vajehtase 38..48 % röunoiš semendkus-sügüz'kus, 72..80 % tal'vkus-keväz'kus.

Eläjad

Vl 2005 lidnan eläjiden lugu oli 247 661 ristitud. Kaikiš suremb lidnan ristitišt om nügüd'.

Sijaline rahvaz om erazvuitte etnižen augotižlibundan mödhe.

Transport

Avtobusad oma kundaližeks transportaks.

Rahvahidenkeskeine civiline lendimport (BHK) sijadase lidnan päivnouzmas. Tehtas reisid Moskvha, Piterihe, Dušanbehe, mugažo Taškentannoks.

Irdkosketused

• Lidnan tobmuden sait (buxoro.uz). (uzb.)